Heiðin

Mikilvægt vitni gaf sig fram við lögregluna á Ísafirði fljótlega eftir að leit af þeim Hafsteini og Jóni Gísla hófst. Þó má segja að sannleikurinn um ferð vinanna hafi ekki komið fram opinberlega fyrr en núna, þrjátíu árum síðar. Vitnisburðurinn var lauslega skráður í skýrslur lögreglunnar en ekki var haft samband við vitnið um mikilvæg atriði sem það gat varpað ljósi á og snertu tilgang farar þeirra Hafsteins og Jóns Gísla, og heimförina sem bar brátt að.

Tugir sentimetra af jafnföllnum snjó höfðu bæst á Steingrímsfjarðarheiði sem gerðu björgunarsveitum og lögreglu erfitt fyrir við leit. Beita þurfti sömu aðferðum og í snjóflóðaleit. Á meðan hófu sögusagnir um hvarfið að grassera á meðal fjölskyldu og vina í Reykjavík en fá svör fengust við þeim spurningum sem uppi voru um hvarfið, tildrög ferðalagsins og hvað hefði farið úrskeiðis.

Þann 8. mars árið 1991 lögðu vinirnir Hafsteinn Hálfdánarson og Jón Gísli Sigurðsson akandi af stað úr Reykjavík til Ísafjarðar. Þeir höfðu sagt sínum nánustu að á Ísafirði hyggðust þeir dvelja í tvo daga en aðeins nokkrum klukkustundum eftir að þeir voru komnir vestur hálffylltu þeir bensínbrúsa, skelltu honum í bílinn sinn og óku aftur af stað til Reykjavíkur með áætlanir um að vera komnir til höfuðborgarinnar undir morgunn. Það reyndist þeirra síðasta ferð. Viku síðar hófst leit að piltunum tveimur en ekkert hafði til þeirra spurst og fjölskyldan var tekin að ókyrrast.

Þessi þáttur er kynningarþáttur fyrir Heiðina, nýtt þriggja þátta hlaðvarp sem hefst hjá RÚV 8. mars næstkomandi. Í Heiðinni er fjallað um hvarf þeirra Jóns Gísla Sigurðssonar og Hafsteins Hálfdánarsonar, en þeir lögðu af stað til Ísafjarðar þann 8. mars fyrir 30 árum síðan, og sáust aldrei aftur.