Hello VOA មានផ្សាយពីរដងក្នុងមួយសប្តាហ៍គឺថ្ងៃច័ន្ទ និងថ្ងៃព្រហស្បតិ៍វេលាម៉ោង៨:៥០យប់ ហើយមានរយៈពេល៣០នាទី។ សូមប្រិយមិត្តទូរស័ព្ទផ្ទាល់មកលេខ (៨៥៥) ១២ ៥១ ៥១ ៩៤ នៅទីក្រុងភ្នំពេញប្រទេសកម្ពុជា។
លោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ច ក្រៅប្រព័ន្ធ ឬហៅកាត់ ថាIDEA ថ្លែងថាអ្នកធ្វើការក្នុងសេដ្ឋកិច្ចក្រៅប្រព័ន្ធរងការបំពានសិទ្ធិធ្ងន់ធ្ងរជាងគេ ខណៈពួកគេ មិនមានសហជីពតំណាង ហើយមិនមាន សិទ្ធិគ្រប់គ្រង ក្នុងការចរចា ជាមួយអាជ្ញាធររដ្ឋ។ លោកក៏ ជំរុញ ឲ្យរដ្ឋាភិបាល កំណត់ប្រាក់ឈ្នួល អប្បបរមា សម្រាប់អ្នកធ្វើការ ក្នុងសេដ្ឋកិច្ច ក្រៅប្រព័ន្ធ ផងដែរ។ (លោកស៊ុន ណារិន, Hello VOA, ភ្នំពេញ ៨ ឧសភា ២០២៤)
ស្របពេលដែលកម្ពុជាកំពុងរងការកើនឡើងកម្តៅជាបន្តបន្ទាប់ចាប់តាំងពីខែមីនាមក កម្មករកម្មការិនីដែលធ្វើការតាមរោងចក្រកាត់ដេរមួយចំនួនបានត្អូញត្អែរពីផលលំបាកក្នុងការធ្វើការងារ ដោយសារសីតុណ្ហភាពក្នុងរោងចក្រក្តៅខ្លាំង។ ក្រសួងការងារកាលពីដើមខែមេសាបានចេញសេចក្តីណែនាំឱ្យតាមបណ្តារោងចក្រអនុវត្តវិធានការផ្សេងៗដើម្បីកាត់បន្ថយកម្តៅ។ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងថា ដើម្បីឱ្យវិធានការកាត់បន្ថយកម្តៅមានប្រសិទ្ធភាព លុះត្រាតែរដ្ឋាភិបាលអនុវត្តច្បាប់ដោយម៉ឺងម៉ាត់ក្នុងពេលចុះធ្វើអធិការកិច្ចតាមរោងចក្រនីមួយៗ៕ (កាន់ វិច្ឆិកា, ភ្នំពេញ, ២៥ មេសា ២០២៤)
ក្នុងពេលដែលកម្ពុជាមានទំនាក់ទំនងល្អជាមួយប្រទេសចិន ក្រុមហ៊ុនចិនបានវិនិយោគលើគម្រោងហេដ្ឋារចនាសម្ព័ន្ធធំៗមួយចំនួន ក្នុងនោះមានគម្រោងព្រែកជីកភ្ជាប់ទន្លេមេគង្គទៅសមុទ្រក្នុងខេត្តកែប តម្លៃប្រមាណ ១.៧០០លានដុល្លារអាមេរិក ផ្លូវល្បឿនលឿនភ្នំពេញ-ក្រុងព្រះសីហនុដែលកំពុងដំណើរការ និងផ្លូវល្បឿនលឿនភ្នំពេញ-ក្រុងបាវិត ដែលកំពុងសាងសង់។ គម្រោងទាំងអស់នេះជាការវិនិយោគតាមទម្រង់ BOT (Build Operate and Transfer) ឬហៅថា សាងសង់ ប្រតិបត្តិការ និងផ្ទេរ។ លោក រ៉ឹម សុខវី អ្នកស្រាវជ្រាវទំនាក់ទំនងកម្ពុជានិងចិន ថ្លែងថា ការវិនិយោគតាមទម្រង់ BOT ផ្តល់ផលប្រយោជន៍ច្រើនដល់កម្ពុជាដែលជាប្រទេសកំពុងអភិវឌ្ឍ ប៉ុន្តែលោកស្នើឲ្យពិនិត្យមើលថា តើក្រុមហ៊ុនឯកជនអាចនឹងគ្រប់គ្រងហេដ្ឋរចនាសម្ព័ន្ធធំៗក្នុងប្រទេសកម្ពុជាក្នុងកម្រិតណា ប្រសិនបើរដ្ឋាភិបាលជ្រើសរើសការវិនិយោគតាមទម្រង់ BOT នេះ៕ (ស៊ុន ណារិន, Hello VOA, ភ្នំពេញ, ១១ មេសា ២០២៤)
ក្នុងរយៈពេលប៉ុន្មានឆ្នាំចុងក្រោយនេះ បច្ចេកវិទ្យារ៉ូបូតចាប់ផ្តើមទទួលបានការចាប់អារម្មណ៍និងការប្រើប្រាស់នៅក្នុងប្រទេសកម្ពុជា ដោយគេឃើញមានការប្រើប្រាស់រ៉ូបូតសម្រាប់បម្រើការងារតាមផ្ទះ និងតាមគ្រឹះស្ថានឧស្សាហកម្មមួយចំនួនផងដែរ។ លោក អ៊ាន សុខណាង វិស្វករនៃក្រុមហ៊ុន AI FARM ROBOTICS លើកឡើងថា បច្ចេកវិទ្យារ៉ូបូតកំពុងបង្កើតឱកាសការងារដល់យុវជនកម្ពុជា ដែលចាប់យកជំនាញបច្ចេកវិទ្យាមួយនេះ ស្របពេលដែលវាដើរតួនាទីសំខាន់នៅក្នុងការសម្រួលដល់វិស័យសេដ្ឋកិច្ចក្នុងប្រទេសឱ្យកាន់តែរីកចម្រើន៕ (កាន់ វិច្ឆិកា, Hello VOA, ភ្នំពេញ, ០៨ មេសា ២០២៤)
ការជឿជាក់លើខ្លួនឯង មិនបោះបង់ចោលខ្លួនឯង ការមិនចុះចាញ់ បានជួយជំរុញឱ្យអ្នកស្រី សេង រាសី ទម្លុះឧបសគ្គជាច្រើនដែលអ្នកស្រីបានជួបប្រទះទាំងលើវិថីការងារនិងជីវិត។ ក្តីប្រាថ្នាលើកកម្ពស់សិទ្ធរបស់ស្រ្តីនៅក្នុងប្រទេសកម្ពុជា ដែលនៅមានកម្រិត បាននិងកំពុងជំរុញឱ្យអ្នកស្រីក្លាយជាអ្នកដឹកនាំមួយរូបដែលតស៊ូលើការងារសង្គមផ្នែកពង្រឹងសិទ្ធិនិងអំណាចរបស់ស្រ្តី ដោយមិនរារេ ទោះបីជាមានឧបសគ្គប្រឈមជាច្រើនយ៉ាងណាក៏ដោយ។ អ្នកស្រី សេង រាសី បានថ្លែងថា សូមកុំឱ្យស្រ្តីឬយុវតីកម្ពុជាយកកត្តាភេទរបស់ខ្លួនធ្វើជាឧបសគ្គ ហើយសូមយកសក្កានុពលរបស់ខ្លួនទៅកំណត់ទិសដៅនិងសុបិនរបស់ពួកគេ៕ (ធីតា វីន, Hello VOA, ភ្នំពេញ, ០១ មេសា ២០២៤)
ក្នុងចំណោមពលករកម្ពុជាជាង ១លាន ៣សែននាក់ ដែលកំពុងធ្វើចំណាកស្រុកមានឯកសារ មានស្រ្តីប្រមាណជា ៥០ភាគរយ។ ពលករទាំងនោះបានផ្ញើប្រាក់មកស្រុកកំណើតយ៉ាងហោចណាស់ជាង ៣ពាន់លានដុល្លារអាមេរិកក្នុងមួយឆ្នាំ។ នេះបើតាមរបាយការណ៍របស់ក្រសួងការងារនិងបណ្តុះបណ្តាលវិជ្ជាជីវៈ។ ទន្ទឹមនឹងកាធ្វើចំណាកស្រុកដោយមានឯកសារ ពលករប្រមាណជា ១លាននាក់ផ្សេងទៀតកំពុងធ្វើចំណាកស្រុកដោយមិនមានឯកសារ។ កញ្ញា ទ្រី សុភា មន្រ្តីផ្នែកទេសន្តប្រវេសន៍នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងថា ស្រ្តីជាពលករចំណាកស្រុកបាននិងកំពុងរួមចំណែកយ៉ាងសំខាន់ក្នុងសេដ្ឋកិច្ច និងសង្គមកម្ពុជា ក៏ប៉ុន្តែពួកគេនៅតែបន្តរងអំពើហិង្សា និងការរើសអើង៕ (កាន់ វិច្ឆិកា, Hello VOA, ភ្នំពេញ, ២៨ មីនា ឆ្នាំ២០២៤)
ចាប់តាំងពីបណ្តាញផ្សព្វផ្សាយសង្គមមានអ្នកប្រើប្រាស់ច្រើន និងកំពុងត្រូវបានប្រើប្រាស់ជាកន្លែងចែករំលែកទំនាក់ទំនង ធ្វើជំនួញ ផ្តល់ព័ត៌មានផ្សេងៗ គេឃើញអ្នកបង្កើតមាតិកាជាច្រើនក៏កំពុងប្រើប្រាស់បណ្តាញសង្គមដើម្បីរកចំណូល និងចែករំលែកជាចំណេះដឹងផងដែរ។ កញ្ញា ហម សុវណ្ណពិដោរ អ្នកបង្កើតមាតិកាអំពីការជំរុញស្រ្តី និងក្មេងស្រីឱ្យមានភាពជឿជាក់លើរូបរាងកាយរបស់ពួកគេ បានថ្លែងថា ប្រសិនបើសង្គមនៅតែបន្តកំណត់អំពីស្តង់ដានៃភាពស្រស់ស្អាត នោះនឹងអាចធ្វើឱ្យសង្គមបាត់បង់ធនធានមនុស្សដែលមានសមត្ថភាព។ កញ្ញាក៏បានលើកទឹកចិត្តឱ្យអ្នកប្រើប្រាស់បណ្តាញសង្គមចូលរួមលើកកម្ពស់ភាពជឿជាក់លើរូបរាងកាយរបស់គ្នាទៅវិញទៅមក៕ (កាន់ វិច្ឆិកា, Hello VOA, ភ្នំពេញ, ១១ មីនា ២០២៤)
រដ្ឋាភិបាលស៊ុយអែតបានប្រកាសបញ្ចប់កិច្ចសហប្រតិបត្តិការ ដែលពង្រឹងផ្នែកសិទ្ធិមនុស្ស ប្រជាធិបតេយ្យ និងនីតិរដ្ឋនៅក្នុងប្រទេសកម្ពុជា ត្រឹមឆ្នាំ ២០២៤ នេះ។ អង្គការសង្គមស៊ីវិលបានស្នើឱ្យរដ្ឋាភិបាលស៊ុយអែតពិចារណាឡើងវិញ ដោយមើលឃើញអំពីផលប៉ះពាល់ធ្ងន់ធ្ងរដល់អង្គការសង្គមស៊ីវិល និងការផ្តល់សេវាដែលមានសារៈសំខាន់សម្រាប់ប្រជាពលរដ្ឋកម្ពុជា។ លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាថ្លែងនៅក្នុងកម្មវិធី Hello VOA ថា ក្នុងរយៈពេលជាង៣០ឆ្នាំមកនេះ ប្រទេសស៊ុយអែតតាមរយៈទីភ្នាក់ងារស៊ីដាបានចូលរួមចំណែកយ៉ាងសំខាន់នៅក្នុងការជួយកម្ពុជាជាពិសេសលើផ្នែកអភិបាលកិច្ចល្អ ការដឹកនាំតាមបែបលទ្ធិប្រជាធិបតេយ្យ បញ្ហានីតិរដ្ឋ បញ្ហាយុត្តិធម៌ លើកកម្ពស់នូវការគោរពសិទ្ធិមនុស្ស និងការប្រយុទ្ធប្រឆាំងនឹងអំពើពុករលួយ។ លោកបន្ថែមថា ជំនួយស៊ុយអែតផ្តោតលើវិស័យរសើបទាំងនេះ ដែលខុសពីជំនួយរបស់ប្រទេសផ្សេងទៀត។ (ស៊ុន ណារិន, Hello VOA, ភ្នំពេញ, ៧ មីនា ២០២៤)
ការបង្កើតក្រុមការងារដែលល្អនៅជុំវិញខ្លួនឯងដើម្បីធ្វើជាបណ្តាញគាំទ្រ បានជួយឱ្យអ្នកស្រី អេង ចាន់ឌី បន្តដំណើរទៅមុខ និងជម្នះឧបសគ្គជាច្រើនក្នុងការតស៊ូស្វែងរកសមភាពយេនឌ័រនៅក្នុងប្រទេសកម្ពុជា។ ការចង់ឃើញសមភាពយេនឌ័រមាននៅក្នុងប្រទេសកម្ពុជា គឺជាការកំណត់ភាពជោគជ័យរបស់អ្នកស្រី អេង ចាន់ឌី។ នៅក្នុងកម្មវិធី Hello VOA អ្នកស្រី ចាន់ឌី បានថ្លែងថា ការស្វែងរកជំនួយគឺជាភាពឆ្លាតវៃសម្រាប់ភាពជាអ្នកដឹកនាំរបស់ស្រ្តី៕ (ធីតា វីន, Hello VOA, ភ្នំពេញ, ០៤ មីនា ២០២៤)
ប្រជាពលរដ្ឋជាច្រើននៅតាមបណ្តាខេត្តក្នុងប្រទេសកម្ពុជា ជាពិសេសតាមបណ្តាខេត្តជាប់ព្រំដែន តែងធ្វើចំណាកស្រុកទៅធ្វើការនៅប្រទេសថៃ ដោយមានទាំងអ្នកធ្វើចំណាកស្រុកមានឯកសារ និងគ្មានឯកសារ។ ជារឿយៗគេតែងឮពលករដែលធ្វើចំណាកស្រុកដោយគ្មានឯកសារតែងរងការឆបោកពីមេខ្យល់ និងប្រឈមនឹងការកេងប្រវ័ញ្ចកម្លាំងពលកម្មជាដើម។ លោក ស៊ាប សីហា អ្នកសម្របសម្រួលមជ្ឈមណ្ឌលធនធានពលករទេសន្តរប្រវេសន៍ ខេត្តបន្ទាយមានជ័យ លើកឡើងថា ការប្រឹក្សាយោបល់ពីការចំណាកស្រុកដល់ប្រជាពលរដ្ឋ និងពលករ ជួយកាត់បន្ថយការធ្វើចំណាកស្រុកដែលគ្មានសុវត្ថិភាព៕ (កាន់ វិច្ឆិកា, Hello VOA, ភ្នំពេញ, ២២ កុម្ភៈ ២០២៤)
ខណៈដែលបច្ចេកវិទ្យាលើពិភពលោកកាន់តែរីកចម្រើនទៅមុខ គេឃើញថាតម្រូវការសម្រាប់ជំនាញឌីជីថលកាន់តែមានភាពច្បាស់លាស់។ សម្រាប់កម្ពុជាដែលជាប្រទេសកំពុងអភិវឌ្ឍន៍ ការចាប់យកអាជីពពាក់ព័ន្ធនឹងឌីជីថលក្នុងចំណោមយុវជនជាពិសេសយុវតី ហាក់នៅមានកម្រិតនៅឡើយ។ កញ្ញា សុខាច័ន្ទ សុជាតា បាននិងកំពុងធ្វើការងារច្រើនពាក់ព័ន្ធនឹងឌីជីថល ឬបច្ចេកវិទ្យា ព្រមទាំងជាសមាជិកគណៈកម្មការរៀបចំវេទិកាអភិបាលកិច្ចអ៊ីនធឺណិតយុវជនកម្ពុជាមួយរូប មានចំណាប់អារម្មណ៍ពាក់ព័ន្ធនឹងឌីជីថលតាំងពីកុមារភាពមក និងបានចាប់យកជំនាញពាក់ព័ន្ធនឹងឌីជីថលនេះ បន្ទាប់ពីចប់ការសិក្សាថ្នាក់វិទ្យាល័យ។ កញ្ញានិយាយថា កញ្ញាចង់ឃើញយុវតីកម្ពុជាចាប់យកជំនាញផ្នែកឌីជីថលកាន់តែច្រើនដើម្បីជំរុញឱ្យសេដ្ឋកិច្ច និងសង្គមកម្ពុជាកាន់តែមានភាពរីកចម្រើន៕ (កាន់ វិច្ឆិកា, ភ្នំពេញ, ១២ កុម្ភៈ ២០២៤)
ការផ្សព្វផ្សាយគ្រឿងស្រវឹងនៅលើប្រព័ន្ធផ្សព្វផ្សាយ និងតាមដងផ្លូវ នៅតែជាបញ្ហាគួរឲ្យព្រួយបារម្ភមួយ ដែលកំពុងបង្កផលប៉ះពាល់ក្នុងសង្គមកម្ពុជា។ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព ដែលជាអង្គការធ្វើយុទ្ធនាការលើបញ្ហាគ្រឿងស្រវឹង ថ្លែងថា ឧស្សាហករគ្រឿងស្រវឹងមាន«ឥទ្ធិពលខ្លាំង» ហើយអាចមានទំនាក់ទំនងយ៉ាងជិតស្និទ្ធជាមួយអ្នកនយោបាយ។ លោកបន្ថែមថាដើម្បីដោះស្រាយបញ្ហាគ្រឿងស្រវឹងក្នុងប្រទេសកម្ពុជា វាទាមទារការប្តេជ្ញាចិត្តខ្លាំងពីអ្នកនយោបាយ៕ (ស៊ុន ណារិន, Hello VOA, ភ្នំពេញ, ៨ កុម្ភៈ ២០២៤)
អ្នកស្រី យឹម សុធារី គឺជាអ្នកជំនាញផ្នែកចិត្តសាស្រ្ត និងជានាយិកាមជ្ឈមណ្ឌលស្នេហា។ តាំងពីកុមារភាពមក អ្នកស្រីតែងមានក្តីសុបិនធ្វើជាអ្នកព្យាបាល ប៉ុន្តែក្តីសុបិននោះមានឧបសគ្គច្រើនដោយសារជីវភាពគ្រួសារ។ ក្រោយមក ដោយសារការខិតខំប្រឹងប្រែង អ្នកស្រីបានសម្រេចក្តីសុបិនរបស់ខ្លួនដោយធ្វើជាអ្នកប្រឹក្សាផ្លូវចិត្ត ហើយជាពិសេសបានបង្កើតមជ្ឈមណ្ឌលស្នេហា ដែលជាកន្លែងផ្តល់ប្រឹក្សានិងព្យាបាលបញ្ហាផ្លូវចិត្ត។ អ្នកស្រីលើកឡើងថា នៅពេលដែលស្រ្តីថែរក្សាផ្លូវចិត្តបានល្អ នោះនឹងជួយឱ្យការដឹកនាំរបស់ស្រ្តីកាន់តែប្រសើរ៕ (កាន់ វិច្ឆិកា, Hello VOA, ភ្នំពេញ, ០៥ កុម្ភៈ ២០២៤)
ការជួញដូរមនុស្សដើម្បីកេងប្រវ័ញ្ចកម្លាំងពលកម្មគឺជាប្រភេទនៃការជួញដូរមួយដែលធ្វើឱ្យប៉ះពាល់ដល់សិទ្ធិមនុស្ស ជាពិសេសសិទ្ធិរបស់ពលករចំណាកស្រុក ប៉ុន្តែមិនសូវមានអ្នកយកចិត្តទុកដាក់ បើធៀបនឹងការជួញដូរមនុស្សក្នុងទម្រង់ផ្សេងៗទៀត។ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថាសង់ត្រាល់ លើកឡើងថា ការជួញដូរមនុស្សដើម្បីកេងប្រវ័ញ្ចកម្លាំងពលកម្មពិបាកក្នុងការកំណត់ និងបង្ក្រាប ដោយសារបទល្មើសនៃការជួញដូរមួយនេះមិនមានច្បាប់ចែងជាក់លាក់៕ (កាន់ វិច្ឆិកា, ភ្នំពេញ, ២៥ មករា ២០២៣)
កាលពីកន្លងទៅអង្គការលីកាដូបានសិក្សាមួយចំនួនទាក់ទងនឹងកម្ចីមីក្រូហិរញ្ញវត្ថុនៅកម្ពុជា។ កាលពីខែសីហា ឆ្នាំមុន អង្គការក៏បានចេញរបាយការណ៍មួយ និយាយអំពី «ហានិភ័យនៃបំណុល៖ ការសិក្សាស្រាវជ្រាវបែបបរិមាណនៃអ្នកជាប់ជំពាក់កម្ចីខ្នាតតូច នៅខេត្តកំពង់ស្ពឺ»។ លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ ថ្លែងនៅក្នុងកម្មវិធី Hello VOA ថា ប្រសិនបើមិនមានវិធានការ និងមិនមានការជួយណាមួយពីគ្រឹះស្ថានមីក្រូហិរញ្ញវត្ថុ ឬក៏រដ្ឋាភិបាលទេ បំណុលមីក្រូហិរញ្ញវត្ថុ«អាចមានហានិភ័យខ្ពស់»៕ (ស៊ុន ណារិន, Hello VOA, ភ្នំពេញ, ១១ មករា ២០២៤)
ការអានមានសារសំខាន់ណាស់សម្រាប់កុមារ និងយុវជន ប៉ុន្តែបណ្ណាល័យដែលអាចផ្តល់ការអានបានដោយឥតគិតថ្លៃនៅកម្ពុជា នៅមានចំនួនតិចតួចនៅឡើយ។ សម្រាប់បណ្ណាល័យសហគមន៍តាមបណ្តាខេត្តនានាក្នុងប្រទេសកម្ពុជាវិញនៅតែបន្តខ្វះសៀវភៅ និងបច្ចេកទេសក្នុងការរៀបចំបណ្ណាល័យ។ លោក សុខ ឡាក់ សហស្ថាបនិកបណ្ណាល័យបញ្ញវន្ត និងជាសហស្ថាបនិកយុទ្ធនាការសៀវភៅមួយសហគមន៍មួយលើកឡើងថា បណ្ណាល័យបញ្ញវន្តជំរុញឱ្យកុមារ និងយុវជននៅតាមសហគមន៍អានសៀវភៅបានកាន់តែច្រើន និងជួយឱ្យការរៀបចំបណ្ណាល័យសហគមន៍បានប្រសើរជាងមុន៕ (កាន់ វិច្ឆិកា, Hello VOA, ភ្នំពេញ, ០៨ មករា ២០២៤)
បើតាមទិន្នន័យក្រៅផ្លូវការរបស់អង្គការសង់ត្រាល់ (CENTRAL) ពលករខ្មែរទាំងមាន និងមិនមានឯកសារយ៉ាងហោចណាស់ជាង ២លាននាក់ កំពុងធ្វើការនៅប្រទេសថៃ។ ជារឿយៗ គេតែងឭអំពីការចាប់ខ្លួនពលករដែលកំពុងធ្វើការ និងពលរដ្ឋខ្មែរដែលព្យាយាមឆ្លងដែនដោយមិនផ្លូវការ ព្រមទាំងការរំលោភបំពានសិទ្ធិផ្សេងៗ។ កាលពីដើមខែចុងខែតុលានេះ អាជ្ញាធរថៃបានឃុំខ្លួនពលករខ្មែរជាង ២០០នាក់ ដោយសារពួកគេគ្មានឯកសារ ហើយក្នុងអំឡុងពេលក្បែរៗគ្នានោះ ក៏មានការផ្សាយថាមានពលរដ្ឋខ្មែរចំនួន ៣៣នាក់ ត្រូវបានអាជ្ញាធរថៃចាប់ខ្លួន ខណៈដែលពួកគេកំពុងប្រថុយឆ្លងកាត់ព្រំដែនដើម្បីទៅរកការងារធ្វើនៅប្រទេសថៃ។ លោក ឌីថេ ហូយ៉ា ប្រធានផ្នែកប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ លើកឡើងថា ប្រជាពលរដ្ឋខ្មែរនៅតែបង្ខំចិត្តធ្វើចំណាកស្រុកទៅធ្វើការនៅប្រទេសថៃដោយសារបញ្ហាជីវភាព បើទោះបីជាមានការចាប់ខ្លួនជាញឹកញាប់៕ (កាន់ វិច្ឆិកា, Hello VOA, ភ្នំពេញ, ២៨ ធ្នូ ២០២៣)
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជា បានលើកឡើងថា ស្ថានភាពអំពើពុករលួយនៅកម្ពុជានៅមានកម្រិតធ្ងន់ធ្ងរនៅឡើយ។ នៅក្នុងកម្មវិធី Hello VOA លោក ពិសី និយាយថា លោកចង់ឃើញអង្គភាពប្រឆាំងអំពើពុករលួយជំរុញការអនុវត្តច្បាប់ទៅលើអំពើពុករលួយទាំងខ្នាតធំ និងខ្នាតតូច និងពិនិត្យមើលឡើងវិញលើគោលការណ៍គតិយុត្តិមួយចំនួន ដូចជាការប្រកាសទ្រព្យសម្បតិ្តជាដើម ដើម្បីធ្វើកំណែទម្រង់ និងរៀបចំគតិយុត្តិដាច់ដោយឡែកលើការការពារសាក្សី អ្នករាយការណ៍ និងជនរងគ្រោះ។ លោកបន្ថែមថា រដ្ឋាភិបាលថ្មីបានបង្ហាញឆន្ទៈក្នុងការប្រយុទ្ធប្រឆាំងអំពើពុករលួយ តែលោកលើកទឹកចិត្តឲ្យការអនុវត្ត ការតាំងចិត្ត និងឆន្ទៈនយោបាយនោះមានភាពមោះមុត និងប្រកបដោយប្រសិទ្ធិភាព៕ (ខាន់ សុគុំមនោ, Hello VOA, អូស្ត្រាលី, ១៨ ធ្នូ ២០២៣)
កាលពីពេលថ្មីៗនេះ ក្រុមយុវជនចលនាមាតាធម្មជាតិបានទទួលពានរង្វាន់អន្តរជាតិមួយឈ្មោះ Right Livelihood នៅប្រទេសស៊ុយអែត សម្រាប់ភាពក្លាហានក្នុងសកម្មភាពការពារបរិស្ថាននៅកម្ពុជា។ លោក លី ចាន់ដារ៉ាវុធ សមាជិកម្នាក់នៃចលនាមាតាធម្មជាតិ អះអាងថា វាដល់ពេលហើយដែលប្រជាជនខ្មែរត្រូវចាប់ផ្តើមការពារធនធានធម្មជាតិរបស់ខ្លួន ការពារភាពត្រឹមត្រូវ និងយុត្តិធម៌ក្នុងប្រទេស៕ (ស៊ុន ណារិន, Hello VOA, ភ្នំពេញ, ១៤ ធ្នូ ២០២៣)
ក្នុងរយៈពេល១០ឆ្នាំមកនេះ កម្មវិធីមេដឹកនាំយុវជនអាស៊ីអាគ្នេយ៍ (YSEALI) បាននាំយកយុវជនកម្ពុជាយ៉ាងហោចណាស់ជាង ៣០០នាក់ ក្នុងចំណោមយុវជនជាង ៦ពាន់នាក់ក្នុងតំបន់អាស៊ីអាគ្នេយ៍ ទៅផ្លាស់ប្ដូរចំណេះដឹង និងសិក្សាពីសង្គម ការគ្រប់គ្រងរដ្ឋផ្ទាល់ និងបង្កើនចំណងមិត្តភាពជាមួយសហរដ្ឋអាមេរិក និងមេដឹកនាំអាស៊ីអាគ្នេយ៍វ័យក្មេងផ្សេងទៀត។ លោក សារីម ម៉ារឌី អ្នកសម្របសម្រួលអតីតនិស្សិតអាហារូបករណ៍នៃស្ថានទូតសហរដ្ឋអាមេរិកប្រចាំកម្ពុជា ថ្លែងក្នុងកម្មវិធី Hello VOA សំឡេងជំនាន់ថ្មីថា កម្មវិធីមេដឹកនាំយុវជនអាស៊ីអាគ្នេយ៍ ជួយពង្រឹងភាពជាអ្នកដឹកនាំរបស់យុវជន និងពង្រឹងភាពខ្លាំងរបស់យុជនក្នុងតំបន់អាស៊ាន៕ (កាន់ វិច្ឆិកា, Hello VOA, ភ្នំពេញ, ១១ ធ្នូ ២០២៣)
ការតស៊ូនិងការតាំងចិត្តរឹងមាំ នាំឱ្យជនភៀសខ្លួនខ្មែរម្នាក់បានចូលធ្វើការនៅក្នុងកងការពារប្រធានាធិបតីសហរដ្ឋអាមេរិកអស់ពេលជាងម្ភៃឆ្នាំ។ លោក អួន ឡឺត ដែលគ្មានលុយកាក់ និងមិនចេះភាសាអង់គ្លេសមួយម៉ាត់ ពេលមកដល់សហរដ្ឋអាមេរិកដំបូង កាលពីឆ្នាំ១៩៨៣ បានប្រាប់វីអូអេ នៅក្នុងកម្មវិធី Hello VOA ថាលោកបានប្រាប់ម្តាយលោកនៅពេលនោះថា លោកនឹងខិតខំប្រឹងប្រែងដើម្បីឱ្យគ្រួសារលោកមានជីវភាពល្អប្រសើរនៅលើទឹកដីថ្មី៕ (លោក ប៉ូច រាសី, Hello VOA, វ៉ាស៊ីនតោន, ៧ ធ្នូ ២០២៣)
ការពង្រឹងកម្លាំងចិត្តឱ្យរឹងមាំបានជួយជំរុញឱ្យអ្នកស្រី នុត ក្លារ៉ា ទម្លុះឧបសគ្គជាច្រើនដែលបានជួបប្រទះលើវិថីការងារនិងជីវិត។ ការប្តេជ្ញាចិត្តដើម្បីឱ្យខ្លួនក្លាយជាស្រ្តីម្នាក់ដែលរឹងមាំបានធ្វើឱ្យអ្នកស្រីក្លាយជាសហគ្រិនមួយរូបដែលបានដឹកនាំនៅក្នុងក្រុមហ៊ុនមួយដែលមានបុគ្គលិកប្រមាណជាង១០០នាក់។ នៅក្នុងកម្មវិធី Hello VOA អ្នកស្រី ក្លារ៉ា បានថ្លែងថា ស្ត្រីត្រូវតែធ្វើជាម្ចាស់ជីវិតលើខ្លួនឯង ហើយមិនត្រូវធ្វើជាបន្ទុកឱ្យនរណាម្នាក់នោះទេ៕ (អ្នកស្រី ធីតា វីន, Hello VOA, ភ្នំពេញ, ៤ ធ្នូ ២០២៣)
លោក ឃុន ថារ៉ូ មន្ត្រីកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ថ្លែងថា រដ្ឋាភិបាលគួរដាក់ចេញគោលនយោយសម្រួលដល់ការបង់សងធនាគារ និងគ្រឹះស្ថានមីក្រូហិរញ្ញវត្ថុ ដើម្បីសម្រាលបន្ទុកនៃការជំពាក់បំណុលនេះ។
ប្រធានគណបក្សកម្លាំងជាតិលោក ស៊ុន ចន្ធី បានលើកឡើងថា លោក និងសហស្ថាបនិកដទៃទៀត បង្កើតគណបក្សជំទាស់ថ្មី ដោយសារតែគណបក្សចាស់របស់ពួកគេ គឺគណបក្សភ្លើងទៀន ដើរដល់ចំណុចទាល់មួយលើផ្នែកបច្ចេកទេសនយោបាយ ដែលជាប់គាំង និងមិនអាចបន្តទៅមុខទៀត ពីព្រោះគណបក្សនេះអាចមិនចូលរួមការបោះឆ្នោតបាន។ លោកបានបន្ថែមថា គណបក្សថ្មីរបស់លោកមិនបានបង្កើតមក បំបែកសំឡេងអ្នកប្រជាធិបតេយ្យនោះទេ ហើយលោកថា សមាជិកគណបក្សថ្មីរបស់លោកស្ទើរតែ ១០០ភាគរយ គឺ«សុទ្ធសឹងតែជាអតីតអ្នកតស៊ូនៅក្នុងគណបក្សភ្លើងទៀន»។ លោកបញ្ជាក់ថា អ្នកចុះចូលគណបក្សលោក«មិនមែនក្បត់នឹងគណបក្សភ្លើងទៀនទេ»៕ (អ្នកនាង ខាន់ សុគុំមនោ, Hello VOA, អូស្ត្រាលី, ២០ វិច្ឆិកា ២០២៣)
ជាទូទៅ យុវជន ឬសិស្សនិស្សិតដែលចង់ស្វែងរកបទពិសោធន៍ការងារ តែងស្វែងរកឱកាសសម្រាប់ហាត់ការនៅតាមក្រុមហ៊ុន ឬស្ថាប័នផ្សេងៗទៅតាមជំនាញរបស់ខ្លួន។ យុវជនមួយក្រុមបានបង្កើតធុរកិច្ចបង្កើតថ្មីមួយឈ្មោះ «បណ្តូល» ដោយភ្ជាប់ក្រុមហ៊ុនជាមួយនឹងយុវជនដែលចង់ហាត់ការ។ កញ្ញា លី ឧត្តមនាថ ស្ថាបនិកធុរកិច្ចបង្កើតថ្មី «បណ្តូល» លើកឡើងថា ធុរកិច្ចថ្មីនេះផ្តល់ឱកាសឱ្យយុវជនទទួលបានឱកាសហាត់ការ ដោយទទួលបានប្រាក់កម្រៃ ឬប្រាក់ឧបត្ថម្ភសម្រាប់ការងាររបស់ពួកគេ៕ (អ្នកស្រី កាន់ វិច្ឆិកា, ភ្នំពេញ, ១៣ វិច្ឆិកា ២០២៣)
អត្រាកើតជំងឺមិនឆ្លងក្នុងតំបន់ ក៏ដូចជានៅប្រទេសកម្ពុជា មានការកើនឡើងច្រើនគួរឲ្យព្រួយបារម្ភ។ ជំងឺទាំងនោះ ដែលមានដូចជាទឹកនោមផ្អែម លើសសម្ពាធឈាមនិងខ្លាញ់ជាដើម កំពុងវាយលុយក្នុងស្រទាប់យុវជនផងដែរ។ ឱសថបណ្ឌិត លោក វិរៈ ខ្លូតជា ដែលជាសហស្ថាបនិក និងនាយកប្រតិបត្តិនៃក្រុមហ៊ុនឪសថមួយដែលគ្រប់គ្រងគេហទំព័រ (ទៅពេទ្យ) TOVPET.COM ជំរុញឲ្យប្រជាជនខ្មែរយកចិត្តទុកដាក់លើការហូបចុក និងហាត់ប្រាណ ដើម្បីបញ្ចៀសជំងឺមិនឆ្លងទាំងនេះ៕ (ស៊ុន ណារិន, Hello VOA, ភ្នំពេញ, ៩ វិច្ឆិកា ២០២៣)
ជំនឿចិត្តដ៏មោះមុតបានជំរុញឱ្យអ្នកស្រី ប៊ុន ចាន់និមល ហ៊ានផ្លាស់ប្តូរទីលំនៅជាច្រើនកន្លែងដើម្បីស្វែងរកទីកន្លែងដែលសាកសមនឹងការអភិវឌ្ឍអាជីព របស់ខ្លួនដែលពេញចិត្ត។ ភាពជឿជាក់និងការមិនចុះចាញ់ជាមួយឧបសគ្គដែលកើតមាន បានធ្វើឱ្យអ្នកស្រីក្លាយជាអគ្គនាយិកាក្រុមហ៊ុន សាស្រ្តាហ្វៀម (Sastra Film) ដែលកំពុងជួយលើកស្ទួយវិស័យខ្សែភាពយន្តខ្មែរ និងផ្តល់ការងារដល់សិល្បករជាច្រើនផងដែរ។ នៅក្នុងកម្មវិធី Hello VOA ស្ត្រីនិងភាពជាអ្នកដឹកនាំ អ្នកស្រី ប៊ុន ចាន់និមល បានថ្លែងថា ដើម្បីសម្រេចនូវក្តីសម្រៃ និងអាជីពដែលខ្លួនស្រលាញ់ ស្រ្តីត្រូវមានជំនឿចិត្តលើខ្លួនឯង និងហ៊ានដើរចេញក្រៅផ្ទះដើម្បីស្វែងរកកន្លែងរៀនជំនាញ ហើយត្រូវរៀបចំផែនការឱ្យបានច្បាស់លាស់នូវអ្វីដែលខ្លួនបម្រុងធ្វើ៕ (អ្នកស្រី ធីតា វីន, Hello VOA, ភ្នំពេញ, ៦ វិច្ឆិកា ២០២៣)
កាលពីពេលថ្មីៗនេះ ក្រសួងការបរទេសអាមេរិកក្នុងរយៈពេលប៉ុន្មានឆ្នាំចុងក្រោយនេះ ចាត់ថ្នាក់កម្ពុជាថាមានការជួញដូរមនុស្សខ្លាំង ហើយថាវិធានការទប់ស្កាត់មិនមានភាពប្រសើរដោយសារកង្វះឆន្ទៈរបស់រដ្ឋាភិបាល ខណៈករណីជួញដូរមនុស្សមួយចំនួនក៏មានជាប់ពាក់ព័ន្ធនឹងអ្នកមានអំណាចមួយចំនួនផងដែរ។ បន្ថែមលើនេះ នៅដើមខែតុលានេះ មានការរកឃើញថា ស្រ្តីខ្មែរ ៧ នាក់ត្រូវបានជួញដូរទៅតំបន់ត្រីកោណមាសនៅក្នុងប្រទេសឡាវ។ លោក ឌី ថេហូយ៉ា ប្រធានផ្នែកប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ ថ្លែងថា រដ្ឋាភិបាលអាណត្តិថ្មី គួរបង្ហាញឆន្ទៈក្នុងការទប់ស្កាត់ការជួញដូរមនុស្សឱ្យមានប្រសិទ្ធភាពដើម្បីស្តារមុខមាត់កម្ពុជា៕ (អ្នកនាង កាន់ វិច្ឆិកា, ភ្នំពេញ, ២៦ តុលា ២០២៣)
ដោយមើលឃើញពីស្ថានភាពដើរថយក្រោយនៃលទ្ធិប្រជាធិបតេយ្យនៅកម្ពុជា សម្ព័ន្ធភាពនយោបាយថ្មីមួយត្រូវបានបង្កើតឡើងដោយគណបក្សនយោបាយចំនួន ៤ ដើម្បីប្រកួតប្រជែងជាមួយគណបក្សប្រជាជនកម្ពុជា លើកកម្ពស់ការគោរពសិទ្ធិមនុស្ស និងស្តារលំហប្រជាធិបតេយ្យឡើងវិញ។ គណបក្សទាំង ៤ នោះ រួមមានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា។ លោក សុក ហាច ប្រធានស្តីទីគណបក្សភ្លើងទៀន បញ្ជាក់ថា សម្ព័ន្ធភាពនេះនឹងជាជម្រើសមួយ ដើម្បីធានាថា គណបក្សជំទាស់អាចចូលរួមការបោះឆ្នោតនៅពេលខាងមុខ ក្នុងនោះរួមមានការបោះឆ្នោតព្រឹទ្ធសភានាខែកុម្ភៈ ឆ្នាំ ២០២៤ បើទោះគណបក្សភ្លើងទៀននឹងបន្តត្រូវបានផាត់ចេញពីការបោះឆ្នោតដោយសារបញ្ហាចម្រូងចម្រាសនៃឯកសារស្នាមក៏ដោយ៕ (ស៊ុន ណារិន, Hello VOA, ភ្នំពេញ, ១២ តុលា ២០២៣)
ខណៈបញ្ហាកសិកម្ម កង្វះទីផ្សារការងារ ព្រមទាំងបញ្ហាសុខភាពផ្សេងៗ នៅតែជាបញ្ហាសំខាន់ក្នុងសង្គម ហើយតែងត្រូវបានប្រជាពលរដ្ឋលើកឡើងជារឿយៗ លោក សួន បញ្ញា ប្រធានគម្រោងយុវជនកសិកម្មដាស់សតិ ថ្លែងថា គម្រោងយុវជនកសិកម្មដាស់សតិ បង្កើតឡើងដើម្បីបង្កើនការយល់ដឹងផ្នែកកសិកម្មសម្រាប់យុវជន និងជំរុញឱ្យយុវជននៅតាមជនបទមានការងារសមរម្យ៕ (កាន់ វិច្ឆិកា, ភ្នំពេញ, ០៩ តុលា ២០២៣)
ជីវភាពគ្រួសារក្រលំបាកបានជំរុញឱ្យលោកស្រី រី ថានី ក្លាហានបង្កើតក្តីស្រមៃ របស់ខ្លួនតាំងពីវ័យកុមារ ដើម្បីជម្នះភាពក្រីក្រលំបាក។ ក្តីស្រមៃនេះ ជាមួយនឹងការខិតខំសិក្សារៀនសូត្រនិងភាពធន់នឹងឧបសគ្គបានធ្វើឱ្យលោកស្រីក្លាយជាស្ថាបនិក និងនាយិកាសិប្បកម្មនរា ដែលបានជួយលើកស្ទួយស្នាដៃផលិតផលក្នុងស្រុកឱ្យកាន់តែប្រសើរឡើងលើឆាកអន្តរជាតិ និងជួយកាត់បន្ថយការធ្វើចំណាកស្រុករបស់ប្រជាពលរដ្ឋមួយចំនួនក្នុងសហគមន៍។ លោកស្រី បានថ្លែងនៅក្នុងកម្មវិធីHello VOA ស្រ្តី និងភាពជាអ្នកដឹកនាំ ថា ស្ត្រីត្រូវហ៊ាន ស្រមៃនូវអ្វីដែលខ្លួនចង់បាន ដោយលើកទឹកចិត្តដល់ស្ត្រីគ្រប់រូបកុំចុះចាញ់ និងកុំបោះបង់ក្តីស្រមៃរបស់ខ្លួន ទោះស្ថិតក្នុងកាលៈទេសៈណាក៏ដោយ។ លោកស្រី រី ថានី ថ្លែងថា៖ «ត្រូវកំណត់គោលដៅ និងមានផែនការច្បាស់លាស់ ហើយព្យាយាមធ្វើដោយការតស៊ូ អត់ធ្មត់ ដើម្បីតាមចាប់ក្តីស្រមៃរបស់ខ្លួន»៕ (ធីតា វីន, Hello VOA, ភ្នំពេញ, ០២ តុលា ២០២៣)
កាលពីពេលថ្មីៗនេះ វិទ្យាស្ថានតស៊ូមតិនិងគោលនយោបាយ (API) បានចេញផ្សាយរបាយការណ៍មួយដែលវិភាគនិងតាមដានការរាំងខ្ទប់គេហទំព័រមួយចំនួនក្នុងប្រទេសកម្ពុជា។ លោក ឡាំ សុជាតិ នាយកប្រតិបត្តិនៃវិទ្យាស្ថានតស៊ូមតិនិងគោលនយោបាយ បញ្ជាក់ថា របាយការណ៍នេះជាភ័ស្តុតាងដែលអង្គការសង្គមស៊ីវិលនឹងដាក់ទៅរដ្ឋាភិបាល និងក្រុមហ៊ុនឯកជន ដើម្បីពិនិត្យមើល និងបញ្ជាក់អំពីមូលហេតុនៃការបិទគេហទំព័រទាំងនោះ។ លោកបន្ថែមថា រដ្ឋាភិបាលកំពុងមមាញឹកក្នុងការបង្កើតច្បាប់ ដើម្បីគ្រប់គ្រងគ្រប់ផ្នែកនៃបណ្តាញបច្ចេកវិទ្យា និងបណ្តាញសារព័ត៌មាន៕ (ស៊ុន ណារិន, Hello VOA, ភ្នំពេញ, ១៤ កញ្ញា ២០២៣)
នៅកម្ពុជា ការចែករំលែកចំណេះដឹងនានាពាក់ព័ន្ធនឹងថាមពលនៅមានកម្រិតតិចតួចនៅឡើយ ស្របពេលដែលប្រជាជនស្ទើតែទាំងអស់រស់នៅដោយពឹងអាស្រ័យលើថាមពល។ ថ្មីៗនេះ គេឃើញយុវជនមួយក្រុមបានបង្កើតគម្រោងមួយឈ្មោះថា អំពីថាមពល ឬ About Energy ដែលជាគម្រោងផ្តោតលើការលើកកម្ពស់ការយល់ដឹងអំពីបញ្ហា និងដំណោះស្រាយទាក់ទងនឹងថាមពល។ លោក ហ៊ាង វិហ្សា សហស្ថាបនិកគម្រោង អំពីថាមពល ឬ About Energy ថ្លែងក្នុងកម្មវិធី Hello VOA សំឡេងជំនាន់ថ្មីថា ការស្វែងយល់អំពីការប្រើប្រាស់ថាមពលជួយសន្សំសំចៃសេដ្ឋកិច្ច និងទប់ស្កាត់បញ្ហាបរិស្ថាន៕ (អ្នកនាង កាន់ វិច្ឆិកា, ភ្នំពេញ, ១១ កញ្ញា ២០២៣)
ពីកម្មកររោងចក្រ រហូតដល់ក្លាយជានាយិកាដឹកនាំស្ថាប័នមួយ ដំណើរជីវិតរបស់លោកស្រី ពាង សុខា ពោរពេញដោយឧបសគ្គ ការតស៊ូ និងការតាំងចិត្តខ្លាំង ដើម្បីផ្លាស់ប្តូរជីវិតរបស់លោកស្រី។ បច្ចុប្បន្ននេះ លោកស្រីគឺជានាយិកាប្រតិបត្តិនៃសិប្បកម្មវត្តថាន់កម្ពុជា និងជាសហគ្រិនស្ត្រីម្នាក់ ដែលព្យាយាមបង្កើតឱកាសការងារនិងផ្តល់ជំនួយដល់សិស្សនិស្សិតនិងក្រុមពលរដ្ឋដែល ត្រូវការជំនួយនិងមិនមានឱកាសនិងសមត្ថភាពក្នុងការស្វែងរកការងារឱ្យត្រូវជំនាញ។ លោកស្រីបានចែករំលែកនៅក្នុងកម្មវិធី Hello VOA ស្ត្រីនិងភាពជាអ្នកដឹកនាំថា ការសិក្សាគឺជាគន្លឹះក្នុងការអភិវឌ្ឍផ្នត់គំនិតនិងភាពជោគជ័យរបស់បុគ្គលម្នាក់ៗ។ លោកស្រីបានលើកទឹកចិត្តឱ្យអ្នកដែលមានជីវភាពក្រីក្របន្តការសិក្សា ទោះបីជាជីវភាពគ្រួសារក្រីក្រយ៉ាងណាក៏ដោយ។ លោកស្រី ពាង សុខា ថ្លែងថា៖ «ឱ្យតែយើងមានក្តីសង្ឃឹម ការតាំងចិត្ត តស៊ូមោះមុត នោះយើងនឹងអាចសម្រេចគោលបំណងរបស់យើងជាក់ជាមិនខាន»៕ (ធីតា វីន, Hello VOA, ភ្នំពេញ, ០៤ កញ្ញា ២០២៣)
បើទោះបីជាវិបត្តិជំងឺកូវីដ ១៩ បានស្រាកស្រាន្តច្រើនក្តី ក៏ផលប៉ះពាល់បង្កឡើងដោយវិធានការទប់ស្កាត់ការឆ្លងរាលដាលរបស់ជំងឺនេះនៅតែបន្តជះឥទ្ធិពលលើសង្វាក់ផលិតកម្មនៅជុំវិញពិភពលោក។ បន្ថែមលើនេះ សង្គ្រាមឈ្លានពានរបស់រុស្ស៊ីនៅអ៊ុយក្រែនកំពុងបង្កភាពមិនប្រាកដប្រជាបន្ថែមទៀតលើដំណើរការសេដ្ឋកិច្ចសាកលលោក ដែលមានភាពប្រទាក់ក្រឡាគ្នា។ នៅក្នុងកម្មវិធី Hello VOA លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ថ្លែងថា វិបត្តិជំងឺកូវីដ១៩ និងសង្រ្គាមឈ្លានពានរបស់រុស្ស៊ីលើអ៊ុយក្រែននេះ ធ្វើឱ្យការបញ្ជាទិញរបស់អន្តរជាតិបានធ្លាក់ចុះ ដែលប៉ះពាល់ឱកាសការងារនិងប្រាក់ចំណូលរបស់កម្មករក្នុងប្រទេសកម្ពុជា៕ (លោក ស៊ុន ណារិន, Hello VOA, ភ្នំពេញ, ទី៣១ ខែសីហា ឆ្នាំ២០២៣)
ក្នុងពេលបច្ចុប្បន្ន តម្លៃទំនិញសំខាន់ៗស្ទើរគ្រប់ប្រភេទដូចជាសាំង និងអង្ករជាដើម ឡើងថ្លៃជាបន្តបន្ទាប់។ រោងចក្រកាត់ដេរមួយចំនួនដែលជាទីពឹងរបស់ប្រជាពលរដ្ឋពេញកម្លាំងការងារ ក៏ត្រូវបានបិទ និងព្យួរ ដោយសារបញ្ហាសេដ្ឋកិច្ចដែលកំពុងរងនូវវិបត្តិ។ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ ថ្លែងក្នុងកម្មវិធី Hello VOA ស្តីពីពលករចំណាកស្រុកថា ការណ៍នេះបានបង្ខំឱ្យប្រជាពលរដ្ឋកម្ពុជាជាច្រើនបន្ថែមទៀត ចំណាកស្រុកទៅធ្វើជាពលករនៅក្រៅប្រទេស៕ (កាន់ វិច្ឆិកា, ភ្នំពេញ, ២៤ សីហា ២០២៣)
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ការផ្លាស់ប្តូរមេដឹកនាំ សម្រាប់អាណត្តិទី ៧ នេះ គឺជាការផ្លាស់ប្តូរដ៏ធំមួយសម្រាប់កម្ពុជា និងប្រជាពលរដ្ឋ។ លោកបានបន្ថែមថា ការផ្លាស់ប្តូរនៅក្នុងក្បាលម៉ាស៊ីនដឹកនាំតាមលក្ខណៈខ្សែស្រឡាយ និងគ្រួសារនិយមបែបនេះមិនធ្លាប់មានទេ ទាំងនៅក្នុងតំបន់ និងសកលលោក។ លោកក៏បានលើកឡើងទៀតថា ដើម្បីទទួលបានការគាំទ្រពីប្រជាពលរដ្ឋ រដ្ឋាភិបាលថ្មីនេះគួរផ្តោតលើអាទិភាពពីរគឺ៖ ការកសាងទំនុកចិត្តពីសាធារណជនឡើងវិញ និងការរៀបចំយុទ្ធសាស្ត្រប្រឆាំងអំពើពុករលួយ៕ (អ្នកនាង ខាន់ សុគុំមនោ, Hello VOA, អូស្ត្រាលី, ២១ សីហា ២០២៣)
ក្រោយការបោះឆ្នោតជ្រើសតាំងតំណាងរាស្រ្តអាណត្តិទី ៧ បានបញ្ចប់កាលពីថ្ងៃទី២៣ ខែកក្កដា ឆ្នាំ២០២៣ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលថ្មីនឹងបង្កើតឡើងនៅចុងខែសីហានេះ ដោយក្បាលម៉ាស៊ីនដឹកនាំប្រទេស ព្រមទាំងរដ្ឋមន្ត្រីតាមក្រសួងនីមួយៗ នឹងត្រូវផ្លាស់ប្តូរច្រើន ដោយដាក់សមាសភាពមន្ត្រីវ័យក្មេងជំនួសមន្ត្រីវ័យចំណាស់ដែលបានបំពេញការងារជាច្រើនអាណត្តិកន្លងទៅ។ កញ្ញា លី ស្រីស្រស់ ប្រធានក្រុមអ្នកវិភាគវ័យក្មេង ថ្លែងក្នុងកម្មវិធី Hello VOA សំឡេងជំនាន់ថ្មីថា ការអនុវត្តគោលនយោបាយពាក់ព័ន្ធនឹងយុវជនអាចមានប្រសិទ្ធភាពទៅបាន លុះត្រាតែថ្នាក់ដឹកនាំជំនាន់ថ្មីមានឆន្ទៈនយោបាយពិតប្រាកដ ជាពិសេសនៅក្នុងការអនុវត្តគោលនយោបាយទាំងអស់នោះ៕ (អ្នកនាង កាន់ វិច្ឆិកា, ភ្នំពេញ, ១៤ សីហា ២០២៣)
អ្នកនាង សាន សុជាតា ជានាយិកាកម្មវិធីនៃអង្គការមូលនិធិអាស៊ីបានថ្លែងនៅក្នុងកម្មវិធី Hello VOA ថា ការចេះរៀបចំគម្រោងដឹកនាំខ្លួនឯង មានសារៈសំខាន់នៅក្នុងការសម្រេចបានគោលដៅក្នុងជីវិត។ អ្នកនាងក៏បានសង្កត់ធ្ងន់ថា ចំណេះដឹងគឺជាអ្វីដែលត្រូវពង្រីកបន្ថែមឥតឈប់ឈរ។ ទោះបីជារៀនចប់រហូតដល់ថ្នាក់បណ្ឌិតក៏ដោយ ក៏យើងត្រូវតែពង្រីក និងអភិវឌ្ឍចំណេះដឹងជាបន្តបន្ទាប់ ដើម្បីសម្របខ្លួនទៅនឹងការវិវឌ្ឍរបស់សង្គម និងដើរឱ្យទាន់ទៅតាមសម័យកាលដ៏ជឿនលឿន។ អ្នកនាងបានបន្ថែមថា យុវជនគួរតែត្រូវចេះរកឱ្យឃើញនូវគោលដៅរបស់ខ្លួនឯង និងរៀបចំផែនការដើម្បីគោលដៅនោះ៕ (អ្នកស្រី ធីតា វីន, Hello VOA, ភ្នំពេញ, ៧ សីហា ២០២៣)
កម្ពុជាទើបបានបញ្ចប់ការបោះឆ្នោតជ្រើសតាំងតំណាងរាស្រ្តកាលពីថ្ងៃទី ២៣ ខែកក្កដានេះ។ នៅចុងខែសីហាខាងមុខ ប្រសិនបើមិនមានការផ្លាស់ប្តូរណាមួយទេ នោះគណៈរដ្ឋមន្ត្រីនៃរដ្ឋាភិបាលអាណត្តិថ្មីនឹងត្រូវបានបង្កើតឡើង។ លោក ឌី ថេហូយ៉ា ប្រធានផ្នែកប្រឆាំងការជួញដូរមនុស្សនិងទេសន្តរប្រវេសន៍នៃអង្គការសង់ត្រាល់ ថ្លែងក្នុងកម្មវិធី Hello VOA ស្តីពីពលករចំណាកស្រុកថា រដ្ឋាភិបាលអាណត្តិថ្មីគួរតែបន្ថែមការយកចិត្តទុកដាក់លើគោលនយោបាយពាក់ព័ន្ធនឹងការការពារពលករចំណាកស្រុក ដើម្បីជំរុញឱ្យស្ថានភាពរស់នៅនិងឱកាសការងាររបស់ពួកគេមានភាពប្រសើរឡើង ដែលនឹងជួយពង្រឹងកម្លាំងសេដ្ឋកិច្ចជាតិ៕ (កាន់ វិច្ឆិកា, Hello VOA, ភ្នំពេញ, ២៧ កក្កដា ២០២៣)
លោក សេង សារី អ្នកស្រាវជ្រាវសង្គមកម្ពុជា បានមានប្រសាសន៍ថា ការបោះឆ្នោតនេះ ជាការបោះឆ្នោតដែល«ពិបាកទទួលយកបានមែនទែនទាំងជាតិនិងអន្តរជាតិ»។ លោកថ្លែងបន្ថែមថា ការបោះឆ្នោតនៅថ្ងៃអាទិត្យនេះ ជាការបោះឆ្នោតមួយដ៏ចម្លែកដែលគ្មានគូប្រកួតប្រជែងដ៏សាកសមជាមួយគណបក្សកាន់អំណាចបច្ចុប្បន្ន។ លោកប្រដូចការបោះឆ្នោតនេះទៅនឹងសង្វៀនកីឡាថា៖ «កីឡាករគីឡូធ្ងន់ កំពុងប៉ះជាមួយកីឡាករគ្មានគីឡូអីសោះ»។ លោកសង្កេតឃើញថា គណបក្សកាន់អំណាចហាក់ដូចជាកំពុងនាំកម្ពុជាទៅរកប្រព័ន្ធដឹកនាំបែបឯកបក្សតាមទម្រង់សង្គមនិយមទំនើប៕ (អ្នកនាង ខាន់ សុគុំមនោ, Hello VOA, ភ្នំពេញ, ១៧ កក្កដា ២០២៣)
លោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា ថ្លែងថា សម្បត្តិទ្រព្យសាធារណៈរបស់រដ្ឋ បានក្លាយជាគោលដៅនៃការរកស៊ីរបស់អ្នកមានលុយ និងអំណាច ដែលចង់បានជាប្រយោជន៍របស់ខ្លួន។ នៅក្នុងកម្មវិធី Hello VOA លោកបានអំពាវនាវឲ្យអ្នកជំនួញចូលរួមថែរក្សាទ្រព្យសម្បត្តិធនធានធម្មជាតិ ដើម្បីទុកឲ្យប្រជាពលរដ្ឋទូទៅអាចអាស្រ័យផលបាន៕ (ស៊ុន ណារិន, Hello VOA, ភ្នំពេញ, ១៣ កក្កដា ២០២៣)
ខណៈការបោះឆ្នោតជ្រើសតាំងតំណាងរាស្រ្តអាណត្តិទី៧ នឹងធ្វើឡើងនៅថ្ងៃទី២៣ ខែកក្កដា ឆ្នាំ២០២៣ នេះ ដោយមិនមានវត្តមានគណបក្សប្រឆាំងដ៏ចម្បង ក្រុមអ្នកឃ្លាំមើលសង្គមតែងលើកឡើងថា ប្រជាពលរដ្ឋ ជាពិសេសយុវជនរងការរឹតត្បិតសិទ្ធិពាក់ព័ន្ធនឹងការបោះឆ្នោត និងការទទួលបានព័ត៌មាន។ កញ្ញា ភឹង សោភា សកម្មជនកិច្ចព្រមព្រៀងសន្តិភាពទីក្រុងប៉ារីស ថ្លែងក្នុងកម្មវិធី Hello VOA សំឡេងជំនាន់ថ្មីថា យុវជនគួរព្យាយាមសិក្សា និងស្វែងយល់អំពីច្បាប់ពាក់ព័ន្ធនឹងរដ្ឋធម្មនុញ្ញ និងសិទ្ធិនានា ដើម្បីជៀសវាង និងទប់ស្កាត់ការរឹតត្បិតសិទ្ធិ នៅមុន អំឡុង និងក្រោយការបោះឆ្នោត៕ (អ្នកនាង កាន់ វិច្ឆិកា, Hello VOA, ភ្នំពេញ, ១០ កក្កដា ២០២៣)
ពលករចំណាកស្រុកពីកម្ពុជាទៅធ្វើការនៅក្រៅប្រទេសដោយស្របច្បាប់ យ៉ាងហោចណាស់មានចំនួន ១លាន ៣សែននាក់ ដែលភាគច្រើនជាពលករគ្មានជំនាញ។ ពួកគេទាំងនោះបានផ្ញើប្រាក់ត្រឡប់មកផ្គត់ផ្គង់ក្រុមគ្រួសារនៅកម្ពុជា ប្រមាណជា ៣ ពាន់លានដុល្លារសហរដ្ឋអាមេរិកក្នុងមួយឆ្នាំ។ នេះបើយោងតាមរបាយការណ៍របស់ក្រសួងការងារនិងបណ្តុះបណ្តាលវិជ្ជាជីវៈ។ លោក ង៉ែត ជូ អ្នកជំនាញសេដ្ឋកិច្ច និងហិរញ្ញវត្ថុ ថ្លែងក្នុងកម្មវិធី Hello VOA ស្តីពីពលករចំណាកស្រុកថា ការបង្កើនការងារក្នុងស្រុកជាជម្រើសដ៏ល្អក្នុងការលើកស្ទួយសេដ្ឋកិច្ចកម្ពុជានាពេលអនាគត ខណៈការបន្តបញ្ជូនពលករគ្មានជំនាញទៅធ្វើការនៅក្រៅប្រទេស នឹងធ្វើឱ្យសេដ្ឋកិច្ចកម្ពុជានៅតែមិនរឹងមាំ៕ (អ្នកនាង កាន់ វិច្ឆិកា, ភ្នំពេញ, ២២ មិថុនា ២០២៣)
លោក សុន ឆ័យ អនុប្រធានគណបក្សភ្លើងទៀន មានប្រសាសន៍ថា សភាពការណ៍នៅកម្ពុជា នាឆ្នាំ ២០២២ និងឆ្នាំ ២០២៣ នេះ ដែលគណបក្សលោកចូលរួមប្រកួតប្រជែងតាមលទ្ធិប្រជាធិបតេយ្យ គឺមានភាពលំបាកលំបិនជាងពេលណាៗទាំងអស់។ លោកយល់ថា អវត្តមានគណបក្សភ្លើងទៀន នៅក្នុងការបោះឆ្នោតជ្រើសរើសតំណាងរាស្ត្រសម្រាប់នីតិកាលទី ៧ នៅខែកក្កដាខាងមុខនេះ ជាការបង្ហាញអំពីភាពកំសោយនៃលទ្ធិប្រជាធិបតេយ្យនៅកម្ពុជា។ លោកបន្ថែមថា អ្វីដែលអាចនឹងប្រែប្រួលបាន គឺអាស្រ័យទៅលើគណបក្សភ្លើងទៀនខ្លួនឯងធ្វើការសម្របសម្រួលទៅតាមស្ថានការណ៍ និងធ្វើយ៉ាងណាឲ្យមានការយោគយល់កាន់តែច្រើនពីសំណាក់គណបក្សកាន់អំណាច ដើម្បីឱ្យគណបក្សជំទាស់នេះនៅតែបន្តការងាររបស់ខ្លួនជាតំណាងឱ្យប្រជាពលរដ្ឋ៕ (ខាន់ សុគុំមនោ, Hello VOA, ១៩ មិថុនា ២០២៣)
លោក កើត សារ៉ាយ ប្រធានសមាគមសម្ពន្ធនិស្សិតបញ្ញវន្តខ្មែរ អះអាងថា រូបលោកផ្ទាល់ក្នុងនាមជាសកម្មជន ត្រូវអនុវត្តតាមច្បាប់របស់កម្ពុជា ដើម្បីធានាថាអ្វីដែលពួកគេតវ៉ាទាមទារ គឺត្រឹមត្រូវតាមច្បាប់។ ថ្លែងនៅក្នុងកម្មវិធី Hello VOA សកម្មជនរូបនេះបានលើកឡើងបន្ថែមថា ខណៈការរឹតត្បិតសិទ្ធិសេរីភាពក្នុងការតស៊ូមតិនិងតវ៉ាជាសាធារណៈនៅកម្ពុជាកំពុងបន្តកើតមានឡើង ជាពិសេសមុនពេលការបោះឆ្នោតជាតិអាណត្តិទី៧ ឈានមកដល់ លោក កើត សារ៉ាយ មិនព្រួយបារម្ភអំពីការចាប់ខ្លួនសាជាថ្មីឡើយ ប៉ុន្តែមិនមែនមានន័យថា លោកចង់ជាប់ពន្ធនាគារនោះទេ៕ (ស៊ុន ណារិន, Hello VOA, ភ្នំពេញ, ៨ មិថុនា ២០២៣)
អ្នកស្រី ម៉ម ដាត្ថាលីណែត ជាស្ថាបនិក Cam Book Club និងជាអនុប្រធានទទួលបន្ទុកកិច្ចការផ្ទៃក្នុងនៃសមាគមសហគ្រិនស្រ្តីកម្ពុជា បានថ្លែងនៅក្នុងកម្មវិធី Hello VOA ថា ការគិតរបស់បុរស ខុសគ្នាពីការគិតរបស់ស្រ្តី។ ដូច្នេះនៅគ្រប់ស្ថាប័ន ការចូលរួមសហការជាវិជ្ជមានរបស់ស្រ្តីជាមួយនឹងបុរស មិនថាលើកិច្ចការអ្វីក៏ដោយ ពិតជាអាចនាំនូវលទ្ធផលការងារដែលទទួលបានមានតុល្យភាព និងគុណភាពប្រសើរ។ អ្នកស្រីបានបន្ថែមថា ចំណេះដឹង បទពិសោធន៍ ទំនាក់ទំនង ការតាំងចិត្តខ្ពស់ កុំខ្លាចនឿយហ៊ត់ មានជំនឿចិត្តលើខ្លួនឯង គឺជាកត្តាសំខាន់ដែលស្រ្តីគួរតែអភិវឌ្ឍន៍ខ្លួនបន្ថែម ដើម្បីទទួលបានការដឹកនាំក្នុងស្ថាប័ននិងតួនាទីរបស់ខ្លួន៕ (ធីតា វីន, Hello VOA, ភ្នំពេញ, ៥ មិថុនា ២០២៣)
អង្គការសង្គមស៊ីវិលមួយដែលតាមដានលើវិស័យគ្រឿងស្រវឹងក្នុងប្រទេសកម្ពុជាកំពុងប្រមូលស្នាមមេដៃរបស់ប្រជាពលរដ្ឋនៅតាមបណ្តាខេត្តមួយចំនួន ក្នុងគោលបំណងដើម្បីស្នើទៅរដ្ឋាភិបាលដំឡើងពន្ធស្រាបៀ និងគ្រឿងស្រវឹងផ្សេងៗ ហើយពន្លឿនដំណើរការអនុម័តសេចក្តីព្រាងច្បាប់ស្តីពីគ្រឿងស្រវឹងសម្រាប់ប្រទេសកម្ពុជា ដែលត្រូវបានពន្យារពេលជាយូរមកហើយ។ ការដំឡើងពន្ធលើស្រាបៀ និងគ្រឿងស្រវឹងនេះ ត្រូវបានមើលឃើញថា នឹងអាចកាត់បន្ថយគ្រោះថ្នាក់ដែលកើតឡើងពីការសេពគ្រឿងស្រវឹង។ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព ថ្លែងថា៖ «ការដំឡើងពន្ធនេះ វាជាគោលនយោបាយឈ្នះៗដែរ រដ្ឋក៏បានចំណូលពន្ធច្រើន ហើយបញ្ហាសុខភាពក៏ត្រូវបានលើកកម្ពស់ ការកាត់បន្ថយគ្រោះថ្នាក់ផ្សេងៗដោយសារគ្រឿងស្រវឹងក៏ត្រូវបានកាត់បន្ថយ»៕ (លោក ស៊ុន ណារិន, Hello VOA, ភ្នំពេញ, ទី២៩ ខែឧសភា ឆ្នាំ២០២៣)
ការធ្វើចំណាកស្រុកទៅរកការងារធ្វើទាំងក្នុង និងក្រៅប្រទេស បានក្លាយចលករដ៏សំខាន់សម្រាប់ការអភិវឌ្ឍសេដ្ឋកិច្ច និងកាត់បន្ថយភាពក្រីក្រ។ ក៏ប៉ុន្តែអ្នកធ្វើចំណាកស្រុកជាច្រើននាក់យល់ដឹងតិចតួចនៅឡើយអំពីផលប៉ះពាល់ផ្នែកសុខភាព និងសង្គមលើពលករចំណាកស្រុក និងក្រុមគ្រួសាររបស់ពួកគេ ជាពិសេសកូនៗរបស់ពួកគេ។ នៅក្នុងកម្មវិធី Hello VOA ស្តីអំពីចំណាកស្រុក អ្នកស្រី ឌុំ ច័ន្ទធីតា មន្ត្រីកម្មវិធីថ្នាក់ជាតិទទួលបន្ទុកសុខភាពនៃអង្គការអន្តរជាតិទេសន្តរប្រវេសន៍ ហៅកាត់ថា IOM ថ្លែងថា ការអភិវឌ្ឍសង្គមនឹងរងផលប៉ះពាល់ ប្រសិនបើកុមារកាន់តែច្រើនត្រូវរស់នៅឆ្ងាយពីឪពុកម្តាយដែលធ្វើចំណាកស្រុក៕ (កាន់ វិច្ឆិកា, ភ្នំពេញ, ២៥ ឧសភា ២០២៣)
គណបក្សភ្លើងទៀន ដែលជាគណបក្សជំទាស់ដ៏ធំមួយ បានរៀបចំបញ្ជីឈ្មោះបេក្ខជន ដែលនឹងឈរឈ្មោះក្នុងការបោះឆ្នោតតំណាងរាស្រ្តនាខែកក្កដាខាងមុខនេះ។ លោក ភូ សុវណ្ណថា ប្រធានប្រតិបត្តិប្រចាំខេត្តបាត់ដំបងរបស់គណបក្សភ្លើងទៀន ក៏បានសម្រេចឈរឈ្មោះសម្រាប់ការបោះឆ្នោតខាងមុខនេះ។ នៅក្នុងកម្មវិធី Hello VOA ស្តីអំពីការបោះឆ្នោត លោក ភូ សុវណ្ណថា ជំរុញឱ្យអាជ្ញាធរអនុញ្ញាតគណបក្សភ្លើងទៀនមានលទ្ធភាពគ្រប់គ្រាន់ក្នុងការធ្វើយុទ្ធនាការរកសំឡេងឆ្នោត ដោយស្មើមុខស្មើមាត់ជាមួយគណបក្សដទៃទៀត៕ (ស៊ុន ណារិន, Hello VOA, ភ្នំពេញ,១៥ ឧសភា ២០២៣)
កាលពីខែមីនា ឆ្នាំ២០២៣ លោកនាយករដ្ឋមន្ត្រី ហ៊ុន សែន បានឲ្យដឹងថា រោងចក្រនៅកម្ពុជាជាង ៧០ បានព្យួរការងារកម្មករជាង ៣ ម៉ឺននាក់ ដោយលោកថាសភាពការណ៍សេដ្ឋកិច្ចពិភពលោកមិនល្អ។ នៅក្នុងកម្មវិធី Hello VOA អ្នកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា បន្តជំរុញឲ្យរដ្ឋាភិបាលធានាការពារផលប្រយោជន៍សម្រាប់កម្មករ ប្រសិនបើរោងចក្របិទទ្វារ ហើយកម្មករបាត់បង់ការងារ៕ (ស៊ុន ណារិន, Hello VOA, ភ្នំពេញ,១៥ ឧសភា ២០២៣)
© 2020-2025 Ivy Podcast Discovery LLC
