Voice of Tibet

རྒྱ་ནག་གཞུང་གིས་མི་རིགས་མཐུན་སྒྲིལ་གྱི་ཁྲིམས་ཡིག་ཟེར་བ་དྲིལ་བསྒྲགས་རྒྱ་ཁྱབ་དུ་གཏང་རྒྱུའི་འབད་རྩོལ་བྱེད་བཞིན་པའི་ཁྲོད། བོད་མིའི་སྒྲིག་འཛུགས་ནས་ཁྲིམས་ཡིག་དེ་ལ་གདོང་ལེན་ཆེད། བོད་ཀྱི་སྐད་ཡིག་རྒྱུན་འཛིན་གྱི་སྲིད་བྱུས་གསར་པ་ཞིག་གཏན་འབེབས་གནང་འཆར་འདུག དེ་ཡང་འདི་ལོའི་ཟླ་བ་ ༧ ཚེས་ ༡ ནས་རྒྱ་ནག་གི་བཙན་དབང་འོག་ཡོད་པའི་མི་རིགས་ཡོངས་རྫོགས་ཀྱི་ངོ་བོ་རྒྱ་རིགས་སུ་བཙན་སྒྱུར་བྱ་རྒྱུའི་ཆེད་དུ་ཏན་འབེབས་བྱས་པའི་མི་རིགས་མཐུན་སྒྲིལ་གྱི་ཁྲིམས་ཡིག་ཟེར་བ་དེའི་སྐོར་གོ་རྟོགས་སྤེལ་རྒྱུའི་དམིགས་ཡུལ་འོག རྒྱ་ནག་གཞུང་ནས་ཟླ་བ་ ༩ ཚེས་ ༢༡ ནས་ ༢༧ བར་བདུན་ཕྲག་གཅིག་རིང་མི་རིགས་མཐུན་སྒྲིལ་གྱི་ཁྲིམས་ཡིག་དང་། རྒྱལ་ཁབ་སླར་གསོའི་འགྲུལ་བཞུད། ཅེས་པའི་བརྗོད་སྙིང་འོག་ལྷ་ས་དང་། ཨུ་རུམ་ཆི། པེ་ཅིང། ཁྲེན་ཏུའུ་འཚུད་པའི་གྲོང་ཁྱེར་ཆེ་ཁག་ཏུ་ཁྲིམས་ཡིག་དང་འབྲེལ་བའི་གཏམ་བཤད་དང་། འགྲེམས་སྟོན། མི་མང་འདུ་འཛོམས་སོགས་ཀྱི་བྱེད་སྒོ་སྤེལ་རྒྱུ་མ་ཟད། འབྱུང་འགྱུར་ཡང་ལོ་ལྟར་ཟླ་བ་ ༩ བདུན་ཕྲག་བཞི་པ་དེ་མི་མང་ལ་གནད་དོན་གོ་རྟོགས་སྤེལ་རྒྱུའི་བདུན་ཕྲག་དུ་སྲུང་བརྩི་ཞུ་རྒྱུ་ཡིན་སྐོར་བསྒྲགས་འདུག རྒྱ་ནག་གཞུང་གིས་ཕྱི་ཚེས་ ༡༥ ཉིན་སྤེལ་བའི་གསར་འགོད་གསལ་བསྒྲགས་ལྟར་ན། ཕྱི་ཚེས་ ༢༡ ཉིན་ལས་རིམ་གཙོ་བོ་དེ་པེ་ཅིང་གི་དེ་སྔ་བོད་སོག་སློབ་གྲྭ་(National Mongolian and Tibetan School)ཡོད་སའི་ས་ཚིགས་སུ་འཚོག་རྒྱུ་དང་། དེའི་རྗེས་གཟའ་འཁོར་ཧྲིལ་པོར་མི་རིགས་རིག་པ་དང་སྲིད་བྱུས་སྐོར་བགྲོ་གླེང་ཚོགས་འདུ་དང་། མི་རིགས་ཁྲིམས་ཡིག་སྐོར་གཏམ་བཤད། སྦྱར་ཡིག་དང་ངོ་སྤྲོད་དེབ་ཆུང་བགོ་འགྲེམས། བརྙན་ཐུང་བརྒྱུད་སྤེལ། དེ་བཞིན་སློབ་གྲྭ་དང་འགྲེམས་སྟོན་ཁང་། དཔེ་མཛོད་ཁང་། རིག་གཞུང་བསྟི་གནས་ཁང་སོགས་ནས་དེ་དང་འབྲེལ་བའི་བྱེད་སྒོ་སྤེལ་བ་སོགས་ཀྱི་ལམ་ནས་མི་རིགས་མཐུན་སྒྲིལ་གྱི་ཁྲིམས་ཡིག་ཟེར་བ་དེའི་སྐོར་གོ་རྟོགས་སྤེལ་རྒྱུ་ཡིན་པའི་གསལ་བསྒྲགས་བྱས་འདུག རྒྱ་ནག་གཞུང་གི་མི་རིགས་རྩ་གཏོར་གྱི་བྱེད་ཕྱོགས་དེ་ལ་གདོང་ལེན་ཆེད། བོད་མིའི་སྒྲིག་འཛུགས་ནས་བོད་ཀྱི་སྐད་ཡིག་རྒྱུན་འཛིན་གྱི་སྲིད་བྱུས་གསར་པ་ཞིག་གཏན་འབེབས་དང་སྦྲགས། རྒྱལ་སྤྱིའི་སྤྱི་ཚོགས་ལ་རྒྱ་ནག་གི་ཁྲིམས་ཡིག་དེའི་ངན་བྱུས་དང་ཤུགས་རྐྱེན་སྐོར་དྲིལ་བསྒྲགས་ཞུ་གཏུག་གནང་རྒྱུ་ཡིན་པ་གསུངས་འདུག   དེ་ཡང་སྐད་ཡིག་སྲིད་བྱུས་གསར་པ་དེ་དང་འབྲེལ་ཏེ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས། མ་འོངས་པར་བོད་ཀྱི་སྐད་ཡིག་མུ་མཐུད་རྒྱུན་འཛིན་ཐུབ་ཐབས་སུ་དམིགས་ཏེ་སྲིད་བྱུས་གསར་པ་དེ་བཟོ་གི་ཡོད་པ་དང་། སྲིད་བྱུས་དེའི་ནང་སྐད་ཡིག་མི་ཉམས་རྒྱུན་འཛིན་བྱེད་པར་བོད་མིའི་སྒྲིག་འཛུགས་དང་། སློབ་གྲྭ ཕ་མ། བོད་མིའི་སྤྱི་ཚོགས་ཁྱོན་ཡོངས་ལ་ལས་འགན་གང་ཡོད་གསལ་སྟོན་བྱེད་ཀྱི་ཡོད་པ་དང་། དམིགས་བསལ་ད་ལྟའི་མི་བཟོས་རིག་ནུས་ཀྱི་དུས་སྐབས་སུ་བོད་ཀྱི་སྐད་ཡིག་རྒྱུན་འཛིན་ལས་དོན་ནང་མི་བཟོས་རིག་ནུས་ཀྱང་བེད་སྤྱོད་བྱེད་ཀྱི་ཡོད་སྐོར་གསལ་བཤད་གནང་འདུག དེ་མ་ཟད་བོད་མིའི་སྒྲིག་འཛུགས་ནས་ལོ་ལྟར་ཟླ་བ་ […] The post རྒྱ་ནག་གི་མི་རིགས་མཐུན་སྒྲིལ་ཁྲིམས་ཡིག་ལ་གདོང་ལེན་ཆེད་བོད་མིའི་སྒྲིག་འཛུག་ནས་སྐད་ཡིག་སྲིད་བྱུས་གཏན་འབེབས་གནང་འཆར་འདུག appeared first on vot.

ཉེ་ལམ་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་རྒྱལ་ཡོངས་བོད་ཀྱི་གསོ་བ་རིག་པའི་ཚོགས་ཆེན་ཐེངས་བཞི་པ་སྟེ་བོད་ཀྱི་གསོ་བ་རིག་པའི་ཉིན་མོ་སྲུང་བརྩི་དང་བསྟུན་ནས་འཚོགས་ཡོད་པ་དང་འབྲེལ།  ཚོགས་ཆེན་ཐོག་བོད་ཀྱི་གསོ་བ་རིག་པའི་ཉིན་མོ་དེ་བཞིན་བོད་མིའི་སྒྲིག་འཛུགས་ཀྱིས་ངོས་ནས་གཞུང་འབྲེལ་ཐོག་སྲུང་བརྩི་དགོས་གལ་སོགས་གྲོས་ཆོད་ ༡༢ ཙམ་གཏན་འབེབས་གནང་འདུག ཐེངས་འདིའི་རྒྱལ་ཡོངས་བོད་ཀྱི་གསོ་བ་རིག་པའི་ཚོགས་ཆེན་དེ་བཞིན་བོད་མིའི་སྒྲིག་འཛུགས་ཀྱི་མཐུན་འགྱུར་དང་བོད་ཀྱི་གསོ་བ་རིག་པའི་ལྷན་ཚོགས་ཀྱི་གོ་སྒྲིག་འོག་ཟླ་འདིའི་ཕྱི་ཚེས་ ༡༡ དང་ ༡༢ བཅས་ཉིན་གྲངས་རིང་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ཨ་ཏི་ཤ་ཚོགས་ཁང་དུ་འཚོགས་ཡོད་པ་དང་།  ཚོགས་ཆེན་དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་པདྨ་མཚོ་མཆོག་ཆེད་ཕེབས་གནང་ཡོད་པ་དང་།  དེ་བཞིན་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་རིགས་བདག་སློབ་དཔོན་ཆེན་མོ་དབང་ཕྱུག་རྡོ་རྗེ་ནེ་གི་ལགས་དང་།  རིགས་དྲུང་ Sunita Chandra ལགས།  ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་གསོ་བ་རིག་པའི་སྡེ་ཚན་གྱི་འགན་འཛིན་སློབ་དཔོན་ཆེན་མོ་རག་རྡོ་བློ་བཟང་བསྟན་འཛིན་ལགས།  གཞན་ཡང་མཇུག་སྡོམ་མཛད་སྒོའི་སྐུ་མགྲོན་དུ་འགྲོ་ཕན་བོད་ཀྱི་སྨན་རྩིས་ཁང་གི་དབུ་འཛིན་ཚེ་རིང་ཆོས་འཛོམས་ལགས་ཆེད་ཕེབས་གནང་ཡོད་པ་བཅས།  ཚོགས་ཆེན་ཐོག་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་གཙོས་པའི་གསོ་བ་རིག་པའི་མཁས་པ་ ༡༡ དང་དཔྱད་རྩོམ་མཁས་དབང་ ༡༡ གདན་ཞུས་གནང་ཡོད་པ་མ་ཟད།  མཐོ་སློབ་ཁག་ ༥ ཙམ་ནས་སློབ་ཕྲུག་བསྡོམས་པས་ཁྱོན་མི་གྲངས་ ༡༤༠ ལྷག་ནས་མཉམ་ཞུགས་གནང་ཡོད་པ་རེད།  དེ་ཡང་འདི་ག་རླུང་འཕྲིན་ཁང་གིས་ཐེངས་འདིའི་ཚོགས་ཆེན་གོ་སྒྲིག་གནང་མཁན་བོད་ཀྱི་གསོ་བ་རིག་པའི་ལྷན་ཚོགས་ཀྱི་ད་ལྟའི་ཚོགས་གཙོ་སྨན་པ་ཐུབ་བསྟན་ཀུན་འཕེལ་ལགས་སུ་བཀའ་འདྲི་ཞུ་སྐབས་ཁོང་གིས།  ད་ལན་གྱི་ཚོགས་ཆེན་ཐོག་ཚོགས་བཅར་བ་ནང་ཕན་ཚུན་གྲོས་བསྡུར་རིམ་པ་བྱུང་བའི་ཁྲོད།  སྨན་པ་ཧ་ལམ་ཚང་མས་འདི་ལྟ་བུའི་ཚོགས་ཆེན་ལོ་ལྟར་འཚོག་དགོས་པ་དང་།  མང་ཚོགས་ཁྲོད་བོད་ཀྱི་གསོ་བ་རིག་པའི་བསླབ་པ་སློབ་གཉེར་དང་འབྲེལ་བའི་གོ་རྟོགས་ཀྱི་ལས་འགུལ་གང་མང་སྤེལ་དགོས་གལ།  དེ་བཞིན་བོད་ཀྱི་སྐད་ཡིག་སྲུང་སྐྱོབ་ཕྱིར་དུ་སྐད་ཡིག་གི་སྤུས་ཚད་ཡར་རྒྱས་གཏོང་དགོས་པ་དང་།  གཙོ་བོ་བོད་ཀྱི་གསོ་བ་རིག་པའི་ཉིན་མོ་ཞེས་སྲུང་བརྩི་ཞུས་སྲོལ་ཡོད་པ་དེ་མ་འོངས་པར་བོད་མིའི་སྒྲིག་འཛུགས་ཀྱི་ངོས་ནས་གཞུང་འབྲེལ་ཐོག་སྲུང་བརྩི་ཞུ་དགོས་པ་སོགས་གྲོས་ཆོད་ ༡༢ ཙམ་གཏན་འབེབས་བྱུང་སྐོར་གསུངས་སོང་།   སྤྱིར་ཚོགས་ཆེན་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་པདྨ་མཚོ་མཆོག་གིས་གསུང་བཤད་ཁྲོད།  བོད་ནང་བོད་མིའི་ངོ་བོ་དང་རིག་གཞུང་མི་ཉམས་རྒྱུན་འཛིན་ཐོག་དམ་དྲག་ཆེན་པོ་ཡོད་སྐོར་དྲན་སྐུལ་དང་སྦྲགས།  བཙན་བྱོལ་བོད་མི་ཚོའི་ངོས་ནས་རང་མི་རིགས་ཀྱི་ངོ་བོ་དང་རིག་གཞུང་སྲུང་སྐྱོབ་དང་སྲ་བརྟན་ཡོང་ཕྱིར་དགོས་ངེས་ཀྱི་ལས་འགན་ཇི་ཡོད་འཁུར་དགོས་གལ་སྐོར་གསུངས་འདུག་པ་དང་།  གསོ་རིག་པའི་སྒྲིག་འཛུགས་དེ་བཞིན་དེང་དུས་ཀྱི་དགོས་མཁོ་དང་མཐུན་པའི་ཐོག་གོང་འཕེལ་གཏོང་དགོས་པ་མ་ཟད།  དེའི་ཕན་ཡོན་འཛམ་གླིང་ཡོངས་ལ་ཁྱབ་སྤེལ་ཕྱིར་དུ་ཤེས་ཡོན་སྤུས་ཚད་ལྡན་པ་དང་གསར་གཏོད་རང་བཞིན།  མཉམ་འབྲེལ་གྱི་འབད་བརྩོན་བཅས་དགོས་གལ་ཡིན་པ་གསུངས་འདུག  ལྷག་པར་དུ་བཀའ་བློན་མཆོག་གིས་གསོ་བ་རིག་པའི་སྒྲིག་འཛུགས་དང་ཉམས་ལེན་པ་ནང་ཁུལ་ཕན་ཚུན་མཐུན་སྒྲིལ་གྱིས་མཉམ་ལས་གནང་ཐོག  ཐེངས་འདིའི་ཚོགས་ཆེན་ཐོག་གཏན་འབེབས་བྱུང་བའི་གྲོས་ཆོད་ཁག་སྐབས་རྗེས་མའི་ཚོགས་ཆེན་མ་འཚོགས་གོང་དུ་ལག་བསྟར་གནད་ལ་སྨིན་པ་ཞིག་ཡོང་བའི་སྐུལ་མ་གནང་འདུག  ཉེ་ལམ་རྒྱལ་ཡོངས་བོད་ཀྱི་གསོ་བ་རིག་པའི་ཚོགས་ཆེན་ཐེངས་བཞི་པའི་འདུ་འཛོམས་དང་བསྟུན་ནས་ཕྱི་ཚེས་ ༡༣ དང་ ༡༤ བཅས་ཉིན་གྲངས་གཉིས་རིང་བོད་ཀྱི་གསོ་བ་རིག་པའི་འགན་འཛིན་ལྷན་ཚོགས་ཀྱི་ཚོགས་འདུ་ཡང་འཚོགས་ཡོད་པ་རེད་འདུག རྩ་བའི་ཐེངས་འདིར་རྒྱལ་ཡོངས་བོད་ཀྱི་གསོ་བ་རིག་པའི་ཚོགས་ཆེན་ཐེངས་བཞི་པ་དེ་བཞིན་ལོ་ངོ་དྲུག་གི་རྗེས་སུ་འཚོགས་པ་ཞིག་ཆགས་ཀྱི་འདུག་ལ།  དེ་ཡང་ཚོགས་ཆེན་འདི་ལྟ་བུ་ཡང་སེ་འཚོགས་ཐུབ་མེད་པའི་རྒྱུ་རྐྱེན་གཙོ་བོ་དེ་དཔལ་འབྱོར་གྱི་དཀའ་ངལ་སོགས་ལ་ཐུག་ཡོད་པ་རེད་འདུག The post རྒྱལ་ཡོངས་བོད་ཀྱི་གསོ་བ་རིག་པའི་ཚོགས་ཆེན་ཐེངས་ ༤ པའི་ཐོག་བོད་ཀྱི་གསོ་བ་རིག་པའི་ཉིན་མོ་གཞུང་འབྲེལ་ཐོག་སྲུང་བརྩི་དགོས་པའི་གྲོས་ཆོད་གཏན་འབེབས། appeared first on vot.

རྒྱ་ནག་གི་སྲིད་འཛིན་ཞི་ཅིན་ཕིང་ཟླ་བ་འདིའི་ཚེས་ ༢༤ ཉིན་ཨ་རིར་སླེབས་ལ་ཉེ་བ་དང་བསྟུན། ཁ་སང་ཚེས་ ༡༥ ཉིན་ཨ་རིའི་གྲོས་ཚོགས་འོག་མའི་མང་གཙོ་ཚོགས་པའི་འཐུས་མི་ Rohit Khanna མཆོག་དང་། Jim McGovern མཆོག་གིས་དབུ་ཁྲིད་པའི་ཨ་རི་དང་རྒྱ་ནག་དམར་ཤོག་ཚོགས་པའི་བར་གྱི་ཐབས་ཇུས་འགྲན་སྡུར་ཐད་ཀྱི་དམིགས་བསལ་ཆེད་འཛུགས་ཚོགས་ཆུང་དང་། ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ལས་དོན་ཚོགས་ཆུང་གིས། བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་བབ་སྐོར་ལ་ཉན་ཞིབ་ཚོགས་འདུ་ཞིག་འཚོགས་འདུག་པ་དང་། སྐབས་དེར་ International Tibet Media Organization ཞེས་རྒྱལ་སྤྱིའི་བོད་ཀྱི་གསར་འགོད་སྒྲིག་འཛུགས་ཀྱི་འགན་འཛིན་དཔལ་ལྡན་རྒྱལ་ལགས་ཀྱིས། ད་ལྟའི་བོད་ནང་གི་ཛ་དྲག་གི་གནས་སྟངས་སྙན་སེང་ཞུས་པ་མ་ཟད། དེ་འབྲེལ་རྒྱ་ནག་གཞུང་ལ་འགན་ཁུར་ཡོང་བ་དང་། བོད་མིའི་གཞི་རྩའི་ཐོབ་ཐང་སྲུང་སྐྱོབ་སླད་ཨ་རིའི་སྲིད་འཛིན་ངོས་ནས་ཞི་དང་ཐུག་འཕྲད་སྐབས་བོད་ཀྱི་གནད་དོན་ཐད་ཀར་གླེང་དགོས་པའི་སྐུལ་མ་གནང་འདུག The Void in China Policy: Why Human Rights Must Be on Trump's Agenda with Xi at the White House འམ་རྒྱ་ནག་སྲིད་ཇུས་ཁྲོད་ཀྱི་སྟོང་ཆ། ཞི་དང་ཐུག་འཕྲད་སྐབས་གྲོས་མོལ་ཁྲོད་འགྲོ་བ་མིའི་ཐོབ་ཐང་དེ་ཉིད་དོན་ཚན་གཙོ་བོར་འཇོག་དགོས་པའི་རྒྱུ་མཚན་ཞེས་པའི་ཉན་ཞིབ་ཚོགས་འདུ་དེའི་ཐོག དཔལ་ལྡན་རྒྱལ་ལགས་དང་ལྷན་ Uyghur Post ཞེས་པའི་གསར་ཁང་གསར་འཛུགས་གནང་མཁན་དང་འགན་འཛིན་ Tahir Imin ལགས་དང་། Pennsylvania གཙུག་ལག་སློབ་གཉེར་ཁང་གི་ཨ་རྒྱ་གཉིས་ཀྱི་མ་འོངས་པའི་འབྲེལ་ལམ་སྐོར་གྱི་ལས་གཞིའི་ལས་བྱེད་ Yaqiu Wang ལགས། […] The post ཞི་ཅིན་ཕིང་ཨ་རིར་འབྱོར་འཆར་དང་བསྟུན་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་བབ་སྐོར་ལ་ཉན་ཞིབ་འཚོགས་འདུག appeared first on vot.

ཨ་རིའི་ Anthropic བཟོ་ལས་ཁང་གིས་གཉེར་བའི་ཀ་ལོ་ཊི་Claude མི་བཟོས་རིག་ནུས་དེ། རྒྱ་ནག་ནང་ནས་བཙན་བྱོལ་བོད་མིའི་སྒྲིག་འཛུགས་དང་། བོད་བརྒྱུད་ནང་པའི་ཚོགས་པ་ཐེ་བའི་རྒྱ་ནག་ལ་ངོ་རྒོལ་བྱེད་མཁན་རྣམས་ཀྱི་གནས་ཚུལ་མཁོ་སྒྲུབ་དང་སོ་མྱུལ་དྲག་གནོན་བྱེད་རྒྱུར་བེད་སྤྱོད་བྱེད་ཀྱི་ཡོད་པ་ཤེས་རྟོགས་བྱུང་མ་ཐག བཟོ་ལས་ཁང་དེ་ཉིད་ནས་སོ་མྱུལ་བྱེད་ལས་དེ་དག་བཀག་སྡོམ་བྱས་པ་ཡོད་གསལ་བཤད་བྱས་འདུག དེ་ཡང་ཟླ་བ་འདིའི་ཚེས་ ༡༡ ཉིན་ཨ་རིའི་Anthropic བཟོ་ལས་ཁང་གིས་བཏོན་པའི་སྙན་ཐོའི་ནང་དུ་འདས་པའི་ཟླ་བ་བརྒྱད་ནང་རྒྱ་ནག་དང་། ཨི་རན། ནུབ་ཨ་ཕི་རི་ཀ་ནས་ཀ་ལོ་ཊི་མི་བཟོས་རིག་ནུས་བེད་སྤྱོད་བྱས་ནས། རྒྱལ་ཁབ་དེ་དག་གི་གྲངས་ཉུང་མི་རིགས་དང། སྲིད་གཞུང་ལ་ངོ་རྒོལ་བྱེད་མཁན་རྣམས་ཀྱི་སྒེར་གྱི་གནས་ཚུལ་མཁོ་སྒྲུབ་ཀྱིས། སོ་མྱུལ་ལྟ་སྲུང་དང་དྲྭ་ཐོག་འཇབ་རྒོལ་བྱས་པ་མ་ཚད། ལྷག་པར་དུ་རྒྱ་ནག་ལ་ཁ་གཏད་ངོ་རྒོལ་བྱེད་མཁན་བཙན་བྱོལ་བོད་མིའི་སྒྲིག་འཛུགས་དང་། ཆོས་ཕྱོགས་ཀྱི་དབུ་ཁྲིད་སོགས་ཚོགས་སྒེར་ཁག་གི་གནས་ཚུལ་མཁོ་སྒྲུབ་བྱེད་པར་མི་བཟོས་རིག་ནུས་དེ་ཉིད་བཀོལ་སྤྱོད་ལོག་པ་བཏང་ཡོད་པ་གསལ་བཤད་བྱས་འདུག སྙན་ཐོ་དེའི་ནང་དུ་རྒྱ་ནག་དང་འབྲེལ་བ་ཡོད་པའི་བཀོལ་སྤྱོད་པ་དེ་ཡིས། ཀོ་ལི་ཊི་མི་བཟོས་རིག་ནུས་དེ་ལ། བོད་མིའི་སྒྲིག་འཛུགས་ནི་ཁྲིམས་འགལ་གྱི་ཁ་བྲལ་བའི་སྒྲིག་འཛུགས་ཤིག་ཡིན་ལུགས་སོགས་རྒྱ་ནག་གི་ལངས་ཕྱོགས་སློབ་སྟོན་བྱས་པ་མ་ཚད། དེ་དང་འབྲེལ་བའི་གནས་ཚུལ་ལོག་པ་འཁྱབ་སྤེལ་བྱེད་པར་མི་བཟོས་རིག་ནུས་དེ་བཀོལ་སྤྱོད་བྱས་ཡོད་པ་གསལ་སྟོན་བྱས་འདུག གཞན་ཡང་ཨན་ཐོ་རོ་པིག་ (anthropic) གིས་རྒྱ་ནག་དང་འབྲེལ་བ་ཡོད་པའི་བཀོད་སྤྱོད་པ་གཞན་ཞིག་གིས། མི་མང་གི་བསམ་ཚུལ་དང་གནས་ཚུལ་ཞིབ་གཤེར་བྱེད་པར་ཀ་ལོ་ཊི་མི་བཟོས་རིག་ནུས་བེད་སྤྱོད་བྱས་ཡོད་པ་དང་། ཞིབ་གཤེར་སོ་ཉུལ་བྱེད་ཡུལ་ཁོངས་སུ་བོད་མི་དང་། ཡུ་གུར། རྒྱ་རིགས་མང་གཙོ་དོན་གཉེར་བ། ལས་འགུལ་བ་སོགས་ཡོད་པ་བརྗོད་འདུག ཨན་ཐོ་རོ་པིག་གིས་བོད་དོན་སྐོར་སོ་མྱུལ་བྱེད་མཁན་གཉིས་ཀྱི་ནང་ནས་གཅིག་ནི་རྒྱ་ནག་ནང་དུ་རྟེན་གཞི་བྱས་ཡོད་པ་དང་། དེ་ཉིད་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་གསང་བའི་ལས་དོན་དང་འབྲེལ་བ་ཡོད་ལ། སོ་མྱུལ་བྱེད་མཁན་གཉིས་པ་དེ་རྒྱ་ནག་གཞུང་གི་བདེ་འཇགས་དང་། འཐབ་ཕྱོགས་གཅིག་འགྱུར་ཁང་དང་འབྲེལ་བ་ཡོད་པའི་ཚོང་ལས་གཉེར་མཁན་ཞིག་ཡིན་པ་བསྒྲགས་འདུག དེ་མ་ཟད་སྙན་ཐོ་དེའི་ནང་དུ་ཨི་རན་དང་། ནུབ་ཨ་ཕི་རི་ཀ་ནས་སྲིད་གཞུང་ལ་ངོ་རྒོལ་དང་མང་གཙོ་དོན་གཉེར་བ་སོགས་ལས་འགུལ་བ་ཚོའི་གནས་ཚུལ་མཁོ་སྒྲུབ་དང་། སོ་མྱུལ་དམ་བསྒྲགས་བྱེད་རྒྱུར་ཨན་ཐོ་རོ་པིག་གི་མི་བཟོས་རིག་ནུས་ཀ་ལོ་ཊི་བེད་སྤྱོད་བྱས་པ་གསལ་སྟོན་བྱས་འདུག ཨན་ཐོ་རོ་པིག་གི་སྙན་ཐོ་ལྟར་ན། མི་བཟོས་རིག་ནུས་ཀྱི་རམ་འདེགས་འོག་སོ་མྱུལ་ལྟ་སྲུང་གི་བྱེད་ལས་དེ་ཕྱི་ལོ་ ༢༠༢༥ ཟླ་བ་ ༡༢ ནས་ཕྱི་ལོ་ ༢༠༢༦ ཟླ་བ་ ༨ བར་དུ་བྱུང་ཡོད་པ་དང་། དེའི་ནང་དུ་མི་བཟོས་རིག་ནུས་ཀྱི་དཔེ་གཞི་ (Claude Haiku) (Sonnet) (Opus)བེད་སྤྱོད་བྱས་ཡོད་ལ། རྒྱ་ནག་དང་ཨི་རན་སོགས་ནས་མི་བཟོས་རིག་ནུས་དེ་བེད་སྤྱོད་ལོག་པ་གཏོང་བཞིན་པ་ཤེས་རྟོགས་བྱུང་མ་ཐག ཨན་ཐོ་རོ་པིག་བཟོ་ལས་ཁང་གིས་བྱེད་ལས་དེ་དག་ལ་བཀག་སྡོམ་དང་། འབྱུང་འགྱུར་གནས་ཚུལ་རྩད་གཅོད་བྱ་རྒྱུའི་ནུས་པ་ཆེ་རུ་བཏང་ཡོད་པ་བརྗོད་འདུག། […] The post རྒྱ་ནག་ནས་མི་བཟོས་རིག་ནུས་བེད་སྤྱོད་བྱས་ཏེ་བཙན་བྱོལ་བོད་མིའི་གནས་ཚུལ་མཁོ་སྒྲུབ་བྱས་ཡོད་པ་ཐེར་འདོན། appeared first on vot.

དེ་རིང་ཕྱི་ལོ་ ༢༠༢༦ ཕྱི་ཟླ་ ༩ ཚེས་ ༡༥ ཉིན་གྱི་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ།  བོད་ཀྱི་གཏམ་བརྗོད་ཚན་པའི་ཚོགས་མི་དང་འཁྲབ་སྟོན་རུ་ཁག་ཅིག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་གྱིས།  ཚན་པའི་ངོས་ནས་ད་ལྟའི་ཆར་ཕ་ཡུལ་ཞེས་པའི་བོད་ལ་རྒྱ་ནག་གིས་ཐོག་མར་བཙན་འཛུལ་བྱས་པའི་སྐོར་གྱི་དངོས་བྱུང་ལོ་རྒྱུས་ལ་གཞི་བཞག་པའི་གཏམ་བརྗོད་གསར་པ་ཞིག་བཟོ་བསྐྲུན་གནང་ཡོད་པའི་སྐོར་༸གང་ཉིད་མཆོག་ལ་སྙན་སེང་ཞུས་ཏེ།  གཏམ་བརྗོད་དེ་བཞིན་རིང་མིན་རྒྱ་གར་རྒྱལ་ཡོངས་དང་རིམ་པས་ཕྱི་རྒྱལ་ཁག་ཏུ་གཟིགས་འབུལ་གྱིས་སྐོར་སྐྱོད་གནང་འཆར་ཡོད་པར་བརྟེན།  ལས་གཞི་དེ་ཉིད་ལམ་ལྷོང་ཡོང་ཆེད་དུ་༸གོང་ས་མཆོག་ལ་ཐུགས་སྨོན་མཛད་གནང་ཡོང་བའི་གསོལ་འདེབས་ཞུས་འདུག  འདི་གའི་གསར་འགོད་པས་དེ་རིང་གི་མཇལ་ཁ་གྲུབ་མཚམས་བོད་ཀྱི་གཏམ་བརྗོད་ཚན་པའི་འགན་འཛིན་ལྷག་པ་ཚེ་རིང་ལགས་སུ་ཁོང་རྣམ་པས་བཟོ་བསྐྲུན་གནང་བའི་ཕ་ཡུལ་ཞེས་པའི་གཏམ་བརྗོད་དེའི་ནང་དོན་སོགས་ཀྱི་སྐོར་བཅར་འདྲི་ཞུས་ཡོད།  དེ་བཞིན་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ།  ཕྱི་ལོ་ ༡༩༨༧ ལོར་བོད་ཀྱི་རྒྱལ་ས་ལྷ་སར་བོད་མིས་ཞི་རྒོལ་སྐབས་ཀྱི་དོན་རྐྱེན་དངོས་བྱུང་དཔར་ལེན་གནང་མཁན་ John Ackerly ལགས་དང་ Blake Kerr ལགས་རྣམ་གཉིས་ནས་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་འདུག  རྩ་བའི་སྐུ་ཞབས་ John Ackerly ལགས་དང་ Blake Kerr ལགས་རྣམ་གཉིས་ནི་ཁ་སང་ཕྱི་ཚེས་ ༡༤ ཉིན་རྒྱབ་བོད་ཀྱི་འགྲེམས་སྟོན་ཁང་གིས་གོ་སྒྲིག་ཞུས་པའི་མི་རབས་གསར་པའི་ཞི་རྒོལ་སྤེལ་ནས་བགྲང་བྱ་ ༤༠ འཁོར་བའི་ཕྱིར་དྲན་ཞེས་པའི་དུས་ཐུང་འགྲེམས་སྟོན་ཞིག་འཚོགས་ཡོད་པ་དེའི་ཐོག་སྐུ་མགྲོན་གྱི་ངོ་བོར་ཕེབས་པ་ཞིག་ཆགས་ཀྱི་འདུག མཇལ་ཁ་གྲུབ་མཚམས་ཁོང་རྣམ་གཉིས་ཀྱིས་འདི་གའི་གསར་འགོད་པའི་དྲི་བར་ལན་འདེབས་ཁྲོད།  ༸གོང་ས་མཆོག་དང་ལྷན་དུ་དེ་རིང་མཇལ་ཁའི་སྐབས་སྐར་མ་ལྔ་ཙམ་བཀའ་མོལ་ཞུ་རྒྱུ་བྱུང་བར་སྐལ་པ་བཟང་པོ་བྱུང་སོང་ཞེས་དང་།  ༸གང་ཉིད་མཆོག་གིས་༸སྐུ་ཉིད་ཀྱི་ཐུགས་སྐྱེད་དམ་བཅའི་སྐོར་དང་འབྲེལ།  བོད་ཀྱི་ཆོས་དང་རིག་གཞུང་ཐོག་རྒྱལ་སྤྱིའི་སྤྱི་ཚོགས་ནས་དོ་སྣང་ཡོང་ཐབས་ལ་རྒྱབ་སྐྱོར་གྱི་སྐུལ་མ་མཛད་སོང་བའི་སྐོར་གསུངས་སོང་ལ།  སྐུ་ཞབས་ཁོང་རྣམ་གཉིས་ཀྱིས་ད་དུང་བཙན་བྱོལ་བོད་མི་གཞོན་སྐྱེས་ཚོའི་ངོས་ནས་བོད་ནང་གི་དངོས་ཡོད་གནས་ཚུལ་ཐོག་དོ་སྣང་དགོས་གལ་མ་ཟད།  གཞིས་བྱེས་གཉིས་ཀྱི་གཞོན་སྐྱེས་ཕན་ཚུན་འབྲེལ་བ་དམ་གཟབ་དགོས་པའི་སྐོར་འགྲེལ་བརྗོད་ཀྱིས།  ལོ་རྒྱུས་ཐོག་ནས་ཀྱང་འཛམ་གླིང་སྤྱི་ཚོགས་གང་སར་གསར་བརྗེའི་གྱེན་ལངས་ཡོངས་རྫོགས་ཐོག་མར་གཞོན་སྐྱེས་ཚོས་སྣེ་ཁྲིད་ཡོད་སྟབས།  རྒྱ་ནག་མི་མང་དང་འབྲེལ་བ་གནང་དགོས་གལ་དང་།  དེས་ཁྱད་པར་ཆེན་པོ་ཞིག་འབྱུང་ངེས་རེད་ཅེས།  རང་དབང་འཐབ་རྩོད་ཞེས་པ་དེ་གཤམ་ནས་ཐོད་ལ་ཡོང་རྒྱུ་ལས་གོང་ནས་འོག་ལ་ཡོང་རྒྱུ་མིན་པ་གསུངས་སོང་། མ་ཟད་རྒྱ་ནག་ལ་བརྡ་ལན་ཚུལ་དུ་སྐུ་ཞབས་ཁོང་རྣམ་གཉིས་ཀྱིས།  རྒྱ་ནག་དམར་ཤོག་སྲིད་གཞུང་ངོས་ནས་བཙན་ཤེད་ཀྱི་སྲིད་བྱུས་ལག་བསྟར་བྱེད་རྒྱུ་ལས་ལྡོག་སྟེ།  བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མཁོ་སྤྲོད་དང་བོད་མིའི་རིན་ཐང་ལ་ཆེ་མཐོང་སྤྲད་དགོས་གལ་ཡིན་པས།  གལ་ཏེ་དེ་ལྟར་མ་བྱས་ན།  བོད་མི་ཚོས་དུས་རྟག་ཏུ་རྒྱ་ནག་སྲིད་གཞུང་ལ་ངོ་རྒོལ་གནང་རྒྱུ་ཡིན་པ་གསུངས་སོང་ལ།  རྒྱ་ནག་གཞུང་ངོས་ནས་གཉིད་སད་རྒྱུ་དུས་ལ་བབས་ཡོད་པ་གསུངས་སོང་།  སྤྱིར་དེ་རིང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུ་མཁན་ཁོངས་སུ་བོད་ཀྱི་གཏམ་བརྗོད་ཚན་པའི་འཁྲབ་སྟོན་པ་དང་ལས་བྱེད།  དེ་བཞིན་ John Ackerly ལགས་དང་ Blake […] The post བོད་ཀྱི་གཏམ་བརྗོད་ཚན་པས་རིང་མིན་ཕ་ཡུལ་ཞེས་པའི་གཏམ་བརྗོད་གསར་པ་ཞིག་གཟིགས་འབུལ་གྱིས་སྐོར་སྐྱོད་གནང་རྒྱུ། appeared first on vot.

དེ་རིང་བཞུགས་སྒར་དུ་རྟེན་གཞི་བྱས་པའི་བོད་ཀྱི་དུས་བབ་གསར་ཁང་དབུས་བརྙེས་ནས་མི་ལོ་ ༣༠ འཁོར་བའི་དུས་དྲན་སྲུང་བརྩི་ཞུས་གནང་སོང་། བོད་ཀྱི་དུས་བབ་གསར་ཁང་དེ་བཞིན་ཐོག་མར་ཕྱི་ལོ་ ༡༩༩༦ ལོའི་ཕྱི་ཟླ་ ༩ པའི་ཚེས་ ༢ ཉིན་བོད་ཀྱི་དམངས་གཙོའི་དུས་ཆེན་དང་སྟབས་བསྟུན་ནས་བོད་ཀྱི་དུས་བབ་གསར་ཤོག་ཐོག་མ་དེ་འདོན་སྤེལ་གནང་བའི་རྗེས་སུ། འདི་ལོའི་ཕྱི་ཟླ་ ༩ པའི་བར་ཁྱོན་བསྡོམས་གསར་ཤོག་འདོན་ཐེངས་ ༡༠༤༩ སྤེལ་ཡོད་པ་དང་འབྲེལ། བཙན་བྱོལ་ནང་བོད་ཀྱི་སྐད་ཡིག་ཐོག་གསར་ཤོག་རྒྱུན་རིང་ཤོས་སྤེལ་མཁན་གྱི་གསར་ཁང་ཞིག་ཆགས་ཀྱི་ཡོད་པ་རེད། དེ་ཡང་དེ་རིང་བོད་མིའི་སྒྲིག་འཛུགས་ཀྱི་སྤྱི་ཐབ་ཡང་སྟེང་ཚོགས་ཁང་དུ་བོད་མིའི་སྒྲིག་འཛུགས་ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་སྤེན་པ་ཚེ་རིང་མཆོག་སྐུ་མགྲོན་གཙོ་བོར་གདན་ཞུས་ཀྱིས་ཉིན་མོ་དེ་སྲུང་བརྩི་གནང་སོང་བའི་ཐོག  བོད་ཀྱི་དུས་བབ་གསར་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ལུང་རིགས་རྒྱལ་ལགས་དང་། གསར་ཁང་གི་ད་ལྟའི་རྩོམ་སྒྲིག་པ་ཆོས་རྒྱལ་སྐྱབས་ལགས།  གསར་ཁང་གི་ལས་ཟུར་རྣམ་པ།  དེ་བཞིན་དེ་རིང་ཉིན་རྒྱབ་བོད་ཀྱི་དུས་བབ་གསར་ཁང་བགྲོ་གླེང་ནང་གཏམ་བཤད་པའི་ཐོག་ནས་མཉམ་ཞུགས་གནང་མཁན་རང་དབང་གསར་འགོད་པ་དང་བོད་རིག་པ་བ་ Vijay Kranti ལགས་དང་། འདི་ག་ནོར་ཝེ་བོད་ཀྱི་རླུང་འཕྲིན་ཁང་གི་སྤྱི་ཁྱབ་རྩོམ་སྒྲིག་པ་བསྟན་འཛིན་དཔལ་སྒྲོན་ལགས།  གློག་བརྙན་འཁྲབ་ཁྲིད་པ་བསྟན་འཛིན་ཚེ་བརྟན་ཕྱོགས་ལེགས་ལགས་ཀྱི་གཙོས། བོད་པའི་གསར་ཁང་གཞན་ཁག་གི་སྐུ་ཚབ་རྣམ་པ་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ་བཅས་ལྷན་འཛོམས་གནང་སོང་། མཛད་སྒོའི་ཐོག་སྐུ་མགྲོན་གཙོ་བོ་ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་སྤེན་པ་ཚེ་རིང་མཆོག་གིས། གསར་འགྱུར་བརྒྱུད་ལམ་དེ་དག་མང་གཙོའི་ཀ་བ་བཞི་པ་ཙམ་མ་ཟད། སྤྱི་ཚོགས་ཀྱི་མེ་ལོང་ལྟ་བུ་ཆགས་ཀྱི་ཡོད་པ་དང་།  གསར་ཁང་ཁག་གི་བཏོན་པའི་གནས་ཚུལ་རྣམས་མ་འོངས་པའི་དཔྱད་ཞིབ་ཀྱི་ཡུལ་ཆགས་འགྲོ་ཡི་ཡོད་པར།  དེ་ལ་གཞིགས་པའི་འགན་ཁུར་བླང་བའི་ཐོག་ནས་གནས་ཚུལ་སྤེལ་དགོས་གལ་ཡིན་པ་དང་། བོད་ཀྱི་སྐད་ཡིག་སྲུང་སྐྱོབ་དང་ཁྱབ་སྤེལ་བྱེད་དགོས་གལ་ཡིན་སྐོར་གྱི་ལམ་སྟོན་གསུང་བཤད་གནང་སོང་། དེ་བཞིན་སྲིད་སྐྱོང་མཆོག་གིས་གསར་ཁང་བཙུགས་ཡག་ལ་དཀའ་ངལ་མེད་ཀྱང་རྒྱུན་གནས་ཐུབ་ཡག་ཧ་ཅང་ཁག་པོ་ཡོད་སྟབས། དུས་བབ་གསར་ཁང་གི་ལོ་ངོ་ ༣༠ རིང་ལ་རྒྱུན་སྐྱོང་གནང་བར་བསྔགས་བརྗོད་དང་སྦྲགས་མུ་མཐུད་རྒྱུན་སྐྱོང་གནང་ཐུབ་པའི་རེ་བ་ཡོད་སྐོར་དང་། སྤྱིར་བརྒྱུད་ལམ་ཁག་གི་ལས་འགན་གཙོ་བོ་དེ་གོ་རྟོགས་སྤེལ་ཡག་དེ་ཡིན་པ་དང་། གནས་ཚུལ་དྲང་བདེན་དང་ཆ་ཚང་བ་སྤེལ་དགོས་གལ་ཡིན་པ།  གལ་ཏེ་དེ་ལྟར་མ་བྱུང་བ་ཡིན་ན་དཀྲོག་གཏམ་ཆགས་རྒྱུ་ཡིན་པ་ལྟར། བརྒྱུད་ལམ་ཁག་གི་ཕྱོགས་ཕན་ཚུན་ཚང་མའི་བསམ་ཚུལ་མཉམ་དུ་སྤུངས་ཏེ་མང་ཚོགས་ལ་གོ་རྟོགས་སྤེལ་མཁན་ཞིག་བྱེད་དགོས་གལ་ཡིན་སྐོར་དང་འབྲེལ།  སྤྱི་ཚོགས་ལ་གནས་ཚུལ་ཚད་ལྡན་མཁོ་སྤྲོད་བྱ་དགོས་ན་བརྒྱུད་ལམ་ཁག་ནས་མཁས་པའི་ཚོགས་ཆུང་བཙུགས་ན་གནས་ཚུལ་ཆ་ཚང་བ་སྤེལ་བར་ཕན་ཐོགས་ཡོང་རྒྱུ་ཡིན་པ་དང་། ཁྲིམས་དང་སྒྲིག་གཞི་རྣམས་ལ་དོ་སྣང་གནང་དགོས་པ། སྤྱི་ཚོགས་ནང་གི་གནད་དོན་འདྲ་མིན་ཐོག་བགྲོ་གླེང་རིགས་མང་ཙམ་གོ་སྒྲིག་གནང་དགོས་པ། ལྷག་པར་དུ་སྤྱི་ཚོགས་ནང་དཀྲོག་གཏམ་ལ་ཁ་གཏད་གཅོག་ཡག་གི་ལག་ཆ་ཡག་ཤོས་དེ་ཕྱི་གསལ་ནང་གསལ་བྱེད་ཡག་འདི་ཡིན་པ་ལྟར། བོད་མིའི་སྒྲིག་འཛུགས་ཀྱི་ཕྱོགས་ནས་ཀྱང་སྲིད་བྱུས་དང་འཛིན་སྐྱོང་། ལས་འཆར་བཅས་གང་སྤྱིའི་ཐད་ཕྱི་གསལ་ནང་གསལ་གནང་ཐབས་གནང་བཞིན་ཡོད་པ་དང་། བརྒྱུད་ལམ་ཁག་གི་ངོས་ནས་ཀྱང་དེ་མཚུངས་འགན་འཁུར་བླང་བའི་ཐོག་ནས་གནང་དགོས་པ་སོགས་གསུངས་སོང་།        དེ་རིང་གི་དུས་ཚིགས་དང་བསྟུན། བོད་ཀྱི་དུས་བབ་གསར་ཁང་གིས་༼ལོ་སུམ་ཅུའི་འགྲུལ་བཞུད།༽ ཞེས་པའི་ད་བར་དུས་བབ་གསར་ཤོག་ནང་ཐོན་པའི་རྩོམ་ཡིག་དམིགས་བསལ་ ༡༡༥ འདེམས་སྒྲུག་གནང་བའི་ཆེད་དེབ་དབུ་འབྱེད་དང་། ཉིན་རྒྱབ་ཏུ་བོད་ཀྱི་གསར་འགོད་ལས་རིགས་ཀྱི་ད་ལྟའི་གནས་བབ་དང་མ་འོངས་འདུན་ལམ་ཞེས་པའི་བརྗོད་གཞིའི་ཐོག་བགྲོ་གླེང་གི་ལས་རིམ་ཞིག་ཀྱང་སྐོང་འཚོགས་གནང་ཡོད་པ་རེད། མཛད་སྒོ་གྲུབ་མཚམས་འདི་གའི་གསར་འགོད་པས་བོད་ཀྱི་དུས་བབ་གསར་ཁང་གི་རྩོམ་སྒྲིག་པ་ཆོས་རྒྱལ་སྐྱབས་ལགས་སུ་དེ་རིང་གི་དུས་ཚིགས་དང་འབྲེལ་ནས་བཅར་འདྲི་ཞུས་ཡོད།  The post བོད་ཀྱི་དུས་བབ་གསར་ཁང་དབུ་བརྙེས་ནས་མི་ལོ་ ༣༠ འཁོར་བའི་དུས་དྲན་སྲུང་བརྩི། appeared first on vot.

ཟླ་བ་འདིའི་ཚེས་ ༢༤ ཉིན་རྒྱ་ནག་གི་སྲིད་འཛིན་ཞི་ཅིན་ཕིང་ཨ་རིའི་ནང་གཞུང་འབྲེལ་ཕྱོགས་བསྐྱོད་སླེབ་འཆར་ཡོད་པ་དང་བསྟུན། བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་ཚོགས་ཆུང་བཞི་ལ་ཆ་བགོས་བྱས་ཏེ། ཨ་རིའི་གྲོས་ཚོགས་གོང་འོག་གི་ལས་ཁུངས་ ༤༥ ཙམ་ལ་ཆེད་བཅར་གྱིས་ཡིག་ཐོག་ནས་དགོས་འདུན་དོན་ཚན་བཞི་ཕུལ་བའི་བརྒྱུད་བོད་རང་བཙན་ཞུ་གཏུགས་ལས་འགུལ་ཞིག་སྤེལ་འདུག དེ་ཡང་བོད་ཀྱི་གཞོན་ནུ་ལྷན་ཚོགས་ཀྱི་ངོ་དེབ་ཐོག་དེ་འབྲེལ་གནས་ཚུལ་སྤེལ་བར་གཞིགས་ན། རྒྱ་ནག་གི་སྲིད་འཛིན་ཞི་ཅིང་ཕིང་ཨ་རིའི་རྒྱལ་སར་མ་སླེབས་པའི་ཉིན་བཅུའི་སྔོན་ཏེ། ཁ་སང་འདི་ཚེས་ ༡༤ ཉིན་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་དང་། དབུས་སྤྱི་ཁྱབ་ཚོགས་གཙོ་ཚེ་རིང་ཆོས་འཕེལ་ལགས་ཀྱི་སྣེ་ཁྲིད་འོག ནིའུ་ཡོག་དང་ནིའུ་འཇར་སི། ཝ་ཤིང་ཊོན་ཌི་སི་བཅས་སུ་གནས་སྡོད་ལྷན་ཚོགས་ཀྱི་དབུས་སའི་རྒྱུན་ལས་ལས་ཟུར་དང་ཚོགས་མི་ ༢༣ ཙམ་ཞིག་ཚོགས་ཆུང་ཁག་བཞི་ལ་བགོས་ཏེ། ཨ་རིའི་གྲོས་ཚོགས་གོང་འོག་གི་ལས་ཁུངས་ ༤༥ ཙམ་ལ་ཆེད་བཅར་གྱིས། སྲིད་འཛིན་ཊོམ་དང་ཞི་ཅིང་ཕིང་ཐུག་འཕྲད་སྐབས་ཨ་རིའི་ངོས་ནས་བོད་ཀྱི་གནད་དོན་སྐོར་ངེས་པར་གླེང་སློང་ཡོང་བ་དང་། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་བ་དེ་བོད་རང་བཙན་སླར་གསོའི་ཆེད་དུ་གནང་ཡོད་ཅིང་། ད་བར་བོད་མི་ ༡༦༠ ལྷག་གིས་རང་ལུས་མེར་བསྲེགས་གནང་བ་ཡོངས་རྫོགས་བོད་ཀྱི་རྩ་དོན་འཐབ་རྩོད་ཀྱི་ཆབ་སྲིད་གནད་དོན་ཡིན་པ། མི་རིགས་མཐུན་སྒྲིལ་ཡར་ཐོན་ལ་སྐུལ་སྤེལ་ཟེར་བའི་ཁྲིམས་ཡིག་དེ་བཞིན་བོད་ཀྱི་རིག་གཞུང་དང་མི་རིགས་བཅས་པ་རྩ་མེད་གཏོང་ཆེད་ཡིན་པས་ཁྲིམས་འཆར་དེ་ཕྱིར་འཐེན་ཡོང་བར་ཨ་རི་གཞུང་གིས་ངེས་པར་གནོན་ཤུགས་སྤྲད་དགོས་པ། དེ་བཞིན་ཨ་རིའི་ཕོ་བྲང་དཀར་པོས་བོད་དེ་ལོ་རྒྱུས་ཐོག་ནས་རང་བཙན་གྱི་རྒྱལ་ཁབ་ཅིག་དང་། རྒྱ་ནག་གིས་བཙན་འཛུལ་བྱས་པའི་རྒྱལ་ཁབ་ཅིག་ཡིིན་པའི་ངོས་འཛིན་གནང་དགོས་པ་བཅས་ཀྱི་དགོས་འདུན་དོན་ཚན་བཞིའི་ཐོག་ནས་བོད་དོན་ཞུ་གཏུགས་ཀྱི་ལས་འགུལ་སྤེལ་འདུག དེ་བཞིན་བོད་ཀྱི་གཞོན་ནུ་ལྷན་ཚོགས་ངོས་ནས་ད་ཐེངས་ཀྱི་ཞུ་གཏུག་ལས་འགུལ་དེ་ནི། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་གཙོས། བོད་ཀྱི་དཔའ་བོ་དཔའ་མོ་ཚོས་བོད་རང་བཙན་སླར་གསོའི་ཆེད་དུ་རླབས་ཆེན་གྱི་བློས་བཏང་གནང་བའི་ཐུགས་ཀྱི་རེ་འདུན་དང་། ཞལ་ཆེམས། བོད་ཀྱི་མ་འོངས་པའི་མདུན་ལམ་ནི་བོད་རང་བཙན་སླར་གསོ་ཡིན་པ་ལྟར། བོད་རང་བཙན་སླར་གསོའི་གོམ་པ་མདུན་སྐྱོད་ཀྱི་ལེའུ་གཞན་ཞིག་ཡིན་པ་མངོན་གསལ་གནང་འདུག འདི་ག་རླུང་འཕྲིན་ཁང་གིས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་སུ་ཐེངས་འདིའི་ཞུ་གཏུག་ལས་འགུལ་དང་འབྲེལ། གྲོས་ཚོགས་འཐུས་མི་སུ་དང་མཇལ་འཕྲད་བྱུང་མིན་དང་ཚུར་ཡ་ལན་ཇི་འདྲ་ཐོབ་མིན། མ་འོངས་མུ་མཐུད་ལས་འགུལ་སྤེལ་ཕྱོགས་སོགས་དང་འབྲེལ་ནས་བཅར་འདྲི་ཞུས་ཡོད། རྩ་བའི་ཉེ་ལམ་ཕྱི་ཟླ་ ༧ ཚེས་ ༡ ཉིན་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་ལག་བསྟར་བྱས་འགོ་ཚུགས་ཏེ། ཕྱི་ཚེས་ ༢ ཉིན་རྒྱལ་གཅེས་པ་བློ་དགའ་རང་བཙན་ལགས་ཀྱིས་ཨ་རིའི་རྒྱལ་ཚོགས་མདུན་དུ་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མེར་བསྲེགས་བཏང་བའི་གནས་སྟངས་འོག  བཙན་བྱོལ་བོད་མི་རྣམས་ནས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་སྤྱི་དང་། ལྷག་པར་མི་རིགས་མཐུན་སྒྲིལ་ཟེར་བའི་ཁྲིམས་ཡིག་ཐད་ངོ་རྒོལ་ཤུགས་ཆེ་བྱས་དང་བྱེད་བཞིན་པར་ཚོར་བ་རྣོ་བའི་དུས་སྐབས་ཤིག་ཡིན་སྟབས། བོད་ཀྱི་གཞོན་ནུ་ལྷན་ཚོགས་གཙོས་པའི་བོད་མིའི་ཚོགས་སྒེར་ཁག་ནས་ངོ་རྒོལ་ཤུགས་ཆེ་བྱེད་བཞིན་ཡོད་པ་རེད། དེའི་ཁྲོད་འདི་ཚེས་ ༢༤ ཉིན་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་སའི་ས་ཚིགས་ནས་རང་བཙན་གོམ་བགྲོད་ལས་འགུལ་ཞིག་འགོ་འཛུགས་བྱ་རྒྱུ་ཡིན་པའི་གསལ་བསྒྲགས་སྤེལ་འདུག དེ་བཞིན་ཉེ་ལམ་ཟླ་བ་འདིའི་ཚེས་ ༡༢ ཉིན་རྒྱ་གར་རྒྱལ་ས་ལྡི་ལིར་གོ་ལའི་ལྷོ་ཕྱོགས་མཉམ་སྦྲེལ་ལྷན་ཚོགས་ BRICS […] The post ཨ་རིའི་གྲོས་ཚོགས་གོང་འོག་གི་ལས་ཁུངས་ ༤༥ ཙམ་ལ་བོད་རང་བཙན་ཞུ་གཏུགས་ལས་འགུལ་སྤེལ་འདུག appeared first on vot.

ཁ་སང་ཕྱི་དྲོ་འདི་ག་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་བོད་ཁྱིམ་སློབ་གྲྭར་རྒྱ་ནག་གི་སྲིད་འཛིན་ཞི་ཅིན་ཕིང་ལ་ངོ་རྒོལ་བྱས་ཏེ་བཙོན་ཁང་ནས་གློད་བཀྲོལ་བྱུང་བའི་བོད་མི་ལས་འགུལ་བ་ཚོར་ས་གནས་ཀྱི་བོད་མིའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་ནས་དགའ་བསུའི་སྣེ་ལེན་ཞུས་འདུག རྒྱལ་ས་ལྡི་ལིའི་ནང་ཟླ་བ་འདིའི་ཕྱི་ཚེས་ ༡༡ ནས་རྒྱ་ནག་གི་གཙོས་པའི་འཛམ་གླིང་ལྷོ་ངོས་ཀྱི་རྒྱལ་ཁབ་ཁག་གི་ཉིན་གཉིས་ཀྱི་ BRICS ལྷན་ཚོགས་འཚོགས་ཡོད་པ་ལྟར།  རྒྱ་གར་གཞུང་ངོས་ནས་ས་གནས་སུ་སྐོར་སྲུང་བ་དང་ཉེན་སྲུང་དམག་མི་བཅས་པ་གསུམ་ཁྲི་ལྔ་སྟོང་ལྷག་འགྲེམས་འཇོགས་ཀྱིས།  གནམ་ཐང་ནས་ཚོགས་འདུ་འཚོགས་ཡུལ་བཅས་ཀྱི་ས་གནས་སོ་སོར་དམ་དྲག་ཧ་ཅང་ཆེན་པོ་ཡོད་པར་ལྟོས་མེད།  བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཁག་གཅིག་གིས་ཚོགས་འདུ་འཚོགས་ཡུལ་ཉེ་འགྲམ་གློག་གི་ཀ་བའི་སྟེང་རྒྱ་ནག་གི་སྲིད་འཛིན་ཞི་ཅིང་ཕིང་ལ་ངོ་རྒོལ་ཡོད་པའི་འབོད་ཚེག་གི་འཕྲེད་དར་དཔྱང་བ་མ་ཟད།  བོད་ཀྱི་གཞོན་ནུ་ལྷན་ཚོགས་ཀྱིས་ཕྱི་ཚེས་ ༡༢ ཕྱི་དྲོ་ཚོགས་འདུ་འཚོགས་ཡུལ་ Bharat Mandapam ཚོགས་ཁང་ཉེ་འགྲམ་དུ་གསང་བའི་ཐོག་ནས་རྒོལ་མཆོང་གི་ལས་འགུལ་ཞིག་སྤེལ་ཡོད་པ་རེད། ལས་འགུལ་དེའི་ནང་གཞོན་ནུ་ལྷན་ཚོགས་ཀྱི་ཚོགས་མི་ ༥༠ ཙམ་གྱི་མཉམ་ཞུགས་གནང་ཡོད་པ་དང་། དེ་དག་གི་ཁོངས་སུ་ལས་འགུལ་བ་འགའ་ཤས་རང་ལོ་ ༡༨ དང་ ༡༩ སོན་ཙམ་རེད་འདུག འདི་གའི་གསར་འགོད་པས་ཁོང་རྣམས་ལ་བཅར་འདྲི་ཞུ་སྐབས། ས་གནས་སུ་དམ་དྲག་ཆེ་བའི་ཛ་དྲག་གི་གནས་སྟངས་ལ་ལྟོས་མེད།  སོ་སོའི་རྒྱལ་ཁབ་དང་མི་རིགས་ཆེད་དུ་ངོ་རྒོལ་བྱེད་སྐབས་ཞེ་སྣང་འདྲ་པོ་རྩ་བ་ནས་སྐྱེས་མེད་པའི་འགྲེལ་བརྗོད་གནང་བ་མ་ཟད། ཐེངས་འདིའི་ལས་འགུལ་བརྒྱུད་རང་ཉིད་ཀྱི་འབོད་སྒྲ་ཕྱིར་མངོན་ཐུབ་པར་དགའ་སྤོབས་ཆེན་པོ་ཡོད་པ་གསུང་གི་འདུག  བོད་རང་བཙན་སློབ་ཕྲུག་ཚོགས་པའི་ལས་འགུལ་བ་གསུམ་པོ་དེ་དག་སྐོར་སྲུང་བས་འཛིན་བཟུང་བྱས་ཏེ Tihar བཙོན་ཁང་དུ་བཅུག་ཡོད་པ་མ་ཟད།   རྒོལ་མཆོང་གི་ལས་འགུལ་སྤེལ་མཁན་གཞོན་ནུའི་ལས་འགུལ་མི་གྲངས་ ༥༠ དེ་དག་ཀྱང་སྐོར་སྲུང་བས་འཛིན་བཟུང་གིས་ཉིན་གྲངས་གཅིག་ཪིང་སྐོར་སྲུང་ལས་ཁུངས་སུ་དོ་དམ་བྱས་ཡོད་པ་རེད། ཁ་སང་ BRICS ཚོགས་འདུ་འགྲུབས་སྟེ་ཞི་ཅིན་ཕིང་གི་གཙོས་པའི་ཕྱི་རྒྱལ་དཔོན་རིགས་ཁག་ཕྱིར་ལོག་རྗེས།   བོད་མི་ལས་འགུལ་མ་ཚང་མ་གློད་བཀྲོལ་བཏང་ཡོད་པ་ལྟར།   བོད་སྒར་གྱི་ས་གནས་འགོ་འཛིན་དབུས་པའི་གཞུང་འབྲེལ་མ་ཡིན་པའི་ཚོགས་པ་ཁག་ནས་ཁ་སང་ཕྱི་དྲོ་ལས་འགུལ་བ་ཚོར་འཚམས་འདྲི་དང་སྣེ་ལེན་བཅས་ཞུས་པ་རེད། The post རང་གི་རྒྱལ་ཁབ་དོན་དུ་ངོ་རྒོལ་བྱེད་དུས་སྐོར་སྲུང་བ་སོགས་ལ་ཞེ་སྣང་རྩ་བ་ནས་སྐྱེ་མ་བྱུང་། appeared first on vot.

ཨ་རིར་གནས་བཞུགས་རྒྱ་རིགས་གསར་འགོད་པ་དང་རྩོམ་པ་པོ་གྲགས་ཅན་ Amy Yee  ལགས་ཀྱིས་ཁ་སང་ཕྱི་ཚེས་ ༡༣ ཉིན་གྱི་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་པ་དང་འབྲེལ།  ཉིན་དེའི་ཕྱི་དྲོ་བོད་སྨྱུག་དཔེ་སྐྲུན་ཁང་དང་བོད་ཁྱིམ་སློབ་གྲྭའི་མཉམ་འབྲེལ་གྱི་གོ་སྒྲིག་འོག  Amy Yee ལགས་ཀྱིས་བྲིས་རྩོམ་གནང་བའི་བཙན་བྱོལ་བོད་མིའི་གནས་བབ་དང་མངོན་འདོད་ཇི་ཡིན་སྐོར་གྱི་དཔེ་དེབ་ Far From the Rooftop of the World ཞེས་པ་དེའི་ཐོག་བགྲོ་གླེང་གི་ལས་རིམ་ཞིག་འཚོགས་སོང་།    སྐབས་དེར་ Amy Yee  ལགས་ཀྱིས་རང་ཉིད་ཀྱི་ལོ་རྒྱུས་རྒྱབ་ལྗོངས་ངོ་སྤྲོད་དང་འབྲེལ།  ཁོ་མོས་དཔེ་དེབ་དེ་ཉིད་བྲིས་རྩོམ་གནང་དགོས་པའི་རྒྱུ་མཚན་གཙོ་བོ་གཅིག་ནི།  ཕྱི་ལོ་ ༢༠༠༨ ལོར་བོད་ལ་ཞི་རྒོལ་ཆེན་མོ་བྱུང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་གསར་འགོད་ལྷན་ཚོགས་ཤིག་སྐོང་འཚོགས་གནང་ཡོད་པ་ལྟར།  ལྷན་ཚོགས་དེའི་ཐོག་ཁོ་མོ་བཅར་ཡོད་སྐོར་གསུངས་སོང་བ་དང་།  སྐབས་དེར་༸གང་ཉིད་མཆོག་གིས་ཁོང་ལ་ཆེད་མངགས་བོད་རྒྱ་དཀའ་རྙོག་འབྲེལ་མོལ་བརྒྱུད་སེལ་དགོས་གལ་སྐོར་དམིགས་བསལ་བཀའ་སློབ་ཤིག་སྩལ་ཡོད་པ་དེས་ཁོང་ལ་སེམས་འགུལ་ཆེན་པོ་ཐེབས་ཡོད་པ་མ་ཟད།  སེམས་འགུལ་དེས་ཁོ་མོར་བཙན་བྱོལ་བོད་མིའི་དངོས་ཡོད་གནས་བབ་དང་མངོན་འདོད་ཇི་ཡིན་སྐོར་དཔེ་དེབ་ཅིག་ངེས་པར་དུ་འདོན་སྤེལ་གནང་དགོས་གལ་གཟིགས་ཡོད་པ་གསུངས་སོང་།  རྩ་བའི་ Amy Yee  ལགས་ཀྱི་དཔེ་དེབ་དེ་ནི་ཕྱི་ལོ་ ༢༠༢༣ ལོར་ཨ་རིར་འདོན་སྤེལ་གནང་ཡོད་ཀྱང་།  དཔེ་དེབ་དེའི་རྒྱ་གར་གྱི་པར་མ་ཉེ་ལམ་ཕྱི་ཟླ་ ༩ ཚེས་ ༡༠ ཉིན་རྒྱལ་ས་ལྡི་ལིར་དབུ་འབྱེད་གནང་ཡོད་པ་དང་།  དཔེ་དེབ་དེ་བཞིན་བཙན་བྱོལ་དུ་གྱར་བའི་བོད་མི་ཚོས་གདོང་ལེན་རྣམ་པ་འདྲ་མིན་འོག་རང་མི་རིགས་ཀྱི་ངོ་བོ་སྲུང་སྐྱོབ་དང་རིག་གཞུང་རྒྱུན་འཛིན་ཇི་ལྟར་བྱེད་བཞིན་པའི་སྐོར་ལོ་ངོ་ ༡༤ ལྷག་གི་རིང་གླིང་ཕྲན་བཞིའི་ནང་གནས་སྤོས་བྱས་པའི་བོད་མི་ཁག་གཅིག་རྗེས་འདེད་ཀྱིས་ཉམས་ཞིན་བརྒྱུད་ཁོང་རྣམ་པའི་འཚོ་བའི་གནས་བབ་དང་མངོན་འདོད་ཇི་ཡིན་གྱི་གནས་ཚུལ་ཞིབ་ཕྲ་རྒྱུས་ལོན་བྱས་པ་ཞིག་ཡིན་པ་རེད།  ཁ་སང་དཔེ་དེབ་བགྲོ་གླེང་གི་ལས་རིམ་ཐོག་དགའ་ལྡན་ཕོ་བྲང་གི་དྲུང་ཆེ་འཆི་མེད་རིག་འཛིན་ལགས་གཙོས་པའི་དོན་གཉེར་ཅན་མི་ཉུང་བ་ཞིག་ནས་མཉམ་ཞུགས་གནང་སོང་ལ།  ལས་རིམ་དེ་བཞིན་བོད་སྨྱུག་དཔེ་སྐྲུན་ཁང་གི་རྩོམ་བྲིས་འགན་འཛིན་བུ་ཆུང་ལྡུམ་ར་བསོད་ནམས་ལགས་ཀྱི་གཙོ་སྐྱོང་འོག་ Amy Yee  ལགས་ནས་དཔེ་དེབ་དང་འབྲེལ་བའི་རང་གི་དགོངས་ཚུལ་དང་།  མཉམ་ཞུགས་གནང་མཁན་ཚོའི་ངོས་ནས་དེ་འབྲེལ་དྲི་བ་ཁག་གཅིག་ཀྱང་བཏོན་གནང་སོང་།  འདི་གའི་གསར་འགོད་པས་མཛད་སྒོ་གྲུབ་མཚམས་ Amy Yee ལགས་དང་།  ལས་རིམ་གཙོ་སྐྱོང་གནང་མཁན་བུ་ཆུང་ལྡུམ་ར་བསོད་ནམས་ལགས།  […] The post རྒྱ་རིགས་གསར་འགོད་པ་ཞིག་གིས་བཙན་བྱོལ་བོད་མིའི་གནས་བབ་དང་མངོན་འདོད་བསྟན་པའི་དཔེ་དེབ་ཐོག་བགྲོ་གླེང་།  appeared first on vot.

དེ་རིང་ཕྱི་ཟླ་ ༩ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ལ་དྭགས་ཞི་བའི་ཚལ་གསུང་ཆོས་ར་བར་ལ་དྭགས་ནང་ཚོགས་དང་། དགོན་ཚོགས། ཁ་ཆེ་དང་ཡེ་ཤུའི་སྡེ་ཚོགས་བཅས་ཀྱིས་བཀྲིན་གཏང་རག་དང་འབྲེལ་བསྙེན་བཀུར་གསོལ་སྟོན་གྱི་མཛད་སྒོ་འཚོགས་སོང་། དེའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་ ༦ པའི་ནང་རྒྱ་གར་གྱི་རྒྱལ་ས་ལྡི་ལིར་ཞབས་པུས་སྨན་བཅོས་ལེགས་གྲུབ་བྱུང་རྗེས་ཟླ་དེའི་ཕྱི་ཚེས་ ༢༨ ཉིན་ལ་དགས་སུ་ཞབས་སོར་བཀྲིན་མཛད་དེ་ད་བར་ཟླ་བ་གཉིས་ལྷག་ཙམ་འགྲོ་བཞིན་པའི་ཁྲོད། དེ་རིང་ལ་དྭགས་ནང་པའི་ཚོགས་འདུ་དང་དགོན་ཚོགས་ཙམ་མ་ཟད། ལ་དྭགས་ཨན་ཇུ་མན་ཨི་མ་མི་ཡ། (Anjuman Immamia) དང་། ཨན་ཇུ་མན་མོ་ཡིན་ཨུལ་ཨི་སི་ལཱམ་ (Anjuman Moin-Ul Islam) བཅས་ཁ་ཆེའི་སུ་ནི་དང་ཤི་ཡ་ཆོས་ཚོགས། དེ་བཞིན་གླེ་ཡི་ཡེ་ཤུའི་སྤྱི་ཚོགས་བཅས་ཐུན་མོང་གི་གོ་སྒྲིག་འོག ལ་དྭགས་དང་བོད་ཀྱི་ཐུན་མོང་མ་ཡིན་པའི་རྐང་བྲོ་གླུ་གཞས་གཟིགས་འབུལ་སོགས་ཀྱི་ལམ་ནས་༸གོང་ས་མཆོག་ལ་བཀྲིན་གཏང་རག་དང་གྱེས་སྟོན་མཛད་སྒོ་གཟབ་རྒྱས་ཤིག་འཚོགས་སོང་། སྐབས་དེར་ལ་དྭགས་ནང་ཚོགས་ཀྱི་ཚོགས་གཙོ་སྐུ་ཞབས་ཚེ་རིང་རྡོ་རྗེ་ལགས་ཀྱིས་གསུང་བཤད་ཁྲོད། འདི་ལོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སུ་ཞབས་སོར་བསྐྱངས་ནས་ཟླ་བ་གཉིས་ཙམ་གྱི་རིང་སྐུ་ལྷོད་བཞུགས་མཛད་རྒྱུ་བྱུང་བར་སྙིང་ཐག་པ་ནས་ཐུགས་རྗེ་ཆེ་ཞུས་གནང་བ་མ་ཟད། ༸གོང་ས་མཆོག་གིས་དུས་ཡུན་དེའི་ཁྲོད་ལ་དྭགས་ཀྱི་དད་ལྡན་པ་ཐོག་མཐའ་བར་གསུམ་ལ་ཉིན་ལྟར་ཐུགས་བརྩེ་བ་ཆེན་པོས་མཇལ་ཁ་སྩལ་བའི་ཁོངས་སུ་འདི་ལོ་དམིགས་བསལ་གྱིས་གཞོན་སྐྱེས་ཚོར་མཇལ་ཁ་སྩལ་བ་དེ་ནི་ལ་དྭགས་ཀྱི་ལོ་རྒྱུས་ནང་ཐོག་མ་ཆགས་ཀྱི་ཡོད་པ་དང་། གཞོན་ནུ་ཚོས་༸གོང་ས་མཆོག་གི་མཇལ་ཁ་ཞུས་པའི་རྗེས་སུ་ཁོང་ཚོའི་སེམས་རྒྱུད་ལ་འགྱུར་བ་ཆེན་པོ་བྱུང་ཡོད་པ་ང་ཚོས་གསལ་པོར་ཤེས་རྟོགས་ཐུབ་ཀྱི་འདུག་ཅེས་གསུངས་སོང་། མཛད་སྒོའི་ཐོག་གཞན་ཡང་ཁ་ཆེ་དང་ཡེ་ཤུའི་སྤྱི་ཚོགས་ཀྱི་སྐུ་ཚབ་དབུ་ཁྲིད་རྣམས་ཀྱིས་ཀྱང་༸གོང་ས་མཆོགས་གི་མཛད་རྗེས་དག་ལ་ཆེ་བསྟོད་ཞུས་པ་མ་ཟད། མགོན་པོ་༸གང་ཉིད་མཆོག་ནི་ནང་པ་གཅིག་པོ་མ་ཡིན་པར་འཛམ་གླིང་ཡོངས་ཀྱི་དབུ་འཁྲིད་ཅིག་ཡིན་པ་མངོན་གསལ་དང་འབྲེལ་དམིགས་བསལ་གྱི་ཐུགས་རྗེ་ཆེ་ཞུས་སོང་ལ། དེ་ཡང་ལ་དྭགས་ཨན་ཇུ་མན་ཨི་མཱམ་མཱི་ཡཱའི་ (Anjuman Immamia) ཚོགས་གཞོན་ Sheikh Nazir མཆོག་གིས་གསུང་བཤད་ཁྲོད། ང་ཚོ་ཆོས་ལུགས་ལ་དད་པ་བྱེད་མཁན་ཡོངས་ནས་༸གོང་ས་མཆོག་ཁྱེད་ལ་ཐུགས་རྗེ་ཆེ་དང་བཀའ་དྲིན་ཆེ་ཞུ་རྒྱུ་ཡིན། གང་ཡིན་ཞེ་ན། ༸གོང་ས་མཆོག་ནི་ལ་དྭགས་གཅིག་པོ་མིན་པར་འཛམ་གླིང་ཡོངས་ཀྱི་ཆོས་ལུགས་ལ་དད་པ་བྱེད་མཁན་སུ་ཡིན་རུང་། མིག་གི་འོད་ཟེར་ལྟ་བུའི་ཁྱེད་ཀྱི་བཀའ་སློབ་ལམ་སྟོན་བཟང་པོའི་བཀའ་དྲིན་ལ་བརྟེན་ནས། ང་ཚོ་ལ་དྭགས་པ་རྣམས་ལ་ཁྱེད་ནི་དེ་རིང་འོད་སྣང་འཕྲོ་བའི་ཉི་མ་ལྟ་བུ་ཡིན། ཉི་མས་དྲོ་སྐྱིད་དང་འོད་སྣང་གིས་སེམས་ཅན་ཡོངས་ལ་བཀའ་དྲིན་བསྐྱངས་པ་བཞིན། ༸གོང་ས་མཆོག་ཀྱང་དེ་དེ་བཞིན་ཡིན་ཞེས་གསུངས་སོང་། གཞི་རྩའི་༸གོང་ས་མཆོག་ཕྱི་ཟླ་ ༦ ཚེས་ ༢༨ ཉིན་ལ་དྭགས་སུ་ཞབས་སོར་བཀའ་དྲིན་མཛད་པ་དང་། ཁ་སང་ཕྱི་ཟླ་ ༨ ཚེས་ ༣༠ ཉིན་ལ་དྭགས་ནང་ཚོགས་དང་དགོན་ཚོགས། ལ་བྱང་བོད་མི་བཅས་ནས་༸གོང་ས་མཆོག་ལ་གནས་བཅུ་དང་འབྲེལ་བའི་མདོ་ལུགས་བརྟན་བཞུགས་བསྟར་འབུལ་ཞུས་ཡོད་པ་མ་ཟད། […] The post ༸གོང་ས་མཆོག་ལ་ལ་དྭགས་ནང་བཀྲིན་གཏང་རག་དང་བསྙེན་བཀུར་གསོལ་སྟོན། appeared first on vot.

རྒྱ་ནག་གཞུང་གིས་བལ་བོད་ས་མཚམས་སུ་བྱུང་བའི་ཆུ་ལོག་གོད་ཆགས་ནང་བོད་སྐྱིད་གྲོང་ཁུལ་དུ་མི་ཤི་རྐྱེན་འདས་ཀྱི་ཆག་སྒོ་བྱུང་བའི་གནས་ཚུལ་སྦས་གསང་བྱེད་བཞིན་པའི་ཁྲོད། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་རྒྱ་ནག་གཞུང་ནས་ཆུ་ལོག་དང་འབྲེལ་བའི་གནས་ཚུལ་ཁ་གསལ་མཁོ་སྤྲོད་དང་། རྒྱལ་སྤྱིའི་རང་དབང་ལྡན་པའི་གསར་ཁང་ཁག་ལ་དེ་དོན་གནས་ཚུལ་མཁོ་སྒྲུབ་བྱེད་འཇུག་དགོས་པའི་དགོས་འདུན་བཏོན་སོང་། དེ་ཡང་ཟླ་བ་འདིའི་ཚེས་ ༢༦ ཉིན་བལ་བོད་ས་མཚམས་སུ་འཁྱག་རུད་བྱུང་ནས་བདུན་ཕྲག་གཅིག་འདས་པའི་རྗེས་སུ། བལ་ཡུལ་ཕྱོགས་སུ་མི་གྲངས་ ༡༠༠༠ ལྷག་འདས་གྲོངས་དང་། མི་གྲངས་ ༣༠༠༠ བརྒལ་བ་གར་སོང་ཆ་མེད་དུ་གྱུར་བའི་གནས་ཚུལ་ཐོན་ཡོད་ནའང་། རྒྱ་ནག་གཞུང་གིས་བོད་ཕྱོགས་སུ་མི་གྲངས་ ༡༦ འདས་གྲོངས་དང་། མི་གྲངས་ ༥༥༨ གར་སོང་ཆ་མེད་དུ་གྱུར་བའི་གནས་ཚུལ་ཙམ་ལས་བཏོན་མེད་པ་མ་ཟད། རྒྱ་ནག་གི་སྤྱི་ཚོགས་དྲྭ་ལམ་ཁག་ཏུ་ཆུ་ལོག་དང་འབྲེལ་བའི་གནས་ཚུལ་ལ་དམ་བསྒྲགས་དང་། རྒྱལ་སྤྱིའི་རང་དབང་ལྡན་པའི་གསར་ཁང་ཁག་ལ་ས་གནས་སུ་གནས་ཚུལ་མཁོ་སྒྲུབ་བྱེད་བཅུག་གི་མེད་པ་རེད། དེ་འབྲེལ་དེ་རིང་ཟླ་བ་ ༩ ཚེས་ ༡ ཉིན་བོད་ཀྱི་གཞུང་འབྲེལ་མ་ཡིན་པའི་ཚོགས་པ་བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཉིས་ནས། རྒྱ་ནག་གི་བྱེད་ཕྱོགས་ལ་སྐྱོན་བརྗོད་དང་སྦྲགས། རྒྱ་ནག་གིས་བོད་ནང་གི་གནས་ཚུལ་མཁོ་སྤྲོད་བྱེད་དགོས་པ་དང་། བོད་ནང་གི་འཁྱག་རོམ་དང་ཆུ་ཚད་སྐོར་གནས་ཚུལ་བལ་ཡུལ་མཚོན་པའི་གཤམ་འོག་རྒྱལ་ཁབ་ལ་སྤྲོད་དགོས་པ། བོད་ནང་ཆུ་ལོག་གི་གོད་ཆགས་ཕོག་མཁན་རྣམས་ལ་རྒྱལ་སྤྱིའི་རོགས་རམ་མཐུན་འགྱུར་སྦྱོར་འཇུག་དགོས་པ། ཆུ་ལོག་དང་འབྲེལ་བའི་གནས་ཚུལ་བརྒྱུད་སྤེལ་བྱེད་མཁན་རྣམས་ལ་ཉེས་ཆད་འགེལ་མི་ཆོག་པ། རྒྱལ་སྤྱིའི་ཚོགས་སྡེ་དང་གསར་ཁང་ཁག་གིས་བོད་ཀྱི་ས་ཆའི་མིང་ངོ་མ་འབོད་དགོས་པའི་དགོས་འདུན་དོན་ཚན་ལྔ་བཏོན་གནང་ཡོད། གསར་འགོད་གསལ་སྒྲགས་དེའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་དོན་གྲུབ་དབང་མོ་ལགས་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་བློ་བཟང་གཡང་མཚོ་ལགས། བོད་རང་བཙན་སློབ་ཕྲུག་ཚོགས་པའི་ལས་འགུལ་འབྲེལ་མཐུད་པ་ བཀྲ་ཤིས་དོན་གྲུབ་ལགས། སྐྱིད་གྲོང་ནས་ཡིན་པའི་ཕ་བྱམས་པ་དཔལ་ལྡན་ལགས་གཙོ་བཞུགས་གནང་ཡོད་པ་དང་། སྐབས་དེར་དོན་གྲུབ་དབང་མོ་ལགས་ཀྱིས་བོད་མཐོ་སྒང་ནི་གནམ་གཤིས་འགྱུར་ལྡོག་གི་ཤུགས་རྐྱེན་ཐེབས་སླ་ཤོས་ཀྱི་ས་ཁུལ་ཞིག་ཡིན་པའི་ཆ་ནས་རྒྱ་ནག་གཞུང་གིས་བོད་མཐོ་སྒང་དུ་འཛུགས་སྐྲུན་ལས་གཞི་སྤེལ་རྒྱུར་དོ་གཟབ་དང་འགན་ཁུར་དགོས་པའི་འབོད་སྐུལ་གནང་སོང་། དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་བློ་བཟང་གཡང་མཚོ་ལགས་ཀྱིས་བོད་དང་བལ་ཡུལ་ལྟ་བུར་མཚོན་ན། མཁའ་དབྱིངས་སུ་དུག་རླངས་འདོན་མཁན་ཉུང་ཤོས་ཡིན་ནའང་། ཁོང་ཚོར་གནམ་གཤིས་འགྱུར་ལྡོག་ལ་བརྟེན་པའི་འབྱུང་བའི་དཀའ་ངལ་མང་ཤོས་འཕྲད་ཀྱི་ཡོད་པ་མ་ཟད། རྒྱུན་ལྡན་གོ་ལའི་གནམ་གཤིས་ཚོགས་འདུའི་སྐབས་སུའང་བོད་ཀྱི་ཁོར་ཡུག་དང་གནམ་གཤིས་སྐོར་གླེང་སློང་བྱེད་པར་གོ་སྐབས་སྤྲོད་ཀྱི་མེད་པ་དང་། ལྷག་པར་རྒྱ་གར་མཚོན་པའི་གཤམ་འོག་ཏུ་ཡོད་པའི་རྒྱལ་ཁབ་ཁག་ནས་རྒྱ་ནག་གཞུང་ལ་ཆུ་དང་འབྲེལ་བའི་གནས་ཚུལ་མཁོ་གཏོང་དགོས་པའི་གནོན་ཤུགས་སྤྲོད་དགོས་པ་གསུང་གི་འདུག མ་ཟད་རྒྱ་གར་བོད་རང་བཙན་སློབ་ཕྲུག་ཚོགས་པའི་ལས་འགུལ་འབྲེལ་མཐུད་པ་བཀྲ་ཤིས་དོན་གྲུབ་ལགས་ཀྱིས། རྒྱ་ནག་གཞུང་གི་དབང་སྒྱུར་འོག་བོད་མི་ཚོར་སོ་སོའི་ས་ཆ་ཇི་ལྟར་བྱེད་སྤྱོད་བྱ་རྒྱུའི་ཐག་གཅོད་བྱེད་པའི་རང་དབང་མེད་པ་དང་། རྒྱ་ནག་གི་བཟོ་གྲྭ་ཁག་གིས་ཚོང་ལས་ཆེད་བོད་ཀྱི་རང་བྱུང་ཁོར་ཡུག་གཏོར་སྐྱོན་གཏོང་སྐབས་བོད་མི་རྣམས་ལ་གྲོས་བསྡུར་བྱེད་ཀྱི་མེད་པ་གསུང་གི་འདུག་ལ། དེ་བཞིན་སྐྱིད་གྲོང་ནས་ཡིན་པའི་ཕ་བྱམས་པ་དཔལ་ལྡན་ལགས་ཀྱིས་སྐྱིད་གྲོང་ཀྱི་ལོ་རྒྱུས་དང་ས་ཚིགས་ཀྱི་གལ་གནད། ད་ལྟའི་ཆར་སྐྱིད་གྲོང་ཁུལ་དུ་དམ་བསྒྲགས་དབང་གིས་ཆུ་ལོག་དང་འབྲེལ་བའི་གནས་ཚུལ་རག་ཁག་པོ་ཡོད་པའི་སྐོར་ངོ་སྤྲོད་གནང་སོང་། The post རྒྱ་ནག་གཞུང་ནས་བལ་བོད་ས་མཚམས་སུ་ཆུ་ལོག་གི་གོད་ཆགས་དང་འབྲེལ་བའི་གནས་ཚུལ་ཕྱི་གསལ་ནང་གསལ་བཟོ་དགོས། appeared first on vot.

ཁ་སང་ཕྱི་ཟླ་ ༨ ཚེས་ ༢༧ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག །ས་རྭ་བོད་ཀྱི་མཐོ་རིམ་སློབ་གཉེར་ཁང་དུ་ཉིན་གྲངས་གཉིས་རིང་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་ཐེངས་ ༨ པ་བསྐོང་ཚོགས་གནང་ཡོད་པ་དང་། ཐེངས་འདིའི་ཚོགས་འདུའི་ཐོག་བཙན་བྱོལ་བོད་མིའི་འཕྲོད་བསྟེན་སྲིད་བྱུས་གཏན་འབེབས་དང་འབྲེལ་ནས་འཕྲོད་བསྟེན་སྨན་པའི་སློབ་སྟོན་ཚོགས་ཆུང་ཞིག་ཆེད་འཛུགས་དང་། ཚོགས་མི་གཏན་འབེབས་གནང་བ་མ་ཟད། དེ་རིང་ཚོགས་འདུ་མཇུག་སྡོམ་དང་འབྲེལ། Health Information System ཞེས་འཕྲོད་བསྟེན་ལས་ཁུངས་ཀྱི་ནད་པའི་གྲངས་མཛོད་གསར་བསྐྲུན་གྱིས་དེའི་ནང་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་རྒན་གཞོན་བར་གསུམ་ཁྲོད། ལུས་སེམས་གཉིས་ཀྱི་དཀའ་ངལ་སེལ་རྒྱུའི་གྲོས་བསྡུར་དང་ཐབས་ལམ་ཚོལ་ཐབས། བཙན་བྱོལ་བོད་མིའི་འཕྲོད་བསྟེན་སྲིད་ཇུས་རགས་ཟིན་བཅས་གྲོས་ཆོད་ཁག་གཅིག་བཞག་འདུག དེ་ཡང་ཁ་སང་སྔ་དྲོ་ཆུ་ཚོད་ ༩ ཡས་མས་སུ་མཛད་སྒོ་དབུ་འཛུགས་གནང་ཡོད་པ་དང་། སྐབས་དེར་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་པདྨ་མཚོ་མཆོག་དང་། འཕྲོད་བསྟེན་དྲུང་ཆེ་དང་དྲུང་འཕར། སྐུའི་བླ་སྨན་པ་རྣམ་པ། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་དང་སློབ་སྤྱི་གཞོན་པ། དེ་བཞིན་བལ་ཡུལ་སྐུ་ཚབ་དོན་གཅོད་དང་དགོན་སྡེ་ཁག་གི་སྨན་ཁང་གི་དབུ་འཛིན་དང་སྨན་པ། འགྲོ་ཕན་བོད་ཀྱི་སྨན་རྩིས་ཁང་དང་དབུས་བདེ་ལེགས་སྨན་ཁང་གི་འགན་འཛིན་རྣམ་པ། བོད་ཀྱི་གསོ་བ་རིག་པའི་སྨན་པའི་ལྷན་ཚོགས་ཀྱི་ཚོགས་གཙོ་གཙོས། འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་གི་དབུ་འཛིན་དང་སྨན་པ་སོགས་ཁྱོན་མི་གྲངས་ ༤༦ ལྷན་འཛོམས་གནང་སོང་། འཕྲོད་བསྟན་བཀའ་བློན་པདྨ་མཚོ་མཆོག་གིས། འཕྲོད་བསྟེན་གྱི་གལ་གནད་ཐོག་ནན་བརྗོད་ཁྲོད། ཕྱིའི་དངོས་པོ་དང་འཕྲུལ་ཆས་ཡར་རྒྱས་ཇི་ཙམ་ཕྱིན་ཡང་སྔོན་འགོག་གི་ཐབས་ལམ་དང་བྱེད་ཐབས་ཡག་ཤོས་ཤིག་ནི་བོད་ཀྱི་གསོ་བ་རིག་པའི་ཐབས་ལམ་ཡིན་པ་དང་། མ་འོངས་པར་བོད་ཀྱི་གསོ་བ་རིག་པ་དང་ཕྱི་ལུགས་ཀྱི་སྨན་ཟུང་སྦྲེལ་ཐོག་ནས་སྔོན་འགོག་གི་ཐབས་ལམ་ཐོག་ནུས་པ་བཏོན་ཐུབ་དགོས་གལ་སྐོར་གསུངས་བ་དང་། ལྷག་པར་དེང་སྐབས་གཞོན་སྐྱེས་ཁྲོད་སེམས་ཁམས་ཀྱི་དཀའ་ངལ་ཇེ་མང་དུ་འགྲོ་བཞིན་པ་དང་། ཁོང་ཚོས་དཀའ་ངལ་སེལ་བར་མྱོ་རྫས་དང་ཆང་རག་ལོངས་སུ་སྤྱོད་པ་སོགས་ཀྱི་གནས་ཚུལ་མང་དུ་ཕྱིན་པ་དེ་དག་ལ་སྔོན་འགོག་གི་ཐབས་ལམ་འཚོལ་དགོས་པ་ནན་བརྗོད་ཙམ་མ་ཟད། བོད་པའི་སྤྱི་ཚོགས་ཁྲོད་ཉམ་ཐག་དང་ཛ་དྲག་ཅན་གྱི་ནད་པ་སྐྱོབ་ཐབས་ཐོག་འཕྲོད་བསྟེན་ལས་ཁུངས་ཀྱི་མཁྱེན་རྟོགས་ཡོད་པའི་ཐོག་སྤྱི་མང་ཞལ་འདེབས་བསྡུ་རུབ་ཀྱིས་ཕན་ཐོགས་སྒྲུབ་དགོས་པ་སོགས་གསུངས་སོང་། རྩ་བའི་འཕྲོད་བསྟེན་ལས་ཁུངས་ནས་ལོ་གཉིས་རེའི་མཚམས་སུ་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་བསྐོང་ཚོགས་གནང་སྲོལ་ཡོད་པ་དེ་ལྟར་ཡང༌། ཐེངས་འདིའི་ཚོགས་ཆེན་འདི་བཞིན་ཕྱི་ལོ་ ༢༠༢༢ རྗེས་ཐེངས་དང་པོ་ཆགས་ཀྱི་འདུག ཐེངས་འདིའི་ཚོགས་འདུའི་ཐོག་གཙོ་བོ་འཕྲོད་བསྟེན་སྲིད་བྱུས་གཏན་འབེབས་ཐོག་གྲོས་བསྡུར་དང་། དེ་སྔ་སྐབས་ ༧ པའི་ཚོགས་འདུའི་ཐོག་གཏན་འབེབས་གནང་བའི་གྲོས་ཆོད་རྣམས་མཇུག་སྐྱོང་དང་ལག་བསྟར་ཇི་བྱུང་གོ་བསྡུར། དེ་བཞིན་བཙན་བྱོལ་བོད་མིའི་འཕྲོད་བསྟེན་སློབ་སྟོན་ཚོགས་ཆུང་ཞིག་ཆེད་འཛུགས་གནང་རྒྱུར་དམིགས་ཡོད་པ་རེད། ཚོགས་འདུའི་ཐོག་བཙན་བྱོལ་བོད་མིའི་འཕྲོད་བསྟེན་སྲིད་བྱུས་གཏན་འབེབས་དང་འབྲེལ་ནས་འཕྲོད་བསྟན་སྨན་པའི་སློབ་སྟོན་ཚོགས་ཆུང་ཞིག་ཆེད་འཛུགས་གནང་ཡོད་པ་ལྟར། ཚོགས་ཆུང་གི་ཚོགས་མིའི་ཁོངས་སུ་སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། སྐུའི་བླ་སྨན་པ་ཚེ་དབང་རྟ་མགྲིན་ལགས། དེ་བཞིན་འགྲོ་ཕན་བོད་ཀྱི་སྨན་རྩིས་ཁང་གི་འགན་འཛིན་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་འཕར། དབུས་བདེ་ལེགས་སྨན་ཁང་གི་འགན་འཛིན་སྨན་པ་བསྟན་འཛིན་བཙོན་གྲུས་ལགས། སྨན་པ་དོན་སྒྲུབ་བཀྲིས་ལགས་དང་། འཕྲོད་བསྟེན་ལས་ཁུངས་ཀྱི་ལས་བྱེད་བཅས་བསྐོ་འཛུགས་གནང་འདུག གཤམ་ལ་འདི་ག་གསར་འགོད་པས་འཕྲོད་བསྟེན་ལས་ཁུངས་ཀྱི་དྲུང་ཆེ་བྱམས་པ་ཕུན་ཚོགས་ལགས་སུ་ཚོགས་འདུའི་མཐའ་མའི་འབྲུ་དོན་དང༌། དེ་བཞིན་ཚོགས་འདུའི་ཐོག་བཅར་བའི་སྨན་པ་དང་སྐུ་ཚབ་ཁག་གཅིག་ས་གནས་སོ་སོའི་ནང་གི་འཕྲོད་བསྟེན་གྱི་གནས་འབབ་སྐོར་བཀའ་འདྲི་ཞུས་ཡོད་པས་གོང་གི་སྒྲ་སྒམ་ནས་གསན་ཐུབ། The post བོད་མིའི་སྒྲིག་འཛུགས་འཕྲོད་བསྟོན་ལས་ཁུངས་ཀྱི་གོ་སྒྲིག་འོག་འཕྲོད་བསྟེན་བསྐྱར་ཞིབ་ཚོགས་འདུ་ཐེངས་ ༨ པ་འཚོགས་པ། appeared first on vot.

དེ་རིང་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་སྲིད་སྐྱོང་ཚོགས་ཁང་དུ། བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༢༥ པ་དེ་དབུ་འཛུགས་གནང་སོང་། དེ་ཡང་དེ་རིང་ནས་བཟུང་ཉིན་བཞིའི་རིང་འཚོགས་གཏན་ཁེལ་བའི་བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་དུ། སྔ་དྲོ་ཚོགས་ཆེན་ཐོག་སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་དང་དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག བོད་མི་མང་སྤྱི་འཐུས་རྒྱུན་ལས་རྣམ་པ་དང་དྲུང་ཆེ་རྣམ་པ། དེ་བཞིན་བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་པདྨ་བདེ་ལེགས་ལགས་དང་ས་གནས་ཁག་བཅོ་ལྔའི་མཉམ་འབྲེལ་གྱི་ཚོགས་གཙོ་དང་དྲུང་ཆེ་བཅས་མཉམ་ཞུགས་གནང་སོང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས། བོད་མིའི་སྤྱི་མཐུན་མཉམ་འབྲེལ་གྱི་དྲྭ་ཚིགས་གསར་པ་དབུ་འབྱེད་གནང་སོང་བ་མ་ཟད། སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་གིས་བོད་མིའི་མཉམ་འབྲེལ་གྱི་བྱུང་རིམ་དང་གལ་གནད་སྐོར་གསུངས་བ་དང་སྦྲགས། འཛིན་སྐྱོང་ནང་ཕྱག་ལས་གནང་བའི་སྐབས་འཐུས་ཤོར་གང་ཕྱིན་པ་རྣམས་ལ་ལྟ་རྟོག་བྱེད་ཐུབ་དགོས་པ་དང་།  གཞིས་ཆགས་ནང་རྙོག་གྲ་གང་བྱུང་པ་རྣམས་དུས་ཐོག་ལ་ཐག་གཅོད་བྱེད་ཐུབ་དགོས་གལ་ཡིན་པ་དང་ངེས་པར་དུ་རྒྱ་གར་གྱི་ཁྲིམས་དང་མཐུན་པའི་ཕྱག་ལས་གནང་དགོས་གལ་ཡིན་པའི་ལམ་སྟོན་གནང་སོང་། ཕྱོགས་མཚུངས་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གིས། ལས་བྱེད་རྣམས་ནས་ཕྱག་ལས་གནང་བའི་སྐབས་ལྷག་བསམ་ཡོད་པའི་ཐོག་ནས་ཕྱག་ལས་གནང་དགོས་གལ་ཡིན་པ་ནན་བརྗོད་དང་སྦྲགས། ད་རེས་མཉམ་འབྲེལ་གྱི་ལས་བྱེད་ནང་ནམ་རྒྱུན་དང་མི་འདྲ་བའི་བུད་མེད་བརྒྱ་ཆ་ ༤༩ ཡོད་པ་ནི་དགའ་འོས་པ་ཞིག་དང་སྤོབས་པ་བྱེད་འོས་པ་ཞིག་རེད་ཅེས་གསུངས་བ་མ་ཟད། བུད་མེད་རྣམས་ནས་སྤུངས་པ་མཉམ་གཤིབ་ཀྱི་དཀའ་ལས་རྒྱག་དགོས་པ་གསུངས་སོང་། མཛད་སྒོ་གྲུབ་མཚམས་སུ་འདི་ག་རླུང་འཕྲིན་ཁང་གིས་བོད་མིའི་མཉམ་འབྲེལ་གྱི་ཚོགས་གཙོ་པདྨ་བདེ་ལེགས་ལགས་སུ་བཅར་འདྲི་ཞུས་ཡོད། རྩ་བའི་ཐེངས་འདིའི་བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༢༥ པ་དེ་བཞིན་དེ་རིང་ནས་བཟུང་ཚེས་ ༣༠ བར་ཉིན་གྲངས་བཞིའི་རིང་འཚོག་རྒྱུ་ཡིན་པ་དང་ས་གནས་ཁག་ ༡༥ ནས་མཉམ་འབྲེལ་ཚོགས་གཙོ་དང་དྲུང་ཆེ་རྣམ་པ་ཆེད་ཕེབས་གནང་ཡོད་པ་མ་ཟད། ཉིན་བཞིའི་རིང་བོད་མིའི་མཉམ་འབྲེལ་ཁག་གི་ལས་དོན་གནང་ཕྱོགས་དང་ལྷག་པར་དུ་ལོ་འཁོར་ལས་བསྡོམས་དང་རྩིས་ཁྲ་སྙན་སེང་བཅས་ཞུ་རྒྱུ་ཡིན་པ་རེད་འདུག The post བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༢༥ པ་དབུ་འཛུགས། appeared first on vot.

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁ་སང་སྙན་ཐོ་ཞིག་འདོན་སྤེལ་གནང་བའི་བརྒྱུད། རྒྱ་ནག་གཞུང་གིས་འདི་ལོའི་ཕྱི་ཟླ་ ༣ པའི་ཚོགས་འདུའི་ཐོག་གཏན་འབེབས་དང་ཕྱི་ཟླ་ ༧ པའི་ཚེས་ ༡ ནས་ལག་བསྟར་བྱས་འགོ་བཙུགས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་གསར་པ་དེས་རྒྱལ་ཁབ་གཅིག་གྱུར་གྱི་སྐད་ཡིག་དང་རྒྱ་མི་རིགས་ཀྱི་ངོ་བོ་གཙོ་བོར་འཛིན་པའི་སྲིད་བྱུས་ལ་ཁྲིམས་ཐོག་ནས་གཞི་འཛིན་ས་བཟོས་ཡོད་སྟབས།  དེས་བོད་ཀྱི་སྐད་ཡིག་དང་ཤེས་ཡོན་གྱི་ལམ་སྲོལ་རྩ་མེད་གཏང་ཉེན་གྱི་སེམས་འཚབ་གསར་པ་བཟོ་བཞིན་པ་མངོན་གསལ་གནང་འདུག དེ་ཡང་ཁ་སང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་དྲྭ་གནས་ཐོག་བོད་ནང་དུ་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པ་དེ་ལག་བསྟར་དང་འབྲེལ་བའི་གནས་སྟངས་སྐོར་སྙན་ཐོ་འདོན་སྤེལ་གནང་བ་དེའི་ནང་དུ། ཁྲིམས་ཡིག་དེའི་ནང་རིམ་ཁག་སློབ་གྲྭ་དང་ཤེས་ཡོན་ཁྱབ་ཁོངས་ནང་རྒྱལ་ཁབ་གཅིག་གྱུར་གྱི་སྐད་ཡིག་དེ་སློབ་ཁྲིད་ཀྱི་རྩ་འཛིན་དུ་གཏན་འཁེལ་བྱས་པ་མ་ཟད།  སློབ་གྲྭ་ཁག་གི་ཤེས་ཡོན་སློབ་གསོའི་ལམ་སྲོལ་ནང་རྒྱ་མི་རིགས་ཀྱི་འདུ་ཤེས་དང་རྒྱལ་ཁབ་གཅིག་གྱུར་གྱི་སློབ་དེབ་བེད་སྤྱོད་བྱེད་དགོས་པ་གཏན་འབེབས་བྱས་ཡོད་འདུག་ལ། ཁྲིམས་ཡིག་དེས་བོད་དང་གྲངས་ཉུང་མི་རིགས་གཞན་དག་གི་ཁྲོད་དུ་ཤེས་ཡོན་ནི་རྒྱལ་ཁབ་གཅིག་གྱུར་གྱི་ངོ་བོ་སྲ་བརྟན་དུ་གཏོང་བའི་གཞི་རྒྱ་ཆེ་བའི་ལས་འགུལ་ཞིག་བཟོས་ཡོད་པ་ཐེར་འདོན་གནང་འདུག ལྷག་པར་དུ་ཁྲིམས་དེའི་དོན་ཚན་བཅོ་ལྔ་པའི་ནང་སློབ་གྲྭ་ཚང་མས་རྒྱལ་ཁབ་གཅིག་གྱུར་གྱི་སྐད་ཡིག་དེ་སློབ་གསོ་སློབ་ཁྲིད་ཀྱི་གཙོ་བོར་འཇོག་དགོས་པ་དང་།  དེ་བཞིན་བུ་བཅོལ་ཁང་གི་བྱིས་པ་ཚོས་ཀྱང་རྒྱལ་ཁབ་གཅིག་གྱུར་གྱི་སྐད་ཡིག་སློབ་སྦྱོང་དང་། འོས་འགན་སློབ་གསོའི་འགྲིམས་པའི་སློབ་མ་ཚོས་གཞི་རྩའི་ཆ་ནས་རྒྱལ་ཁབ་གཅིག་གྱུར་གྱི་སྐད་ཡིག་རང་རྐྱ་འཕེར་དགོས་པ་གཏན་འབེབས་བྱས་ཡོད་པ་འཁོད་ཡོད་པ་དང་། དོན་ཚན་བཅུ་དྲུག་པའི་ནང་སློབ་གྲྭ་དང་ཤེས་ཡོན་སྡེ་ཚན་གྱིས་སློབ་གསོའི་བརྒྱུད་རིམ་ཧྲིལ་པོར་མི་རིགས་མཉམ་འདྲེས་ཀྱི་འདུ་ཤེས་བསྐྲུན་དགོས་པ་དང་།  དེ་ཡང་འཛིན་གྲྭའི་ནང་གི་སློབ་ཁྲིད་དང་། སྤྱི་ཚོགས་ཀྱི་ལག་ལེན། དེ་བཞིན་གཙོ་གནད་སློབ་གསོ་དང་དྲྭ་ཐོག་སློབ་གསོ།  དེའི་ནང་ད་དུང་རྒྱལ་ཁབ་གཅིག་གྱུར་གྱི་སློབ་དེབ་བེད་སྤྱོད་བྱ་རྒྱུ་བཅས་ཚུད་ཡོད་པ་དང་། སློབ་གསོའི་ལས་ཁུངས་ཀྱིས་སློབ་དེབ་རྩོམ་སྒྲིག་དང་ཞིབ་བཤེར་གྱི་འགན་འཁྲི་འཁུར་དགོས་པ་མ་ཟད།  ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བསྐྲུན་རྒྱུའི་སློབ་གཞི་རྩོམ་སྒྲིག་དགོས་པའི་ནན་བརྗོད་བྱས་ཡོད་པར་བརྟེན།  ཁྲིམས་ཡིག་དེ་ནི་རྒྱལ་ཁབ་གཅིག་གྱུར་གྱི་སྐད་ཡིག་ཁྱབ་གདལ་གཏོང་རྒྱུའི་ས་མཚམས་ལས་བརྒལ་ཏེ། སྐད་ཡིག་དང་། སློབ་ཚན། རྒྱལ་ཁབ་ཀྱི་ངོ་བོ་བཅས་ཤེས་ཡོན་གྱི་ཁྲིམས་ཡིག་ནང་བཅུག་ཡོད་པ་གསུངས་འདུག དེའི་ཁྲོད་བོད་ནང་དུ་འབྲེལ་ཡོད་ལས་ཁུངས་ཁག་གིས་གཏན་འབེབས་དེ་དག་དང་འབྲེལ་བའི་ཤེས་ཡོན་གྱི་ལས་འགུལ་སྤེལ་འགོ་ཚུགས་པའི་ཁྲོད། ཟླ་བ་འདིའི་ཚེས་ ༡༢ ཉིན་བོད་རང་སྐྱོང་ལྗོངས་ཟེར་བའི་གསར་འགྱུར་གཞུང་ལས་ཁང་ཟེར་བས་གསར་འགོད་ལྷན་ཚོགས་ཤིག་སྐོང་འཚོགས་བྱས་པའི་ཐོག་བོད་རང་སྐྱོང་ལྗོངས་སློབ་གསོའི་ལས་ཁུངས་ཀྱི་འགན་འཛིན་གཞོན་པ་ལི་ཇེ་ཡིས་རྒྱ་ནག་ལ་དགའ་ཞེན་གྱི་ས་བོན་འདེབས་པའི་ལས་འགུལ་གཏིང་ཟབ་སྤེལ་རྒྱུ་ཡིན་པ་ནན་བརྗོད་བྱས་པ་མ་ཟད། མི་རིགས་མཐུན་སྒྲིལ་ཡར་ཐོན་གྱི་སློབ་ཚན་དེ་སློབ་གྲྭ་ཆེ་འབྲིང་ཆུང་གསུམ་དང་།  ཐ་ན་བུ་བཅོལ་ཁང་ནང་དུའང་ཁྱབ་གདལ་གཏོང་རྒྱུའི་ཐག་གཅོད་བྱས་ཡོད་པ། དེ་བཞིན་མི་རིགས་ཁག་གི་དགེ་སློབ་བར་ཕན་ཚུན་མཉམ་འདྲེས་དང་མཉམ་འདུས་ཀྱི་བྱེད་སྒོ་སྤེལ་དགོས་པ་དང་། རྒྱལ་ཁབ་གཅིག་གྱུར་གྱི་ངོ་བོ་དང་སྤྱི་སྤྱོད་སྐད་ཡིག་ཁྱབ་གདལ་ལ་ཤུགས་སྣོན་དང་སློབ་དེབ་གསར་རྩོམ་དང་སློབ་གྲྭ་ཁག་ཏུ་བསམ་བློ་ཆབ་སྲིད་ཀྱི་སློབ་གསོ་གཏིང་ཟབ་སྤེལ་དགོས་པའི་ནན་བརྗོད་བྱས་ཡོད་པ་རེད་འདུག འདི་ཚེས་ ༡༢ ཉིན་གྱི་གསར་འགོད་ལྷན་ཚོགས་ཐོག་གཞན་ཡང་ད་དུང་། བོད་པའི་བྱིས་པ་ཚོར་ཆུང་དུས་ནས་རྒྱལ་ཁབ་གཅིག་གྱུར་གྱི་སྐད་ཡིག་སྦྱང་ཤེས་དང་རྒྱ་མི་རིགས་ཀྱི་ངོ་བོ་གཙོ་བོར་འཛིན་རྒྱུའི་སློབ་གསོ་སྤེལ་རྒྱུ་དང་འབྲེལ་ནས་སྔོན་འགྲོ་ནས་སློབ་གྲྭ་ཆེན་མོ་བར་གྱི་རིམ་པ་ཁག་གི་སློབ་གྲྭར་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྐོར་གྱི་སློབ་དེབ་རྩོམ་སྒྲིག་བྱེད་བཞིན་ཡོད་པ་དང་།  སློབ་དེབ་དེ་དག་གི་ཁོངས་སུ་སྔོན་འགྲོའི་སློབ་གྲྭའི་ནང་ཀྲུང་ཧྭ་མི་རིགས་ཁྱིམ་ཚང་གཅིག་ཟེར་བ་དང་། སློབ་ཆུང་ནང་དུ་ཀྲུང་ཧྭ་མི་རིགས་ཁྱིམ་ཚང་ཆེན་མོ་ཟེར་བ།སློབ་འབྲིང་ནང་ཀྲུང་ཧྭ་མི་རིགས་མཐུན་སྒྲིལ་ཆེན་མོ་ཟེར་བ།  དེ་བཞིན་སློབ་གྲྭ་ཆེན་མོའི་ནང་ཀྲུང་ཧྭ་མི་རིགས་གཅིག་མཐུན་ཚོགས་པའི་གཞུང་ལུགས་ཟེར་བ་བཅས་གཏན་འབེབས་བྱེད་དགོས་པའི་ཐག་གཅོད་ལག་བསྟར་བྱེད་བཞིན་ཡོད་པ་རེད་འདུག ཁྲིམས་ཡིག་དེ་དངོས་སུ་ལག་བསྟར་བྱས་ཏེ་བདུན་ཕྲག་གཉིས་ཙམ་སོང་རྗེས་ཀྱི་ཕྱི་ཟླ་ ༧ པའི་ཚེས་ ༡༥ ཉིན་གཞིས་བཞུགས་བོད་མི་ཞིག་གིས་ལྟེ་གནས་ཁང་ལ་གནས་ཚུལ་མཁོ་སྤྲོད་གནང་བའི་ནང་དུ། བོད་མཚོ་སྔོན་དང་ ཟི་ཁྲོན།  དེ་བཞིན་ཀན་སུའུ་ཞིང་ཆེན་བཅས་ཀྱི་ནང་བོད་ཡིག་སློབ་དེབ་གསར་པ་རྩོམ་སྒྲིག་བྱེད་བཞིན་ཡོད་པ་དང་། སློབ་དེབ་དེ་དག་གི་ནང་སྙན་ངག་མེ་ལོང་དང་། ཆུ་ཤིང་བསྟན་བཅོས། དེ་བཞིན་གུང་ཐང་བསྟན་པའི་སྒྲོན་མེས་བརྩམས་པའི་ཉམས་མྱོང་རྒན་པོའི་འབེལ་གཏམ་སོགས་བོད་ཀྱི་སྲོལ་རྒྱུན་གྱི་རྩོམ་རིག་དང་བརྩམས་ཆོས་མང་པོ་ཕྱིར་འཐེན་བྱས་ཡོད་པ་མ་ཟད། སློབ་དེབ་གསར་པ་དེ་དག་གི་ནང་བོད་ཀྱི་རིག་གཞུང་གི་ནང་དོན་མེད་པའམ་ཡང་ན་ཧ་ཅང་ཉུང་ཉུང་ཡིན་པར་བརྟེན་བོད་ཕྲུག་ཚོས་སོ་སོའི་མི་རིགས་ཀྱི་རིག་གཞུང་ལ་རྒྱུུས་ལོན་དང་གོ་རྟོགས་ཧ་ཅང་ཞན་པོ་ཆག་རྒྱུའི་ཐུགས་འཚབ་འགྲེལ་བརྗོད་གནང་ཡོད་འདུག འདི་གའི་གསར་འགོད་པས་དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་སུ་སྙན་ཐོ་དེའི་སྐོར་བཀའ་འདྲི་ཞུ་སྐབས་ཁོང་གིས། […] The post རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པས་བོད་ཀྱི་སྐད་ཡིག་དང་ཤེས་ཡོན་གྱི་ལམ་སྲོལ་རྩ་མེད་གཏང་བའི་སེམས་འཚབ་བཟོ་བཞིན་པ་མངོན་གསལ། appeared first on vot.

དཔའ་བོ་བློ་དགའ་རང་བཙན་ལགས་ཀྱིས་རྒྱ་དམར་གཞུང་ལ་ངོ་རྒོལ་གྱིས་བོད་བསྟན་སྲིད་མི་རིགས་དོན་དུ་རང་ལུས་མེར་བསྲེགས་བཏང་བ་ནས་བཟུང་། འཛམ་གླིང་ཡུལ་གྲུ་གང་སར་བོད་མིའི་འདུ་སྡོད་ས་གནས་ཁག་ཏུ་ལས་འགུལ་རིམ་པ་སྤེལ་དང་སྤེལ་བཞིན་ཡོད་ཅིང་། ལས་འགུལ་ཁྲོད་བོད་མི་ཁག་གཅིག་གི་བོད་དོན་དང་འབྲེལ་བའི་གོམ་བགྲོད་ཀྱི་ལས་འགུལ་སྤེལ་བའི་ཁྲོད། ཨ་རིར་གནས་བཞུགས་བོད་མི་བསོད་ནམས་རྡོ་རྗེ་ལགས་ཀྱིས་ Chicago རྒྱ་ནག་གཞུང་ཚབ་ལས་ཁུངས་ནས་ Washington DC ཝ་ཤིང་ཊོན་ཌི་སི་རྒྱ་ནག་གཞུང་ཚབ་ལས་ཁུངས་བར་མེ་ལེ་ ༡༠༠༠ ཡི་རྒྱང་ཐག་ལྡན་པའི་རང་དབང་གོམ་བགྲོད་ཀྱི་ལས་འགུལ་འགོ་འཛུགས་གནང་འདུག དེ་ཡང་ཁ་སང་ཕྱི་ཟླ་ ༨ ཚེས་ ༢༥ ཉིན་བོད་མི་བསོད་ནམས་རྡོ་རྗེ་ལགས་ཀྱིས་ཉིན་གྲངས་ ༤༠ ཙམ་གྱི་རང་དབང་གོམ་བགྲོད་ཀྱི་ལས་འགུལ་འདི་བཞིན་ Chicago ཅི་ཀ་གོ་རྒྱ་ནག་གཞུང་ཚབ་ལས་ཁུངས་ཀྱི་མདུན་དུ་སྐད་འབོད་དང་བཅས་འགོ་འཛུགས་གནང་འདུག་པ་དང་། སྐབས་དེར་ཅི་ཀ་གོ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚུལ་ཁྲིམས་ངག་གྲགས་ལགས་དང་སྤྱི་མཐུན་ཚོགས་པའི་ཚོགས་གཙོ་ཟུར་པ་བཀྲ་ཤིས་ཚེ་རིང་ལགས་ནས་གོམ་བགྲོད་དེ་ཉིད་དབུ་འབྱེད་དང་། ས་གནས་མང་ཚོགས་ཁག་གཅིག་ཆེད་ཕེབས་གནང་འདུག རྩ་བའི་དེ་སྔོན་བསོད་ནམས་རྡོ་རྗེ་ལགས་ཀྱིས་རང་དབང་གོམ་བགྲོད་དེ་དང་འབྲེལ་བའི་གསལ་བསྒྲགས་སྤེལ་བའི་ནང་། ལས་འགུལ་འདི་ད་བར་གཞིས་བྱེས་གཉིས་སུ་རྒྱལ་གཅེས་དཔའ་བོ་དཔའ་མོ་བོད་མི་ ༡༧༠ ལྷག་གི་རང་ལུས་མེར་བསྲེགས་ཀྱིས་བློས་བཏང་ལ་གདུང་སེམས་མཉམ་བསྐྱེད་དང་། ཁོང་རྣམ་པའི་སྐུ་ཚབ་བྱས་ཏེ། གྲོང་ཁྱེར་ཆེ་ཁག་ Chicago ཅི་ཀ་གོ་དང་ Indianapolis དེ་བཞིན་ Ohio དང Virginia མངའ་སྡེའི་བརྒྱུད་ནས་བོད་དོན་ཞུ་གཏུག་ཀྱིས་གོམ་བགྲོད་ལས་འགུལ་སྤེལ་རྒྱུ་དང་། ལྷག་པར་དུ་ལས་འགུལ་འདིའི་ནང་དབུ་མའི་ལམ་དང་རང་བཙན་གྱི་ལངས་ཕྱོགས་ཇི་འདྲ་ཡིན་རུང་མཉམ་ཞུགས་གནང་ན་དགའ་བསུ་ཡོད་སྐོར་བརྗོད་ཡོད་པ་མ་ཟད། ད་ལྟའི་དུས་སྐབས་དུ་རྡོག་རྩ་ཆིག་སྒྲིལ་གྱིས་ནུས་པ་འདོན་རྒྱུ་དང་བོད་དོན་དྲིལ་བསྒྲགས་ཀྱི་ལས་འགུལ་སྤེལ་དགོས་རྒྱུ་ཤིན་ཏུ་ནས་གལ་ཆེན་པོ་ཡིན་པ་གསལ་སྟོན་གནང་འདུག ཁ་སང་ལས་འགུལ་ཉིན་དང་པོ་གྲུབ་རྗེས། ཁོང་གིས་དེ་འབྲེལ་བརྙན་ཐུང་ཞིག་འདོན་སྤེལ་གནང་འདུག་པ་དང་། དེའི་ནང་ཁོང་གིས་གོམ་བགྲོད་གནང་བཞིན་པའི་བར་དུ་བཀའ་མོལ་གནང་བའི་ཁྲོད་ནས། ལས་འགུལ་འདི་ཉེ་སྔོན་ཨ་རི་ Minnesota མི་ནི་སོ་ཊ་ནས་ Chicago ཅི་ཀ་གོ་བར་བོད་མི་ཁག་གཅིག་ནས་བོད་དོན་གོམ་བགྲོད་གནང་བའི་དེའི་རྒྱུན་མཐུད་ལས་འགུལ་ཞིག་ཀྱང་མཚོན་གྱི་ཡོད་ཅིང་། གོམ་བགྲོད་འདི་བཞིན་ཟླ་བ་གཅིག་གི་ནང་དུ་མཇུག་སྒྲིལ་ཟིན་ཐུབ་ཀྱི་ཡོད་ཀྱང་། ཉིན་གྲངས་ ༡༠ འཕར་མ་བཞག་དགོས་དོན་ནི་ལམ་བར་དུ་དཀའ་ངལ་འཕྲད་པའི་གནས་སྟངས་རིགས་བྱུང་ཚེ་ཉལ་གསོ་རྒྱག་རྒྱུར་དམིགས་པ་ཞིག་ཡིན་པ་བརྗོད་འདུག ལྷག་པར་ཕྱི་ཟླ་ ༡༠ ཚེས་ ༢ ཉིན་མཇུག་སྒྲིལ་གནང་རྒྱུའི་དུས་ཚིགས་དེ་ཡང་། […] The post ཅི་ཀ་གོ་ནས་ཝ་ཤིང་ཊོན་རྒྱ་ནག་གཞུང་ཚབ་ལས་ཁུངས་བར་རང་དབང་གོམ་བགྲོད་ཀྱི་ལས་འགུལ་དབུ་འཛུགས། appeared first on vot.

རྒྱ་ནག་གཞུང་གི་དམག་སྲིད་ཁྱབ་ཁོངས་ལས་བོད་དམག་ཁུལ་ཁང་གི་དམག་དོན་སྒྲིག་འཛུགས་དང་འཛུགས་སྐྲུན། དེ་བཞིན་དེའི་འཕེལ་རིམ་ལ་དབྱེ་ཞིབ་གནང་བའི་ཉམས་ཞིབ་ཀྱི་སྙན་ཐོ་ཞིག་འདོན་སྤེལ་གནང་སོང་། དེ་ཡང་ཁ་སང་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་སྲིད་བྱུས་ཉམས་ཞིོབ་ཁང་གི་ཚོགས་ཁང་དུ་སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་མཆོག་གདན་ཞུས་ཐོག ཉམས་ཞིབ་པ་འབུམ་རམས་པ་བྱེ་གཞོང་ཚེ་དབང་རྡོ་རྗེ་ལགས་དང་ཕན་ཐོགས་ལགས། དེ་བཞིན་ཉམས་གསོ་ཉམས་ཞིབ་པ་བློ་བཟང་བཀྲ་ཤིས་ལགས་བཅས་གསུམ་གྱིས་ཉམས་ཞིབ་དང་རྩོམ་སྒྲིག་གནང་བའི་བོད་དམག་ཁུལ་ཁང་གི་བྱུང་བ་བརྗོད་པ་ A Historical Development of the Tibet Military District and China's Military Infrastructure in Tibet ཞེས་པའི་ཉམས་ཞིབ་ཀྱི་སྙན་ཐོ་དེ་ཉིད་དབུ་འབྱེད་གནང་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་མཆོག་གིས་དབུས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་དང་། ཉམས་ཞིབ་པ་རྣམ་པ། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ལས་བྱེད་རྣམ་པ་བཅས་ཆེད་ཕེབས་གནང་འདུག སྐབས་དེར་བཀའ་ཟུར་འབྲོང་ཆུང་དངོས་གྲུབ་མཆོག་གིས་རྒྱ་ནག་གཞུང་གིས་བོད་བཙན་བཟུང་བྱས་པ་ནས་བཟུང་། བོད་དེ་བཞིན་ས་བབ་ཀྱི་ཆ་ནས་དམག་གི་འཐབ་བྱུས་ཐད་གལ་འགངས་ཆེན་པོ་ཆགས་ཡོད་པ་འགྲེལ་བརྗོད་དང་འབྲེལ། དེ་སྔ་རྒྱ་ནག་དབུ་ཁྲིད་ཚོས་རྒྱལ་ཁབ་ལྷིང་འཇགས་དགོས་ན་མཐའ་སྲུང་བརྟན་པོ་དགོས་ངེས་ཡིན་པ་དང་། མཐའ་སྲུང་བརྟན་པོ་ཡོད་ན་བོད་དེ་བཞིན་ལྷིང་འཇགས་ཡོང་ངེས་ཡིན་པ་ཐེངས་མང་བཤད་ཡོད་པ་ལུང་འདྲེན་དང་སྦྲགས། བོད་དེ་བཞིན་རྒྱ་ནག་ངོས་ནས་དམག་གི་འཐབ་བྱུས་ཀྱི་ཆེད་དུ་ག་ཚོད་ཀྱི་གལ་འགངས་ཆེན་པོ་ཆགས་ཡོད་པ་གསལ་པོ་ཤེས་ཐུབ་ཀྱི་རེད་ཅེས་གསུངས་བ་མ་ཟད། དྲན་གསོས་པ་ཞིག་ལ་དེ་སྔ་བོད་ནང་དམག་དོན་དང་འབྲེལ་བའི་གནམ་ཐང་ཁག་ཅིག་ཡོད་པ་གསལ་སྟོན་གྱིས། ས་བྱི་ཞི་རྒོལ་ཆེན་མོ་བྱུང་བ་ནས་བཟུང་རྒྱ་ནག་གཞུང་གིས་བོད་ས་ཡོངས་ལ་དམག་མི་འགྲོ་ལམ་མྱུར་པོ་ཡོང་རྒྱུའི་ཆེད་དུ་གནམ་ཐང་མང་དག་ཅིག་འཛུགས་སྐྲུན་བྱས་ཡོད་པ་ཐེར་འདོན་གནང་སོང་། སྙན་ཐོ་དེ་དང་འབྲེལ་ནས་ཉམས་ཞིབ་པ་བྱེ་གཞོང་ཚེ་དབང་རྡོ་རྗེ་ལགས་ཀྱིས་ཐོག་མར་བོད་ཀྱི་དམག་ཁུལ་ཁག་དང་འབྲེལ་བའི་ཉམས་ཞིབ་བྱེད་འགོ་བཙུགས་སྟངས་ཀྱི་རྒྱབ་ལྗོངས་ལོ་རྒྱུས་དང་བྱུང་རིམ། དེ་བཞིན་ཚོགས་ཆུང་བཙུགས་དགོས་པའི་བྱུང་རིམ་སོགས་ཀྱི་སྐོར་འགྲེལ་བརྗོད་གནང་སོང་། ཕྱོགས་མཚུངས་ཉམས་གསོའི་ཉམས་ཞིབ་པ་བློ་བཟང་བཀྲ་ཤིས་ལགས་ཀྱིས་ཕྱི་ལོ་ ༢༠༡༦ བར་བོད་དམག་ཁུལ་ཁང་གི་བྱུང་བ་དང་འཕེལ་རིམ་ངོ་སྤྲོད་དང་འབྲེལ། རྒྱ་ནག་གཞུང་གིས་བོད་དམག་ཁུལ་ཁང་ཆེད་དུ་རྒྱ་ལམ་དང་མེ་འཁོར་ལྕགས་ལམ། དེ་བཞིན་གནམ་ཐང་སོགས་འཛུགས་སྐྲུན་བྱས་པ་སོགས་གསལ་སྟོན་གྱིས། རྒྱ་ནག་གཞུང་གིས་བོད་རང་སྐྱོང་ལྗོངས་ནང་དམག་གི་གནམ་ཐང་ཁྱོན་ ༡༣ འཛུགས་སྐྲུན་བྱས་ཟིན་ཡོད་པ་གསུངས་སོང་། རྩ་བའི་ཤོག་གྲངས་ ༡༡༡ ཅན་གྱི་བོད་དམག་ཁུལ་ཁང་གི་བྱུང་བ་བརྗོད་པ་ཞེས་པའི་སྙན་ཐོ་དེ་བཞིན་བོད་ཡིག་ཐོག་རྩོམ་སྒྲིག་གནང་བ་ཞིག་ཡིན་འདུག་པ་དང་འབྲེལ། རིམ་པའི་དབྱིན་ཡིག་སོགས་ཀྱི་ནང་ཕབ་བསྒྱུར་གནང་འཆར་ཡོད་པ་དང་། སྙན་ཐོ་དེ་བཞིན་སྡེ་ཚན་གསུམ་ལ་དབྱེ་སྟེ། བོད་དམག་ཁུལ་ཁང་གི་བྱུང་བ་དང་། དེའི་དམག་སྲིད་ཀྱི་སྒྲིག་གཞིའི་སྐོར་དང་རྒྱ་ནག་གཞུང་གིས་བོད་དམག་ཁུལ་ཁང་བཙུགས་པའི་དགོས་དམིགས། དེ་བཞིན་བོད་ནང་དམག་དོན་ཆེད་འཛུགས་སྐྲུན་ཇི་ལྟར་བྱས་ཡོད་མེད་བཅས་ཀྱི་སྐོར་གསལ་ཡོད་འདུག The post བོད་དམག་ཁུལ་ཁང་གི་བྱུང་བ་བརྗོད་པ་ཞེས་པའི་སྙན་ཐོ་འདོན་སྤེལ། appeared first on vot.

རྒྱལ་སྤྱིའི་ཐོག་བོད་མིའི་སྒྲིག་འཛུགས་ལ་ཆེ་མཐོང་ངོས་འཛིན་དང་། ཨ་རི་གཞུང་གིས་བོད་མིའི་སྒྲིག་འཛུགས་ལྷན་ཐད་ཀར་འབྲེལ་བ་འཛུགས་ཐབས་ལ་དམིགས་ཏེ། ཨ་རིའི་གྲོས་ཚོགས་གོང་མའི་ནང་དུ་བོད་དོན་ལ་རྒྱབ་སྐྱོར་གྱི་ཁྲིམས་འཆར་བོད་ཀྱི་མ་འོངས་འགན་སྲུང་ཞེས་པ་ཞིག་ངོ་སྤྲོད་གནང་འདུག དེ་ཡང་ཕྱི་ལོ་ ༢༠༢༦ ཟླ་བ་ ༨ ཚེས་ ༡༡ ཉིན་ཨ་རིའི་གྲོས་ཚོགས་གོང་མའི་འཐུས་མི་ཇེབ་མར་ཀི་ལི་ (Jeff Merkley) ལགས་དང་། གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་འཐུས་མི་ཇིམ་རི་ཤི་ (Jim Risch) ལགས་ཀྱིས་ཨ་རིའི་གྲོས་ཚོགས་གོང་མའི་ནང་དུ། ཨ་རི་གཞུང་གིས་རྒྱལ་སྤྱིའི་སྟེང་དུ་བོད་མིའི་སྒྲིག་འཛུགས་ཀྱི་ཆེ་མཐོང་ནུས་པ་གོང་མཐོར་དང་། གཞུང་འབྲེལ་ངོ་བོའི་ཐོག་ནས་བོད་མིའི་སྒྲིག་འཛུགས་ལྷན་དུ་མཉམ་ལས་ཡོང་ཐབས་ཀྱི་ཁྲིམས་འཆར་བོད་ཀྱི་མ་འོངས་འགན་སྲུང་། ཞེས་པ་དེ་ངོ་སྤྲོད་གནང་འདུག ཁྲིམས་འཆར་དེའི་ནང་དུ་ཨ་རི་གཞུང་གིས་བོད་མིའི་སྒྲིག་འཛུགས་དེ་བཞིན་བོད་མིའི་ཁྲིམས་མཐུན་གྱི་སྐུ་ཚབ་ཡིན་པ་དང་། དེ་ཉིད་༸གོང་ས་མཆོག་གིས་བསྐྱར་འཛུགས་མཛད་པའི་གཞུང་གི་རྒྱུན་འཛིན་པར་ངོས་འཛིན་གནང་བའི་ཐོག ཨ་རིའི་ཕྱི་སྲིད་ལྷན་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་ངམ་མཐོ་རིམ་སྐུ་ཚབ་ལ་ཆེ་མཐོང་མཚོན་ཆེད། ཁོང་ཚོར་རྒྱལ་ཁབ་ཀྱི་དབུ་ཁྲིད་དང་མཐུན་པའི་བརྩི་བཀུར་འབྲེལ་ལམ་ཞུ་དགོས་པའི་གྲོས་འགོ་བཏོན་འདུག བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། ཨ་རིའི་སྲིད་དོན་ཚོགས་པ་ཟུང་སྦྲེལ་གྱི་རྒྱབ་སྐྱོར་ཡོད་པའི་བོད་དོན་ཁྲིམས་འཆར་དེ་བོད་ཀྱི་མ་འོངས་པའི་གནས་བབ་དང་། ལྷག་པར་དུ་བོད་མིའི་སྒྲིག་འཛུགས་ལ་རྒྱལ་སྤྱིའི་སྟེང་ཆེ་མཐོང་གདེང་འཇོགས་ཡོང་ཐབས་དང་། བོད་རྒྱའི་དཀའ་རྙོག་སེལ་ཐབས་སྐོར་ཡིན་དུས་ཧ་ཅང་གལ་ཆེན་པོ་ཆགས་ཀྱི་ཡོད་ཅེས་གསུང་གི་འདུག ཨ་རི་གཞུང་གིས་དེ་སྔོན་གཏན་འབེབས་ཞུས་པའི་བོད་དོན་དང་འབྲེལ་ཁྲིམས་ཡིག་ཁག་ཏུ་བོད་མིའི་སྒྲིག་འཛུགས་ཀྱི་མིང་ཁ་གསལ་མེད་པ་མ་ཟད། གཞུང་འབྲེལ་ཐོག་ནས་བོད་མིའི་སྒྲིག་འཛུགས་ལྷན་འབྲེལ་མོལ་མཉམ་ལས་བྱེད་ཕྱོགས་སྐོར་གང་ཡང་གསལ་མེད། གལ་ཏེ་ཐེངས་འདིའི་ཁྲིམས་འཆར་དེ་ཉིད་ཁྲིམས་ཡིག་ཏུ་གཏན་འབེབས་ཐུབ་ན། ཁྲིམས་ཡིག་དེ་ཉིད་བོད་མིའི་སྒྲིག་འཛུགས་དེ་བོད་མིའི་ཁྲིམས་མཐུན་གྱི་སྐུ་ཚབ་ཏུ་ངོས་འཛིན་དང་། བོད་མིའི་ཆབ་སྲིད་ཀྱི་སྒྲིག་འཛུགས་དེ་ལ་ཨ་རི་གཞུང་གིས་གཞུང་འབྲེལ་འབྲེལ་ལམ་སྒོ་འབྱེད་ཀྱི་ཁྲིམས་ཡིག་དང་པོ་དེ་ཆགས་ཀྱི་ཡོད། དེ་བཞིན་བོད་ཀྱི་མ་འོངས་འགན་སྲུང་ཞེས་པའི་ཁྲིམས་འཆར་དེའི་ནང་དུ། བོད་མིའི་འགྲོ་བ་མིའི་ཐོབ་ཐང་དང་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་དང་། འཛམ་གླིང་མཉམ་འབྲེལ་རྒྱལ་ཚོགས་སུ་བོད་མིའི་སྒྲིག་འཛུགས་ལ་ཟུར་ཉན་པའི་གནས་བབ་སྤྲད་རྒྱུ་མཚོན་པའི་རྒྱལ་སྤྱིའི་ཚོགས་སྡེ་ཁག་ནས་བོད་མིའི་སྒྲིག་འཛུགས་ལ་ངོས་འཛིན་རྒྱབ་སྐྱོར་ཡོང་ཐབས་ཞུ་རྒྱུ་དང་། བོད་རྒྱའི་དཀའ་རྙོག་བསལ་རྒྱུ་དེ་ཨ་རིའི་ཐབས་བྱུས་ཀྱི་ཁེ་ཕན་ཞིག་ཡིན་པ་ངོས་འཛིན་གྱིས། རྒྱ་ནག་མི་མང་སྤྱི་མཐུན་རྒྱལ་ཁབ་ལ་བོད་མིའི་མངོན་འདོད་བསྒྲུབ་རྒྱུར་སྐུལ་འདེད་གཏང་རྒྱུ། ཕྱོགས་མཚུངས་༸གོང་ས་སྐུ་ཕྲེང་བཅུ་བཞི་པ་མཆོག་གི་སྐུའི་ཡང་སྲིད་ངོས་འཛིན་ཞུ་རྒྱུའི་བདག་དབང་ཡོངས་རྫོགས་དགའ་ལྡན་ཕོ་བྲང་ཡིད་ཆེས་དགེ་རྩར་ཡོད་པ་དང་། ཨ་རི་གཞུང་གིས་༸གོང་ས་སྐུ་ཕྲེང་བཅུ་བཞི་པ་སྐུ་འཚོ་བཞུགས་མེད་པའི་སྐབས་སུའང་བོད་དོན་ལ་རྒྱབ་སྐྱོར་མུ་མཐུད་བྱ་རྒྱུའི་སྐོར་འཁོད་འདུག བོད་མིའི་སྒྲིག་འཛུགས་ཀྱི་ཆེ་མཐོང་གོང་མཐོར་གཏོང་ཐབས་ཀྱི་ཁྲིམས་དེ་གཏན་འབེབས་ཐུབ་ན། དེ་དོན་བོད་མིའི་སྒྲིག་འཛུགས་ནས་ཕྱི་འབྲེལ་ཐབས་བྱུས་ཀྱི་གོ་སྐབས་ལེན་ཐབས་སྐོར་བསྟན་འཛིན་ལེགས་བཤད་ལགས་ཀྱིས་གསུངས་དོན་ལ། “བོད་མིའི་སྒྲིག་འཛུགས་ཀྱི་མཐར་ཐུག་གི་དམིགས་ཡུལ་དེ་བོད་རྒྱའི་དཀའ་རྙོག་བསལ་རྒྱུ་ཡིན་པས། དེའི་ཆེད་དུ་ནུས་པ་ག་ཚོད་བཏོན་ཐུབ་ནའང་དགེ་མཚན་ཆེ་བ་ཡོད། ད་ཐེངས་ཀྱི་ཁྲིམས་འཆར་དེ་བོད་མིའི་སྒྲིག་འཛུགས་ལ་ཆེ་མཐོང་ཡོང་ཐབས་སྐོར་ཡིན་པ་དང་། དམིགས་བསལ་བོད་མིའི་སྒྲིག་འཛུགས་དེ་བཞིན་༸གོང་ས་མཆོག་གི་དབུ་ཁྲིད་པའི་སྲིད་གཞུང་གི་རྒྱུན་སྐྱོང་མཁན་ཞིག་ཏུ་ངོས་འཛིན་གྱིས་སྔ་མོའི་བོད་གཞུང་དང་ད་ལྟའི་བོད་མིའི་སྒྲིག་འཛུགས་དེ་གཞུང་གཅིག་ཡིན་པར་གཟིགས་ཀྱི་ཡོད་པ་མ་ཟད། ཨ་རི་གཞུང་གིས་མཉམ་འབྲེལ་རྒྱལ་ཚོགས་སུ་བོད་མིར་ཟུར་ཉན་པའི་གནས་བབ་སྤྲད་རྒྱུ་མཚོན་པའི་མཐུན་ཕྱོགས་རྒྱལ་ཁབ་ཁག་ལ་བོད་མིའི་སྒྲིག་འཛུགས་ལ་ངོས་འཛིན་རྒྱབ་སྐྱོར་སྐུལ་འདེད་གཏོང་གི་ཡོད་དུས། ཁྲིམས་འཆར་དེ་གལ་ཆེན་པོ་ཆགས་ཀྱི་ཡོད་པས། བོད་མིའི་སྒྲིག་འཛུགས་ནས་ཁྲིམས་འཆར་ངོ་སྤྲོད་གནང་མཁན་འབྲེལ་ཡོད་གྲོས་ཚོགས་འཐུས་མི་རྣམས་ལ་ཐུགས་རྗེ་ལེགས་འབུལ་ཞུ་གི་འདུག” ཅེས་གསུངས།   འབྱུང་འགྱུར་ཁྲིམས་འཆར་དེ་ཉིད་ཁྲིམས་ཡིག་ཏུ་བསྒྱུར་བར་དེའི་སྐོར་ཨ་རིའི་གྲོས་ཚོགས་གོང་འོག་གཉིས་སུ་བགྲོ་གླེང་དང་། མོས་མཐུན་གཏན་འབེབས་བྱེད་དགོས་པ་དང་། དེ་ལྟར་གྲུབ་བའི་རྗེས་སུ་ཨ་རིའི་སྲིད་འཛིན་གྱིས་མོས་མཐུན་མཚན་རྟགས་འགོད་དགོས་ཀྱི་ཡོད། གྲོས་ཚོགས་གོང་མའི་འཐུས་མི་ཇེབ་མར་ཀི་ལི་ […] The post ཨ་རིའི་གྲོས་ཚོགས་གོང་མའི་ནང་དུ་རྒྱལ་སྤྱིའི་སྟེང་བོད་མིའི་སྒྲིག་འཛུགས་ལ་ངོས་འཛིན་ཆེ་མཐོང་ཡོང་ཐབས་ཀྱི་ཁྲིམས་འཆར་ཆེད་འདོན། appeared first on vot.

དེ་རིང་ཕྱི་ཟླ་ ༨ ཚེས་ ༡༢ ཉིན་གྱི་སྔ་དྲོ་ཆུ་ཚོད་༡༠།༣༠ཐོག་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་ཕྱི་རྒྱལ་ནས་རྒྱ་གར་དུ་ཕྱིར་ལོག་གནང་མཁན་བོད་མི་ཞིག་གི་འོས་བསྡུ་ཐོབ་ཐང་དང་འབྲེལ་ཁ་མཆུ་ཨང་ ༢༣ པའི་གནད་དོན་གཏན་འབེབས་ཀྱིས་ཉན་ཞིབ་ལས་རིམ་འཚོགས་སོང་། དེ་ཡང་གནད་དོན་གཏན་འབེབས་ཀྱི་ཉན་ཞིབ་ལས་རིམ་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དབུས་པའི་ཁྲིམས་ཞིབ་པ་རྣམ་པ་དང་། ཆེས་མཐོའི་ཁྲིམས་ཞིབ་ཁང་གི་ལས་བྱེད་རྣམ་པ། གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་དང་ཁོང་གི་ཁྲིམས་རྩོད་པ་བོད་མིའི་ཁྲིམས་ལུགས་རིག་པ་བའི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་བསྟན་འཛིན་ཡར་རྒྱས་ལགས། དེ་བཞིན་གྱོད་ཡ་རྩོད་ལེན་པ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་དང་། གཞན་ཡང་ཟུར་ཉན་པ་དང་གསར་འགོད་པ་བཅས་ཕེབས་འདུག སྐབས་དེར་ཆེས་མཐོའི་ཁྲིམས་ཞིབ་པ་རྣམ་པས་བཙན་བྱོལ་བོད་མིའི་བཅའ་ཁྲིམས་ཀྱི་སྤྱི་དམངས་གཏུག་བཤེར་ཁྲིམས་སྒྲིག་གི་དགོངས་དོན་ལྟར་གྱོད་ཡ་ཞུ་སྦྱོར་བ་དང་གྱོད་ཡ་རྩོད་ལེན་པ་གཉིས་ཀྱི་ཞུ་རྩའི་ནང་གང་དང་གང་འཁོད་མེད་དང་། ལྷག་པར་དུ་ཕྱི་ཚེས་ ༥ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་ཁ་མཆུ་དེ་ཉིད་དང་འབྲེལ་ཉན་ཞིབ་ཐོག་མའི་སྐབས་ཞུ་རྩ་དང་། ཞུ་ལན་བཅས་ལ་འདྲི་ཞིབ་གནང་རྗེས་ཐག་གཅོད་གང་གནང་ཡོད་མེད་བཅས་ལ་གཞིར་བཞག་ནས་གྱོད་ཡ་ཞུ་སྦྱོར་བའི་ཁྲིམས་རྩོད་པར་ཐེངས་རྗེས་མའི་ཁྲིམས་རའི་ཐོག་དབུས་འོས་བསྡུ་ལས་ཁང་གི་ཞུ་སྦྱོར་བ་དང་འབྲེལ་བའི་ཐག་གཅོད་དེ་དག་བཅའ་ཁྲིམས་དང་འོས་བསྡུའི་སྒྲིག་གཞི་དང་འགལ་ཡོད་པ་དང་། ལྷག་པར་དོ་བདག་ཞུ་སྦྱོར་བ་རང་ཉིད་ཁེ་ན་ཌའི་མི་སེར་དང་དཔྱ་ཁྲལ་ལག་དེབ་ཀྱི་ཐོབ་ཁུངས་ཡང་ཁེ་ན་ཌ་ཡིན་བཞིན་དུ། གནས་སྡོད་ཅེས་པའི་ཚིག་གཞི་དེ་དང་འབྲེལ་ནས། ཁྱེད་རང་ཁེ་ན་ཌའི་གནས་སྡོད་མིན་པ་དང་། རྒྱ་བལ་འབྲུག་གསུམ་གྱི་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་རྒྱུའི་ཐོབ་ཐང་ཡོད་པའི་ཁྲིམས་དོན་གྱི་གནད་དོན་དོན་ཚན་གཉིས་ཀྱི་ཐོག་ཁུངས་སྐྱེལ་གནང་དགོས་ཞེས་གསུངས་སོང་། འདི་གའི་གསར་འགོད་པས་ད་རེས་ཀྱི་གནད་དོན་གཏན་འབེབས་ཀྱི་ཉན་ཞིབ་ལས་རིམ་གྲུབ་མཚམས་སུ་གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་ཀྱི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་རྩོད་ལེན་པ་དབུས་འོས་བསྡུ་འགན་འཛིན་བློ་བཟང་ཡེ་ཤེས་ལགས་རྣམ་གཉིས་ལ་བཅར་འདྲི་ཁག་གཅིག་ཞུས་ཡོད། གཞི་རྩའི་ཐེངས་འདིའི་གནད་དོན་གཏན་འབེབས་ཀྱི་ཉན་ཞིབ་ལས་རིམ་ཐོག་ཆེས་མཐོའི་ཁྲིམས་ཞིབ་པ་མཆོག་ནས་ཁ་མཆུ་ཉན་ཞིབ་ཐོག་མའི་སྐབས་ཞུ་རྩ་དང་། ཞུ་ལན། གྱོད་ཡ་བརྟག་དཔྱད་ཉན་ཞིབ་བཅས་བྱས་འབྲས་སུ། གྱོད་ཡ་ཞུ་སྦྱོར་བས་ཞུ་ལན་གྱི་ནང་གསལ་ ༡ པོའི་ནང་། བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༨ དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ པ། སྤྱི་འཐུས་ཀྱི་འོས་ཆོས་དང་འབྲེལ་བའི་དོན་ཚན་ཁག་ལུང་འདྲེན་གྱིས་ཞུ་སྦྱོར་བ་དོ་བདག་རྒྱ་གར་ནས་སྤྱི་འཐུས་འོས་མིར་ལང་ཆོག་པའི་སྐོར་འགྲེལ་བརྗོད་གནང་ཡོད་པ་དེ་ལྟར་ཡང་། ཐོག་མའི་ཉན་ཞིབ་སྐབས་རྩོད་ལེན་པས། རྒྱ་བལ་འབྲུག་གསུམ་གྱི་ཐོབ་ཁུངས་ནང་འོས་བསྡུའི་ཆ་ཤས་ལེན་རྒྱུ་ཡིན་ན། འོས་བསྡུ་སྒྲིག་གཞི་དོན་ཚན་ ༢༢ ནང་གསལ་ལུང་འདྲེན་གྱིས་ཞུ་སྦྱོར་བ་ངོས་ནས་ཁེ་ན་ཌའི་མི་སེར་ལག་འཁྱེར་བློས་གཏོང་བྱ་དགོས་པ་དེ་ལྟར་བྱུང་མེད་པ་དང་། དོ་བདག་ཞུ་སྦྱོར་བ་ཁེ་ན་ཌའི་མི་སེར་ཡིན་པ། དཔྱ་ཁྲལ་ལག་དེབ་ཀྱི་ཨང་གྲངས་ཡང་ཁེ་ན་ཌའི་ཁོངས་ནས་ཡིན་པར་སོང་ཐོབ་ཁུངས་བྱང་ཨ་རི་དང་ལྷོ་ཨ་རི་ཁུལ་གནས་སྡོད་བོད་མིའི་ཁོངས་ཡིན་པའི་གསལ་བཤད་གནང་ཡོད་པས།  ཁྲིམས་ཞིབ་ཁང་ནས་གྱོད་ཡ་ཞུ་སྦྱོར་བའི་ཁྲིམས་རྩོད་པར་ ༡། དབུས་འོས་བསྡུ་ལས་ཁང་གི་ཞུ་སྦྱོར་བ་དང་འབྲེལ་བའི་ཐག་གཅོད་དེ་དག་བཅའ་ཁྲིམས་དང་འོས་བསྡུའི་སྒྲིག་གཞི་དང་འགལ་ཡོད་པ་ཁུངས་སྐྱེལ་ཐོག  ༢། དོ་བདག་ཞུ་སྦྱོར་བ་རང་ཉིད་ཁེ་ན་ཌའི་མི་སེར་དང་དཔྱ་ཁྲལ་ལག་དེབ་ཀྱི་ཐོབ་ཁུངས་ཡང་ཁེ་ན་ཌ་ཡིན་བཞིན་དུ། གནས་སྡོད་ཅེས་པའི་ཚིག་གཞི་དེ་དང་འབྲེལ་ནས། ཁྱེད་རང་ཁེ་ན་ཌའི་གནས་སྡོད་མིན་པ་དང་། རྒྱ་བལ་འབྲུག་གསུམ་གྱི་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་རྒྱུའི་ཐོབ་ཐང་ཡོད་པ་ཁུངས་སྐྱེལ་གནང་དགོས་ཞེས་གསུངས་སོང་། The post ཁ་མཆུ་ཨང་ ༢༣ པའི་གྱོད་དོན་གཏན་འབེབས་ཀྱི་ཉན་ཞིབ་འཚོགས་པ། appeared first on vot.

བོད་ཀྱི་ཟློས་གར་ཚོགས་པ་དབུ་བརྙེས་ཏེ་མི་ལོ་ཧྲིལ་པོ་ ༦༧ འཁོར་བའི་དུས་ཆེན་དང་བསྟུན། སྐུ་མགྲོ་གཙོ་བོ་མཆོག་གིས་གསུང་བཤད་ཁྲོད་བོད་ཀྱི་ཟློས་གར་ཚོགས་པས་བོད་ཀྱི་རིག་གཞུང་མི་ཉམས་རྒྱུན་འཛིན་ལ་ཞུབས་ཞུ་ཆེན་པོ་གྲུབ་ཡོད་པར་བསྔགས་བརྗོད་དང་འབྲེལ། རྒྱ་ནག་གི་བོད་བཙན་འཛུལ་བྱས་པ་མ་ཟད་བོད་ཀྱི་རིག་གཞུང་ལའང་བསྲེས་ལྷད་ཡོང་ཐབས་བྱེད་བཞིན་པར་བོད་མི་ཚོས་ཐུགས་སྣང་གནང་དགོས་པའི་འབོད་སྐུལ་གནང་སོང་། དེ་ཡང་ཁ་སང་ཕྱི་ཚེས་ ༡༡ ཉིན་བོད་ཀྱི་ཟློས་གར་ཚོགས་པ་དབུ་བརྙེས་པའི་དུས་ཆེན་སྲུང་བརྩི་ཞུས་ཡོད་པ་དང་། རྒྱུན་ལྡན་དུས་སྐབས་འདིར་དབྱར་སྐྱིད་སྤྲོ་སྐྱིད་ཚོགས་སྲོལ་ཡོད་པ་ཀྱང་། འདི་ལོ་དཔའ་བོ་བློ་དགའ་རང་བཙན་དམ་པ་དེ་ཉིད་ཀྱིས་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མེར་བསྲེགས་གནང་བ་དང་། དེ་བཞིན་ཟློས་ཟུར་ཁག་གཅིག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་ཡོད་སྟབས། གདུང་སེམས་མཉམ་བསྐྱེད་དང་མྱ་ངན་གུས་འདུད་མཚོན་ཆེད་ད་ལོ་དབྱར་སྐྱིད་ཀྱི་སྤྲོ་སྐྱིད་ཕྱིར་འཐེན་གནང་ཡོད་པ་དང་། དུས་ཆེན་སྲུང་བརྩིའི་ཆེད་དུ་རྒྱ་ལུ་རུ་ཁག་དང་རྔོན་པ་རུ་ཁག་གཉིས་བར་རྐང་བྲོ་གླུ་གཞས་འགྲན་བསྡུར་གནང་སྟེ། མཐའ་མའི་རྒྱལ་ཁ་དེ་སླར་ཡང་རྒྱ་ལུ་རུ་ཁག་ལ་ཐོབ་སོང་། ཐེངས་འདིའི་རྐང་བྲོ་གླུ་གཞས་འགྲན་བསྡུར་ཁྲོད། རྐྱང་གཞས་ལྟ་བུ་ཆ་མཚོན་ན་དམིགས་བསལ་ཞིག་ཏུ་རུ་ཁག་གཉིས་ནས་གར་གླུ་གཟིགས་འབུལ་ཞུས་ཡོད་པ་དང་། གར་གླུ་ཞེས་པ་ལས་གར་ནི་གཙོ་བོ་བོད་གཞུང་དགའ་ལྡན་ཕོ་བྲང་པའི་སྲིད་དབང་དུས་སུ་གཞུང་འབྲེལ་ཐད་ཀར་བཀོད་འདོམས་གནང་ལམ་ཡོད་པའི་གར་པ་ལ་གོ་བ་དང་། གར་པས་བཏང་བའི་གླུ་གར་གྱི་བསྡུས་མིང་ལ་གར་གླུ་ཞེས་འབོད་ཀྱི་ཡོད་པ་མ་ཟད། སྒྱུ་རྩལ་དེ་ནི་༸རྒྱལ་དབང་མཆོག་ཕེབས་བསུའི་སྐབས་འཁྲབ་སྟོན་གནང་བ་མ་གཏོགས་སྤྱིར་བཏང་གི་གནས་སྐབས་སུ་གང་བྱུང་འཁྲབ་སྟོན་བྱེད་སྲོལ་མེད་པ་ཞིག་ཆགས་ཀྱི་འདུག བོད་ཀྱི་ཟློས་གར་ཚོགས་པའི་ཉམས་ཞིབ་པ་དང་རིག་གནས་དགེ་རྒན་བསོད་ནམས་ཚེ་བརྟན་ལགས་ཀྱིས་གར་གླུའི་འཕེལ་རིམ་དང་ད་ལྟའི་གནས་བབ་སོགས་དང་འབྲེལ་ནས་འགྲེལ་བརྗོད་གནང་བ་གོང་གི་སྒྲ་སྒམ་དང་བརྙན་ཐུང་ནས་གསན་གཟིགས་གནང་ཐུབ། དེ་བཞིན་རྒྱ་ལུ་རུ་ཁག་གི་རུ་དཔོན་བསྟན་འཛིན་ཉི་མ་ལགས་སུ་བཀའ་འདྲི་ཞུས་སྐབས་ཁོང་གི་ད་ལོ་སླར་ཡང་རྒྱལ་ཁ་ཐོབ་པར་དགའ་ཚོར་ཆེན་པོ་བྱུང་བ་དང་འབྲེལ། མ་འོངས་པར་སློབ་གྲྭ་ཁག་གི་ཟློས་གར་དགེ་རྒན་རྣམས་པས་གར་གླུ་ཐོག་ཤུགས་སྐྱོན་ཐུབ་ན་དགེ་མཚན་ཡོད་པའི་འབོད་སྐུལ་ཞུས་སོང་། མ་ཟད་རྔོན་པ་རུ་ཁག་གི་རུ་དཔོན་བསྟན་འཛིན་ཉི་མ་ལགས་ཀྱིས་ཁོང་རང་ཉིད་ཀྱི་ཚོར་བ་འགྲེལ་བརྗོད་དང་འབྲེལ། བོད་པའི་གཞོན་སྐྱེས་ཚོས་བོད་ཀྱི་ཐུན་མོང་མ་ཡིན་པའི་རིག་གཞུང་ལ་དོ་སྣང་མང་ཙམ་གནང་ཐུབ་ན་དགེ་མཚན་ཆེན་པོ་ཡོད་པའི་འབོད་སྐུལ་ཞུས་སོང་། རྩ་བའི་མཛད་སྒོའི་ཐོག་སྐུ་མགྲོན་གཙོ་བོར་དབུས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་དམིགས་བསལ་སྐུ་མགྲོན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གིས་དབུས་པའི་མཛད་གཙོ་ཁག་ཅིག་དང་གཞུང་འབྲེལ་མ་ཡིན་པའི་སྐུ་མགྲོན། དེ་བཞིན་བོད་ཀྱི་ཟློས་གར་ཚོགས་པའི་ཚོགས་མི་དང་མང་ཚོགས་བཅས་ལྷན་ཞུགས་གནང་ཡོད་པ་རེད། དམིགས་བསལ་སྐུ་མགྲོན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གིས་གསུང་བཤད་གནང་བའི་ཁྲོད། རྒྱ་ནག་དང་ཐ་དད་ཡིན་པའི་བོད་ཀྱི་ཐུན་མོང་མ་ཡིན་པའི་ཟློས་གར་གྱི་འཕེལ་རིམ་དང་དེའི་གལ་གནད། དེ་བཞིན་བོད་ཀྱི་ཟློས་གར་ཚོགས་པ་དབུ་བརྙེས་པའི་དེ་བྱུང་ལོ་རྒྱུས་དང་བརྒྱུད་རིམ། དམིགས་ཡུལ་བཅས་ངོ་སྤྲོད་དང་། རྒྱ་ནག་གིས་བོད་བཙན་འཛུལ་བྱས་པ་མ་ཟད་བོད་ཀྱི་རིག་གཞུང་ལའང་བསྲེས་ལྷད་གཏོང་ཐབས་བྱེད་བཞིན་པར་བོད་མི་ཚོས་ཐུགས་སྣང་གནང་དགོས་པའི་འབོད་སྐུལ་གནང་སོང་། ལྷག་པར་ད་ལྟའི་དུས་སྐབས་སུ་ལྷག་དཀར་སྲུང་བརྩི་དང་འབྲེལ་བའི་རིག་གཞུང་འཁྲབ་བསྟོན་གནང་བཞིན་པར་ལེགས་གསོ་བསྔགས་བརྗོད་དང་འབྲེལ། བོད་མི་ཚོས་ཐུགས་སྣང་དགོས་པ་ཞིག་ལ་རྒྱ་ནག་གི་སྲོལ་རྒྱུན་ཟློས་གར་ཁྲང་ཞིའི་ཤན་ཞུགས་ཐེབས་རྒྱུ་མེད་པར་ཡིད་གཟབ་གནང་དགོས་གལ་ཡིན་པའི་དྲན་སྐུལ་གནང་སོང་། The post རྒྱ་ནག་གིས་བོད་ལ་བཙན་འཛུལ་བྱས་པ་མ་ཟད་བོད་ཀྱི་རིག་གཞུང་ལ་བསྲེས་ལྷད་གཏོང་ཐབས་བྱེད་བཞིན་པར་ཐུགས་སྣང་དགོས་གལ་ཡིན་པ་གསུངས་སོང་། appeared first on vot.

བཞུགས་སྒར་རྡ་རམ་ས་ལ་ནས་ལ་དྭགས་ཀྱི་འཕགས་བོད་ས་མཚམས་བར་བོད་དོན་གོམ་བགྲོད་ཀྱི་ལས་འགུལ་སྤེལ་མཁན་སྐལ་བཟང་མཐར་ཕྱིན་ལགས་འདི་ཚེས་ ༣ ཉིན་ལ་དྭགས་ཟངས་དཀར་དུ་ཕེབས་འབྱོར་བྱུང་རྗེས་དེ་རིང་སྔ་དྲོ་ཟངས་ལ་ནས་ Nyerak ཕྱོགས་སུ་སྐྱོད་བཞིན་འདུག དེ་ཡང་ཟླ་བ་ ༧ ཚེས་ ༡༥ ཉིན་བཞུགས་སྒར་རྡ་རམ་ས་ལ་ནས་བོད་མི་སྐལ་བཟང་མཐར་ཕྱིན་ལགས་ཀྱིས་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་མི་རིགས་རྩ་གཏོར་གྱི་ཁྲིམས་ལག་བསྟར་བྱས་འགོ་བཙུགས་པར་ངོ་རྒོལ་དང་། རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་མྱ་ངན་དང་གདུང་སེམས་མཉམ་སྐྱེད་ཞུ་སླད་ཀ་ཁ་ག་ང་རྣམ་པར་རྒྱལ་གྱུར་ཅིག་ཅེས་པའི་ཞི་བའི་གོམ་བགྲོད་ལས་འགུལ་ཞིག་འགོ་བཙུགས་ཏེ། དེ་རིང་ཉིན་གྲངས་ ༢༤ ཙམ་འགྲོ་བཞིན་ཡོད་པ་དང་འདི་ཚེས་ ༣ ཉིན་སྐལ་བཟང་ལགས་ལ་དྭགས་ཟངས་དཀར་ཁུལ་དུ་འབྱོར་སྐབས་ཟངས་དཀར་བོད་ཁྱིམ་སློབ་ཟུར་ཚོགས་པའི་ཚོགས་མི་རྣམས་ཀྱིས་ཕེབས་བསུ་སྣེ་ལེན་དང་སྦྲགས་ལས་འགུལ་དེར་རྒྱབ་སྐྱོར་གནང་བ་མ་ཟད། ཟངས་དཀར་ནང་ཚོགས་ཀྱི་ཚོགས་གཞོན་དང་བོད་ཁྱིམ་སློབ་ཟུར་ཚོགས་པའི་ཚོགས་མི་གཞས་པ་བསྟན་འཛིན་ཤེན་ལགས་ཀྱིས་ཟངས་དཀར་མང་ཚོགས་ལ་སྐལ་བཟང་ལགས་ཀྱི་ཞི་བའི་གོམ་བགྲོད་ནང་མཉམ་ཞུགས་ཡོང་བའི་རེ་སྐུལ་ཞིག་ལ་དྭགས་ཀྱི་ཡུལ་སྐད་ནང་གནང་འདུག ལྷག་པར་དུ་ཕྱི་ཚེས་ ༦ ཉིན་གོམ་བགྲོད་པ་སྐལ་བཟང་མཐར་ཕྱིན་ལགས་ཟངས་དཀར་དཔལ་ལྡུམ་ཁུལ་དུ་འབྱོར་སྐབས་ཟངས་དཀར་ནས་བསྟན་འཛིན་ཆོས་གྲགས་ལགས་ཀྱིས་ལས་འགུལ་ནང་མཉམ་ཞུགས་གནང་སྟེ་ཁོང་གཉིས་སྟོང་སྡེ་གྲོང་ཚོ་བརྒྱུད་འདི་ཚེས་ ༨ ཉིན་ཟངས་ལར་འབྱོར་ཡོད་ཅིང་། ལམ་བར་དུ་སྐལ་བཟང་ལགས་ཀྱིས་རང་ཉིད་ཀྱི་ངོ་དེབ་ཐོག་ལ་དྭགས་ཡུལ་མི་གཙོས་བཙན་བྱོལ་བོད་མི་དང་དེ་བཞིན་ཧི་མ་ཡ་ལའི་མི་རིགས་སུ་འདྲ་ཞིག་ནས་ཁོང་གི་གོམ་བགྲོད་ནང་མཉམ་ཞུགས་གནང་བའི་བརྒྱུད་ལས་འགུལ་འདིའི་ནུས་པ་དང་མཚོན་དོན་ཆེ་རུ་འགྲོ་བའི་ཡིད་ཆེས་གནང་བཞིན་ཡོད་པ་གསུངས་འདུག རྩ་བའི་སྐལ་བཟང་ལགས་དང་བསྟན་འཛིན་ཆོས་གྲགས་ལགས་གཉིས་འདི་ཚེས་ ༨ ཉིན་ཟངས་ལ་ནས་ Nyerak གྲོང་ཚོར་བསྐྱོད་རྩིས་ཡོད་ཀྱང་སྐལ་བཟང་ལགས་གློ་བུར་གཟུགས་གཞི་བདེ་མིན་རྐྱེན་པས་ཁུལ་དེར་ཉིན་གཉིས་ངལ་གསོ་བསྐྱོན་དགོས་བྱུང་ནས་དེ་རིང་སྔ་དྲོ་ཟངས་ལ་ནས་ཕྱིར་ཐོན་གྱིས་ཕྱི་དྲོ་ Nyerak གྲོང་ཚོར་འབྱོར་གྱི་ཡོད་པ་དང་དེ་ནས་རིམ་པའི་ Nyemo བརྒྱུད་ལ་དྭགས་གླེ་ཕྱོགས་སུ་བསྐྱོད་རྒྱུ་རེད་འདུག འདི་གའི་གསར་འགོད་པས་དེ་རིང་སྔ་དྲོ་སྐལ་བཟང་ལགས་སུ་གོམ་བགྲོད་ལས་འགུལ་ཀྱི་སྔ་ཕྱིའི་བྱུང་རིམ་དང་འབྲེལ་ནས་གནས་ཚུལ་རྒྱུས་ལོན་ཞུ་ཐབས་བྱས་ཀྱང་འབྲེལ་བ་མཐུད་ཐུབ་མ་སོང་བས་འདི་ག་རླུང་འཕྲིན་ཁང་ལ་དེ་སྔ་སྐལ་བཟང་ལགས་ཀྱི་གོམ་བགྲོད་ཀྱི་དམིགས་ཡུལ་སྐོར་བཅར་འདྲི་དང་ལེན་གནང་བ་ཞིག་བསྐྱར་བསྲིང་ཞུ་རྒྱུ་ཡིན།  The post བོད་དོན་གོམ་བགྲོད་པ་སྐལ་བཟང་མཐར་ཕྱིན་ལ་དྭགས་ཟངས་ལ་ནས་ Nyerak གྲོང་ཚོར་སྐྱོད་བཞིན་པ། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་བཏང་ནས་བདུན་ཚིགས་ལྔ་པ་འགྲོ་བཞིན་པ་དང་བསྟུན་ཅཱན་དི་གྷར་དུ་བོད་མི་བརྒྱ་ཕྲག་འདུ་འཛོམས་ཀྱིས་གཞི་རྒྱ་ཆེ་བའི་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག དེ་ཡང་ཁ་སང་རྒྱ་གར་བྱང་ཕྱོགས་བོད་མིའི་གཞིས་ཆགས་པོན་ཊ་དང་པུ་རུ་ཝ་ལ། ཧར་པར་པུར། སིམ་ལ། རཇ་པུར། རའེ་པུར། བདེ་སྐྱིད་གླིང་། ཅོན་ཏ་ར། མ་ཎ་ལི། སྦིར། པོན་ཊོ། དེ་བཞིན་ལྡི་ལི་བཅས་ནས་བོད་མི་སུམ་རྒྱ་བརྒལ་བ་ལྷན་འཛོམས་ཀྱིས། གཙོ་བོ་རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་རྗེས་དྲན་དང་ལྷག་དོན་རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོ་རྒོལ་མཚོན་ཆེད། ཞི་བའི་གོམ་བགྲོད་དང་མགོ་རིལ་བཟོ་བའི་གཞི་རྒྱ་ཆེ་བའི་ལས་འགུལ་སྤེལ་འདུག ལས་འགུལ་སྐབས་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ལག་ཏུ་བོད་ཀྱི་རྒྱལ་དར་བསྣམས་ཏེ་བོད་རྒྱལ་ལོ་ཞེས་འབོད་སྒྲ་སྒྲོགས་པ་དང་། ཡང་ཁག་ཅིག་གིས་དཔའ་བོ་བློ་དགའ་རང་བཙན་ལགས་ཀྱིས་སྐུ་པར་ལག་ཏུ་བསྣམས་ཏེ་དམ་པ་ཁོང་རྒྱལ་ལོ་ཞེས་འབོད་སྒྲ་སྒྲོགས་པ་མ་ཟད། རྒྱ་ནག་གཞུང་གི་ཁྲིམས་གསར་ལ་ངོས་ལེན་རྩ་བ་ནས་མེད་པའི་རྣམ་འགྱུར་ཤུགས་ཆེ་བསྟན་འདུག སྐབས་དེར་ལས་འགུལ་ནང་བོད་མི་ཙམ་མ་ཟད་ས་གནས་ཡུལ་མི་དང་སློབ་ཕྲུག་མང་དག་ཅིག་ནས་མཉམ་ཞུགས་གནང་བ་དང་། ཡུལ་མི་ཁག་ཅིག་གིས་དཔའ་བོ་བློ་དགའ་རང་བཙན་ལགས་ཀྱིས་སྐུ་པར་ལག་ཏུ་བསྣམས་ཏེ་མགོ་རིལ་བཟོ་བའི་ལས་འགུལ་ནང་མཉམ་ཞུགས་གནང་འདུག འདི་ག་རླུང་འཕྲིན་ཁང་གིས་ཅཱན་དི་གྷར་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་མཐའ་ཡས་ལགས་སུ་བཀའ་འདྲི་ཞུས་ཡོད། རྩ་བའི་རྒྱལ་གཅེས་དཔའ་བོ་བློ་རང་བཙན་ལགས་ཀྱི་སྐུ་ལུས་མེར་བསྲེགས་བཏང་ནས་བདུན་ཚིགས་ལྔ་པ་འཁོར་བ་དང་བསྟུན། འཛམ་གླིང་ས་ཕྱོགས་གང་སར་གནས་སྡོད་བོད་མི་རྣམས་ནས་རྣམ་པ་འདྲ་མིན་ཐོག་ངོ་རྒོལ་སྐད་འབོད་དང་མར་མེ་ཁྲོམ་སྐོར། ཞི་བའི་གོམ་བགྲོད། ཟས་བཅད་ངོ་རྒོལ། ངག་བཅད། མཆོད་འབུལ་སྨོན་ལམ་སོགས་ཀྱི་ཐོག་ནས་ལས་འགུལ་རྣམ་པ་འདྲ་མིན་སྤེལ་བཞིན་ཡོད་པ་དང་། སང་ཉིན་ཁེ་ན་ཌའི་གྲོང་ཁྱེར་ཌོ་རོན་ཌོ་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་བོད་མི་དང་བོད་དོན་རྒྱབ་སྐྱོར་བ་རྣམས་ནས་གཞི་རྒྱ་ཆེ་བའི་ཟས་བཅད་ངོ་རྒོལ་གྱི་ལས་འགུལ་ཞིག་ཀྱང་སྤེལ་རྒྱུ་རེད་འདུག The post ཅཱན་དི་གྷར་ནང་དཔའ་བོ་བློ་དགའ་རང་བཙན་ལགས་སུ་རྗེས་དྲན་གྱིས་གཞི་རྒྱ་ཆེ་བའི་སྐད་འབོད་ཀྱི་ལས་འགུལ་སྤེལ་འདུག appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་རྒྱལ་ཁབ་ཀྱི་རང་བཙན་སླར་གསོ་དང་བོད་མི་རིགས་དོན་དུ་སྐུ་ལུས་མེར་བསྲེགས་བཏང་བའི་གནད་དོན་བྱུང་བའི་རྗེས། འཛམ་གླིང་ཡུལ་གྲུ་གང་སར་གནས་པའི་བོད་མི་ཡོངས་ནས་དཔའ་བོ་ཁོང་ལ་རྗེས་དྲན་དང་རྒྱ་ནག་གཞུང་གི་བོད་མིའི་ཐོག་འཛིན་པའི་སྲིད་བྱུས་སྤྱི་དང་། ལྷག་པར་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེར་ངོས་ལེན་མེད་པའི་ངོ་རྒོལ་རིམ་པ་གནང་དང་གནང་བཞིན་པའི་ཚོར་བ་དྲག་པོ་ཡོད་པའི་དུས་སྐབས་འདིར། རྒྱ་ནག་གཞུང་གི་འཁྱོག་བཤད་འོག་མ་ཚུད་པར་གཟབ་གཟབ་གནང་དགོས་ཤིང་། དེར་གདོང་ལེན་གྱིས་བོད་དོན་ནུས་པ་ཇེ་ཤུགས་ཆེ་རུ་གཏོང་ཐབས་གནང་དགོས་པའི་སྐུལ་འདེབས་གནང་སོང་། འདི་ག་རླུང་འཕྲིན་ཁང་ནས་ཨ་རིའི་རྒྱལ་ས་ཝ་ཤིང་ཊོན་ཌི་སི་ནང་དུ་གནས་བཞུགས་རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་དང་ཨ་རིའི་མངའ་སྡེ་མི་ནི་སོ་ཌར་གནས་བཞུགས་བོད་རྒྱལ་ཡོངས་རང་བཙན་ལྷན་ཚོགས་ཀྱི་སྤྱི་ཁྱབ་ཚོགས་གཙོ་འཇིགས་མེད་ཨོ་རྒྱན་ལགས་སུ་དཔའ་བོ་བློ་དགའ་རང་བཙན་རྗེས་དྲན་ཐོག་བོད་ཀྱི་མ་འོངས་གནས་བབ་སོགས་དང་འབྲེལ་ནས་བཅར་འདྲི་ཞུས་པའི་སྐབས། བུ་ཆུང་ཚེ་རིང་ལགས་ཀྱིས། བོད་མིའི་རང་ལུས་མེར་བསྲེགས་ཀྱི་གནད་དོན་དང་འབྲེལ་ནས་བོད་མི་ཡོངས་ཀྱི་ཐུགས་འཇགས་གནང་དགོས་པ་ནི། བོད་མི་རིགས་ཀྱི་འཐབ་རྩོད་ཀྱི་ཁ་ཕྱོགས་ག་བ་འགྲོ་ཡི་ཡོད་མེད་དང་དེར་ཐབས་ཤེས་ཇི་ཡོད། མཐའ་མར་སླེབས་ས་ག་བ་ཡིན་པའི་ཐོག་ལ་གཏིང་ཟབ་པོའི་ཐུགས་སྣང་གནང་དགོས་ཤིང་། ལྷག་པར་བོད་མི་མི་རེ་ངོ་རེ་ལ་སྔར་ལྷག་ལས་འགན་ལྗིད་དུ་ཕྱིན་ཡོད་པ་དང་། རྒྱ་ནག་གཞུང་གི་དངོས་སམ་བརྒྱུད་པའི་ཐོག་ནས་བོད་པའི་སྤྱི་ཚོགས་ནང་ལ་དཀྲུག་ཤིང་སློང་བའི་གནས་ཚུལ་འབྱུང་བཞིན་ཡོད་པར། དཀྲུག་ཤིང་དེ་དག་གི་འོག་ལ་མ་ཚུད་པར་བོད་དོན་གྱི་ནུས་པ་དེ་ཇེ་ཤུགས་ཆེ་རུ་གཏོང་ཐབས་ཇི་ཡོད་སྐོར་དགོངས་བཞེས་གནང་དགོས་གལ་ཡིན་པའི་སྐུལ་འདེབས་གནང་སོང་། དེ་བཞིན་འཇིགས་མེད་ཨོ་རྒྱན་ལགས་ཀྱིས། རང་དབང་ལུང་པའི་ནང་ཡོད་པའི་བོད་མི་ཚོར་ལས་འགན་ཆེ་ཤོས་ཡོད་པ་དང་། ད་བར་བོད་མི་ ༡༧༡ ནས་བོད་རྒྱལ་ཁབ་དང་མི་རིགས་དོན་དུ་སྐུ་ལུས་མེར་བསྲེགས་བཏང་སྟེ། རང་སྲོག་བློས་བཏང་གནང་མཁན་དཔའ་བོ་དཔའ་མོ་རྣམ་པའི་མཚན་དང་ཞལ་ཆེམས། འཐབ་རྩོད་ཇི་འདྲ་གནང་ཡོད་པ་དེ་དག་རང་སོར་བཞག་དགོས་པ་ལས་བསྒྱུར་བ་གཏོང་རྒྱུ་མེད་པ་དང་ཆབས་ཅིག བོད་མི་ཡོངས་ནས་སྐད་འབོད་ཀྱི་ལས་འགུལ་སྤེལ་བའི་སྐབས། འཛམ་གླིང་གི་སྲིད་གཞུང་ཁག་ལ་རེ་བ་བཅོལ་རྒྱུ་ཙམ་མིན་པར་འཛམ་གླིང་སྲིད་གཞུང་ཁག་ནས་ཚུར་བོད་དོན་ཐོག་རོགས་རམ་ཡོང་ཐབས་ཀྱི་ཐབས་བྱུས་བཟུང་དགོས་པ། ལྷག་པར་དེ་འབྲེལ་བགྲོ་གླེང་རིགས་ཨིན་སྐད་ཐོག་མང་ཙམ་གནང་ཐུབ་ན་རྒྱལ་སྤྱིའི་སྤྱི་ཚོགས་ལ་གོ་བརྡ་སྤྲད་ཐུབ་རྒྱུའི་ཕན་ཐོགས་ཆེན་པོ་ཡོད་པ་མ་ཟད། ཆབ་སྲིད་ལངས་ཕྱོགས་ག་རེ་ཡིན་ཡང་བོད་པ་ཤ་ཁྲག་གཅིག་པ་དང་སོ་སོའི་ན་ཚ་ངོ་འཕྲོད་རྒྱུ། རྩ་བའི་བླ་མ་བོད་ལ་གདན་འདྲེན་ཞུ་རྒྱུའི་ཐོག་དགོངས་བཞེས་ཀྱི་ཕྱག་ལས་གནང་རོགས་ཞེས་སྐུལ་འདེབས་གནང་སོང་། དཔའ་བོ་བློ་དགའ་རང་བཙན་ལགས་ཀྱི་རང་ལུས་མེར་བསྲེགས་ཀྱི་བློས་བཏང་དེས་བོད་མིའི་མ་འོངས་ལས་འགུལ་ལ་ཤུགས་རྐྱེན་ཇི་ཡོད་བཀའ་འདྲི་ཞུས་པར་བུ་ཆུང་ཚེ་རིང་ལགས་ཀྱིས། མ་འོངས་ལས་འགུལ་ལ་ཤུགས་རྐྱེན་ཆེན་པོ་ཐེབས་རྒྱུ་ཡིན་ཞིང་། དེ་ཡང་བོད་ཀྱི་དཀའ་རྙོག་མ་སེལ་ནས་ལོ་ངོ་བཅུ་ཕྲག་བདུན་ལྷག་འགྲོ་བཞིན་ཡོད་པ་དང་། ད་ཆ་བོད་པའི་མི་རབས་བཞི་པ་དེ་ཆགས་ཀྱི་ཡོད་སྟབས། རྒྱ་གཞུང་གིས་བོད་མི་རྣམས་ཀྱི་སེམས་ཀྱི་རྨ་ཁ་གསོ་རྒྱུའི་ཚབ་ལས་ད་དུང་རྨ་ཁ་བཟོ་བཞིན་ཡོད་པའི་གནད་དོན་དང་རྒྱལ་སྤྱིའི་སྤྱི་ཚོགས་ཀྱི་རྒྱལ་ཁབ་མང་པོས་རྒྱ་ནག་ལ་དཔལ་འབྱོར་ཐོག་བསྟུན་མཁས་བྱེད་བཞིན་པའི་གནས་ཚུལ་ཐོག་བོད་ཀྱི་ཡ་ང་བའི་གནས་སྟངས་ཁྲོད་དེ་ལྟ་བུའི་ཡིད་སྐྱོ་བའི་གནས་ཚུལ་དེས་བོད་མིར་ཚོར་བ་ཤུགས་དྲག་པོ་སླེབས་ཡོད་པ་དང་། ཕྱོགས་གཞན་ཞིག་ནས་ད་ལྟའི་དུས་སྐབས་སུ་དུས་ཚོད་ཐུང་ངུའི་ནང་འཛམ་གླིང་གི་གནས་ཚུལ་ཤེས་རྟོགས་ཐུབ་ཀྱི་ཡོད་པ་དང་དཔའ་བོ་ཁོང་གི་བློས་བཏང་གནང་བ་དེ་མཇལ་རྒྱུ་ཡོད་པའི་དུས་སྐབས་འདིར་ཚོར་བ་ཤུགས་ཆེ་ཡོང་རྒྱུ་ཡིན་པ་གསུངས་སོང་། འཇིགས་མེད་ཨོ་རྒྱན་ལགས་ཀྱིས། རྒྱ་ནག་གཞུང་གིས་ལོ་མང་པོའི་རིང་འཛམ་གླིང་ཡུལ་གྲུ་གང་སར་དྲྭ་རྒྱའི་ཐོག་ནས་ལས་དོན་ཤུགས་ཆེན་པོ་བྱེད་བཞིན་ཡོད་པར། བོད་པའི་སྤྱི་ཚོགས་ནང་དུའང་དེའི་རིགས་ལ་ཐུགས་སྣང་གནང་ཚེ་མ་འོངས་བོད་དོན་ལས་འགུལ་ལ་ནུས་པ་ཤུགས་ཆེ་རུ་ཡོང་རྒྱུ་དང་། སྤྱི་ཚོགས་དྲྭ་རྒྱའི་ནང་དཀྲུག་ཤིང་དང་སྐད་ཆ་གང་བྱུང་འཆད་མཁན་མང་ཆེ་བའི་མིང་རྫུན་མ་དང་པར་མེད་པ་ཧ་ཅང་མང་པོ་ཡོད་པར་དེ་དག་ལ་གདོང་ལེན་གནང་ཆེད་ཆབ་སྲིད་ཀྱི་སློབ་སྦྱོང་དང་རྡོག་རྩ་ཆིག་སྒྲིལ་གྱི་ཐོག་ནས་ཁ་གཏད་གཅོག་དགོས་པའི་དྲན་སྐུལ་གནང་སོང་། རྩ་བའི་བགྲོ་གླེང་ལས་རིམ་འདིའི་ནང་ཁོང་རྣམ་པ་གཉིས་དང་ལྷན་དུ་དཔའ་བོ་ཁོང་གི་འཛམ་གླིང་མཉམ་སྦྲེལ་རྒྱལ་ཚོགས་ལས་ཁུངས་མདུན་དུ་སྐུ་ལུས་མེར་མཆོད་ཕུལ་བའི་མཚོན་དོན་བརྒྱུད་ནས་བོད་མི་རྣམ་པས་མཉམ་སྦྲེལ་རྒྱལ་ཚོགས་ལ་ལོ་ངོ་བཅུ་ཕྲག་དུ་མའི་རིང་རེ་བ་བཅོལ་ཡོད་ཀྱང་། གྲོས་ཆོད་ཁག་གཅིག་གཏན་འབེབས་མ་གཏོགས་དོན་ཕན་ལྡན་པའི་བོད་ཀྱི་གནད་དོན་ལ་བཟང་ཕྱོགས་ཀྱི་འགྱུར་བ་གང་ཡང་བྱུང་མེད་པའི་སྐོར་དང་། བོད་མི་རྣམས་ཚོར་ཤུགས་ཆེ་བའི་དུས་སྐབས་དེར་ཆབ་སྲིད་ཀྱི་ལངས་ཕྱོགས་ལས་བརྒལ་ནས་བོད་ཀྱི་རྩ་དོན་འཐབ་རྩོད་ཆེད་མདུན་བསྐྱོད་ཇི་ལྟར་བྱ་དགོས་མིན། རྒྱ་ནག་གཞུང་གི་བྱེད་བབ་ལ་གཞིགས་ནས་ད་ལྟའི་སྲིད་བྱུས་ལ་བསྐྱར་ཞིབ་དགོས་ཀྱི་ཡོད་མེད་ཐད་དགོངས་ཚུལ་སོགས་ཀྱི་ཐོག་ལ་བཅར་འདྲི་ཞུས་ཡོད་པས་གཟིགས་འདོད་ཡོད་ཚེ་འདི་ག་རླུང་འཕྲིན་ཁང་གི་ཡུ་ཊུབ་དང་ངོ་དེབ་ཐོག་གཟིགས་རྒྱུ་ཡོད་པ་མ་མཉེས་པ་གནང་རོགས། The post ད་ལྟའི་དུས་སུ་བོད་མི་ཡོངས་ནས་རྒྱ་ནག་གཞུང་གི་འཁྱོག་བཤད་ལ་གདོང་ལེན་གྱིས་བོད་དོན་ནུས་པ་ཤུགས་ཆེ་རུ་གཏོང་ཐབས་གནང་དགོས་པ། appeared first on vot.

ཁ་སང་ཕྱི་དྲོ་འདི་ག་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་དགོན་པའི་མདུན་ཐང་དུ་མདོ་ཁམས་ཆུ་བཞི་སྒང་དྲུག་དབུས་ས་གཉིས་ཀྱི་གོ་སྒྲིག་འོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་བསྟན་སྲིད་མི་རིགས་ཀྱི་ཆེད་རང་སྲོག་མཆོད་འབུལ་གནང་མཁན་དཔའ་བོ་བློ་དགའ་རང་བཙན་ལགས་ཀྱི་བདུན་ཚིགས་ལྔ་པ་དང་བསྟུན།  མཆོད་འབུལ་སྨོན་ལམ་དང་མར་མེའི་ཁྲོམ་སྐོར་བཅས་ཀྱི་ལས་འགུལ་ཞིག་སྤེལ་ཡོད་པ་དང་།   ལས་འགུལ་དེའི་སྐབས་མདོ་སྨད་ཆུ་བཞི་སྒང་དྲུག་གི་དབུས་རྒྱུན་སྤྱི་ཟུར་དགེ་བཤེས་སྨོན་ལམ་མཐར་ཕྱིན་ལགས་ནས།  དཔའ་བོ་བློ་དགའ་རང་བཙན་ལགས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་གཞན་ལ་འཚེ་བ་སྤུ་ཙམ་མེད་པར་འཆར་གཞི་དང་ནུས་པ་སྙིང་སྟོབས་བཅས་ལྡན་པའི་ཐོག་ནས་བོད་བསྟན་སྲིད་མི་རིགས་ཀྱི་ཆེད་དུ་རང་སྲོག་བློས་གཏོང་བྱས་པ་དེར་ངེས་པར་རྗེས་དྲན་ཞུ་དགོས་པ་དང་། ལྷག་པར་ལྡི་ལི་བོད་སྒར་བསམ་ཡས་གླིང་གི་མི་མང་ཚོས་ཨ་རི་དང་ཡོ་རོབ་སོགས་ཀྱི་ས་གནས་གཞན་ཁག་གི་བོད་མིའི་ལས་འགུལ་ཁག་ལ་དཔེ་བླངས་ཏེ་ཚོར་བ་ཡོད་ཙམ་བྱས་ཏེ་ལས་འགུལ་སྤེལ་དགོས་པ་སོགས་ཀྱི་གསུང་བཤད་གནང་སོང་།   མདོ་ཁམས་ཆུ་གཞི་སྒང་དྲུག་དབུས་ས་གཉིས་ཀྱི་སྤེལ་བའི་ཁ་སང་ཕྱི་དྲོའི་ལས་འགུལ་དེའི་སྐབས།  བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་ཟུར་པ་རྒྱ་རི་སྒྲོལ་མ་མཆོག་གི་དབུས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་དང་།  བོད་སྒར་བསམ་ཡས་གླིང་གི་ས་གནས་ འགོ་འཛིན་གྱི་གཙོས་པའི་རྒྱ་འཐུས་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་མི་མང་བརྒྱ་སྐོར་ཞིག་ནས་མཉམ་ཞུགས་གནང་ཡོད་པ་དང་།    སྐབས་དེར་མདོ་ཁམས་ཆུ་བཞི་སྒང་དྲུག་གི་ཚོགས་གཙོ་དགེ་བཤེས་བློ་བཟང་སྙན་གྲགས་ལགས་ཀྱིས་ཀྱང་བློ་དགའ་རང་བཙན་ལགས་ཀྱི་ཞལ་ཆེམས་ལྟར་བོད་མི་ཚང་མས་རྡོག་རྩ་ཆིག་སྒྲིལ་ཐོག་ནས་ནུས་པ་མཉམ་སྤུངས་དགོས་པ་སོགས་གསུངས་ཡོད།   རྒྱལ་གཅེས་དམ་པ་དཔའ་བོ་བློ་དགའ་ལགས་ཀྱི་མདུན་ཚིགས་ལྔ་པའི་མཆོད་འབུལ་སྨོན་ལམ་དེའི་སྐབས་ད་དུང་རྒྱ་གར་བོད་དོན་རྒྱབ་སྐྱོར་ཚོགས་པ་ BTSM གྱི་རྒྱལ་ཡོངས་འབྲེལ་མཐུད་པ་སྐུ་ཞབས་ Pankaj Goyal ལགས་ཀྱིས་བོད་མིའི་བདེན་དོན་འཐབ་རྩོད་ལ་རྒྱབ་སྐྱོར་ཡོད་པའི་གསུང་བཤད་གནང་བ་མ་ཟད།  མཆོད་འབུལ་སྨོན་ལམ་གྲུབ་མཚམས་ལས་འགུལ་བ་ཚོས་མར་མེའི་ཁྲོམ་སྐོར་ཡང་གནང་ཡོད།  The post རྒྱལ་ས་ལྡི་ལིར་དཔའ་བོ་བློ་དགའ་རང་བཙན་གྱི་བདུན་ཚིགས་ལྔ་པར་མཆོད་འབུལ་སྨོན་ལམ་དང་མར་མེའི་ཁྲོམ་སྐོར་གནང་བ། appeared first on vot.

ཁ་སང་ཕྱི་ཚེས་ ༥ ཉིན་ཨ་རིའི་མི་ནི་སོ་ཊའི་ནང་རང་ལོ་ ༨༢ ཅན་གྱི་སྤོ་བོ་རྡོ་རྗེ་རྒྱལ་པོ་ལགས་ཚུད་པའི་བོད་མི་ལྔ་ཡིས་མངའ་སྡེའི་རྒྱལ་ས་ Saint Paul ནས་ Chicago གྲོང་ཁྱེར་གྱི་རྒྱ་ནག་གཞུང་ཚབ་ལས་ཁུངས་བར་མི་ལེ་ ༤༠༠ ལྷག་གི་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་འདུག དེ་ཡང་མི་ནི་སོ་ཊའི་ས་གནས་མདོ་ཁམས་ཆུ་བཞི་སྒང་དྲུག་གི་ཚོགས་གཙོ་ལྷ་ཐོག་རྨ་གཡང་ཉི་མ་ལགས་ཀྱིས་སྣེ་འཁྲིད་པ་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་རྒྱབ་སྐྱོར་འོག ཁ་སང་ཚེས་ ༥ ནས་འགོ་འཛུགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་བོད་དོན་ཆེད་རང་སྲོག་བློས་བཏང་གནང་ནས་ཞག་ ༤༩ སྟེ་འདི་ཚེས་ ༡༩ བར་ཞི་བའི་གོམ་བགྲོད་གནང་བཞིན་པ་དང་། ལས་འགུལ་ནང་རང་ལོ་ ༨༢ ཅན་གྱི་སྤོ་བོ་རྡོ་རྗེ་རྒྱལ་པོ་ལགས་དང་རང་ལོ་ ༢༦ ཅན་གྱི་གཞོན་སྐྱེས་བསྟན་འཛིན་ནོར་བུ་ལགས་བཅས་ཁྱོན་མི་གྲངས་ལྔ་ནས་མཉམ་ཞུགས་གནང་ཡོད་པ་མ་ཟད། ཁ་སང་ཉིན་དང་པོའི་ལས་འགུལ་ནང་ས་གནས་མང་ཚོགས་གཞན་ཁག་གཅིག་ཀྱང་མཉམ་ཞུགས་གནང་འདུག ལྷ་ཐོག་རྨ་གཡང་ཉི་མ་ལགས་ཀྱིས་འདི་ག་རླུང་འཕྲིན་ཁང་ལ་གོམ་བགྲོད་དབུ་འཛུགས་སྐབས། ཐེངས་འདིའི་ཞི་བའི་ལས་འགུལ་དེ་ནི་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཞེས་པའི་སྲིད་བྱུས་དང་། བོད་ཀྱི་ཆོས་དང་རིག་གཞུང་། སྐད་ཡིག་བཅས་ལ་དམ་དྲག བོད་ཕྲུག་མང་པོ་ཞིག་རྒྱ་ནག་གཞུང་འབྲེལ་གྱི་བཅའ་སྡོད་སློབ་གྲྭ་ཁག་ཏུ་བཙན་གྱིས་བཅུག་པ་སོགས་ཀྱི་གནད་དོན་རྣམས་ཨ་རིས་གཙོས་རྒྱལ་སྤྱིའི་སྤྱི་ཚོགས་ཁྲོད་གོ་རྟོགས་སྤེལ་ཆེད་དང་། བོད་མི་རྣམས་གཉིད་ལས་སད་ཆེད་དྲན་གསོ་ཡིན་པར་འགྲེལ་བརྗོད་གནང་སོང་བ་མ་ཟད། ལྷག་དོན་དུ་རྒྱ་ནག་དམར་པོའི་གཞུང་ལ་བོད་ཀྱི་བདེན་མཐའ་མ་གསལ་བར་དུ་བོད་མིའི་སེམས་ཤུགས་ནམ་ཡང་ཆགས་ཀྱི་མ་རེད་ཅེས་བརྡ་ལན་གནང་སོང་། གཞན་ཡང་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་གཙོ་འཇིགས་མེད་ཨོ་རྒྱན་ལགས་ཀྱིས། བོད་པ་ཡིན་པ་ཙམ་གྱིས་ལས་འགུལ་འདྲ་མིན་སྤེལ་དགོས་རྒྱུ་གལ་ཆེན་ཡིན་པ་ནན་བཤད་དང་སྦྲགས། རྒྱུ་ཡོད་མཁན་ཚོས་དངུལ་འགྲོ་སོང་དང་། དཔའ་བློ་ཡོད་མཁན་ཚོས་ཕྱིར་དོན་ནས་ལས་འགུལ་སྤེལ་དགོས་པ། ཤེས་ཡོན་ཅན་ཚོས་དཔྱད་རྩོམ་འབྲི་དགོས་པ་སོགས་ཀྱི་ཞུ་སྐུལ་གནང་སོང་། ཐེངས་འདིའི་ལས་འགུལ་ནང་མཉམ་ཞུགས་གནང་མཁན་ཁོངས་སུ་ཡོད་མཁན་སྤོ་བོ་རྡོ་རྗེ་རྒྱལ་པོ་ལགས་ལྟ་བུ་མཚོན་ན། དེ་སྔོན་ཕྱི་ལོ་ ༢༠༡༢ ལོར་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་ཉིན་གྲངས་ ༢༧ རིང་ཟས་བཅད་ངོ་རྒོལ་གྱི་ལས་འགུལ་ནང་མཉམ་ཞུགས་གནང་མྱོང་མཁན་ཞིག་ཡིན་པ་དང་། ཁོང་གིས་ཐེངས་འདིའི་ལས་འགུལ་ནང་མཉམ་ཞུགས་གནང་དགོས་དོན་གཙོ་བོ་ནི་རྒྱལ་གཅེས་པ་བློ་དགའ་རང་བཙན་ལགས་ཀྱིས་རྒྱལ་ཚོགས་མདུན་དུ་སྐུ་ལུས་མེར་བསྲེགས་བཏང་བའི་གནས་ཚུལ་ཐོན་པར་སེམས་ནང་ཚོར་སྣང་དྲག་པོ་ཞིག་བྱུང་སྟབས་ཡིན་པ་གསུངས་འདུག གཞི་རྩའི་ཉེ་ལམ་ཨ་རི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཆེད་དུ་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གིས་རང་ལུས་མེར་བསྲེགས་དང་། ལྷག་པར་འདི་ལོར་རྒྱ་དམར་སྲིད་གཞུང་གིས་ཟླ་བ་འདིའི་ཚེས་ ༡ ཉིན་ནས་འགོ་འཛུགས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བའི་དོན་ཚན་ ༦༥ ཅན་གྱི་ཁྲིམས་ཡིག་ལག་བསྟར་བྱེད་འགོ་བཙུགས་པ་ནས་བཟུང་། རྒྱ་གར་ཕྱི་ནང་གཉིས་ནང་བོད་མི་གནས་སྡོད་ས་ཚིགས་གང་སར་རྐང་འཁོར་དང་སྦག་སྦག་སྐོར་སྐྱོད། སྒེར་ཚོགས་གཉིས་ཀའི་གོ་སྒྲིག་འོག་ཞི་བའི་གོམ་བགྲོད་དང་། […] The post ཨ་རིའི་ Minnesota ནས་ Chicago གྲོང་ཁྱེར་བར་ཞི་བའི་གོམ་བགྲོད་དབུ་འཛུགས། appeared first on vot.

CNN གསར་ཁང་དང་བོད་གནས་ལྟ་ཞིབ་ཁང་གཉིས་ཀྱིས་བོད་ཁམས་ཕྱོགས་ནས་བཙན་བྱོལ་ལ་འབྱོར་བའི་བོད་མི་ཞིག་ལ་དམིགས་བསལ་བཅར་འདྲི་ཞུས་པའི་ཁྲོད། རྒྱ་གཞུང་གིས་ཕྱི་ལོ་ ༢༠༢༡ ལོའི་ལོ་མཇུག་ཙམ་ལ་ཁམས་བྲག་མགོ་དགའ་ལྡན་རབ་བརྟན་གླིང་དགོན་དུ་སྨིད་ ༩༩ ཅན་གྱི་སྟོན་པའི་སྐུ་བརྙན་དང་མ་ཎི་འཁོར་ལོ་གྲངས་ ༤༥ དེ་བཞིན་ཉེ་འཁྲིས་སུ་ཡོད་པའི་ཐོག་བརྩེགས་གསུམ་ཅན་གྱི་རྗེ་བཙུན་བྱམས་པ་མགོན་པོའི་སྐུ་བརྙན་དང་གཙུག་ལག་ཁང་གཏོར་བཤིག་བཏང་རྗེས། ད་ཆ་ས་ཚིགས་དེབཞིན་རྟ་རྒྱུག་ཐང་དུ་བསྒྱུར་ཡོད་པ་མ་ཟད། སྲིད་འཛིན་ཞི་ཅིན་ཕིང་གིས་སྣེ་ཁྲིད་པའི་རྒྱ་གཞུང་གིས་བོད་ནང་དུ་མི་རིགས་མཉམ་བསྲེས་ཀྱི་ཆེས་གདུག་རྩུབ་ཅན་གྱི་སྲིད་བྱུས་ལག་བསྟར་ཁྲོད།  ད་ལྟའི་ཆར་བོད་པའི་ལོ་ཆུང་བྱིས་པ་རྣམས་བོད་སྐད་ཡང་རྒྱག་ཐུབ་ཀྱི་མེད་པའི་གནས་སྟངས་འོག་ལྷུང་ཡོད་པ་འགྲེལ་བརྗོད་གནང་འདུག དེ་ཡང་ཁ་སང་ CNN གསར་ཁང་དང་བོད་གནས་ལྟ་ཞིབ་ཁང་གཉིས་ཀྱིས་དེ་གའི་དྲྭ་ཚིགས་ཐོག་བོད་ཁམས་བྲག་མགོ་ཕྱོགས་ནས་བཙན་བྱོལ་ལ་འབྱོར་བའི་བོད་མི་ཆོས་རྒྱལ་ཟླ་བ་ལགས་སུ་དམིགས་བསལ་བཅར་འདྲི་ཞུས་པའི་གནས་ཚུལ་སྤེལ་བའི་ནང་། ཕྱི་ལོ་ ༢༠༢༡ ཟླ་ ༡༢ ཚེས་ ༡༢ ཉིན་རྒྱ་ནག་གཞུང་གིས་བོད་བྲག་མགོའི་དགའ་ལྡན་རབ་བརྟན་རྣམ་རྒྱལ་གླིང་གི་ཉེ་འཁྲིས་སུ་བཞེངས་ཡོད་པའི་མཐོ་ཚད་ལ་ཁྲུ་ ༩༩ ཅན་གྱི་སྟོན་པའི་སྐུ་བརྙན་དང་། རྗེ་བཙུན་བྱམས་མགོན་གྱི་སྐུ་བརྙན། མ་ཎི་དུང་འཁོར་བཞི་བཅུ་ཞེ་ལྔ་བཅས་གཏོར་བཤིག་བཏང་བའི་གནས་ཚུལ་ཕྱི་ཕྱོགས་སུ་ཐོན་ཡོད་པ་ལྟར་།ཆོས་རྒྱལ་ལགས་ཀྱིས་སྔར་ཆོས་ལུགས་ཀྱི་གནས་རྟེན་ཡིན་པའི་ས་གནས་དེ་ད་ཆ་རྟ་རྒྱུག་བཏང་སའི་ཐང་ཆེན་དུ་བསྒྱུར་ཡོད་པ་མ་ཟད། དེའི་ཉེ་འཁོར་དུ་ཐོག་བརྩེགས་མང་པོ་ཡོད་པའི་ཁང་པ་འཛུགས་སྐྲུན་བྱེད་བཞིན་ཡོད་པ་འགྲེལ་བརྗོད་གནང་འདུག མ་ཟད། ཁོང་གིས་ཁམས་བྲག་མགོ་དེ་བཞིན་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ངོ་རྒོལ་གྱི་ལྟེ་གནས་ཤིག་ཏུ་གྱུར་རྗེས། རིམ་པས་ཁུལ་དེར་རྒྱ་གཞུང་གིས་མངོན་གསལ་དོད་པོས་དམག་མི་དང་ཉེན་རྟོག་པ་ཇེ་མང་དུ་བཏང་ནས་དམ་དྲག་ཇེ་ཆེར་བཏང་བ་དང་། སྲང་ལམ་ཁག་ནས་བོད་མི་ཚོར་གང་བྱུང་གིས་སྔོག་བཤེར་བྱས་པ་སོགས་མཐོང་མྱོང་ཡོད་པ་དང་། ལྷག་པར་དེང་སྐབས་ས་གནས་མི་མང་རྣམས་རྒྱུན་དུ་གཞུང་གི་ཚོགས་འདུར་བསྐོངས་ནས། དམར་ཤོག་ཚོགས་པར་ཉན་དགོས་པ་དང་། རང་གི་ཕྲུ་གུ་དགོན་པའི་སློབ་གྲྭར་གཏོང་མི་རུང་བའི་སྐོར་ལ་སློབ་གསོ་སྤྲོད་ཀྱི་ཡོད་པ་དང་ཆབས་ཅིག བྲག་མགོ་རྫོང་གི་སྟོན་པའི་སྐུ་བརྙན་གཏོར་བཤིག་ལ་ཞི་རྒོལ་གནང་མཁན་བོད་མིར་ཉུང་མཐར་ཉིན་གྲངས་ ༢༠ ལྷག་བཀག་ཉར་དང་གཞུང་གི་ཆབ་སྲིད་སློབ་གསོར་བཙན་གྱིས་ཞུགས་བཅུག་གི་ཡོད་པ་འགྲེལ་བརྗོད་གནང་འདུག དེ་བཞིན་ཆོས་རྒྱལ་ལགས་ཀྱིས་ཁོང་གི་མི་རབས་ནི་རྒྱ་ནག་ནང་ཤེས་ཡོན་གྱི་བརྒྱུད་རིམ་ཡོངས་རྫོགས་སུ་བོད་ཀྱི་ལོ་རྒྱུས་དང་། སྐད་ཡིག རིག་གཞུང་བཅས་ལ་དམིགས་བསལ་གྱིས་སློབ་སྦྱོང་བྱེད་པའི་གོ་སྐབས་ཡོད་པའི་མི་རབས་མཐའ་མ་དེ་ཡིན་པར་སེམས་འཚབ་དང་སྦྲགས། རྒྱ་གཞུང་གིས་བོད་ཁུལ་དུ་བཙན་གྱིས་མི་རིགས་མཉམ་བསྲེས་ཀྱི་སྲིད་བྱུས་ལག་བསྟར་ཁྲོད་ད་ལྟའི་ཆར་བོད་མི་ན་གཞོན་རྣམས་རང་གི་ཕ་སྐད་ཙམ་ཡང་རྒྱབ་ཐུབ་ཀྱི་མེད་པ་དང་། ལྷག་པར་རྒྱའི་ཆེད་འཛུགས་བྱས་པའི་བཅའ་སྡོད་སློབ་གྲྭ་ཁག་ནང་རྒྱ་སྐད་དང་རྒྱ་ཡིག་གཙོ་ཁྲིད་བྱས་ཏེ་བོད་མིའི་ངོ་བོ་བཅས་པ་རྩ་མེད་བཟོ་ཐབས་བྱེད་བཞིན་ཡོད་པའི་ཐོག ད་ཆ་སྔོན་འགྲོའི་སློབ་གྲྭ་ནང་གི་བོད་པའི་ལོ་ཆུང་བྱིས་པ་ཚོ་ལའང་རྒྱ་ནག་དམར་ཤོག་ཚོགས་པར་དགའ་ཞེན་དང་ཡིད་ཆེས་འགྱུར་བ་མེད་པ་བྱེད་དགོས་སྐོར་གྱི་སློབ་གསོ་སྤེལ་བཞིན་པ་དེས་བོད་མིའི་ངོ་བོ་དང་ཆོས་རིག་བཅས་པ་རྩ་མེད་འགྲོ་ཉེན་ཡོད་པའི་བློ་འཚབ་ཆེས་ཆེར་བཏོན་གནང་འདུག གནས་ཚུལ་ནང་ད་དུང་དེ་སྔ་ཕྱི་ལོ་ ༢༠༠༨ ལོར་ལོ་ན་བརྒྱད་སོན་པའི་ཆོས་རྒྱལ་ལགས་ཀྱིས་བོད་ནས་བྲོས་བྱོལ་དུ་ཕེབས་ཐབས་གནང་ཡོད་ཀྱང་། གཞིས་ཀ་རྩེ་ས་ཁུལ་དུ་རྒྱ་གཞུང་གིས་ཁོང་འཛིན་བཟུང་བྱས་རྗེས་ཟླ་བ་གཅིག་ཙམ་བཀག་ཉར་བྱས་ཏེ་འདྲི་རྩད་བྱས་པ་དང་། དེ་རྗེས་ས་གནས་བཙོན་ཁང་དུ་བསྐྱལ་ཏེ་ཟླ་བ་དྲུག་ཙམ་རིང་བཅོན་དུ་བཅུག་ཡོད་པ་གསལ་སྟོན་དང་ཆབས་ཅིག དེ་ལྟར་ཡང་སྔ་ལོར་ཁོང་བོད་ནས་བྲོས་བྱོལ་དུ་ཕེབས་ཏེ་༸སྤྱི་ནོར་གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཡང་ཞུས་ཡོད་པ་གསལ་སྟོན་གནང་འདུག གནད་དོན་དེ་དང་འབྲེལ་འདི་ག་རླུང་འཕྲིན་ཁང་གིས་བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས་སུ་ཞལ་པར་བརྒྱུད་བཀའ་འདྲི་ཞུས་ཡོད། གཞི་རྩའི་སྔ་ལོར་རྒྱ་གཞུང་གིས་བོད་ཁམས་དཀར་མཛེས་ས་ཁུལ་གྱི་བྲག་མགོ་རྫོང་དུ་སླར་ཡང་གུ་རུའི་སྐུ་བརྙན་ཞིག་དང་མཆོད་རྟེན་བརྒྱ་ཕྲག་མང་པོ་གཏོར་བཤིག་བཏང་བ་མ་ཟད། ཁུལ་དེའི་ས་གནས་བོད་མི་ཚོར་དམ་དྲག་ཤུགས་ཆེན་བྱེད་བཞིན་པའི་གནས་ཚུལ་ཐོན་ཡོད་པ་དང་། ལྷག་པར་དེའི་སྐོར་གྱི་གནས་ཚུལ་མཁོ་སྤྲོད་གནང་མཁན་བོད་མིར་འཛིན་བཟུང་དང་ཁྲིམས་ཐག་ལྕི་མོ་གཅོད་ཀྱི་ཡོད་པའི་གནས་ཚུལ་ཐོན་ཡོད་པ་རེད། The post བོད་བྲག་མགོ་རྫོང་གི་སྟོན་པའི་སྐུ་བརྙན་བཞུགས་སའི་ས་ཚིགས་དེ་བཞིན་རྟ་རྒྱུག་ཐང་ཆེན་དུ་བཟོས་ཡོད་པ་ཐེར་འདོན། appeared first on vot.

ནིའུ་ཡོག་ཏུ་གནས་སྡོད་བོད་མི་ཚོས་རྒྱལ་ཚོགས་ཀྱི་ལས་ཁུངས་མདུན་དུ་རང་ཉིད་ཀྱི་སྐྲ་བཞར་ཏེ་མགོ་རིལ་བཟོས་པས་བརྒྱུད་རྒྱ་ནག་གཞུང་ལ་ངོ་རྒོལ་དང་རྒྱལ་གཅེས་དཔའ་བོ་བློ་དགའ་རང་བཙན་ལགས་སུ་རྗེས་དྲན་ཞུས་གནང་འདུག དེ་ཡང་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་ཨ་རིའི་ནིའུ་ཡོག་ཏུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་བཏང་ནས་ཁ་སང་བདུན་ཚིགས་བཞི་པ་ཁེལ་བ་དང་བསྟུན། ཨ་རིའི་ནིའུ་ཡོག་དང་ནིའུ་ཇར་སི་ས་གནས་གཞོན་ནུའི་གོ་སྒྲིག་འོག ཁུལ་དེའི་བོད་མི་ཁྱོན་ ༩༠ ཙམ་གྱིས་སྐྲ་བཞར་གྱི་ལས་འགུལ་དེའི་ནང་མཉམ་ཞུགས་གནང་འདུག  དེ་དག་གི་ཁོངས་ནས་བོད་མི་ ༦༨ ཀྱིས་ལུས་ལ་དཔའ་བོ་དེ་ཉིད་ཀྱི་འདྲ་པར་འཁོད་པའི་སྟོད་ཐུང་ནག་པོ་གྱོན་ཏེ་རྒྱལ་ཚོགས་ཀྱི་མདུན་དུ་དངོས་སུ་མགོ་རིལ་བཟོས་ཡོད་པ་དང་། བོད་མི་ ༢༢ ཀྱིས་རང་ཉིད་ཀྱི་ཁྱིམ་ལ་མགོ་རིལ་བཟོས་པའི་རྗེས་རྒྱལ་ཚོགས་ཀྱི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ནང་མཉམ་ཞུགས་གནང་འདུག གནད་དོན་དེ་འབྲེལ་འདི་ག་རླུང་འཕྲིན་ཁང་གིས་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དཀོན་མཆོག་པ་སངས་ལགས་སུ་བཀའ་འདྲི་ཞུས་པར་ཁོང་གིས།  རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་བཏང་ནས་བདུན་ཚིགས་བཞི་པ་ཁེལ་བ་དང་བསྟུན། ནམ་རྒྱུན་ལྟར་ངོ་རྒོལ་སྐད་འབོད་ཙམ་མ་ཡིན་པར་ད་ལན་སྐྲ་བཞར་གྱི་ལས་འགུལ་སྤེལ་རྒྱུའི་འཆར་གཞི་སྒྲིག་པ་བཞིན། ཐོག་མའི་ཆར་ད་བར་བོད་མི་རང་ལུས་མེར་བསྲེགས་བཏང་མཁན་ ༡༧༠ ལྷག་བྱུང་ཡོད་པས་ཁོང་རྣམས་ལ་རྗེས་དྲན་དང་འབྲེལ་མི་གྲངས་ ༡༧༠ ཡིས་སྐྲ་བཞར་གྱི་ལས་འགུལ་ནང་མཉམ་ཞུགས་བྱེད་ཐབས་བྱས་ཀྱང་། ལས་འགུལ་ནང་དངོས་སུ་མཉམ་ཞུགས་གནང་མཁན་མི་གྲངས་ ༩༠ ཙམ་བྱུང་ཡོད་སྐོར་གསུངས་བ་མ་ཟད། ཁོང་རང་ཉིད་ཀྱང་སྐྲ་བཞར་གྱི་ལས་འགུལ་ནང་མཉམ་ཞུགས་བྱས་ཡོད་སྐོར་གསུངས་སོང་། མ་ཟད་སྐྲ་བཞར་གྱི་ལས་འགུལ་དེའི་ནང་བུད་མེད་མཉམ་ཞུགས་གནང་མཁན་གཅིག་བྱུང་བ་ནི་པདྨ་མཁའ་འགྲོ་ལགས་ཡིན་པ་དང་། ཁོང་གིས་ལས་འགུལ་དེའི་སླད་ཐོ་འགོད་དམིགས་བསལ་གནང་མེད་ཀྱང་ས་གནས་སུ་ངོ་རྒོལ་སྐད་འབོད་གནང་སྐབས་ཚོར་བ་ཆེན་པོའི་ཐོག་བློ་དགའ་རང་བཙན་ལགས་དམ་པ་དེ་ཉིད་ཆེད་དུ་སྐྲ་བཞར་རྒྱུའི་བསམ་བློ་འཁོར་བ་ཞིག་ཆགས་ཀྱི་འདུག སྤྱིར་ཁ་སང་ཕྱི་ཚེས་ ༣༠ ཉིན་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ནང་དུ་ Youth for Human Rights International དང་ United for Human Rights ཞེས་པའི་འགྲོ་བ་མིའི་ཐོབ་ཐང་ཚོགས་པ་གཉིས་ཀྱི་གོ་སྒྲིག་འོག 20th International Human Rights Summit ཞེས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༢༠ པ་དེ་དབུ་འཛུགས་གནང་ཡོད་པ་ལྟར། ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དཀོན་མཆོག་པ་སངས་ལགས་གཙོས་པའི་བོད་མི་གསུམ་ནས་ཉིན་གསུམ་རིང་གི་ལྷན་ཚོགས་དེའི་དབུ་འབྱེད་མཛད་སྒོར་མཉམ་ཞུགས་གནང་བ་མ་ཟད། ལྷན་ཚོགས་ཀྱི་ཚོགས་གཙོ་དང་གནད་ཡོད་མི་སྣ་ཁག་གཅིག་དང་མཇལ་འཕྲད་ཀྱིས་དབུས་བོད་ཀྱི་གཞོན་ནུ་ལྷན་ཚོགས་ཀྱི་བོད་དང་འབྲེལ་བའི་ཡིག་ཆ་ཁག་དང་དཔའ་བོ་བློ་དགའ་རང་བཙན་ལགས་ཀྱི་ལོ་རྒྱུས་ངོ་སྤྲོད་སོགས་ཕུལ་ཏེ་བོད་དོན་ཞུ་གཏུགས་གནང་འདུག དེའི་ཁྲོད་ཁ་སང་གཞན་ཡང་ནིའུ་ཡོག་ས་གནས་བོད་ཀྱི་བུད་མེད་ལྷན་ཚོགས་ཀྱིས་ཨ་རིའི་ནིའུ་ཡོག་ཏུ་རྟེན་གཞི་བྱས་པའི་ New York Post གསར་ཁང་གི་མདུན་དུ་ངོ་རྒོལ་གྱི་ལས་འགུལ་སྤེལ་འདུག་པ་དང་། […] The post རྒྱལ་ཚོགས་མདུན་མགོ་རིལ་བཟོས་ཏེ་བློ་དགའ་རང་བཙན་ལགས་སུ་རྗེས་དྲན་ཞུས་འདུག appeared first on vot.

རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་མི་རིགས་རྩ་གཏོར་གྱི་ཁྲིམས་ལག་བསྟར་བྱས་འགོ་བཙུགས་པར་ངོ་རྒོལ་དང་། དཔའ་བོ་བློ་དགའ་རང་བཙན་ལགས་ལ་མྱ་ངན་དང་གདུང་སེམས་མཉམ་སྐྱེད་ཞུ་སླད། བཞུགས་སྒར་རྡ་རམ་ས་ལ་གཙོ་བོར་འགྱུར་བའི་འཛམ་གླིང་ས་ཕྱོགས་གང་སར་གནས་པའི་བོད་མི་རྣམས་ནས་ངོ་རྒོལ་སྐད་འབོད་དང་ཟས་བཅད་ངོ་རྒོལ། དེ་བཞིན་རྐང་འཁོར་དང་སྦག་སྦག་སྐོར་སྐྱོད་སོགས་ཀྱི་ལས་འགུལ་སྣ་མང་སྤེལ་བཞིན་པའི་ཁྲོད། བོད་མི་སྐལ་བཟང་མཐར་ཕྱིན་ལགས་ཀྱིས་ཟླ་བ་འདིའི་ཕྱི་ཚེས་ ༡༥ ནས་འགོ་འཛུགས་ཀྱིས་བཞུགས་སྒར་རྡ་རམ་ས་ལ་ནས་ལ་དྭགས་བར་སྤྱི་ལེ་ ༦༠༠ ལྷག་གི་བོད་དོན་གོམ་བགྲོད་ཀྱི་ལས་འགུལ་སྤེལ་བཞིན་པ་རེད། ཕྱི་ཚེས་ ༡༥ ཉིན་རྡ་རམ་ས་ལ་ནས་འགོ་བཙུགས་ཏེ། ཁ་ཉིན་ཁོང་ཀུ་ལུ་མ་ན་ལི་ཁུལ་དུ་ས་གནས་བོད་མི་མང་ཚོགས་ཀྱིས་ཕེབས་སུ་སྣེ་ལེན་ཞུས་པའི་ཐོག་ཕེབས་འབྱོར་བྱུང་རྗེས། དེ་རིང་ཀི་ལོང་ནས་ Jispa ཕྱོགས་སུ་སྐྱོད་བཞིན་པ་རེད་འདུག འདི་ག་རླུང་འཕྲིན་ཁང་གིས་སྐལ་བཟང་མཐར་ཕྱིན་ལགས་སུ་ཁོང་གི་གོམ་བགྲོད་ལས་འགུལ་འདིའི་སྐོར་བཀའ་འདྲི་ཞུས་ཡོད།  The post རྡ་རམ་ས་ལ་ནས་ལ་དྭགས་བར་བོད་དོན་གོམ་བགྲོད་གནང་མཁན་སྐལ་བཟང་མཐར་ཕྱིན་ལགས་དེ་རིང་ཀི་ལོང་ནས་ Jispa ཕྱོགས་སུ་སྐྱོད་བཞིན་པ། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ཀྱིས་བོད་ཀྱི་རྩ་དོན་སླད་རྒྱལ་ཚོགས་ཀྱི་ལས་འཁུངས་མདུན་དུ་སྐུ་ལུས་མེར་བསྲེགས་ཕུལ་ཏེ་ཟླ་བ་གཅིག་ཧྲིལ་པོ་འཁོར་གྱི་ཡོད་པའི་དུས་ཚིགས་དང་བསྟུན། བོད་མི་གནས་སྡོད་ས་གནས་གང་སར་གཞི་རྒྱ་ཆེ་བའི་རྔམ་སྟོན་ཁྲོིམ་སྐོར་སོགས་ཀྱི་ལས་འགུལ་ཇེ་ཤུགས་ཆེ་རུ་སྤེལ་བཞིན་འདུག དེའང་དེ་རིང་སྔ་དྲོ་ཨོ་རི་ས་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་ས་གནས་བོད་མི་བརྒྱ་ཕྲག་འདུ་འཛོམས་ཀྱིས་ཨོ་ར་ས་གྲོང་ཁྱེར་ Bubaneshwar ནང་རྔམ་སྟོན་ཁྲོམ་སྐོར་གྱི་ལས་འགུལ་བརྒྱུད་དམ་པ་དེ་ཉིད་ལ་རྗེས་དྲན་དང་རྒྱ་གཞུང་གིས་བོད་ཐོག་འཛིན་པའི་དྲག་པོའི་སྲིད་བྱུས་ལ་ངོ་རྒོལ་གྱི་ལས་འགུལ་ཞིག་སྤེལ་འདུག་པ་མ་ཟད། ལས་འགུལ་ཐོག་ཨོ་རི་ས་མངའ་སྡེའི་ BJP གཞུང་འཛིན་ཚོགས་པའི་ཚོགས་གཙོ་སྐུ་ཞབས་ Samir Mohanti གཙོས་པའི་ཕྱི་ནང་སྐུ་མགྲོན་ཁག་གཅིག་ཆེད་ཕེབས་གནང་འདུག  གནད་དོན་དེ་འབྲེལ་འདི་ག་རླུང་འཕྲིན་ཁང་གིས་ཨོ་རི་ས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་དབྱངས་འཛོམས་ལགས་སུ་བཀའ་འདྲི་ཞུས་ཡོད། ཕྱོགས་མཚུངས་དེ་རིང་རྒྱ་གར་བྱང་ཤར་ Assam མངའ་སྡེའི་ Guwahati གྲོང་ཁྱེར་ནང་དུ་ཤིས་ལོང་ས་གནས་ཀྱི་སྣེ་ཁྲིད་དང་བྱང་ཤར་བོད་མིའི་ཛ་དྲག་དྭང་བླངས་ལས་འགུལ་ཚོགས་པའི་གོ་སྒྲིག་འོག་གསར་འགོད་ལྷན་ཚོགས་ཤིག་སྐོང་འཚོགས་གནང་འདུག  སྐབས་དེར་སྤྱི་ཟུར་ཚེ་རིང་སྒྲོལ་མ་ལགས་དང་སྤྱི་ཟུར་དབྱངས་ཅན་སྒྲོལ་དཀར་ལགས་གཉིས་ཀྱི་གཙོ་འགན་བཞེས་ཏེ་གཙོ་བོ་རྒྱ་ནག་གཞུང་གིས་ཟླ་འདིའི་ཚེས་ ༡ ནས་ལག་བསྟར་ཟིན་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོ་རྒོལ་ དང་། ཨ་རི་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་བར་གདུང་སེམས་མཉམ་སྐྱེད། དེ་བཞིན་རྒྱ་ནག་གཞུང་གིས་བོད་ནང་དམ་དྲག་དང་སྡུག་རྩུབ་ཅན་གྱི་སྲིད་བྱུས་འདྲ་མིན་སྤེལ་བཞིན་པ་ལ་ངོ་རྒོལ་དང་ངོས་ལེན་རྩ་བ་ནས་མེད་པའི་བརྡ་ལན་གསལ་འདོན་གནང་བ་མ་ཟད། ད་བར་བོད་ཕྱི་ནང་གཉིས་སུ་རང་ལུས་མེར་བསྲེགས་བཏང་མཁན་རྣམས་དང་རྒྱ་ནག་གཞུང་གིས་བོད་ནང་དམ་དྲག་བྱེད་བཞིན་པའི་གནས་སྟངས་སོགས་ཀྱི་ཐོག་པར་རིས་འགྲེམས་སྟོན་གྱི་ལས་འགུལ་ཞིག་ཀྱང་སྤེལ་གནང་འདུག ཕྱོགས་མཚུངས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནང་མང་ཚོགས་འདུ་འཛོམས་ཀྱིས་བློ་རང་བཙན་ལགས་དམ་པ་དེ་ཉིད་ལ་རྗེས་དྲན་དང་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་འདུག་པ་དང་།  དྷ་རམ་ས་ལར་རྒྱུན་མཐུད་ཟས་བཅད་ལས་འགུལ་མུ་མཐུད་སྤེལ་མུས་ཐོག བཞུགས་སྒར་ཉེ་འདབས་སུ་ཆགས་པའི་ནོར་བུ་གླིང་ཁ་ལྟ་བུའི་ནང་རེས་གཟའ་ལྷག་པར་འཆར་ཅན་རྒྱལ་གཅེས་པ་དམ་པ་དེ་ཉིད་སླད་མཆོད་འབུལ་སྨོན་ལམ་གོ་སྒྲིག་གནང་མུས་ཡིན་པ་རེད། གཞན་ཡང་དེ་རིང་དགོང་མོ་འབྲས་ལྗོངས་ཀྱི་རྒྱལ་ས་སྒང་ཏོག་ནང་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་དཔའ་བོ་བློ་དགའ་རང་བཙན་ལགས་འདས་གྲོངས་སུ་ཕྱི་ནས་བདུན་ཚིགས་ ༤ པ་དང་བསྟུན་གཞི་རྒྱ་ཆེ་བའི་མར་མེ་ཁྲོམ་སྐོར་གྱི་ལས་འགུལ་སྤེལ་གནང་རྒྱུ་དང་།  ཨ་རིའི་ནིའི་ཡོག་ནང་བདུན་ཚིགས་ ༤ པ་དང་བསྟུན་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག མཉམ་སྦྲེལ་རྒྱལ་ཚོགས་མདུན་དུ་བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་རྗེས་དྲན་དང་རྒྱ་ནག་གཞུང་ལ་ངོ་རྒོལ་ཆེད་སྐྲ་བཞར་གྱི་གཞི་རྒྱ་ཆེ་བའི་ལས་འགུལ་ཤིག་གྲ་སྒྲིག་གནང་བཞིན་པ་རེད་འདུག དེ་བཞིན་སྤུ་རུ་ཝ་ལ་དང་། གུ་ཝ་ཧ་ཌི། ལོན་ཌོན། ཊོ་རོན་ཊོ། བྷོ་སི་ཊོན་བཅས་སུའང་བློ་དགའ་རང་བཙན་ལགས་དམ་པ་དེ་ཉིད་ལ་རྗེས་དྲན་དང་རྒྱ་གཞུང་ལ་ངོ་རྒོལ་གྱི་ལས་འགུལ་གཅིག་མཚུངས་སུ་སྤེལ་ཡོད་པ་རེད། The post བློ་དགའ་རང་བཙན་ལགས་དམ་པའི་བདུན་ཚིགས་བཞི་པ་དང་བསྟུན་རྒྱ་གཞུང་ལ་ངོ་རྒོལ་ལས་འགུལ་སྔར་ལྷག་སྤེལ་བཞིན་འདུག appeared first on vot.

དེ་རིང་ཕྱི་ཟླ་ ༧ ཚེས་ ༢༩ སྟེ་ནང་པ་སངས་རྒྱས་པའི་གནས་བརྟན་སྡེ་པའི་ལུགས་ཀྱི་ཆོས་འཁོར་དུས་ཆེན་དང་བསྟུན།  ཡུལ་ཝ་རཱ་ཎ་སིར་རྟེན་གཞི་བྱས་པའི་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་རྒྱ་གར་ Uttar Pradesh ཨུཏྟར་པརཱ་དེ་ཤི་མངའ་སྡེའི་སྤྱི་ཁྱབ་བློན་ཆེན་གཞོན་པ་སྐུ་ཞབས་ Keshav Prasad Maurya མཆོག་དབུ་བཞུགས་ཐོག་ Asadha Purnima- Dhammacakkappavattana Divas འམ་སངས་རྒྱས་ཤཀྱཱ་ཐུབ་པས་ཆོས་ཀྱི་འཁོར་ལོ་སྐོར་བའི་དུས་ཆེན་སྲུང་བརྩི་གཟབ་རྒྱས་ཞུས་འདུག གནས་བརྟན་སྡེ་པའི་ལུགས་ཀྱི་ཆོས་འཁོར་དུས་ཆེན་སྲུང་བརྩི་ཐེངས་ལྔ་པའི་མཛད་སྒོ་དེ་བཞིན་རྒྱ་གར་དབུས་གཞུང་གི་རིག་གཞུང་ལྷན་ཁང་དང་།  རྒྱལ་སྤྱིའི་ནང་པའི་མཐུན་ཚོགས།  ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་བཅས་གསུམ་གྱིས་མཉམ་རུབ་ཐོག་གོ་སྒྲིག་གནང་བ་ཞིག་ཡིན་པ་དང་།  མཛད་སྒོའི་ཐོག་སྐུ་མགྲོན་གཙོ་བོ་ཨུཏྟར་པརཱ་དེ་ཤི་མངའ་སྡེའི་སྤྱི་ཁྱབ་བློན་ཆེན་གཞོན་པ་སྐུ་ཞབས་ Keshav Prasad Maurya མཆོག་དང་།  རྒྱ་གར་དང་ཤྲི་ལང་ཀཱ་རྒྱལ་སྤྱིའི་ནང་པའི་མཐུན་ཚོགས་ཀྱི་ཚོགས་གཙོ་ Dr. K Siri Sumedha Thero ལགས།  རྒྱལ་སྤྱིའི་ནང་པའི་མཐུན་ཚོགས་ཀྱི་སྤྱི་ཁྱབ་འགན་འཛིན་ Shri Raghav Prasad Bhatnagar ལགས་དང་སྤྱི་ཁྱབ་དྲུང་ཆེ་དགེ་བཤེས་བྱང་ཆུབ་ཆོས་ལྡན་ལགས།  ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ངེས་སྟོན་པ་དགེ་བཤེས་དབང་ཕྱུག་རྡོ་རྗེ་ནེ་གི་ལགས།  གཞན་ཡང་ཕྱོགས་མཐའ་ཁག་ནས་ཕེབས་པའི་རྒྱ་གར་གྱི་སྐུ་མགྲོན་ཁག་གཅིག་དང་།  ཝ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཚུད་པའི་དགེ་ལས་སློབ་ཕྲུག་བཅས་ནས་མཉམ་ཞུགས་གནང་འདུག སྤྱིར་ཐེངས་འདིའི་གནས་བརྟན་སྡེ་པའི་ལུགས་ཀྱི་ཆོས་འཁོར་དུས་ཆེན་སྲུང་བརྩིའི་མཛད་སྒོའི་ཐོག་སྐྲུ་མགྲོན་རྣམས་ནས་སངས་རྒྱས་ཤཀྱཱ་ཐུབ་པའི་མཛད་རྣམ་དྲན་གསོ་དང་འབྲེལ།  སྟོན་པས་བསྟན་གནང་མཛད་པའི་བདེན་བཞིའི་རྣམ་གཞག་དང་།  འཕགས་ལམ་ཡན་ལག་བརྒྱད།  མཐའ་གཉིས་བྲལ་བའི་དབུ་མའི་ལམ་སོགས་ཀྱི་གལ་གནད་རང་བཞིན་སྐོར་འགྲེལ་བརྗོད་ཀྱིས།  སངས་རྒྱས་ཀྱིས་ཆོས་འཁོར་སྐོར་སའི་གནས་ཆེན་ཡུལ་ཝཱ་རཱ་ཎ་སཱིའི་ Sarnath འམ་དྲང་སྲོང་ལྷུང་བ་རི་དྭགས་ཀྱི་ནགས་ཚལ་དེ་བཞིན་མཉམ་འབྲེལ་རྒྱལ་ཚོགས་ཀྱི་རང་བྱུང་ཤུལ་བཞག་སྲུང་སྐྱོབ་ཀྱི་མིང་གཞུང་ཁོངས་སུ་བཅུག་པའི་སྐོར་གྱི་གནས་ཚུལ་ལུང་འདྲེན་གནང་སྟེ།  དེ་ནི་འཛམ་གླིང་ཁྲོད་ནང་པ་ས་ཡ་ ༥༠༠ ལྷག་ཡོད་པའི་མང་ཚོགས་ལ་དགའ་སྤོབས་སྐྱེ་འོས་པའི་གཏམ་བཟང་ཞིག་ཡིན་པ་དང་།  ལྷག་པར་དུ་སྐུ་མགྲོན་གཙོ་བོ་ཁོང་གིས་རྒྱ་གར་གཞུང་ངོས་ནས་ནང་པ་སངས་རྒྱས་པའི་བསྟན་པ་དར་སྤེལ་ཐད་འདི་ལྟ་བུའི་ལས་གཞི་གང་ཡིན་རུང་དེར་མཐུན་རྐྱེན་སྦྱོར་རྒྱུའི་ཆོད་སེམས་བརྟན་པོ་ཡོད་ལ།  རྣམ་པ་ཚོའི་ངོས་ནས་ཀྱང་ནང་བསྟན་གོང་འཕེལ་དང་མི་ཉམས་རྒྱུན་འཛིན་ཐད་ཞིབ་འཇུག་སློབ་སྦྱོང་གང་གནང་གི་ཡོད་པ་དེ་དག་ལམ་ལྷོང་མདུན་སྐྱོད་ཡང་བའི་སྨོན་འདུན་ཞུ་ཡི་ཡོད་པ་གསུངས་འདུག  མཛད་སྒོའི་ཁྲོད་གཞན་ཡང་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་ཕྲུག་སེར་སྐྱ་ཕོ་མོ་ཁག་གཅིག་གིས་སྟོན་པ་ཤཀྱཱ་ཐུབ་པའི་མཛད་རྣམ་དང་བདེན་བཞིའི་ཆོས་འཁོར་དང་འབྲེལ་བའི་གཏམ་བརྗོད་འཁྲབ་སྟོན་ཞིག་ཀྱང་གཟིགས་འབུལ་ཞུས་འདུག  […] The post གནས་བརྟན་སྡེ་པའི་ལུགས་ཀྱི་ཆོས་འཁོར་དུས་ཆེན་སྲུང་བརྩི། appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཞོན་ནུ་ཚོར་མྱོ་རྫས་ངན་གོམས་དང་འབྲེལ་བའི་ཡིག་ཐོག་གསུང་འཕྲིན་ཞིག་སྩལ་ཡོད་པ་དང་།  དེ་འབྲེལ་ལ་དྭགས་གཞོན་སྐྱེས་ཁག་གཅིག་གིས་༸གང་ཉིད་མཆོག་གི་བཀའ་སློབ་ལམ་སྟོན་དེ་དག་ཡིག་ཐོག་ཁོ་ནར་ལུས་སུ་མ་བཅུག་པར་ངེས་པར་དུ་རང་སོ་སོའི་མི་ཚེའི་ཁྲོད་ལག་བསྟར་དགོས་པའི་གཞེན་སྐུལ་གནང་འདུག  དེ་ཡང་ཉེ་ཆར་༸གོང་ས་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་སེམས་ངལ་སོགས་ཀྱི་བདེ་སྡུག་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་པར།  དེ་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་ཡོད་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་ཡོད་པ་རེད། འདི་ག་རླུང་འཕྲིན་ཁང་གི་བཅར་འདྲིར་དང་ལེན་ཁྲོད་ལ་དྭགས་གཞོན་སྐྱེས་ཁག་གཅིག་གིས་ཉེ་ལམ་༸གོང་ས་མཆོག་གི་མྱོ་རྫས་ངན་གོམས་སོགས་དང་འབྲེལ་བའི་གསུང་འཕྲིན་དེའི་སྐོར་ཁོང་རྣམས་ཀྱིས།  ༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་འགན་གྲངས་ལས་འདས་པ་ཡོད་ཀྱང་།  ༸གང་ཉིད་མཆོག་གིས་ཐུགས་བརྩེ་བ་ཆེན་པོས་ལ་དྭགས་གཞོན་སྐྱེས་ཚོའི་བདེ་སྡུག་ཆ་ཚང་གསན་བཞེས་ཀྱིས་དུས་མཐུན་འོས་ཤིང་འཚམས་པའི་ཐབས་ལམ་སྟོན་གནང་མཛད་པ་དེར་ཐུགས་རྗེ་ཆེ་ཞུས་ཀྱི་བཀའ་དྲིན་རྗེས་དྲན་ཞུས་པ་མ་ཟད།  གསུང་འཕྲིན་ནང་དམིགས་བསལ་གྱིས་༸གོང་ས་མཚོག་ནས་རང་གཅེས་འཛིན་གྱི་བློ་དོར་ཏེ་གཞན་གཅེས་འཛིན་གྱི་བློ་ཇི་ལྟར་གོང་འཕེལ་གཏོང་དགོས་པ་སོགས་སེམས་ལ་སྦྱོང་བརྡར་སྤྲད་དགོས་གལ་སྐོར་གྱི་བཀའ་སློབ་ལམ་སྟོན་ཕེབས་ཡོད་པ་དེ་དུས་ལ་བབས་པ་ཞིག་རེད་འདུག་ཅེས་གསུངས་འདུག  མ་ཟད་བདེ་བ་ངོ་མ་དེ་སེམས་ཀྱི་ཞི་བདེ་དང་གཞན་ཕན་གྱི་བསམ་བློ་ནས་ཡོང་གི་ཡོད་སྐོར་བཀའ་སློབ་ལམ་སྟོན་སྩལ་བ་དེ་ལ་དྭགས་མི་མང་ལ་ཧ་ཅང་གི་གལ་ཆེན་པོ་ཆགས་ཀྱི་ཡོད་པ།  ལྷག་པར་དུ་༸གོང་ས་མཆོག་གིས་བཀའ་སློབ་ལམ་སྟོན་ལྟར་སྡུག་བསྔལ་ཅི་འདྲ་ཞིག་ཡིན་རུང་མཐར་ཐུག་ན་ནང་སེམས་ལ་རག་ལས་ཀྱི་ཡོད་པ་དང་།  ལ་དྭགས་གཞོན་སྐྱེས་ཚོའི་ངོས་ནས་ཀྱང་གཞི་རྩའི་ལྟ་གྲུབ་ཤེས་ཀྱི་ཡོད་ཀྱང་གཙོ་བོ་ལག་ལེན་ལ་ཐུག་ཡོད་པ་དང་།  སྤྱིར་དེང་དུས་སྤྱི་ཚོགས་དྲྭ་རྒྱ་སོགས་ཀྱི་རྣམ་གཡེང་གི་གནས་སྟངས་འོག་བཀའ་སློབ་དེ་དག་ལག་བསྟར་གནང་རྒྱུ་ཁག་པོ་ཏན་ཏན་ཡོད་རེད་དེ།  གོམ་པ་རེ་རེ་བྱས་ཏེ་སྤོ་ནས་རིམ་པས་གང་ཟག་བྱམས་བརྩེ་ལྡན་པ་དྲང་པོ་ཞིག་ཏུ་འགྱུར་རྒྱུར་འབད་བརྩོན་བྱས་ན།  དེ་ནི་༸གང་ཉིད་མཆོག་ལ་ལེགས་སྐྱེས་ཡག་ཤོས་ཤིག་རེད་ལ།   མ་འོངས་ལ་དྭགས་དེ་བཞིན་བདེ་སྐྱིད་བདེ་ཐང་ལྡན་པ་ཞིག་ཏུ་འགྱུར་རྒྱུར་རེ་བ་འཆང་གི་ཡོད་པ་གསུངས་འདུག  དེ་བཞིན་ཉེ་ལམ་༸གོང་ས་མཆོག་གིས་གསུང་འཕྲིན་ནང་དམིགས་བསལ་གྱིས་ལ་དྭགས་གཞོན་ནུ་ཚོས་མྱོ་རྫས་ལོངས་སུ་སྤྱོད་རྒྱུ་འཛེམ་དགོས་པའི་སྐོར་བཀའ་མངགས་སྩལ་བའི་སྐོར་དང་འབྲེལ།  མྱོ་རྫས་བེད་སྤྱོད་བྱས་ན།  རང་སོ་སོའི་འཕྲོད་བསྟེན་ལ་གནོད་པ་ཙམ་མིན་པར།  ནང་མི་སྤུན་མཆེད་ཡོངས་རྫོགས་གཏོར་བཤིག་གཏོང་གི་ཡོད་པ་དང་།  ༸གོང་ས་༸སྐྱབས་མགོན་ཆེན་པོ་མཆོག་གིས་དེ་འབྲེལ་གསུང་འཕྲིན་སྩལ་བ་དེ་ནི་བཀའ་སློབ་ལམ་སྟོན་ཙམ་མིན་པར།  དེ་དག་ང་ཚོས་ཇི་ལྟར་ལག་བསྟར་དགོས་པའི་སྐུལ་མ་ཞིག་ཀྱང་ཡིན་ལ།  ༸གང་ཉིད་མཆོག་གིས་བཀའ་སྩལ་ལྟར།  མྱོ་རྫས་ལོངས་སུ་སྤྱོད་མཁན་ཚོར་མཐོང་ཆུང་གི་ལྟ་སྟངས་ཤིག་འཁྱེར་རྒྱུ་མེད་པ་དང་།  ཁོང་རྣམས་ལ་བྱམས་དང་བརྩེ་བས་སྒོ་ནས་དེ་ལས་ཐར་བར་བྱེད་པར་རོགས་རམ་བྱེད་དགོས་པ་མ་ཟད།  གང་ཟག་སུ་འདྲ་ཞིག་ཡིན་རུང་ཚང་མ་ལ་ཡར་རྒྱས་གཏོང་རྒྱུའི་ཐོབ་ཐང་ཡོད་པ་སོགས་ཀྱི་དྲན་སྐུལ་གྱིས།  ང་ཚོ་ཚང་མས་རང་སོ་སོའི་སེམས་དྭངས་མ་དེའེི་ཐོག་ནས་སྔར་ལས་ལྷག་པའི་མི་བཟང་པོ་ཞིག་ཏུ་འགྱུར་ཐུབ་པར་འབད་བརྩོན་གནང་དགོས་པ་གསུངས་འདུག  སྤྱིར་ཐེངས་འདའི་བཅར་འདྲི་ཁྲོད་ལ་དྭགས་གཞོན་ནུ་གཅིག་གིས་ཉེ་ལམ་༸གོང་ས་མཆོག་གི་གསུང་འཕྲིན་དེ་ཉིད་ལ་དྭགས་གཞོན་ནུ་ཁོ་ནར་དམིགས་པ་ཞིག་མ་ཡིན་པར་དེ་ནི་འཛམ་གླིང་ཀུན་ལ་ཁྱབ་པ་ཞིག་ཡིན་སྐོར་གསུངས་ཡོད་སྟབས།  འདི་ག་རླུང་འཕྲིན་ཁང་ལ་ཁུལ་དེར་གནས་སྡོད་བོད་མི་གཅིག་གིས།  ཐེངས་འདིའི་༸གོང་ས་མཆོག་གི་གསུང་འཕྲིན་དེའི་ནང་གཙོ་བོ་ལ་དྭགས་གཞོན་ནུ་ཁྲོད་སེམས་ངལ་དང་མྱོ་རྫས་ལངས་ཤོར་སྐོར་བཀའ་སློབ་ལམ་སྟོན་སྩལ་ཡོད་པར།  ༸གང་ཉིད་མཆོག་གིས་བཀའ་མངགས་ལྟར་དེ་དག་གི་རྒྱུ་རྐྱེན་ཕལ་ཆེ་བ་བཟང་སྤྱོད་དང་གཞན་ཕན་གྱི་སེམས་མ་འདང་བའི་རྒྱུ་མཚན་གྱིས་ཡོང་གི་ཡོད་དུས།  ང་ཚོའི་མི་རབས་རྒན་པ་ཚོའི་ངོས་ནས་ཐུགས་འགན་བཞེས་ཏེ་གཞོན་སྐྱེས་ཁྲོད་རིན་ཐང་དེ་དག་གོང་འཕེལ་ཐད་ཤུགས་སྣོན་རྒྱག་དགོས་གལ་ཡིན་པ་གསུང་གི་འདུག  གཞི་རྩའི་༸གོང་ས་མཆོག་གིས་ཉེ་ལམ་ནས་ལ་དྭགས་གཞོན་སྐྱེས་ཚོར་མང་མཇལ་སྩལ་གནང་མཛད་ཀྱི་ཡོད་པ་ལྟར།  ཁ་ཉིན་ཕྱི་ཚེས་ ༢༥ ཉིན་མཇལ་བཅར་ཞུས་མཁན་ཁོངས་སུ་ལ་དྭགས་ནང་གི་གཞོན་སྐྱེས་གཞས་པ་གྲགས་ཅན་གྲས་དང་མྱོ་རྫས་ངན་གོམས་སྤངས་ཟིན་པའི་གཞོན་ནུ་ཁག་གཅིག་གིས་༸གང་ཉིད་མཆོག་ལ་མྱོ་རྫས་ལོངས་སུ་སྤྱོད་རྒྱུ་མཚམས་འཇོག་བྱེད་ཡིན་སྐོར་སྙན་སེང་ཞུས་པར་༸གོང་ས་མཆོག་གིས་ཀྱང་ཐུགས་རྗེ་ཆེ་ཞེས་བཀའ་སྩལ་ཡོད་པ་དང་།  གཞོན་ནུ་དེ་དག་ཁོངས་ནས་གཅིག་གིས་འདི་ག་རླུང་འཕྲིན་ཁང་གིས་བཅར་འདྲིར་དང་ལེན་ཁྲོད།  ཁོང་མྱོ་རྫས་ལ་ཧ་ཅང་ལངས་ཤོར་ཕྱིན་ཏེ་སྤང་ཐུབ་ཡག་མེད་མཁན་གྱི་གང་ཟག་ཅིག་ཏུ་གྱུར་ཡོད་ནའང་།  རིམ་པས་ནང་མིའི་སེམས་འཚབ་དང་སོ་སོའི་འཕྲོད་བསྟེན་ལ་གཞིགས་ཏེ།  ད་ཡིན་ན་སྤང་དགོས་འདུག་བསམ་བྱུང་ཅེས།  དུས་དེ་ནས་བཟུང་ནང་མིར་དམ་བཅའ་བཞག་སྟེ་དགོན་པར་མཆོད་མཇལ་གྱིས་རིམ་པས་དུག་རྫས་ལོངས་སུ་སྤྱོད་རྒྱུ་མཚམས་འཇོག་བྱས་ཡིན་ཅེས་དང་།   ཁག་གཅིག་གིས་མྱོ་རྫས་ངན་གོམས་ཤོར་ཚར་ན་དུས་ནམ་ཡང་སྤང་ཐུབ་ཀྱི་མ་རེད་ཅེས་བཤད་མཁན་ཡོད་ཀྱང་།  དེ་ནི་ནོར་འཁྲུལ་ཆེན་པོ་ཞིག་ཡིན་པ་དང་།  འཇིག་རྟེན་འདིའི་ནང་ཅི་ཞིག་བྱ་དགོས་བསམ་ན་བྱེད་ཐུབ་ཡག་མེད་པ་གཅིག་ཀྱང་མི་འདུག་ཅེས།  ད་ལྟ་ཁོང་མྱོ་རྫས་ལོངས་སུ་སྤྱོད་རྒྱུ་མཚམས་འཇོག་བྱས་ཟིན་དུས།  ནང་མི་ལྷན་དུའང་སྙིང་ཉེ་བོར་གྱུར་ཡོད་པ་དང་།  སྤྱི་ཚོགས་ཁྲོད་མང་ཚོགས་ཀྱིས་ཀྱང་རྒྱབ་བཤད་མེད་པར་ལྟ་སྟངས་ཡག་ཏུ་ཕྱིན་པ་གཙོས་པའི་བསྟོད་ར་གཏོང་གི་ཡོད་དུས་སེམས་པའང་སྐྱིད་པོ་འདུག་ཅེས་གསུང་གི་འདུག་ལ།  […] The post ལ་དྭགས་གཞོན་སྐྱེས་ཚོས་༸གོང་ས་མཆོག་གི་མྱོ་རྫས་ངན་གོམས་དང་འབྲེལ་བའི་གསུང་འཕྲིན་ལག་བསྟར་དགོས་པའི་གཞེན་སྐུལ། appeared first on vot.

རིང་མིན་བལ་ཡུལ་དུ་འཚོག་གཏན་ཁེལ་བའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་ཐེངས་བཅུ་བདུན་པའི་ཐོག་རྒྱ་ནག་གི་གནོན་ཤུགས་འོག་བོད་མིའི་སྒྲིག་འཛུགས་ཀྱི་སྐུ་ཚབ་ཉམས་ཞིབ་པ་བཅར་རྒྱུ་ཕྱིན་འཐེན་བྱས་པའི་གནས་ཚུལ་ཐོན་ཡོད་ནའང་། བོད་མིའི་སྒྲིག་འཛུགས་ཀྱི་ཉམས་ཞིབ་པ་རྣམ་པ་སྔར་སྲོལ་བཞིན་ཞིབ་འཇུག་ཚོགས་འདུར་བཅར་གཏན་ཁེལ་ཡོད་པའི་སྐོར་བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་ཡོད་ཉམས་ཞིབ་པ་ཞིག་གིས་གསལ་བཤད་གནང་སོང་། དེ་ཡང་འདི་ལོའི་ཟླ་བ་བརྒྱད་པའི་ནང་བལ་ཡུལ་གྱི་རྒྱལ་ས་ཀ་ཐ་མན་གྲུར་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་ཐེངས་བཅུ་བདུན་པ་འཚོག་གཏན་ཁེལ་བར། བལ་ཡུལ་གནས་འཁོད་རྒྱ་ནག་གི་གཞུང་ཚབ་ཀྱིས་ཞིབ་འཇུག་ཚོགས་འདུའི་ཐོག་རྒྱ་ནག་ལ་སྐྱོན་བརྗོད་དང་། བོད་དོན་ཆབ་སྲིད་གླེང་སྲིད་པའི་བློ་འཚབ་བསྟན་ནས། བལ་ཡུལ་གཞུང་ནས་ཚོགས་འདུའི་བརྗོད་བྱར་བྱ་ར་སྟངས་འཛིན་དགོས་པའི་འབོད་སྐུལ་བྱས་པའི་རྗེས། བལ་ཡུལ་དང་རྒྱ་གར་གྱི་གསར་ཁང་ཁག་ཅིག་གི་ཐོག་རྒྱལ་སྤྱིའི་བོད་རིག་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་ཉམས་ཞིབ་པ་གཞུང་འབྲེལ་ངོ་བོའི་ཐོག་ནས་གཏང་རྒྱུ་མིན་པའི་ཐག་གཅོད་བྱས་ཡོད་ལུགས་ཀྱི་གནས་ཚུལ་ཐོན་ཡོད། འོན་ཀྱང་། བོད་ཀྱི་སྲིད་བྱུས་ཉམས་ཞིབ་ཁང་གིས་དེ་ལྟ་བུའི་ཐག་གཅོད་ཅིག་བྱས་མེད་པ་དང་། གཞུང་འབྲེལ་ཉམས་ཞིབ་པ་རྣམས་སྔར་སྲོལ་བཞིན་དུ་ཚོགས་འདུར་བཅར་གཏན་ཁེལ་ཡོད་པ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཞིག་གིས་འདི་ག་གསར་ཁང་ལ་འགྲེལ་བརྗོད་གནང་བྱུང་། བལ་ཡུལ་གྱི་གསར་ཁང་ Nepalkhabar གྱིས་གནས་ཚུལ་སྤེལ་བ་ལྟར་ན། བལ་ཡུལ་ཐོག་རྒྱ་ནག་གི་གནོན་ཤུགས་དང་། ཚོགས་འདུར་བར་ཆད་མི་ཡོང་བའི་ཆེད་དུ་བལ་ཡུལ་དུ་འཚོག་འཆར་ཡོད་པའི་རྒྱལ་སྤྱིའི་བོད་རིག་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་ཉམས་ཞིབ་པ་གཞུང་འབྲེལ་ངོ་བོའི་ཐོག་ནས་གཏང་རྒྱུ་མིན་པའི་ཐག་གཅོད་བྱས་ཡོད་པ་དང་། དེ་སྔོན་དེབ་སྐྱེལ་བྱས་ཟིན་པའི་ཉམས་ཞིབ་པ་རྣམས་སྒེར་གྱི་ངོ་བོའི་ཐོག་ནས་ཚོགས་འདུར་བཅར་འཐུས་ཚུལ་སྐོར་གནས་ཚུལ་སྤེལ་འདུག བོད་མིའི་སྒྲིག་འཛུགས་ནས་བོད་རིག་པའི་ཚོགས་འདུའི་ནང་གཞུང་འབྲེལ་ཉམས་ཞིབ་པ་གཏང་རྒྱུ་མ་ཟད། བོད་མིའི་སྒྲིག་འཛུགས་བོད་ཀྱི་སྲིད་བྱུས་ཉམས་ཞིབ་ཁང་ནས་ཚོགས་འདུར་བོད་རིགས་ཉམས་ཞིབ་པ་གཞན་གང་མང་བཅར་ཐུབ་ཐབས་སུ་དམིགས་ཏེ། བོད་རིགས་ཚོགས་བཅར་བ་མི་གྲངས་ ༢༥ ལ་ལམ་གྲོན་དང་ཁང་གླའི་ཆེད་ཧིན་སྒོར་ ༥༠,༠༠༠ རེ་གནང་རྒྱུུའི་གསལ་བསྒྲགས་དེ་སྔོན་ནས་སྤེལ་ཟིན་ཡོད།   རྒྱ་ནག་གཞུང་ནས་བལ་ཡུལ་དུ་ཚོགས་གཏན་ཁེལ་བའི་བོད་རིག་པའི་ཚོགས་འདུའི་ཐོག་རྒྱ་ནག་གཞུང་གི་བཤད་ཚུལ་དང་མི་མཐུན་པའི་ལོ་རྒྱུས་དང་། སྤྱི་ཚོགས་ཆབ་སྲིད་ཀྱི་གནད་དོན་གླེང་སློང་བྱ་རྒྱུར་བཀག་སྡོམ་བྱ་རྒྱུའི་ཆེད། ཚོགས་འདུ་དེར་བློ་འཚབ་ཡོད་སྐོར་གྱི་ཉེན་བརྡ་སྔོན་ཚུད་ནས་བཏང་བ་ཞིག་ཡིན་པ་དང་། ལྷག་པར་དུ་༸གོང་ས་སྐུ་ཕྲེང་བཅུ་བཞི་པའི་ཡང་སྲིད་གནད་དོན་དེ་རྒྱལ་སྤྱིའི་སྟེང་གླེང་གཞི་གལ་གནད་ཆེན་པོ་ཞིག་ཏུ་གྱུར་ཡོད་སྟབས། རྒྱ་ནག་གཞུང་གིས་བལ་ཡུལ་གྱི་ཚོགས་འདུའི་ནང་དུའང་སྐུའི་ཡང་སྲིད་དང་འབྲེལ་བའི་གནད་དོན་གླེང་སྲིད་པའི་འཇིགས་སྣང་བྱེད་ཀྱི་ཡོད་པ་གནད་དོན་དབྱེ་ཞིབ་པས་འགྲེལ་བརྗོད་གནང་གི་འདུག རྒྱ་གཞུང་གིས་རྒྱལ་སྤྱིའི་ཐོག་བོད་རིག་པའི་ཞིབ་འཇུག་ཚོགས་འདུའི་གལ་གནད་ཆེ་མཐོང་དང་། ཚོགས་བཅར་བའི་གྲངས་འབོར་མང་དུ་འགྲོ་བཞིན་པར་མཐོང་ནས། དེ་ལ་གདོང་ལེན་བྱ་རྒྱུར་ཕྱི་ལོ་ ༡༩༨༦ ཟླ་བ་ ༥ ཚེས་ ༢༠ ཉིན་ཀྲུང་གོ་བོད་རིག་པ་ཞིབ་འཇུག་ལྟེ་གནས་ཞེས་པ་ཞིག་པེ་ཅིང་དུ་གསར་འཛུགས་བྱས་ཏེ། ད་བར་རྒྱལ་སྤྱི་རྒྱལ་ནང་དུ་རྒྱ་ནག་གཞུང་གི་བཤད་ཚུལ་དང་མཐུན་པའི་བོད་ཀྱི་ལོ་རྒྱུས་རིག་གནས་ཁྱབ་སྤེལ་དྲིལ་བསྒྲགས་བྱ་རྒྱུར། ཚོགས་འདུ་ཆེ་ཆུང་རིམ་པ་མི་འདྲ་བ་མང་དག་བསྐོང་ཚོགས་བྱས་ཡོད། ཉེ་སྔོན་ཕྱི་ལོ་ ༢༠༢༣ ཟླ་བ་ ༨ ནང་པེ་ཅིན་རྒྱལ་སྤྱིའི་བོད་རིག་པའི་དཔྱད་གླེང་གྲོས་ཚོགས་སྐབས་བདུན་པ་ཞེས་པ་བསྐོང་ཚོགས་བྱས་ཡོད་པ་དང་། སྐབས་དེར་ཚོགས་བཅར་བ་རྣམས་ཀྱིས་དབྱིན་སྐད་ཐོག་བོད་ཀྱི་སྐད་དོད་དུ། Tibet  མ་ཡིན་པར་ Xizang ཞེས་འབོད་འགོ་བཙུགས་དགོས་པའི་གྲོས་འགོ་བཏོན་ཡོད་པ་དང་། གྲོས་འགོ་དེ་གཞིར་བཟུང་ཕྱིས་སུ་རྒྱ་ནག་གཞུང་གིས་གཞུང་འབྲེལ་ཡིག་ཆ་ཁག་དང་གསར་ཁང་སོགས་སུ་ཨིན་སྐད་ཐོག་བོད་ཀྱི་སྐད་དོད་དུ་ Xizang ཞེས་འབྲི་འགོ་བཙུགས་པ་དང་སྦྲགས། མིང་བརྡ་དེ་ཉིད་བོད་རང་ལྗོངས་ཟེར་བ་ཁོ་ན་ལས་མདོ་སྟོད་སྨད་གཉིས་ལ་འཇུག་གི་མེད་ལུགས་ཀྱི་མིང་བརྡའི་ཆབ་སྲིད་བརྩེ་འགོ་བཙུགས། རྒྱ་ནག་གཞུང་གིས་ཁ་གཏད་དུ་ངོས་འཛིན་བྱེད་པའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུ་ཐེངས་བཅུ་བདུན་པ་རྒྱ་ནག་གི་ཉེ་འགྲམ་བལ་ཡུལ་ནང་འཚོག་གཏན་འཁེལ་བར། […] The post རྒྱ་ནག་གི་གནོན་ཤུགས་ལ་མ་ལྟོས་པར་བོད་མིའི་སྒྲིག་འཛུགས་ཀྱི་ཉམས་ཞིབ་པ་བོད་རིག་པའི་ཚོགས་འདུར་མཉམ་ཞུགས་བྱ་རྒྱུ། appeared first on vot.

བོད་ཀྱི་གནད་དོན་དང་དཔའ་བོ་བློ་དགའ་རང་བཙན་ལགས་ཀྱིས་བློས་བཏང་ལ་མྱ་ངན་གུས་འདུད་ཆེད་རྒྱ་གར་དང་། ཡུ་རོབ། ཨ་རི་སོགས་རྒྱལ་ཁབ་ཕྱི་ནང་གཉིས་ཀའི་ནང་རྐང་འཁོར་སྐོར་སྐྱོད་དང་། སྦག་སྦག་སྐོར་སྐྱོད། ཟས་བཅད་ངོ་རྒོལ་སོགས་ཀྱི་ལས་འགུལ་འདྲ་མིན་སྤེལ་བཞིན་པ་རེད་འདུག དེ་ཡང་ཉེ་ལམ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཆེད་དུ་རང་ལུས་མེར་བསྲེགས་བཏང་བའི་ཡིད་སྐྱོའི་གནས་ཚུལ་བྱུང་བ་ནས་བཟུང་། རྒྱལ་སྤྱིའི་ཁྱོན་ཡོངས་སུ་དམ་པ་ཁོང་གིས་བློས་བཏང་དང་རྒྱ་ནག་གིས་བོད་ནང་སྤེལ་བཞིན་པའི་སྲིད་བྱུས་ལ་ངོས་ལེན་མེད་པའི་ལས་འགུལ་རིམ་པ་སྤེལ་བཞིན་པའི་ཁྲོད། ཁ་སང་མེའོ་ཆོས་འཕེལ་གླིང་གཞིས་ཆགས་སུ་གནས་སྡོད་བོད་མི་བཟའ་ཚང་བསྟན་འཛིན་དབང་འདུས་ལགས་དང་།  ཟླ་བ་ལགས་གཉིས་ཀྱིས་ཁུལ་དེ་ནས་འགོ་འཛུགས་ཀྱིས་རྒྱལ་ས་ལྡི་ལི་བར་དུ། སྦག་སྦག་སྐོར་སྐྱོད་ཀྱི་ལས་འགུལ་དབུ་འཛུགས་གནང་འདུག ཕྱོགས་མཚུངས་ཡོ་རོབ་ཀྱི་རྒྱལ་ཁབ་ Austria ནང་གི་ Linz གྲོང་ཁྱེར་ནང་བོད་མི་ཉི་མ་ཚེ་རིང་ལགས་ཀྱིས། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་དུ་དམ་པ་དེ་ཉིད་དགོངས་པ་རྫོགས་རྗེས་ཀྱི་ཞག་ ༤༩ མ་ཟིན་བར་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བཞིན་པ་དང་འབྲེལ། མང་ཚོགས་ཚང་མས་དམ་པ་ཁོང་གི་ཞལ་ཆེམས་ལག་བསྟར་གནང་དགོས་གལ་ཡིན་པའི་བརྡ་ལན་གནང་འདུག རྩ་བའི་བཞུགས་སྒར་དུ་ཟླ་འདིའི་ཕྱི་ཚེས་ ༡༩ རེས་གཟའ་ཉི་མའི་ཉིན་བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་ཆེ་བསྟོད་དང་། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བར་ངོ་རྒོལ་དང་འབྲེལ། བློ་དགའ་རང་བཙན་ལགས་དམ་པ་དེ་ཉིད་ཀྱི་མངོན་འདོད་རྒྱུན་མཐུད་སླད་ཟས་བཅད་ངོ་རྒོལ་གྱི་ལས་འགུལ་སྤེལ་མུས་ཡིན་པ་དང་། དེའང་འཛམ་གླིང་ཡོངས་སུ་ཆགས་པའི་གཞོན་ནུའི་ས་གནས་ཁག་དང་། བོད་དོན་རྒྱབ་སྐྱོར་བ་རྣམས་ཀྱི་བརྒྱུད་འཛམ་གླིང་ཡོངས་སུ་སྤེལ་རྒྱུའི་རྒྱུན་མཐུད་ཀྱི་ལས་འགུལ་ཞིག་ཡིན་སྐོར་གསུངས་ཡོད་པ་རེད། དེ་བཞིན་ཁ་སང་ཨ་རིའི་ནིའུ་ཡོག་ནང་དུའང་སྟོད་གོས་ནག་པོ་གྱོན་ནས་ཁུལ་དེའི་རྒྱ་ནག་གཞུང་ཚབ་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག་པ་མ་ཟད། རྒྱལ་གཅེས་པ་དམ་པ་ཁོང་སྐུ་འདས་གྲོངས་སུ་ཕྱིན་ནས་བདུན་ཚིགས་གསུམ་པ་དང་བསྟུན། བོད་མིའི་འདུ་སྡོད་ས་གནས་གང་སར་མཆོད་འབུལ་སྨོན་ལམ་དང་། ཞི་བའི་ངོ་རྒོལ་སོགས་གནང་བཞིན་ཡོད་པ་རེད།  མ་ཟད་བོད་ཀྱི་གནད་དོན་དང་འབྲེལ་རྒྱ་གར་གྱི་ Youtube བརྙན་ཐུང་བཟོས་མཁན་ SANJEET WITH TTI STUDY ཞུ་བ་ཞིག་གིས། ཟླ་བ་འདིའི་ཕྱི་ཚེས་ ༢༦ ཉིན་གྱི་ཕྱི་དྲོ་ཕྱག་ཚོད་ ༧ པ་ནས་འགོ་འཛུགས་ཀྱིས་ X སྤྱི་ཚོགས་དྲྭ་ལམ་སྟེང་ #StandWithTibet དང་ #FreeTibet ཞེས་ (Hashtag) ཚིག་བེད་སྤྱོད་ཀྱིས་བོད་དོན་དྲིལ་བསྒྲགས་ཀྱི་གཞི་རྒྱ་ཆེ་བའི་ལས་འགུལ་ཞིག་སྤེལ་འཆར་ཡོད་པ་དེར་མང་ཚོགས་ནས་མཉམ་ཞུགས་དགོས་པའི་སྐུལ་མ་གནང་འདུག The post བོད་དོན་དང་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་མྱ་ངན་གུས་འདུད་སླད་རྒྱ་གར་དང་ཕྱི་རྒྱལ་གཉིས་ཀའི་ནང་ལས་འགུལ་འདྲ་མིན་སྤེལ་བཞིན་པ། appeared first on vot.

ཨོ་ཌི་ཤ་མངའ་སྡེ་དེ་ཉིད་འཛམ་གླིང་ནང་གི་ནང་པའི་གནས་དང་འབྲེལ་བའི་ཡུལ་སྐོར་སྤྲོ་འཆམ་པའི་ས་ཚིགས་འབུར་ཐོན་བཟོ་ཐབས་ལ་དམིགས་ནས་ལས་གཞི་སྣ་མང་སྤེལ་དང་སྤེལ་བཞིན་པའི་ཁྲོད་འདིར། ཉེ་ལམ་མངའ་སྡེའི་ཡུལ་སྐོར་སྤྲོ་འཆམ་པའི་ལས་ཁུངས་དང་ཁུལ་དེར་རྟེན་གཞི་བྱས་པའི་རི་དགོན་ཐུབ་བསྟན་སྨིན་གྲོལ་གླིང་དགོན་པའི་བར་ནང་པའི་ཤུལ་བཞག་དང་གཅེས་ནོར་སྲུང་སྐྱོབ་ཚུད་པའི་ཡུལ་སྐོར་སྤྲོ་འཆམ་འཕེལ་རྒྱས་ཡོང་ཐབས་སུ་གཉིས་མོས་གན་ཡིག་ཐོག་མཚན་རྟགས་བསྐྱོན་འདུག དེ་ཡང་ཟླ་བ་འདིའི་ཚེས་ ༡༥ ཉིན་ཨོ་ཌི་ཤའི་ Lok Seva Bhawan དུ་གན་ཡིག་བཞག་རྒྱུའི་མཛད་སྒོ་དེའི་ཐོག་མངའ་སྡེ་སྤྱི་ཁྱབ་བློན་ཆེན་གཞོན་པ་དང་ཡུལ་སྐོར་སྤྲོ་འཆམ་པའི་ལས་ཁུངས་ཀྱི་གཙོ་འཛིན་གཅིག་ལྕོགས་ Parvati Parida པཱར་ཝ་ཏི་པཱ་རི་ཌ་མཆོག་དང་། ཁུལ་དེའི་གཱ་ཇཱ་པ་ཏི་རྫོང་ནང་རྟེན་གཞི་བྱས་པའི་ Padmasambhava Mahavihara རམ་རི་དགོན་ཐུབ་བསྟན་སྨིན་གྲོལ་གླིང་དགོན་པའི་དབུ་འཛིན་༸སྐྱབས་རྗེ་དགེ་སྤྲུལ་འཇིགས་མེད་རིན་པོ་ཆེ་མཆོག དེ་བཞིན་མངའ་སྡེའི་སྐད་ཡིག་དང་རྩོམ་རིག རིག་གཞུང་། རྩེད་རིགས། གཞོན་སྐྱེས་ཞབས་ཞུ། མཐོ་རིམ་སློབ་གྲྭ་བཅས་ཀྱི་བློན་ཆེན་ Suryabanshi Suraj སུརྱ་ཝན་ཤི་སུ་རཇ་མཆོག མངའ་སྡེའི་སྤྱི་ཁྱབ་དྲུང་ཆེ་ Anu Garg ཨ་ནུ་གརྒ་ལགས་བཅས་དབུ་བཞུགས་ཀྱི་ཐོག་ནས་མཉམ་འབྲེལ་གན་ཡིག་ཐོག་མཚན་རྟགས་བསྐྱོན་འདུག ལས་གཞི་དེ་ནི་མངའ་སྡེ་གཞུང་གིས་ཁུལ་དེའི་ Jajpur ཇཱཇ་པུར་རྫོང་ནང་ཡོད་པའི་ནང་པའི་གནས་རཏྣ་གི་རི་ Ratnagiri དང་ཨུ་དྷེ་གི་རི་ Udayagiri ལ་ལིཏ་གི་རི་ Lalitgiri བཅས་དང་། བོད་མིའི་གནས་སྡོད་ཕུན་ཚོགས་གླིང་གཞིས་ཆགས་དང་དགོན་སྡེ་ཁག་བཅས་སུ་ཡུལ་སྐོར་སྤྲོ་འཆམ་མྱུར་ཚད་མཐོ་བོའི་ཐོག་ནས་འཕེལ་རྒྱས་འགྲོ་རྒྱུ་ཙམ་མ་ཟད། ནང་པའི་ཤུལ་བཞག་སྲུང་སྐྱོབ་བཅས་ལ་དམིགས་པ་ཞིག་ཆགས་ཀྱི་འདུག མཛད་སྒོའི་ཐོག་མངའ་སྡེའི་སྤྱི་ཁྱབ་བློན་ཆེན་གཞོན་པས་ནང་པའི་ཤུལ་བཞག་གི་རིག་གནས་དེ་དག་མངའ་སྡེའི་རིག་གཞུང་དང་འབྲེལ་བའི་གཅེས་ནོར་གལ་ཆེན་ཞིག་ཡིན་པ་དང་། དེར་ཡུལ་སྐོར་སྤྲོ་འཆམ་རྒྱ་སྐྱེད་ཀྱི་ནུས་པ་ཆེན་པོ་ཡོད་ཅེས་བརྗོད་འདུག དེ་བཞིན་མཉམ་འབྲེལ་གྱི་གན་ཡིག་དེའི་བརྒྱུད་ནས་འཛམ་གླིང་ཡུལ་གྲུ་གང་ནས་ཕེབས་མཁན་རྣམས་ལ་ཆོས་ཕྱོགས་ཀྱི་མྱོང་བ་ཚད་ལྡན་བསྐྲུན་ཐབས་དང་ཆབས་ཅིག མངའ་སྡེ་གཞུང་གི་ངོས་ནས་ནང་པའི་རིག་གནས་དེ་དག་སྲུང་སྐྱོབ་ལ་ཆོད་སེམས་བརྟན་པོ་མཚོན་གྱི་ཡོད་པ་འགྲེལ་བརྗོད་གནང་འདུག རྩ་བའི་ལས་གཞི་དེའི་ནང་མངའ་སྡེ་གཞུང་དང་དགོན་པ་ཟུང་སྦྲེལ་གྱི་ཐོག་ནས་རྒྱལ་ཁབ་ཕྱི་ནང་གཉིས་ཀྱི་ལྟ་སྐོར་བ་རྣམས་ལ་སྒོམ་སྒྲུབ་དང་ཟབ་སྦྱོང་། ཆོས་ཕྱོགས་ཀྱི་སློབ་སྦྱོང་དང་གནས་མཇལ་གྱི་བྱེད་སྒོ་སོགས་ཚུད་པའི་ཆོས་ཕྱོགས་དང་ནང་སེམས་ཀྱི་མྱོང་བ་བཅས་ལ་དམིགས་ནས་ཡུལ་སྐོར་སྤྲོ་འཆམ་པའི་ལས་གཞི་གོང་འཕེལ་གཏོང་རྒྱུ་དང་། ལྷག་པར་རྒྱལ་སྤྱིའི་ཚོགས་འདུ་དང་ཟུང་སྦྲེལ་གྱི་ཉམས་ཞིབ། སློབ་གྲྭ་ཕན་ཚུན་ཤེས་ཡོན་བརྗེ་ལེན་གྱི་ལས་གཞི་བཅས་ཀྱི་བརྒྱུད་ནས་ནང་པའི་རིག་གཞུང་དར་འཕེལ་གཏོང་རྒྱུ་སོགས་ཀྱི་ལས་གཞི་ཡོད་པ་རེད་འདུག དེ་བཞིན་མངའ་སྡེའི་རིག་གཞུང་བློན་ཆེན་མཆོག་གིས། མངའ་སྡེ་ནང་ཡོད་པའི་ནང་པའི་རིག་གཞུང་དེ་དག་ནི་ཐུན་མོང་མིན་པའི་ལོ་རྒྱུས་དང་ལྟ་གྲུབ་ཟུང་ལྡན་གྱི་ཁྱད་ཆོས་ཞིག་མཚོན་གྱི་ཡོད་པ་སོགས་བརྗོད་འདུག རྒྱ་གར་གཞུང་གི་ངོས་ནས་ད་ལྟའི་ཆར་ཨོ་ཌི་ཤ་ནང་ཡོད་པའི་ Diamond Triangle འམ་རྡོ་རྗེ་གྲུ་གསུམ་དུ་གྲགས་པའི་ནང་པའི་གནས་གསུམ་སྟེ། Ratnagiri རཏྣ་གི་རི་དང་། […] The post རྒྱལ་སྤྱིའི་ཁྲོད་ཨོ་ཌི་ཤ་ནང་པའི་གནས་འབུར་ཐོན་དང་རིག་གནས་སྲུང་སྐྱོབ་ཆེད་བོད་པའི་དགོན་པ་ཞིག་དང་ལྷན་དུ་གན་རྒྱ་བཞག་འདུག appeared first on vot.

ཟླ་འདིའི་ཕྱི་ཚེས་ ༢ ཉིན་ཨ་རི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་ཕུལ་བ་དང་བསྟུན། ནིའུ་ཡོག་གཙོས་པའི་ཁེ་ན་ཌ་དང་རྒྱ་གར། ཡོ་རོབ་སོགས་ཀྱི་ནང་ལས་འགུལ་རྣམ་པ་འདྲ་མིན་གྱི་ཐོག་ནས་སྤེལ་དང་སྤེལ་མུས་ཁྲོད། ཁ་སང་ཕྱི་ཚེས་ ༡༥ དེ་བཞིན་དམ་པ་དེ་ཉིད་ཀྱི་བདུན་ཚིགས་གཉིས་པ་འཁེལ་གྱི་ཡོད་སྟབས་ཐའེ་ཝན་གྱི་རྒྱལ་ས་ཐའེ་པེ་ནང་དང་། རྒྱ་གར་ལྷོ་ཕྱོགས་མའེ་སོར་གྲོང་ཁྱེར་སོགས་སུ་རྒྱ་ནག་ལ་ངོ་རྒོལ་ལས་འགུལ་རྒྱ་ཆེ་སྤེལ་འདུག དེ་ཡང་བརྒྱུད་ལམ་ཁག་ཏུ་དེ་འབྲེལ་གནས་ཚུལ་སྤེལ་བར་གཞིགས་ན། ཁ་སང་ཐའེ་ཝན་ནང་ཐའེ་ཝན་བོད་ཀྱི་སྐུ་ཚབ་དོན་གཅོད་དང་། བོད་རིགས་ཚོགས་པ། དེ་བཞིན་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་སྣེ་ཁྲིད་འོག་ཁུལ་དེའི་ Liberty Square ཞེས་པའི་ས་ཚིགས་སུ་དགོང་མོ་ཕྱག་ཚོད་ ༧།༣༠ ཙམ་ལ་བོད་བརྒྱུད་ནང་བསྟན་གྱི་མཁན་བླ་སྤུལ་ཁག་དང་། བོད་མི་གཙོས་བོད་དོན་རྒྱབ་སྐྱོར་བ་དང་། འགྲོ་བ་མིའི་ཐོབ་ཐང་རྩོད་ལེན་པ་སོགས་མང་ཚོགས་ ༣༠༠ ཙམ་འདུ་འཛོམས་ཐོག་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་མྱ་ངན་གུས་འདུད་དང་། འདི་ཚེས་ ༡ ནས་རྒྱ་ནག་གཞུང་གིས་ལག་བསྟར་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོས་ལེན་རྩ་བ་ནས་མེད་པའི་ལས་འགུལ་སྤེལ་འདུག་ཅིང་། དེ་འབྲེལ་ལས་འགུལ་ཁོངས་མཉམ་ཞུགས་གནང་མཁན་ཐའེ་ཝན་མི་སེར་ Tess Cheng ལགས་ཀྱིས་ཐེ་ཝན་དང་བོད། ཧོང་ཀོང་། ཤིན་ཅང་བཅས་ནི་རྒྱ་ནག་གི་ཡུན་རིང་གདུག་རྩུབ་ཅན་གྱི་སྲིད་བྱུས་འོག་གནས་བཞིན་ཡོད་པ་དང་། སྤྱིར་རྒྱལ་གཅེས་པ་ཁོང་གིས་སྐུ་ལུས་མེར་བསྲེགས་བཏང་གནང་བའི་དོན་རྐྱེན་དེ་བཞིན་ཕྱི་རྒྱལ་དུ་བྱུང་ཡོད་ཀྱང་། དེ་ནི་ང་ཚོའི་དཀའ་ངལ་དང་གཅིག་འགྱུར་ཆགས་ཀྱི་ཡོད་པ་གསུངས་འདུག འདི་ག་རླུང་འཕྲིན་ཁང་གིས་གནད་དོན་དེ་འབྲེལ་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་ལགས་སུ་བཀའ་འདྲི་ཞུས་ཡོད། དེ་བཞིན་དཔའ་བོོ་བློ་དགའ་རང་བཙན་ལགས་སུ་མྱ་ངན་མཚོན་ཆེད་ SFT-Itanagar ཞེས་ཨི་ཊ་ན་གྷར་བོད་རང་བཙན་སློབ་ཕྲུག་ཚོགས་པས་གཟའ་འཁོར་འདིའི་རེས་གཟའ་ཟླ་བ་སྟེ་འདི་ཚེས་ ༡༣ ཉིན་ཁུལ་དེའི་ཐུབ་བསྟན་དགའ་ཚལ་གླིང་དགོན་པར་མར་མེ་ཁྲོམ་སྐོར་གྱི་ལས་འགུལ་ཞིག་གོ་སྒྲིག་གནང་འདུག་པ་དང་། འདུ་འཛོམས་དེའི་ཚོགས་པས་ངོས་ནས་བོད་དོན་ལས་འགུལ་སྤེལ་རྒྱུའི་ཁས་ལེན་བསྐྱར་ནན་དང་ཆབས་ཅིག བོད་མི་ཡོངས་ལ་གདུང་སེམས་མཉམ་སྐྱེད་མུ་མཐུད་གནང་དགོས་པའི་འབོད་སྐུལ་ཞུས་འདུག་ཅིང་། ལས་འགུལ་དེའི་བརྒྱུད་རྒྱལ་སྤྱིའི་སྤྱི་ཚོགས་དང་འཛམ་གླིང་གི་དབུ་ཁྲིད་རྣམས་ལ་བོད་ཀྱི་གནད་དོན་ཞི་བདེ་དང་དྲང་བདེན། མཐུན་སྒྲིལ་གྱི་ཐོག་ནས་ཐག་གཅོད་གནང་པའི་འབད་བརྩོན་ལ་རྒྱབ་སྐྱོར་བྱེད་དགོས་པའི་འབོད་སྐུལ་གནང་འདུག མ་ཟད་རྒྱ་གར་ལྷོ་ཕྱོགས་མའེ་སོར་གྲོང་ཁྱེར་དུའང་སྦེལ་ཀོབ་དང་ཧུན་སུར། ཀོ་ལི་གྷར་བཅས་ཀྱི་དབུ་མའི་ལམ་གྱི་བོད་ཀྱི་གཞོན་ནུ་དང་། བུད་མེད་ལྷན་ཚོགས། དེ་བཞིན་མའེ་སོར་བཅའ་བཞུགས་བོད་རིགས་སློབ་ཕྲུག་མཐུན་ཚོགས་ནས་གོ་སྒྲིག་འོག་རྔམ་སྟོན་ལས་འགུལ་གནང་འདུག་པ་དང་། གཞན་ཡང་བསྟན་འཛིན་སྒང་དང་། Italy རྒྱལ་ས་ Rome སོགས་ནང་དུ་ལས་འགུལ་འདྲ་མིན་སྤེལ་ཡོད་པ་རེད། ཕྱོགས་མཚུངས་དམ་པ་ཁོང་གི་བདུན་ཚིགས་གཉིས་པ་དང་བསྟུན་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བཞུགས་སྒར་རྡ་སའི་ཐང་ཁྲོམ་ཚོགས་པས་མཆོད་འབུལ་སྨོན་གོ་སྒྲིག་གནང་ཡོད་པ་དང་། འདི་ཚེས་ […] The post དཔའ་བོ་བློ་དགའ་རང་བཙན་ལགས་སུ་གདུང་སེམས་མཉམ་སྐྱེད་དང་རྒྱ་ནག་གི་ཁྲིམས་གསར་པར་ངོས་ལེན་མེད་པའི་ལས་འགུལ། appeared first on vot.

ཨོ་གླིང་དུ་རྟེན་གཞི་བྱས་པའི་ Rev. Bill Crews ཐེབས་རྩ་ཁང་དུ་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་དབུ་བཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་སྔ་ཨོསྟྲེ་ལི་ཡ་དང་ནིའུ་ཛི་ལེནྜ་ཁུལ་དུ་ཆིབས་བསྒྱུར་རིམ་པ་བསྐྱངས་པའི་པར་རིས་ཕྱག་དེབ་ ‘Ocean of Wisdom Over Southern Skies' ཞེས་པ་ཞིག་དབུ་འབྱེད་གནང་འདུག འདི་གའི་གསར་འགོད་པས་གནས་ཚུལ་དེའི་སྐོར་ཨོ་གླིང་བོད་ཀྱི་སྐུ་ཚབ་དོན་གཅོད་ཀརྨ་སེང་གེ་ལགས་སུ་ཞལ་པར་བརྒྱུད་བཀའ་འདྲི་ཞུ་སྐབས་ཁོང་གིས།  པར་རིས་ཕྱག་དེབ་དེ་ཉིད་ཨོ་གླིང་བོད་ཀྱི་སྐུ་ཚབ་དོན་གཅོད་ལས་ཁངས་ཀྱི་རྐང་འགན་བཞེས་པའི་འོག་ Rev. Bill Crews ཐེབས་རྩ་དང་ལྷན་དུ་ཉམ་འབྲེལ་གྱིས་༸རྒྱལ་བའི་གོ་སྟོན་སྲུང་བརྩིའི་ལས་རིམ་གྱི་ཆ་ཤས་སུ་པར་བསྐྲུན་གནང་བ་ཞིག་ཡིན་པ་དང་།  ཕྱག་དེབ་དེའི་ནང་གཙོ་བོ་༸གོང་ས་མཆོག་དེ་སྔ་ཕྱི་ལོ་ ༡༩༨༢ ནས་ ༢༠༡༥ བར་ཨོསྟྲེ་ལི་ཡ་དང་ནིའུ་ཛི་ལེནྜ་ཁུལ་དུ་ཆིབས་བསྒྱུར་གྱིས་ཡུལ་དེ་གཉིས་ཀྱི་སྲིད་བློན་གཙོས་པའི་ཆོས་ཕྱོགས་དང་ཆབ་སྲིད་ཀྱི་གནད་ཡོད་མི་སྣ་མཇལ་འཕྲད་སོགས་ཀྱི་མཛད་འཕྲིན་བསྐྱངས་པའི་སྐབས་ཀྱི་པར་རིས་ཁག་འཁོད་ཡོད་པ་གསུངས་སོང་ལ།   ཕྱག་དེབ་དེ་ཉིད་དངོས་སུ་དབུ་འབྱེད་ཀྱི་མཛད་སྒོ་དེ་བཞིན་ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་སྲུང་བརྩི་དང་འབྲེལ་ཏེ་ཟླ་འདིའི་ཕྱི་ཚེས་ ༡༢ ཉིན་ཨོ་གླིང་དུ་རྟེན་གཞི་བྱས་པའི་ Rev. Bill Crews ཐེབས་རྩ་ཁང་དུ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་དབུས་པའི་༸གོང་ས་མཆོག་དང་ཐུགས་འདྲིས་ཟབ་པའི་ཡེ་ཤུའི་ཆོས་དཔོན་ Bill Crews  དེ་བཞིན་ཁུལ་དེར་གནས་སྡོད་གནང་མཁན་ཡུན་རིང་ནས་བོད་དོན་ཐད་རྒྱབ་སྐྱོར་བ་ཁག་གཅིག་བཅས་འདུ་འཛོམས་ཐོག་འཚོགས་ཡོད་པ་གསུངས་སོང་།  ཕྱག་དེབ་དབུ་འབྱེད་ཀྱི་མཛད་སྒོའི་ཐོག་ ༸སྐྱབས་རྗེ་ཀུན་བདེ་གླིང་རིན་པོ་མཆོག་གིས་༸རྒྱལ་བའི་མཛད་འཕྲིན་སྐོར་དང་འབྲེལ་དམིགས་བསལ་གྱིས་༸གང་ཉིད་མཆོག་གི་ཐུགས་སྐྱེད་དམ་བཅའ་བཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད། དེ་བཞིན་དུས་རྒྱུན་སྐུ་མདུན་གྱི་བྱམས་སྙིང་རྗེ་སྐོར་གྱི་བཀའ་སློབ་བཅས་ལུང་འདྲེན་གྱིས་གསུང་བཤད་གནང་ཡོད་པ་དང་།  རིན་པོ་ཆེ་མཆོག་གིས་ད་དུང་༸གོང་ས་༸སྐྱབས་མགོན་ཆེན་པོ་མཆོག་དང་བོད་དོན་ཐོག་སྔ་རྗེས་རྒྱབ་སྐྱོར་གནང་མཁན་ཨོསྟྲེ་ལི་ཡའི་གཞུང་དང་བོད་དོན་རྒྱབ་སྐྱོར་བ་ཡོངས་ལ་ཐུགས་རྗེ་ཆེ་ཞུས་གནང་འདུག་པ་མ་ཟད།  སྐབས་དེར་གདན་ཞུས་སྐུ་མགྲོན་གཞན་ཁག་གཅིག་གིས་དེ་སྔ་སྐུ་མདུན་ཁུལ་དེར་ཆིབས་བསྒྱུར་ཁྲོད་ཀྱི་མཇལ་འཕྲད་སྐོར་དང་འབྲེལ་རང་སོ་སོའི་མྱོང་ཚོར་གསུངས་ཡོད་པ་དང་།  ལྷག་པར་དུ་ཁོང་རྣམས་ནས་༸གོང་ས་མཆོག་དེ་སྔ་ཁུལ་དེར་ཆིབས་བསྒྱུར་རིམ་པ་བསྐྱངས་པ་དེ་དག་གིས་ཁོང་ཚོའི་མི་མང་ཁྲོད་བྱམས་སྙིང་རྗེ་དང་འཚེ་མེད་ཞི་བའི་བསམ་བློ་གོང་མཐོར་ཐད་ཕན་ཐོགས་ཆེན་པོ་བྱུང་ཡོད་སྐོར་གསུངས་འདུག  དེ་བཞིན་ཁོང་རྣམས་ནས་༸གང་ཉིད་མཆོག་ལ་ཆིབས་བསྒྱུར་ཁྲོད་ཞབས་ཞུ་ཕྲན་བུ་བསྒྲུབས་ཐུབ་པ་དེ་དག་ཁོང་རྣམས་ཀྱི་མི་ཚེ་ནང་གོ་སྐབས་རྩ་ཆེན་པོར་རྩིས་ཀྱི་ཡོད་ལ་སྤོབས་པའང་ཡོད་པ་གསུངས་འདུག་པ་མ་ཟད།  ༸གོང་ས་མཆོག་གི་བཀའ་དགོངས་གང་ཐུབ་ལག་ལེན་ཐུབ་པ་གནང་རྒྱུ་དང་སྤྱི་ཚོགས་ཁྲོད་དེ་དག་གོང་འཕེལ་ཐུབ་པར་གང་ཐུབ་འབད་བརྩོན་གནང་གི་ཡིན་བཅས་གསུངས་འདུག རྩ་བའི་ཟླ་འདིའི་ཕྱི་ཚེས་ ༡༢ ཉིན་ཨོ་གླིང་དུ་འཚོགས་པའི་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་པར་རིས་ཕྱག་དེབ་ཀྱི་མཛད་སྒོའི་ཐོག་ཨོསྟྲེ་ལི་ཡ་ཨེ་ཤི་ཡའི་སྤྱི་འཐུས་སྐལ་བཟང་ཚེ་རིང་ལགས་ནས་ཀྱང་མཉམ་ཞུགས་ཀྱིས་༸རྒྱལ་བའི་སྐུ་ཚེའི་མཛད་འཕྲིན་སྐོར་དང་༸གང་ཉིད་མཆོག་གིས་འཚེ་མེད་ཞི་བ་དང་གྲོས་མོལ་ཐད་ཀྱི་ཆེད་སེམས་སྐོར་གསུང་བཤད་གནང་ཡོད་པ་མ་ཟད། ཉེ་ལམ་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱེད་འགོ་བཙུགས་པའི་སྐོར་དང་དེས་བོད་ཐོག་སྤྱི་ཡོངས་ནས་ཤུགས་རྐྱེན་ཇི་ཡོད་སྐོར་བཅས་གསུངས་འདུག མཛད་སྒོའི་ཐོག་གཞན་ཡང་བོད་པའི་སྒྱུ་རྩལ་བ་གྲགས་ཅན་བསྟན་འཛིན་ཆོས་རྒྱལ་ལགས་གཙོས་པའི་སིཌ་ནི་གཟའ་མཇུག་སློབ་གྲྭའི་བོད་ཕྲུག་རྣམས་ནས་གཞས་སྣ་འཁྲབ་སྟོན་གཟིགས་འབུལ་ཡང་ཞུས་ཡོད་པ་རེད་འདུག The post ཨོ་གླིང་དུ་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་པར་རིས་ཕྱག་དེབ་ཅིག་དབུ་འབྱེད་གནང་འདུག appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་བསྟུན།  རྒྱ་གར་ལྷོ་ཕྱོགས་བྷང་ལོར་ས་གནས་སུ་ལྷོ་སྤྱི་དང་སྒོ་མང་མཁན་རིན་པོ་ཆེ་གཉིས་གཙོས་པའི་འབྲེལ་ཡོད་ལས་བྱེད་ཁག་གཅིག་བཅས་ནས་ཀར་ནཱ་ཊ་ཀ་མངའ་སྡེའི་སྲིད་སྐྱོང་མཆོག་དང་མཇལ་འཕྲད་ཀྱིས།  ༸རྒྱལ་བའི་མཛད་འཕྲིན་དང་བོད་ཀྱི་ཛ་དྲག་གནས་སྟངས་སྐོར་ངོ་སྤྲོད་གནང་འདུག་པ་མ་ཟད།  ཁུལ་དེར་རྟེན་གཞི་བྱས་པའི་མཐོ་སློབ་ཁག་གཅིག་གི་ནང་དེ་འབྲེལ་གཏམ་བཤད་ཀྱི་ལས་རིམ་དང་བོད་ཀྱི་རིག་གཞུང་མཚོན་པའི་གཞས་སྣ་འཁྲབ་སྟོན་གཟིགས་འབུལ་སོགས་ཀྱི་བརྒྱུད་༸རྒྱལ་བའི་འཁྲུངས་སྐར་སྲུང་བརྩི་རྒྱ་ཆེར་ཞུས་འདུག དེ་ཡང་འདི་ག་གསར་ཁང་ལ་འབྲེལ་ཡོད་ཀྱིས་གནས་ཚུལ་མཁོ་སྤྲོད་གནང་བ་གཞིར་བཟུང་ལྟར་ན།  ཉེ་ལམ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་འབྲས་སྤུངས་སྒོ་མང་གྲྭ་ཚང་གི་མཁན་རིན་པོ་ཆེ་འཇིགས་མེད་རྒྱ་མཚོ་ལགས་གཙོ་བོར་གྱུར་བའི་འབྲེལ་ཡོད་ལས་བྱེད་ཁག་གཅིག་བཅས་ནས་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་སྲིད་སྐྱོང་སྐུ་ཞབས་ Thawar Chand Gehlot མཆོག་དང་མཇལ་འཕྲད་ཀྱིས།  ༸རྒྱལ་བའི་མཛད་འཕྲིན་དང་། ༸གང་ཉིད་མཆོག་གི་རླབས་ཆེན་གྱི་དགོངས་གཞི། ད་ལྟའི་བོད་ཀྱི་ཛ་དྲག་གནས་སྟངས་བཅས་ཀྱི་སྐོར་ངོ་སྤྲོད་གནང་ཡོད་པ།  དེ་བཞིན་རྒྱ་གར་གཞུང་དང་ལྷག་དོན་དུ་ཀར་ནཱ་ཊ་ཀ་མངའ་སྡེ་ནས་ད་བར་བོད་མིར་རྒྱབ་སྐྱོར་དང་རོགས་རམ་གནང་བར་དམིགས་བསལ་གྱིས་ཐུགས་རྗེ་ཆེ་ཞུས་གནང་འདུག་ལ།  སྐབས་དེར་མངའ་སྡེའི་སྲིད་སྐྱོང་མཆོག་གིས་ཀྱང་༸རྒྱལ་བའི་འཁྲུངས་སྐར་ལ་འཚམས་འདྲི་དང་འབྲེལ་སྙན་སེང་ཞུས་པའི་གནད་དོན་ཁག་གི་ཐད་ཐུགས་སྣང་ཆེན་པོས་བཀའ་མོལ་གནང་ཡོད་པ་རེད་འདུག  མ་ཟད་ཐེངས་འདིར་བོད་མིའི་སྒྲིག་འཛུགས་ཁྱབ་ཁོངས་ལྷོ་སྤྱི་ལས་ཁུངས་དང བྱེས་ཀྱི་གདན་ས་འབྲས་སྤུངས་སྒོ་མང་གྲྭ་ཚང་གཉིས་ཀྱིས་ཟུང་སྦྲེལ་ཐོག་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་ནང་དུ་ཟླ་འདིའི་ཕྱི་ཚེས་ ༨ ནས་བཟུང་ཉིན་གྲངས་གསུམ་ཙམ་གྱི་རིང་༸རྒྱལ་བའི་འཁྲུངས་སྐར་སྲུང་བརྩིའི་ཆ་ཤས་སུ་གོ་སྒྲིག་ཞུས་པའི་ལས་རིམ་ཁོངས་སུ་གཞན་ཡང་།  ཁུལ་དེར་རྟེན་གཞི་བྱས་པའི་རྒྱ་གར་གྱི་མཐོ་སློབ་ Jyoti Nivas College དང་། Mount Carmel College, St. Joseph's University, Surana College, V.E.T First Grade College བཅས་སུ་སྒོ་མང་མཁན་རིན་པོ་ཆེ་འཇིགས་མེད་རྒྱ་མཚོ་ལགས་དང་ལྷོ་སྤྱི་འཇིགས་མེད་ཚུལ་ཁྲིམས་ལགས་གཉིས་ནས་༸རྒྱལ་བའི་ཐུགས་སྐྱེད་དམ་བཅའ་བཞིའི་སྐོར་གཙོས་པའི་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་དང་།  ལྷག་པར་དུ་ཉེ་ལམ་རྒྱ་ནག་གིས་བཙན་དབང་ཐོག་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱས་པའི་སྐོར་དང་།  རྒྱལ་གཅེས་དཔའ་བོ་བློ་དགའ་རང་བཙན་ལགས་སོགས་བོད་ཕྱི་ནང་གཉིས་སུ་དབར་བོད་མི་ ༡༧༠ ཙམ་གྱིས་རྒྱ་ནག་ལ་ངོ་རྒོལ་མཚོན་བྱེད་དུ་རང་ལུས་མེར་བསྲེགས་བཏང་བ་བཅས་བོད་ཀྱི་ཛ་དྲག་གནས་སྟངས་ངོ་སྤྲོད་དང་།  དེ་འབྲེལ་དྲི་བ་དྲི་ལན་གནང་ཡོད་པ་མ་ཟད།  ཀ་ལོན་སྦུག་ནས་ཆེད་མངགས་ཕེབས་པའི་གངས་ལྗོངས་ཟློས་གར་ཚོགས་པའི་ངོས་ནས་བོད་ཀྱི་རིག་གཞུང་མཚོན་པའི་གཞས་སྣ་འཁྲབ་སྟོན་གཟིགས་འབུལ་ཡང་ཞུས་ཡོད་པ་རེད་འདུག དེའི་སྐོར་འདི་གའི་གསར་འགོད་པས་ལྷོ་སྤྱི་འཇིགས་མེད་ཚུལ་ཁྲིམས་ལགས་སུ་བཀའ་འདྲི་ཞུས་ཡོད།  The post རྒྱ་གར་ཀར་ནཱ་ཊ་ཀ་མངའ་སྡེའི་སྲིད་སྐྱོང་མཆོག་ལ་༸རྒྱལ་བའི་མཛད་འཕྲིན་དང་བོད་ནང་གི་ཛ་དྲག་གནས་སྟངས་ངོ་སྤྲོད། appeared first on vot.

དེ་རིང་སྤྲུལ་སྐུ་བསྟན་འཛིན་བདེ་ལེགས་མཆོག་རྒྱ་ནག་གཞུང་གིས་སྐུ་བཀྲོངས་ནས་ལོ་ ༡༡ འཁོར་བའི་ཉིན་མོ་དང་བསྟུན། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ No Tongue in Their Mouths: Allegations of Assault in Tenzin Delek Rinpoche's Death ཞེས་སྤྲུལ་སྐུ་བསྟན་འཛིན་བདེ་ལེགས་དམ་པ་ཁོང་གི་ཚ་མོ་གྲོང་རྟ་ཚང་ཉི་མ་ལྷ་མོ་ལགས་ཀྱིས་བརྩམས་གནང་བའི་བདེ་དོན་གླེང་བའི་གཏམ་ཞེས་པའི་ཕྱག་དེབ་དབྱིན་སྒྱུར་ཞུས་པ་དེ་དབུ་འབྱེད་གནང་སོང་། དེ་ཡང་དེ་རིང་སྔ་དྲོ་ཕྱག་ཚོད་ ༡༡།༣༠ ཐོག་བཞུགས་སྒར་དུ་རྟེན་གཞི་བྱས་པའི་ནོར་བུ་གསོལ་མགྲོན་ཁང་གི་ཚོགས་ཁང་ནང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོ་སྒྲིག་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་མཐུན་འགྱུར་འོག བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གདན་ཞུས་ཐོག་ནས་དབྱིན་སྒྱུར་ ཕྱག་དེབ་དེ་དབུ་འབྱེད་ཀྱི་མཛད་སྒོ་ཞིག་འཚོགས་སོང་། ཚོགས་གཙོ་སྒྲོལ་མ་ཚེ་རིང་མཆོག་གིས་དེ་རིང་ཉི་མ་ལྷ་མོ་ལགས་ཀྱིས་དབྱིན་སྒྱུར་ཕྱག་དེབ་དེ་དབུ་འབྱེད་དང་འབྲེལ་ནས་གསུང་བཤད་གནང་བའི་ཁྲོད། སྤྲུལ་སྐུ་བསྟན་འཛིན་བདེ་ལེགས་མཆོག་གི་སྐུ་ཚའི་ལོ་རྒྱུས་ཀྱི་གནད་འགག་ཅན་གྱི་གནད་དོན་རྣམས་གསལ་སྟོན་དང་སྦྲགས། ཁོང་ནི་བོད་ནང་གི་བོད་མི་ཚོའི་མནར་གཅོད་ཇི་ཙམ་མྱངས་ཡོད་མིིན་དང་བོད་ཀྱི་ཆོས་དང་རིག་གཞུང་། སྐད་ཡིག་གི་ཆེད་དུ་བློས་གཏོང་ཇི་ཙམ་གནང་ཡོད་མིན་གྱི་བདེན་དཔང་ར་སྤྲོད་གནང་མཁན་ཞིག་ཡིན་པ་ལྟར་ཁོང་ནི་སྙིང་སྟོབས་ཀྱི་དཔའ་བོ་ཞིག་ཡིན་པ་དང་། ང་ཚོས་ཁོང་གི་སྙིང་སྟོབས་དཔེར་བླངས་ཏེ་དོན་མེད་ཀྱི་ཆོལ་ཁ་ཆོས་ལུགས་དབྱེ་འབྱེད་ཀྱི་གནད་དོན་ལ་མགོ་འཁོར་ནས་བསྡད་རྒྱུ་མེད་པར་བོད་མི་རིགས་དང་བོད་ཀྱི་རྩ་དོན་ཆེད་དུ་ཞབས་འདེགས་སྒྲུབ་ཕྱོགས་ཐད་བསམ་བློ་གཏོང་དགོས་གལ་ཡིན་པ་གསུངས་སོང་།   ཁོང་གིས་ད་དུང་དེང་སྐབས་འཛམ་གླིང་གང་སར་རྒྱ་ནག་གི་འཁྱོག་བཤད་དྲིལ་བསྒྲགས་ཤུགས་ཆེ་འགྲོ་བཞིན་པའི་དུས་སྐབས་འདིར། ང་ཚོས་འདི་ལྟ་བུའི་བདེན་དཔང་ར་སྤྲོད་ཀྱི་ཕྱག་དེབ་དེ་དག་གང་མང་འགྲེམས་སྤེལ་གནང་དགོས་པའི་སྐུལ་མ་གནང་སོང་། སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་ཀྱིས། ཕྱག་དེབ་འདི་པར་བསྐྲུན་ཞུས་པའི་དགོས་པ་དང་གནད་འགག་སྐོར་ལ་གཏམ་བཤད་སྤེལ་བའི་ཁྲོད། ཉི་མ་ལྷ་མོ་ལགས་ནི་བོད་ནང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་སྡུག་རྩུབ་ཇི་ཙམ་གཏོང་གི་ཡོད་མིན་གྱི་དཔང་པོ་གལ་ཆེ་ཞིག་ཡིན་པ་དང་འབྲེལ་ནས་ཁོང་གི་བརྩམས་གནང་བའི་ཕྱག་དེབ་དེ་བདན་དཔང་ར་སྤྲོད་ཀྱི་ཐད་ནས་ཧ་ཅང་གལ་ཆེན་པོ་ཆགས་ཀྱི་ཡོད་པ་དང་། ལྟེ་གནས་ཁང་གི་ངོས་ནས་བོད་པའི་མི་རབས་གཞོན་པ་ཚོར་བོད་ནང་གི་དངོས་ཡོད་གནས་སྟངས་དང་བོད་མིའི་དཀའ་སྡུག་དང་བློས་གཏོང་གི་སྐོར་ལ་གོ་རྟོགས་མང་ཙམ་འཕེལ་རྒྱུར་དམིགས་ཏེ་ད་རེས་ཕྱག་དེབ་དེ་པར་བསྐྲུན་ཞུས་ཡོད་པ་གསུངས་སོང་། སྐབས་དེར་མཛད་སྒོའི་ཐོག་ཕེབས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་ཚོགས་གཙོ་དང་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས། ཁོང་ཐོག་མར་བོད་ནས་རྒྱ་གར་ལ་ཕེབས་པའི་སྐབས་སུ་རང་གི་བླ་མ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་བཙན་བྱོལ་ནང་དུ་བོད་ཀྱི་རྩ་དོན་ཆེད་དུ་ཕྱག་ལས་གནང་དགོས་པ་དང་། ཆོལ་ཁ་ཆོས་ལུགས་འཐེན་འཁྱེར་གྱི་ལས་དོན་རིགས་སྤེལ་རྒྱུ་མེད་པའི་ཞལ་ཆེམས་སློབ་གསོ་བསྐྱོན་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་འབྲེལ་བཀའ་སློབ་རིམ་པ་ཕེབས་ཡོད་པ་ལུང་འདྲེན་དང་སྦྲགས། བོད་མི་ཚང་མས་ཡིད་གཟབ་གནང་དགོས་པའི་སྐུལ་མ་གནང་བ་མ་ཟད། དེ་རིང་གི་མཛད་སྒོའི་ཐོག་བོད་ནང་གི་བོད་མི་ཁག་གཅིག་གིས་དྲྭ་ལམ་བརྒྱུད་བརྡ་ལན་གནང་བ་སྒྲོག་སྦྱང་གནང་སོང་བའི་ནང་དུ། བོད་ནང་གི་བོད་མི་རྣམས་ལ་ངོ་རྒོལ་ཁྲོམ་སྐོར་བྱེད་རྒྱུའི་རང་དབང་མེད་པ་དང་། ལྷག་པར་དུ་སྨྲ་བརྗོད་རང་དབང་རིགས་རྩ་བ་ནས་མེད་པ་དང་། རྒྱ་གཞུང་གིས་མཐའ་ན་བོད་ཀྱི་ས་ཁུལ་གྱི་མིང་ཡང་བརྗེ་པོ་རྒྱག་སྟེ་ངོ་མ་ཤེས་པ་བཟོ་བཞིན་པའི་ཛ་དྲག་གནས་སྟངས་ཡོད་པ་མ་ཟད། བོད་ནང་གི་བོད་མི་ཚོས་བཙན་བྱོལ་བོད་མི་རྣམས་ཀྱི་བོད་དོན་དྲིལ་བསྒྲགས་དང་ལས་འགུལ་སྤེལ་རྒྱུའི་རེ་བ་བློ་གཏད་བཅོལ་བཞིན་ཡོད་པ་དྲན་སྐུལ་གྱིས། བཙན་བྱོལ་བོད་མི་རྣམས་ནས་བོད་པའི་འདུ་ཤེས་ཤེས་པའི་ཐོག་ནས་ཤུགས་རྒྱག་དགོས་པའི་སྐུལ་འདེབས་ཞུས་གནང་འདུག དེ་བཞིན་དེ་རིང་གི་མཛད་སྒོའི་ཐོག་ཧི་མཱ་ལ་ཡའི་ཆོས་རིག་ཉམས་ཞིབ་པ་དང་དགེ་རྒན་རྡོ་རྗེ་རིན་ཆེན་ལགས་ཀྱང་ཆེད་ཕེབས་གནང་ཡོད་པ་ལྟར། ཁོང་ནས་སྤྲུལ་སྐུ་བསྟན་འཛིན་འཛིན་བདེ་ལེགས་རིན་པོ་ཆེའི་སྐོར་སྤེལ་བའི་ཕྱག་དེབ་རིམ་པའི་སྐོར་དང་དེ་དག་གི་གལ་གནད་སྐོར་གསུངས་བཤད་ནན་པོ་གནང་སོང་། The post སྤྲུལ་སྐུ་བསྟན་འཛིན་བདེ་ལེགས་མཆོག་གི་ཚ་མོ་ཉི་མ་ལྷ་མོའི་བདེ་དོན་གླེང་བའི་གཏམ་ཞེས་པའི་དབྱིན་སྒྱུར་ཕྱག་དེབ་དབུ་འབྱེད། appeared first on vot.

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་དུ་གཞུང་འབྲེལ་ཕྱོགས་ཕེབས་ཁྲོད། ཨ་རིའི་རྒྱལ་ས་ Washington DC  ཝ་ཤིང་ཊོན་ཌི་སི་ཁུལ་གྱི་བོད་མི་རྣམས་ལ་གསུང་བཤད་དང་དྲི་བ་དྲིས་ལན་གྱི་ལས་རིམ་ཐོག་སྲིད་སྐྱོང་མཆོག་གིས། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་དེ་ཁྲིམས་འགལ་ཡིན་པ་དང་། དབུ་མའི་ལམ་གྱི་སྲིད་བྱུས་མུ་མཐུད་རྒྱུན་སྐྱོང་གནང་བཞིན་ཡོད་པ་སོགས་གསུངས་ཏེ། བོད་ཕྲུག་རྣམས་ལ་བོད་མི་རིགས་ཀྱི་འདུ་ཤེས་སྐྲུན་རྒྱུར་སོ་སོའི་ནང་ནས་འགོ་འཛུགས་བྱ་དགོས་པ་ནན་བརྗོད་གནང་འདུག དེ་ཡང་སྐབས་དེར་སྲིད་སྐྱོང་མཆོག་གི་མང་ཚོགས་ལ་གསུང་བཤད་གྲུབ་མཚམས་དྲི་བ་དྲིས་ལན་གྱི་ལས་རིམ་ཁྲོད། མང་ཚོགས་ཁག་གཅིག་གིས་ཡོང་རྒྱུའི་ཕྱི་ཟླ་ ༧ ཚེས་ ༡ ཉིན་རྒྱ་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ལག་བསྟར་བྱ་རྒྱུ་ཡིན་པ་དང་འབྲེལ་ནས། བོད་པའི་སྤྱི་ཚོགས་ཁྲོད་ཁྲིམས་ཡིག་དེས་དེ་སྔོན་བོད་མིའི་སྒྲིག་འཛུགས་ནས་རྒྱ་ནག་ལ་སྟོན་པའི་བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་ཡིག་ཆའི་གཞི་རྩ་མེད་པ་བཟོས་སྐོར་བརྗོད་ཀྱི་ཡོད་པའི་ཐོག་ལ་དགོངས་བཞེས་གནང་ཕྱོགས་བཀའ་འདྲི་ཞུས་པར། སྲིད་སྐྱོང་མཆོག་གིས་འདི་ལོའི་ཕྱི་ཟླ་ ༣ པའི་རང་རེའི་གྲོས་ཚོགས་ནང་བཀའ་ཤག་གི་གྲོས་ཆོད་ཅིག་བསྣམས་ཡོད་པ་དེའི་ནང་། ཁྲིམས་ཡིག་དེ་ནི་བཟང་སྤྱོད་དང་འགལ་བ་མ་ཟད་ཁྲིམས་དང་འགལ་ཡོད་སྐོར་ཐེར་འདོན་གནང་ཡོད་པ་དང་། ད་ལྟའི་ཆར་རྒྱ་ནག་གི་ལག་བསྟར་བྱེད་བཞིན་པའི་རྩ་ཁྲིམས་དེ་ནི་ཕྱི་ལོ་ ༡༩༨༢ ལོར་གཏན་འབེབས་བྱས་པ་དེ་ཡིན་ཞིང་། ཁྲིམས་དེའི་ཆ་རྐྱེན་ཞིག་གི་འོག་ནས་ས་གནས་མི་རིགས་རང་སྐྱོང་གི་ཁྲིམས་ཞེས་པ་ཞིག་བཟོས་ཡོད་པ་དང་། ཁྲིམས་འདི་ད་ལྟའི་ཆར་རང་འཇག་གནས་ཡོད་པ། ལྷག་པར་མ་འོངས་པར་འབྲེལ་མོལ་སླར་གསོ་བྱུང་ཚེ་ཕྱི་ལོ་  ༢༠༠༨ ལོར་བསྟན་པའི་ཡིག་ཆར་གཞི་བཞག་བྱ་དགོས་མིན་ཐད་གཏན་འཇག་ཐབས་བྱུས་འཆར་འགོད་ཚོགས་ཆུང་དང་ལམ་སྟོན། གོ་བསྡུར་ཞུས་ཏེ་འགྲོ་ལུགས་གཞིར་བཟུང་ཐག་གཅོད་བྱེད་རྒྱུ་ཡིན་པ་གསུངས་འདུག དེ་བཞིན་རྒྱ་ནག་དང་ལྷན་དུ་སྒོ་རྒྱབ་ཀྱི་འབྲེལ་བ་དེ་༸གོང་ས་མཆོག་གདན་འདྲེན་ཞུ་རྒྱུ་དང་ཡང་ན་བོད་མིའི་སྒྲིག་འཛུགས་དང་ཐད་ཀར་བཀའ་མོལ་གནང་གི་ཡོད་པའི་གནད་དོན་སྐོར་བཀའ་འདྲི་ཞུས་པར་སྲིད་སྐྱོང་མཆོག་གིས། སྒོ་རྒྱབ་ཀྱི་འབྲེལ་བ་མུ་མཐུད་ཡོད་པ་དང་། དེའི་སྐོར་ད་བར་ཞུས་དགོས་འོས་རིགས་རྣམས་ཞུས་ཟིན་པ་དང་། རྒྱ་ནག་ཕྱོགས་ནས་སྒོ་རྒྱབ་ཀྱི་འབྲེལ་བའང་ཡོད་ཅེས་བཤད་ཆོག་གི་མེད་སྐོར་བརྗོད་ཀྱི་ཡོད་ཅིང་། དེ་འབྲེལ་ཞིབ་ཕྲ་ད་ལྟའི་ཆར་ཞུ་རྒྱུའི་དུས་ཚོད་མིན་པར་དེས་ཕན་ལས་གནོད་ཆེ་བ་ཡོང་རྒྱུ་ཡིན་པར་བརྟེན། དེ་སྔོན་ཞུས་པ་བཞིན་ད་ལྟའི་ཆར་ཐུགས་ཕན་གསོས་པ་དེ་འདྲ་གང་ཡང་མེད་ཅེས་པ་དེས་༸གོང་ས་མཆོག་བོད་དུ་གདན་འདྲེན་ཞུ་རྒྱུ་དང་བོད་རྒྱ་འབྲེལ་མོལ་ལ་ཐུགས་ཕན་གསོས་པ་མེད་ཅེས་པའི་གོ་དོན་ཡིན་པར། གང་ལྟར་འབྲེལ་བ་བཞག་དགོས་ཀྱི་ཡོད་པར་༸སྐུ་མདུན་གྱི་ལམ་སྟོན་གཞིར་བཟུང་བརྟན་པོ་དང་ལྷིང་པོའི་ཐོག་འགྲོ་བཞིན་ཡོད་པ་ནན་བརྗོད་གནང་འདུག ད་དུང་མང་ཚོགས་ཁྲོད་ཕྱི་རྒྱལ་ནང་དུ་གནས་འཁོད་བོད་མི་མང་པོ་ཡོད་ཅིང་། བོད་མིའི་སྒྲིག་འཛུགས་ལ་ཨ་རི་ནས་ཐོབ་པའི་རོགས་དངུལ་ཁག་གཅིག་ཨ་རིས་གཙོས་པའི་ཕྱི་རྒྱལ་ཡུལ་གྲུ་ཁག་གི་བོད་མི་ཐོག་རོགས་རམ་གནང་དགོས་པའི་གནད་དོན་ཐད་ཞུས་པར་སྲིད་སྐྱོང་མཆོག་གིས། ཨ་རི་གཞུང་གིས་རོགས་དངུལ་གནང་བའི་སྐབས་ཡིག་ཆར་ཚིག་གཞི་ཇི་འཁོད་ལྟར་འགྲོ་དགོས་ཀྱི་ཡོད་སྟབས། དེ་སྔོན་ཨ་རིའི་གྲོས་ཚོགས་ཀྱི་བཀའ་འཁྲོལ་ཡོད་པའི་ཚིག་གཞིའི་ནང་ལྷོ་ཨེ་ཤི་ཡ་ཞེས་གསལ་ཡོད་པར་ད་ལྟའི་ཕྱི་ལོ་ ༢༠༢༦ ལོའི་བཀའ་འཁྲོལ་ཚིག་གཞི་གསར་པ་ཡོད་པ་དང་། དེར་གཞིར་བཞག་སྟེ་རྒྱ་གར་དང་བལ་ཡུལ་ཙམ་མིན་པར་ས་ཁུལ་གཞན་ལ་ཁྱབ་ཐུབ་ཐབས་དང་། ཨ་རིའི་གྲོས་ཚོགས་ཀྱི་དགོངས་པ་ཡོད་པ་གཞིར་བཟུང་འཛིན་སྐྱོང་ནས་ལག་བསྟར་བྱས་ཚེ། ལམ་ཁ་མང་བ་སྒོ་ཕྱེ་ཡི་ཡོད་པ་དང་ཆབས་ཅིག རོགས་དངུལ་བེད་སྤྱོད་གཏོང་ཕྱོགས་ཐད་ཚིག་གཞི་གཞིར་བཟུང་འགྲོ་དགོས་པ་གསལ་བཤད་གནང་འདུག མ་ཟད་དབུ་མའི་ལམ་གྱི་སྲིད་བྱུས་ལས་གཞན་པའི་ཐོག་ནས་བོད་མིའི་འཐབ་རྩོད་གནང་བའི་དུས་ལ་སླེབས་མེད་དམ་ཞེས་བཀའ་འདྲི་ཞུས་པར་སྲིད་སྐྱོང་མཆོག་གིས། ད་ལྟའི་ཐབས་ལམ་དེ་ལས་ཡག་བ་དང་། མྱུར་བ། སྒྲུབ་ཐུབ་རྒྱུ་ཡོད་པ་ཞིག་ཡོད་ཚེ་ཡིན་དང་ཡིན་ཞེས་བསམ་བློ་གཏང་ཆོག་གི་ཡོད་པ་དང་གོ་བསྡུར་བྱེད་ཆོག་གི་ཡོད་ཅིང་། ད་ལྟའི་དབུ་མའི་ལམ་གྱི་སྲིད་བྱུས་དེ་ནི་རྒྱལ་སྤྱིའི་གནས་སྟངས་དང་རྒྱ་ནག་གི་གནས་སྟངས། ལྷག་པར་བོད་ནང་གི་གནས་སྟངས་ལ་གཞིགས་ནས་བཀའ་ཤག་གི་ཐབས་བྱུས་འཛིན་བཞིན་ཡོད་ཅེས་གསུངས་འདུག ཨ་རིས་བོད་མིའི་སྒྲིག་འཛུགས་ལ་བོད་གཞུང་ཞེས་ངོས་འཛིན་བྱ་རྒྱུའི་ཁྲིམས་འཆར་ལྟར་རྒྱ་གར་གཞུང་ནས་བོད་གཞུང་ངོས་འཛིན་གནང་ཐབས་ཀྱི་གནད་དོན་དང་འབྲེལ་ནས། ༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ས་ཐོག་ཏུ་ཞབས་སོར་འཁོད་རྗེས། སྐབས་དེར་ང་དང་ངའི་བཀའ་ཤག་ག་བ་ཡོད་ན་བོད་གཞུང་དེར་ཡོད་ཅེས་བཀའ་སྩལ་ཡོད་པ་དང་། དེའི་རྗེས་རྒྱ་གར་གཞུང་ནས་བོད་གཞུང་ངོས་ལེན་བྱེད་ཐུབ་ཀྱི་མ་རེད་ཅེས་བརྗོད་ཡོད་པར་ད་ལྟའི་བཀའ་ཤག་གི་ངོས་ནས་དབུ་མའི་ལམ་གྱི་སྲིད་བྱུས་རྒྱུན་སྐྱོང་བའི་ཐོག་ལོ་རྒྱུས་ཀྱི་གནས་བབ་སྐོར་ཤུགས་གནོན་འཕར་མ་སྐྱོན་བཞིན་ཡོད་པ་མ་ཟད། […] The post མི་རིགས་མཐུན་སྒྲིལ་གྱི་ཁྲིམས་ཡིག་ཟེར་བ་དེ་བཟང་སྤྱོད་ཙམ་མ་ཟད་ཁྲིམས་དང་འགལ་བ་ཞིག་ཡིན་པར་སྐྱོན་བརྗོད། appeared first on vot.

Kinnaur Baudh Sewa Sangh འམ་ཁུ་ནུ་ཆོས་འཁོར་གླིང་དགོན་པ་དང་། ཨེ་མོ་རི་ཚན་རིག་དང་སྒོམ་སྒྲུབ་བསྟི་གནས་ཁང་། དེ་བཞིན་ Piramal Foundation པི་རཱ་མལ་ཐབས་རྩ་ཁང་། ཧི་མཱ་ཅལ་གཞུང་གི་ཤེས་རིག་ལས་ཁུངས་ Samagra Shiksha སམགྲ་ཤིཀྵཱ་བཅས་ཐུན་མོང་གི་གོ་སྒྲིག་འོག ཀི་ནོར་རྫོང་གི་རིཀོང་སྤེའུར་ Reckong Peo ནང་དུ་རྟེན་གཞིས་བྱས་པའི་བདག་ཉིད་ཆེན་པོ་གཱན་དྷིའི་སྤྱི་གླིང་དུ། དེ་རིང་ཕྱི་ལོ་ ༢༠༢༦ ཟླ་ ༦ ཚེས་ ༢༢ ཉིན་ཁུ་ནུ་དང་སྤི་ཏི་ཡོད་པའི་གཞུང་དང་སྒེར་གྱི་སློབ་གྲྭ་ཁག་དྲུག་ཅུའི་དབུ་འཛིན་དང་དགེ་རྒན་ཁག་ལ་དམིགས་ནས་སཱི་ཤེས་ཡོན་སློབ་གསོའི་ཟབ་སྦྱོང་འགོ་འཛུགས་གནང་འདུག ཟབ་སྦྱོང་དེ་བཞིན་འདི་ཚེས་ ༢༤ བར་ཉིན་གྲངས་གསུམ་རིང་འཚོགས་བཞིན་ཡོད་ཅིང་། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་། སྐུའི་གོ་སྟོན་བྱམས་བརྩེ་ལོའི་སྲུང་བརྩི་ཆ་ཤས་སུ་གོ་སྒྲིག་གནང་བ་ཞིག་ཡིན་པ་རེད་འདུག དེ་རིང་དབུ་འབྱེད་མཛད་སྒོའི་ཐོག་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དབུས་པའི་༸སྐྱབས་རྗེ་རྒྱ་བུང་མཆོག་སྤྲུལ་རིན་པོ་ཆེ། ཨེ་མོ་རི་གཙུག་ལག་སློབ་གཉེར་ཁང་གི་ཚན་རིག་དང་སྒོམ་སྒྲུབ་བསྟི་གནས་ཁང་གི་འགན་འཛིན་དང་སཱི་ཤེས་ཡོན་སློབ་གསོའི་གསར་འཛུགས་འགན་འཛིན་འབུམ་རམས་པ་དགེ་བཤེས་བློ་བཟང་བསྟན་འཛིན་ནེ་གཱི་ལགས། སློབ་དཔོན་ཆེན་མོ་ཡུ་ཀི་ཨིམོཊོ་ལགས། ཧི་མཱ་ཅལ་གཙུག་ལག་སློབ་གཉེར་ཁང་གི་རིག་དྲུང་གྱཱན་སཱགར་ནེ་གི་ལགས། སཱི་ཤེས་ཡོན་སློབ་གསོ་བ་བརྩོན་འགྲུས་བསམ་འཕེལ་ལགས། དེ་བཞིན་མཁས་པ་དང་གནད་ཡོད་སྐུ་མགྲོན་གཞན་ཁག་གཅིག་སོགས་ཚོགས་བཅར་བ་བརྒྱ་ལྷག་ནས་མཉམ་ཞུགས་གནང་འདུག སྐབས་དེར་སྐུ་མགྲོན་གཙོ་བོ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས། གསུང་བཤད་གནང་བའི་ཁྲོད་ SEE སྤྱི་ཚོགས་དང་སེམས་མྱོང་། བཟང་སྤྱོད་བཅས་ཀྱི་ཤེས་ཡོན་དེ་ནི་མངའ་སྡེ་དང་རྒྱལ་ཁབ་ཙམ་མིན་པར། འགྲོ་བ་མིའི་རིགས་སྤྱི་ཡོངས་ཀྱི་མ་འོངས་གནས་བབ་དེ་ད་ལྟའི་མི་ཚེ་སྐྱེལ་སྟངས་ལ་རག་ལུས་ཀྱི་ཡོད་སྟབས། གལ་གནད་ཆེན་པོ་ཞིག་ཆགས་ཀྱི་ཡོད་ཅེས་གསུངས་བ་དང་འབྲེལ། ལེགས་གསོ་བསྔགས་བརྗོད་དང་། ཁྱད་པ་དུ་ཀི་ནོར་ས་ཁུལ་ནས་མཁས་པ་མང་པོ་བྱུང་ཡོད་པར་རེ་བ་ཆེན་པོ་ཡོད་ཅེས་གསུངས་འདུག འདི་ག་རླུང་འཕྲིན་ཁང་ནས་ཨེ་མོ་རི་གཙུག་ལག་སློབ་གཉེར་ཁང་གི་ཚན་རིག་དང་སྒོམ་སྒྲུབ་བསྟི་གནས་ཁང་གི་འགན་འཛིན་དགེ་བཤེས་བློ་བཟང་བསྟན་འཛིན་ནེ་གཱི་ལགས་སུ་བཀའ་འདྲི་ཞུས་པར། ད་རེས་ཟབ་སྦྱོང་དེ་ནི་༸རྒྱལ་བའི་གོ་སྟོན་དང་བསྟུན་ནས་གོ་སྒྲིག་ཞུས་པ་གནད་འགག་ཆེན་པོ་ཞིག་ཆགས་ཀྱི་ཡོད་པ་དང་། དེ་བཞིན་༸རྒྱལ་བའི་བཞུགས་གནས་ཧི་མཱ་ཅལ་མངའ་སྡེ་ཆགས་ཀྱི་ཡོད་པར་དེ་སྔོན་ཧི་མཱ་ཅལ་ཤེས་རིག་ལས་ཁུངས་ནས་སཱི་ཤེས་ཡོན་སློབ་གསོ་དེ་སློབ་གྲྭ་ཡོངས་རྫོགས་ནང་རིམ་པས་ལག་བསྟར་ཞུ་རྒྱུའི་ཞལ་བཞེས་གནང་ཡོད་ཅིང་། རིམ་པ་ཁུ་ནུ་ནང་དུ་དེ་འབྲེལ་ལག་བསྟར་བྱ་རྒྱུའི་འཆར་གཞི་ཡོད་པ་མ་ཟད། ཉིན་གསུམ་གྱི་ཟབ་སྦྱོང་དབུ་འབྱེད་མཛད་སྒོའི་ཚོགས་མགོན་དུ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་དབུ་བཞུགས་གནང་བར་རྟེན་འབྲེལ་བཟང་པོ་དང་གལ་གནད་ཆེན་པོ་ཞིག་ཏུ་གྱུར་སོང་ཞེས་འགྲེལ་བརྗོད་གནང་སོང་། ཐེངས་འདིའི་ཟབ་སྦྱོང་ནང་མཁས་དབང་རྣམ་པའི་གསུང་བཤད་དང་། སེམས་མྱོང་སྟངས་འཛིན་དང་འགྲོ་བ་མིའི་བཟང་སྤྱོད་གོང་སྤེལ་གཏོང་ཐབས། སློབ་ཕྲུག་རྣམས་ཀྱི་བློ་རྩེ་གཅིག་སྒྲིམ་གྱི་ཐབས་ལམ། བྱམས་སྙིང་རྗེ་གོང་འཕེལ་གཏོང་ཐབས། འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གཏོང་ཐབས་སོགས་ཀྱི་ཐོག་ཟབ་ཁྲིད་གནང་གི་ཡོད་པ་རེད་འདུག […] The post ཁུ་ནུ་ནང་དུ་སློབ་གྲྭའི་དབུ་འཛིན་དང་དགེ་རྒན་རྣམས་ལ་སཱི་ཤེས་ཡོན་གྱི་ཟབ་སྦྱོང་འགོ་འཛུགས། appeared first on vot.

ཁ་ཉིན་ཕྱི་ཟླ་ ༦ ཚེས་ ༢༠ ཉིན་གྱི་ཕྱི་དྲོ་ཕྱག་ཚོད་ ༧ པའི་ཐོག་བཞུགས་སྒར་བོད་ཀྱི་ཟློས་གར་གྱི་ཚོགས་ཁང་དུ།  བོད་ཀྱི་སྲོལ་རྒྱུན་སྒྱུ་རྩལ་བ་ཁྱུང་བྱང་གཞུང་པ་བསོད་ནམས་བཀྲ་ཤིས་ཡོངས་གྲགས་སུ་ཨ་ཇོ་ཌེ་ནི་ལགས་ཀྱིས་བཟོ་བསྐྲུན་གནང་བའི་སྡེ་སྲིད་སངས་རྒྱས་རྒྱ་མཚོས་མཛད་པའི་མིག་ཡིད་རྣ་བའི་དགའ་སྟོན་ལས་མཆེད་པའི་མཆོད་སྤྲིན་གར་རོལ་གྱི་བྱུང་རབས་སྐོར་གྱི་དངོས་བྱུང་གློག་བརྙན་གཟིགས་འབུལ་གྱི་མཛད་སྒོ་འཚོགས་སོང་། དེ་ཡང་མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་དཔལ་ལྡན་དོན་གྲུབ་ལགས་གཙོས་པའི་བཀའ་བློན་གཞན་དང་སྤྱི་འཐུས་ཁག་གཅིག་དང་།  ཁྲིམས་ཞིབ་པ་གཞན་མ་ཟད།  ༸སྐྱབས་་རྗེ་སླེ་ལུང་རིན་པོ་ཆེ་དང་།  གཞན་ཡང་བོད་ཀྱི་ཟློས་གར་ཚོགས་པའི་འབྲེལ་ཡོད་ཁག་གཅིག་དང་མི་མང་བཅས་ཁྱོན་མི་གྲངས་བརྒྱ་སྐོར་ཙམ་ནས་མཉམ་ཞུགས་གནང་སོང་། སྐབས་དེ་དུས་འདི་གའི་གསར་འགོད་པས་བོད་ཀྱི་སྲོལ་རྒྱུན་སྒྱུ་རྩལ་བ་བསོད་ནམས་བཀྲ་ཤིས་སམ་ཨ་ཇོ་ཌེ་ནི་ལགས་སུ་བོད་ཀྱི་གར་རོལ་གྱི་བྱུང་རབས་དང་འབྲེལ་བའི་དངོས་བྱུང་གློག་བརྙན་དེའི་སྐོར་བཀའ་འདྲི་ཞུ་སྐབས་ཁོང་གིས།  ལོ་རྒྱུས་རང་བཞིན་ཅན་གྱི་དངོས་བྱུང་གློག་བརྙན་དེས་བོད་ཀྱི་སྲོལ་རྒྱུན་གྱི་གར་དེ་བཞིན་དུས་རབས་ག་དུས་བྱུང་བ་དང་།  སྡེ་པ་གཙང་པ་དང་ཧོར་སྐབས་ཀྱི་བོད་ནང་ས་གནས་མང་པོར་འཁྲབ་སྲོལ་ཡོད་པ་མ་ཟད།  ༸གོང་ས་ལྔ་པ་ཆེན་པོ་སྐབས་ནས་བཟུང་གར་དེ་ཉིད་གཞུང་འབྲེལ་མཛད་སྒོ་ཁག་ཏུ་ཕོ་བྲང་པོ་ཏཱ་ལ་དང་དམིགས་བསལ་གྱི་སྐུ་མདུན་ཆིབས་བསྒྱུར་སྐབས་སུ་འཁྲབ་སྲོལ་ཡོད་པ་སོགས། བོད་ཀྱི་ལོ་རྒྱུས་ཁྲོད་གནད་འགག་ཅན་ཞིག་ཆགས་ཡོད་དུས།  དངོས་བྱུང་གློག་བརྙན་འདི་སྤྱི་ཡོངས་ནས་གར་གྱི་རིག་གནས་མི་ཉམས་རྒྱུན་འཛིན་དང་མ་འོངས་དུས་སུ་གར་སྐོར་ཉམས་ཞིབ་གནང་མཁན་ཚོར་དཔེ་བལྟ་ས་ཞིག་ཏུ་འགྱུར་བར་རེ་བ་དང་བཅས་ཏེ་བཟོ་བསྐྲུན་གནང་བ་ཞིག་ཡིན་པ་གསུངས་སོང་།  ཁ་ཉིན་རེས་གཟའ་སྤེན་པའི་ཉིན་གྱི་མཛད་སྒོའི་ཐོག་བོད་ཀྱི་ཟློས་གར་ཚོགས་པའི་འགན་འཛིན་དོན་གྲུབ་ཚེ་རིང་ལགས་ཀྱིས།  ལྕགས་ཟམ་པ་བོད་ཀྱི་ཟློས་གར་ཚོགས་པ་གསར་འཛུགས་གནང་མཁན་ཁོངས་སུ་ཡོད་པ་སྒྱུ་རྩལ་བ་བསོད་ནམས་བཀྲ་ཤིས་ལགས་ཀྱིས་ལོ་ངོ་བཞི་བཅུ་ལྷག་རིང་བོད་ཀྱི་ཟློས་གར་སྒྱུ་རྩལ་གྱི་རིག་གནས་མི་ཉམས་རྒྱུན་འཛིན་ཐོག་མུ་མཐུད་ཕྱག་ལས་གནང་བར་ཆེ་བསྟོད་ཀྱིས་ཐུགས་རྗེ་ཆེ་ཞུས་གནང་སོང་ལ།   སྐབས་དེ་དུས་སྒྱུ་རྩལ་བ་ཁྱུང་བྱང་གཞུང་པ་བསོད་ནམས་བཀྲ་ཤིས་ལགས་ཀྱིས།  བོད་ཀྱི་ཟློས་གར་ཚོགས་པ་དེ་ཉིད་༸གོང་ས་མཆོག་གིས་ཕུགས་རྒྱང་རིང་པོའི་དགོངས་གཞི་ལས་གལ་ཆེན་དོན་ཆེན་དུ་གཟིགས་ནས་གསར་འཛུགས་གནང་བ་ཞིག་ཡིན་དུས།  གཞུང་དང་མི་དམངས་གཉིས་ཀའི་ངོས་ནས་རིག་གཞུང་ཉར་ཚགས་གནང་མཁན་གྱི་གནད་ཡོད་མི་སྣ་ཇི་ཡོད་རྣམས་ལ་མ་འཆི་གོང་དུ་བརྩི་མཐོང་དང་བདག་པོ་རྒྱག་དགོས་གལ་ཡིན་པ་གསུངས་སོང་། ཁོང་གིས་ད་དུང་ཟླ་སྔོན་མའི་ཕྱི་ཚེས་ ༢༤ ཉིན་འཇར་མཱ་ནིའི་རྒྱལ་ས་སྦར་ལིན་ནང་དུ་སྣ་མང་རིག་གཞུང་འཁྲབ་སྟོན་ཐེངས་ ༣༠ པའི་ཐོག་༸རྒྱལ་བའི་གོ་སྟོན་བྱམས་བརྩེའི་ལོ་སྲུང་བརྩིའི་ཆེད་དུ། འཇར་མཱ་ནི་བོད་རིགས་ཚོགས་པ་མཉམ་ཞུགས་དང་། བོད་ཀྱི་ཟློས་གར་ཚོགས་པས་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་གཟིགས་འབུལ་ཞུས་པ་དང་སྦྲགས། ཨང་རིམ་དང་པོ་ཐོབ་ཡོད་པར་བསྔགས་བརྗོད་ཡི་རངས་ཀྱིས་སྐབས་དེའི་དུས་ཀྱི་འཁྲབ་སྟོན་གནང་མཁན་ཚོར་མཇལ་དར་བསྒྲོན་འབུལ་ཞུས་སོང་། ལྷག་པར་དུ་མཛད་སྒོའི་ཐོགས་སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་ལགས་ཀྱིས།  ཟློས་གར་འདིའི་བརྒྱུད་ནས་ཚང་མས་གཞས་མཉམ་དུ་གཏོང་གི་ཡོད་དུས་བོད་པའི་སྐད་དེ་བཞིན་སྒྲ་དག་ཏུ་འགྲོ་ཡག་དང་སྐད་ཕྱུག་ཏུ་འགྲོ་ཡི་ཡོད་པ་བཅས་བོད་ཀྱི་སྐད་ཡིག་སྲུང་སྐྱོབ་ཀྱི་ནང་ནས་གལ་ཆེ་ཤོས་ཤིག་ཆགས་ཀྱི་ཡོད་པ་གསུངས་སོང་ལ།  བོད་ཀྱི་ཟློས་གར་ཚོགས་པ་འདི་ནས་ཐོན་པའི་ཨ་ཇོ་ཌེ་ནི་ལགས་ལྟ་བུ་སྒྱུ་རྩལ་བས་སྐུ་ཚེ་ཧྲིལ་པོར་རང་གི་རིག་གཞུང་དང་སྒྱུ་རྩལ་བློས་མ་བཏང་བར་ཉར་ཚགས་བྱེད་པར་ཆེ་བསྟོད་ཞུས་གནང་སོང་།   མ་ཟད་སྡེ་སྲིད་སངས་རྒྱས་རྒྱ་མཚོའི་མཆོད་སྤྲིན་གར་རོལ་གྱི་བྱུང་རབས་སྐོར་གྱི་དངོས་བྱུང་གློག་བརྙན་གཟིགས་འབུལ་གྲུབ་མཚམས།  བོད་ཀྱི་ཟློས་གར་ཚོགས་པ་དང་སྒྱུ་རྩལ་བ་བསོད་ནམས་བཀྲ་ཤིས་ལགས་ཟུང་འབྲེལ་གྱི་ཐོག་ནས་གཞས་སྣ་འཁྲབ་སྟོན་གྱི་ལས་རིམ་ཞིག་ཀྱང་གཟིགས་མོ་བ་རྣམས་ལ་སྤྱན་འབུལ་ཞུས་སོང་།  The post སྡེ་སྲིད་སངས་རྒྱས་རྒྱ་མཚོའི་མཆོད་སྤྲིན་གར་རོལ་གྱི་བྱུང་རབས་སྐོར་གྱི་དངོས་བྱུང་གློག་བརྙན་གཟིགས་འབུལ། appeared first on vot.

རྒྱ་ནག་གི་ཕྱི་སྲིད་བློན་ཆེན་ Wang Yi ཕྱི་ཚེས་ ༢༡ ཉིན་གྱི་མཚན་མོར་རྒྱ་གར་གྱི་རྒྱལ་ས་ལྡི་ལིར་ BRICS རྒྱལ་སྲུང་སློབ་སྟོན་པའི་ཚོགས་འདུར་མཉམ་ཞུགས་ཆེད་འབྱོར་གྱི་ཡོད་པ་དང་བསྟུན། བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་ནས་གསར་འགོད་གསལ་བསྒྲགས་ཤིག་སྤེལ་བའི་བརྒྱུད་ Wang གི་ཐེངས་འདིའི་རྒྱ་གར་ནང་གི་ཕྱོགས་བསྐྱོད་ལ་ངོ་རྒོལ་དང་། རྒྱ་གར་ངོས་ནས་བོད་ནང་གི་ཛ་དྲག་གནས་སྟངས་ཐད་རྒྱ་གཞུང་ལ་ངེས་པར་འདྲི་རྩད་གནང་དགོས་པའི་འབོད་སྐུལ་ཞུས་སོང་།  དེའང་རྒྱ་ནག་གི་ཕྱི་སྲིད་བློན་ཆེན་ Wang Yi ཟླ་བ་འདིའི་ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་ལྡི་ལི་གསར་པའི་ནང་ BRICS རྒྱལ་ཁབ་རྣམས་ཀྱི་རྒྱལ་སྲུང་སློབ་སྟོན་པའི་ཚོགས་འདུར་མཉམ་ཞུགས་བྱེད་ཀྱི་ཡོད་པ་དང་ལྷག་པར་དུ་ཚོགས་འདུའི་ཁྲོད་རྒྱ་ནག་གི་ཕྱི་སྲིད་བློན་ཆེན་ནས་རྒྱ་གར་གི་སྐུ་ཚབ་ལྷན་བོད་དང་རྒྱ་གར་གྱི་ས་མཚམས་སྐོར་གྲོས་བསྡུར་བྱེད་རྒྱུ་ཡིན་འདུག་པའི་གནས་ཚུལ་ཐོན་གསལ་ལྟར། དབུས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ལས་ཁུངས་ནང་གསར་འགོད་གསལ་བསྒྲགས་ཤིག་སྤེལ་བའི་བརྒྱུད་རྒྱ་གར་དབུས་སའི་གཞུང་ལ་ད་ལན་རྒྱ་གར་དུ་ BRICS ཚོགས་འདུ་སྐོང་ཚོགས་ཞུ་རྒྱུའི་གོ་སྐབས་བྱུང་བར་འཚམས་འདྲི་ཞུས་པ་དེ་ལྟར་ཡང་། དེའི་རྒྱལ་སྲུང་སློབ་སྟོན་པའི་ཚོགས་འདུར་རྒྱ་དམར་སྲིད་གཞུང་གི་ཕྱི་སྲིད་བློན་ཆེན་ཝང་ཡི་ཟེར་བ་ཚོགས་བཅར་བྱེད་ཀྱི་ཡོད་པར་ངོ་རྒོལ་སྐྱོན་བརྗོད་གནང་སོང་།  ལྷག་པར་དུ་བོད་ཀྱི་གཞོན་ནུ་ལྷན་ཚོགས་ནས་དམིགས་བསལ་དོ་སྣང་དང་བློ་འཚབ་བྱེད་དགོས་པ་ཞིག་ནི། དགྲ་བོ་རྒྱ་དམར་སྲིད་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་ཁྲིམས་ཡིག་དེའི་མགོ་སྐོར་འོག་རྒྱ་ནག་རང་གི་བཙན་འོག་ཏུ་གནས་པའི་མི་རིགས་ཁག་གི་མི་མང་རྣམས་ཚུད་ཉེན་ཡོད་ཅིང་། རྒྱ་དམར་སྲིད་གཞུང་གིས་མི་རིགས་མཉམ་བསྲེས་དང་སྐད་ཡིག་མཉམ་བསྲེས། མདོར་ན་མི་རིགས་ཀྱི་ངོ་བོ་རྩ་མེད་དུ་གཏོང་རྒྱུ་སོགས་ལ་བཙན་གྱིས་སྐུལ་འདེད་བྱས་ཏེ་ཡོད་ཚད་ཀྲུང་གོ་ཅན་དང་ཡང་ན་རྒྱ་ནག་ཅན་དུ་བསྒྱུར་རྒྱུར་ཁྲིམས་ཐོག་ནས་འཇིགས་སྐུལ་དང་བཙན་སྐུལ་བྱེད་བཞིན་ཡོད་ཅེས་ནན་བརྗོད་གནང་སོང་།  གསར་འགོད་ལྷན་ཚོགས་མཇུག་སྒྲིལ་མཚམས་གསར་འགོད་པས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་སུ་ཐེངས་འདིའི་ཚོགས་འདུ་བརྒྱུད་རྒྱ་དཀར་ནག་གཉིས་ལ་བརྡ་ལན་ཇི་ཡོད་བཀའ་འདྲི་ཞུས་པར། ཁོང་གིས་རྒྱ་གར་གཞུང་ངོས་ནས་ BRICS ཚོགས་འདུའི་ཐོག་བོད་ནང་གི་ཛ་དྲག་གནས་སྟངས་ཐད་རྒྱ་གཞུང་ལ་ངེས་པར་འདྲི་རྩད་བྱེད་དགོས་པའི་རེ་འདུན་དང་མཉམ་དུ་རྒྱ་གཞུང་ལ་བོད་མི་རྣམས་ཀྱིས་བོད་ཀྱི་བདེན་མཐའ་མ་གསལ་བར་དུ་ངོ་རྒོལ་སྐད་འབོད་དང་གསལ་འགོད་གསལ་བསྒྲགས་སོགས་པའི་ལས་འགུལ་སྣ་མང་མུ་མཐུད་སྤེལ་རྒྱུའི་ཆོད་སེམས་བརྟན་པོ་ཡོད་ཅེས་གསུངས་སོང་།  The post རྒྱ་ནག་གི་ཕྱི་སྲིད་བློན་ཆེན་གྱི་རྒྱ་གར་ནང་གི་ཕྱོགས་བསྐྱོད་ལ་ངོ་རྒོལ། appeared first on vot.

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་བོད་མི་གཙོས་རྒྱ་ཡི་བཙན་འོག་ཏུ་ཡོད་པའི་རྒྱལ་ཁབ་ཁག་གི་མི་རིགས་རྣམས་ནས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་ལ་སྣང་མེད་དཀྱུར་འཇོག་མ་བྱས་པར་དེར་ངོས་ལེན་མེད་པ་དང་དགག་པ་མཐའ་གཅིག་ཏུ་ཡོད་པའི་རྣམ་འགྱུར་གསལ་སྟོན་གནང་དགོས་པ་གསུངས་འདུག དེ་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ད་ཆ་ཨ་རིའི་ཝ་ཤིང་ཌོན་ཌི་སི་རུ་གཞུང་འབྲེལ་འཚམས་གཟིགས་གནང་བཞིན་ཡོད་པ་ལྟར། ཁ་སང་ཨ་རིའི་བོད་ཀྱི་སྐུ་ཚབ་དོན་ཁང་དུ་སྲིད་སྐྱོང་སྤེན་པ་ཚེ་རིང་མཆོག་ནས་རྒྱལ་སྤྱིའི་བོད་ཀྱི་གསར་འགོད་སྒྲིག་འཛུགས་ཀྱི་ཚོགས་མི་དང་ལྷན་དུ་གསར་འགོད་ལྷན་ཚོགས་ཤིག་སྐོང་འཚོགས་གནང་ཡོད་པ་དང་། སྐབས་དེར་བོད་པའི་གསར་འགོད་པ་ཟུར་པ་ཞིག་ནས་ད་ལྟའི་ཆར་ཨ་རིའི་གྲོས་ཚོགས་སུ་བོད་དོན་སྐོར་གྲོས་འཆར་གསར་པ་གཉིས་ཆེད་འདོན་གནང་ཡོད་པ་འགྲེལ་བརྗོད་དང་འབྲེལ། ཁྲིམས་འཆར་འདི་ལྟ་བུ་ཨ་རིའི་གཞུང་གིས་བཙན་བྱོལ་བོད་མིའི་སྒྲིག་འཛུགས་ལ་ངོས་ལེན་གནང་རྒྱུ་ཐག་ཉེ་པོར་འགྲོ་བའི་ལམ་ཁ་ཞིག་ལ་གཟིགས་མིན་དང་དེར་རེ་བ་ཇི་ཡོད་བཅས་ཀྱི་སྐོར་བཀའ་འདྲི་ཞུས་པར། སྲིད་སྐྱོང་མཆོག་གིས་འཛམ་གླིང་རྒྱལ་ཁབ་མང་པོའི་ནང་ནས་བོད་ཐོག་ཁྲིམས་ཡོད་པ་འདི་ཨ་རི་གཅིག་པུ་ཆགས་ཀྱི་ཡོད་པ་དང་། འདི་ཡང་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་ཆགས་ཀྱི་ཡོད་པ་དང་དེ་ནས་རིམ་པའི་ཁྲིམས་འཆར་དེར་བསྐྱར་བཅོས་ཀྱིས་ཁྲིམས་འཆར་དང་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་སོགས་གཏན་འབེབས་བྱུང་བ་མ་ཟད། ཨ་རི་གྲོས་ཚོགས་ཀྱིས་སྔོན་རྩིས་ཁྲིམས་འཆར་ནང་ཆེས་ཐོག་མར་བོད་མིའི་སྒྲིག་འཛུགས་དེ་བཞིན་བཙན་བྱོལ་བོད་གཞུང་ལ་ངོས་འཛིན་གནང་རྒྱུ་ཡིན་པའི་ཚིག་བརྗོད་འཁོད་ཡོད་པ་བཅས་ལུང་འདྲེན་གནང་བ་དང་སྦྲགས། ང་ཚོའི་ངོས་ནས་བོད་མིའི་སྒྲིག་འཛུགས་ལ་གཞུང་འབྲེལ་ངོས་འཛིན་ཐོབ་པར་ད་དུང་ལས་ཀ་བྱེད་རྒྱུ་མང་པོ་ཡོད་པའི་ཐོག་འབད་བརྩོན་གནང་མུས་ཡིན་པ་དང་ལྷག་པར་དུ་ཁྲིམས་འཆར་གསར་པ་དེ་གྲོས་ཚོགས་གོང་འོག་གཉིས་ནང་གཏན་འབེབས་ཐུབ་པར་ཚང་མས་ཧུར་བསྐྱེད་གནང་དགོས་གལ་ཡིན་པ་གསུངས་འདུག དེ་བཞིན་སྲིད་སྐྱོང་མཆོག་གིས་རྒྱ་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་གསར་པའི་མཇུག་འབྲས་ཚབས་ཆེན་སྐོར་དང་འབྲེལ། འདི་ནི་བོད་མི་རིགས་ཀྱི་ཐུན་མོང་མ་ཡིན་པའི་ཆོས་རིག་སྐད་ཡིག་བཅས་པའི་ངོ་བོ་ཡོངས་སུ་རྫོགས་པ་རྩ་མེད་གཏོང་ཐབས་ཀྱི་སྲིད་བྱུས་ངན་པ་ཞིག་ཆགས་ཀྱི་ཡོད་པ་དང་སྲིད་བྱུས་འདི་ཉིད་དངོས་སུ་ལག་བསྟར་ལོ་འགའ་ཤས་སྔོན་ནས་བོད་ནང་གི་བཅའ་སྡོད་སློབ་གྲྭ་སོགས་ཀྱི་ཆ་ཤས་འོག་ནས་བྱེད་བཞིན་ཡོད་པ་དང་། ད་རེས་བྱེད་ལས་དེ་དག་ལ་ཁྲིམས་ཐོག་ནས་ངོས་འཛིན་བྱས་པ་དང་།  ལྷག་པར་དུ་དེའི་ནང་དོན་ཚན་ ༦༣ པ་དེ་བཞིན་རྒྱལ་མཚམས་བརྒལ་བའི་གནས་སྟངས་ཆགས་ཀྱི་ཡོད་སྟབས།  ཉེ་ཆར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་གྱིས་དབུ་འབྱེད་གཏམ་བཤད་ནང་། རྒྱ་ནག་གཞུང་གིས་བོད་གཙོས་རྒྱ་ཡི་བཙན་འོག་ཏུ་ཡོད་པའི་རྒྱལ་ཁབ་ཁག་གི་ནང་མི་རིགས་དེ་དག་གི་རིག་གཞུང་དང་ངོ་བོ་རྩ་མེད་བཟོ་བའི་སྲིད་བྱུས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་མཉམ་འབྲེལ་རྒྱལ་ཚོགས་ཀྱི་ངོས་ནས་བློ་འཚབ་ཆེན་པོ་གནང་གི་ཡོད་པ་དང་སྦྲགས། རྒྱ་གཞུང་གིས་ཁྲིམས་ཡིག་དེ་ཉིད་འཕྲལ་དུ་ཕྱིར་བསྡུ་དང་མཚམས་འཇོག་དགོས་པའི་ནན་བརྗོད་གནང་ཡོད་པ་སོགས་ལུང་འདྲེན་གནང་སྟེ་བོད་མི་གཙོ་བོར་གྱུར་པའི་ཡུ་གུར་དང་སོག་པོ་སོགས་ནས་རྒྱལ་སྤྱིའི་ཐོག་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་དེར་མོས་མཐུན་མེད་པ་དང་དགག་པ་མཐའ་གཅིག་ཡོད་པའི་རྣམ་འགྱུར་གསལ་སྟོན་གནང་དགོས་པ་གསུངས་འདུག གསར་འགོད་ལྷན་ཚོགས་དེའི་ཐོག་སྲིད་སྐྱོང་མཆོག་ལ་ད་ལྟའི་ཨ་རིའི་གྲོས་ཚོགས་ནང་གི་གཞོན་སྐྱེས་མི་རབས་གསར་པའི་གྲོས་ཚོགས་འཐུས་མི་ཚོ་དང་འབྲེལ་བ་ཇི་ཙམ་གནང་ཐུབ་མིན་སྐོར་བཀའ་འདྲི་གནང་བའི་བཀའ་ལན་དུ། དེ་སྔའི་བཀའ་ཤག་དང་ད་ལྟའི་བཀའ་ཤག་ངོས་ནས་ཨ་རིའི་གྲོས་ཚོགས་ནང་གི་བགྲེས་གཞོན་འཐུས་མི་རྣམས་དང་གང་མང་འབྲེལ་བ་གཏིང་ཟབ་བྱ་རྒྱུའི་འབད་བརྩོན་ཞུས་མུས་ཡིན་པ་དང་ལྷག་པར་བོད་དོན་རྒྱུན་གནས་ཐུབ་པར་གཞོན་སྐྱེས་འཐུས་མི་གསོ་སྐྱོང་གནང་རྒྱུ་དེ་གལ་འགངས་ཆེན་པོར་རྩིས་འཞིན་ཡོད་ཅེས་གསུངས་འདུག དེའི་ཁྲོད་བཙན་བྱོལ་བོད་མིའི་མི་འབོར་ལ་གཞིགས་པའི་ཁེ་ན་ཌར་སྤྱི་འཐུས་ཀྱི་ཞབས་ཀྱག་ལོགས་སུ་དགོས་གལ་གཟིགས་མིན་ཐད་ད་ལྟའི་བཀའ་ཤག་གི་དགོངས་ཚུལ་ཇི་ཡིན་སྐོར་བཀའ་འདྲི་ཞུས་པར། སྲིད་སྐྱོང་མཆོག་གིས་ད་ལྟའི་ཆར་སྐབས་ ༡༧ པའི་བཀའ་ཤག་དང་སྤྱི་འཐུས་སྐབས་ ༡༨ པ་གསར་པ་ཕེབས་གྲུབ་མ་ཐག་ཡིན་པ་སོང་ཙང་ལམ་སེང་སྤྱི་འཐུས་ཀྱི་གྲུབ་གཞི་སོགས་ཀྱི་ཐོག་ལ་བཀའ་མོལ་ཡོང་དཀའ་བ་ཞིག་ཡིན་ནའང་། བཀའ་ཤག་གི་མ་འོངས་བོད་ཀྱི་འགན་སྲུང་ཡིག་ཆ་གཞིར་བཟུང་ལྟར་ན་ང་ཚོས་དུས་དང་གནས་བབ་ལ་དཔག་པའི་མང་གཙོའི་སྒྲོམ་གཞི་དང་སྤྱི་འཐུས་ཀྱི་གྲུབ་ཆ་དག་དངོས་ཡོད་གནས་སྟངས་དང་མཐུན་པའི་འགྱུར་བ་གང་འདྲ་དགོས་མིན་ཐད་བགྲོ་གླེང་བརྒྱུད་ཕྱག་བསྟར་དགོས་པ་འཁོད་ཡོད་ཅེས་དང་བཀའ་ཤག་གི་གཙོ་བོ་འོས་ཀྱི་ཐོབ་ཐང་འདྲ་མཉམ་གྱི་ལམ་བུར་བསྐྱོད་ཐུབ་ཚེ་རྒྱལ་སྤྱིའི་ཐོག་ནས་མང་གཙོ་ཚད་ལྡན་ཇི་ལྟར་ཡོད་མེད་འགྲེལ་བརྗོད་བྱེད་སླ་བ་དང་དེས་བོད་མིའི་སྤྱི་ཚོགས་ནང་མཐུན་ལམ་ལ་ཕན་པ་སོགས་གསུངས་འདུག རྩ་བའི་བོད་མིའི་སྒྲིག་འཛུགས་ཀྱི་སྲིད་སྐྱིང་མཆོག་ད་རེས་ཨ་རིའི་ཝ་ཤིང་ཌོན་ཌི་སི་རུ་གཞུང་འབྲེལ་འཚམས་གཟིགས་གནང་དོན་གཙོ་བོ་ནི། ཨ་རིའི་རོགས་དངུལ་བཀའ་ཁྲོལ་གཏན་འབེབས་ཡོད་པ་རྣམས་ལས་གཞི་གང་དང་གང་ལ་ཐོབ་མིན་ཐོག་གསལ་ཆ་ཡོང་ཆེད་དུ་ཡིན་པ་དང་དེའི་སླད་སྲིད་སྐྱོང་མཆོག་ནས་ཨ་རིའི་གྲོས་ཚོགས་གོང་འོག་གཉིས་ཀྱི་སྔོན་རྩིས་ཚན་པའི་ལས་བྱེད་མཐོ་གྲས་ཁག་གཅིག་དང་ཕྱི་སྲིད་ལས་ཁུངས་ཀྱི་འབྲེལ་ཡོད་ལས་བྱེད་སོགས་དང་མཇལ་མོལ་གནང་འདུག ཤེས་རྟོགས་བྱུང་བར་གཞིགས་ན།  ཟླ་བ་འདིའི་ཚེས་ ༡༥ ཉིན་ཨ་རིའི་ཝ་ཤིང་ཌོན་ཌི་སི་རུ་གཞུང་འབྲེལ་འཚམས་གཟིགས་དབུ་འཛུགས་གནང་ཡོད་པའི་ཁྲོད། ཨ་རི་སྐུ་ཚབ་དོན་ཁང་དུ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་ཀྱི་ལས་བྱེད་རྒན་པ་ཁག་གཅིག་དང་མཇལ་འཕྲད་གནང་སྟེ་བོད་ཀྱི་གནད་དོན་ཁག་སྲིད་བྱུས་དང་ཐག་གཅོད་བརྒྱུད་ནས་གོང་འཕེལ་གཏོང་ཐབས་སྐོར་གླེང་མོལ་གནང་འདུག དེ་རྗེས་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་ཀྱི་བསྟི་གནས་ཀེ་པི་ཊོལ་ཧིལ་དུ་ཡུལ་དེའི་གྲོས་ཚོགས་འོག་མའི་དགོས་དངུལ་ཆ་བགོས་ཚོགས་ཆུང་གི་ཕྱི་སྲིད་ལས་དོན་དང་། འབྲེལ་ཡོད་ལས་གཞི་བཅས་ཀྱི་ནང་གསེས་ཚོགས་ཆུང་གི་ཚོགས་གཙོ་སྐུ་ཞབས་ (Mario Diaz-Balart) ལགས་ཀྱི་ལས་བྱེད་ (Jamie McCormick) ལགས་དང་མཇལ་འཕྲད་ཀྱིས་བོད་དོན་དང་འབྲེལ་བའི་དངུལ་རྩིས་དང་། བློ་འཚབ་ཆེ་བའི་གནད་དོན། དེ་བཞིན་མ་དངུལ་གྱི་གནད་དོན་བཅས་ཀྱི་ཐོག་གྲོས་མོལ་གནང་ཡོད་པ་རེད། The post བོད་མི་གཙོས་ཡུ་གུར་དང་སོག་པོ་སོགས་ནས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་ལ་ངོས་ལེན་མེད་པའི་རྣམ་པ་དུས་དང་རྣམ་པ་ཀུན་ཏུ་བཏོན་དགོས། appeared first on vot.

བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོའི་དཀའ་ཆེན་རྒན་བློ་བཟང་ཤེས་རབ་ལགས་སུ་མཁན་ཐོག་དྲུག་པའི་ཐུགས་དམ་བཀའ་ཡིག་རིན་པོ་ཆེ་འབུལ་བཞེས་ཀྱི་མཛད་སྒོ་འཚོགས་འདུག དེ་ཡང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་བོད་ཟླ་ ༤ པ་ས་ག་ཟླ་བའི་ཚེས་པ་ ༩ སྟེ། ཕྱི་ཟླ་ ༥ ཚེས་ ༢༥ ཉིན་དགེ་བཤེས་ལྷ་རམས་པ་དཀའ་ཆེན་བློ་བཟང་ཤེས་རབ་ལགས་སུ་བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོའི་མཁན་ཐོག་དྲུག་པའི་ཐུགས་དམ་ཕྱག་རྟགས་བཀའ་ཡིག་སྩལ་དོན་ལྟར། ཟླ་བ་འདིའི་ཕྱི་ཚེས་ ༡༧ ཉིན་གྱི་སྔ་དྲོ་ཕྱག་ཚོད་ ༨ པའི་ཐོག་ཁྲིམས་བདག་དགེ་བསྐོས་དང་། དབུ་མཛད། ཕྱག་མཛོད། འགན་འཛིན་ལྷན་ཚོགས་བཅས་ལས་ཀྱི་སྣེ་མོ་བ་རྣམས་ཚང་འཛོམས་ཐོག་བླ་བྲང་དུ་ཕྱག་རྟགས་བཀའ་ཡིག་རིན་པོ་ཆེ་འབུལ་བཞེས་ཀྱི་མཛད་སྒོ་འཚོགས་འདུག་པ་དང་། མཁན་པོའི་ཁྲི་འདོན་མཛད་སྒོ་དེ་བཞིན་བོད་ཟླ་ ༦ ཚེས་ ༡༣ སྟེ། ཕྱི་ཟླ་ ༧ ཚེས་ ༢༧ ཉིན་འཚོག་རྒྱུ་ཡིན་པ་རེད་འདུག རྩ་བའི་དགེ་བཤེས་ལྷ་རམས་པ་དཀའ་ཆེན་བློ་བཟང་ཤེས་རབ་དཔལ་བཟང་པོ་ལགས་ནི། ཕྱི་ལོ་ ༡༩༦༦ ལོར་ཡབ་བཀྲ་ཤིས་ཚེ་རིང་དང་ཡུམ་ཚེ་དབང་བདེ་སྐྱིད་གཉིས་ཀྱི་སྲས་སུ་དེ་སྔོན་ཀར་དཀྱིལ་རྫོང་ཁོངས་ཡིན་པ་དང་ད་ལྟའི་ཆར་ཟངས་དཀར་རྫོང་ཡིན་པ་དེར་སྐུ་འཁྲུངས་ཤིང་། དགུང་ལོ་ཆུང་དུས་ནས་གྲྭ་པ་གནང་འདོད་ཆེན་པོ་ཡོད་པ་བཞིན། ཁོང་གི་ཐུགས་འདོད་ལྟར་དགེ་བའི་བཤེས་གཉེན་རྒན་ཚེ་རིང་དབང་རྒྱལ་ལགས་དང་ཡབ་ཡུམ་བཅས་ནས་དགུང་གྲངས་ ༡༣ སོན་པའི་སྐབས་ཟངས་དཀར་ལོ་ཙཱ་བ་འཕགས་པ་ཤེས་རབ་ཀྱིས་ཕྱག་བཏབ་མཛད་པའི་དཀར་ཆ་བྱམས་གླིང་དགོན་པར་ཆོས་ཞུགས་གནང་། ཆོས་སྡེ་ཆེན་པོ་བཀྲ་ཤིས་ལྷུན་པོའི་དཀའ་ཆེན་བློ་བཟང་བཟོད་པའི་དྲུང་ནས་དགེ་ཚུལ་གྱི་སྡོམ་པ་བཞེས། ཕྱི་ལོ་ ༡༩༨༣ ལོར་ཆོས་གྲྭ་ཆེན་པོ་བཀྲ་ཤིས་ལྷུན་པོར་སྒྲིག་ཞུགས་ཀྱིས་ཆོས་སྤྱོད་རབ་གསལ་རྒྱུགས་འབུལ་གནང་ཡོད་པ་དང་། རིམ་པས་དཀའ་ཆེན་བློ་བཟང་བཟོད་པ་དང་། སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་ཚེ་རིང་། དཀའ་ཆེན་བྱམས་པ་ཐུབ་བསྟན། དཀའ་ཆེན་བློ་བཟང་བསྟན་དར། སེར་སྨད་དགེ་བཤེས་ཐབ་བསྟན་རིན་ཆེན། དགའ་ལྡན་ཤར་རྩེ་དགེ་བཤེས་ཕུན་ཚོགས་རྒྱལ་མཚན་བཅས་དགེ་བའི་བཤེས་གཉེན་དུ་བསྟེན་ནས་གཞུང་ཆེན་བཀའ་པོད་ལྔ་ལ་གསན་བསམ་སློབ་གཉེར་མཛད་དེ་ཞོར་དུ་རྒྱུད་སྡེའི་དབང་ལུང་སོགས་ཞུས། ཕྱི་ལོ་ ༡༩༨༦ ལོར་གདན་ས་སེ་ར་ཐེག་ཆེན་གླིང་གི་གཙུག་ལག་ཁང་ཆེན་པོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་བསྙེན་རྫོགས་ཀྱི་སྡོམ་པ་མནོས། མགོན་པོ་༸གང་ཉིད་མཆོག་གིས་དབུས་པའི་སྐྱེས་ཆེན་དུ་མའི་དྲུང་ནས་དབང་ལུང་མན་ངག་དུ་མ་གསན་བསམ་མཛད། ལྷག་པར་རྒན་ངག་དབང་ཆོས་གྲགས་དང་རྒན་འཇམ་དཔལ་སོགས་ཀྱི་དྲུང་ནས་ཐུན་མོང་བའི་རིག་གནས་དང་། དཀའ་ཆེན་ལྷག་པ་རྡོ་རྗེའི་དྲུང་ནས་གསང་སྔགས་རྒྱུད་པ་གྲྭ་ཚང་གི་ཕྱག་ལེན་ལྟར་རྒྱུད་སྡེའི་ལས་བཞི་དང་། དཀྱིལ་འཁོར་བཅས་ཀྱི་ཐིག །ཕྱག་རྒྱ། […] The post དཀའ་ཆེན་རྒན་བློ་བཟང་ཤེས་རབ་ལགས་སུ་བཀྲ་ཤིས་ལྷུན་པོའི་མཁན་པོར་ཐུགས་དམ་བཀའ་ཡིག་འབུལ་བཞེས་ཀྱི་མཛད་སྒོ་འཚོགས་པ། appeared first on vot.

ཁ་ཉིན་དབྱིན་ཡུལ་གྲོས་ཚོགས་འོག་མའི་ནང་ཡུལ་དེའི་ཕྱི་སྲིད་དྲུང་ཆེ་ལས་རོགས་མཆོག་ལ་བོད་དོན་དང་བོད་ཀྱི་ཁོར་ཡུག་གནད་དོན་ཐོག་འདྲི་རྩད་ནན་པོ་གནང་འདུག   དེ་ཡང་ཁ་ཉིན་ཕྱི་ཚེས་ ༡༦ ཉིན་རྒྱབ་དབྱིན་ཡུལ་གྲོས་ཚོགས་འཐུས་མི་གཉིས་ཀྱིས་ཡུལ་དེའི་ཕྱི་སྲིད་དྲུང་ཆེ་ལས་རོགས་མཆོག་ལ་བོད་དོན་དང་བོད་ཀྱི་ཁོར་ཡུག་གནས་སྟངས་སྤྱིའི་ཐོག་སེམས་འཚབ་དང་འབྲེལ་འདྲི་རྩད་རིམ་པ་གནང་ཡོད་པའི་ཁྲོད། དབྱིན་ཡུལ་གྱི་གྲོས་ཚོགས་འཐུས་མི་དང་བློན་ཆེན་ཟུར་པ་ Kerry McCarthy ལགས་ཀྱིས་བོད་ནང་རྒྱ་ནག་གི་གཏེར་ཁ་སྔོག་འདོན་དང་ཆུ་མཛོད་གསར་རྒྱག་གྱི་ལས་གཞི་ཁག་དང་གནམ་གཤིས་འགྱུར་ལྡོག་དབང་གིས་རྒྱལ་ཁབ་མང་པོར་ཤུགས་རྐྱེན་ཐེབས་སྲིད་པ་འགྲེལ་བརྗོད་ཀྱིས། དབྱིན་ཇི་རྒྱལ་ཁབ་ཀྱིས་རྒྱལ་སྤྱིའི་ཐོག་གནད་དོན་འདི་དག་གང་འདྲ་བྱས་ནས་གླེང་སློང་བྱེད་ཐུབ་མིན་དང་ལྷག་པར་དུ་ས་གནས་བོད་མི་རྣམས་འཛུགས་སྐྲུན་ལས་གཞིའི་གྲོས་མོལ་ནང་མཉམ་ཞུགས་བྱེད་དགོས་པར་ཕྱི་སྲིད་དྲུང་ཆེས་མོས་མཐུན་གནང་གི་ཡོད་མེད་སྐོར་འདྲི་རྩད་གནང་འདུག སྐབས་དེར་ཕྱི་སྲིད་དྲུང་ཆེས་དབྱིན་ཇི་རྒྱལ་ཁབ་ཀྱིས་རྒྱ་ནག་དང་མཉམ་དུ་གནམ་གཤིས་དང་ཁོར་ཡུག་གི་གནད་དོན་ཐད་མུ་མཐུད་གྲོས་བསྡུར་བྱེད་མུས་ཡིན་ཞེས་དང་། ཉེ་ཆར་རྒྱལ་ཁབ་གཉིས་ཀྱི་ཁོར་ཡུག་གྲོས་མོལ་སྐབས་རང་བྱུང་ཁོར་ཡུག་དང་སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པར་མཉམ་ལས་བྱེད་རྒྱུའི་གྲོས་མཐུན་བྱུང་ཡོད་པའི་ལན་འདེབས་བསྐྱོན་འདུག མ་ཟད་འདྲི་རྩད་ཀྱི་ལས་རིམ་དེའི་ཐོག་དབྱིན་ཡུལ་གྲོས་ཚོགས་འཐུས་མི་དང་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་མི་ Ms. Wera Wobhouse ལགས་ཀྱིས་ཀྱང་ཁོང་གཙོས་དབྱིན་ཡུལ་གྲོས་ཚོགས་འཐུས་མི་ཁག་གཅིག་ཉེ་ཆར་བོད་མིའི་སྒྲིག་འཛུགས་ཀྱི་ལྟེ་གནས་བཞུགས་སྒར་རྡ་རམ་ས་ལར་གཞུང་འབྲེལ་གྱི་སྐུ་མགྲོན་ཐོག་ནས་བཅར་རྒྱུ་བྱུང་བའི་མྱོང་བ་འགྲེལ་བརྗོད་དང་འབྲེལ། སྒྲིག་འཛུགས་འདིའི་ངོས་ནས་བོད་ནི་ཕྱི་ཕྱོགས་ཀྱི་མི་སྣ་དང་གནས་ཚུལ་འགྲོ་འོང་ལ་ཕྱོགས་ཡོངས་ནས་བཀག་སྡོམ་བྱས་ཡོད་པར་བློ་འཚབ་གནང་གི་ཡོད་པ་དང་ཕྱི་གསལ་ནང་གསལ་མེད་པའི་གནས་སྟངས་འདིའི་རྐྱེན་གྱིས་བོད་ནང་ཁོར་ཡུག་གི་གནོད་འཚེ་ཚབས་ཆེ་ཐེབས་ཐུབ་པ་དང་དེས་འཛམ་གླིང་ཡོངས་ལའང་ཤུགས་རྐྱེན་ཐེབས་པའི་སྐོར་ལ་ཕྱི་སྲིད་དྲུང་ཆེ་མཆོག་ལ་དོ་སྣང་ཡོད་དམ་ཞེས་བཀའ་འདྲི་གནང་བར། ཁོང་གིས་ལྕམ་སྐུ་ཉིད་ཀྱིས་གནད་དོན་གལ་ཆེན་འདི་བཏོན་པར་ཐུགས་རྗེ་ཆེ་ཞུས་པ་དང་། བོད་ནང་ཁོར་ཡུག་གི་ལས་གཞི་ཆེན་པོ་དག་གི་རྐྱེན་པས་བོད་མི་རྣམས་བཙན་གྱིས་རང་གི་ཕ་མེས་ཀྱི་གྲོང་གསེབ་ནས་གཞན་དུ་གནས་སྤོ་བྱེད་དགོས་པའི་གནས་ཚུལ་ཐོན་པར་ཕྱི་སྲིད་ལས་ཁུངས་ངོས་ནས་བློ་འཚབ་བྱེད་བཞིན་ཡོད་ལ། བློ་འཚབ་ཀྱི་གནད་དོན་འདི་དག་ཐོག་ཁོང་ཚོས་མུ་མཐུད་དོ་སྣང་བྱེད་རྒྱུ་གལ་ཆེན་པོ་ཡིན་ཞེས་གསུངས་འདུག དེའི་ཁྲོད་ཁ་སང་དབྱིན་ཡུལ་གྲོས་ཚོགས་སུ་བོད་མི་དང་བོད་དོན་རྒྱབ་སྐྱོར་བ་མི་གྲངས་ ༢༦ ལས་གྲུབ་པའི་སྐུ་ཚབ་ཚོགས་ཆུང་ཞིག་གིས་གྲོས་ཚོགས་འཐུས་མི་དགུ་ལ་ངོ་བཅར་གྱིས་བོད་དོན་ཞུ་གཏུག་གི་ལས་འགུལ་སྤེལ་འདུག ཞུ་གཏུག་ལས་འགུལ་དེ་བཞིན་དབྱིན་ཡུལ་དང་བླངས་བོད་དོན་ཞུ་གཏུག་ཚོགས་པས་གོ་སྒྲིག་དང་དབྱིན་ཡུལ་རྒྱལ་ཡོངས་འབྲེལ་མཐུད་ལས་ཁང་གི་སྣེ་ཁྲིད་འོག་སྤེལ་འདུག་ཅིང་། དེར་དབྱིན་ཡུལ་སྐུ་ཚབ་དོན་ཁང་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་། བོད་དོན་ལས་འགུལ་ལྟེ་གནས་ཁང་། དབྱིན་ཡུལ་བོད་དོན་རྒྱབ་སྐྱོར་དང་ས་གནས་ཀྱི་བོད་རང་བཙན་སློབ་ཕྲུག་ཚོགས་པ་གཙོས་དབྱིན་ཡུལ་གྱི་བོད་མི་ཚོགས་པ་བཅས་ཀྱིས་རྒྱབ་སྐྱོར་གནང་ཐོག་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ལྷན་ཞུགས་གནང་འདུག   དེའི་སྐོར་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་སུ་ཞལ་པར་བརྒྱུད་བཀའ་འདྲི་ཞུས་ཡོད།  ཁ་སང་ལས་འགུལ་གྱི་ཆ་ཤས་སུ། མཉམ་ཞུགས་པ་རྣམས་ཀྱིས་དབྱིན་ཡུལ་གྲོས་ཚོགས་འཐུས་མི་ཁག་བདུན་ཙམ་དང་ཐུག་འཕྲད་གནང་སྟེ། རྒྱ་ནག་གཞུང་གིས་གསར་དུ་གཏན་འབེབས་བྱས་པའི་མི་རིགས་མཐུན་སྒྲིལ་ཡར་རྒྱས་ལ་སྐུལ་འདེད་གཏོང་བའི་ཁྲིམས་ཡིག་ལ་ངོ་རྒོལ་བྱས་ཏེ་དེས་བོད་མིའི་ངོ་བོ་དང་རིག་གཞུང་། སྐད་དང་ཆོས་དད་བཅས་ལ་གནོད་སྐྱོན་ཚབས་ཆེན་གཏོང་གི་ཡོད་པས་ཕྱིར་འཐེན་དགོས་པ་དང་། བོད་ནང་གི་བཅའ་སྡོད་སློབ་གྲྭ་ཁག་གིས་བོད་པའི་བྱིས་པ་རྣམས་རང་གི་རིག་གཞུང་དང་སྐད་ཡིག་ལས་ཁ་བྲལ་དུ་འཇུག་པ་དང་བྱིས་པའི་ཐོབ་ཐང་དང་འགལ་གྱི་ཡོད་པའི་གནས་ཚུལ་སྐོར་གྲོས་ཚོགས་ནང་དྲི་བ་འདོན་དགོས་པ། ལྷག་པར་དུ་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཡང་སྲིད་ངོས་འཛིན་བྱེད་རྒྱུའི་ཐོབ་ཐང་ལ་རྒྱབ་སྐྱོར་གནང་བ་དང་། རྒྱ་ནག་གཞུང་གིས་བརྒྱུད་རིམ་འདིའི་ནང་ཐེ་བྱུས་བྱེད་རྒྱུར་ངོ་རྒོལ་བྱེད་དགོས་པའི་འབོད་སྐུལ་དོན་ཚན་གསུམ་ཆེད་འདོན་གནང་འདུག ཐེངས་འདིའི་བོད་དོན་ཞུ་གཏུག་ཁྲོད་མཉམ་ཞུགས་བ་ཚོས་གྲོས་ཚོགས་འཐུས་མི་ Vicky Foxcroft ལགས་དང་ Laura Kyrke-Smith  ལགས། James Cleverly ལགས། དེ་བཞིན་ Stella Creasy ལ་སོགས་གྲོས་ཚོགས་འཐུས་མི་ཁག་གཅིག་དང་ཐུག་འཕྲད་གནང་བ་མ་ཟད། བོད་ཀྱི་སྐོར་ལ་གྲོས་བསྡུར་གནང་ཐུབ་པ་བྱུང་འདུག དབྱིན་ཡུལ་གྲོས་ཚོགས་འཐུས་མི་རྣམས་དང་ཐུག་འཕྲད་གནང་རྗེས་མཉམ་ཞུགས་པ་རྣམས་ནས་ཡུལ་དེའི་གྲོས་ཚོགས་ཀྱི་ Portcullis House ཚོགས་ཁང་དུ་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ […] The post དབྱིན་ཡུལ་གྲོས་ཚོགས་ནང་བོད་དོན་དང་བོད་ཀྱི་ཁོར་ཡུག་གནད་དོན་ཐོག་འདྲི་རྩད། appeared first on vot.

སྒྲུབ་བརྒྱུད་བསྟན་པའི་མངའ་བདག་༸དཔལ་རྒྱལ་བའི་དབང་པོ་སངས་རྒྱས་ཀརྨ་པ་ཨོ་རྒྱན་འགྲོ་འདུལ་ཕྲིན་ལ་དབང་གི་རྡོ་རྗེ་མཆོག་བོད་ལུགས་ལྟར་དགུང་གྲངས་ ༤༢ དང་ཕྱི་ལུགས་ལྟར་དགུང་གྲངས་ ༤༡ ལ་ཕེབས་པའི་སྐུའི་འཁྲུངས་སྐར་ཉིན་གང་ཉིད་ཀྱི་གདན་ས་རུམ་བཏེག་དང་བཞུགས་སྟོད་གྲྭ་ཚང་གཙོས་པའི་ཕྱི་ནང་གི་དད་ལྡན་རྣམ་པས་རིན་པོ་ཆེ་མཆོག་གི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་རེད། དེ་ཡང་བོད་ཟླ་ ༥ ཚེས་ ༡ སྟེ། ཕྱི་ཟླ་ ༦ ཕྱི་ཚེས་ ༡༦ ཉིན་འབྲས་ལྗོངས་ནང་དུ་རྟེན་གཞིས་བྱས་པའི་༸དཔལ་རྒྱལ་དབང་ཀརྨ་པ་གང་ཉིད་ཀྱི་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་དབུ་བཞུགས་ཐོག སྐུ་མགྲོན་གཙོ་བོར་འབྲས་ལྗོངས་མངའ་སྡེ་གཞུང་གི་སྤྱི་ཁྱབ་བློན་ཆེན་ Prem Singh Tamang པྲེམ་སིང་རྟ་མང་མཆོག་དང་དབུས་པའི་མངའ་སྡེ་གཞུང་གི་དགོན་གནས་བློན་ཆེན་བསོད་ནམས་བླ་མ་ལགས། མངའ་སྡེའི་གནད་ཡོད་སྐུ་མགྲོན་གཞན་ཁག་གཅིག་དང་སེར་སྐྱ་མང་ཚོགས་བཅས་ལྷན་ཞུགས་ཐོག་སྐུའི་འཁྲུངས་སྐར་སྲུང་བརྩི་ཞུས་འདུག མཛད་སྒོའི་ཐོག་༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་དང་སྤྱི་ཁྱབ་བློན་ཆེན་མཆོག་ནས་༸རྒྱལ་དབང་མཆོག་གི་བཞུགས་ཁྲིར་མཎྜལ་རྟེན་གསུམ་འདེགས་འབུལ་ཞུས་ཡོད་པ་དང་འབྲེལ། ༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་གིས་བཀའ་སློབ་གསུང་བཤད་ཁྲོད། ༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་ལ་སྐུའི་འཁྲུངས་སྐར་གྱི་འཚམས་འདྲི་ཞུས་པ་དང་འབྲེལ། སྐུ་ཚེ་ཞབས་པད་བརྟན་པ་དང་ཐུགས་བཞེད་ལྷུན་གྱིས་གྲུབ་པ་མ་ཟད། མྱུར་དུ་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་ཞབས་སོར་འཁོད་ཐུབ་པའི་ཐུགས་སྨོན་ཞུས་འདུག མངའ་སྡེའི་སྤྱི་ཁྱབ་བློན་ཆེན་མཆོག་གིས་༸རྒྱལ་དབང་མཆོག་གི་འཁྲུངས་སྐར་དང་བསྟུན་ནས་དྲ་ཐོག་ཏུ། ད་རེས་འཁྲུངས་སྐར་ཉིན་གང་ཉིད་ཀྱི་གདན་ས་རུམ་བཏེག་ཏུ་༸སྐྱབས་རྗེ་རྒྱལ་ཚབ་དྲུང་གོོ་ཤྲི་སྐུ་ཕྲེང་ ༡༢ པ་དབུ་བཞུགས་ཐོག་བཅར་རྒྱུ་བྱུང་བ་དགའ་ཚོར་དང་བསོད་ནམས་ཆེན་པོ་བྱུང་ཞེས་གསུངས་བ་དང་འབྲེལ། སྐྱེས་འགྲོ་སྤྱིའི་བདེ་ཐབས་དང་འཛམ་གླིང་ཞི་བདེའི་ཆེད་དུ་༸རྒྱལ་དབང་མཆོག་སྐུ་ཚེ་ཞབས་པད་བརྟན་པ་དང་། སྐུའི་འཕྲོད་བཞེས་བཟང་པོ་ཡོང་བ། དེ་བཞིན་ཆོས་ཕྱོགས་ཀྱི་མཛད་པ་རྒྱུན་མཐུད་འགེགས་མེད་ཡོང་བའི་སྨོན་འདུན་ཞུས་འདུག མཛད་སྒོའི་ཐོག་གཞན་ཡང་འབྲས་ལྗོངས་མངའ་སྡེ་དགོས་གནས་དྲུང་ཆེ་ཟུར་པ་ཚེ་མཆོག་གླིང་རིན་པོ་ཆེ་མཆོག་དང་། མངའ་སྡེའི་ཆེས་མཐོའི་ཁྲིམས་དཔོན་ཟུར་པ་བསོད་ནམས་ཕུན་ཚོགས་ལགས་བཅས་ཀྱང་ཕེབས་ཡོད་ཅིང་། ཉིན་རྒྱབ་སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་འབྲེལ་ནས་དད་ལྡན་མང་ཚོགས་རྣམ་པས་རིག་གཞུང་འཁྲབ་སྟོན་སོགས་ཀྱི་མཛད་རིམ་ཁག་གཅིག་གཉེར་ཡོད་པ་རེད་འདུག ཕྱོགས་མཚུངས་ཁ་སང་བཞུགས་སྒར་གྱི་ཉེ་འདབས་སུ་རྟེན་གཞིས་བྱས་པའི་སྟོད་རྒྱུད་གྲྭ་ཚང་དུ་མཁན་བླ་འདུས་སྤྱི་ཡོངས་ནས་༸དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་གིས་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་མ་ཟད། དད་ལྡན་དང་དགོན་སྡེ་ཁག་འདྲ་མིན་ནང་གང་ཉིད་ཀྱི་འཁྲུངས་སྐར་སྲུང་བརྩི་ཞུས་ཡོད་པ་རེད། འབྲས་ལྗོངས་ནང་དུ་རྟེན་གཞིས་བྱས་པའི་གདན་ས་རུམ་བཏེག་དགོན་པའི་བཤད་གྲྭའི་མཁན་པོ་སྐལ་བཟང་ཉི་མ་ལགས་སུ་བཀའ་འདྲི་ཞུས་པར་ཁོང་གིས། འབྲས་ལྗོངས་དབུས་གཞུང་ནས་རྒྱ་གར་དབུས་གཞུང་དང་ལྷན་དུ་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་རྒྱ་གར་ནང་དུ་གདན་འདྲེན་ཞུ་རྒྱུ་ཐད་བཀའ་མོལ་གནང་དང་གནང་བཞིན་ཡོད་པ་མ་ཟད། ས་གནས་མང་ཚོགས་དང་གང་ཉིད་ལ་དད་དམ་ཡོད་མཁན་རྣམ་པས་དེ་མཚུངས་ཀྱི་རེ་བ་ཆེན་པོ་གནང་བཞིན་ཡོད་སྟབས། མྱུར་དུ་རྒྱ་གར་དུ་ཞབས་སོར་འཁོད་པའི་རེ་བ་ཞུ་བཞིན་ཡོད་བཅས་འགྲེལ་བརྗོད་གནང་སོང་། གཞི་རྩའི་༸རྒྱལ་དབང་མཆོག་གི་སྐུའི་འཁྲུངས་སྐར་དང་འབྲེལ་ནས་དཔལ་ཀརྨ་པའི་སྤྱི་ལས་ཁང་ནས་ཕྱི་ལོ་ ༢༠༢༢ ཟླ་ ༥ ཚེས་ ༡༦ ཉིན་གསལ་བསྒྲགས་སྤེལ་དོན་ལྟར། ༸རྒྱལ་དབང་མཆོག་གི་གཞུང་འབྲེལ་འཁྲུངས་སྐར་དུས་ཆེན་བྱེས་སུ་དེ་སྔ་ཕན་ཆད་སྤྱི་ཟླ་ ༦ ཚེས་ ༢༦ ཉིན་སྲུང་བརྩི་ཞུ་སྲོལ་ཡོད་ཀྱང་། འཁྲུངས་ཚེས་འཁྲུལ་མེད་དེ་བོད་ཟླ་ […] The post ༸དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་བོད་ལུགས་ལྟར་དགུང་གྲངས་ ༤༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི། appeared first on vot.

སུད་སི་གྲོང་ཁྱེར་ཇི་ནི་ཝའི་ནང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་དབུ་འཛུགས་དང་བསྟུན། སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་གོ་སྒྲོག་འོག་རྒྱལ་ཚོགས་ཀྱི་མདུན་དུ་བོད་མི་རྣམས་ནས་ཞི་བའི་སྐད་འབོད་དང་བོད་དོན་ཞུ་གཏུག་གི་ལས་འགུལ་སྤེལ་འདུག ཁ་སང་སུད་སིའི་གྲོང་ཁྱེར་ཇི་ནི་ཝའི་ནང་དུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་དབུ་འཛུགས་གནང་ཡོད་པ་དང་། སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་ངེས་སྟོན་རྒྱ་མཚོ་ལགས་ཀྱིས་གཙོས་འབྲེལ་ཡོད་ལས་བྱེད་དང་། ས་གནས་བུད་མེད་ལྷན་ཚོགས། སུད་བོད་མཛའ་འབྲེལ་ཚོགས་པ། ཡུ་རོབ་བོད་ཀྱི་གཞོན་ནུ་མཐུན་ཚོགས། དེ་བཞིན་གྲངས་ཉུང་མི་རིགས་ཁག་གི་སྐུ་ཚབ་དང་རྒྱ་རིགས་ཡེ་ཤུ་ཆོས་ལུགས་ཀྱི་ཚོགས་པ་དང་བོད་མི་སོགས་རྒྱལ་ཚོགས་ཀྱི་མདུན་ཐང་དུ་ལྷན་འཛོམས་གནང་ཐོག་གསར་འགོད་བསྒྲགས་གཏམ་དང་ཞུ་ཡིག་ཅིག་ཕུལ་བའི་བརྒྱུད་རྒྱལ་ཚོགས་ལ་བོད་ཀྱི་གནད་དོན་ཐོག་འགན་འཁུར་ཆེ་ཙམ་བཞེས་དགོས་པ་དང་། བོད་ནང་རྒྱ་ནག་དམར་གཞུང་གིས་འགྲོ་བ་མིའི་ཐོབ་ཐང་བརྡལ་བཤིག་གཏོང་བཞིན་པར་མཚམས་འཇོག་དགོས་པས་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོས་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཁག་ཅིག་ཐེར་འདོན་དང་སྦྲགས། ང་ཚོས་བཙན་བྱོལ་ནང་ལས་འགུལ་མུ་མཐུད་སྤེལ་ཏེ། རྒྱ་གཞུང་ལ་གདོང་ལེན་བྱ་རྒྱུ་གལ་ཆེན་པོ་ཡིན་པ་སོགས་གསུངས་པ་མ་ཟད། ད་རེས་ཀྱི་ལས་འགུལ་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་དབུ་འཛུགས་དང་བསྟུན། རྒྱལ་ཚོགས་ལ་ད་ལྟའི་བོད་ནང་གི་ཛ་དྲག་གནས་སྟངས་དང་འབྲེལ། ངེས་པར་དུ་དགོངས་པ་བཞེས་དགོས་པའི་དོན་ཚན་ཁག་ཅིག་འཁོད་པའི་ཞུ་གཏུག་ཡི་གེ་ཞིག་ཀྱང་ཕུལ་ཡོད་པ་སོགས་གསུངས་འདུག ཁ་སང་སུད་སིའི་གྲོང་ཁྱེར་ཇི་ནི་ཝའི་ནང་དུ་དབུ་འཛུགས་གནང་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་འདི་བཞིན་ཟླ་བ་རྗེས་མའི་ཕྱི་ཚེས་ ༧ བར་འཚོག་གནང་གི་ཡོད་ཅིང་། ད་རེས་ཀྱི་ལྷན་ཚོགས་དེ་དང་བསྟུན་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་མཆོག་ལ་བོད་དོན་ཞུ་སྙན་ཞིག་ཕུལ་འདུག་པ་མ་ཟད།  གཞན་ཡང་སྐབས་དེར་ལས་འགུལ་ཐོག་ཕེབས་པའི་སུད་སི་ས་གནས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་དང་། སུད་བོད་མཛའ་འབྲེལ་ཚོགས་པའི་སྐུ་ཚབ་སོགས་ནས་ཀྱང་རྒྱ་ནག་གཞུང་གི་དམ་བསྒྲགས་སྲིད་བྱུས་འོག་བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པ་དང་། བོད་པའི་བྱིས་པ་རྣམས་བཙན་དབང་གིས་རང་ཉིད་ཕ་མ་ནང་མི་དང་ཁ་བྲལ་བཏང་སྟེ། རྒྱ་གཞུང་གིས་ཆེད་འཛུགས་བྱས་པའི་གཏན་འཇགས་བཅའ་སྡོད་སློབ་གྲྭར་གཏོང་བཞིན་པ་སོགས་གསལ་འདོན་གྱིས། རྒྱལ་ཚོགས་དང་རྒྱལ་སྤྱིའི་འགོ་ཁྲིད་རྣམས་ནས་བོད་ནང་གི་གནད་དོན་ཐོག་དགོངས་པ་བཞེས་ཏེ་རྒྱ་གཞུང་དེ་བཞིན་འགན་ཁུར་ལྡན་པ་ཞིག་བཟོ་དགོས་པ་གསུངས་འདུག ད་རེས་ཇི་ནི་ཝ་ནང་འཚོག་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པའི་ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་སྐུ་ཞབས་ Volker Turk ལགས་ཀྱིས་གནང་བའི་དབུ་འབྱེད་ཀྱི་གཏམ་བཤད་ནང་། ཉེ་ཆར་རྒྱ་ནག་གཞུང་གིས་བོད་གཙོས་རྒྱ་ཡི་བཙན་འོག་ཏུ་ཡོད་པའི་རྒྱལ་ཁབ་ཁག་གི་ནང་མི་རིགས་དེ་དག་གི་རིག་གཞུང་དང་ངོ་བོ་རྩ་མེད་བཟོ་བའི་སྲིད་བྱུས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་མཉམ་འབྲེལ་རྒྱལ་ཚོགས་ཀྱི་ངོས་ནས་བློ་འཚབ་ཆེན་པོ་གནང་གི་ཡོད་པ་དང་སྦྲགས་རྒྱ་གཞུང་གིས་ཁྲིམས་ཡིག་དེ་ཉིད་འཕྲལ་དུ་ཕྱིར་བསྡུ་དང་མཚམས་འཇོག་དགོས་པའི་ནན་བརྗོད་གནང་ཡོད་པ་རེད།  The post རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དབུ་འཛུགས་དང་བསྟུན་བོད་མིས་ཞི་བའི་སྐད་འབོད་གནང་བ། appeared first on vot.

དེ་རིང་ཕྱི་ལོ་ ༢༠༢༦ ཟླ་ ༦ ཚེས་ ༡༦ ཉིན་བོད་ཀྱི་བསྟན་སྲུང་དྭང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༦༨ འཁོར་བའི་དུས་དྲན་སྲུང་བརྩི་དང་བསྟུན། མི་རབས་གཞོན་པ་རྣམས་ལ་བོད་ཀྱི་ཆོས་དང་རིག་གཞུང་གི་གོ་རྟོགས་གོང་འཕེལ་ཡོང་ཐབས་དང་འབྲེལ། ས་གནས་སོ་སོ་ནས་བོད་ཀྱི་ཆབ་སྲིད་དང་འབྲེལ་བའི་ལས་འགུལ་གང་མང་སྤེལ་དགོས་པའི་འབོད་སྐུལ་ཞུས་སོང་། དེ་ཡང་དེ་རིང་སྔ་དྲོའི་ཆུ་ཚོད་ ༡༡ ཙམ་ལ་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་ཆུ་བཞི་སྒང་དྲུག་དཔའ་བོའི་རྗེས་དྲན་གྱི་ཚོགས་ཁང་ནང་དུས་དྲན་དེ་ཉིད་སྲུང་བརྩི་འགོ་འཛུགས་གནང་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་རྒྱ་གར་གྱི་དམག་དཔོན་ཟུར་པ་ Lt Gen V K Chaturvedi མཆོག་གིས་དབུས་པའི་དམིགས་བསལ་སྐུ་མགྲོན་ལྡི་ལི་སྐུ་ཚབ་དོན་གཅོད་ཀྱི་དྲུང་ཆེ་བཀྲ་ཤིས་བདེ་སྐྱིད་ལགས། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་ཨ་ཅརྱ་ཡེ་ཤེས་ཕུན་ཚོགས་ལགས།  སྤྱི་འཐུས་དཀོན་མཆོག་རིན་ཆེན་ལགས།   རྒྱ་གར་གསར་འགོད་པ་དང་བོད་རིག་པའི་མཁས་པ་ Vijay Kranti ལགས། བོད་སྒར་བསམ་ཡས་གླིང་གི་གཞུང་འབྲེལ་དང་།  གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་སོགས་ཆེད་ཕེབས་གནང་འདུག དབུ་འབྱེད་ཀྱི་མཛད་སྒོའི་ཐོག་མདོ་ཁམས་ཆུ་བཞི་སྒང་དྲུག་གི་དབུས་སྤྱི་ཁྱབ་དྲུང་ཆེ་ཀརྨ་བསམ་གྲུབ་ལགས་ཀྱིས་དབུས་སྤྱི་ཁྱབ་ལས་ཁུངས་ཀྱི་ཡོངས་ཁྱབ་གསུང་འཕྲིན་སྒྲོགས་སྦྱང་གནང་བའི་ནང་། དེ་སྔོན་ཕྱི་ལོ་ ༡༩༥༨ ཟླ་ ༦ ཚེས་ ༡༦ ཉིན་བོད་ལྷོ་ཁ་ལྕགས་ཚ་གྲི་གུ་ཐང་དུ་རྒྱལ་གཅེས་དཔའ་བོ་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གི་དབུ་ཁྲིད་འོག་སྒྲིག་འཛུགས་དེ་ཉིད་འགོ་འཛུགས་གནང་བའི་རྒྱབ་ལྗོངས་ལོ་རྒྱུས་ངོ་སྤྲོད་དང་འབྲེལ།   རྒྱ་དམར་གཞུང་གི་བོད་ས་ཡོངས་རྫོགས་བཙན་བཟུང་གིས་སྤྱི་ནོར་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་བཙན་བྱོལ་དུ་ཕེབས་དགོས་བྱུང་སྐབས་སྐུའི་ཉེན་སྲུང་གི་ཞབས་འདེགས་རླབས་ཆེན་བསྒྲུབས་པ་མ་ཟད།  སྒྲིག་འཛུགས་དེའི་མི་རབས་རྒན་པ་ཚོས་བོད་བསྟན་སྲིད་མི་རིགས་ཀྱི་ཆེད་དུ་སྙིང་སྟོབས་ལ་ཞུམ་པ་མེད་པར་རྒྱལ་ཁབ་སླར་གསོའི་ཆེད་རྒྱ་དམར་ལ་ཕར་རྒོལ་བྱས་པ་སོགས་ཀྱི་རྗེས་དྲན་ཞུས་སོང་། དེ་བཞིན་གཉན་འཕྲང་གི་ད་ལྟའི་དུས་སྐབས་འདིར་བོད་མི་ཡོངས་ནས་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་བློས་བཏང་གནང་མཁན་གྱི་དཔའ་བོ་དཔའ་མོ་རྣམས་སྙིང་དབུས་སུ་བཅངས་ཏེ།  ཆོལ་གསུམ་བོད་མི་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་ལྟར་ནང་ཁུལ་རྡོག་རྩ་གཅིག་སྒྲིལ་གནང་དགོས་པ་གསུངས་སོང་། ལྷག་པར་མི་རབས་གཞོན་པ་རྣམས་ལ་བོད་ཀྱི་ཆོས་དང་རིག་གཞུང་གི་གོ་རྟོགས་གོང་འཕེལ་ཡོང་ཐབས་དང་། བོད་རྒྱལ་ཁབ་ཀྱི་བདག་དབང་སླར་གསོའི་ནུས་སྟོབས་དང་སེམས་ཤུགས་ཆེར་བསྐྱེད་ཡོང་བའི་སྤོབས་པ་བསྐྲུན་རྒྱུས་གཙོས་སྐབས་བསྟུན་གྱི་འགན་ཁུར་ལྷུར་ལེན་བྱ་རྒྱུ། དེ་བཞིན་ས་གནས་སོ་སོ་ནས་བོད་ཀྱི་ཆབ་སྲིད་དང་འབྲེལ་བའི་ལས་འགུལ་གང་མང་སྤེལ་གནང་ཡོང་བའི་འབོད་སྐུལ་སོགས་ཞུས་སོང་། སྐུ་མགྲོན་གཙོ་བོ་རྒྱ་གར་གྱི་དམག་དཔོན་ཟུར་པ་ Lt Gen V K Chaturvedi མཆོག་ནས་སྐབས་དེར།  བོད་དང་རྒྱ་གར་གཉིས་བར་ལོ་རྒྱུས་ཀྱི་ཐོག་ནས་འབྲེལ་ལམ་ཡོད་པའི་སྐོར་གསུངས་ཏེ།  བོད་དང་རྒྱ་གར་གཉིས་ལ་མི་རིགས་ཀྱི་ལོ་རྒྱུས་དང་།  གཞན་ལ་ངོམས་སུ་ཆོགས་པའི་ཆོས་དང་རིག་གཞུང་།  སྐད་ཡིག་བཅས་ཡོད་པའི་གདེང་སྤོབས་ངེས་པར་དུ་དགོས་པ་དང་།   […] The post མདོ་ཁམས་ཆུ་བཞི་སྒང་དྲུག་བསྟན་སྲུང་དྭང་བླངས་དམག་གི་སྒྲིག་འཛུགས་དབུ་བརྙེས་ཏེ་ལོ་ ༦༨ འཁོར་བའི་དུས་དྲན་སྲུང་བརྩི། appeared first on vot.

དེ་རིང་ཕྱི་ཟླ་ ༦ ཚེས་ ༡༢ ཉིན་གྱི་སྔ་དྲོ་ཚོུད་ ༡༠།༣༠ ཐོག་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་བལ་ཡུལ་དགོན་པ་གཉིས་ཀྱི་འོས་བསྡུའི་ཐོབ་ཐང་བཀག་སྐྱིལ་དང་འབྲེལ་བདེ་སྙན་དེ་བཞིན་ཁ་མཆུ་ཞུ་སྦྱོར་དེབ་འགོད་ཨང་ ༢༢ ཀྱི་ངོ་བོ་དང་། རྐྱེན་རྩ། དགོས་འདུན་བཅས་པ་གཅིག་པ་ཆགས་ཀྱི་འདུག་པས། སྤྱི་མང་ཁྲིམས་ཡིག་དོན་ཚན་ ༨༨ དགོངས་དོན་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་རྩིས་མེད་ཀྱི་ཐག་གཅོད་གནང་སོང་། དེ་ཡང་ཟླ་འདིའི་ཚེས་ ༩ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་བལ་ཡུལ་གྱི་ཤྲཱི་སེང་གེ་བྲག་ངེས་དོན་བདེ་ཆེན་འོད་གསལ་གླིང་དགོན་པ་དང་ཤྲཱི་སེངྒེ་བྲག་ཤར་སྦག་ཁང་དོན་གྲུབ་ལྡིང་དགོན་པ་གཉིས་ཀྱི་སྐུ་ཚབ་གྲྭ་ཤེས་རབ་སེངྒེ་ལགས་ཀྱིས་དབུས་འོས་བསྡུ་ལས་ཁང་གིས་དགོན་པ་གཉིས་ཀྱི་གྲྭ་བཙུན་རྣམས་ལ་ ༢༠༢༦ ལོའི་བཙན་བྱོལ་བོད་མིའི་དངོས་གཞིའི་འོས་བསྡུའི་ཐོབ་ཐང་བཀག་སྐྱིལ་བྱས་ཡོད་པས་ཁྲིམས་ཞིབ་ཁང་ལ་བདེ་སྙན་ཕུལ་ཡོད་པའི་གནད་དོན་དང་འབྲེལ་སྔོན་འགྲོའི་ཉན་ཞིབ་འཚོགས་ཡོད་པ་དང་། དེ་རིང་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ་གཞི་རྩའི་ཐོབ་ཐང་སྲུང་སྐྱོབ་ཀྱི་གྱོད་གཞིའི་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས། བལ་ཡུལ་དགོན་པ་གཉིས་ཀྱི་འོས་བསྡུའི་ཐོབ་ཐང་བཀག་སྐྱིལ་དང་འབྲེལ་བདེ་སྙན་དེ་བཞིན་ཁ་མཆུ་ཞུ་སྦྱོར་དེབ་འགོད་ཨང་ ༢༢ ཀྱི་ངོ་བོ་དང་། རྐྱེན་རྩ། དགོས་འདུན་བཅས་པ་གཅིག་པ་ཆགས་ཀྱི་འདུག་པས། བདེ་སྙན་པ་ཐུན་མོང་གི་ཞུ་གཏུག་ཐོབ་ཐང་སྲུང་སྐྱོབ་ཆེད་སྤྱི་མང་ཁྲིམས་ཡིག་དོན་ཚན་ ༡༩ [ཀ] པའི་དགོངས་དོན་ཁ་མཆུ་ཞུ་སྦྱོར་དེབ་འགོད་ཨང་ ༢༢ ནང་གྱོད་ཡ་སྣོན་མའི་ངོ་བོ་ཐོག་ནས་ཞུ་གཏུག་བྱེད་ན་འཐུས་རྒྱུ་དང་། རྐྱེན་རྩ་གཅིག་ལ་ཞུ་རྩོད་གཅིག་ལས་མང་བ་ཆགས་པ་ཡིན་ན། ཁྲིམས་ཡིག་གི་བྱ་རིམ་ཚུལ་མིན་དུ་ཆགས་ཉེན་ལ་སོང་བས། སྤྱི་མང་ཁྲིམས་ཡིག་དོན་ཚན་ ༨༨ དགོངས་དོན་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་བརྩི་མེད་ཀྱི་ཐག་གཅོད་གནང་ཡོད་པ་གསུངས་སོང་། མ་ཟད། དབུས་འོས་བསྡུ་ལས་ཁང་གིས་ཕྱི་ལོ་ ༢༠༢༦།༤།༢༣ འཁོད་བལ་ཡུལ་མཆོད་འཇོར་མི་མང་ལ་སྐྱོན་གནད་དོན་ཚན་ ༨ ཅན་དང་འབྲེལ་བའི་ཐག་གཅོད་གནང་བའི་ཁོངས་བདེ་སྙན་པ་སེང་གེ་ཤེས་རབ་དང་། ཤར་སྦག་ཁང་དོན་འགྲུབ་ལྡིང༌། ཤྲཱི་སེང་གེ་བྲག་ངེས་དོན་བདེ་ཆེན་འོད་གསལ་གླིང་དགོན་པ་བཅས་པར་བལ་ཡུལ་མཆོད་འཇོར་ཁྱབ་ཁོངས་སུ་ཚུད་ཀྱི་ཡོད་པ་དང་། བལ་ཡུལ་མཆོད་འཇོར་མི་མང་ ༢༠༠༠ ལྷག་ཕྱི་ལོ་ ༢༠༢༦ སྲིད་སྤྱི་གཉིས་ཀྱི་འོས་བསྡུའི་ཆེད་དེབ་བསྐྱེལ་བགྱིས་པའི་ནང་། གོང་གསལ་བདེ་སྙན་པ་ཐུན་མོང་ཡང་ཚུད་ཡོད་པ་ར་འཕྲོད་བྱུང་ཡོད་པར་བརྟེན། ད་རེས་ཆེས་མཐོའི་ཁྲིམས་ཞིབ་ཁང་གིས་བལ་ཡུལ་དགོན་པ་གཉིས་ཀྱི་འོས་བསྡུའི་ཐོབ་ཐང་བཀག་སྐྱིལ་དང་འབྲེལ་བདེ་སྙན་ངོས་བཞེས་རྩིས་མེད་བཏང་ཡོད་པ་གསུངས་སོང་། […] The post ཆེས་མཐོའི་ཁྲིམས་ཞིབ་ཁང་གིས་བལ་ཡུལ་དགོན་པ་གཉིས་ཀྱི་འོས་བསྡུའི་ཐོབ་ཐང་བཀག་སྐྱིལ་དང་འབྲེལ་བདེ་སྙན་ངོས་བཞེས་རྩིས་མེད་བཏང་སོང་། appeared first on vot.

དེ་རིང་ཕྱི་ལོ་ ༢༠༢༦ ཟླ་ ༦ ཚེས་ ༡༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག་བོད་ཀྱི་བཟོ་རིག་སྒྱུ་རྩལ་འགྲེམས་སྟོན་ཐེངས་གསུམ་པ་དེ་དབུ་འཛུགས་གནང་སོང་།  འགྲེམས་སྟོན་དེ་ནི་བོད་རིགས་སྒྱུ་རྩལ་བ་ཚོགས་སྒེར་ཁག་གི་བོད་ཀྱི་རིག་གཞུང་དང་འབྲེལ་བའི་བཟོ་རིག་སྒྱུ་རྩལ་ལ་རྒྱབ་སྐྱོར་མཚོན་བྱེད་དུ་དམིགས་པ་ཞིག་རེད་འདུག་ལ།  དེ་རིང་གི་འགྲེམས་སྟོན་དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་ནས་དབུ་འབྱེད་གནང་སོང་བ་དང་།  ཐེངས་འདིའི་འགྲེམས་སྟོན་ནང་སྒྱུ་རྩལ་བ་ཚོགས་སྒེར་ཁག་ ༡༨ དང་རུ་ཁག་ ༢༤ ནས་མཉམ་ཞུགས་ཀྱིས་དེ་རིང་དང་སང་ཉིན་བཅས་ཉིན་གྲངས་གཉིས་རིང་འཚོག་གནང་རྒྱུ་རེད་འདུག འདི་གའི་གསར་འགོད་པས་དེ་རིང་གི་འགྲེམས་སྟོན་ཐོག་ཕེབས་པའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་ལ་བཅར་འདྲི་ཞུ་སྐབས་ཁོང་གིས།  བོད་ཀྱི་བཟོ་རིག་སྒྱུ་རྩལ་འགྲེམས་སྟོན་འདི་ལྟ་བུ་བཙན་བྱོལ་ནང་གོ་སྒྲིག་ཞུ་དགོས་གལ་ཆེན་པོ་ཡིན་པ་དང་།  དེ་ཡང་བོད་ནང་ལ་མཚོན་ན་རྒྱ་ནག་གི་བཙན་པོའི་དབང་ཤེད་ཀྱི་སྲིད་བྱུས་དང་ཁྲིམས་སྒྲིག་ལག་བསྟར་འོག་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པ་མི་ཉམས་རྒྱུན་འཛིན་གནང་རྒྱུའི་གོ་སྐབས་དང་གནས་སྟངས་ཙམ་ཡང་མེད་པ་མ་ཟད།  བོད་པའི་བྱིས་པ་ན་གཞོན་རྣམས་རྒྱ་ནག་གིས་བཅའ་སྡོད་སློབ་གྲྭར་བཙན་ཁྲིད་ཀྱིས་བོད་ཀྱི་ཆོས་རིག་དང་ཁ་བྲལ་དུ་གཏོང་གི་ཡོད་སྟབས།  བཙན་བྱོལ་དུ་ང་ཚོས་བོད་ཀྱི་བཟོ་རིག་སྒྱུ་རྩལ་འདི་དག་ཉར་ཚགས་བྱེད་དགོས་གལ་ཙམ་མ་ཡིན་པར།  ན་གཞོན་ཚོའི་སེམས་ནང་དུ་བག་ཆགས་འཇོག་དགོས་གལ་ཡིན་པས།  བོད་ཀྱི་ཐང་ཀ་དང་ཡིག་གཟུགས།  སྨན་དང་རྩིས།  ལ་སོགས་པའི་སྲོལ་རྒྱུན་གྱི་སྒྱུ་རྩལ་གང་དང་གང་ཡོད་པ་ཐམས་ཅད་སྐོར་བོད་མི་ཡོད་དོ་ཅོག་གིས་དོ་སྣང་གནང་དགོས་པ་དང་།  ལྷག་པར་དུ་གནས་ཚང་རྒྱལ་ཁབ་ནང་དུ་ཡང་བོད་ཀྱི་བཟོ་རིག་སྒྱུ་རྩལ་སྣ་མང་ཡོད་པ་དེ་དག་གིས་སྤྱི་ཚོགས་ཁྲོད་ཞབས་འདེགས་གང་སྒྲུབ་ཀྱི་ཡོད་སྐོར་ངོ་སྤྲོད་གནང་དགོས་གལ་ཡིན་པ་གསུངས་སོང་།  ཚོགས་གཙོ་མཆོག་གིས་ད་དུང་།  སྐད་ཡིག་དང་ཆོས་ཐོག་དམ་དྲག་བྱེད་ཐུབ་རྒྱུ་ཞིག་ཡིན་པ་དེ་ལྟར་ཡང་སྒྱུ་རྩལ་ནི་མི་རེ་ངོ་རེའི་ལག་རྩལ་དང་འབྲེལ་བ་ཆགས་ཀྱི་ཡོད་དུས་དེར་དམ་དྲག་བྱེད་དཀའ་བ་ཞིག་ཡིན་པར་བརྟེན།  བོད་མི་སོ་སོའི་རང་རྒྱུད་དུ་སྒྱུ་རྩལ་གང་ཞིག་ཡོད་པ་དེ་དག་གོང་མཐོར་གཏོང་དགོས་གལ་ནི་ང་ཚོའི་ཚང་མའི་ལས་འགན་ཞིག་ཡིན་པ་དྲན་སྐུལ་དང་འབྲེལ།  བོད་ཀྱི་བཟོ་རིག་སྒྱུ་རྩལ་འགྲེམས་སྟོན་འདི་ལྟ་བུ་ནི་དུས་ཀྱི་དགོས་མཁོ་དང་འཚམས་པ་དང་།  ཕྱི་མ་དྲག་ན་སྔ་མ་དྲག་པ་ཞིག་ཡིན་པ།  ལྷག་དོན་འགྲེམས་སྟོན་འདི་ལྟ་བུ་ནི་བཞུགས་སྒར་དུ་གོ་སྒྲིག་ཞུས་པ་ཙམ་མ་ཟད།  ས་གནས་འདིར་ཡོང་མ་ཐུབ་མཁན་ཚོར་དམིགས་ཏེ་རྒྱ་གར་གྱི་གྲོང་ཁྱེར་ཆེ་ཁག་ནང་གཅིག་མཚུངས་ཀྱིས་གོ་སྒྲིག་གནང་ཐུབ་པ་ཡིན་ན་བོད་ཀྱི་ཁྱད་ཆོས་དང་རིག་གནས་ཕྱི་མི་ལ་དྲིལ་བསྒྲགས་དང་མཉམ་དུ་བོད་ཀྱི་ཛ་དྲག་གི་གནས་སྟངས་ཀྱང་བཤད་རྒྱུའི་གོ་སྐབས་ཡོད་པ་གསུངས་སོང་།  དེ་བཞིན་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་རིག་གཞུང་ཚན་པའི་འགན་འཛིན་དོན་གྲུབ་ཚེ་རིང་ལགས་ཀྱིས་འདི་གའི་གསར་འགོད་པར།  དེ་རིང་གི་འགྲེམས་སྟོན་དེ་བཞིན་གཙོ་བོ་བོད་རིགས་སྒྱུ་རྩལ་བ་ཚོགས་སྒེར་ཁག་གི་བོད་ཀྱི་རིག་གཞུང་དང་འབྲེལ་བའི་བཟོ་རིག་སྒྱུ་རྩལ་ལ་རྒྱབ་སྐྱོར་མཚོན་བྱེད་དང་སེམས་ཤུགས་སྤེལ་ཆེད་དུ་དམིགས་པ་ཞིག་ཡིན་པ་དང་འབྲེལ།  བོད་ཀྱི་བཟོ་རིག་སྒྱུ་རྩལ་འགྲེམས་སྟོན་འདི་ཐད་ཀར་ཨ་རིའི་རོགས་ཚོགས་ཀྱི་མཐུན་འགྱུར་འོག་ཆོས་རིག་ལས་ཁུངས་ཀྱིས་གོ་སྒྲིག་གནང་གི་ཡོད་པ་དང་།  འདི་ལོའི་འགྲེམས་སྟོན་ནང་སྔ་ལོ་དང་མི་འདྲ་བར་དཔལ་སྤུངས་ཤེས་རབ་གླིང་དགོན་པ་ནས་ཡིག་གཟུགས་ཀྱི་སྒྱུ་རྩལ་འགྲེམས་སྟོན་ཞིག་དང་། དེ་བཞིན་སྦིར་ས་ཁུལ་ནས་རྩམ་པ་བཟོ་མཁན་དང་ཤིང་པར་རྒྱག་མཁན་གྱི་སྒྱུ་རྩལ་འགྲེམས་སྟོན་ཞིག་སྤྱན་འབུལ་ཞུས་ཡོད་པ་གསུངས་སོང་།  The post བཞུགས་སྒར་དུ་བོད་ཀྱི་བཟོ་རིག་སྒྱུ་རྩལ་འགྲེམས་སྟོན་ཐེངས་གསུམ་པ་འཚོག་བཞིན་པ། appeared first on vot.

ཁ་སང་ཕྱི་ཟླ་ ༦ ཚེས་ ༡༡ ཉིན་གྱི་ཉིན་རྒྱབ་ཆུ་ཚོད་ ༢།༢༢ སྟེང་བོད་རང་བཙན་འཐབ་རྩོད་པ་དང་ལས་འགུལ་བ། རྩོམ་པ་པོ། སྙན་ངག་པ་རྒན་ལྷ་བཟང་ཚེ་རིང་ལགས་དགུང་ལོ་ ༧༤ སྟེང་བཞུགས་སྒར་དྷརྨ་སཱ་ལཱའི་བྱམས་པ་གླིང་རྒན་གསོ་ཁང་དུ་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་ཡོད་པ་དང་། ད་ལྟའི་ཆར་དམ་པ་ཁོང་གི་སྐུ་ཕུང་རང་ཁྱིམ་དུ་ཡོད་པ་རེད་འདུག ཁོང་ཕྱི་ལོ་ ༡༩༥༢ ལོར་བོད་དུ་སྐྱེས་ཤིང་། བོད་རྒྱ་ནག་གི་བཙན་བཟུང་བྱས་པའི་རྗེས་ཕ་མ་དང་ཁོང་གི་གཅེན་པོ་གཉིས་དང་ལྷན་དུ་རྒྱ་གར་ནང་བྲོས་བྱོལ་དུ་ཕེབས་ཡོད་པ་དང་། ཕྱི་ལོ་ ༡༩༦༢ ལོར་མ་སུ་རི་གཏན་སློབ་ཏུ་སློབ་ཞུགས་གནང་། དེའི་རྗེས་མ་སུ་རིའི་ Wynberg Allen School སློབ་གྲྭར་སློབ་སྦྱོང་གནང་། ཕྱི་ལོ་ ༡༩༧༢ ལོར་ཨ་རིར་རྟེན་གཞིས་པའི་ Johns Hopkins University ཇོན་སི་ཧོབ་ཀིན་སི་གཙུག་ལག་སློབ་གཉེར་ཁང་དུ་སྨན་གྱི་སློབ་སྦྱོང་གནང་རྒྱུའི་གོ་སྐབས་ཐོབ་ཀྱང་། གོ་སྐབས་དེ་བློས་གཏོང་གནང་རྗེས་བལ་ཡུལ་གློ་སྒྲིག་འཛུགས་ཀྱི་དམག་སྒར་ནང་བཞུགས་རྒྱུའི་ཐུགས་ཐག་བཅད། འོན་ཀྱང་ཕྱི་ལོ་ ༡༩༧༤ ལོར་གློ་སྒྲིག་འཛུགས་ཀྱི་དམག་སྒར་མཚམས་འཇོག་བྱས་པའི་རྗེས་སུ་ཁོང་རྡ་རམ་ས་ལར་ཕྱིར་ལོག་གནང་། དེ་ནས་བོད་འབྲེལ་ཉམས་ཞིབ་ལྟེ་གནས་ཁང་གསར་འཛུགས་གནང་མཁན་ཁོངས་སུ་ཡོད་པ་རེད་འདུག དེ་བཞིན་ཕྱི་ལོ་ ༡༩༧༦ ནས་ ༡༩༨༢ བར་རྡ་སྟེང་བོད་ཁྱིམ་གྱི་སློབ་སྤྱིའི་ཐུགས་འགན་བཞེས་ཡོད་པ་དང་སྐབས་དེར་ཁོང་དགུང་ལོ་ ༢༤ ཡིན་པ་དང་། ཕྱི་ལོ་ ༡༩༨༣ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་འོག་བོད་གཞུང་ཕྱི་དྲིལ་ལས་ཁུངས་སུ་ཕྱག་ལས་གནང་ཡོད་ཅིང་། ཕྱག་ལས་གནང་བའི་དུས་ཡུན་ཁྲོད་སྣར་ཐང་དཔར་ཁང་གི་ལས་གཞི་རྒྱ་སྐྱེད་དང་ཀམ་པུ་ཊར་ཚན་པའི་ནང་ཕྱག་ལས་གནང་འདུག ཕྱི་ལོ་ ༡༩༨༦ ནས་ ༡༩༩༠ བར་སྐབས་གཉིས་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོའི་ཐུགས་འགན་བཞེས་མྱོང་ཡོད་པ་མ་ཟད། ཕྱི་ལོ་ ༡༩༨༦ ཟླ་ […] The post བོད་རང་བཙན་འཐབ་རྩོད་པ་རྒན་ལྷ་བཟང་ཚེ་རིང་ལགས་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག appeared first on vot.

ཁ་སང་ཕྱི་དྲོ་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་ས་ལྡི་ལིར་གསུང་བཤད་ཞིག་གནང་སྐབས། བོད་མི་ཚོས་རྒྱ་གར་ནང་ཤིན་ཏུ་ནས་རྩ་ཆེ་བའི་སྟོན་པའི་གསུང་ཪབ་ཁག་སླར་གསོ་བྱེད་ཐུབ་པ་དེ་ནི་གཟི་བརྗིད་ལྡན་པ་ཙམ་དུ་མ་ཟད།   རྒྱ་གར་གཞུང་དམངས་ལ་བཀའ་དྲིན་རྗེས་དྲན་ཞུ་བའི་ལེགས་སྐྱེས་ཆེན་པོ་ཞིག་ཀྱང་ཡིན་སྐོར་གསུངས་ཡོད།  ཁ་སང་གསུང་བཤད་ཀྱི་ལས་རིམ་དེ་ནི་སྲིད་སྐྱོང་སྤེན་པ་ཚེ་རིང་མཆོག་སླར་ཡང་སྲིད་སྐྱོང་དུ་མང་མོས་འདེམས་ཐོན་རྗེས་མང་ཚོགས་དང་ཐད་ཀར་གཏམ་བཤད་གནང་བའི་ལས་རིམ་ཐོག་མ་དེ་ཡང་ཆགས་ཀྱི་ཡོད་པ་རེད། དེ་ཡང་འདི་ལོའི་རྒྱལ་སྤྱིའི་བྱམས་བརྩེའི་ལོ་སྲུང་བརྩི་ཞུ་བའི་ཆ་ཤས་སུ།   ཁ་སང་ཕྱི་དྲོ་རྒྱ་གར་རྒྱལ་ས་དི་ལླིའི་ཤེས་ཡོན་མི་སྣའི་ལྟེ་གནས་ India Habitat Centre དུ།   ༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལ་ཕུལ་བའི་བླ་སློབ་ཀྱི་ལེགས་སྐྱེས་ཞེས་པའི་བརྗོད་གཞིའི་ཐོག་དམིགས་བསལ་གཏམ་བཤད་ཀྱི་ལས་རིམ་ཞིག་གོ་སྒྲིག་ཞུས་ཡོད་པ་དང་།   སྐབས་དེར་སྲིད་སྐྱོང་སྤེན་པ་ཚེ་རིང་མཆོག་ནས་བོད་ཀྱིོ་ཆོས་རྒྱལ་སྐབས་ཀྱི་ལོ་རྒྱུས་ནས་བཟུང་རྒྱ་གར་དང་དཔལ་ཡོན་གྱི་འབྲེལ་བ་ཆེན་པོ་ཡོད་པ་མ་ཟད།   རིམ་པས་རྒྱལ་ཁབ་གཉིས་དབར་ཆོས་དང་སྐད་ཡིག  རིག་གཞུང་བཅས་ཀྱི་འབྲེལ་བ་དམ་ཟབ་འཕེལ་རྒྱས་དང་།  ལྷག་པར་ རྒྱ་གར་གཞུང་དམངས་གཉིས་ནས་ཀྱང་བོད་མིར་ཆབ་སྲིད་ཀྱི་དཀའ་ངལ་འཕྲད་སྐབས་གང་སྤྱིའི་མཐུན་འགྱུར་གནང་དང་གནང་མུས་བཅས་ལ་བཀའ་དྲིན་རྗེས་དྲན་ཞུས་པ་དང་སྦྲགས།   ༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་གཞིའི་འོག་བོད་མི་ཚོས་རྒྱ་གར་གྱི་ཤིན་ཏུ་ནས་རྩ་ཆེ་བའི་ནང་བསྟན་གྱི་སྲོལ་རྒྱུན་ཁག་ཉར་ཚགས་ཀྱིས་སླར་གསོ་དང་དར་སྤེལ་ཐུབ་པ་དེ་ནི་རྒྱ་གར་གཞུང་དམངས་ལ་བཀའ་དྲིན་རྗེས་དྲན་གྱི་ལེགས་སྐྱེས་ཤིན་ཏུ་ནས་ཆེན་པོ་ཞིག་ཡིན་པ་སོགས་གསུངས་ཡོད།   India Habitat Centre གིས་གོ་སྒྲིག་ཞུས་པའི་གཏམ་བཤད་ཀྱི་ལས་རིམ་དེ་ལྟེ་གནས་ཁང་དེའི་འགན་འཛིན་སྐུ་ཞབས་སློབ་དཔོན་ KG Suresh མཆོག་གི་གཙོ་སྐྱོང་འོག  གསར་འགོད་པ་གྲགས་ཅན་སྐུ་ཞབས་ Vijay Kranti མཆོག་གི་སྟངས་འཛིན་གནང་ཡོད་པ་དང་།   གཏམ་བཤད་ལས་རིམ་དེའི་ཐོག་ཆབ་སྲིད་མི་སྣ་དང་།  ཕྱི་རྒྱལ་གཞུང་ཚབ་ཁག་གི་མི་སྣ།   མཁས་དབང་།   སློབ་ཕྲུག་དང་བོད་དོན་དོན་གཉེར་བ་སོགས་མི་གྲངས་བརྒྱ་སྐོར་ཞིག་འདུ་འཛོམས་བྱུང་འདུག་པ་མ་ཟད།  དྲི་བ་དྲི་ལན་གྱི་ལས་རིམ་སྐབས།   ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ངོ་མ་ལྕམ་སྐུ་ Dr. Eliska Zigova མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པ་དང་།  ༸གང་ཉིད་ཀྱི་དགོངས་གཞི་ལྟར་བོད་དོན་བདེན་མཐའ་མྱུར་དུ་གསལ་བ་བཅས་ཀྱི་དགོངས་ཚུལ་ཡང་བཀའ་གནང་ཡོད།   འདི་ག་རླུང་འཕྲིན་ཁང་ནས་སྲིད་སྐྱོང་མཆོག་ལ་གཏམ་བཤད་ཀྱི་ལས་རིམ་དེའི་སྐོར་བཅར་འདྲི་ཞུས་པར། རྒྱ་གར་མི་མང་ཚོར་བོད་ཀྱི་གནད་དོན་གསལ་བཤད་བྱེད་རྒྱུ་དེ་གལ་གནད་ཆེན་པོར་ངོས་འཛིན་གནང་གི་ཡོད་པའི་འགྲེལ་བརྗོད་གནང་གི་འདུག གཞི་རྩའི་སྲིད་སྐྱོང་སྤེན་པ་ཚེ་རིང་མཆོག་ཟླ་བ་འདིའི་ཕྱི་ཚེས་ ༨  ནས་ཉིན་གྲངས་ཉི་ཤུ་རིང་རྒྱལ་ས་དི་ལླི་དང་།  ཡོ་རོབ།   ཨ་རི་བཅས་སུ་གཞུང་འབྲེལ་ཕྱོགས་ཕེབས་གནང་གི་ཡོད་པ་དང་།  འཇར་མན་ཁུལ་དུ་སྲིད་སྐྱོང་མཆོག་ནས་ཚོགས་འདུ་ཁག་གཅིག་ཏུ་ལྷན་བཞུགས་དང་སྦྲགས་གཞུང་ཕན་ཚུན་འབྲེལ་ལམ་དང་།   དེ་ནས་ཨ་རིའི་ནང་རོགས་དངུལ་དང་འབྲེལ་བའི་གནད་ཡོད་མི་སྣ་ཁག་གཅིག་དང་མཇལ་འཕྲད་གནང་རྒྱུ་བཅས་ཀྱི་མཛད་འཆར་ཡོད་པ་རེད།   The post སྟོན་པའི་གསུང་རབ་སླར་གསོ་ཐུབ་པ་དེ་ནི་བོད་མིས་རྒྱ་གར་གཞུང་དམངས་ལ་བཀའ་དྲིན་རྗེས་དྲན་གྱི་ལེགས་སྐྱེས་ཡག་ཤོས་དེ་ཡིན་པ་གསུངས་སོང་། appeared first on vot.