Olsen & Jensens visepod

Erik Moll tar oss med langs sitt livs musikalske landeveg, frå Wisconsin på 50-talet til Hornelandsvågen i dag. Me stoppar mellom anna i Bergen, San Fransisco, København og Austin TX, helsar på Jerry Garcia og Willie Nelson og opplever calypso-feber på Torgallmenningen.

Dei aller fleste som har eit forhold til musikk i fysisk format på Stord, har også eit forhold til platebaren til Solgull Rennemo. Det starta på Narvesen i 1974, før ho fekk sin eigen platebar på Stord senter i 1985. Visepodden tok turen til Haga for å høyra meir om Solgull si historie. Me var mette og blide då me gjekk derifrå.

Verdas hyggelegaste saksofonist kjem frå Stord. Ole Jacob Hystad tok godt imot Olsen & Jensen heime i øvingsrommet på loftet i Aslaksvikjo. Her kan du høyra resultatet.

Då Jørn Olav Myhre vaks opp i Sagvåg, skulle ein helst ikkje visa at ein spelte i band, iallfall ikkje overfor jenter. Difor kom han og kompisane på skrøner som at dei skulle til sløyden og jobba litt, når dei eigentleg skulle på øving. Olsen & Jensen inviterte seg sjølv til beste vestkant – på nyopna Heistårnet Pub – for å bli betre kjend med den smilande bassisten. Det blei ei tvers gjennom hyggeleg stund.

Denne nye, spontane sendinga er frå Kringla konditori i Borggata på Stord. Olsen gjekk frå Springsteen-bootsa sine på eit lugubert hotell i Bergen i samband med Paul McCartney-konserten tidlegare i sommar. Me har hanka inn skohandlar Einar Hillestad – som tok med seg boots-katalogen – for å skaffa Olsen nytt fottøy. Visste du forresten at Hillestad er den einaste mopparen i landet som har blitt utvist? PS! Carola har fylt 50 år sidan sist.

I ei intens regnbye onsdag kveld, sat Olsen & Jensen i den innerste kroken på Osvald pub og drøste fram ny episode: Olsen & Jensens spontane (og relativt innhaldslause) sommarpod. Utan gjest – men med "ringer en venn". Her får du høyra litt om musikarar som opptrer som tjuvar, karusellane på Tusenfryd, laksefiske i Matreelva og litt om storleiken på ballane til spermkvalen. God sommar vidare!

Det blir servert fyrstekake på Kattatveit når Olsen & Jensen kjem på besøk. Heile Stord sin heavygitarist Roald Kaldestad har spelt i minst 115 band, trur me. Og me gjer eit forsøk på gå gjennom kvar og eitt band. Dette er episoden om musikaren Roald Kaldestad - frå tidleg oppvekst og vegen fram til i dag. Om kameratskap, musikalske førebilde, rare bandnamn, platekontrakt og japanturné. Og forresten har både Cher og Bonnie Tyler hatt rund dag sidan sist.

Her kjem ei relativt spontan sending, viss det går an å seia sending i podcastbransjen. Femårsjubileum står for døra om få dagar, og me har invitert oss heim til den første artisten som blei booka inn til viseklubben i 2011. Me snakkar om Jørgen Sandvik, og me er i Grovaåsen på Stord. Her lærer me at Sandvik eigentleg kjem frå Fredrikstad. Og han lærer oss at ein ikkje treng Lillebjørn Nilsens gitarbok for å bli ein habil gitarist. I tillegg til mykje, mykje meir om både Sandvik og Real Ones. Me får også litt input om korleis ein Guinness skal tappast. I serien "Olsen og Jensens ringer en venn" møter me ein stjernevokalist som hausa opp banjospelaren Jørgen Sandvik framfor eit forventningsfullt publikum sør på kontinentet for sikkert 12 år sidan.

Olsen & Jensens visepod har fått audiens i det største rockebandet på Stord gjennom tidene si storstove i Hornelandsvågen, i eit rom kledd i Guns N' Roses-plakat, Kiss-plakat og med eit rocka Marshall-kjøleskap. Sjefen sjølv, John Ståle Eldøy, er gjest. Og visepoden ringer ein spesiell venn, som har ei spesiell historie om ein annan venn, som møtte Bob Dylan der borte i Oslo. Hanne Krogh har fylt 60 og viseklubben har investert i slike boots som Bruce Springsteen lett kunne ha gått med.

Andre episode er endeleg her. Olsen og Jensen feiarar bursdagar, Neil Young er den store snakkisen og ei ny spalte skal presenterast. Denne episoden er spelt inn i kjellarstudioet til gjesten vår Ian Kolstad, i Kviteluren på Stord, blant knappar, instrument, kablar, ølflasker og levande lys.  

Første episode blei spelt inn på eit hotellrom i Oslo sentrum, med utsyn mot Postgirobygget (bygget, ikkje bandet). Oslo-aktuelle Bob Dylan står på dagsorden, og Kyrre Myklebust frå Sula kommune er gjest. Her forklarer han kvifor «Rolling Thunder Revue» er tidenes live-album.