逐工一幅天文圖 APOD Taigi

毋知你上佮意 ê 行星 ê 自轉是啥物款--ê？伊敢是踅足緊--ê？伊 ê 自轉方向是墜直--ê？坦平--ê？抑是踅倒反--ê？這支影片 有 kā NASA 翕--ê 太陽系 八粒行星 影像畫做動畫，按呢咱就會當看著 in 排做一排做伙自轉，咱嘛較好做比較。Tī 這支 縮時攝影影片 內底，地球 ê 一工，就是地球自轉一輾，才幾若秒爾爾。木星 自轉 ê 速度較緊，金星 自轉毋若較慢（是講你敢看有？），而且是踅倒反--ê。動畫頂半爿是岩石質 ê 太陽系內行星，大部份應該是 tī 太陽系形成早期 kah 其他天體有 激烈 ê 相挵，造成自轉方向改變。這寡行星 ê 自轉 kah 趨角是按怎變做這馬按呢，是一个 研究主題。這會當 ùi 現代 電腦模擬 kah 最近發現--ê 幾若百粒 系外行星 ê 分析，得著啟發。系外行星就是 踅其他恆星咧行 ê 行星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250914/ 影像：NASA 動畫：James O'Donoghue (JAXA) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250914.html Powered by Firstory Hosting

地球有偌濟成份是水？實際上，足少--ê。雖罔講 海洋 佔地球表面 70 葩，in kah 地球半徑比起來其實是 足淺--ê。這張插圖 有畫予咱看，咱若是 kā 地球表面 kah 附近所有 ê 水，攏收集做一粒 水球，會變做啥款。這粒水球 ê 半徑是干焦 700 公里爾爾，比咱 地球 ê 月娘 半徑 ê 一半閣較細。毋閣是比土星 ê 月娘，土衛五 Rhea，較大淡薄仔。Rhea kah 咱 太陽系 內底其他衛星仝款，主要是水冰組成--ê。這粒大粒水球邊仔較細粒 ê 水球，是 地球 表面所有液態淡水。上細粒 ê 水球，是地球表面 ê 淡水湖 kah 河川。這寡 水 是按怎來到 地球--ê？是毋是閣有大量水藏 tī 地表下底？攏是咱欲研究 ê 主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250907/ 影像：Jack Cook, Adam Nieman, Woods Hole Oceanographic Institution 資料：Igor Shiklomanov 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250907.html Powered by Firstory Hosting

華麗 ê 捲螺仔星系 NGC 4565 ùi 咱地球 kā 看是側向--ê。因為伊狹狹--ê，所以伊嘛叫做 繡針星系。這个光-iàⁿ-iàⁿ ê NGC 4565 tùi 天文觀測團 ê 群眾來講，是北天關注 ê 目標，伊就 tī 暗暗毋閣整齊 ê 后鬃座 遐。這个清楚閣多彩 ê 影像，看會著星系中心有一个 盒仔形、脹脹 ê 星系核。有一條 閘光 ê 塗粉帶，就迒 tī NGC 4565 薄薄 ê 星系盤遐。NGC 4565 離咱有 4000 萬 光年 遠，伊 ê 闊度有 10 萬光年闊。因為咱用細台天文望遠鏡就揣會著 NGC 4565 矣，所以 天文愛好者 認為講，這个遮爾出眾 ê 天體無 tī Messier 星表內底，應該是 伊編星表 ê 時陣 kā 落勾去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250904/ 影像：José Rodrigues (IA, OFXB) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250904.html Powered by Firstory Hosting

毛蟹星雲 ê 核心有一粒 kah 城市平大、有磁性 ê 中子星，伊一秒鐘會自旋 30 擺。伊就叫做 毛蟹星雲脈動星，是 tī 星雲核心 這寡咧轉踅氣體 ê 中央 上光彼點。毛蟹星雲 中心彼搭 ê 發光氣體、閬空、kah 捲踅 ê 雲絲，實在是足壯觀--ê，這差不多有 12 光年闊。這張相片 是 kā 三个波段 ê 影像疊做一張--ê。Hubble 太空望遠鏡 ê 可見光 是茄仔色--ê，Chandra X-光太空天文台 ê X-光 是藍色--ê，Spitzer 太空望遠鏡 ê 紅外線 是紅色--ê。毛蟹星雲脈動星就親像是一台 宇宙發電機 仝款，伊會 予毛蟹星雲動力 產生發射線，ùi 四箍圍仔 ê 物質驅動 震波，kā 轉踅 ê 電子加速。這粒 會自旋 ê 脈動星，是大質量恆星 爆炸 了後崩塌 ê 核心。伊 ê 質量比 太陽 較大，毋閣伊 ê 密度 kah 原子核 仝款。毛蟹星雲脈動星 ê 外層，是做恆星 ê 氣體脹大 ê 殘骸。是講，地球人 tī 1054 年 ê 時陣，就捌看過 超新星爆炸矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250824/ 影像：NASA: X-ray: Chandra (CXC), Optical: Hubble (STScI), Infrared: Spitzer (JPL-Caltech) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250824.html Powered by Firstory Hosting

你敢知影這寡上光 ê 天星 ê 名？你可能知影。有一寡仔 天星 ê 名，是老甲拄開始有 書寫系統 ê 時陣就有矣。世界上足濟文化對這寡 上光 ê 天星 攏有 in 家己號名 ê 方式，而且知影 in ê 名 tī in ê 文化 kah 歷史佔足重要 ê 地位。毋過，為著欲予全球 ê 人有較精確 ê 溝通，國際天文聯合會 (IAU) kā 這寡天星 ê 名標準化。這張相片是這 25 粒 上光 ê 天星 kah IAU kā in 號 ê 名。相片內底這寡天星 ê 色彩，是咱 人 目睭真正看著 ê 色彩。有一寡天星 ê 名實在是 誠有意思，包括 天狼星 (tī 拉丁文 內底是臭火焦 ê 意思)，織女星 (tī 阿拉伯文 內底是落落去 ê 意思)，kah 心宿二 (tī 希臘文 內底是火星 ê 死對頭 ê 意思)。有一粒你可能較熟 ê 是：北極星。毋過伊無 tī 這張圖內底，因為伊無夠光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250611/ 影像：Tragoolchitr Jittasaiyapan 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250611.html Powered by Firstory Hosting

Tī 火星日第 46 工（2021 年 4 月 6 號），毅力號探測車 tī 火星伸出一支機器手骨自翕。Tī 手骨尾節 ê WATSON kha-mé-lah 是設計來翕火星岩石 kah 表面細節 ê 特寫，毋是欲來做 kah 朋友歡喜做伙 ê 速翕。落尾是需要 團隊合作 kah 幾若禮拜 ê 火星時間，來設計一系列 ê 感光 kah kha-mé-lah ê 運動 來翕毅力號 kah 伊 ê 環境。這 62 張相片煞會當組合做一張真清楚 ê 拼鬥影像，是歷史上上複雜 ê 火星探測車自翕。Tī 這个版本 ê 自翕，探測車 ê Mastcam-Z kah SuperCam 儀器當 leh 看 WATSON kah 探測車伸長 ê 手骨。離毅力號差不多 4 公尺遠 ê 所在，有另外一台機器人，是 火星獨創號直升機。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250607/ 影像：NASA, JPL-Caltech, MSSS 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250607.html Powered by Firstory Hosting

Messier 63 是 tī 北天一个足光 ê 捲螺仔星系。伊 kah 附近 彼个忠心 ê 星座獵犬座 ê 距離，差不多是 3000 萬光年左右。伊嘛去予編做 NGC 5055，這个雄偉 ê 島宇宙 差不多有 10 萬光年大，kah 咱 銀河 ê 大細是差不多。這个星系有明亮 ê 星系核 kah 雄偉 ê 捲螺仔手骨，所以伊才會提著一个足奅 ê 名，日頭花星系。這張感光特別深 ê 相片，嘛有翕著較暗 ê 弧形 恆星流，流 tùi 星系暈 內底去。這个恆星流 ùi 星系中心延伸出去，一直到 18 萬光年遠 ê 所在。這敢若是 M63 ê 衛星星系 去予潮汐力 搝甲弄家散宅 ê 殘骸。M63 ê 其他衛星星系嘛會當 tī 這張出色 ê 闊幅影像 內底揣著。像一寡較暗 ê 矮星系，嘛會 tī 紲落來幾若十億年 ê 時間內，變做 M63 ê 恆星流 ê 一部份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250522/ 影像：Sophie Paulin, Jens Unger, Jakob Sahner 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250522.html Powered by Firstory Hosting

媠閣大範 ê 捲螺仔星系 M101 是 Charles Messier's 彼个有名 ê 星表內底上尾一个天體，毋過伊絕對毋是上普通 ê 一个。這个星系 ê 大細差不多有 17 萬光年大，伊足大--ê，差不多是咱銀河系 ê 2 倍大。M101 嘛是 19 世紀 用 Rosse 伯爵上大台 ê 望遠鏡 Leviathan of Parsontown 觀測著 ê 原始 捲螺仔星雲 之一。這是 kā Hubble 太空望遠鏡 tī 20 世紀 kah 21 世紀 紀錄 ê 51 擺感光 kah 地面望遠鏡 ê 觀測資料組合起來 ê 相片。這張組合相片主要是 M101 中央 4 萬 光年闊 ê 範圍。M101 是 Hubble 公佈 ê 捲螺仔星系內底，解析度上懸 ê 其中一个。這張清楚 ê 影像 有翕著 正向盤仔形星系 hŏng 足注意 ê 特色，包括恆星、塗粉，kah 一寡 M101 後壁 ê 背景星系。M101 嘛叫做風吹星系，差不多 tī 2500 萬光年遠 ê 所在，咱會當 tī 北方 ê 大熊座 內底揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250516/ 影像：NASA, ESA, CFHT, NOAO 感謝：K.Kuntz (GSFC), F.Bresolin (U.Hawaii), J.Trauger (JPL), J.Mould (NOAO), Y.-H.Chu (U. Illinois) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250516.html Powered by Firstory Hosting

這个美麗 ê 星雲 是 tī 1500 光年遠 ê 所在。Tī 這个望遠鏡景色內底，伊 ê 形體 kah 色光，予人感覺伊看起來 敢若是花眉仔卵。這个宇宙雲有 3 光年闊，就 tī 南方星座 天爐座 ê 邊界內底。NGC 1360 是行星形星雲，是卵形--ê，毋過伊毋是恆星拄開始 ê 階段。伊是一粒 較老 ê 恆星，是恆星演化到上尾一个足短 ê 階段。實際上，咱會當 tī 這張圖 ê 中心看著一粒中心恆星，伊是一个雙星系統，應該是有 2 粒演化尾期 ê 白矮星 組成--ê。In ê 紫外光輻射 足強--ê，這 tī 可見光看袂著。輻射能 kā 包 tī 白矮星外口 幾若層氣體內 ê 原子 ê 電子 擲出去。NGC 1360 顯目 ê 青藍色，是電子 kah 雙離子化酸素原子 複合 ê 時陣 產生 ê 強輻射光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250514/ 影像：Dong Liang 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250514.html Powered by Firstory Hosting

毛蟹星雲 是 彼个有名 ê Charles Messier 星表 ê 頭一粒天體。伊 ê 編號是 M1，毋是彗星。實際上，咱這馬知影 毛蟹星雲 是一个 超新星殘骸，是懸質量恆星死亡爆炸了後產生 ê 脹大星雲 ê 雲屑仔。天文學家 tī 1054 年 ê 時陣有看著這个激烈出世 ê 毛蟹星雲。這个星雲 ê 直徑差不多有 10 光年，伊 ê 脹大 速度 是一秒鐘 1500 公里。你若是比較 Hubble 太空望遠鏡 kah James Webb 太空望遠鏡 ê 清楚影像，就會發現 伊咧脹大。2005 年 Hubble 太空望遠鏡 ê 可見光波段 kah 2023 年 Webb 太空望遠鏡 ê 紅外光波段，有翕著毛蟹星雲 ê 雲屑仔 kah 雲絲 ê 活動。這隻宇宙甲殼類動物，就 tī 金牛座 方向差不多 6500 光年遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250508/ 影像：NASA, ESA, CSA, STScI; Jeff Hester (ASU), Allison Loll (ASU), Tea Temim (Princeton University) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250508.html Powered by Firstory Hosting

Tī 這个足厲害 ê 電腦視覺化影像內底，咱看會著 踅雙超大烏洞吸積盤發出 ê 光，去予極端重力扭曲 ê 時空彎曲去。這个 模擬吸積盤 是用幾若色來 kā 標記，紅色是踅 20 億太陽質量烏洞 ê 吸積盤，藍色是踅 10 億太陽質量烏洞 ê 吸積盤。這會當予咱較簡單 to̍h 揣著光 ê 源頭，毋過這款方式 mā 反應現實。較燒 ê 氣體倚光譜 ê 藍光彼爿，而且踅小粒烏洞 ê 物質有較強 ê 重力效應，閣會產生較懸 ê 溫度。像這款質量，兩个吸積盤攏會 tī 紫外線 發出 大部份 ê 光。Tī 這支影片內底，特寫影像是扭曲 ê 藍色烏洞。這是 ùi 紅色烏洞看伊 ê 另外一伴。會當 tī 前景看著絞做伙 ê 紅色吸積盤。這支影片會當予咱 tī 仝一个時間看著去予藍色烏洞扭曲 ê 紅色烏洞。因為咱會當看著紅色烏洞看著 ê 藍色烏洞，嘛會當直接看著藍色烏洞，所以咱會當同齊看著兩爿 ê 藍色烏洞。Ùi 兩粒烏洞發出 ê 紅光 kah 藍光會當 tī 上內底 ê 光環看著，這个環 to̍h 是 光子環。這个環 to̍h 差不多 tī 事件地平線附近。天文學家預測，免偌久，in to̍h 會當 觀測著重力波。這是一个時空 ê 水波痕，是兩粒超大烏洞 tī 仝一个系統內底 互相轉踅 kah 合併，to̍h 親像遮內底模擬 ê 這款 sio-siâng。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250506/ 影像：NASA, Goddard Space Flight Center, Jeremy Schnittman and Brian P. Powell 文稿：Francis Reddy 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250506.html Powered by Firstory Hosting

質量上大 ê 少年星團是 NGC 346。伊就 tī 咱 ê 衛星星系 小麥哲倫星雲 ê 恆星形成區內底，離咱有 21 萬光年遠。雖罔講 NGC 346 星團內底 ê 大質量恆星 攏足短命--ê，毋過 in 攏 活跳跳 閣 pìn-piàng 叫。恆星風 kah 輻射 leh 雕這區 厚塗粉 分子雲外沿 ê 時陣，會驅動內底 ê 恆星形成活動。恆星形成區內底會有足濟 紅嬰仔恆星，四散 tī 星團內底。In 才 300 到 500 萬歲爾爾，猶未開始 tī in ê 核心 進行 水素 ê 核融合反應。NGC 346 這張壯觀 ê 紅外線景色 是 ùi James Webb 太空望遠鏡 ê 近紅外線相機 NIRcam 翕--ê。相片內底 ê 粉紅仔色，是大質量恆星 ê 高能輻射 kā 水素原子 離子化。柑仔色是恆星形成分子雲 內底 ê 水素分子 kah 塗粉 發出 ê 發射線。Webb 太空望遠鏡翕--ê 這張 遮爾清楚 ê 少年恆星形成區，若是照 小麥哲倫星雲 ê 距離來估算，應該是有 240 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250502/ 影像：NASA, ESA, CSA, Olivia C. Jones (UK ATC), Guido De Marchi (ESTEC), Margaret Meixner (USRA) 資料：Alyssa Pagan (STScI), Nolan Habel (USRA), Laura Lenkić (USRA), Laurie E. U. Chu (NASA Ames) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250502.html Powered by Firstory Hosting

是按怎木星有環？木星主要 ê 環 是 1979 年 NASA 航海家 1 號 太空船飛過木星 ê 時陣翕著--ê。毋閣環是按怎來--ê，彼陣咱猶毋知。等到 NASA 加利略 太空船 tī 1995 年到 2003 年 踅木星咧行 ê 時陣，有證實一个假說。講，木星環 是 流星體 挵著木星附近 ê 細粒衛星，才產生--ê。比論講，若是有一粒細粒流星體 挵著木星足細粒 ê 衛星 Metis。這粒流星體會鑽入去衛星內底、蒸發、爆炸，kā 產生 ê 塗粉擲入去 踅木星 ê 軌道。這張 木星相片是 James Webb 太空望遠鏡 tī 紅外線波段 翕--ê。這毋若看會著 木星 kah 木星雲，嘛看會著木星環。咱嘛看會著木星 ê 大紅斑 (GRS)，就是正爿較淺色彼丸。木星上大粒 ê 衛星 木衛二 Europa 就 tī 倒爿彼个 繞射光尖 ê 中心。木衛二 Europa ê 烏影，就 tī 大紅斑 ê 邊仔。這張相片內底有幾若个特徵，咱到今 猶毋是蓋清楚。比論講木星正爿邊界，敢若有一重 kah 木星 分開 ê 雲層。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250402/ 影像：NASA, ESA, CSA, STScI 資料：Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250402.html Powered by Firstory Hosting

地球無任何一个海洋比這个鯊魚星雲閣較大。是講，這隻 食肉--ê 幻影 袂造成危險，因為伊是星際氣體 kah 塗粉 組成--ê。親像 這款 烏暗塗粉，看起來敢若是大管薰 ê 煙，是 tī 大質量 恆星 ê 低溫大氣內底 製造 出來--ê。大質量恆星 ê 氣體去予擲出去了後，重力會重新閣 kā in 搝做伙。紲落來，in 會 kā in ê 高能光 kah 高速 恆星風 當做雕刻 ê 家私，kā 生 in ê 雲 雕出 複雜 ê 結構。In 產生 ê 熱能，會 kā 較厚 ê 分子雲 蒸發，kā 四箍圍仔 ê 水素氣體 解體，發出紅光。Tī 這寡 大型雲 leh 散去 ê 過程中，咱人類就會當開始 想像，看 in ê 形體 是毋是 kah 一寡咱定定看會著 ê 物件 有相-siâng。這 kah 咱 leh 看咱地球 ê 雲仝款，毋過地球 ê 雲是水組成--ê。鯊魚星雲 才 15 光年大爾爾，就 tī Aethiopia 王 ê 星座（仙王座）ê 方向 650 光年 遠 ê 所在。伊內底閣包括 一寡較細 ê 塗粉星雲，像 烏暗星雲 Lynds 1235、Van den Bergh 149 kah 150 等等。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250318/ 影像：Timothy Martin 音樂：P!SCO - 鼎鼎 聲優：蔡老師 翻譯：An-Li Tsai (TARA) 原文：https://apod.nasa.gov/apod/ap250318.html Powered by Firstory Hosting

土星 tī 紅外線看起來有小可仔無仝。雲帶內底有足清楚 ê 大型結構，嘛包括 搝長 ê 風暴。紅外線 影像閣有一个 hŏng 注意著 ê 結構，就是 土星 ê 北極區有一个無四常 ê 六角雲圖樣。六角 雲逐爿 ê 長度，差不多 kah 地球直徑平長。咱無料想講會看著這个 六角雲。伊 ê 起源 kah 存在，是一个 研究主題。土星上有名 ê 土星環 kā 土星箍起來，環 ê 烏影就投影 tī 赤道 下面。這張相片是 Cassini 機器人太空船 tī 2014 年，用幾若个紅外線波段 翕--ê。Cassini 任務 tī 2017 年 9 月有一个戲劇性 ê 結局：太空船愛 飛入去 巨大 ê 土星環內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250223/ 影像：NASA, JPL-Caltech, SSI 資料：Maksim Kakitsev 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250223.html Powered by Firstory Hosting

天頂 ê 北美洲星雲 會當做地球 ê 北美洲大陸 袂當做 ê 代誌：做恆星！而且，kah 去予地球限制 ê 大陸比起來，這个較光 ê 星雲，看起來就親像是 美洲東岸。實際上，伊是氣體、塗粉、kah 新恆星 ê 燒眠床，咱 kā 叫做是 天鵝座雲牆。這張 主題相片 內底 看會著恆星形成雲牆，伊去予 光閣少年 ê 恆星 照予光、閣去予侵蝕去，而且閣有 一部份藏 tī 伊產生 ê 烏暗 塗粉 內底。相片內底 ê 北美洲星雲 (NGC 7000) 有 15 光年 闊，伊離咱有 1500 光年遠，就 chhāi tī 天鵝 ê 星座 (天鵝座) 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250122/ 影像：Dimitris Valianos 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250122.html Powered by Firstory Hosting

雷神 Thor 毋若有 專門 ê 日子（拜四），嘛是天堂 ê 頭盔。咱一般攏 kā NGC 2359 叫做 雷神 Thor ê 頭盔。伊是一个帽仔形 ê 宇宙雲，閣有兩支翼股。雷神 Thor ê 頭盔有 30 光年闊，tùi 北歐神 來講嘛是有夠大 ê。實際上，這个宇宙崁蓋較成是一个 星際氣泡，是去予氣泡中心一粒明亮、大質量恆星 ê 高速恆星風吹出來 ê。中心恆星是 Wolf-Rayet 星，伊是 足燒 ê 巨恆星，是 超新星 前期足短 ê 演化 階段。NGC 2359 離 咱有 15000 光年遠，to̍h tī 大犬 座 ê 方向。這張 遮爾清楚 ê 影像 是濫幾若款無仝 ê 觀測資料，有闊頻 kah 狹頻 濾片 ê 資料。內底毋若有 一般看著 ê 影像，嘛有 星雲 雲絲 ê 清楚結構。雷神 Thor ê 頭盔 中心 ê 恆星，閣紲落來幾若千年了後，應該會 爆炸，變做壯觀 ê 超新星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250317/ 影像：Brian Hopkins (East Coast Astronomer) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250317.html Powered by Firstory Hosting

是按怎月球面頂遮爾厚塗粉？Tī 地球， 石頭經過風 kah 水 ê 風化作用了後，會產生沙塗。月球 ê 歷史是一直去予微隕石砲擊，kā 本來 ê 岩石表面挵甲產生一重 月球沙塗抑是表岩屑仔。毋閣 tùi 阿波羅太空人 kah in ê 設備來講，坱埃四界軁，閣 細粒，又閣著一直來，實在是有夠麻煩。50 冬前 ê 1972 年 12 月，tī 月球表面 ê 阿波羅 17 號 太空人 Harrison Schmitt kah Eugene Cernan 愛拍拚 修理探測車 ê 其中一个塗帕仔，才有法度 kā 車輪噴出來 坱蓬蓬 ê 塗粉 擋咧，袂去影響著 in kah 狗齒仔。這張相片看會著去予塗粉崁牢 ê 探測車車輪 kah 塗帕仔。太空人用備用地圖、鋏仔、kah 殕色 ê 電火布 kā 塗帕仔補起來，實在是真巧 ê 做法。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250328/ 影像：Apollo 17, NASA 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250328.html Powered by Firstory Hosting

Tī 火星面頂 一改 ê 雷射聲 聽起來是啥物款--ê？這無需要去問禪師。咱 kan-na 需要來聽一下仔 火星面頂第一个拍出 ê 雷射聲波記錄 to̍h 知影。毅力號任務 tī 第 12 个火星日（3 月 2 號）彼工，to̍h 用探測車桅尾彼台超級 kha-mé-lah 儀器，ùi 3.1 公尺遠 ê 所在 tùi 一粒叫做 Ma'az ê 石頭拍 30 改 ê 信號。伊 ê mài-khù kā 超級 kha-mé-lah ê 高速雷射銃發出 ê 無連紲 ê 聲音記錄起來。一寡石頭去予雷射銃拍甲蒸發去，煞來 tī 火星薄薄 ê 大氣層內底產生衝擊波。這款聲音會當提供目標物 ê 物理結構 ê 線索。這台 超級 kha-mé-lah tùi Ma'az 區域特寫 ê 範圍有 6 公分闊。Ma'az tī 美國原住民 Navajo ê 語言 內底，to̍h 是火星 ê 意思。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250322/ 影像：NASA / JPL-Caltech / LANL / CNES / CNRS 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250322.html Powered by Firstory Hosting

這是一个足特別 ê 日食。一般講來，是 月球 kā 太陽 閘著 矣。毋閣 tī 2021 年 ê 時陣，是 金星 kā 太陽閘著矣。這 to̍h kah 月球 kā 太陽閘著 ê 日食 現象仝款。金星那綴太陽行到仝一條線，伊 ê 相位 嘛愈變愈薄，變做 月眉形 ê。落尾 in 對有齊齊，金星 ê 相位 to̍h 變做零矣。這粒金星 烏點，行過咱 ê 母恆星。這个現象，技術上咱會當 kā 叫做 金星 ê 環食，是講伊外口有一輾足大輾 ê 火環。這張相片 是 tī 掩星彼陣翕 ê，內底 ê 三色太陽是 踅地球 ê 太陽動力學天文台 tī 紫外光 翕 ê。相片正爿 ê 烏暗區是 日冕洞。金星 to̍h 繼續踅，幾若點鐘了後，一絲絲仔月眉形 ê 金星 to̍h 閣出現矣。後一擺 ê 金星凌日，會出現 tī 2117 年。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250316/ 影像：NASA/SDO & the AIA, EVE, and HMI teams 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250316.html Powered by Firstory Hosting

太空中敢有 Calafia 女王 ê 神話島嶼？可能無，毋過這團太空分子雲 ê 外形，kah 美國加州是有成。咱 ê 太陽 就 tī 銀河系 ê 獵戶座捲螺仔手骨 頂懸，離 加州星雲 才 1000光年遠爾爾。伊嘛叫做 NGC 1499，是一个典型 ê 發射星雲，差不多有 100 光年 長。Tī 這張影像 內底，加州星雲上顯目 ê 紅光，是 ùi 水素 原子重新 kah phàng 見 ê 電子複合，發出 ê 光。這个 phàng 見 ê 電子，是去予 高能恆星光 kā 電離，才走去--ê。發出 高能恆星光、kā 大部份 星雲氣體 電離 ê，應該是 tī 星雲 ê 正爿彼粒較光、高溫、藍色 ê 英仙座 ξ。加州星雲是天文攝影師愛翕 ê 目標。Tī 烏暗夜空中，用闊幅望遠鏡 tī 英仙座 方向、昴宿星團 附近就 揣會著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250310/ 影像：Toni Fabiani Mendez 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250310.html Powered by Firstory Hosting

行星形星雲 Abell 7 毋是蓋光，伊離咱有 1800 光年遠，tī 獵戶座南方 ê 兔仔星座，天兔座 內底。Abell 7 是 這張深空望遠鏡影像 ê 主角，伊 ê 邊仔有銀河內底 ê 恆星，視線方向有遙遠 ê 背景星系。伊 ê 結構是一个 簡單 ê 圓球形，直徑差不多是 8 光年闊。是講，圓球內底美麗複雜 ê 細節，愛用 狹頻 濾鏡才看會著。咱 kā 水素發射線用紅色表示，kā 酸素發射線用青色 kah 藍色表示，按呢會當予 Abell 7 看起來有一个較自然 ê 形體。若無，伊實在是傷暗矣，煞 看 袂著。行星形星雲 是恆星演化到上尾，一个足短 ê 階段。咱 ê 太陽閣過 50 億 年了後，嘛會變做按呢。Tī 行星形星雲 ê 中心，會有一粒像太陽這款 ê 恆星，kā 伊 ê 外層大氣捒出去。咱估計講，行星形星雲 Abell 7 應該有 2 萬歲矣。伊 ê 中心恆星就是相片中央彼粒 較暗 ê 白矮星，差不多有 100 億歲矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250307/ 影像：Vikas Chander 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250307.html Powered by Firstory Hosting

你敢捌聽過哈伯深空視場？毋管你捌抑是毋捌，你可能毋捌 聽過這款 ê。請你 tī 這幅影像面頂徙動你 ê 滑鼠，來聽看覓 leh！哈伯深空視場 (HUDF) 是 2003 到 2004 年開創 ê，是用 哈伯太空望遠鏡 tùi 一个看起來啥物攏無 ê 太空區域長時間感光。按呢 to̍h 會當看著 tī 這內底遙遠、暗淡 ê 星系。HUDF 是上有名 ê 一个天文影像之一，tī 遮咱用一个較活潑 ê 方式，聲波距離，來展示予逐家看。你 kā 滑鼠徙到一个星系，伊 to̍h 會展示 訊息 予你看，內底有伊大概 ê 紅移。因為 紅移 會 kā 光 ê 頻率徙到較紅 ê 光譜 彼爿去，tī 遮 咱 to̍h 用 kā 音調徙到較低 ê 聲音譜 彼爿來表示。愈遠 ê 星系，伊 ê 宇宙紅移 to̍h 愈大（to̍h 算講伊看起來是藍色 ê），伊 ê 音調彈--起來 to̍h 會愈低。HUDF 內底 ê 星系，平均距離是 106 億 光年 遠，聽--起來是 升 F 調。按呢 tī 遮，你會當揣著 上遠 ê 星系 是佗一个？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250302/ 影像：NASA, ESA, Hubble 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250302.html Powered by Firstory Hosting

恆星是做伙生出來--ê。天頂 上有名 ê 一陣星叫做 昴宿星團，伊是一个 足光 ê 星團，咱用 目睭直接 就看會著。昴宿星團離咱有 450 光年 遠，是 1 億年前形成--ê，而且會閣活 2.5 億歲。咱 ê 太陽 應該嘛是 ùi 星團 內底生出來--ê。毋閣伊已經 45 億歲矣，伊 誕生彼陣 ê 星伴，早就已經無去矣。相片內底 ê 昴宿星團 就 tī 天頂。前景是 tī 美國 加州 優勝美地 國家公園 內底，一粒足有名 ê 岩石，叫做 半爿圓厝頂。這張相片 是 kā 28 張翕著 ê 前景，kah 174 張翕著 ê 天星背景疊做一張。In 攏是 tī 2019 年 10 月 ê 仝一暝，踮仝一个所在，用仝一台 kha-mé-lah 翕--ê。天文攝影師 事先有算好，愛開偌久時間 來翕 昴宿星團 kah 半爿圓厝頂岩石。毋閣伊意外拄著這區咧 失電，結果 背景 ê 夜空 煞規个變甲異常烏暗。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250127/ 影像：Dheera Venkatraman 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250127.html Powered by Firstory Hosting

Kā 你 ê 望遠鏡 tùi 飛足懸 ê 飛馬座 看，你會當看著咱這个 寬闊銀河系 ê 恆星 kah 遙遠 ê 星系。NGC 7814 to̍h tī 這幅美麗視場 ê 中央，伊 ê 視角 差不多 kah 月娘 平闊。NGC 7814 有當時仔嘛叫做細頂草帽仔星系，因為伊 kah 另外一个較有名 ê M104，草帽仔星系 足成 ê。草帽仔星系 kah 細頂草帽仔星系攏是側向 ê 捲螺仔星系。In 攏有寬闊 ê 銀暈 kah 銀核，毋閣 in ê 外形攏去予 in ê 薄星系盤 kah 足狹 ê 塗粉帶分做兩爿。實際上，NGC 7814 離咱 4000 萬光年遠，伊差不多有 6 萬光年闊。這个 細頂草帽仔星系，kah 彼个較有名 ê 草帽仔星系差不多平大。伊看起來較細較暗，只是因為伊較遠爾爾。這个 tī 7 月 17 翕著 ê 望遠鏡影像，有一个新發現 ê 超新星，to̍h tī 銀核 ê 倒爿。伊 去予編做 SN 2021rhu，是 Ia 型 ê 超新星，會使用來校正 宇宙 距離 ê 大細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250123/ 影像：Mike Selby 音樂：P!SCO - 鼎鼎 聲優：蔡老師 翻譯：An-Li Tsai (TARA) 原文：https://apod.nasa.gov/apod/ap250123.html Powered by Firstory Hosting

1 月 13 彼工，月圓相 ê 月娘 kah 火星 是行足倚--ê。In 攏足光--ê，嘛攏 tī 地球天頂行到 日頭 ê 相對面。實際上，ùi 北美洲 kah 非洲西北部 ê 一寡所在看，火星 ùi 月娘後壁行過，月娘 kā 火星閘牢矣，這就叫做 月掩火星。這張相片是 tī 美國 Virginia 州 Richmond 翕--ê 合成相片。Ùi 掩星前、掩星中、到 掩星煞，有翕著 這个 壯觀 天文現象 ê 規个過程。這組望遠鏡系列相片 是 2 分鐘翕一張，攏總翕幾若點鐘久。火星 ê 路線看起來有小可仔彎彎，這是伊相對月娘 ê 視運動。後一擺 ê 月掩火星 會發生 tī 2 月 9 號，時到 ê 月相是 頂膨月。這擺 ê 月掩星 干焦發生 tī 地球一寡所在爾爾。2 月 9 號 ê 月掩火星 會當 tī 露西亞、中國、加拿大東部、格陵蘭、kah 其他北半球 ê 一寡所在看著。毋過，看袂著 ê 所在猶是看會著 月娘 kah 火星 行到合 ê 相位，就是 in 兩粒 tī 天頂行足倚 ê 現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250118/ 影像：David Bowman 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250118.html Powered by Firstory Hosting

壯麗 ê 捲螺仔星系 Messier 33 看起來是有過量 ê 水素氣體 leh 發光。 M33 是本星系群 ê 成員之一，嘛叫做 三角座星系，離咱有 300 萬 光年遠。 這張 清楚 ê 宇宙肖像，就是這个星系中心 3 萬光年 ê 範圍，是 leh 翕 M33 發紅光 ê HII 區，就是水素離子雲。 這寡 HII 區就綴 M33 鬆鬆 ê 捲螺仔手骨，踅入去星系核內底。 M33 ê 大片 HII 區 是目前咱知影 上大 ê 恆星誕生區，會生出足濟短命 ê 大質量恆星。 足光 ê 大質量恆星 發出強烈 ê 紫外光輻射，kā 邊仔 ê 水素氣體 離子化，予 in 發出特別 ê 紅光。 這張影像是 kā 闊頻資料 kah H-alpha (Hα) 濾鏡紀錄 ê 狹頻資料 疊出來 ê 結果。 H-alpha (Hα) 濾鏡是 tī 可見光波段，會當 kā 上強 ê 水素 發射線 ê 信號送過來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250130/ 影像：NASA, ESA, CSA, STScI; D. Milisavljevic (Purdue University), T. Temim (Princeton University), I. De Looze (University of Gent) 音樂：P!SCO - 鼎鼎 聲優：草莓大福 翻譯：An-Li Tsai (TARA) 原文：https://apod.nasa.gov/apod/ap250130.html Powered by Firstory Hosting

你敢捌 tī 太空看過火箭發射？ 咱會使 ùi 這个縮時攝影影片 斟酌來 kā 看。 這是 ùi 國際太空站 面頂看著 ê 景色，有一台火箭飛到地球軌道 ê 懸度。 這台 露西亞 ê Soyuz-FG 火箭，是 tī 2018 年 11 月 ê 時陣，ùi 哈薩克 ê Baikonur 太空發射中心 發射 ê。 伊送一台 Progress MS-10 模組（嘛號做 71P）去-lih，內底是欲予國際太空站用 ê 物資。 這个 90 秒鐘 ê 影片 內底（ùi 15 分鐘濃縮來 ê），倒爿下跤 看會著城市 ê 光 kah 地球看會著 ê 雲。 嘛看會著大氣層內底，藍色 氣輝層 kah 金色 氣輝層，to̍h 迒 tī 這支影片 ê 對角方向。 正爿頂懸，tī 地球後壁，閣有遠方 ê 天星。 咱會當看著火箭 ê 下節 落轉來地球。 頂節 ê 補給船，發射伊 ê 推進器，沓沓仔 倚近國際太空站。 這間 太空實驗室 to̍h 按呢，tī 2018 年 慶祝 in 成立 20 週年 矣。 蹛 tī 踅地國際太空站 ê 太空人，愛進行足濟 ê 實用勤務 kah 科學實驗。 這毋若會當擴展人類 ê 智識，嘛會當增加未來 tī 地球低層軌道 ê 商業應用。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250105/ 影像：NASA, ESA, CSA, STScI; D. Milisavljevic (Purdue University), T. Temim (Princeton University), I. De Looze (University of Gent) 音樂：P!SCO - 鼎鼎 聲優：蔡老師 翻譯：An-Li Tsai (TARA) 原文：https://apod.nasa.gov/apod/ap250105.html Powered by Firstory Hosting

咱銀河系內底 ê 大質量恆星 有燦爛 ê 一生。 In 是 ùi 大型宇宙雲崩塌來--ê，in ê 核子反應爐 著起來了後，會 tī 核心製造重元素。 大部份大質量恆星經過短短幾若百萬年了後，會 kā 伊 產生 ê 物質 噴轉去星際空間，變做後一擺做恆星 ê 材料。 這个咧漲大 ê 屑仔雲叫做仙后座 A，這是 恆星性命週期 上落尾 ê 階段。 超新星爆炸產生超新星殘骸，伊發出來 ê 光，350 年前頭一擺 tī 地球天頂 hŏng 看著，毋過這个光其實是愛開 1 萬 1000 年才會到咱遮。 這幅 James Webb 太空望遠鏡 ê NIRCam 翕 ê 清楚影像，有翕著超新星殘骸 猶燒滾滾 ê 雲絲 kah 雲丸。 咧漲大 ê 白煙外殼，大細差不多有 20 光年大。 Uì 大質量恆星爆炸發出來 ê 光，有去予 Webb 太空望遠鏡翕著。 這張清楚影像，就是超新星殘骸 仙后座 A。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250117/ 影像：NASA, ESA, CSA, STScI; D. Milisavljevic (Purdue University), T. Temim (Princeton University), I. De Looze (University of Gent) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250117.html Powered by Firstory Hosting

毋管是 siáng kah 土衛一 Mimas 相碰，攏會 kā 伊挵甲 giōng 欲碎-⁠-去。 這是 土星 一粒上細粒 ê 球形衛星面頂，其中一擺 上大相碰產生 ê 隕石坑。 分析了後發現，若是閣較強一點仔 ê 相碰， to̍h 會 kā Mimas 規粒挵碎。 這个大隕石坑是 tī 1789 年 tī Mimas 發現 ê，叫做 Herschel，是用 William Herschel 爵士 ê 名號-⁠-ê。 這粒有 130 公里闊 ê 隕石坑 to̍h tī 遮。 低質量 ê Mimas 產生 ê 表面重力，拄仔好強到有法度結做一粒 球形天體，嘛拄仔好弱到有法度產生這款大型 ê 表面結構。 Mimas 大部份 ê 成份是水冰 kah 一寡岩石。 所以講伊是一粒大粒 ê 垃圾雪球，實在是真鬥搭。 這張影像是Casiini 機器人太空船 tī 2010 年 踅土星 leh 行 ê 時陣，飛過 Mimas 上近彼陣翕 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250112/ 影像：NASA, JPL-Caltech, Space Science Institute, Cassini 音樂：P!SCO - 鼎鼎 聲優：蔡老師 翻譯：An-Li Tsai (TARA) 原文：https://apod.nasa.gov/apod/ap250112.html Powered by Firstory Hosting

Ùi 這馬開始幾若十億年後，這兩粒星系干焦會賰一个。到彼陣進前，捲螺仔 星系 NGC 2207 kah IC 2163 會沓沓仔互相倚近閣離開、產生 潮汐 尾溜、衝擊波氣體、烏暗塗粉帶、恆星形成 爆發、kah 去予 擲出去 ê 恆星流。這張 有科學配色 ê 影像 是 Hubble ê 可見光 kah Webb ê 紅外線 ê 合成影像。天文學家預測 正爿較大粒 ê 星系 NGC 2207 落尾 會 kah 倒爿較細粒 ê 星系 IC 2163 合併做一粒。In 最近相碰 是 tī 4000 萬年前。較細粒 ê 星系是倒剾踅，這馬是行到較大粒星系 後壁。星系 kah 星系相挵 ê 時陣，內底 ê 恆星 kah 恆星之間 猶是差足遠--ê，袂相碰。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250106/ 影像：NASA, ESA, CSA, STScI 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250106.html Powered by Firstory Hosting

地球踅太陽 ê 軌道 毋是圓--ê，是長株圓。咱美麗 ê 地球 tī 長株圓軌道頂懸行到 kah 太陽上倚 彼點就叫做近日點。 今年 ê 近日點是 tī UTC 世界時 1 月 4 號 13:28，地球 kah 太陽 ê 距離差不多是 1 億 4700 萬 公里。咱來做一个比較，遠日點會出現 tī 7 月 3 號，這是地球行到 kah 太陽上遠彼點，差不多是 1 億 5200 萬 公里遐爾遠。毋過咱 kah 日頭 ê 距離 毋是決定 地球季節變化 ê 原因。冬至 是 北半球寒天開始彼工，是南半球熱天開始彼工。這張相片是 舊年冬至 太陽活動力較強 ê 時陣，用 H-alpha 濾鏡翕--ê 影像。拄仔好 kah 地球近日點差無 14 工。嘛真拄好，NASA Parker 太陽探測器 tī 太陽近日點進前 11 工 飛過。Parker 太陽探測器 是 2018 年發射--ê，2024 年 12 月 24 飛到 太陽表面 620 萬公里附近，拍破 伊 進前飛倚太陽 ê 紀錄。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250104/ 影像：Peter Ward (Barden Ridge Observatory) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250104.html Powered by Firstory Hosting

月食 kah 日食 定定是一對--ê。一年會出現兩擺食週期，一擺差不多 34 工。日頭、月娘、地球會行做仝一逝。月圓 kah 新月 ê 月相 會差 14 工較加，分別對應著 月食 kah 日食 出現 ê 時期。毋過較罕得拄著 ê 是，tī 仝一个食季內，新月 kah 月圓 彼陣，日頭、月娘、地球 ê 排列攏排欲仝一逝。按呢就會造成成對 ê 日全食 kah 月全食，抑是 日環食 kah 月全食。而且，偏食嘛是食季中 會拄著--ê。實際上，2024 年上尾一擺食季就有這款食對：9 月 18 ê 月偏食 kah 10 月 2 號 ê 日環食。這幅縮時攝影組合影像，分別是 tī 英國（倒爿彼張）kah 復活島（正爿彼張）翕--ê。2025 年 ê 食季 會出現 tī 3 月 14 ê 月全食 kah 3 月 29 ê 日偏食 按呢一對。另外閣有一對會是 9 月 8 號 ê 月全食 kah 9 月 21 ê 日偏食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250103/ 影像：Josh Dury 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250103.html Powered by Firstory Hosting

寒天 佮 熱天看起來敢若是出現 tī 這粒細粒行星 ê 仝一个暗暝 ê 款。這粒行星其實是地球啦！這是 數位合成 ê 全景圖，360 度 乘 180 度 ê 大細，是 kā 1 月 kah 7 月 tī 法國 Alps 山脈 Col du Galibier 翕--ê 相片 組合起來--ê。下底是北半球 ê 寒天，後壁是 熱天 ê 銀河，背景是恆星 kah 星雲。銀河 tī 相片內底，變做是一條拗彎 ê 地平線。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241130/ 影像：Camille Niel 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241130.html Powered by Firstory Hosting

這个浮 tī 空中 ê 環，其實 kah 星系平大。實際上，伊是一个星系，上無嘛是星系 ê 一部份。這个足媠 ê 草帽仔星系，是 室女座星系團 內底 上大粒 ê 星系。Tī 下面彼張可見光影像內底，烏暗 塗粉帶 kā 草帽仔星系 中央閘去矣，毋過頂懸彼張紅外線影像煞光爍爍。下面彼張 紅外線 相片，是 James Webb 太空望遠鏡 昨昏公佈 ê 假色藍色影像。頂懸彼張是 NASA ê Hubble 太空望遠鏡 ê 可見光 影像。影像經過數位處理了後有較清楚。草帽仔星系 嘛 叫做 M104，差不多有 5 萬 光年 闊，就 tī 2800 萬光年遠 ê 所在。M104 用細台望遠鏡就看會著，伊就 tī 室女座 ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241126/ 影像：NASA, ESA, CSA, STScI, Hubble Heritage Project (STScI, AURA) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241126.html Powered by Firstory Hosting

獵戶座 內底 ê 馬頭星雲 是天頂上好揣 ê 一个星雲，伊是大型烏暗 分子雲 ê 一部份。伊嘛叫做 Barnard 33。這个無四常 ê 外形是 1800 年代尾仔 tī 玻璃底片 內底揣著--ê。紅光是星雲後壁 ê 水素 氣體來--ê，是去予附近 ê 獵戶座 Sigma 星 kā 電離--ê。馬頭 較烏 ê 部份是較厚 ê 塗粉，馬頭 ê 頷頸 是 投影 tī 倒爿下跤 ê 烏影。一寡氣體 嘛 因為強烈 ê 磁場 煞 離開 星雲。馬頭星雲 內底一寡光點是 當咧形成 ê 恆星。馬頭星雲 ê 光愛 1500 年才會到咱遮。這張影像 是 tī 智利 山頂 ê 智利 天文台翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241125/ 影像：Alex Lin (Chilescope) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241125.html Powered by Firstory Hosting

Kā 你 ê 3D 目鏡 提來，來欣賞這張月球表面 ê 風暴洋。這幅 3D 影像是 1969 年 11 月 ê 時陣，阿波羅 12 號 ê 太空人 Pete Conrad 去 拜訪 測量員 3 號 太空船 ê 相片。Tī 這進前 2 冬半 ê 1967 年 4 月，測量員 3 號降落 tī 較細个窟仔邊 ê 內面。阿波羅 12 號 登月艙 無畏號 降落 ê 所在 才離 測量員太空船 200 公尺爾爾，毋是蓋遠。這張立體影像是 kā 2 張 月球表面 無仝張相片 (編號 AS12-48-7133 kah AS12-48-7134) 組合起來--ê。2 張 ê 視角干焦有小可仔無仝，kah 咱人目睭看著--ê 差不多。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241115/ 影像：NASA, Apollo 12, Alan Bean 立體影像版權：Kevin Frank 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241115.html Powered by Firstory Hosting

南半球 天爐座方向 干焦 5600 光年遠 ê NGC 1365，是 一个直徑 20 萬光年 ê 大粒棍螺仔星系，是咱銀河 ê 2 倍大。這是 James Webb 太空望遠鏡 ê 中紅外線相機 MIRI 翕--ê 紅外線 影像，有翕著捲螺仔星系 足清楚 ê 細節。Webb 翕--ê NGC 1365 有 6 萬光年闊 ê 範圍，是欲看星系 ê 核心 kah 新誕生 ê 星團。影像內底 ê 塗粉絲 kah 氣泡 組成 ê 網路是 星系中心棍仔 伸出來 ê 捲螺仔手骨 頂懸 ê 少年恆星 產生--ê。天文學家 懷疑講，NGC 1365 星系棍仔 ê 重力場，應該是 星系演化過程中足重要 ê 角色。伊 kā 氣體 kah 塗粉 送去 生恆星 ê 所在，落尾這寡物質 會攏飼予星系中心 ê 超大質量烏洞 食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241113/ 影像：NASA, ESA, CSA, Janice Lee (NOIRLab) 資料：Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241113.html Powered by Firstory Hosting

月眉星雲是按怎形成--ê？相片 中央這幅 月眉星雲，看起來就親像是一粒太空 蟲包，這是中央彼粒足光 ê 恆星造成--ê。一款逐家較相信 ê 假說是講，這个 月眉星雲 是 25 萬年前形成--ê。彼个時陣，中央彼粒大質量恆星已經演化變做 Wolf-Rayet 星 (WR 136) 矣。而且伊 ê 恆星風 強甲 kā 外層氣體擲出去，差不多 1 萬年擲 1 个太陽質量 出去。這个恆星風 kā 進前演化階段 留落來 ê 氣體捒出去，形成 一重一重足複雜 ê 發光 氣體殼。月眉星雲 ê 編號是 NGC 6888，就 tī 天鵝座 方向 4700 光年 遠 ê 所在。WR 136 星 可能會 tī 紲落來 100 萬年內，演化變做 超新星 爆炸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241112/ 影像：Team ARO 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241112.html Powered by Firstory Hosting

象管星雲 to̍h 親像是英國童話「To̍h 是按呢 ê 故事」內底一篇「象仔囝」故事 ê 銀河版插圖。伊就 tī 懸閣遠 ê 仙王座 遐，彎彎曲曲迵過發射星雲 kah 少年星團 複合體 IC 1396。倒爿 ê 宇宙象管嘛叫做 vdB 142，伊 ê 長度是超過 20 光年長。這幅詳細 ê 望遠鏡特寫，有翕著伸 tùi 後壁去、足光 ê 山龍，kah 這內底 一區一區 ê 低溫 星際 塗粉氣體。這个 烏暗、虯做伙 ê 雲 內底有做新恆星 ê 原始材料，嘛會當 kā 原恆星藏 tī 內底。這个較暗 ê IC 1396 星團複合體 tī 差不多 3000 光年遠 ê 所在。伊 tī 天頂 ê 範圍是足大--ê，有 5 度遐爾闊。毋過 這幅影像 ê 視野才 1 度闊爾爾，這个角寸尺差不多是兩粒月娘遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241121/ 影像：Giorgio Ferrari 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241121.html Powered by Firstory Hosting

這个去予編做 NGC 206 ê 大型星協，就 tī 咱 ê 厝邊星系 仙女座星系 厚塗粉 ê 捲螺仔手骨內底，綴星系頂懸粉紅仔色 ê 恆星形成區咧行。仙女座星系嘛叫做 M31。這个捲螺仔星系 kah 咱 ê 距離才 250 萬光年爾。這張是 仙女座星系盤西南 爿 清楚閣詳細 ê 特寫相片，NGC 206 就 tī 這張相片 ê 中央正爿彼搭。NGC 206 內底有一寡足光 ê 藍色 恆星，表示講伊猶閣足少年--ê。實際上，這寡少年懸質量恆星 ê 歲數，是猶無到 1000 萬歲。NGC 206 ê 大細差不多有 4000 光年大，是比咱銀河 盤 面頂 少年球形星團 抑是 開放星團 閣較大。這个寸尺 kah 咱附近 ê 捲螺仔星系 [M33][M33] 內底 ê 大型恆星托兒所 NGC 604 kah 大麥哲倫星雲內底 ê 蜘蛛星雲 是 差不多大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241128/ 影像：Roberto Marinoni 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241128.html Powered by Firstory Hosting

這个看起來有編織花樣 kah 蛇紋 ê 發光氣體雲絲，予伊得著這个足紅 ê 名：Medusa 星雲。伊嘛予人號做 Abell 21。這个 Medusa 星雲是一个足老 ê [行星形星雲][planetary nebula]。伊 to̍h tī 雙生仔座方向，離咱有 1500 光年遠。Kah [神話][mythological] 內底 ê 名仝款，這个星雲嘛有一个戲劇性 ê 轉變。伊現此時 ê [行星形星雲][planetary nebula]，其實是像太陽這款低質量恆星 [演化][the evolution] 到上尾 ê 階段，已經 ùi [紅巨星][red giants] 轉變做燒滾滾 ê 白矮星矣。Tī 這个過程中，白矮星會 kā 伊 ê 外層氣體幌掉。高溫恆星發出 ê 紫外光 [輻射][radiation]，會 kā 星雲照予光。Tī 發光 ê 月眉形氣體中央彼粒無蓋光 ê 天體，to̍h 是 Medusa 星雲演化尾期 ê 恆星。[Tī 這張深空 ê 望遠鏡景色][this deep telescopic view] 內底，較暗 ê 雲絲嘛翕甲真清楚。這寡雲絲 to̍h 湠到較光彼个月眉形氣體 ê 正爿 kah 下底去。照估計，Medusa 星雲應該有超過 4 光年大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241122/ 影像：Bruno Rota Sargi 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241122.html Powered by Firstory Hosting

這張 太空速翕相片 內底，有 80 億人 giōng 欲無去矣！這是 11 月 21 翕--ê，是 Artemis 1 號任務 ê 第 6 工。這張相片是獵戶座太空船飛出去 ê 時陣，伊 ê 外部 kha-mé-lah 翕 ê，咱會當看著地球 tī 月娘外沿遐。獵戶座太空船這馬欲進行動力飛行，飛過月球表面 130 公里懸 ê 所在。動力飛行 ê 過程會增加飛行速度，按呢會當飛到 離月球較遠 ê 逆行軌道 去。這个軌道較遠，因為伊離月球有 9 萬 2000 公里遠，而且是逆行軌道。這是因為太空船 ê 軌道方向會 kah 月球踅地球 ê 方向倒反。獵戶座太空船會 tī 11 月 25 拜五 ê 時陣，飛到這个較遠 ê 逆行軌道。獵戶座太空船 tī 月球附近幌來幌去，落尾會 tī 11 月 28 拜一 ê 時陣飛到離地球上遠 ê 距離（40 萬公里）。這个距離超過進前 設計欲載人做太空探險 ê 阿波羅 13 號任務 ê 記錄。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241120/ 影像：NASA, Artemis 1 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241120.html Powered by Firstory Hosting

這个烏影景色 就是冥王星暗暝彼半爿。遮是一个暗淡 koh 遙遠 ê 世界。這張予人讚嘆 ê 太空視角內底，太陽 to̍h tī 49 億公里遠（差不多是 4.5 光時遠）ê 所在。這張相片是 飛足遠 ê 新視野號太空船 tī 2015 年 7 月 翕 ê。彼陣 ê 太空船離冥王星 2 萬 1 千公里遠，差不多是伊 ùi 離冥王星 上近彼位飛--出去 ê 19 分鐘後。這个 Kuiper 帶 ê 成員有戲劇性 ê 外形。Ùi 這張相片來看，咱知影冥王星 霧霧 ê 大氣層其實是蔫蔫，而且實在是 有夠複雜 ê。Tī 這張相片頂懸彼个月眉形 ê 晨昏區景色 內底，有南部地區 ê 窒素冰原，這馬叫做 Sputnik 平原，嘛有 坎坎坷坷、有水冰 ê Norgay 山脈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241116/ 影像：NASA, Johns Hopkins Univ./APL, Southwest Research Institute 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241116.html Powered by Firstory Hosting

紫金山-ATLAS 彗星 ê 尾溜 內底 無四常 ê 烏暗線 是按怎來--ê？10 月中有翕著 ê 這粒足光 ê 彗星 相片，毋但翕著 予人印象足深 ê 長彗尾 kah 細細條 ê 倒反彗尾，嘛有一寡人 翕著 長 彗尾 內底 足特別 ê 烏暗 線。這个烏暗線是按怎來--ê？到今猶 tī 咧討論。有可能是 烏暗 塗粉 雲煙、無仝區 ê 彗尾 相疊、抑是 較厚 ê 彗鬚 內底一寡細粒塗粉粒產生 ê 烏影。10 月 14 tī 美國德州翕著 ê 這張 相片 嘛有翕著這條烏暗線。為著欲幫贊科學家分析這个現象，你若是有翕著有清楚烏暗線 ê 彗星相片，請 送來 APOD。紫金山-ATLAS 彗星 這馬已經轉去 外太陽系 矣，所以伊 tī 天頂會 愈來愈暗。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241111/ 影像：Bray Falls 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241111.html Powered by Firstory Hosting

火星 頂懸有一巡足深 ê 痕跡，是 太陽系 內底上大 ê 峽谷。伊就叫做 水手谷，是一个 3000 公里長、600 公里闊，8 公里深 ê 大山谷。地球 美國 Arizona 州 ê 大峽谷 嘛才 800 公里長，30 公里闊、1.8 公里深爾爾。水手谷 ê 起源到今 猶毋是蓋清楚。目前上主要 ê 假說是講，伊是幾若十億年前 火星冷卻 ê 時陣，一條細條 ê 必巡 演變做這馬 ê 峽谷。科學家已經 ùi 這个 峽谷內底揣著幾若款地質演變 ê 過程。這張 拼鬥圖 是 1970 年代 海賊號 軌道太空船 翕 ê 火星 相片 合成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241110/ 影像：NASA, USGS, Viking Project 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241110.html Powered by Firstory Hosting

冰巨行星 海王星 tī 地球天頂是暗暗一粒 tī 遐。伊 kah 太陽 ê 距離 是 伊 kah 地球距離 ê 30 倍，愛用望遠鏡 才看會著 這粒暗暗 ê 遙遠世界。這个戲劇性 ê 海王星暗暝，是地球附近 ê 望遠鏡翕袂著 ê 景色。Ùi 內太陽系看出去，是干焦看會著 海王星 日時 這爿 ê 景色。實際上這幅 新月形 ê 海王星暗暝 kah 邊仔 ê 海衛一 Triton，是 航海家 2 號太空船 翕--ê。航海家 2 號太空船是 1977 年 ê 時陣 ùi 地球發射，1898 年 ê 時陣 飛倚這粒太陽系上外口 ê 行星。這隻機器人太空船 離開 ê 時陣，回頭看海王星，紲落來就閣繼續 伊 ê 星際旅行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241109/ 影像：Voyager 2, NASA 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241109.html Powered by Firstory Hosting

浮 tī 咱銀河盤附近 ê 厚塗粉分子雲，看起來敢若是宇宙尺度 ê 一支來鬥相共 ê 手。In 是恆星形成星際雲 複合體 ê 一部份，包括 LDN 1358, 1357, kah 1355。這是美國天文學家 Beverly Lynds tī 1962 年piàn ê 烏暗星雲目錄 內底 ê 天體。這寡 3000 光年遠、袂透光 ê 烏暗星雲是 tī 有足濟 恆星 ê 北方星座 仙后座 內底。對天文攝影師來講，翕著 in 是 足困難毋過足值得驕傲 ê 一項代誌。這个距離翕著 ê 這張望遠鏡深空影像，差不多是 80 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241108/ 影像：Francesco Radici 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241108.html Powered by Firstory Hosting

這張 美麗 ê 星際景色 Arp 227 是 1996 年 ê「特殊星系圖集」內底 ê 一个特別 ê 星系系統。這个系統 tī 雙魚座方向 1 億光年遠 ê 所在。相片中央倚 倒反頂懸 ê Arp 227 其實是 2 个星系，雲殼星系 NGC 474 kah 伊附近 ê 捲螺仔星系 NGC 470。NGC 474 有 顯目 ê 雲殼 kah 恆星流，應該是 10 億年前 kah 另外一个較細 ê 星系相倚 ê 時陣，受著潮汐力 ê 影響造成--ê。正爿下底 ê 大粒星系 NGC 467 嘛有 雲殼 kah 恆星流，表示講這應該嘛是另外一个 合併星系系統。視野內底閣有足濟美麗 ê 背景星系，前景是 銀河系 內底 ê 天星。這張望遠鏡景色有 25 角分，差不多佔 天頂 ê 一半。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241107/ 影像：George Williams 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241107.html Powered by Firstory Hosting

紫金山-ATLAS 彗星 這馬欲轉去 外太陽系 矣。這粒大粒垃圾雪球 tī 地球 10 月份 行到 太陽附近 ê 時陣，變做是夜空中予人 印象足深 ê 天體，逐家嘛翕著足濟足媠 ê 相片。這張相片 是 10 月中翕--ê，有一條顯目 ê 倒反彗尾。這張相片有翕著 彗星 C/2023 A3 (紫金山-ATLAS 彗星) 長長 ê 塗粉 尾溜 kah 離子 尾溜，方向是指向離開日頭 ê 方向。毋過 內底有較大粒塗粉粒 ê 倒反彗尾，方向是指向 日頭 落去 ê 方向。前景是 意大利 ê Tai di Cadore 庄頭，背景是 足懸 ê Dolomite 山脈。另外一粒 彗星 C/2024 S1 (ATLAS 彗星) 進前去予人認為 kah 紫金山-ATLAS 彗星 有通比並，毋過伊頂禮拜接近太陽 ê 時陣 煞 散去 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241106/ 影像：Alessandra Masi 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241106.html Powered by Firstory Hosting

木星頂懸彼粒烏斑是啥物？無人知影。NASA ê 機器人太空船 Juno 飛過 木星 ê 時陣，翕著這个 一直攏烏烏 ê 雲，咱 kā 叫做 深坑。邊仔 ê 雲 ê 圖樣表示講，深坑 是 一个 捲螺仔旋 ê 中心。因為 木星大氣 ê 烏色雲 比 淺色雲 較深，所以這个 深坑 看起來就親像是一个 足深 ê 空。毋過咱目前猶無證據，較歹講。深坑 邊仔是一寡複雜、彎彎曲曲 ê 雲 kah 捲螺仔風 風暴系統。有一寡 tī 上懸海拔 ê 雲就是淺色--ê。這張圖 是 2019 年 Juno 太空船飛過 木星雲頂 1 萬 5000 公里懸 ê 時陣翕--ê。後一擺 Juno 太空船 飛過 木星，會發生 tī 3 禮拜後。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241103/ 影像：NASA, Juno, SwRI, MSSS 資料：Gerald Eichstädt & Sean Doran 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241103.html Powered by Firstory Hosting