Fólkið á Norðurlandi vestra

Að þessu sinni var rætt við Lindu Fanney Valgeirsdóttur, framkvæmdastýru nýsköpunarfyrirtækisins Alor sem er að þróa umhverfisvænar álrafhlöður. Linda Fanney ólst upp á bænum Vatni á Höfðaströnd í Skagafirði og er faðir hennar, Valgeir einn af stofnendum Alor. Í þættinum segir Linda Fanney frá fyrirtækinu Alor og hvernig er að starfa við nýsköpun.

Margrét er verkefnastjóri textílab á Blönduósi. Í þættinum segir hún okkur frá textíllabinu, hvaða tæki eru í boði og hvernig er hægt að nýta smiðjuna.

Sólveig Pétursdóttir og Þuríður Helga Jónasdóttir (Solla og Helga) eru búsettar á Hofsósi og stofnuðu Verðandi endurnýtingarmiðstöð. Markmiðið þeirra er gefa hlutum sem stendur til að henda nýtt líf með því að endurnýta þá og draga þannig úr sóun. Í þessum þætti segja þær okkur betur frá því hvað Verðandi Endurnýtingamiðstöð er, hvaða verkefni þær eru að fást við, hvað drýfur þær áfram og hvernig þær sjá framtíðina fyrir sér. 

Viðmælandi þáttarins að þessu sinni er viðburðastjórinn Jóhann Daði Gíslason. Hann hélt stærstu jólatónleika ársins í landshlutanum, Jólin heima, um miðjan desember í Varmahlíð. Í þættinum ræðir Jóhann við Helga Sæmund Guðmundsson um viðburðahald í landshlutanum. Þeir hafa báðir reynslu af slíku og ræða tækifærin og áskoranir og mikilvægi þess að halda menningarviðburði í heimabyggð þar sem tónlistarfólk fær tækifæri til að koma fram. Einnig var rætt um jólin í Skagafirði, hefðirnar og árlegu jóla viðburðina.

Sandra Granquist er búsett í Húnaþingi vestra. Hún er doktor í vistfræði sela, deildarstjóri selarannsóknardeildar Selaseturs Íslands og sérfræðingur hjá Hafrannsóknastofnun. Sandra er frá Svíþjóð en flutti til Íslands fyrir 24 árum. Hún segir okkur frá starfinu, áhugamálinu sem hefur undið aðeins upp á sig og hvernig er að búa á Norðurlandi vestra. 

Guðbjörg Halldórsdóttir flutti nýlega með manninum sínum og þremur börnum á Sauðárkrók. Hún hefur nú tekið til starfa sem leikskólastjóri á leikskólanum Ársölum. Hún segir okkur frá búferlaflutningunum, tækifærunum á Norðurlandi vestra og nýja starfinu. 

Edda Brynleifsdóttir á og rekur verslunina Hitt og þetta á Blönduósi. Hún segir okkur frá versluninni, viðskiptavinum hennar, staðsetningunni og hvað henni líkar best við að búa á Blönduósi og á Norðurlandi vestra. Stutt en áhugavert spjall við konu sem lætur fátt stoppa sig.

Sigurður Hauksson, forstöðumaður skíðasvæði Tindastóls, hefur undanfarin ár búið í Bandaríkjunum en er nú búsettur í Skagafirði. Hann er stórhuga varðandi skíðasvæðið og stefnir að því að breyta svæðinu í heilsársstarfi með spennandi hjólabrautum.

Sigrún Helga Indriðadóttir er borin og barnfædd Skagfirðingur og býr á bænum Stórhóli í Lýtingsstaðahreppi. Sigrún er bóndi, listamaður og smáframleiðandi. Á Stórhóli er að finna Rúnalist Gallerí, en það er vinnustofa og lítil búð þar sem selt er handverk og afurðir búsins. 

Landsliðskokkurinn Kristinn Gísli Jónsson hefur unnið fjölda verðlauna í matreiðslu og unnið á flottustu veitingastöðum landsins. Í hlaðvarpsþættinum segir hann okkur frá ævintýrum sínum sem kokkur en hann snéri aftur heim í Skagafjörð í heimsfaraldrinum og matreiðir nú á Gránu Bistro á Sauðárkróki.

Viðmælanadinn þáttarins er listakonan Hólmfríður Dóra Sigurðardóttir. Hún er með vinnustofu við Vatnsdalshóla þar sem hún gerir allskyns listaverk á borð við málverk, handmáluð kerti, kort, skrautskrifuðu skjöl undir nafninu Listakot Dóru. 

Elínborg Erla Ásgeirsdóttir rekur litla garðyrkjustöð í Skagafirði undir nafninu Breiðargerði þar sem framleitt er ferskt grænmeti og afurðir úr því.

Helgi Sæmundur Guðmundsson, tónlistarmaður og annar liðsmaður hljómsveitarinnar Úlfur Úlfur segir okkur frá því hvernig er að vera tónlistar- og allt muligt maður úti á landi.

Ólína Sif Einarsdóttir flutti nýlega aftur heim á Sauðárkrók eftir nám í grafískri hönnun í Bandaríkjunum. Hún starfar nú sem sjálfstætt starfandi hönnuður undir nafninu ÓE Design. Meðal þeirra verkefna sem hún sinnir eru plakötin Bærinn minn, lógó hönnun, nafnspjöld, uppsetning á auglýsingum og bæklingum. 

Í febrúar 2021 stóð SSNV fyrir samtalsröð á facebook undir yfirskriftinni Spjallað um landbúnað. Einn viðmælanda var Hólmfríður Sveinsdóttir, ráðgjafi á sviði nýsköpunar hjá Mergi ráðgjöf og er spjallið við Hólmfríði hér birt í heild sinni. Hólmfríður hefur áralanga reynslu í nýsköpunargeiranum og hefur skýra sýn á þau tækifæri sem í henni felast.

Flestir Íslendingar þekkja Vilko en færri vita að fyrirtækið er staðsett á Blöndósi og hversu viðamikil starfsemi fyrirtækisins er. Kári Kárason framkvæmdastjóri segir okkur allt um það og deilir meira að segja með okkur í lokin nýrri útfærslu af kakósúpunni víðfrægu sem fyrirtækið framleiðir sem krakkar eru víst afar hrifnir af.

Það er óhætt að segja að í Skagafirði drjúpi saga af hverju strái og það er einmitt hún sem er í lykilhlutverki á sýningunni 1238 sem opnaði árið 2019 á Sauðárkróki. Þar eru sögunni gerð skil og miðlað með nýjustu tækni á afar vel heppnaðan hátt. Áskell Heiðar Ásgeirsson segir okkur frá sýningunni og því sem þar er boðið upp á.

Við lítum við í Spákonuhofi á Skagaströnd og spjöllum við Dagný Marín Sigmarsdóttur sem þar er í forsvari. Dagný segir okkur frá hugmyndinni með sýningunni sem þar er að finna, hvernig þar er tekið á móti gestum og ýmsu fleiru sem tengist spádómum. Í lokin er svo hægt að heyra Dagný lesa í rún sem dregin er.

Við hittum Katharinu Schneider verkefnisstjóra í Textílmiðstöð Íslands í sögufrægu húsi Kvennaskólans á Blönduósi.Vð forvitnuðumst um þá starfsemi sem fer fram í húsinu og kynntumst Katharinu sjálfri.

Evelyn Ýr Kuhne á Lýtingsstöðum í Skagafirði hefur ásamt fjölskyldu sinni byggt upp öfluga ferðaþjónustu með íslenska hestinn, hestaferðir og hestasýningar í forgrunni. Samhliða þessu hefur Evelyn tekið virkan þátt í uppbyggingu ferðaþjónustunnar í landshlutanum og fékk á dögunum viðurkenningu frá Markaðsstofu Norðurlands fyrir störf sín í þágu ferðaþjónustunnar.

Það er heilmikið að gerast á skíðasvæðinu Tindastóli. Viggó Jónsson framkvæmdastjóri tekur á móti okkur í skíðaskálanum og segir okkur frá þeirri uppbyggingu sem hér er í gangi, framtíðarplönin og annað sem hann er að sýsla við. Nýverið var skrifað undir styktarsamning mili AVIS og skíðadeildarinnar og á myndinni sjást Baldur Sigurðsson, umboðsmaður AVIS á Sauðárkróki, Viggó (2. frá vinstri), Axel Gómez framkvæmdastjóri AVIS og Arnþór Jónsson, sölustjóri (Mynd PF).

Karólína í Hvammshlíð kallar ekki allt ömmu sína. Hún flutti íbúðarhúsið sitt úr Hegranesi í Skagafirði yfir í Hvammshlíð í Austur Húnavatnssýslu. Þá hafði jörðin verið í eyði í 130 ár og býr þar með hundunum sínum tveimur og 50 kindum. Hún hefur búið sér hlýlegt heimili og sinnir hinum ýmsu verkefnum auk búskapar. Við tókum hús á Karólínu, áttum hjá henni góða stund og heyrðum af hennar högum.

Jóhannes Gunnar Þorsteinsson starfar sem tölvuleikjahönnuður í Vesturárdal í Húnaþingi vestra. Hann starfar aðallega fyrir Hollenskt fyrirtæki og á í samstarfi við aðila út um allan heim - allt af skrifstofunni sinni á Kollafossi. Við fengum að heyra hvaða leið Jóhannes fór til að mennta sig í leikjahönnun og hvað hann gerir til að viðhalda tengslum við leikjaheiminn þó hann sé búsettur fjarri honum.

Dr. Vilhelm Vilhelmsson er forstöðumaður Rannsóknarseturs Háskóla Íslands á Norðurlandi vestra.Vilhelm er doktor í sagnfræði og lék okkur forvitni á að vita hvernig það er að vera fræðimaður á landsbyggðinni og hvaða tækifæri eða áskoranir felast í því.

Hallbjörn Björnsson er ráðgjafi í viðskiptagreind og fjármálum hjá Capacent á starfstöð fyrirtækisins á Sauðárkróki. Hann er einn af þeim sem tók starfið sitt með heim og nýtur nú náttúrunnar í Skagafirði og þeirra fjölmörgu tækifæra sem hún býður upp á til útivistar og annarra ævintýra.

Laufey Leifsdóttir, náttúrubarn og frístundabóndi, er ritstjóri hjá Forlaginu.Þegar Laufey fluttist í Skagafjörðinn tók hún starfið sitt með sér og er forvitnilegt að heyra hvernig það kom til og hvaða kosti það hefur.

Jóhanna Erla Pálmadóttir á Akri í Austur-Húnvatnssýslu er mörgum að góðu kunn fyrir störf sín tengd textíl í hinum breiðasta skilningi. Við tókum hús á Jóhönnu og ræddum við hana um handavinnuáhugann, verkefnin sem hún hefur ráðist í og auðvitað um fálkaorðuna sem hún var sæmd sumarið 2019.

Þröstur Erlingsson og kona hans Ragnheiður Lára Brynjólfsdóttir stunda blandaðan búskap í Birkihlíð í Skagafirði. Þau hafa stigið áhugaverð skref í átt til þess að auka virði framleiðslu sinnar með því að koma upp kjötvinnslu á bænum. Þröstur segir okkur frá því hvernig það hefur gengið og hvað hefur helst komið á óvart við að vera í beinum tengslum við neytendur.

Guðrún Helga Magnúsdóttir er í hópi unga fólksins sem ákveður að flytja aftur heim að loknu námi. Hún er Zumba- og jógakennari, nuddari, starfar sem leiðbeinandi með umsjón í 7. bekk Grunnskóla Húnaþings vestra og hyggur á kennaranám.

Í Vörusmiðju BioPol á Skagaströnd hefur verið komið upp vottuðu vinnslurými fyrir smáframleiðendur sem vilja vinna framleiðsluvörur sínar sjálfir. Þar ræður ríkjum Þórhildur M. Jónsdóttir matreiðslumeistari og aðstaðar hún viðskiptavini við vöruþróun og framleiðslu. Hún framleiðir líka sjálf gómsæta heitreykta bleikju.

Sópransöngkonan Helga Rós Indriðadóttir er búsett í Varmahlíð í Skagafirði. Hún hefur komið að mörgum metnaðarfullum menningarverkefnum þar í sveit og segir okkur frá því hvernig það er að vera listamaður á Norðurlandi vestra. 

Það eru ekki margir sem geta státað af því að búa á menningarsetri.Birta Þórhallsdóttir býr í menningarsetrinu Holti á Hvammstanga og starfrækir þar örbókaútgáfuna Skriðu, heldur menningarviðburði og sinnir eigin skrifum og þýðingum.Hún segir okkur frá listinni, húsinu sínu og af hverju hún ákvað að kaupa sér hús á Hvammstanga.

Hrefna Jóhannesdóttir hefur marga hatta. Hún er skógarbóndi, skipulagsfulltrúi , oddviti og ýmislegt fleira. Hún býr ásamt fjölskyldu sinni á Silfrastöðum í Akrahreppi í Skagafirði á skógræktarjörð. Hún segir okkur frá hvaðan skógræktaráhuginn kemur og tækifærunum í skógræktinni, störfum sínum sem hún vinnur mikið til í fjarvinnu af heimili sínu á Silfrastöðum og oddvitahlutverkinu svo fátt eitt sé talið. 

Hvað verður til þess að ungur lögfræðingur í Reykjavík ákveður að sækja um sveitarstjórastöðu á Norðurlandi vestra.Alexandra Jóhannesdóttir sveitarstjóri á Skagaströnd tók þá ákvörðun, fékk starfið og fluttist norður. Hún segir okkur frá störfum sveitarstjóra og hvernig hún kann við sig á Norðurlandi vestra.

Hann fluttist til Hvammstanga frá London árið 2015 eftir að hafa starfað þar við leiklist, leikstjórn, kennslu og hjá ferðarisanum Expedia.Fékk starf sem framkvæmdastjóri Selasetursins á Hvammstanga og hefur látið til sín taka í menningarmálum svo eftir er tekið.Sigurður Líndal spjallar við okkur um mikivægi menningar fyrir byggðarlög og segir frá þeim verkefnum sem hann hefur staðið fyrir á Norðurlandi vestra.

Hann hefur vakið athygli fyrir störf sín við kennslu og kennsluráðgjöf hér heima og erlendis. Er duglegur við að miðla þekkingu sinni og fékk einstakt tækifæri til að stunda nám við Stanfordháskóla í Bandaríkjunum. Ingvi Hrannar Ómarsson smitar okkur af krafti og orku þegar hann segir frá áhuga sínum á kennslu og frá sýn sinni og lífsspeki.

Karen Helga Steinsdóttir býr í Víkum á Skaga í Skagabyggð ásamt Jóni manni sínum og syni þeirra. Svo eiga þau von á öðru barni í sumarlok. Auk þess að reka sauðfjárbú er Karen sveitarstjórnarmaður og líklega með yngri slíkum á landinu aðeins 24 ára gömul. Karen segir okkur frá lífinu í Víkum og hvernig það er að vera sveitarstjórnarmaður í 97 manna sveitarfélagi.

Kristín Guðmundsdóttir vildi ekki líta um öxl og sjá eftir því að hafa ekki stokkið þegar henni og Þorvaldi eiginmanni hennar bauðst að kaupa niðurnídd gróðurhús á Laugarbakka og hefja þar ylrækt. Auk þess litar Kristín garn undir merkjum Vatnsnes Yarn auk þess að hanna og smíða vefsíður undir merkjum dóttir vefhönnun. Kristín segir okkur frá öllu því sem hún er að sýsla og hver draumurinn er með ræktunina í Skrúðvangi.

Í bílskúr á Sauðárkróki hefur Magnús Freyr Gíslason komið sér upp verkstæði þar sem hann hannar og smíðar húsgögn undir merkjum Gagn. Magnús er bæði arkitekt og húsgagnasmiður en húsgagnasmíðinni lauk hann í helgarnámi hjá Fjölbrautarskóla Norðurlands vestra. Magnús segir okkur frá hugmyndinni að bak við Gagn, hvaðan hann fær innblástur og hvernig gengur að smíða hinn fullkomna stól. 

Það eru tæplega margir framkvæmdastjórar sem nýta sumarfríið sitt í strandveiðar. Halldór Gunnar Ólafsson framkvæmdastjóri BioPol er einn þeirra. Borinn og barnfæddur Skagstrendingur sem kom til baka eftir háskólanám og stýrir nú 8 manna rannsóknarstofu á Skagaströnd og Matarsmiðjunni sem er vottað vinnslurými fyrir matvælaframleiðendur. Halldór segir okkur frá því hvað það er sem drífur hann áfram og af hverju hann velur að búa á Norðurlandi vestra.

Þórey Edda Elísdóttir var nú ekkert alltof spennt að flytja á Hvammstanga þegar það barst í tal milli hennar og Guðmundar Hólmars Jónssonar sambýlismanns hennar. Þegar hún fékk þar vinnu á verkfræðistofu ákvað hún að láta slag standa og sér ekki eftir því. Þórey Edda segir okkur hvað hún gerði til að komast hratt inn í samfélagið og hvað kom henni helst á óvart við að búa á Norðurlandi vestra.

Af einstökum eldmóði hefur Sigurður Hansen ásamt fjölskyldu sinni byggt upp einstakt sögusetur á Kringlumýri í Skagafirði, stað þar sem sagan drýpur af hverju strái. Listaverkið Grjótherinn var fyrsti áfanginn en Sigurður segist hafa fengið hugmynd að verkinu og byrjað á henni daginn eftir. Kakalaskálinn kom næstur þar sem hann breytti minkahúsi í sal þar sem hann hefur haldið sögustundir, tekið á móti hópum og farið í gegnum sögu svæðisins sem hann þekkir svo vel. Nýjasta viðbótin er svo sýning með einstökum listaverkum um sögu Þórðar Kakala. Sigurður segir okkur frá framkvæmdunum og hugsuninni á bak við þær.