Noss chors

Differentas furmaziuns da jodel emplaina l'ura da «Noss chors». I vegn chantà d'amur, da patria ed anc bler auter. L'emissiun porta chant da jodel plain variaziun. Chors pli gronds sco il «Frauenjodelchörli Stailalva» sco era furmaziuns pli pitschnas sco il «Jodelduett Seraina & Ladina Hug» u il «Jodelduett Pizokel» mussan ch'i vegn jodlà er en il chantun Grischun.

Chantar ensemen fa bain a l'olma, u betg? Noss chors ha rimnà ina schelta da chanzuns popularas rumantschas, tudestgas, franzosas e talianas. Ina u l'autra chanzun è segir era gia stada part d'in chant da cumpagnia ad ina u l'autra festa. Cun chanzuns sco «Mis Büeli», «Quattro cavai che trottano» fin tar «Tumasch da la pasch» u «Chante en mon coeur» datti in viadi popular cun variaziun linguistica. Sper insaquantas chanzuns fitg enconuschentas preschenta Noss chors era ina u l'autra melodia populara main renumada – tgi sa, forsa sa mida quai suenter quest'emissiun.

En noss mintgadi plitost hectic emblid'ins mintgatant ils muments quiets. Cun la musica dad oz envida Noss chors da prender peda exact per quests. Dad uraziuns da l'Africa dal Sid sco «Indodana» fin tar chanzuns rumantschas sco «Consolaziun» da Gion Balzer Casanova datti d'udir oz in pau dal tut. Tut las chanzuns cuntegnan en ina u l'autra moda ina sort calma che duai animar da tschertgar la quietezza en noss mund ch'è tut auter che quiet.

I sa di ch'il mais da matg saja er il mais da l'amur. Noss chors chantan perquai chanzuns da la charezza. Primavaira - la natira sa desda, las temperaturas vegnan pli chaudas ed ils dis pli lungs. Il medem capità sin ina moda er cun ils umans. Els sa legran, han plaschair da quest temp. Sentiments sa sveglian u sa dasdan puspè. Questas emoziuns vegnan er descrittas en chanzuns sco per exempel «Sch'eu füss ün'utschella», «La rosa mia» u «Tu sei la mia vita». En l'emissiun dechantan noss chors grischuns e rumantschs talas chanzuns.

Per il mais da matg datti uschè bleras chanzuns sco per nagin auter mais da l'onn. Durant l'ura da Noss chors udis ina schelta da chanzuns da quest mais. I vegn chantà da siemis, miraclas ed auter pli. Chanzuns sco «Siemis da matg» da Gion Antoni Derungs u «Mai» dad Armon Cantieni emplainan l'emissiun dad oz cun tuns e suns primavauns rumantschs. Sper diversas cumposiziuns da cumponists or dal ravugl rumantsch, datti d'udir er ina u l'autra chanzun tudestga ed englaisa. «This sweet and merry month of May» u «Komm lieber Mai und mache» procuran per variaziun linguistica e stilistica.

I vegn chantà da plievgia, neglas, terra ed auter pli. Cun in matg da chanzuns faschain nus in viadi auditiv tras la natira. Tuns e texts da l'emissiun dad oz preschentan tut sias bellezzas. Noss chors fa viadi tras la natira – in tema adina puspè preschent en la litteratura da chors rumantscha. Mintgatant emblid'ins tge bels stgazis che la natira porscha. Ina selecziun da chanzuns che raquintan tranter auter da cuntradas, lieus e plantas che represchentan las bellezzas da nossa natira.

«Suisse Romande en musique»: quai il motto da quist'ura da musica. Differentas furmaziuns da la Svizra franzosa fan resunar differentas chanzuns popularas da lur regiuns. Durant quest'ura da Noss chors vegnan chantadas da tuttas sorts chanzuns – il fil cotschen: chant franzos. Sper intginas chanzuns fitg enconuschentas, datti er ina u l'autra supresa ch'i n'è anc betg vegnida chantada uschè savens. Sa laschai suprender d'in'ura franzosa plain moviment e variaziun.

Duas furmaziuns da la Svizra tudestga chantan chanzuns popularas en dialect svizzer. Quest'emissiun porscha in viadi tras differents chantuns da la Svizra. En differents dialects vegn chantà da l'amur, da stailas u era d'in u l'auter viadi. L'ensemble «Molto cantabile» da Lucerna ed il «ChorBasel» procuran per in'ura populara plain variaziun. Sper varsaquants semperverds sco «Simeliberg», «Luegit vo Bärg und Tal» u «Stets i trure mues i lebe» datti era diversas chanzuns popularas in pau main enconuschentas.

Differentas furmaziuns chantan oz per talian. Chanzuns popularas talianas emplainan quest'ura da «Noss chors». I sa tracta d'ina maschaida da chanzuns tradiziunalas ed in u l'auter arranschament che cuntegna intginas sgnoccas ed inqual experiment. Goccia di voci, Corale Pro Ticino San Gallo, Chors dals Paslers ed il Kammerchor Chur procuran per in'ura cun chant talian che porscha adina puspè era tuns e suns plain umor. I vegn chantà da l'amur, da la furmicla ed il grigl, da musicists, d'in bel glindesdi ed anc bler auter.

Per il disc cumpact «Ragischs» ha l'ensemble Cantus Firmus Surselva registrà l'onn 2017 ina bouquet da chanzuns rumantschas. L'emissiun «Noss chors» lascha resunar in project da chor enramà d'in duo instrumental. Tgirar la chanzun rumantscha: quai il motto dal project «Ragischs» ch'il Cantus Firmus Surselva ha realisà l'onn 2017. Ensemen cun ils dus musicists Domenic e Curdin Janett èn els ids a la tschertga da ragischs rumantschas. Ina maschaida da chanzuns pli veglias e tuns pli giuvens mussa ch'i dovra omadus per che noss stgazi da chanzuns vegnia mantegnì.

Differentas furmaziuns chantan chanzuns ritmicas, melodiusas, fitg allegras e pli pensivas. L'ura da «Noss Chors» porscha chant per in e scadin. En l'archiv dad RTR sa chatta ina enorm gronda tscherna da chanzuns da chors. Ina schelta da chanzuns da tut gener emplaina l'emissiun dad oz. En crusch ed en travers chantan differentas furmaziuns davart tuttas sorts tematicas. Dapli registraziuns da chors chattais era en il «Play Festas».

Differents ensembles vocals pitschens da la Svizra procuran per in'ura da musica plain moviment. Ensembles virils, da dunnas ed era maschadads chantan differents arranschaments da chant «a capella». Dezibelles, Quite Loud, Ensemble Noctuor, touChant a capella, Ostinato Luzern, Vocabular e Cantuccini procuran per in'ura da chant «a capella». I sa tracta qua da gruppas vocalas pitschnas che chantan arranschaments vocals da tut gener – d'arranschaments da rock e pop enfin tar in u l'auter arranschament popular porscha quest'emissiun musica vocala per in e scadin.

En in u l'auter lieu stendan las emprimas fluras da primavaira lur chaus vers il sulegl ed uschia sco che las fluras auzan era ils chors lur vuschs en nossa emissiun. Per blers è la primavaira il temp da ventira. I sa tracta dal temp da colurs, da las flurs e da la natira che sa dasda. Cun observar bels purtrets da la natira pon ins tadlar il chant d'utschels ubain in tscherna da chanzuns da «Noss Chors». Quest'ura da musica vegn emplenida cun chant primavaun.

Il Cor Proget 2000 preschenta in tagl tras la musica vocala da las duas valladas. Igl è in project d'avant 25 onns. L'onn 2000 ha il chor da project da Curdin Lansel, il Cor Proget, realisà in project sut il titel «Ün tagl tras la musica vocala d'Engiadina e da la Val Müstair. Il project è stà accumpagnà d'ina pitschna exposiziun movibla ed il linguist Chasper Pult ha commentà ils concerts. Uss, 25 onns pli tard, regorda l'emissiun Noss chors a quest project.

Il cumponist turitgais ha ina colliaziun stretga cun il Grischun e la Svizra rumantscha. Hans Lavater vegn or d'ina veglia famiglia da Turitg ed è naschì ils 24 da favrer 1885. Suenter il gimnasi ha el frequentà in studi da chemia. En ses temp liber ha el però fatg musica, emprendì da sunar clavazin e cello ed era gia empruvà da cumponer emprimas chanzuns. La finala è Hans Lavater sa decidì da daventar musicist da professiun. Dentant era sco cumponist è el sa profilà. El ha scrit passa 100 chanzuns cun texts tudestgs, franzos ed era rumantschs («Al pur grischun», «Ma chara val», «Ei tucca da notg»). Noss chors fa omagi a Hans Lavater ch'aveva er ina colliaziun stretga cun il Grischun. Dal 1932 fin il 1943 ha el dirigì il chor viril Ligia Grischa.

Cantapella Helvetica ed Americas Vocal Ensemble – ils dus chors preschentan musica spagnola ed argentina. «Cordoba» è il titel d'in disc cumpact che l'ensemble vocal Cantapella Helvetica ha publitgà avant 25 onns. Sin quest portatun sa chatta tranter auter musica spagnola da Antonio José e da Mario Tedesco Castelnuovo. En l'emissiun udin in concert da l'onn 2000 en la baselgia Grossmünster a Turitg. Il dirigent è Christoph Cajöri. Il segund ensemble vocal vegn dals Stadis Unids: Americas Vocal Ensemble. Quel è vegnì fundà il 1982 da la dirigenta Nelly Vuksic. Sin ses album dal 1988 «Serenata» preschenta l'ensemble chanzuns ed ovras da cumponists argentins sco Carlos Guastavino, Adolfo Peralta Dávila u Carlos Rausch.

«Noss Chors» dat in sguard enavos sin in'occurrenza da chant ch'ha gì lieu avant bundant in onn. En il rom da la concurrenza svizra dals chors è Cuira numnadamain daventada la cità dal chant, almain per ina singula fin d'emna. Cun chant da furmaziuns da l'entira Svizra sco «touChant a capella», «ChorBasel», «Vokalensemble Zürich West» u «Männerstimmen der Singknaben Solothurn» lascha «Noss chors» resunar anc in giada ina part da las producziuns da la Concurrenza svizra dals chors dal favrer passà. Ina paletta da chanzuns plain moviment e variaziun procuran per in'ura da chant per in e scadin.

Vuschs giuvnas che represchentan lur stretga colliaziun cun la tradiziun da chor grischuna sco era lur mirveglia da scuvrir chant che deriva da culturas dal tuttafatg differentas: quai è il nov disc cumpact «Sulegl VIII» dal «Ensemble vocal incantanti». «Noss Chors» preschenta il nov album da l'«Ensemble vocal incantanti». Chanzuns da differents cumponists grischuns sco Tumasch e Benedetg Dolf, Curò Mani-Vital u era Christoph Cajöri represchentan lur stretga colliaziun cun la patria. La chanzun «Sulegl VIII» da Gion Andrea Casanova, cun text dad Arnold Spescha ha ina muntada tut speziala per l'ensemble giuvenil. Perquai ha era l'entir album survegnì quest titel. Sper varsaquantas chanzuns da cumponists indigens porscha l'album era in u l'autra excursiun en l'exteriur. Cun «Time» da Jennifer Lucy Cook u era cun la chanzun filippina «Kruhay» da Beny F. Castillo demussan las vuschs giuvnas quant divers che chant da chor dastg'esser.

Bischa, scrottas da naiv, cuntrada alva... la naiv ha inspirà blers cumponists da scriver chanzuns davart la naiv. Quest enviern è la naiv vegnida a dretg temp ed ha carmalà fullas da glieud sin las pistas ed or en la natira. Er ils divers chors e furmaziuns pitschnas dechantan en numerusas chanzuns la naiv, il scursalar ed ir cun skis ed ils divertiments che la «materia alva» porta. In'ovra mussa dentant er il privel da la naiv, «La lavina» da Duri Sialm. D'udir èn tranter auter ils chors d'uffants da Trun, Mustér, Scuol e Sent u er il Singkreis Adula, il Cor mixt Samedan u il Rudè da chant Engiadina.

Sper ils gronds hits en il mund da chors, cuntegna noss archiv era ina u l'autra registraziuns ch'ins auda betg uschè savens en il radio. L'emissiun «Noss Chors» preschenta ina schelta da quellas. En l'archiv dad RTR sa chatta ina enorm gronda tscherna da chanzuns da chors. I sa tracta d'ina collecziun da chanzuns pli veglias fin da quellas actualas ch'èn vegnidas registradas durant ils ultims onns. Differentas furmaziuns chantan chanzuns davart tematicas sco natira, notg, far viadi ed anc bler auter – tut registraziuns ch'ins n'ha betg anc udì uschè bler enfin ussa. Dapli registraziuns da chors chattais era en il «Play Festas».

Per las «Gratulaziuns», il «Concert sin giavisch» u era ils «Giavisch da chatscha» vegnan giavischadas gugent chanzuns da «Noss Chors». En quest'emissiun tadlain nus quellas ch'èn vegnidas giavischadas il pli savens durant l'onn passà. Sco mintg'onn dat «Noss Chors» in sguard enavos sin l'onn passà cun guardar tgeninas chanzuns da chor ch'èn vegnidas giavischadas il pli savens durant l'onn 2024. Era quest onn han audituras ed auditurs savì tadlar insaquants favurits bain enconuschents. Ina u l'autra nuvella procura dentant era per surpresas en la rangaziun.

Chanzuns da fitg different stil e tempra emplainan quest'emissiun da «Noss chors». Furmaziuns indigenas, ma era chors d'ordaifer la Svizra procuran per in'ura da musica varianta e divertaivla. Ina tscherna da chanzuns a capella che derivan da spartas da musica dal tuttafatg differentas garanteschan in ura da musica fitg animada. Cun chanzuns popularas d'auters pajais sco «Four Old Hungarian Folksongs» da Béla Bartók, in u l'auter tun spiritual sco «Witness» u chanzuns tradiziunalas rumantschas sco per exaimpel «Fila, Fila» u «La sfranzinella» porscha Noss chors in'ura da chant per in e scadin.

Cun in bouquet da chant popular e chant spiritual sa deditgescha «Noss chors» a differentas chanzuns per l'ultim di da l'onn. In differents vitgs vegn tgirada ina tradiziun da chant ad hoc per prender cumià da l'onn vegl – per gronda part ha l'occurenza lieu en il liber. A Bravuogn ed a Lantsch sa numna questa tradiziun «Chant da Goita». Mintg'onn resuna in repertori da chant spiritual e chant popular dal 18 e 19avel tschientaner tras las giassas da quests dus vitgs. Ina part da las chanzuns derivan dals cumponists svizzers: Schmidlin e Bachofen. Sper la chanzuns chanzuns da Goita ch'èn vegnidas registradas dals 2001 cun in chor ad hoc, sut la direcziun dad Iso Albin, porta «Noss chors» anc ina u l'autra ulteriura chanzun da Silvester.

«Noss chors» porta in'ura da chant da Nadal rumantsch. Differents chors ed ensembles vocals procuran per tuns e suns festivs en tut sias colurs e fassettas. Nadal en vitg e val – differentas furmaziuns dechantan la vegnida dal Messias. L'emissiun «Noss chors» porta ina variaziun da chanzuns da Nadal en differents idioms rumantschs sco per exempel: Tedlei o fideivels, Nadal-Nadal, Gesu, tü meis Signur, Glisch nuviala, O stalla ventireivla, Chanzun da Nadal, Bunas novas u era Clara notg.

Sper celebrar quest giubileum datti er anc in concert da l'ensemble vocal incantanti ed il Chor mischedau Surrein. L'onn 1994 ha Hansruedi Kämpfen inizià e fundà il Schweizer Jugendchor, il Chor da giuvenils svizzer ed è stà fin il 2018 il manader artistic da la furmaziun. Dapi l'onn da fundaziun entusiasmeschan las giuvnas chantaduras ed ils giuvens chantadurs tranter 16 e 26 onns il publicum en ed ordaifer la Svizra. Il chor che dumbra radund 50 chantaduras e chantadur fa punts tranter las regiuns linguisticas svizras e chanta uschia chanzuns en tuttas quatter linguas naziunalas. Sper il chor da giuvenils svizzer datti d'udir en l'emissiun er dus furmaziuns grischunas. Il Chor mischedau Surrein e l'ensemble vocal incantanti han dà in concert communabel a Surrein.

Differentas chanzuns che raquintan da naiv e glatsch procuran per in'ura chantica dedichada a la magia da l'enviern. Ina duas giadas hai gia bischà – perquai derasan «Noss chors» oz anc in pau dapli atmosfera d'enviern per l'endretga luna tar la stagiun alva e mainan vus almain per in mument en in mund plain naiv. Quai tranter auter cun chanzuns sco «Tras la neiv» da Gion Andrea Casanova, «Speranza» da Gion Giusep Derungs u lura «Ils trais paslers» da Peter Appenzeller.

I savura da biscuits, la saira envid'ins ina chandaila e mintga di dastg'ins avrir ina nova fanestrina dal chalender: il temp d'advent è arrivà. Cun chanzuns dad anghels, stailas e flocs da naiv pudais As preparar per la gronda festa da Nadal ensemen cun «Noss chors». Il pled «advent» deriva dal latin e munta arrivada. Quel pled duess renviar la naschientscha dal bambin che nus festivain da Nadal. Quest'emissiun da «Noss chors» porscha tuns e suns calms che duessan procurar per ina bell'atmosfera da preparaziun per la gronda festa.

Quartets virils, maschadads e da dunnas ma er sextetts dubels chantan chanzuns da differents stils musicals. Sper ils chors datti en il Grischun sco era en Svizra bleras furmaziuns vocalas pitschnas sco quartets, quartets dubels u ensembles. L'emissiun Noss chors porta oz ina paletta da talas furmaziuns, per part cun chantaduras e chantadurs da hobbi dentant era talas cun vocalistas e vocalists professiunals. Er las chanzuns ch'ellas preschentan èn da fitg differents stils musicals.

Il chor dal radio BBC da l'Engalterra festivescha quest onn ses emprim tschientaner. Ensemen cun differents giasts han els dà in concert da giubileum plain variaziun. «Noss chors» preschenta ina schelta d'extracts da quest concert festiv. Tar ils «BBC Singers» sa tracti dal sulet chor professiunal da temp cumplain da l'Engalterra. Quest chor è ina da las sis furmaziuns da musica professiunalas dal radio BBC. Dal 1924 è la furmaziun vegnida fundada – là anc sco in chor ad hoc. Il program da lur concert da giubileum, ch'è vegnì mess ensemen da las commembras e dals commembers da la furmaziun, ha procurà per muments festivs a partir da l'emprim tun. Cun musica da Johann Sebastian Bach, Arnold Schönberg enfin tar litteratura dad Eric Whitacre porscha «Noss Chors» in'ura cun chant en las pli differentas colurs.

Era musica po dar chaud – almain al cor. «Noss Chors» preschentan oz ina schelta da chanzuns che dechantan l'amur en sias differentas fassettas. «Tumasch da la pasch», «Buna sera biala» ed auter pli: chanzuns che raquintan differentas istorgias d'amur, d'amicizias e da marusaglias emplainan l'emissiun «Noss chors».

Ils dis vegnan pli curts, las temperaturas sa sbassan ed intginas cuntradas sumeglian ina surfatscha d'aur: in indizi che l'atun è arrivà. Chanzuns che raquintan istorgias da questa stagiun, emplainan quest'emissiun da «Noss Chors». Igl è atun: las cuntradas han midà colur, ils dis èn vegnids pli curts ed ins senta ch'igl è vegnì pli fraid. Era tar «Noss chors» è l'atun arrivà. Differentas furmaziuns chantan chanzuns che raquintan istorgias da cuntradas d'aur, da randulinas che prendan cumià, da racoltas ch'èn finidas ed auter pli.

En l'emissiun «Noss Chors» na vegni per ina giada betg chantà per rumantsch.  Oz chantan «Noss Chors» en differentas linguas. In viadi linguistic procura per in'ura chantica fitg varianta. Differents chors grischuns mussan ch'els interpreteschan gugent era chanzuns en linguas estras.

«Noss Chors» sa deditgescha al chant da chor viril che ha ina gronda tradiziun en Grischun. Chant da chor, chant d'ensembles pitschens u era chant solistic procura per in'ura cun variaziun da chant dad umens. Tranter auter datti d'udir tuns e suns dal «Chor viril Mustér», il «Chor dils Larischs» ubain il «Chor viril Surses». Sper ina schelta da differents chors virils sa preschentan era furmaziuns pli pitschnas durant l'ura da «Noss Chors».

«Noss Chors» sa deditgescha oz al chant da dunnas. Chant da chor, chant d'ensembles pitschens u era chant solistic procura per in'ura chantica feminina plain variaziun. Lensemble vocal «touCHant a cappella» che consista dad otg dunnas da la Svizra tudestga dat il culp da partenza en quest'emissiun. Sper ellas datti d'udir ina variaziun da chant classic e chant popular d'ulteriuras furmaziuns da dunnas. I sa tracta da registraziuns che sa chattan gia daditg en noss fundus, ma era da chanzuns interpretadas d'ensembles pli giuvens.

Ils 6 d'october ha lieu il final da la concurrenza da chors che la EBU organisescha mintg'onn. Quest onn datti in final cun participaziun grischuna. «incantanti» è numnadamain era da la partida. «Noss chors» preschenta ils trais chors concurrents da l'ensemble vocal grischun. La Bulgaria cun il «BNR Childrens Choir», il Danemarc cun il «Copenhagen Girls Choir», la Finlanda cun «Chorus Iucundus» e la Svizra cun «incantanti». Quai èn ils quatter pajais ch'èn part dal final da la concurrenza da chors d'uffants e giuvenils da «Let the peoples sing». Questa concurrenza che vegn organisada da l'uniun da las staziuns da radio da l'Europa datti dapi il 1961. Il final da l'eveniment ha quest onn lieu per l'emprima giada en ina moda in pau speziala. I sa tracta d'in concert final decentral: mintga chor vegn registrà en ses pajais e transmess directamain a Londra tar il Radio BBC che coordinescha l'entira occurrenza. La transmissiun dal concert dad «incantanti», che represchenta la Svizra, vegn realisada e coordinada da RTR.

Animals – il fil cotschen da quest'emissiun: «Noss chors» preschentan ina schelta da chanzuns popularas che raquintan da tuttas sorts animalets. Il Chor viril Surses cun «Igl pasler e la tschuetta», La Cumbricula cun «Il silip e la furmia», il Chor mischedà Sumvitg/Cumpadials cun «Allas hirundellas» ed anc blers auters chors grischuns procuran per in'emissiun emplenida cun differentas istorgias d'animals.

L'aua: in element che dat vita. Ina tscherna da chanzuns che raquintan da plievgia, flums, lais e mar emplaina quest'emissiun da «Noss chors». Esser sper il Rom en Val Müstair, chaminar sut la plievgia u giudair ina saira tar la mar. Quai ed anc bler auter pudais Vus far durant quest'emissiun. Differents chors maschadads e chors virils chantan chanzuns che raquintan da l'aua en sias differentas furmas.

Tumasch chanta da sia Mengia e Gion Giachen è en tschertga da ses echo. Nums en chanzuns: il fil cotschen da quest'emissiun. Chanzuns che procuran per ina u l'autra risada, ma era chanzuns che raquintan per exempel da mal d'amur emplainan l'emissiun dad oz. Titels sco «Tumasch da la pasch» chantà da «La Cumbricula», u «La canzun dad Oscar» interpretà dal solist Flurin Caduff – fan part a l'emissiun dad oz. I dat d'udir ina vasta paletta d'istorginas ed istorgettas da tut gener, tuttas colliadas cun in u cun plirs nums da persunas.

E puspè èsi temp da chatscha en il Grischun. «Noss chors» preschentan oz chanzuns che raquintan da predas, culms e bler auter. Seser sin il sez aut, observar l'ur dal guaud, sa schluitar tras il chagliom e suandar als fastiz da l'animal per savair dar la fin finala il culp perfetg. Er en «Noss chors» hai bleras chatschadras e blers chatschaders che dechantan la bellezza da quest temp. Oz datti d'udir chanzuns che raquintan differentas istorgias che van a prà cun il temp da chatscha.

L'emissiun «Noss Chors» preschenta oz ina schelta da chanzuns da different gener – ina u l'autra chanzun tradiziunala svizra, ma era diversas chanzuns d'auters pajais da l'Europa. En l'archiv dad RTR sa chatta ina enorm gronda tscherna da chanzuns da chors. I sa tracta d'ina collecziun da chanzuns tradiziunalas fitg enconuschentas fin tar chanzuns pli estras che derivan da lieus pli lontans. Differents chors procuran per in'ura da chant plain variaziun.

Ina notg da stad cun in tschiel stailì e bain insatge bel? «Noss Chors» chantan oz da stailinas e stailettas. Tgi sa, forsa ch'i gartegia perfin da giudair las melodias sut in tschiel che traglischa? «Stärne», «Sterndeuter», «Notg stellida sur la mar» ed anc ina massa autras chanzuns procuran per in'ura da musica plain traglischur. Da jodel enfin classic, datti d'udir stailinas e stailettas da tut gener. Differents chors ed ensembles chantan da differentas situaziuns e differents purtrets da la notg.

Differentas furmaziuns vocalas grischunas s'inscuntran oz cun instrumentalists. In matg da chanzuns cun accumpagnament instrumental emplaina quest'ura da Noss chors. Cun chanzuns sco «Jubilate Deo», «La nona fila» u «Stägeli uf – Stägeli ab» vegn quest'ura emplenida cun ina variaziun d'arranschaments per chor ed instruments. Sper il chant datti d'udir tuns e suns da clavazin, da chapellas popularas e d'auter pli.