Nabelschau

Dank eme dumme Kommentar erreicht d'Produktion vo dem Podcast nie kännti Höhene, gwöhned eu ned dra. D'Laura isch so beschäftigt, dass sie sogar es Stelleahgebot vo de Büezerbuebe becho hed. Als chlini Marketing-Muus überleid sie sich natürlich scho, wie sich das gränzrächte Image positiv verchaufe lahd. De Johnson isch guet druf und führt churzerhand en neui Kategorie ih, "Die fünf dümmsten...". Chömeder anhand vom Titel uf s'Thema vo dere Wuche? Usnahmswiis gids kein Buechtipp, sondern en Verriss: Normal People vo de Sally Rooney cha mer sich ächt spare. Empörti Nachrichte bitte ad Laura, schöne Hinech.

D'Laura isch us ihre Ferie zrugg und hed näbe Spanisch en neue Job und en Lektion über die 14 Wältwunder im Gepäck. Für Wältwunder muess de Johnson gar ned us em Huus, irgendwänn werdeds scho mal inere Serie zeigt. Vilicht ja in Modern Family? 5 Staffle ih zwei Wuche, Wältrekord maybe? Händer au scho mal es Paket erwarted und dringend uf s'WC müesse? Im wahrste Sinn vom Wort en scheiss Situation. Chileglocke sind au scheisse, abschaffe jetzt! Buechtipp: The Martian vom Andy Weir.

"Eine weitere wunderbare Folge meines Lieblingspodcasts, ich habe selten so gelacht." Harald Schmidt

Gemischtes Hack für Armi mälded sich genauso pünktlich zrugg wie de Sleepy Joe us em Altersheim für sini Vereidigung. D'Laura hed extra uf s'Riite verzichted für die Ufnahm, sie isch aber au chli ahgfrässe gsi, well die andere Wendys ohni sie Skijöring betriebe händ. So isch das hald mit eme greglete Job, Nomitag-Events gheied in Schnee. De Johnson hed en neui Kategorie ihgführt und live on air für s'nächste Mal verbessered, ufregendi Ziite! Was es mit Eidechse-Magier und Autositz-Chopflehne uf sich hed, ghöreder dete. Buechtipp: Cien años de soledad vom Gabriel García Márquez. Falls ihr eu jetzt dänked wow, da händer sicher wieder ordentlich abgliefered, dänn drücked jetzt uf play und empfehleds eue Fründe und Familie. Wenns öpper verdient hed, dänn ja wohl mir. Bescheideheit isch en Tugend, aber was mit tugendhafte Lüüt passiert, hämmer in Game of Thrones ja gseh...

Guets neus ihr Nuggets, jetzt muess de Buuch weg! D'Laura hed 7mal Wiehnachte gfiired, de Johnson gar ned, zäme also en guete 3.5er-Schnitt. Defür hed er en Erlüchtig gha, us sine Chatze werded kei Mänsche meh - klassischs Tiertheorem, mer kännts. D'Laura hed en spontani Empfehlig für eus useghaue: Laura vom Peter Freund. 2021 wird besser als em Johnson sin Gsang, versproche.

All I want for Christmas isch kei Wiehnachtsmusig müesse z'lose und dass d'Laura regelmässig chan ufneh. 22. Folg, Schnapszahl... händer blinzled? 22 entspricht au öppe de Prosecco-Zahl vom Johnson gester Abig. Vom Hagenweg 20 isch er glücklicherwiis aber no es bizeli entfernt. D'Laura isch so richtig in Wiehnachtsstimmig, vilicht chund bald s'Rindlis bached? Spotify teilt eus übrigens mit, was ihr in letschter Ziit so glost händ, Big Brother is watching you... drum läsed doch grad 1984 vom George Orwell. Shoutout ah alli, wo d'Beschriebige läsed, you da real MVP. Vorusgsetzt, ihr losed au d'Folg hehehe. Bisous.

Geili Folg ohni Gedöns. De Johnson hed sini Nerzluune vo letscht Mal überwunde, d'Laura isch eh guet druf und über ihres Ross wird nume gseid, dass es hüt ned erwähnt wird. D'Chatze folged wiiterhin em Johnson sim Vorbild, nume chund de Dünnschiss bi ihne hald ned us em Muul. No fap, no shave, no life November. Mit de Pamela Harris zieht ändlich mal chli Strandgfühl is Wiisse Huus ih. Aber es intressiert sich eh niemert für d'Nummer zwei, au ned bi eusem Podcast, gäll Johnson? Wie passt das alles ih ei Folg? Die Norwegisch Formle hebts zäme. Mir händ abgliefered, genau wie de Brandon Sanderson. Läsed sis Züüg, er hed en 20-Jahresplan. Mir händ grad mal en Zweiwucheplan und ghöred eus drum nächst Mal wieder. Kuss ufs Aug.

23:13 am 11.11., crazy oder? Nope, d'Laura isch eifach chli dure. Zum Glück bringt de Johnson au kei Energie und inhaltlich gsehds au ned vill besser us, en wiitere Nabelschau-Klassiker also. Special Erotikroman-Tipp vo de Laura: After Passion vo de Anna Todd. Hani müesse google, inkognito natürlich.

Mir händ tatsächlich de Bundesrat Berset döffe interviewe, absolut crazy!! Isch ned alles glatt gloffe, wie chönts andersch si bi eus zwei. Suscht redet de Johnson no chli über sis ungsunde Konsumverhalte (hed en Rückfall geh...) und d'Laura hed wieder irgenden Ross-Gschicht uf Lager. Who cares, Hauptsach ihr chönd ihschlafe bim lose. Buechtipp: Momo vom Michael Ende

D'Laura erfindet live s'beschte Intro aller Ziite, unglaublich talentiert die Frau. De Johnson isch gwohnt grimmig underwägs, bi dene Fallzahle aber au keis Wunder. S'einzige wo euses Verhalte chönt ändere, wär s'Wüsse, dass de Papa Berset vo eus enttüscht isch... wemmer ussterbed, dänn wenigstens im Wüsse, dass s'intelligente Läbe ih de Milchstrass mit eus ziemlich sicher ned änded, wie eus de Johnson erklärt (er hed mal öppis vorbereited!). Churzgschicht für zwüschedure: The Last Question vom Isaac Asimov

De Fritig gids ned nume Fajitas, sondern au en Folg Nabelschau uf d'Ohre. Es muess schwierig si, monatelang öppis z'lügne und dänn sälber dra z'erchranke. Get well Donnie! D'Laura hed bald en Job und wird demit wieder es vollwertigs Mitglied vo eusere kapitalistische Gsellschaft, während de Johnson dur en Sucht an Rand drängt wird und sich drum sälber uf Entzug setzt... Buechtipp: John Williams - Augustus

Laura fucking Rindlisbacher and Motherfucker Jones back at it again. De Johnson lehnt sich zwar zrugg, isch aber trotzdem chli hässig underwägs. Prompt passiert em en grosse Fehler, aber Fertig Lustig und Fascht e(n) Familie, alles s'gliche oder? Und d'Laura... isch hald eifach d'Laura fucking Rindlisbacher. Han übrigens zweimal Rindslibacher gschriebe und müesse korrigiere, naja. Soo lang känne mer eus ja au noni. Buechtipp: The Name of the Wind vom Patrick Rothfuss.

Ihr habt lang genug gewartet, dass ein Podcast erscheint. Mir mälded eus zrugg us de unahgchündete, unbeabsichtigte Summerpause und reded scho ih de erschte zwei Minute über Sextoys - logisch, oder? Brucht de Johnson zwar ned, well er drowned momentan so richtig. Gchratzt und bisse wird au, en haarigi Ahglägeheit... d'Laura hed defür sehr vill Ziit uf de Chnü verbracht. Wait, what? Losed sälber. Buechtipp: Die Physiker vom Friedrich Dürrenmatt. Tönt nach Ufzgi, ich weiss.

The Queen is back und hed vill los, aber wenig z'verzelle. Hed eus natürlich ned devo abghalte en Stund z'fülle. De Johnson hed en Corona-Tescht gmacht und läbt no. Allgemein gilt, lieber COVID als Männerschnupfe, am I right? Buechtipp: Der Mensch erscheint im Holozän vom Max Frisch. Und losed Der Plot - Casey Affleck.

En Quickie mit em Johnson, lehned eu zrugg und lönd eu überrasche. Buechtipp: The Secret History by Donna Tartt.

"Warum liegt hier überhaupt Stroh rum?" "Warum hast du ne Maske auf?" "Na Corona halt." "Achso, na dann." De Klassiker vo de Erotikindustrie neu interpretiert dur d'Nabelschau, mit de Naddel ih de Hauptrolle. Isch also kein Tippfehler, sondern es Wortspiel. Da händer scho dänkt ihr händ eus verwütscht he? De Johnson isch sehr albern unterwägs, mir händ aber au am 23.15 ufgnoh. WSL, VBS, am Schluss no chli ASMR. Buech: To Kill a Mockingbird by Harper Lee. Vill Spass ihr Nuggets, eui Nabbels.

D'Laura wird 27i die Wuche. Ziit, um Sache z'säge wie anno dazumal... wo s'Hüftglänk noni künstlich gsi isch. Und wie mer alli wüssed, lüged Hüfte ned (SHAKIRA SHAKIRA). Es isch au es Alter, wo mer sich uf s'wichtige im Läbe besinnt, drum hed d'Laura ih dere Folg s'grosse Fründschaftsthema uspackt. De Johnson hingäge reded sich mal wieder in Rage über sini Fehlchäuf, da isch mer hald au im höche Alter ned devo gfeit. Läseempfehlig die Wuche: Am Hang vom Markus Werner.

Spati Ufnahm, Laptop-Mikro - mir mälded eus au die Wuche gwohnt professionell zrugg. De Alkohol isch in Ströme gflosse und öpper vo eus zum Pöbel-Johnson mutiert (wer das ächt gsi isch?). Am nächste Tag isch dänn de oft benutzti, aber sälte länger als bis zum nächste Wuchenänd ihghalteni Satz "Nie meh Alkohol" gfalle. Ih dere Ziit hed die ander Person sich uf em Berg zu elektronische Kläng Rösti gönnt. So cha mers au mache. Usserdem gids ab jetzt jedi Wuche en Buechtipp vom Johnson, gwöhned eu dra. Die Wuche: Stoner vom John Williams. Nabeltschau

Leude, was sölle mer säge. Es isch alles guet gange (mal abgseh vo de technische Problem) bis churz vor Schluss. Dänn ischs doch no politisch worde und mir sind wahrschinlich knapp dra verbigschlittered, vo mehrere Politiker*inne verklagt z'werde. Hoffentlich. Isch also wichtiger denn je, dass ihr alli die Folg losed, demit mir vilicht irgendwänn gsponsered werded und dänn eusi horrende Ahwaltschöste zahle chönd. Wiiteri News: Die Wuche isch d'Laura vo ihrem höche Ross gheit. Glücklicherwiis hed sie sich Airbags ahtrainiert und es isch nüt passiert. Trainiered au ihr eu jetzt eui eigene Airbags ah und wenn ihr dezue d'Nabelschau losed, düend d'Squats 20% weniger weh, versproche. Respektive nei, mir verspräched gar nüt, suscht simmer au da ahfällig für en Zivilklag. Mir lehned jeglichi Haftig ab, lose uf eigeni Gfahr.

Händer scho mal live en mental breakdown miterläbt? Passiert so oder so ähnlich scho ih de erschte 2min vo dere Folg. Jetzt ned ganz live für eu, aber ja... close enough. De Johnson hed s'Huus wieder mal verlah und prompt gnueg erläbt, um die ganz Folg mit gwohnt mittelmässigem Content (und Anglizisme) z'fülle, während d'Laura die Wuche als Geburtshälferin tätig gsi isch und eus ihri inneri alti Frau präsentiert. Die hütig Jugend isch hald au eifach unverschämt! Das und meh, hüt ih de Nabelschau.

Here we go again, de Titel isch Programm. Hämmer gmeinsam mit einige Onlinemedie wie mer ih dere Folg feschtgstellt händ. Usserdem gids s'lang ersehnte Lampe-Update 3. Dinosaur erotica is a thing, de Johnson heds nume für eu recherchiert und reded jetzt grad us unerfindliche Gründ vo sich ih de dritte Person. Isch mal en chürzeri Folg, ahgeblich isch das hüfig gwünscht worde. Find ich persönlich ja schwach, müend eui Prioritäte hald andersch setze. Vor allem jetzt wo Gemischtes Hack zwei Mönet Summerpause macht - mir sind für eu da. Bisous

Ih dere Folg gids es Lampe-Update, d'Ufzgi vo de letschte Wuche werded besproche (oder au ned GÄLL LAURA) und mir finded use, wer vo eus zwei en Sprachbehinderig hed... vilicht ja au beid? Es blibt spannend! Und jedes Mal, wemmer "vo demher" säged, müender trinke. Sorry im Voruus. Mir übernähmed kei Haftig für allfälligi Läberschäde etc. Drink responsibly und leged im ÖV Maske ah, de Papa Berset wirds eu danke. Papa Berset wär en übel guete Folgename, bin grad richtig on fire. D'Beschribig wird besser als d'Folg, aber was wett mer mache... s'einte isch hald en Gruppearbet, vo demher... trinke!

Nach eusem legendäre Träffe hämmer eus eigentlich nüme vill z'säge gha, händ aber natürlich trotzdem abgliefered. Gahd um vill alti und peinlichi Lüüt - sind mir zum Glück noni, also vill Spass.

Was händ de Kanye West und de Money Boy gmeinsam? Für was isch d'Schnürlischrift guet? Wieso weissi bim Beschriebig schribe scho nüme, über was mer gredt händ? Das und meh, hüt ih de Nabelschau.

Eue family-unfriendly Podcast isch pünktlich zrugg in besserer Qualität (zur Hälfti zumindest), mit neue Theme und alte Bekannte. Eifach purs Füür!

Die neui Folg hed wieder mal alles, was s'Herz begehrt: Seichti Unterhaltig, schweri politischi Theme und vor allem zwei Deppe, wo vom einte zum andere stolpered. Aber Leude, eifach mal de Duden läse, es hilft!

Laura & Jonathan (Jöne? Johnny? Johnson? Jones?), die neue Stern am Podcast-Himmel. Chan TikTok öppis, wer liest Erotikromän und was sölled eigentlich Tier-Insta-Profil?