Podcasts about alii

OPEN HEAVENSMATALA LE LAGI MO LE  ASO TOONAI 19 SETEMA 2026(tusia e Pastor EA Adeboye) Manatu Autu: E sili atu le iuga  (Greater is the end) Tauloto Tusi Paia: Iopu 8:7 “E ui lava ‘ina itiiti lou amataga, ‘ae matuā fa‘ateleina lou i‘uga.”Faitauga - Tusi Paia: Failauga 7:8I le soifuaga, o le iuga o soosemea e tatau ona sili le fa'ataua e ave I ai na I loo lona amataga. O a'u o le atalii o se fai faatoaga, o se tasi sa iloga le mativa, e o'o i tagata matitiva na o latou faaigoa ia te ia e mativa. Mo le ulua'i 18 tausaga o lo'u olaga, e le'i I ai ma so'u seevae peita'i ua feliuaina a'u e le Atua i se tasi ua faamanatuina e le lalolagi atoa i aso nei. Atalii ma afafine o le Atua, o le mea taua i le olaga e lē o le auala na amata ai lou soifua a o lona faagasologa ma le taunuuga. Poo le a le faaletonu ma gaoa na i ai lou tuana'i e tatau ona e agai i luma ma aua ne'i faatagaina mea na tutupu e taofia ma faavaivaia oe. Afai sa e i le loloto o le agasala mo se fa'ata'ita'iga, e ao ona e iloa o lenā ua faaolaina lou olaga ma ua lē tatau ona e manatu e lē mafaia e le Atua ona fa'aaogā oe pei ona ia faaaogaina isi. O lou tagata tuai ua tuana'i, ua e fanaufouina ma o oe o se tagata fou atoa (2 Korinito 5:17). Atonu na talitonu nisi na taunuu Elisaia i le tumutumuga o se fai faatoaga manuia i le 1 Tupu 19:19; peita'i o le mea moni faatoa amata le faamoemoe sili atu a le Atua mo lona olaga. Ina ua o'o i ona luga le aao o le Alii na avea o Ia ma perofeta tautaua ma avanoa i tupu, mālō ma tamāoaiga. A e savali moni ma Iesu, e lē faatusalia ni mea na e ausia ma maua muamua i le mamalu o le a faaalia e le Atua e ala ia te oe. Ua talanoa mai le 2 Korinito 3:1-18; i le sauniga na oo mai ai le faasala ma le faiva na o'o mai ai le amiotonu. O i na fa'atusatusa ai e Paulo le faiva na fai e Mose ma galuega a Iesu. E ui o le galuega a Mose sa na o se taimi, na fa'amatalaina lava e mamalu peita'i o lona mamalu sa lē ma faatusalia i le mamalu e faavavau ma tumau o Iesu Keriso. Poo le a lava le mamalu e te manatu ua e maua i lou olaga e oo mai i le taimi nei, e mou ese fa'atusatusa i le manuia ua teuina e le Atua mo oe. Le au pele e, e leai se mea e te lē manuia ai ma e te maua mea uma pe a tuu lou ola iā Iesu. I le Galuega 2, ina ua uma ona afio ifo Agaga Paia i luga o Peteru ma isi aposetolo, na ia lauga le talalelei ma apoapoa'i atu i e na faalogologo ia faaolaina i latou lava mai lenei tupulaga fa'api'opi'o sa o latou ola ai (Galuega 2:40). Ou te faamalosi atu fo'i ia te oe ia laveaiina oe lava mai lenei tupulaga fa'apiopio faapei o i latou na faalogo ia Peteru ona o latou talia ma le fiafia lana upu. Ou te tatalo ia ta'ita'iina pea oe e le Atua Silisiliese mai le mamalu i le mamalu i le suafa o Iesu, Amene.

OPEN HEAVENSMATALA LE LAGI MO LE ASO LULU 16 SETEMA 2026(tusia e Pastor EA Adeboye) Manatu Autu: Taitaiga Fou mai le Atua (Divine redirection)  Tauloto Tusi Paia:  Luka 1:79 “e fa‘amalamalama ai i ē nonofo i le pouliuli ma le ata o le oti, e ta‘ita‘i i o tatou vae i le ala o le manuia.”Faitauga - Tusi Paia: Galuega 9:1-8I le faitauga o le Tusi Paia i le asō, o se tamaloa e igoa iā Saulo mai Taso, o lē sa sauaina le Ekalesia a Keriso, sa agaʻi atu i Tamaseko e pu‘e faapagota tagata Kerisiano ma aumai i Ierusalema e faafalepuipui ai. Peita‘i, a'o agaʻi atu i Tamaseko, na faaali atu Iesu Keriso ia te ia, ua feliuaina ma maua se taitaiga fou mai le Atua. E sese le itu sa iai, i le sauāina o Kerisiano ma le galuega a le Atua i le lalolagi. Peita‘i, na afio mai le Atua ma feliuaina o ia ma taitai i le ala tonu. Ou te tatalo mo oe, afai e sese le ala o loo e agai atu iai i lou olaga, e mafai e le Atua Matautia ona feliuaina oe ma ta'ita'i i le ala tonu, i le suafa o Iesu.O Maria le Makatala o se isi tagata na feliuaina i le taitaiga a le Atua. I le Luka 8:2, ae leʻi feiloa‘i ma Iesu, sa sauaina e temoni e to‘afitu. E tasi le temoni e mafai ona faaleagaina le olaga ma le taunu‘uga o se tagata, ae e fitu temoni sa iā Maria. Sa faia e Satani se fuafuaga e faaumatia ai o ia, peita‘i na afio mai Iesu, feliuaina ma taitaia i se olaga fou. Na ia faasa‘olotoina o ia, ma na avea o ia o se tasi o ulua‘i tagata na vaai iā Iesu ina ua toetu mai. I le Ioane 20:13–18, na ia maua se feiloa‘iga mamalu ma le Ali‘i toetu, ua alu ma talai atu i ona soo, ua ia vaai i le Alii ma talanoa ma ia. O se fafine sa ulufia muamua e temoni, ua avea ma molimau faatuatuaina a le Ali‘i. Ou te tatalo ia e maua fo‘i se feiloa‘iga faapitoa ma le Atua. Ma afai o loo sesē le ala o e iai i soo se vaega o lou olaga, ou te folafola atu, o le a feliuaina ou ala ma taitai e le Atua i le ala tonu, i le suafa o Iesu.I ni tausaga ua mavae, sa matou faia ai se mafutaga faievagelia i Lagos. Sa iai se taule‘ale‘a o se sui o se vaega o tagata faomea faaaupegaina. Na sau o ia i le mafutaga ma se fana. Peita‘i, na taofia o ia e le Atua, ua ia tuuina atu lona ola ia Iesu Keriso ma ua ia lafoai le fana. I ni nai aso mulimuli ane, na fasiotia tagata uma o lana vaega i se osofaiga faagaoi. E lei iai lenei taule'ale'a I lea osofaiga aua ua fanaufouina. Sa i le itu sese, peita‘i na ia maua le malamalama o le Atua, ma ua lavea‘iina e le Atua mai le malaia.Le au pele e, afai o loo e savalia le ala sese i lou olaga i le taimi nei, ou te tatalo ia taofi oe e le malamalama o le Atua. Ou te tatalo ia afio atu le Atua e feliuaina ma toe ta'ita'i oe i lona mamalu, i le suafa o Iesu. TataloTamā, faamolemole asiasi mai ia te a'u i lou malamalama ma toe feliuaina a'u i soo se vaega o lo'u olaga o loo sese le ala o loo ou agai atu iai, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 5 SETEMA 2026(tusia e Pastor EA Adeboye) Manatu Autu: Faapaiaina ma faamanuiaga mai le Atua (Holiness and divine blessings)  Tauloto Tusi Paia:Salamo 37:4 “Ia e fiafia lava oe i le ALI‘I, ‘ona foa‘iina lea e ia ‘iā te oe o mea e mana‘o i ai lou loto.”Faitauga - Tusi Paia: Luka 5:1-9E‭ masani lava ona ou fai i lau fanau o le faapaiaina, o le faia lea o soo se mea e fai mai ai le Atua ma lou loto atoa ma ia vave. A fetalai mai e nofo i lalo, ou te tali atu, ‘ioe le Alii e', a fai mai e tu i luga, o la'u tali, ‘ioe le Alii e'. A fai mai e ‘ai', e le faatuai ona ou faapea atu, ‘ioe le Alii e', a fai mai foi e anapogi, o lau tali e tumau i le ‘ioe le Alii e', ma e amata loa. Na o le fai lava o le finagalo o le Atua ma lou loto atoa ma ia vave, ona taatia lea o mea uma ia te ia, o le mea lena e ta'ua o le faapaiaina. E lē talafeagai pe a faapaiaina se tagata ae oti mativa. O le mafuaaga lea ou te lē faamuamua ai le lauga i le tamaoaiga ma le mauoa, ae e faamuamua ona ou lauga i le faapaiaina. A e faapaiaina, e iai taimi e avatu ai e le Atua faatonuga e taitaiina ai oe e maua faamanuiaga mai ia te ia pe afai e te usitai iai. Peitai o soo se tasi e faafinau i le Atua i taimi faapea, o le a ia misia ia faamanuiaga ua ia saunia mo ia. O le mafuaaga lea na fai mai ai Tavita i le Salamo 37:25 “Ua ‘ou toeaina a‘u nei, sa au taule‘ale‘a; a ‘ou te le‘i iloa se tagata amiotonu na lafoa‘iina, po o ana fānau ‘ua ‘aisi i latou.”I le faitauga mai le Tusi Paia o le asō, na manaomia e Iesu se vaa e lauga atu ai i le motu o tagata ua potopoto atu, ona o loo latou fia faalogo i le Upu a le Atua mai ia Iesu. Na ia afio atu i le vaa o Peteru ma fai atu e tuutuu teisi atu mai le laueleele. O le tali a Peteru, ‘ioe le Alii e'. Ina ua maea le lauga a le Alii, na ia faliu atu ia Peteru ma fai iai e tuutuu atu i le loloto. Ona o le faaaogaina o lona vaa, na finagalo le Atua e tauia Peteru, ona oo atu lea ia te ia o taui e tele. Ae lei oo mai Iesu, na finau Peteru ma le faiaina, toilalo pea ma ua tau fiu foi,  na galue i le po atoa ae leai se i'a na maua. Peitai o le taimi na fai ai, ia Iesu, ‘ioe', ma tuuina atu lona vaa i le Alii, ua faatulagaina lona tagata mo le liligi atu iai o faamanuiaga a le Atua. Na matua tele au i'a na maua ua masae ai le upega. Na matua tele lana faamanuiaga na manuia atu ai ma ona tuaoi, ua matua tutumu le vaa o Peteru ma ona tuaoi ua amata ona goto. Le au pele e, e lē mafai ona e soifua faapaiaina, e iloa i lou usitai i le Atua, ae tuua oe, pe lafoaaina oe ma le fememeai. A e usitai i le Atua i mea uma, e tali mai o ia ma faamanuiaga ia te oe i soo se vaega o lou olaga. TataloTamā, faamolemole fesoasoani mai ia te a'u ia ou usitai i au faatonuga uma ia vave ma ia faia ma le loto atoa, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 3 SETEMA 2026(tusia e Pastor EA Adeboye) Manatu Autu: Fefa'afetaua'i ma le Atua 2 (Trading with God 2)  Tauloto Tusi Paia:Luka 6:38 “Ia ‘outou foa‘i atu, e foa‘iina mai ai ‘iā te ‘outou; e foa‘i mai e i latou i lo ‘outou lava ‘ie pulupulu le fua lelei, e lolomi ma lūlūina, e tumu ma solo i tua. Auā o le fua tou te fuaina atu ai, e fuaina mai ai ‘iā te ‘outou.”Faitauga - Tusi Paia: 2 Korinito 9:6-8I le tele o tausaga ua tuanai, na fesili mai le Atua ia te a'u poo le a le ituaiga faifeau ou te fia oo iai. Na ia fesili mai, ‘e te fia avea ma faifeau pito sili ona lelei poo se faifeau e pito sili ona leaga?' Na ou fai iai, ou te fia avea ma faifeau pito sili ona lelei. Na ia fesili mai foi pe ou te fia avea ma faifeau mauaoloa poo se faifeau mativa, ona ou fai atu lea ou te fia avea ma faifeau mauoa. Na ou ola mai i le mativa ma ou te tau atu ia te oe, e lē lelei. Mo se faataitaiga, mo le 18 tausaga muamua o lou olaga, e leai ni ou seevae ona e leai se tupe a ou matua e faatau ai. E lei leva se taimi, ae ou alu atu i se sauniga lotu ma ua oo i le taimi o le foai. Na faafuaei ona fesili mai le Atua i le fesili lava e tasi, ae ou tali atu, ‘o le faifeau maoae, pito sili ona lelei toe mauoa'. Ona ia faapea mai lea, ‘foai mai ia te au le tupe a le atunuu e pito maualuga lona tau o loo i lau taga'. Na matua faigata ia te a'u aua e telē le tupe. Na toeitiiti lava ou alaga, ‘satani, alu i ou tua,' peitai ou te iloa lelei le siufofoga o le Atua, o lea na ou tali atu ai,  ‘ioe, ua lelei le Alii e'. E lei leva ae ou alu foi i seisi sauniga, ae fesili mai i le fesili lava e tasi, na ou tali foi i le tali e tasi ona ia faapea mai lea, ‘tago e faaluaina lau foai ia te a'u', ona ou faaluaina lea. E lei leva se taimi ae faapea mai ia faatoluina. Na ou faia foi ona amata loa lea ona ou vaai atu ua galue mai le Atua. O aso uma, e eseese tagata e o mai ia te au e fia foai mai mea eseese ma ua amata ona ou fiafia iai. E iai se aso, o le a ou moe, ae ou manatua e leai ma se tagata ua ia foai maia se mea ia te au i lea asō. Na ou fai i le Atua, e leai se mea na foia mai e seisi ia te au i le asō. I le lata i le tulua o po ma ao, ae tuitui mai se tagata i lou faitotoa ma faapea mai, ‘lau susuga, na fai mai le Atua ou te sau e aumai le mea lea'. Na ou fai i si alii pe aisea ua sau ai lava i le leva o le po ae fai mai, ‘ou te iloa o le Atua na auina mai au e na te puipui ia te a'u'. Le au pele e, ou te fia fesili atu ia te oe, ‘o le a le ituaiga kerisiano e te fia faapei, mativa pe mauoa?' Ou te manao ia e faamaoni ma faatuatua i le Atua ma faataga o ia e faaali atu ia te oe i lou olaga lona matautia i le foai atu ia te oe. Foai faifaipea ia te ia mai mea uma ua ia foai atu ia te oe, ma ou te faamautinoa atu ia te oe, e oo mai le taimi e te faapea atu ai ia te ia, ‘Le Atua e, e lē ua tele naua ea nei faamanuiaga?' E faamanuia pea e le Atua i latou e foai atu ia te ia, i le suafa o Iesu, Amene. 

OPEN HEAVENSMATALA LE LAGI MO LE ASO LULU 2 SETEMA 2026(tusia e Pastor EA Adeboye) Manatu Autu: Fefa'afetaua'i ma le Atua 1 (Trading with God 1)  Tauloto Tusi Paia: Kalatia 6:7 “‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia.”Faitauga - Tusi Paia: 2  Nofoaiga Tupu 1:6-15I le tele o tausaga ua tuanai, o se sui o le mafutaga a alii faipisinisi faavaomalō a le Ekalesia, na ia folafola o le a ia totogiina uma le tau o polokalame faaevagalia mo le tausaga atoa, ma ua malilie uma iai tagata. I le faaiuga o lea tausaga, na fai le tautinoga a lea alii i le maoae o mea ua faia e le Alii ia te ia ona o lana foai, ma ua matuā ofo ai isi sui o le mafutaga. Ona ia toe ofo lea o le a ia totogiina le tau o polokalame faaevagalia o le a sosoo ai i le isi tausaga, peitai na vave tali uma mai sui o le mafutaga e leai. Ua mananao foi i latou e fia maua le taui ma faamanuiaga o le foai o loo aeae ai lava na o lea alii. I le faitauga mai le Tusi Paia o le asō, ua tatou faitau ai na lūlū ma foai e Solomona taulaga mu e afe, e faitaulaga ai i le Atua,ma i le po lava lea, na afio mai le Atua ia te ia ma fesili poo le a le mea e manao ai. Na ole atu Solomona mo le meaalofa o le poto. Na foai iai e le Atua le mea na ole atu ai ma ua faaopoopo iai ma le oloa e tele, tamaoaiga ma le faaeaina. Na matuā faamanuiaina lava o ia, fai mai le Tusi Paia i le 2 Nofoaiga Tupu 7:5, ina ua ia avatu seisi faigataulaga, na osi le taulaga e 22,000 povi ma le 120,000 o mamoe. O se tasi o tulaga matagofie i le fefaatauai ma le Atua, e lē aitalafu le Atua i se tagata. A e foai ia te ia se mea, e na te totogi atu taui e tele. E leai se tagata e fefaatauai ma le Atua ae gau ai. E faaigoaina o ia e le Eperu 11:6 o Lē na te tauia atu o ē matuā sā‘ili ‘iā te ia. O loo faamatala i le Ioane 6:5-13 le tala o se tamaitiiti na foai atu lana meaai o areto e lima ma i'a e lua ia Iesu e fafagaina ai le motu o tagata. E lē gata i lea, na ia maua ato e sefululua o toega o meaai, ou te manatu na alu ma ia ona o lana meaai lea na fagaina ai le motu o tagata. O se tamaitiiti ma sau ma lana tamai meaai ua faafuaseia ona manaomia le fesoasoani a tagata matutua e amoina ato meaai i lona fale. Le au pele e, fai mai le Efeso 3:20, e mafai e le Atua ona faia o mea e fa‘asilisili lava i mea tatou te ole atu ai ma mafaufau i ai. O loo faaalia manino mai ai, e lē mafai ona e fefaatauai ma le Atua ae faasolo atu ina e mativa. O soo se mea e te foai atu i le Atua e toe foaina atu ia te oe i fua e tele, e faasilisili atu i ou manatunatuga uma. E leai se tagata e fefaatauai ma le Atua ae gau ai, i le suafa o Iesu, Amene. 

Alii talks about the controversial Lindsay Clancy case and how the internet has completely lost the plot by turning Clancy into an icon.

OPEN HEAVENSMATALA LE LAGI MO LE ASO TOONAI 29 AOKUSO 2026(tusia e Pastor EA Adeboye) Manatu Autu: Aua e te faapologa ia te oe lava 1 (Don't over work yourself 1)  Tauloto Tusi Paia: Kenese 2:2 “Ua fa‘auma e le Atua i le aso fitu lana galuega na faia e ia; ‘ona mālōlō ai lea o ia i le aso fitu i lana galuega uma na faia e ia.”Faitauga - Tusi Paia: 1 Tupu 19:4-8Atonu sa fa'aaogā uma e Elia lona malosi fa'aleagaga sa teu ma faaputu ina ua ia tatalo ma pa'ū ifo le afi mai le lagi I le tusi 1 Tupu 18:36-38. Ina ua uma lenā na ia toe utuvai mai le fa'atanoa lava lea o malosi fa'aleagaga e faatonu ai uaga mai le lagi. E le'i timu mo le tolu ma le afa tausaga ma sa matua'i manino le vanimonimo, peita'i na ia tu'u se fa'atonuga taua i luga o lana faatanoa o malosi fa'aleagaga e ala i lona tatalo seia o'o ina amata to timuga (1 Tupu 18:41-45). E le gata i lea na sili atu fo'i le malosi fa'aleagaga na ia fa'aaogaina e tamoe saoasaoa atu ai na i loo le kariota a le tupu (1 Tupu 18:46) mo se mamao e fua faatatauina e nisi o tagata atamamai o le Tusi Paia pe a ma le fitu kilomita. Ina ua maea ona faia nei mea uma, e le'i malolo o ia pe tu'u se taimi e maua ai sona malosi fa'aleagaga ina ua ia maua le tala o loo saili le masiofo o Iesepela e fasioti ia te ia. Sa matuai leai sona malosi fa'aleagaga, o lea na ia tamo'e ai mo aso ma po e tolu ia fa'asaoina lona ola. E taunuu atu i le laau o le ratami o loo tāua i le faitauga mai le Tusi Paia o le asō ua matua'i vaivai lava ma leai sona malosi fa'aleagaga, ona ia tatalo ai i le Atua e faauma lona ola. Na uma loa ona faia lana tatalo moe loa aua ua silia ma le tolu aso e lei moe. Na sau le agelu a le Alii e fafagu ia te ia e nofo i luga e ai, ma ina ua uma ona ai na toe moe o ia, e ui sa ia iloaina o loo lama pea Iesepela ia te ia e faauma lona soifua. Na fo'i faalua mai le agelu a le Alii e fafagu ia te ia e tu i luga e ai aua na te manaomia le malosi mo le faigamalaga umi o le a alu ai. E tatau fo'i ona I ai sou taimi e te malolo ai ma fafaga lou malosi fa'aleagaga pe afai e te mana'o e te tamo'e i se tuuga ma taunuu manuia. I le tusi o Kenese 1:1-31 o loo faamatala ai e le Tusi Paia pe na faafefea ona faia e le Atua o mea uma. O se galuega tele nauā ma mamafa peita'i ao faasolo atu faamatalaga i le tusi o Kenese 2:2 o le upu tauloto lea o le asō o le a e vaaia ai na malolo le Atua. Le au pele e, e le mafai ona sili atu lou atamai i le Atua. Afai na malolo le Atua ina ua uma le foafoaga, e tatau fo'i ona e faia sou taimi malolo mai lea taimi i lea taimi. Aua e te faigaluega mamafa faasoloatoa e aunoa ma le faia o se malologa lelei. Toatele tagata ua o latou faapologa i latou lava seia o'o ina vaivai ma toetoe ina a leai se malosi, peita'i e lē o le finagalo lea o le Atua mo so'ose tasi. E finagalo le Atua ia e iloa le taimi ua tatau ma faafefea ona e malolō ina ia aua ne'i e faaleagaina oe lava. Le au pele e, ou te tatalo ia liligi faauma ifo e le Atua Silisili ese lona tomai ia e iloa ai ona faafou ma tausi lou malosi i le suafa o Iesu. O le fesili, e te malolo ea i le taimi e tatau ona e malolo ai? I le suafa o Iesu, Amene.

 OPEN HEAVENSMATALA LE LAGI MO LE ASO LULU 26 AOKUSO 2026(tusia e Pastor EA Adeboye) Manatu Autu: Matau i le Atua 2(Fear God 2) Tauloto Tusi Paia: Faataoto 1:7 “O le mata‘u i le ALI‘I, o le amataga lea o le poto; ‘ae ‘ino‘ino tagata vālelea i le poto ma le a‘oa‘oina.”Faitauga - Tusi Paia: Tanielu 1:8-20O ananafi, na ou talanoa atu i faamanuiaga o le matau i le Atua, o le asō, o le a ou talanoa atu i le avanoa e te maua ma iloa ai mealilo i le finagalo o le Atua pe afai e te matau ia te ia. Fai mai le Tusi Paia i le Salamo 25:14, o le mealilo a le Alii, o i latou e matatau ia te ia, ma e na te faaalia lana feagaiga iai latou. E faaali e le Atua ana mealilo iai latou e matatau ia te ia, e pei lava o i tatou, e masani ona tatou faasoa atu iai latou e faatuatuaina ma manatu lelei iai tatou. O Aperaamo o se tagata e matau tele i le Alii, ma o lona taui, na ia maua faaaliga i le loloto o le finagalo o le Atua. Ina ua finagalo le Atua o le a ia faaumatia Sotoma ma Komoro, na ia fetalai, “Ou te natia ‘ea ‘iā Aperaamo le mea o le a ‘ou faia?”(Kenese 18:17). E fai e le Atua ia fetalaiga tau o i latou e matatau ia te ia aua o loo ia silafia lelei e latou te faatauaina ma puipui i ia mea lilo.O Tanielu o se tasi tagata na maua faaaliga ma mealilo e loloto aua foi sa ia matau ma ava i le Atua. Fai mai le Tusi Paia i le Tanielu 1:8, na manatu Tanielu, ia aua nei leaga o ia i mea taumafa a le tupu. Na ia ava i le Atua i lona faamaoni lea ia te ia tusa pe o iai i nuu ese, ma ia taitaia ana uo e latou te faia faatasi. Na liliu mai le Atua ma tauia lana faaiuga, i le faia lea o ia ma ana uo, e faasefulu ona sili atu i latou i lo ē na  latou aoaoina faatasi (Tanielu 1:20). Ina ua faia se miti a le tupu, ma ua le mafai e le au vavalo a le atunuu ona faamatala, na faaali e le Atua ia Tanielu le uiga ( Tanielu 2:19). Le au pele e, a e matau i le Atua, e lē mafai ona e mativa i le poto faaleagaga ma le vaai mamao aua e faamautinoaina e le Atua e te maua avanoa ia. O le tauloto o le asō o loo faapea mai o le matau i le Alii o le amataga lea o le poto ae o loo faapea mai foi le Salamo 111:10 o le matau i le Alii o le amataga lea o le poto. O tagata uma na matatau i le Alii i le Tusi Paia na latou maua le poto e lē maua e le toatele. Afai e te fia maua lea ituaiga poto, e tatau ona e matau i le Atua. Afai e te finagalo i le Atua e avatu ia te oe le oloa e sili o le pogisa ma oloa lilo i mea nana e pei ona ia folafola i le Isaia 45:3, e tatau ona e ava ia te ia i ou mafaufauga, faaiuga ma mea e faia. Ou te tatalo ia avatu e le Atua Silisili Ese ia te oe mealilo uma, o loo i lona finagalo ao e ava ia te ia i lou olaga, i le suafa o Iesu, Amene. 

OPEN HEAVENSMATALA LE LAGI MO LE ASO LUA 25 AOKUSO 2026(tusia e Pastor EA Adeboye) Manatu Autu: Matau i le Atua 1(Fear God 1) Tauloto Tusi Paia:2 Tupu 17:39 “ Ae peita‘i o le ALI‘I lo ‘outou Atua ‘ia ‘outou matata‘u i ai; ‘ona lavea‘i lea o ia ‘iā te ‘outou i lima o i latou uma lava o ē ita mai ‘iā te ‘outou.”Faitauga - Tusi Paia: Salamo 112:1-9O le matau i le Atua o le amataga lea o le poto (Salamo 111:10), o lona uiga o soo se tagata e lē matau i le Atua e lē poto. O le Atua o le Afi Maamaai ( Eperu 12:29) ma o i latou e lē matatau ia te ia, e valea moni aua e oo i se taifau feai, e fefefe i le afi. O le uiga o le Salamo 111:10, o i latou e matatau i le Atua e avea ma ē popoto. E ese mai le poto, e tele foi isi faamanuiaga e maua i le matau i le Atua, ma o loo auiliili mai e le faitauga mai le Tusi Paia o le asō. O se tasi o faamanuiaga, o suli o ē matatau i le Atua o le a matautia i le lalolagi nei (Salamo 112:2). O le fuaiupu lava lea e tasi o loo faaali mai ai o augatupulaga e tupuga mai e amiotonu e faamanuiaina. Fai mai le Salamo 112:3, e tatala avanoa e te maua ai le oloa e tele ma le tamaoaiga pe a e matau i le Atua. E fai mai foi le Salamo 112:7 e te lē fefe i ni osofaiga a ē amioleaga. O tagata e matatau i le Atua e lē fefefe i se mea aua foi e na te laveaiina i latou mai lima o latou fili ma soo se mea e taumafai e fasia i latou. O i latou e lē matatau i le Atua, e faigofie ona latou faia le agasala, ma e oo mai ai fetuu iai latou ma latou suli. Mo se faataitaiga, o le leai o se matau o Keasi i le Atua na fetuuina ai ona suli i le tuufaasolo lea o le lepela sa ia Naamanu iai latou (2 Tupu 5:20-27). A amio se tagata i se auala e lē matau ai i le Atua, o le a ia faoa avanoa e silisili ma lelei ai lana fanau ae tatala avanoa iai latou mo fetuu, ae lē o faamanuiaga. O Ioapo o se tagata sa leai sona matau i le Atua ma naia tuua fetuu i e tupuga mai ia te ia. I le 2 Samuelu 3:27-29, fai mai le Tusi Paia na ia faa'ole'ole ia Apineru ma fasioti ia te ia. Ina ua faalogo iai Tavita, na ia lafo se fetuu i luga o suli ma ē tupuga mai ia Ioapo ia latou mamai, lepela, matitiva, vaivai ma le oti. O tagata e lē matatau i le Atua, ua latou faatauina le leaga mo latou fanau. Le au pele e, afai e te manao i le lumanai o lau fanau e manuia, e tatau ona e matau i le Atua. Afai e te fia maua le filemu i le mafaufau i lou tagata matua, e tatau ona e matau i le Atua. O le mafuaaga ou te mautinoa ai o lo'u lumanai ma le lumanai o la'u fanau o le a lelei, aua foi ou te matau i le Alii. Ou te tatalo o lou soifua faapea ma lau fanau, o le a faatumuina i faamanuiaga, ae lē o malaia, i le suafa o Iesu. O le matau i le Alii e faamautinoa ai faamanuiaga a le Atua ia te oe ma ou suli, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 22 AOKUSO 2026(tusia e Pastor EA Adeboye) Manatu Autu: Soli feagaiga 2 (Breaking covenants 2) Tauloto Tusi Paia: 1 Ioane 4:4 “O ‘outou, le fānau e, mai le Atua lava ‘outou, ‘ua ‘outou manumālō fo‘i ‘iā te i latou, auā e sili o ia ‘ua ‘iā te ‘outou, i lē ‘ua i le lalolagi.”Faitauga - Tusi Paia: 2 Korinito 5:17-19I tausaga ua mavae, na sau ai se tasi o o'u afafine I le Alii ia te a'u ma faapea mai, “Tamā na fesootai mai se taulealea talavou ia te a'u ma fai mai e fia faaipoipo ia te a'u.” Sa ou fa'amālō ia te ia peita'i na tali mai, “Tamā, na ta'u mai e lo'u tamā ia te a'u na ofoina a'u i se atua fafine o se vaitafe ina ua o'u fanau mai, ma sa faia se feagaiga poo ai lava ou te faaipoipo i ai o le a oti i le aso o le ma faaipoipoga. Ou te lē mana'o e oti le taulealea.” Sa o'u fai atu i le afafine ou te iloa le tagata e malosi atu i le atua fafine o le vaitafe. Na fai le ma tatalo faigofie ma le afafine ona alu lea. O le isi taimi na o'u vaai ai i le afafine lenei, ua faaipoipo ma le fiafia ma ua i ai lana pepe. Ou te folafola atu, o soo se malosi o le amioleaga e ono faalavelave i lou alu alu i luma, ua faaumatia i le asō i le suafa o Iesu. E mafaia e se feagaiga fou ma sili atu le malosi ona fa'alēaogaina se feagaiga o i ai i lea taimi. Fa'ata'ita'iga afai e te mana'o e tatala se feagaiga ma se tasi, pau le mea e manaomia ona e fai o le osi feagaiga ma se tasi e sili atu; e mafai e le tagata malosi atu ona fa'asa'oloto faamalosi oe mai le feagaiga ma le tagata vaivai. Afai e fai feagaiga se tagata ma le tiapolo, o le taimi lava e amata ai se la feagaiga ma le Atua, e soloiesea ai e ia feagaiga leaga uma mai le olaga o lea tagata. O le feagaiga a le Atua e sili atu i lo se isi lava feagaiga. O lo tatou Atua e malosi atu nai lo le aupito silisili ona malosi; o lea la o le taimi lava e fai feagaiga ai se tasi ma ia, na te saisaia ai soose tagata malosi na pulea muamua le olaga o le uso ma togi ia te ia i fafo. E taua fo'i ona e maitauina e toe saili lava e le tiapolo se avanoa e toe faatuina ai ana olo malolosi i olaga o tagata tusa po ua uma ona faaolaina i latou. O nei olo malolosi e masani ona aofia ai le loto tigā, faamaualuga, fetu'u tuufaasolo i auga tupulaga, loto ita, ma isi. Le au pele e, ua fa'atauanau mai le 2 Korinito 10:3-5; ia o tatou lepetia olo malolosi ma solia i lalo masalosaloga ma mea maualuluga uma ua faamaualuga ia te ia lava e tete'e i le iloa o le Atua. Afai o e auai i so'ose ituaiga feagaiga leaga po o aafiaga i soo se olo malosi fa'a temoni, tagi atu i le Atua i le asō e fa'asa'oloto oe i lona mana mata'utia. Ou te fesoota'i atu lo'u faatuatua ma oe ma folafola ua e saoloto atoatoa mai so'ose feagaiga leaga, poo olo malolosi faa temoni e ono i totonu o lou olaga, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 21 AOKUSO 2026(tusia e Pastor EA Adeboye) Manatu Autu: Soli feagaiga 1 (Breaking covenants 1) Tauloto Tusi Paia: Esekielu 17:15 “A ‘ua ia fouvale ‘iā te ia i lona ‘a‘auina atu o lana sāvali i Aikupito ‘ina ‘ia tu‘u mai ‘iā te ia o solofanua ma tagata e to‘atele. E manuia ‘ea ia? E sao ‘ea lē fai mea fa‘apea? E soli ‘ea e ia le feagaiga ‘ae fa‘asaoina?”Faitauga - Tusi Paia: 1 Samuelu 2:27-31E faamaoni le Atua, e lē taitai soli feagaiga, e lē toe foi i lana upu. Fai mai Iakopo 1:17, e lē o ‘iā te ia se mea fa‘alētumau po o sina liliu itiiti. O Iesu Keriso e lē liu lava ia, o ananafi, ma le asō, e o‘o fo‘i i le fa‘avavau(Eperu‬ ‭13‬:‭8‬), ma e lē soli feagaiga. Peitai a soli ese tagata se feagaiga na ia faia ma le Atua, e leai la se mafuaaga tatau e faia ai e le Atua lana vaega o le feagaiga. I le Numera 25:6-13, na fai e le Atua se feagaiga o le ositaulaga sili e faavavau ma Fineaso, le atalii o Eliasa, aua i lona faamaufaailogaina mo le Alii, na ia tāia ma oti ai se tagata ma lana ava. Peitai i le faitauga mai le Tusi Paia o le asō, na fetalai le Atua ia Eli, ‘a ou faia se feagaiga ma oe e auauna lou aiga i le fale o lou tama ma tutu i ou luma e faavavau, ae ona ua e solia le feagaiga, ua ou faapea atu, ia e mamao ese ma a'u'. O le faatamala o Eli na faaleaogaina ai le feagaiga na osia e le Atua ma lona tuaā o Fineaso. O le taui o le feagaiga ua soli, ua alu ese le afi o le puipuiga a le Atua mai le aiga o Eli, ma ua maliliu uma ona atalii e toalua i le aso e tasi, faatasi ai ma avā a se tasi o ona atalii. E faamalamalama mai ai le taua o feagaiga, ma o le taui o le soli feagaiga, e masani lava o le oti. O le oti o se tagata sa avea ma sui o le feagaiga e saoloto mai ai le tagata ma aiaiga o le feagaiga, peitai e tumau pea le faamaoni o le Atua i ana feagaiga, tusa pe o lē na la osi feagaiga ua maliu. Fai mai le Teuteronome 7: 9 o le Atua e fa‘amaoni, o lē na te tausi i le feagaiga ‘atoa ma le alofa i ē alolofa atu ‘iā te ia ma tausiusi i ana poloa‘iga, e o‘o lava i le afe, o tupulaga. Fai mai le Esoto 34:7 e tausia e le Atua le alofa mo le afe o tupulaga. Afai e te tausia le lua feagaiga ma le Atua, e faaauau atu foi i ou suli. Ina ua folafola e le Atua ia Aperaamo o lana fānau e manuia ai nu‘u uma lava o le lalolagi (Kenese‬ ‭22‬:‭18‬), na faataunuuina lea folafolaga e ala ia Iesu, na afio mai o ia i le maea ai o le 42 augatupulaga mai ia Aperaamo, e tusa ma le 2000 tausaga mulimuli mai ai. Ina ua folafola e le Atua ia Tavita e na te saunia seisi e tupuga mai ia te ia e avea ma tupu ( Salamo 89:3-4, 29), e na te lei solia lava se feagaiga, na faataunuuina foi lea feagaiga e ala ia Iesu. Le au pele e, ia e faamaoni i le lua feagaiga na osia ma le Atua, aua a e faia, e lē mafaitaulia faamanuiaga e tatala mai ia te oe ma lau fanau ma augatupulaga e tupuga mai ia te oe. E faamaoni le Atua, e lē taitai  solia se feagaiga, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 20 AOKUSO 2026(tusia e Pastor EA Adeboye) Manatu Autu: O le feagaiga a le Atua mo le tamaoaiga (God's covenant of prosperity) Tauloto Tusi Paia: Teuteronome 8:18 “A ‘ia e manatu i le ALI‘I lou Atua, auā o ia na te avatua ‘iā te oe le malosi e maua mai ai ‘oloa, ‘ina ‘ia fa‘atumauina ai e ia lana feagaiga na ia tautō ai i ou tamā, pei ‘ona fai i le aso nei.”Faitauga - Tusi Paia: Iopu 36:11-12A e faia se feagaiga ma Lē e ona le lalolagi ma mea o tumu ai ( Salamo 24:1), o Lē e ona le auro ma le ario (Hakai 2:8), e na te fa‘atamao‘āiga oe e lē fa‘aopoopoina i ai se tigā (Fa‘ata‘oto‬ ‭10‬:‭22‬). E mailei atu e le tiapolo tagata e osi feagaiga ma ia ae folafola iai le tamaoaiga e tele. Peitai, o lea tamaoaiga e sau ai ma le tigā. Ou te manatua le tala i se tamaloa na alu i se taulaitu ma osia se feagaiga ma agaga leaga e mauoloa tele ai mo le fitu tausaga, a maea ona oti lea. Na ia foloina se vai na paluina e le taulaitu, peitai e lei mauoa, ae ua amata faitauina lona oti i le tausaga lona fitu. Ini nai aso maea le fitu tausaga, na tamoe mai le tamaloa i le lotu ma faamatala lana tala. Na matou fai iai e lafoai lona ola ia Iesu Keriso, ona ia puipui lea ia te ia. Na loto malie iai ona matou tatalo lea o se tatalo faigofie ma ia. I luma o tagata na iai, na puai mai i fafo le mea na ia foloina. Ua matou fiafia ma vivii i le Atua ma ia, ma na amata ona toaga mai i le lotu. Ina ua maea sina taimi, ua le toe sau i le lotu, ona matou toe asiasi lea iai. Fai mai na fai atu le taulaitu e sese le vai na ia inuina muamua o lea na ia toe faia ai se isi vai e inu. E lei leva ae mauoa loa. Ina ua lata ina atoa le fitu tausaga o le feagaiga, na ia manatu ia te ia lava, ‘o le feagaiga sa faia iine i Nigeria. O le a ou alu i Lonetona, ma e le mafai e temoni ona oo mai ai ia te a'u'. O le faanoanoaga, na maliu i luga o le vaalele na malaga ai i Lonetona. E na o le feagaiga a le Atua mo le tamaoaiga e faatamaoaigaina ai se tagata ma e na te lē faaopoopo iai se tigā. O le Malaki 3:10 o se vaega taua tele o le feagaiga a le Atua mo le faatamaoaigaina. A e totogiiina le sefuluai, e tatala e le Atua faitotoa o le lagi ma sasaa atu faamanuiaga e tele ia te oe, e silisili ona tele e lē lava nofoaga e teu ai. E faamalosi mai foi le Faataoto 3;9-10, ia e āva i le ALI‘I i lau ‘oa ma le fa‘apolopolo o au mea uma e tutupu. Le au pele e, a e fai feagaiga ma le Atua, e na te tausia oe ma faamautinoaina e leai se mea e te mativa ai. Ia atagia pea i lou olaga faamanuiaga a le Alii, i le suafa o Iesu. TataloTamā, faamolemole fesoasoani mai ia te a'u e āva ia te oe i le tamaoaiga ua e faamanuia ai ia te a'u, i le suafa o Iesu, Amene. 

OPEN HEAVENSMATALA LE LAGI MO LE ASO LULU 19 AOKUSO 2026(tusia e Pastor EA Adeboye) Manatu Autu: O le feagaiga a le Atua mo le puipuiga (God's covenant of protection) Tauloto Tusi Paia: Sakaria 2:5 “O a‘u fo‘i, ‘ua fetalai mai le ALI‘I, e fai a‘u ma pā afi e si‘osi‘o a‘i, e fai fo‘i a‘u ma pupula i totonu ‘iā te ia.”Faitauga - Tusi Paia: Salamo 91:1-16E maileia e le tiapolo tagata e faia feagaiga leaga ma le folafolaga e maua le puipuiga, peitai e na o le Atua e iai le puipuiga atoatoa. Fai mai le Roma 8:31 “Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?”  O loo faaopoopo mai le Roma 8:37 ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou. O lona uiga, afai o loo e osi feagaiga ma le Atua, e te lē tauina ni taua, aua o le a ia tauina mo oe. O le tele o taimi, e te manumalo i le taua faatoa e iloa ane, sa taumafai se tagata e osofai ia te oe. Na ou sola ese mai lo'u nuu ina ua faafefe au e ni tagata mai fai mai o le a latou fasioti ia te a'u. Mo le 13 tausaga, sa le mafai ona ou toe alu i lou nuu. Peitai ina ua ou feiloai ma lo'u Alii o Iesu Keriso, na mafai loa ona ou toe alu i lo matou nuu, na oo i se faaipoipoga na ou alu iai, ma na ou vaai ai i tagata ia na faapea mai o le a latou faia ni vai faataulaitu e fasioti ai a'u. Sa ou laitiiti i le faatuatua i lea taimi, sa tele lou ta'uamiotonuina, ae laitiiti le poto. Na talosaga mai ou te faia le lauga i le faaipoipoga, ma sa matautia la'u lauga na matua taia malosi ai i latou i le Upu a le Atua. I nai masina mulimuli ane, na ō le au faataulaitu ia i le tina o le teine faaipoipo ma fai iai ua ou faaaogaina le faaipoipoga e faaleaga ai iai latou. Na latou fai i le tina, ua leva ona latou faatali i se avanoa e taui ma sui ai ma o lea ua maitaga lana tama, ua latou faapea mai, ‘ia sei vaai pe oo ona fanau lau tama, e faatoa taunuu pe afai e uma la matou pule i le lalolagi nei'. Na fefe le tinā o le teine faaipoipo ma ua sau ia te a'u. Na ou fai iai e aua le popole, o le aso e fanau ai lana tama, o i latou uma o loo tau faafefe ia te ia, o le a momoe uma. O le pepe na latou tauto e le fanau mai, o loo avea nei ma se fomai. Le au pele e, na fetalai le Atua i le tauloto mai le Tusi Paia o le asō, e avea o ia ma se pā afi e siosio ai oe ma o soo se tasi e filifili e faasagatau mai i le Afi Maamaai, e lē ola e faamatala se tala. Aua e te fefe i soo se malosiaga, poo se tagata, poo soo se tulaga e taufaafefe mai, pe fasi foi ia te oe. Ole ma tagi atu i le Atua mo tulaga faapena, aua e afio mai o ia e puipui ia te oe ma avatu ia te oe le manumalo. O le Atua o se pa afi e siomia i latou ua osi feagaiga ma ia, i le suafa o Iesu, Amene.

OPEN HEAVENSMATALA LE LAGI MO LE ASO TOONAI 15 AOKUSO 2026(tusia e Pastor EA Adeboye) Manatu Autu: O Le Mamafa o Feagaiga 2 (The Weight Of Covenants 2)  Tauloto Tusi Paia: Esoto 19:5 “O lenei fo‘i ‘āfai tou te matuā fa‘alogo mai i lo‘u leo ma tausiusi i la‘u feagaiga, ‘ona fai lea ‘outou ma ‘oloa tāua mo‘u, e sili i nu‘u uma; auā o lo‘u lava le lalolagi uma.”Faitauga - Tusi Paia: Mataio 11:28-30O le ola faapaiaina o le ola lea i se soifuaga e atagia ai amioga fa'ale Atua ma o le tulaga aupito sili lea ona taua i se feagaiga ma le Atua. So'ose tasi ua osi feagaiga ma le Atua e tatau ona pei o le Atua (1 Peteru 1:16), ma e manaomia ona e faia mea uma e finagalo ai o Ia. O le taui, o le a maua e le uso le tele o faamanuiaga mai le Alii (Teuterenome 28:1-14). O nisi tagata ua manatu ifo lava i latou o le a na o mea lelei lava e tumu ai le olaga pe a avea ma kerisiano; peita'i e leai ma se folafolaga faapea a Iesu. I le faitauga mai le Tusi Paia o le asō na Ia fetalai, so'ose tasi e sau ia te Ia e ao ona amoina lana amo. O lona uiga e lē faapea a avea oe ma atalii poo le afafine o le Atua ona e lē amoina lea o se mamafa o le feagaiga ma le Atua, o le eseesega o le avega o le a māmā ma faigofie ona tauave i le fesoasoani a Agaga Paia. Fai mai le tusi o Filipi 2:13; “auā o le Atua o loo galue i totonu ia te outou ina ia outou loto i mea e finagalo malie ai o ia ma ia outou galulue ai.” O loo finagalo le Atua e faataunuu aiaiga o le lua feagaiga pe afai e te faataga ia te Ia. A fai se lua feagaiga ma le Atua, o le a lē toe faatagaina ona e faia le tele o mea o loo fai e tagata lē faaolaina. Ia i latou, atonu e sa'o ia mea ae lē sa'o mo oe. Fai mai Paulo e ui ua tataga mea uma, e lē o mea uma e talafeagai (1 Korinito 10:23). O nisi tagata e finau mai e le o se agasala le faalogologo i pese fa'asalemausau; peita'i mo se tagata ua osi feagaiga ma le Atua e lē tatau, e sesē. O nisi e oofu faatosina peita'i e lē faatagaina e le Atua lou laei i lavalava faapea. O le a faasolo ina e maua fa'atonuga e sili atu le mamafa ona o le lua feagaiga ma le Atua peita'i na te fa'amalosia pea oe e lē aunoa e usiusita'i atu ia te Ia. O le tala fiafia afai e te tauaveina lelei le amo o le feagaiga a le Atua o le a e fiafia I Ona taui e faavavau. Na fai feagaiga le Atua ma lou tamā i le Alii, Pa Akindayomi ma avatu e le Atua ia te ia ni aiaiga faapitoa, ma o le taui, na fetalai le Atua ia te ia o le a ia amatalia se ekalesia e ala i lana auauna e tupu ma so'o ai le lalolagi. Faafetai i le Atua na ausia e Pa Akindayomi ia aiaiga ma ina ua maliu le tamā, na fa'aauau e le Atua ona faataunuu lana vaega o le feagaiga. Le au pele e, fai punoua'i lau vaega o le feagaiga; tauave le amo māmā o le feagaiga o le faaolataga a le Atua ona e vaai lea i le galue mai o le Atua e faataunuu lana pitolaau o le feagaiga e ala i lona sasa'a mai o faamanuiaga ia te oe. Ou te tatalo ia faatumulia lou olaga e faamanuiaga mamalu a le Atua i le suafa o Iesu, Amene. Tatalo Tamā faamolemole fesoasoani mai ia te a'u e tauave le amo māmā o lau feagaiga ma le lotomalie ma le olioli. Fesoasoani mai ia te a'u e ola faapaiaina pei ona Paia oe, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 14 AOKUSO 2026(tusia e Pastor EA Adeboye) Manatu Autu: O Le Mamafa o Feagaiga 1 (The Weight Of Covenants 1)  Tauloto Tusi Paia: Salamo 89:34 “Ou te lē tu‘umavaega la‘u feagaiga, ‘ou te lē liliu lava le ‘upu ‘ua pa‘ū atu i o‘u laugutu.”Faitauga - Tusi Paia: Kenese 17:1-8I le faitauga mai le Tusi Paia o le asō, na osia le feagaiga i le va o le Atua ma Aperamo ma folafola e faia o ia ma tamā o nuu e tele, ma sui lona igoa ia Aperaamo. E lē pepelo le Atua, ma o folafolaga uma na ia faia ia Aperaamo na faataunuuina. Fai mai le Numera 23:19 “E lē se tagata le Atua e tala pepelo ai o ia, po o se atali‘i o se tagata e salamō ai o ia; ‘ua fetalai mai o ia, na te lē faia ‘ea? ‘ua fetalai mai fo‘i o ia na te lē fa‘ataunu‘uina ‘ea?”A fai e le Atua se feagaiga ma se tagata, e mautinoa na te faia, e tuu atu ai avanoa i lea tagata i mea uma e na te manaomia i lenei lalolagi. E aofia ai le soifua faafualoa, mauoa, alofaina, faamanuiaga, olioli, filemu, soifua maloloina lelei ma soo se mea lelei. O le tiapolo i leisi itu, e lē mafai ona ia tausisi i se feagaiga na te faia. E lē savali ini ana folafolaga aua o ia o le pepelo o le tamā o le pepelo (Ioane 8:44). E masani ona osi feagaiga tagata ina ia latou maua mai ai se mea ma leisi itu, e faapea foi ona latou foai atu ni mea. O le mamafa moni o se feagaiga, e faatoa ilo pea a lē mafai ona faatino e se vaega la latou folafolaga o le mea e faia. I le tele o ia feagaiga, o le avega mamafa o le oti le iuga o le talepeina o lea feagaiga. A auai atu tagata i faalapotopotoga faalilolilo, e latou te osia ai ni feagaiga. Afai latou te lē faia mea ua faatonuina e faia i totonu o lea faapotopotoga, o le iuga o le oti e masani ai. E te ono fesili ia te oe lava, ‘aisea e ono manao ai se tagata e fai ma sui o ia faapotopotoga faalilolilo ae e iloa e iu lava i le oti?' O nisi tagata e faapea mai o le mafuaaga e auai ai i ia faapotopotoga ona e manaomia lo latou puipuiga, ao isi e fai mai e maua ai le oa ma isi faamanuiaga. E taua le maitau mai, e faatosina atu le tiapolo iai latou e auai ma le folafolaga o le tele o mea matagofie, ae o le taui, e na te aveina o latou agaga e faaumatia ai. Auā se a le aogā i le tagata pe ‘āfai na te maua le lalolagi uma, ‘ae māumau ai lona ola? ( Mataio 16:26). E mamafa le avega o le agaga o le tagata ma e lē tatau ona lafoai i le tiapolo. Le au pele e, aua e te faatagaina le tiapolo e faaosooso ia te oe e faia se feagaiga leaga ma ni folafolaga e lē taunuu, ma afai ua e osia se feagaiga ma seoli, saini feagaiga ma satani, e mafai e Iesu ona faasaoloto ia te oe pe afai e te tamoe atu ia te ia. E na te lē tuulafoai i soo se tagata e alu atu ia te ia ( Ioane 6:37). Ou te tatalo ia faia e le Alii lana feagaiga o le filemu ma oe, ma lou aiga, i le suafa o Iesu. O soo se feagaiga e faia ma le tiapolo e faavae i pepelo, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 13 AOKUSO 2026(tusia e Pastor EA Adeboye) Manatu Autu: Malamalama i feagaiga (Understanding covenant) Tauloto Tusi Paia: Teuterononome 7:9 “Ia e iloa fo‘i o le ALI‘I lou Atua o le Atua lava ia, o le Atua fa‘amaoni, o lē na te tausi i le feagaiga ‘atoa ma le alofa i ē alolofa atu ‘iā te ia ma tausiusi i ana poloa‘iga, e o‘o lava i le afe, o tupulaga;”Faitauga - Tusi Paia: 1 Korinito 6:18-20O le malamalama i feagaiga, e fesoasoani i le malamalamala lea i se maliega tusitusia, aua e tutusa o la uiga. O se konekarate, o se maliega tusitusia i le va o ni tagata, ma e faamaoti mai ai galuega faatino a tagata o loo saini lima. O le taimi e sainia ai lea maliega, o tagata uma e aafia ai, ua saisaitia ai i latou, ma e masani ona tusia ai aafiaga mautu pe afai e lē savavali tagata na saini lima i aiaiga o lea maliega. O le aafiaga e aofia ai tupe totogi o faasalaga, taui tau tupe ma isi tupe totogi faapea. O le feagaiga o se maliega tusitusia foi, peitai e sainia pe faamautu i suavai mai le tino, e masani lava ona faaaoga ai le toto. O lona uiga e faaaoga suavai mai le tino aemaise lava le toto e sainia pe faamautū ai se maliega, ma osia ai loa se feagaiga. Mo se faaataitaiga, i le Kenese 17:1-14, na osia se feagaiga i le va o Aperaamo ma le Atua, ma i le sainia ma le faamautuina o lea feagaiga, o alii uma na fananau i le aiga o Aperaamo na peritomeina, e amata mai ia Aperaamo, e ui ua 100 ona tausaga i lea taimi. O se feagaiga o se maliega e lē ula iai se tagata, aua foi o le taui poo le faasalaga pe a lē tausisia aiaiga, o le oti. O le mafuaaga lea e taua tele ai le aoaoga o le asō. .A faatasi ma momoe se tane ma le fafine e feusuai ai suavai o le tino (tulou), ua la osia se feagaiga. E la te lē ono iloa, peitai ua la osia se feagaiga. O le mafuaaga taua lea e tatau ai i le tane ma le avā ona faamaoni i lo la va faale ulugalii aua foi e mafai ona faaaoga e le tiapolo le mulilua e faasolo ma tufa solo ai temoni iai latou o loo faia. I le tele o tausaga ua leva, sa iai se tamaitiiti na aumai ia te au mo le faasaolotoga ona e ou pei se taifau. Ina ua ou suesueina le mataupu, na ou iloa ai sa momoe a ma lana maile i totonu o lona fale. I seisi faaupuga, ua ia osia se feagaiga ma lana maile, ma ua faaaoga e le tiapolo e osofaia ai o ia. I le manatu lava e tasi, a momoe se tagata ma seisi e lē o lona toalua, e iai lava vaega ua faasolo atu mai leisi i le isi, ma e mautinoa e lē o ni mea lelei aua foi o le tulaga na faatino ai, e tetee i ala ma le finagalo o le Atua. Le au pele e, aua e te faatalalē i faatonuga a le Atua matautia e faatatau i le ola mama ma le faapaiaina. Aua e te faatagaina le tiapolo e ulu i lou olaga e ala i le faitaaga ma le mulilua. Ou te tatalo ia faaauau pea ona faamalosi atu le Alii ia te oe ina ia  e manumalo i soo se faaosoosoga i le faitaaga ma le mulilua, i le suafa o Iesu, Amene. 

OPEN HEAVENSMATALA LE LAGI MO LE ASO LULU 12 AOKUSO 2026(tusia e Pastor EA Adeboye) Manatu Autu: O mea e tuu iai e fausia mea e maua mai ai 2 (Inputs determine outputs 2) Tauloto Tusi Paia: Luka 12:48 “A o lē ‘ua lē iloa, ‘ua faia fo‘i e ia mea e tatau ‘ina sasaina ai, e māmā ‘ona sasaina o ia. Auā o lē ‘ua foa‘iina atu i ai o mea e tele, e su‘eina atu fo‘i ‘iā te ia o mea e tele; o lē fo‘i ‘ua tu‘uina atu i ai o mea e tele latou te fai atu ‘iā te ia, e ‘aumai mea e sili ‘ona tele.”Faitauga - Tusi Paia: Mataio 25:14-30A avatu e le Atua ia te oe se galuega, e na te foai atu mea uma e manaomia e faataunuuina ai. O nisi o punaoa manaomia o loo i lou siomaga ao isi, o loo i totonu ia te oe. E pei ona faaalia i le tauloto mai le Tusi Paia o le asō, o le tele o mea e avatu ia te oe, o le tele foi lea o mea e sueina ma aumai ia te oe. O tagata e manatu e lē lava punaoa ma mea o loo i o latou lima, e tatau ona faaeteete ia aua nei faapei o le auauna na inoino i le taleni na foai iai e lona matai, e pei ona faaalia i le faitauga o le Tusi Paia o le asō. O nisi tagata e manatu o mea ua latou maua e lē lava, ona taumafai lava lea e faatali i le Atua e foai atu nisi mea e sili atu, ona faatoa mafai lea ona faamaoni i sina mea o loo i o latou lima. Le au pele e, e sese lea ituaiga mafaufau lea. O se tagata e lē mafai ona faamaoni i sina mea itiiti ua ia maua, e lē tatau ona manatu e sili atu seisi mea na te maua. E foai e le Atua na o i latou ua faamaonia lo latou faamaoni i mea itiiti. Ou te sau mai se nuu laitiiti lava i luga o le faafanua. O le mativa ia o lou tamā e oo i tagata matitiva e latou te lauina lona mativa. E ui na matitiva ou matua ma e lē tele se punaoa na ou maua ao ou tuputupu ae, na foai mai e le Atua se taleni e tasi ia te a'u, o lo'u faiai. Na ou faaaogaina tatau le taleni na foai mai e le Atua e ala i lou toaga i le aoga ma suesue ma le punouai, ona amata lemu lava lea ona maua punaoa mai lea taleni. Na foai mai e le Atua ia te a'u le faaolataga i le 1973, e amata mai lea taimi, na avea au o se ipu e aoga i ona aao. A ou manatunatu i mea tetele ua faia e le Atua mo a'u ma faataga ou te ausia e ui e itiiti punaoa na ou maua i le amataga, ou te vivii faifaipea i le Alii i lona faamaoni. E moni, a faamaoni se tagata i mea itiiti, e faaopoopo mea ia te ia. Atalii poo le afafine o le Atua, tilotilo i lou siomaga ma vaavaai i totonu ia te oe, e te vaai atu ai i meaalofa e tele ua foai atu e le Atua ia te oe. Aua e te toilalo, faamolemole faaaoga meaalofa na, e manumalo ai agaga mo le malo o le Atua. Faaaoga lelei e siitia lou tulaga ma le pule, a oo ina e tautala, e faalogo tagata uma ma auauna i le Atua e tasi o loo e auauna iai. Ou te tatalo ia faaaoga e le Atua matautia lou tagata e faia mea tetele i lona malo ao e auauna ia te ia ma le faamaoni e faaaoga ai meaalofa ua ia foai atu ia te oe, i le suafa o Iesu, Amene. 

OPEN HEAVENSMATALA LE LAGI MO LE ASO SA 9 AOKUSO 2026(tusia e Pastor EA Adeboye) Manatu Autu: O le faauuga e le faatauina (The annointing Is Not For Sale) Tauloto Tusi Paia: Mataio 10:8 “Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu.”Faitauga - Tusi Paia: 1 Peteru 5:2-4A faauuina e le Atua se tagata, e finagalo o ia e faaaoga e lea tagata le faauuga e faamalosi ai i tagata ma talai le talalelei. E pei ona tatou faitauina mai le Tusi Paia o le asō, e lē finagalo le Atua e faaaogaina e maua ai ni tupe. E masani ona ou fai i faifeau o loo i lalo o lau taitaiga, a faaaoga i latou e le Atua e faia se vavega, e lē tatau ona latou faatauananu se taui, pe talia foi ni taui mai le tagata na maua le vavega. I le tauloto mai le Tusi Paia o le asō, na fetalai Iesu i lona ausoo na latou maua fua le faauuga ma e tatau foi ona latou foai fua atu. O Lē na faia vavega a le Atua, e lē o tagata na ia faauuina. O lona uiga, e lē tatau ona e manatu e maua mai ni mea i se tagata na maua sana vavega mai le Atua e ala i le faauuga ia te oe. O nisi o faifeau a le Atua ua o atu ma faatau atu suauu, vai, solosolo ma isi mea faapena, ua latou fai mai, ua maea faauuina i latou e o mai mo tatalo. O ia amioga e atagia ai o auauna o loo naunau e faaaoga seseina mamoe a le Atua ae ua lē faia tiute faaleoleo mamoe o le tausi ma fafaga. Le au pele e, e lē tatau ona e faaaogaina le faauuga ua tuu e le Atua i ou luga e faaaoga ai tagata. O nisi tagata e faatonu malosi mai e tatau ona faaigoa i latou o ‘ Tama i le Alii' ona ua faaaoga e le Atua i latou e faamalolo ai ulu tigā. O le faauuga e lē agavaa ai se tasi e avea ma Alii i luga o isi tagata ae o le faauuga e tatau ona faaaogaina e auauna ai i tagata. Na silafia e Peteru o ia faaosoosoga e oo mai, o le mafuaaga lea na ia faatonu ai nisi o taitai o le Ekalesia i le faitauga mai le Tusi Paia o le asō e fafaga le fanau a le Atua ma le loto malie ma le mafaufau matala. Na ia lapatai foi ia aua nei faaaogaina le faauuga a le Atua i o latou olaga e maua ai ni mea. O Iesu Keriso o le faataitaiga sili, na faasino mai le ala e faaaogaina ai le faauuga a le Atua i luga o se tagata. Na ia faia galuega lelei ma faamalolo nisi na faapologaina e le tiapolo ( Galuega 10:38), na ia auauna foi i tagata na mulimuli ia te ia (Ioane 13:3-5). Le au pele e, e pei o Iesu, faaaoga le faauuga na e maua mai le Atua e faamanuia ai iai latou ua auina atu ia te oe, aua ete faaaogaina e maua ai ni mea. O Iesu o le leoleo mamoe sili ma e iai le aso e te avatu ai faamaumauga ole faaaogaina o mea uma ua ia foai atu ia te oe. Ia manatua lava o le faauuga mai le Atua o se auupega e te auauna ai ia te ia, aoao ona tagata, faamalieina ai manaoga ma talai le talalelei i tuluiga o le lalolagi. O le faauuga e lē faaaogaina e maua ai ni mea, ae ia auauna e faia le finagalo o lē na auina mai ai, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 6 AOKUSO 2026(tusia e Pastor EA Adeboye) Manatu Autu: E lē o le fitafita (Not by might) Tauloto Tusi Paia: Sakaria 4:6 “Ua tali mai o ia, ‘ua fai mai ‘iā te a‘u, o lo‘o fa‘apea mai: “O le afioga lenei a le ALI‘I ‘iā Serupapelu, o lo‘o fa‘apea mai: E lē o le fitafita, e lē o le malosi, a o lo‘u Agaga, ‘ua fetalai mai ai le ALI‘I o ‘au.”Faitauga - Tusi Paia: Failauga 9:11-12O le ituaiga tagata e te oo iai ao iai i le lalolagi nei, e lē fuaina tau o galuega na e faia. E iai se muagagana faa Aferika e faapea mai, ‘o le pisi solo mai i ma o e le mauoloa ai'. E sa'o lelei, mo se faataitaiga, o i latou e faigaluega i luga o le uafu e la'u uta mai le taeao seia oo i le po, o latou totogi e na o se vaega itiiti o le totogi o le pule o le uafu, o loo nofo i totonu o se potu ea malulu, inu lana ti ma saini pepa. E oo atu i faaiuga o le masina, o le totogi o le pule e leiloa pe sili atu i totogi o le la'u uta i le tausaga atoa. O le faitauga mai le Tusi Paia o le asō o loo faamanino mai ai, o se tagata tamoe saosaoa ma televave, e le faapea e mua ai i se tausinioga, e oo foi i se tagata malosi, e le faapea o le a ia malo ai i le taua ma ē ita mai. O loo faapea mai foi, ua lē i ai fo‘i i ē ‘ua popoto le mea e ‘ai, ‘ua lē i ai foi i ē ‘ua fa‘autauta le ‘oloa e tele. O lona uiga o le maualuga o faailoga ma le aoaoina o se tagata e lē fuaina ai le tele o le oa e na te maua. Ou te manatua ao ou iai i le nofoaga o togalauapiga i le va o le tausaga 1983 ma le 1984, ao ou mafuta ma le Atua, na ou tagi atu i le Atua faapea, ‘ou te lē o ole atu mo ni lavalava, poo se taavale, poo se fale foi. Sa fai lava au galuega masani o se faiaoga i le Iunivesite i le taimi na e fai mai ai ou te sau e auauna atu ia te oe. Na ou talia aua ou te fia auauna lava ia te oe, peitai ou te manaomia le mana ma le malosi e faia ai lau galuega. Ou te lē fia pei o isi faifeau, ou te fia tuputupu pea ma manuia'. I lo'u faatauanau atu pea, na ou faaopoopo atu, ‘Le Atua e, foai mai le mana ia te au, a lē o lena, avatu loa a'u'. Na pai atu i le Atua la'u tatalo, aua i le po lea, na luluina i se mafuie le laueleele, o le malosi ua ua oo atu i nuu tuaoi e faitau kilomita le mamao. Na asiasi mai le Alii ia te a'u ma aumai le mana e manuia ai. Le au pele e, e te manaomia le faauuga a le Atua e te manuia ai. O le Atua e na te avatu ia te oe le mana e maua ai le oloa e tele (Teuteronome 8:18), ua na o lona faauuga e aoaoina ai oe i mea uma e te manaomia ona iloa (1 Ioane 2:27), ma ua nā o ia e te mafaia ai mea uma (Filipi 4:13). O le mafuaaga lea e tatau ai ona e ole ma tagi atu i le Atua e faauu oe, e pei foi ona ou faia i le tele o tausaga talu ai. Ou te tatalo ia avatu e lo'u Tama ia te oe le malosi e manuia ai, i le suafa o Iesu. TataloLe Alii e, faamolemole, asiasi mai ia te a'u ma faamalosi mai ia te a'u ia ou manuia, i le suafa o Iesu, Amene. 

OPEN HEAVENSMATALA LE LAGI MO LE LULU 5 AOKUSO 2026(tusia e Pastor EA Adeboye) Manatu Autu: Faalogo i fautuaga (Be open to feedback) Tauloto Tusi Paia: Faataoto 1:5 “E fa‘alogo mai le tagata poto, e tupu ai pea lona poto; o lē ‘ua mafaufau fo‘i e maua e ia le poto e pule ai;”Faitauga - Tusi Paia: Galuega 18:24-28I lo matou nuu ou te sau ai, e iai se muagagana a toeaina e faapea, ‘e leiloa atu e le moli lalo o le tuugamoli'. O le uiga o lea muagagana, tusa poo a mea e tele e iloa e le tagata, e iai lava vaega o lona olaga e na te leiloa atu. O le mafuaaga tonu lava lea e tatau ai ona e gauai e faalogo i fautuaga mai isi tagata e vaavaai atu ma le faamaoni ia te oe i lo oe lava ia, I le Faaaliga 3:15-17, o loo fetalai le Alii, o le toatele o tagata e tusa ma o latou manatu, o loo talitonu o loo lelei mea uma iai latou aua o i latou e mauoa ma e leai se mea e mativa ai. Peitai i alāfua a le Atua, o i latou e malaia, pagātia, mativa, tauaso ma lē lavalavā.  Afai e faamaualuga tele se tagata e lē fia faalogo ini fautuaga, e vaai atu lava tagata o savali o ia agai i le lua ae tuu ai pea seia paū i le lua. Fai mai le Faataoto 24:6 o le toatele o faipule poo ē faufautua, e saogalemu ai. O tagata e talia gofie pe a faasa'o atu pe fautua atu foi iai, e tele ina latou alo ese mai faafitauli, peitai o i latou e manatu ua latou iloa mea uma, e pauu atu i faafitauli semanu e mafai ona alo ese ai. O loo faamatalaina Iesu, o ia o le poto ma le mana i le 1 Korinito 1:24, peitai ina ua afio mai i le lalolagi, na nofo o ia i lalo o aoaoga a faiaoga, faalogo ma fai ana fesili iai latou (Luka 2:46-47), ma na faamauina i le Tusi Paia na tuputupu ae o ia i le poto (Luka 2:52). Na gauai foi e faalogo i fautuaga e pei ona tusia i le Mataio 16:13-16, ina ua fesili atu i lona ausoo e ta'u atu pe fai mai e a tagata ia te ia, e oo i lona ausoo na fesili iai poo le a lo latou manatu ia te ia. I le faitauga mai le Tusi Paia o le asō, o Apolo o se faiaoga iloga o le Upu ae lei fetaui ma Akula ma Pisila. Ina ua faalogo i laua ia Apolo, na la iloa e manaomia le faamalamalama atili o nisi o vaega o le Upu a le Atua. O lea na la faamanino atili ai nisi o vaega o le upu. Na faalogo iai Apolo ma siitia lona tulaga o le faiaoga o le Upu ma ia aoao ai le au Iutaia, o Iesu o le Faaola. O le ala e gauai ai le tagata i e taitai ia te ia, talia ma faaaoga fautuaga, e fua iai pe tuputupu ae lona tagata, pe tumau i le mea e tasi. Le au pele e, afai e te fia tuputupu a'e i le poto, e tatau ona e faamaualalo e faalogo ma aoaoina mai isi tagata. E tatau foi ona e ole atu ia Agaga Paia mo lana taitaiga i taimi uma. Ou te tatalo ia faaauau pea ona e tuputupu ae i le poto ma le alofa tunoa o le Atua ma tagata, i le suafa o Iesu, Amene. 

OPEN HEAVENSMATALA LE LAGI MO LE ASO LUA 4 AOKUSO 2026(tusia e Pastor EA Adeboye) Manatu Autu: O lē manatu o lo'o tu ia 2 (He who thinks he stands 2) Tauloto Tusi Paia: Salamo 139:23-24 “Le Atua e, ‘ia e su‘esu‘e mai ‘iā te a‘u, ma ‘ia e silafia lo‘u loto; tofotofo mai ia ‘iā te a‘u, ma ‘ia e silafia ‘ou mānatunatu; ma ‘ia e silafia po o ‘iā te a‘u se ala e tigā ai; ma e ta‘ita‘iina mai a‘u i le ala o le fa‘avavau.”Faitauga - Tusi Paia: Mataio 7:21-23O le tu mo Iesu o se tasi lea itu, ao leisi itu, o le tu mo ia seia oo i le iuga. O le tu mo Keriso seia oo i le iuga e manaomia ai le fesoasoani a le Atua (Iuta 1:24), ma e tatau ona saili faifaipea i le Alii ina ia iloa poo le a le ituaiga tu o tu ai. Fai mai le ‭‭2 Korinito‬ ‭10‬:‭18‬ “Auā e lē talia o lē ‘ua vivi‘i o ia ‘iā te ia lava, a o lē ‘ua vi‘ia e le Ali‘i.”E toatele tagata e latou te viia i latou lava, e fua ia latou lava tapulaa, peitai ua leva na pauu. E silafia e le Atua i latou o loo tutū pea mo ia, o lona faavae e mautu ma e le finagalo i ni tagata e faaopoopo iai ni faavae lē moni (2 Timoteo 2:19). O loo tau mai iai tatou mai le faitauga o le Tusi Paia o le asō, i aso mulimuli, e toatele tagata o le a ō atu i le Atua ma le manatu maualuga e tatau ona latou maua le lagi, peitai o le a tuliesea i latou ma ta'ua o tagata amioleaga. O le a latou taumafai e finau atu i le Atua e fua ia latou lava tapulaa, e aofia ai galuega lelei ma le tetele na latou faia i le suafa o le Alii, peitai o le a teena i latou. Na manatu le perofeta o Isaia o loo ia tu mo le Atua seia oo ina ia asiasi atu i le nofoalii o le Atua ma iloa ai, o ia o se tagata laugutu leaga (Isaia 6:5). Le au pele e, aua nei e manatu o loo e tu pea ia Keriso, ia e suesue ia te oe lava, i taimi uma e fua i tapulaa a le Atua e faamautinoaina o loo e iai pea i le faatuatua. E te faia lea i le faatusatusa o au amio ma mea o loo faia, i le upu a le Atua. Mo se faataitaiga, o le a lau tali atu pe a le mafaufau mai se tagata ia te oe? A viia oe e tagata, e te fiafia iai ma e mimita, pe vave ona e ave le viiga i le Atua, o Lē na foai atu meaalofa o loo viia ai oe e tagata? A iai se avanoa e te auauna ai, e te taumafai ea e alo mai ai, ae naunau ia faaaloalo mai tagata ia te oe ona o lou tulaga ma mea ua e ausia? E vave ona e agamalu e pei o Iesu ma auauna atu i isi tagata? E te naunau ea ia fai lava le mea e te manao ai pe faataga Agaga Paia e fai lona finagalo? O le Upu a le Atua o le faata lea e te suesue ai pe o e tu pea mo ia pe leai. O loo faamalosi mai le Iakopo 1:23-25 iai tatou, ia aua le na o le faalogologo i le Upu a le Atua ae ia anaana iai. Aua nei e faapei o le tagata e vaai atu ini faaletonu i ona foliga ae le faia iai se fuafuaga. Ole atu ia Agaga Paia e faaali atu ia te oe  vaega e te lē o savali tonu ai e tusa ma lona finagalo, ina ia e faia vave suiga talafeagai. TataloTamā, faamolemole fesoasoani mai ia te a'u ina ia ou tu pea ia te oe seia oo i le iuga, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 3 AOKUSO 2026(tusia e Pastor EA Adeboye)Manatu Autu: O lē manatu o lo'o tu ia 1 (He who thinks he stands 1)Tauloto Tusi Paia: Luka 11:35 “O lenei, ‘ia oe ne‘i pogisā le malamalama ‘ua i totonu ‘iā te oe.”Faitauga - Tusi Paia: 1 Timoteo 4:13-16Fai mai le 1 Korinito 10:12, o lē manatu o lo‘o o tu ia, ‘inā fa‘aeteete ia ne‘i pa‘ū. O loo tau mai ai, e mafai e le tagata ona tu nei ae paū taeao pe afai e lē faaeteete. O le manatu e lē pau lava, e mafai ona paū ai se tagata na tū pea mo le Alii i se taimi umi. I le 53 tausaga o le ma savaliga ma le Alii, ua ou vaai i tagata e toatele ua pauu ona o le manatu faapea. E manatu e tu pea mo le Alii mo se taimi umi, ua manumalo foi i le tele o faaosoosoga, ma o manatu faapea e oo ai ina lē faaeteete. O se kerisiano, o loo mataitu lelei e le tiapolo oe i taimi uma, a e lē faaeteete i se vaega, e mafai ona ia faaaogaina e te paū ai. Ua ou faalogo i nisi tagata o le Atua e faapea mai, e mafai ona iai ma se tamaitai lē lavalavā (tulou) i se potu ae leai se mea e tupu. O lau fesili muamua, aisea e oo ai se tagata o le Atua i se potu ma se tamaitai e lē o sana ava? A oo se tagata o le Atua i se tulaga faapea, ua oo atu o ia i se tulaga e paū ai. Ou te fai lava i la'u fanau ia aua lana nei iai se tulaga e avea ai se tamaitai o se failautusi a se alii. Aua foi o lea alii o le a tele itula e faigaluega faatasi ai, e oo i le po i nisi taimi. Afai e manatu maualuga le tamaloa i lona malosiaga e tetee ai faaosoosoga, e ono avea ma ala e paū ai. O le manatu maualuga, e mafai ona taitaiina le toatele o tagata e faatalalē i faavae o lo tatou faaolataga. Mo se faataitaiga, o nisi faifeau ua talitonu e lē toe manaomia nisi o aoga Tusi Paia ona o le tele o le faauuga. O nisi e talitonu e lē toe manaomia ona faalogo pe tusi ma fai faamaumauga pe a lauga nisi  e maualalo atu tulaga i totonu o le lotu. Ao isi ua fai fonotaga i taimi o pese ma viiga o sauniga lotu. O faiga faapea e iloa ai ua manatu maualuga i tulaga o iai ma e ono oo atu ai ina pauū.Le au pele e, aua nei e manatu maualuga i le tulaga o iai lau savaliga ma le Atua. Aua nei e faatagaina mea tetele ua e ausia i taimi ua tuanai e taitai seseina ese oe mai faavae o le faaolataga. E lē taitai gata lou savali ma le faaeteete, suesue i le Tusi Paia, anapogi ma mafuta ma isi tagata faatuatua. Tusa poo le a le tulaga o lou tuputupu ae i le Alii, e lē mafai ona e tuua ia mea. Ou te tatalo ia fesoasoani atu le Atua ia te oe, ia e tu pea, seia oo i le iuga o lau savaliga i le lalolagi nei, i le suafa o Iesu, Amene.

O loo galue nei mo se taimi puupu le fomai talavou ia Dr Setu Petaia i le medical centre i Powell Street Medical Centre.O loo galue nei mo se taimi puupu le fomai talavou ia Dr Setu Petaia i le medical centre i Powell Street Medical Centre.O Dr setu Petaia e tupuga mai se aiga fomai e pei o lona tina ia Dr Lisi Aiafi Petaia,si ona uncle ia Papalii Samuelu Petaia ma lona tausoga ia Tanyamarie Petaia.E na o le luasefulufa tausaga o lona soifua a o lenei ua i'u mai ma ua sauni e tautua le atunuu Pele

OPEN HEAVENSMATALA LE LAGI MO LE ASO FARAILE 24  IULAI 2026(tusia e Pastor EA Adeboye) Manatu Autu: Faatumauina o lou saolotoga 2 (Sustaining your freedom 2) Tauloto Tusi Paia: Salamo 100:2 “Ia ‘outou ‘au‘auna atu i le ALI‘I ma le fiafia; ō mai ia ‘outou i ona luma ma le ‘alaga fiafia.”Faitauga - Tusi Paia: Luka 17:12-19O ananafi, na ou talanoa atu i le auala e faatumauina ai e se tagata lona saolotoga, o le vivii lea i le Atua. O le asō, o le a ou talanoa atu i le faafetai, tapuaiga faifaipea ma le galue punouai i le Alii, o laasaga e tatau i se tagata ona faia e faatumauina lona saolotoga. I le faitauga mai le Tusi Paia o le asō, na alalaga atu lepela e toasefulu ia Iesu mo lona alofa mutimutivale, ona ia faatonuina lea o i latou e o e vaai le ositaulaga sili. Ao agai atu, na latou iloa, ua malolō i latou, peitai e na o le toatasi le tagata na toe foi e faafetai ia Iesu. Na toe foi atu i le pese ma viiga ma le leo tele e viia ai le Atua. E lei maasiasi e avatu le viiga ma le faafetai i le Atua, o le taui, na avatu ia te ia seisi vavega, ua maloloina atoatoa. E iai se muagagana faa Aferika e faapea o se tamaitiiti e loto faafetai i meaalofa e maua i le asō, e mautinoa e tele atu isi meaalofa e maua i le lumanai. A e avatu le faafetai i le Atua matautia mo mea uma ua ia faia mo oe, ua faatulagaina foi lou tagata e maua atili mai ia te ia. O le vivii i le Atua faifai pea e avea ma masani, o seisi laasaga lea i le faatumauina o le faasaolotoina moni. I le 2 Tupu 5:1-7, na faasaoloto e le Atua Naamanu mai le avega mamafa o le lepela. Ina ua maea ona faamaloloina, na fai le faaiuga a Naamanu e na o le Atua Matautia o le a ia tapuai iai i lona olaga atoa, ma ou te mautinoa na faatumauina lona faasaolotoina e lē toe suia. E tatau foi ona faia sau faaiuga o le a e tapuai, ua nā o le Atua lava i lou olaga atoa. E tatau foi ona faaavanoaina se nofoaga e te tapuai ma mafuta ai i le Atua o se masani i aso uma, e lē faailogaina lona tele poo fea. Ou te manatua sa iai se taimi e pau le nofoaga e mafai ai ona ou tapuai i le Atua e aunoa ma se faalavelave, o le fale lē taua. E tatau foi ona faamautinoa e saunia lou loto e tapuai ia te ia i taimi uma. O seisi ki e faatumauina ai le saolotoga, o le auauna faamaoni i le Atua ma lou loto atoa. A aveese e le Atua avega a se tagata, e tatau i lea tagata ona auauna i le Alii ma lona loto atoa ma faamaoni i le nofoaga o galue ai. I le Mareko 5:1-20 ina ua faasaolotoina e Iesu le tamaloa i Katara, na ia faatonuina e alu e talai i ana uo. A lafoai lou ola o se mea faigaluega i aao o le Atua e faalauteleina lona malo, e le mafai e le tiapolo ona toe ulufia oe. Ou te tatalo ao e faafetai  tele i le Atua Malosi, tapuai faifaipea ma auauna ia te ia ma lou loto atoa, e na te faasaoina mea uma o loo e manumalo ai ma faatupuina pea faamanuiaga i lou olaga, i le suafa o Iesu. TataloTamā, faamolemole fesoasoani mai ia te a'u ia ou maua se loto e faafetai ia te oe ia faifaipea ma auauna ia te oe ma le loto atoa i aso uma o lo'u ola, i le suafa o Iesu, Amene. 

OPEN HEAVENSMATALA LE LAGI MO LE ASO LULU 22  IULAI 2026(tusia e Pastor EA Adeboye) Manatu Autu: O ki i le saolotoga 3 (The keys to freedom 3) Tauloto Tusi Paia: Salamo 18:6 “Ona ‘ou vala‘au atu ai lea i le ALI‘I i lo‘u puapuagā, ma ‘ou ‘alaga atu i lo‘u Atua; na fa‘afofoga mai o ia i lona malumalu i lo‘u leo, na o‘o atu ‘iā te ia la‘u ‘alaga i ona lava fofoga.”Faitauga - Tusi Paia: Salamo 3:1-4I aso e lua ua mavae atu, na ou talanoa atu i laasaga e faia e soo se tagata o loo amo avega mamafa a le tiapolo ina ia faasaolotoina ai. O le asō, o le a faaiu atu lenei mataupu faasolo i le faamamafa lea o le mafuaaga e tatau ai e se tagata o loo i lalo o avega a le tiapolo ona alaga atu i le Atua mo le faasaolotoga. Ou te masani ona ou ofo pe a ou vaai i tagata e lē faatauaina le taimi o tatalo. O le faanoanoaga, o tagata faapea, o loo faamaimauina latou taimi, ma e seasea maua tali o latou tatalo. E leai se tagata, e oo iai latou o loo amo avega a le tiapolo e tatau ona faatalale pe a oo i taimi o tatalo. Aua foi e aoga tele le tatalo faatauanau a le tagata amiotonu (Iakopo 5:16), ae lē o le tatalo e na o le faataunuu. Mo se faataitaiga, i le Mareko 10:46-52, ana le alaga atu Patimaio ia Iesu mo se fesoasoani, semanu e tauaso pea. E faapena foi i le Mataio 15:21-28, ana le saili fesoasoani le fafine Kanana ia Iesu ma tumau i lana faatoga atu ia te Ia, semanu e lē faasaolotoina lana tama. O Tavita o se tagata e masani ona alaga atu i le Atua mo le manumalo pe a oo i taimi o taua. O le tele o taimi i ana Salamo, na ia tusia ai lona alaga ma tagi atu i le Atua mo le fesoasoani. Mo se faataitaiga i le Salamo 3:4, na ia tusia, “Na ‘ou vala‘au i le ALI‘I i lo‘u leo; ‘ua fa‘afofoga mai fo‘i o ia ‘iā te a‘u mai lona mauga pa‘ia.” E pei a ona valaau Tavita i le Alii ma lona leo, e tatau i soo se atalii poo se afafine o le Atua ona alaga atu ia te ia i soo se taimi o puapuaga. E leai se isi tagata e sili atu ona talafeagai e alaga atu mo oe, ua na o oe lava aua foi ua na o oe e sili ona aafia i le tulaga lea. O le mafuaaga lea e feoai ai tagata mai lea nofoaga i lea nofoaga e saili tagata e tatalo mo latou, o e tatalo atu i le Atua mo latou. O le mafuaaga lea e tumau ai i latou i saisaitiaga mo se taimi umi. I le tauloto mai le Tusi Paia i le asō, fai mai Tavita na ia valaau atu i le Atua ma alaga atu i lona puapuaga, ona faafofoga mai lea o le Atua i lona leo mai lona malumalu. E lē mafai ona pupuni fofoga o le Atua i se tagata o loo alaga atu ia te ia ma le loto momomo (Salamo 51:17). Le au pele e, e le tatau ona e faavaivai i le tatalo pe afai e taitaina oe e tatalo seia faafofoga mai le Atua, e tatau ona e totogiina le tau o le saolotoga i le nofoaga o tatalo. Ou te tatalo e vave ona tali atu le Atua ia te oe i soo se taimi e te alaga atu ai ia te ia, i le suafa o Iesu. O i latou e alaga atu i le Atua i taimi o puapuaga, e latou te maua lana faaolataga, i le suafa o Iesu, Amene. 

OPEN HEAVENSMATALA LE LAGI MO LE ASO FARAILE 17  IULAI 2026(tusia e Pastor EA Adeboye) Manatu Autu: Faasaolotoga mai avega o faaipoipoga (Deliverance from marital burdens) Tauloto Tusi Paia: Salamo 46:9 “Ua faaiua e ia o taua e o‘o lava i tulu‘iga o le lalolagi; ‘ua gagau e ia le ‘aufana ma vavae le tao; ‘ua susunuina fo‘i e ia kariota i le afi.”Faitauga - Tusi Paia: Ioane 2:1-11 O le asō, o le a ou talanoa atu i se tasi o avega, o le avega o faaipoipoga. E inoino satani i mea uma na faia e le Atua e aofia ai ma le faaipoipoga, o le mafuaaga lea e taumafai ai lava e faavevesi le faaipoipoga paia ua osia i le va o le tane ma le avā. E iai taimi e taumafai lava e taofia le alii ma le tamaitai e aua le faaipoipo ao isi taimi, e sau ma aumai faafitauli eseese e taofia ai le fiafia o lea ulugalii i le filemu ma le malologa lelei i lo la aiga. O le faitauga mai le Tusi Paia o le asō o loo faamatala ai le faaipoipoga i Kana i Kalilaia. E leiloa pe na manatu le tama faaipoipo ua saunia mea uma e manaomia mo le aso o le faaipoipoga. Peitai na faafuasei ona lē tofu le uaina. E mautinoa ua amata ona oo mai le maasiasi seia oo ina afio iai le Atua Matautia. I le 1 Samuelu 1:1-20, o loo faamatala ai le tala ia Hana e pā. Na tauemu ē na ita ma tetee ia te ia i aso uma, ma ua matuā faigata lona olaga. E na te lei fuafuaina e pā, ae na oo mai le pā, ma e leai se mea e mafai ona ia faia. Na afio mai Lē tauave avega i lona olaga ma ua ia fanauina se fanau e toa ono e aofia ai ma le perofeta tautaua o Samuelu. O Sarai foi na amo le avega o le lē fanau seia oo ina asiasi ia te ia ma lana tane Lē tauave avega i le Kenese 18:1-6. Ae lei afio mai Lē tauave avega i le la ulugalii, ua tele tausaga o pā Sara ma o le mafuaaga lea na ataata ai ina ua fai atu o le a fanau i le tausaga e sosoo ai. Afai o loo e saili pea ia maua sau pepe ma ua leai se faamoemoe e maua ai sau pepe,ou te manao ia e iloa, o Lē tauave avega, e nate saunia le faamoemoe i tulaga ua leai se faamoemoe,  ma e na te mafai ona faaofo ia te oe. I le suafa e sili i suafa uma lava, ou te folafola atu, o soo se avā e pā o faitau pe faalogo i lenei faamalosiau, ua lata mai ona e pese i le olioli. Le au pele e, e leai se luitau o ni faaipoipoga e lē mafai e le mana o le Atua ona faatoilaloina. E mafai e le Alii ona faatonu ia iai le filemu i se mea o loo vevesi ma leai se loto gatasi, e mafai foi ona ia faafilemuina soo se afā i soo se faaipoipoga. Afai ua e faaipoipo ae o loo e ui i faigata ma afā i lau faaipoipoga, ou te tatalo ia afio atu Lē tauave avega i le taimi nei, ona e pese ai lea i se pese fou, i le suafa o Iesu. Afai foi ua e matua ua tatau ona e faaipoipo ae lei faaipoipo lava, ou te folafola atu e saunia e le Atua matautia sou tofi e amiolelei e te faaipoipo iai, i le suafa o Iesu. E leai se luitau poo se faafitauli i se faaipoipoga a se ulugalii e lē mafai e le Atua ona faatoilalo, i le suafa o Iesu, Amene. 

OPEN HEAVENSMATALA LE LAGI MO LE ASO SA 12 IULAI 2026(tusia e Pastor EA Adeboye) Manatu Autu: Galuega Mata'utia (Mighty Works) Tauloto Tusi Paia:Mareko 9:23 “Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”Faitauga - Tusi Paia: Mareko 6:1-6Ua faailoa mai e le tusi o Ieremia 32:19; ia I tatou, o le Atua Silisiliese e mata'utia i galuega. E finagalo le Atua e fai galuega Silisili. Paga lea, peita'i i le tusi faitau mai le Tusi Paia o le asō, ua lē mafai e Iesu ona faataunuu galuega mamana i totonu o lona lava nuu ona o le lē faatuatua o tagata. O le lē talitonu ma le masalosalo o le a lē mafai ai e se uso ona vaai i galuega mamana a le Atua i lona olaga. A i ai le faatuatua ma le talitonu o le a fa'aalia i le olaga o le uso galuega mata'utia a le Atua Silisili ese. E fiafia le Atua e fai galuega silisili ma na te sailia ni atalii ma ni afafine e galulue faatasi ma Ia. O loo saili mai o Ia mo ni tane ma ni fafine e faia galuega e sili atu i mea na faia e le Alii o Iesu Keriso a o i ai o Ia i le lalolagi. Peita'i e manaomia le faatuatua i le Alii o Iesu Keriso pe afai e te mana'o e mafai ona e faia galuega e sili atu i mea na Ia faia (Ioane 14:12). Le au pele e, e te lē manaomia sou auai atu i se aoga fa'afaifeau pe maua se tulaga faapitoa e faatino ai galuega tetele; pau le tulaga manaomia o lou faatuatua. Ina ua latalata i le taimi e afio a'e ai Iesu i le lagi, na ia poloa'i i ona so'o, e tāla'i atu le talalelei i le lalolagi uma ma ta'u atu iai latou, faailoga tetele e mulimuli atu iai latou. Na ia fetalai, ua iai latou le mana e tutuli ai temoni, tautalatala i gagana fou, fetagofi i latou i gata ma fa'ae'e o latou lima i luga o e mama'i (Mareko 16:15-18). Pau le mea e agava'a ai i latou e fai nei galuega uma o le faatuatua ia te Ia.Atalii ma le afafine o le Atua, e finagalo le Atua e faatino galuega silisili e ala ia te oe. E finagalo e fa'aaogā oe e fai ma ana uatogi o le taua e faaumatia ai galuega a le pouliuli (Ieremia 51:20). Peita'i e ao ona e faatuatua i le Atua e taunuu ai mea nei. E moni o Ia o le Atua e Pule aoao e mafaia ona fai soosemea e finagalo ai, peita'i e finagalo o Ia i le faatuatua ia mafaia ai mea uma mo oe (Mareko 9:23). Na e faatagaina le lē talitonu e faaseseina oe ma aveese oe mai galuega mamana na finagalo le Atua e faataunuu e auala ia te oe? Afai na e faia, ole atu mo lona alofa mutimutivale i le asō. Faatumu lou loto i lana upu auā o lou faalogo pea lava pea i le upu a le Atua e tupu ai lou faatuatua. Fai mai le tusi o Roma 10:17; e tupu le faatuatua i le taulogologo atu, o le taulogologo atu fo'i o i le Afioga a le Atua lea. E ao fo'i ona e sola ese mai soosemea e faavaivaia lou faatuatua. O Iesu Keriso e tumau ananafi, o le asō ma le faavavau (Eperu 13:8) ma o mea mata'utia ua ia faia mo isi, ma auala atu i isi, e mafai fo'i ona Ia faia mo oe ma ala atu ia te oe. Pau lava ia e faatuatua. Tula'i i luga ma galue. I le suafa o Iesu, Amene.

On today's episode of Pillow Talk, Alii discusses the Charlie Kirk assassination trial and the irresponsible nature of many influencers and internet commentators on the reckless speculation that they've spewed out concerning Charlie's death. 

OPEN HEAVENSMATALA LE LAGI MO LE ASO TOFI 9 IULAI 2026(tusia e Pastor EA Adeboye) Manatu Autu: Taulaga o ē oti (The city of the dead ) Tauloto Tusi Paia: Kolose 2:13 “O ‘outou fo‘i sa oti i amio leaga ma le lē peritomeina o ‘outou tino, na ia fa‘aola mai fa‘atasi ma ia, ‘ina ‘ua fa‘amāgaloina mai a tatou amioga leaga uma lava.”Faitauga - Tusi Paia: Efeso 2:1-6I le tele o tausaga talu ai, na ou asiasi ai i se tasi o atunuu e pito i telē le fanuatanu i le lalolagi atoa. I luga o soo se fanuaoti, e iai ni oga simā tetele ma e o mai nisi o tagata e leai ni nofoaga e nonofo ai o le taulaga, fai ai o latou faleie na nonofo ai i luga o nei oga simā. O le mafuaaga lea e taua ai lea fanuatanu, o le taulaga o ē oti. Le au pele e, e te iloa o tagata e lei tuuina atu o latou ola ia Keriso pe faapea mai foi ua faaolaina ae o loo ola pea i le agasala, o loo ola i se taulaga o e oti i le agaga? O le faitauga mai le Tusi Paia o le asō o loo ta'u mai ai iai tatou sa tatou oti i le agasala ae lei faaolaina i tatou e Iesu e ala i lona maliu ma le toetu. Na afio o ia i le taulaga o ē oti ma aumai le ki o seoli ma le oti mai ia Satani (Faaaliga 1:18). Na maliu Iesu ina ia aua nei iai se tasi e ui i le tigā matuitui o le oti e faavavau. Ou te fautua malosi atu ia te oe ina ia faasaoina oe mai le faafanoga, talia Iesu e avea ma ou Alii ma Faaola ae lei tuai. Liliu ia te ia i le asō, ona ia suia lea o lou nofoaga mai le taulaga o ē oti i le ‘Malo o le Ola'. Afai o oe o se tasi o fanau a le Atua, o lau matafaioi o le talai atu le talalelei iai latou e lei talia ma tuuina atu o latou ola ia Iesu Keriso. Aua e te pisi i au lava pisinisi ae e faatalalē i le pisinisi a le Alii o le molimau atu i agaga o loo leiloa pea. O nisi taimi o le faamanuiaga o loo e naunau iai o loo nanāina i lou usitai lea i le poloaiga a le Alii e talai le talalelei ma fai nuu uma ma so'o. I le tele o tausaga talu ai, e iai se tamaitai sa tatalo lava i le Atua mo sona toalua ma na fai iai le Atua, ‘alu e manumaloina agaga. O lou toalua e lei avea lava ma sui o lo'u aiga'. Na usitai ma taulai lana vaai i le talai atu i ē o leiloa. Ina ua maea le 6 masina, na sau ia te a'u ma faapea mai, ‘Tamā, e iai lo'u faafitauli'. Na ou fesili iai poo le a le faafitauli ae faapea mai, ‘o se tagata fou faatoa faaolaina na ou taitaia ia Keriso ua fai mai e fia faaipoipo ia te a'u'. Na ou fai iai e tatalo ma talia pe afai ua ia mautinoa o lona tofi lea. O le asō, o i laua o se ulugalii pito sili ona lelei ou te iloa. Le au pele e, afai ua faaolaina oe e le Atua mai le taulaga o ē oti, ‘aua e te manatu tau o oe lava, talai atu iai latou o loo nonofo pea i lea taulaga ina ia latou faatasi ma oe i le malo o le ola. O le matafaioi a soo se kerisiano o le talai atu iai latou o loo nonofo pea i le taulaga o ē oti, i le suafa o Iesu, Amene. 

OPEN HEAVENSMATALA LE LAGI MO LE ASO LULU 8 IULAI 2026(tusia e Pastor EA Adeboye) Manatu Autu: Ia sili atu le tatalo (Exceed in prayer ) Tauloto Tusi Paia:Efeso 6:18 “Ia ‘outou tatalo i le Agaga i aso uma lava i talotaloga ma fa‘atoga uma; ‘ia ‘outou mataala pea i lenei lava mea, ma matuā tausisi i le fa‘atoga mo tagata pa‘ia uma lava;”Faitauga - Tusi Paia: Kenese 32:24-30 I se vaitaimi i le 1975, o lo'u tamā faaleagaga, na sau ma nofo i lo'u tamai fale i se aai i Saute i Sisifo o Nigeria. E ui o se fale e faia i le palapala ae teuteu i le simā, sa ou fiafia lava e talimalo ai i lo'u tamā faaleagaga. Ua oo i le po ua  maea ma tatalo faatasi ona ou sauni lea ou te alu ou te moe. Ao ou savali i le potu ou te moe, ou te vaai atu o loo tootuli lava lou tamā ma tatalo. Ina ua ou ala i se taimi i le tulua o po ma ao ma ou toe ala i le 5.30 i le taeao, na ou ofo i lou vaai i le toeaina o loo tootuli lava ma tatalo. Ua ou popole ma ou fesili atu iai pe iai se faafitauli ua tupu, ae faapea mai ua lata ona ou malamalama lea. O loo ou mulimuli i ona tulaga vae e amata mai i lea aso, ma ou te malamalama moni, o tatou kerisano faatuatua, e tatau ona tatou tatalo e le aunoa (1 Tesalonia 5:17). Le au pele e, o loo valaau le Atua i lana fanau ia ola i se olaga tatalo. Peitai ane, o le toatele o kerisiano e lē iloa se mafuaaga e tatalo ai pe afai o loo sologa lelei mea mo i latou. E latou te manatu e leai se mafuaaga e tatalo ai fua aua e lē o ui ini luitau ma faigata. Peitai, afai o oe o se tasi o fanau moni a le Atua, e tatau ona e tatalo e lē aunoa. Tusa poo le a le faatele ona e tatalo, e mafai lava ona siitia pea i le nofoaga o tatalo. Aua nei avea lou olaga tatalo o loo iai nei, tusa poo le a le lelei o iai, e te manatu ai o le maualuga lena e gata ai. Finau pea ia siitia ina ia aua ai nei e malolo ma gata ai lou finafinau pea. Ina ua avea au ma taitai aoao o le Ekalesia RCCG, na ou alu ma ave au uo e toaono i se nofoaga i Matū totonu o Nigeria e tatalo ai mo le 36 itula e leai se malolo. Ina ua maea matou tatalo mo le36 itula, na faaalia mai e le Atua nisi o mea iai matou. Ua matou lagona le fiafia ma manatu ua matou faia ma ausia se galuega tele. Peitai i le vaiaso na sosoo ai, na ou faalogo i se tamaloa na tatalo mo le 30 aso e leai se malolo. I le faitauga mai le Tusi Paia o le asō, na tatou vaai ai ia Iakopo o loo tauivi seia ona maua le faamanuiaga mai le Atua, na suia ai lona olaga atoa. Le au pele e, e finagalo le Atua ia te oe e te tumau ia te ia i le tatalo e aunoa ma le faavaivai (Luka 18:1). Aua e te malolo pe talai ni tulaga tetele ua e ausia i le tatalo, ae e tatau ona e saili ia sili ma siitia pea. Tau ina ia faifaipea ona faamalosi atu le Alii ia te oe ao e  faatalitali ia te ia, mo soo se fuata o lou olaga, i le suafa o Iesu. E finagalo le Atua ia e siitia pea i le nofoaga o tatalo, i le suafa o Iesu, Amene. 

OPEN HEAVENSMATALA LE LAGI MO LE ASO LUA 7 IULAI 2026(tusia e Pastor EA Adeboye) Manatu Autu: O le ala e faaleleia ai (His refining process ) Tauloto Tusi Paia: Salamo 105:18-19 “Ua latou fa‘atigā i ona vae i le noanoaga; ‘ua o‘o lava o ia i le u‘amea; ‘ua o‘o i le tau na taunu‘u ai lana afioga. O le afioga a le ALI‘I na tofotofo ai ‘iā te ia.”Faitauga - Tusi Paia: Esoto 13:17-18 O le Atua i Lona poto, e na te ave lana fanau i le ala e savali ma ui ai, ia ausia tulaga tetele. E na te faaaogaina laasaga uma e faatonu lelei ai a latou amio ma vavaeeseina i latou mai soo se mea e taofia pe faaumatia ai i latou e aunoa ma le ausia o tulaga tetele. Mo se faataitaiga, ae lei ausia e Iosefa lona tulaga maualuga, na ave e le Atua o ia ma ui i le tulaga pito sili ona maualalo, i le fale o Potifara, o le falepuipui e saunia ai lana amio ia lelei ao sauniuni atu e avea ma alii sili i Aikupito. O le tauloto mai le Tusi Paia o le asō o loo fai mai, na oo o ia i uamea seia taunuu le Upu a le Atua. O le Upu a le Atua na tofotofo ia te ia seia faamaonia ua saunia lelei mo tulaga tetele. Na faapena foi Tavita, na ui foi i ala o le Atua e saunia ai i le avea ma tupu. O lona ala i le avea ma tupu na iloa ai le tele o luitau, e aofia ai le nofoesea i le vao. O le ala i tulaga tetele e masani ona tele ai luitau ma faigata. O le ala moni i tulaga tetele e lē faigofie, peitai e iai lona taui lelei. Na faamatala e le Aposetolo o Paulo lea ala o le ‘puapuaga mamasagia' i le 2 Korinito 4:17. Peitai tusa poo le a le faigata o le ala, e lē mafai ona faatusaina i le maualuga ma le matagofie  o le mamalu ua maea saunia e le Atua mo i tatou. O tagata e fia ausia tulaga tetele e aunoa ma le ui i ala ua saunia e le Atua, e lē umi ona iai i ia tulaga tetele pe a oo iai. E pei o le tupu o Saulo, na i'u ina ia lē toe maua ia tulaga ona o amio ma vaivaiga sa tatau ona aotauina mai ai. O i latou e filifili e ui i ala o le Atua e i'u ane lava e tulai mai e famamaina e pei o le auro maoi. E avea ma alii ma tamaitai e faatuatuaina e le Atua ma le tele o punaoa ma le vaaia o tagata. E oo i lo tatou Alii o Iesu Keriso na ui i ala o le Atua , ma ina ua oo mai le taimi moni e faia ma faatinoina ai le galuega a le Atua, na papatisoina o ia ma ua afio mai le Agaga o le Atua ia te ia ( Mataio 3:16-17). E lei amata ona faia vavega ina ua uma ona fanau mai, aua e lē mafai ona faatuina mai e le Atua se tagata e aunoa ma lona tofotofo ma saunia o ia. E pei ona tatou iloa mai le faitauga mai le Tusi Paia o le asō, na taitai e le Atua le fanauga a Isaraelu i le ala ma ua malaga atu i le nuu na folafolaina i le ala umi. E lei finagalo o ia e toe foi i latou i Aikupito i le taimi muamua e fetaui ai ma se taua. Na finagalo e fesoasoani iai latou ina ia avea ma se nuu malosi ma mausalī. Le au pele e, o ave oe e le Atua i se ala e faaleleia atili ai lou tagata ae ua faigata ia te oe? Ou te faamalosi ia te oe ia e filigā ao e ui ai, aua o le vaega lea o fuafuaga a le Alii e saunia ai oe mo tulaga tetele e moni ma mausalī. Tatalo, Le Alii e, faamolemole fesoasoani mai ia te a'u ina ia ou ui i le ala e faaleleia atili ai lo'u tagata ma le manuia, i le suafa o Iesu, Amene. 

OPEN HEAVENSMATALA LE LAGI MO LE ASO SA 5 IULAI 2026(tusia e Pastor EA Adeboye) Manatu Autu: O Le A Lou Naunautaiga Loloto? (What Is Your Deepest Desire? ) Tauloto Tusi Paia: Salamo 130:6 “O lo‘o fa‘atalitali atu lo‘u agaga i le Ali‘i e sili i ē o leoleo ‘ona fa‘atalitali i le taeao; e sili lava i ē o leoleo ‘ona fa‘atalitali i le taeao.”Faitauga - Tusi Paia: Ioane 12:20-21 Fai mai le Salamo 27:4 “E tasi le mea ‘ua ‘ou ole atu ai i le ALI‘I, o le mea lava lea ‘ou te sā‘ili atu ai; ‘ia ‘ou nofo i le fale o le ALI‘I i aso uma o lo‘u ola, ‘ina ‘ia ‘ou iloa atu ai le matagofie o le ALI‘I, ma ‘ou sā‘ili i lona malumalu.”  I le fuaiupu mai le Tusi Paia ua taua i luga ma le tele o isi fa'ata'ita'iga i totonu o le Tusi Paia, o loo faailoa ai e Tavita lona naunautaiga e nofo i le mamalu o le Atua. I le Salamo 63:1-2; na ia fa'aalia ai le fa'anaunauga o lona loto e ala saili i le Atua ma iloa lona malosi ma lona mamalu. I le fuaiupu e 6 o le mataupu lava lea na fai mai ai Tavita na te manatua le Atua i luga o lona moega ma manatunatu ia te Ia i leoleoga o le po. E faapea fo'i i le fuaiupu tauloto o le asō na ia faapea mai, o loo faatalitali lona agaga i le Alii e sili atu ia i latou o ē leoleo ma faatalitali i le taeao. O tagata leoleo e lē aunoa ona fia vaai atu i le tafa mai o ata latou te saoloto ai e mālōlō ma mapu ai, ma na faatusa e Tavita lona matua'i naunau mo le Atua e pei o lo latou manana'o ma faatalitali mo le tafa o ata. Le au pele e, o le a, po o ai o e sailia? I le tusi faitau mai le Tusi Paia o le asō, sa i ai se Eleni na o atu e tapua'i i se tausamiga i Ierusalema, ma ina ua o latou vaaia Filipo, na o latou faapea, “Le alii e, matou te fia feiloai ma Iesu.” Afai e avatu e le Atua se avanoa ia te oe i le asō e ole atu ai i soo se mea, o le a se manaoga o le a e fai? E te ole atu ea mo mea e uma le aoga pe a uma le olaga nei, pe e te mana'o ia e vaai ia Iesu? O tagata e saili i le Atua mo na o mea o le lalolagi e lē mafai ona fa'amalieina auā o ia mea e i'u ina mou atu. Peita'i o i latou e saili i le Atua ma lona mālō ma le loto atoa latou te maua lava o Ia (Ieremia 29:13) ma i'u i le fa'amalieina atoatoa, auā o isi mea uma latou te manaomia e fa'aopoopoina ia i latou (Mataio 6:33).E fa'alatalata le Atua e lē aunoa i e fa'alatalata atu ia te Ia (Iakopo 4:8). Na ia fa'aalia manino lea tulaga i le la sootaga ma Tavita. E te mana'o e alofa le Atua ia te oe i se ala faapitoa? E te mana'o e faatasi mai o Ia ia te oe i taimi uma? Ia avea la ma ou naunautaiga loloto le faafiafia ia te Ia e le aunoa (Tesalonia 4:1) ma ia fa'aauau ona e tupu ma ola i lou iloa o Ia (Filipi 3:10).Atalii /afafine o le Atua, o le a le tagi ogaoga i lou loto? O le a se mea o e ala ai i le po? O e mafaufau i taimi uma pe faafefea ona faaputu ma faateleina mea fa'aletino mo oe lava? Po o e manatu pe faafefea ona e iloa atili le Atua? Po'o le a lava le mea o e fiaai ma fiainu i ai, e fua iai le mea e te maua, e pei ona fai mai le tusi o Mataio 5:6; “Amuia i latou e fiaaai ma fiainu i le amiotonu auā e maoona i latou.” Ou te tatalo ia e saili I fofoga o le Atua ma lou loto atoa ma ia e soifua ma iloa le matagofie o lona Paia, I le suafa o Iesu. O le a le tagi ma le naunautaiga loloto o loo ia te oe? Mea i le tino poo Iesu? I le suafa o Iesu, Amene.

OPEN HEAVENSMATALA LE LAGI MO LE ASO TOFI 2 IULAI 2026(tusia e Pastor EA Adeboye) Manatu Autu: Faaopoopo ma faaopoopo (More after more) Tauloto Tusi Paia: Luka 1:53 “Ua fagaina e ia i mea lelei ē sa fia ‘a‘ai, a o ē mau mea ‘ua aufuaina atu e ia.”Faitauga - Tusi Paia: Filipi 3:5-14I  le faitauga mai le Tusi Paia o le asō, sa faamalau mai e Paulo nisi o matatia na ia ausia. Na ia fai mai o ia na peritomeina i le po valu, e mai le ‘āiga o Isaraelu, o le itū‘āiga o Peniamina, o le Eperu o sa Eperū, ma o ia o le faresaio. Ina ua maea ona ia faamatala faailoga ma tomai na ia ausia, ona ia faapea mai lea ua ia manatu e lē aogā ia mea uma ‘ona o Keriso.E manino o Paulo o se tasi o le au aposetolo e maualuga lona aoaoina. O ia o se loia ma se faresaio, sa aoaoina e se faiaoga tautaua i ia vaitau o Kamalielu ( Galuega 22:3). A faatusa i nei aso, na alu i le Iunivesite pito maualuga ma aoga i lalo o polofesa tautaua tomai ma faailoga. Sa ia ausia mea e viia ai tagata. Peitai, ina ua ia tuuina lona ola ia Iesu, na ia tuuina uma mea na ia ausia i lalo o aao o Keriso ma faataga le Alii e faaaogaina mo le faalauteleina o lona malo. Na faamaualalo o ia ma gauai ia Anania, o le soo o Keriso i Tamaseko ma alu i ana misiona e talai le talalelei ma Panapa, o le sa Levī. E lei faatagaina e Paulo mea na ia ausia e taofia lona saili pea i le Alii ma lona loto atoa. O le mealilo o matatia na ausia e Paulo o lana savaliga ma le Atua e pei ona maua i le Filipi 3:13 “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.”Sa filiga pea Paulo ia aoaoina pea. E na te lei faatagaina mea ua ia iloa e taofia lona iloa o mea o loo fia faaali atu e le Atua ia te ia. O le tulaga lea e tatau ona e iai pe afai e te fia savali vavalata ma le Atua, e ausia mea tetele mo lona malō. Fai mai le Auega 3:23, o lona alofa mutimutivale e fou i taeao uma. Afai e te uu mau pea i le alofa mutimutivale o ananafi, e faapefea ona e maua le vaega o le asō? E iai lava le faaopoopo i mea o loo e maua i le asō, ma e mafai e le Atua ona foai atu mea faaopoopo e sili atu i mea ua maea ona ia foai atu ia te oe. Peitai seiloga e te faamaualalo e maua mai le Alii ona e maua lea o le faaopoopo mai ia te ia. O se tasi o fili o le tuputupu pea o le mafaufau ua taunuu. O le taimi e manatu ai le tagata ua latou taunuu (ausia le faatumutumuga o lona olaga), ua latou taofia le tuputupu a'e. Le au pele e, ole atu i le Atua e fesoasoani ia te oe e tausia se loto e fiaai mo ia ma saili faifaipea e ausia mea tetele mo lona malo. E na te foai atu le faulai o lona alofa tunoa, ina ia e tumau pea ia te ia ma ona manuia. TataloTamā, faamolemole foai mai ia te a'u le fia ai e saili ai pea ia te oe, i le suafa o Iesu, Amene. 

OPEN HEAVENSMATALA LE LAGI MO LE ASO LUA 30 IUNI 2026(tusia e Pastor EA Adeboye) Manatu Autu: Aua le taofia lou a'oa'oina pea (Dont stop learning) Tauloto Tusi Paia: Salamo 107:9 “Auā ‘ua na fa‘amalie i le tagata fia inu, o le tagata matelaina fo‘i ‘ua mā‘ona mai ‘iā te ia i le mea lelei.”Faitauga - Tusi Paia: Galuega 18:24-28O le faitauga mai le Tusi Paia o le asō, o loo faamatala mai ai iai tatou le tala ia Apolo, o se alii aoaoina na nofo i Efeso. Ua faamatalaina o se tagata ua a‘oa‘oina i ala o le Ali‘i; ‘ua malosi fo‘i lona loto. Ana faapea o loo soifua o ia i lenei vaitau, e leiloa pe faaigoaina o se aposetolo, se faifeau poo se taitai o le Ekalesia. Sa aoaoina lelei Apolo i le Tusi Paia ma sa loto toa e aoaoina tagata i le sunako. Peitai, ina ua oo atu Akula ma Pisila i Efeso, na la maitauina nisi o vaega e lē o manino i lana aoaoga, o lea na la avea o ia ma faamatala atili ia te ia ala o le Atua. E lei faamaualuga Apolo e na te lē faalogo i aoaoga na maua mai ia Akula ma Pisila. Ae na ia faalogo ma faaopoopo mea na aoaoina ai o ia i mea ua ia iloa. O le tagata ua aoaoina lelei i le upu a le Atua ua iu ane i se tagata ua ia aoaoina lelei tagata Iutaia, o Iesu o le Keriso e ala i le Tusi Paia. O Apolo, e talia gofie le aoaoina ma sa faamaualalo ia aoaoina mai isi tagata. Le au pele e, e mafai ona aoaoina oe ese isi tagata? E te faamaualalo ia aoaoina mai isi tagata e ono lē lauiloa e pei o oe, toaga i le tatalo pe aoaoina e pei o oe?O se tasi o tulaga ootia e ono oo i se tagata, pe afai e lē toe fia faalogo i se aoaoga. Fai mai le Faataoto 1:5 “E fa‘alogo mai le tagata poto, e tupu ai pea lona poto; o lē ‘ua mafaufau fo‘i e maua e ia le poto e pule ai;”E le tatau ona gata lou fia inu i le poto aua e fua iai lou tuputupu pea. E lē tatau ona e oo i se tulaga e te faapea ai ua e poto tele e te le toe fia iloa seisi mea. I le 2 Tupu 4:1-8 ina ua amata ona sasaa e le fafine ua oti lana tane le suauu mai lana fagu suauu i ipu na ia aoina mai tuaoi, na masaa pea le suauu seia oo ina le toe iai se ipu o totoe ona gata ai lea o le suauu. O se faataitaiga manino lea o le mea e tupu i le tagata ua manatu ua lava ma totoe lona poto o iai, o lea tagata ua gata lona tuputupu pea. Le au pele e, e iai lava se mea fou e aoaoina ai oe. Tusa poo le a le poto o loo e iai e faatatau i le Atua, e iai lava vaega eseese o le Atua e tatau ona e suesue ma malamalama ai. Fai mai le 2 Peteru 3:18 “A ‘ia tutupu ‘outou i le alofa tunoa ma le poto i lo tatou Ali‘i, o lo tatou Fa‘aola lea o Iesu Keriso. Aua e te faatagaina mea ua e iloa e taofia lou aoaoina o mea e tatau ona e iloa. Ou te tatalo e faaali atu pea e le Alii o Ia ia te oe, ao e saili atu pea e siitia lou iloa o ia. E te faamaualalo ea ia aoaoina pea? I le suafa o Iesu, Amene. 

OPEN HEAVENSMATALA LE LAGI MO LE ASO GAFUA 29 IUNI 2026(tusia e Pastor EA Adeboye) Manatu Autu: Taulai le vaai i mea e lē vaaia (Focus on the unseen) Tauloto Tusi Paia: 2 Korinito 4:18  “O lo‘o matou lē mānatunatu i mea ‘ua va‘aia, a o mea e lē va‘aia; auā o mea ‘ua va‘aia e gata mai ia, a o mea e lē va‘aia e fa‘avavau ia.”Faitauga - Tusi Paia: Eperu 11:1-3O le faitauga mai le Tusi Paia o le asō tatou te malamalama ai o mea uma i le lalolagi na faia e le Upu a le Atua. O lona uiga, o mea o loo e vaai atu iai, na faia mai mea e lē vaaia. O le tulaga tonu lea e finagalo ai le Atua i lana fanau e manatunatu i mea i le agaga e sili atu i mea i le tino. I le tauloto mai le Tusi Paia i le asō, o loo faamalosi mai Paulo ia tatou manatunatu ma taulai le vaai i mea e lē vaaia. Faataitaiga, afai o e ui i luitau ma faigata, aua le taulai le vaai i mea o vaaia, ae ole atu i le Atua e faaali atu ia te oe mea oi tua atu o luitau o loo feagai ma oe. Alu atu i le Atua i le tatalo, ma faataitai ia Repeka o lē na fesili i le Alii, ‘Āfai e fa‘apea, se a le mea ‘ua ‘ou fa‘apea ai?”(Kenese 25:22). O soo se taimi e ui ai tagata i luitau, o le toatele lava e taulai le vaai tau o mea o loo vaai atu iai. Peitai afai e tatalo i le Atua ma ole atu ia faapupulaina o latou mata ia iloa atu mea e lē vaaia, e tali mai o ia ma taitai i latou ia maua le tali e fetaui lelei. I le Luka 15:11-32, na faamatala e Iesu le faataoto o le atalii faamaumau oa, na ola e leai se tapasā i se nuu mamao. E lei leva, ua amata ona leai se mea o totoe ma ua leai se tupe e ola ai. Ua matua leaga le tulaga na oo iai ua manatu e ai i meaai a puaa ona ua leai se meaai. Ina ua oo i le tulaga ua ia lē mafaia se mea e ola ai, na manatu e toe foi i lona tamā, ona foia uma lea o ona faafitauli i se taimi vave. Ana lē suia le mea na taulai iai lana vaai o le toe foi i lona tamā, semanu e faaauau ai pea ona pologa ma taamilomilo solo ai lava. Le au pele e, afai o loo e feagai pea ma se luitai, poo pologa foi i se mataupu, e leiloa pe ua tatau ona sui le tulaga e taulai iai lau vaai. E te manaomia ona taulai lau vaai i lou tamā i le lagi e ala i lou valaau ia te ia i le tatalo. E le umi se taimi ona tali mai lea o le Atua, peitai a taulai lau vaai i le ala sesē, o le a le mafai ona e iloa atu mea ua saunia e le Atua e mafai ai ona e manumalo ai, i luitau o loo feagai ma oe. E pau le finagalo o le Atua ia taulai lau vaai ia te ia ina ia mafai ona ia faaali atu le ala i lou manumalo ma faamatuu atu faamanuiaga ia te oe. Ou te tatalo ia fesoasoani atu le Atua malosi ia te oe e faatumauina lou vaai atu pea ia te ia i taimi uma, ina ia avatu le malosi ia te oe e te maua ai pea le manumalo. TataloTamā, faamolemole fesoasoani mai ia te a'u ina ia tumau pea lo'u vaai atu ia te oe, ina ia ou savali pea i le manumalo, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 27 IUNI 2026(tusia e Pastor EA Adeboye) Manatu Autu: Mata e vaai ai 2 (Seeing eyes 2) Tauloto Tusi Paia: Isaia 29:18  “O le aso lava lea e lagona ai ē o tutuli i ‘upu a le tusi, e fa‘apupulaina fo‘i mata o ē ‘ua tauaso ‘ina ‘ua te‘a le pouliuli ma le pogisā.”Faitauga - Tusi Paia: Kenese 21:14-19O ananafi na ou talanoa atu ai o mata e vaai ai, e lē na o mata o le tino. A foai atu e le Alii ia te oe mata e vaai ai, e amata ona e fiafia i tulaga sa e pologa ai muamua. I le faitauga mai le Tusi Paia o le asō, o Akara ma lana tama o Isamaeli, na malaga i le vao, ona leai lea o se vai e feinu ai. O le vao e lē o se nofoaga e te alu atu iai ae leai se vai, o lea ua leai se vai ma ua oo ina vaivai i le fia inu. Ua matua vaivai ua faapea lona tinā ua oti. Ua ia iloa e leai se mea e mafai ona ia faia ina ia ola pea lana tama, o lea na ia faamamao ese le pepe ae tagi aueue. I le taimi lea, na afio mai le Atua ma faapupulaina ona mata ma vaai atu i le tali o lona faafitauli o loo i ona tafatafa. Sa iai se vaieli e latalata atu ia te ia, peitai e na te leiloa atu seia oo ina faapupula e le Atua ona mata. E matua faanoanoa pe ana faapea e oti, e aunoa ma lona iloa o le tali o lona faafitauli o loo matuā latalata atu ia te ia. Afai o loo e feagai ma ni luitau, ou te tatalo ia faapupulaina e le Atua malosi ou mata ia e vaai i tali e talafeagai, i le suafa o Iesu. Afai e le maua e tagata mata e vaai ai, e latou te savavali i le pogisa. E ono latou maua faamanuiaga i lo latou siomaga, peitai e puapuaga pea aua latou te lēiloa atu. O i latou e leai mata e vaai ai, e pauū atu i le alofa mutimutivale o isi tagata. E tau pauū i mea e lē masani ona pauū ai isi tagata, aua foi e lē mafai ina latou iloa atu. O le pogisa e aumai ai le fememeai ma le gaogao ma o le mafuaaga lea na gaogao ai le lalolagi ma soona nunumi seia fetalai iai le Atua, ona malamalama ai lea ( Kenese 1:2). Le au pele e, e finagalo le Atua e foai atu mata e te vaai ai i le faulai o faamanuiaga ma fiafia ai i lona agalei e leai sona gataaga. O le tulaga na ia finagalo e iloa e Akara o le vaieli, peitai mo oe,  e leiloa poo ia finagalo e te vaai atu i seisi auala e maua ai tupe, peo le auala e sili atu e te galue ai, pe o seisi auala lelei e fesootai ai ma tagata. E lē finagalo le Atua e te nofo i le pogisa, e finagalo ia e tumu i le malamalama. E finagalo e faaali atu ia te oe le oloa o le pogisa ma oloa lilo o loo i meaa nanā. Ou te tatalo e tatala e le Alii ou mata e te vaai i mea lelei ua ia saunia mo oe, i le suafa o Iesu.TataloLe Alii e, faamolemole foai mai ia te a'u mata e vaai ai ina ia ou savali i lou malamalama ma aua nei o'u pauū i le pogisa, i le suafa o Iesu, Amene. 

OPEN HEAVENSMATALA LE LAGI MO LE ASO FARAILE 26 IUNI 2026(tusia e Pastor EA Adeboye) Manatu Autu: Mata e vaai ai 1 (Seeing eyes 1) Tauloto Tusi Paia: Faataoto 20:12  “O taliga e fa‘alogo ai ma mata e va‘ai ai; o le ALI‘I o lē na faia ia mea e lua.”Faitauga - Tusi Paia: 2 Tupu 4:1-7O le faitauga mai le Tusi Paia o le asō o loo faamatala mai ai se fafine ua oti lana tane, o le a ave lana fanau e fai ma pologa ona o se aitalafu tele na tuua e lona toalua. Sa matua mafatia lona tulaga ma ua tamoe i le perofeta o Elisaia ma faasoa atu iai lona faafitauli. Ina ua maea ona faamatala atu ia Elisaia lona faafitauli, na fesili mai le perofeta poo le a le mea o loo i lona fale, ma na tali atu, ‘e leai se mea ae na o sina suaauu i le ulo'. Na manatu o se mea laitiiti, peitai e na te leiloa, e pau lea ole mea e manaomia e saoloto mai ai i aitalafu. E iai taimi, e te lē manaomia ni mea faaopoopo e sili atu i mea o loo ia te oe, e te maua ai mea uma ua saunia e le Atua mo oe. O mea uma na manaomia e le fafine ua oti lana tane e fofo ai ona faafitauli tau tupe, sa iai lava i totonu o le fale, ae na te leiloa. Na faaaogaina faatonuga a Elisaia i le mea e faia i mea sa ia te ia, ona liua ma ua faateleina se mea itiiti sa ia te ia. Ana tatala e le Atua ona mata e vaai ai i mea tetele e mafai ona faia e le Atua mai mea itiiti sa ia te ia, semanu e na te lē popole. Ou te tatalo ia tatala e le Atua Malosi ou mata e te vaai ai i fofo o faafitauli ua ia tuuina i lou siomaga, i le suafa o Iesu. I le tauloto mai le Tusi Paia o le asō, fai mai le Tusi Paia o taliga e faalogo ai ma mata e vaai ai na faia e le Alii. O lona uiga e mafai ona siomia se tagata ma le oloa e tele, peitai afai e lē faapupulaina e le Atua lea tagata e vaai i avanoa ua ia tuuina i lona siomaga, e ono oti lava o mativa. O le maua o mata e vaai ai e sili atu i le nā o le vaai i le tino nei. A e maua mata e vaai, e te iloa atu avanoa i mea o loo vaai atu nisi o faafitauli, pe iloa atu foi le faulai o mea, ae o loo vaai atu isi e lē lava. Ina ua faapupula e le Atua mata o Isaako e iloa atu avanoa i le ogatotonu o le oge, na avea o ia o se tagata mauoloa tele ua oo i le au Filisitia, ua ofo ma mataua, ona ua matua mauoa tele e sili atu iai latou ( Kenese 26:12-16). Le au pele e, o le ola tuputupu pea ma manuia, e te manaomia mata e vaai. E manaomia lou vaai atu, e sili atu i le itu e masani ai, ina ia ausia tali e sili atu i tulaga masani. I aso o le a sosoo atu nei, o le a ou faasoa atu i le taua o le iai o mata e vaai ai ma le mafuaaga e tatau ai ona e ole atu i le Alii ia e maua. Ou te tatalo e foai atu e lo'u Tamā i le lagi ia te oe mata e vaai ai, ina ia e iloa avanoa o loo vaai atu isi tagata o ni faafitauli, ma maua ai ou avanoa lelei ae o loo teena ai isi, i le suafa o Iesu. TataloLe Alii e, faamolemole foai mai mata e vaai ai sei ou maua ai avanoa lelei ua e faatulagaina i lo'u siomaga, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 25 IUNI 2026(tusia e Pastor EA Adeboye) Manatu Autu: Amata mai i le mea o loo e iai (Start from where you are) Tauloto Tusi Paia: Sakaria 4:10 “Auā po o ai ‘ea ‘ua ‘ino‘ino i le aso o mea iti? Latou te fiafia ‘ina ‘ua latou va‘ai i le fua fa‘atautau i le lima o Serupapelu; “O i latou nei e fitu, o fofoga o le ALI‘I i latou, e fetaufetulia‘i i le lalolagi uma.”Faitauga - Tusi Paia: Ioane 4:25-30O nisi tagata e filifili e lē galue ma le finafinau i latou galuega e oo i mea latou te faia mo le malo o le Atua, aua foi e lē fia amata i se tulaga laitiiti. E faatuai lava ona faataunuuina mea e tatau ona latou faia ona e manatu e leai se agavaa o iai latou. Afai ua tuuina atu e le Atua ia te oe se galuega e tatau ona faatino, e lē tatau ona e faatali seia e lagonaina ua lava lou agavaa e faatino ai. Aua foi o loo silafia e le Atua lou agavaa o loo iai ma le tele o faaletonu ae na te lei filifili oe. E ui e manaomia lou tuputupu pea ma faaaupegaina lou tagata ina ia tele ou tomai ma agavaa, o se ipu taua i ona aao, e lē tatau ona e tuua le Atua e faatalitali pea pe afai ua ia faatonuina oe i se galuega e faia, ona o loo e faatali seia e maua tomai uma e manaomia mo lea galuega. I le Ioane 41:1-30, ina ua talanoa Iesu i le fafine Samaria, na toe foi lenei fafine i ona tagata ma talai atu Iesu iai latou. E pau le mea sa ia te ia, o le faatasi ona fetaiai ma le matai, peitai na lava ma totoe lea, e mulimuli ai tagata ia te ia, ma o atu ai ma feiloai ma Iesu. E lei alu e resitara i se aoga Tusi Paia, pe faia sana aoga mai le au Tusiupu, na amata mai i le nofoaga sa iai ma mea sa ia te ia. Ina ua valaau le Atua ia Mose i le Esoto 3, na ia manatu e lē agavaa o ia mo le galuega. Na faaauau ona ia lau atu i le Atua mafuaaga e lē mafai ai ona ia faia, e oo i le fautua atu i le Alii e saili seisi tagata. E lē valaau le Atua i ē agavaa, ae na te faaauupegaina i latou na te filifilia ia agavaa. E mafai ona lē filifilia e le Atua se tagata e lava le tomai ma agavaa ae filifili se tagata e matua lē lava le tomai ma leai se agavaa. Mo se faataitaiga, na lē filifilia e le Atua uso matutua o Tavita, ae na filifili le uii o le aiga, e foliga mai e matua leai sona agavaa e fai ai ma tupu. Fai mai le Salamo 78:70-71 na filifilia e le Atua Tavita mai le lotoā mamoe e fafaga ia Isaraelu lona tofi. E matua fiafia le Atua e filifilia mea vālea a le lalolagi, ‘ina ‘ia fa‘amāina ē popoto (1 Korinito‬ ‭1‬:‭27‬). E fiafia foi e nanā mea mai ē popoto ma ē atamamai, ae fa‘aalia atu ia mea i tama valevale. (Mataio‬ ‭11‬:‭25‬). Le au pele e, ua valaau ea le Atua e te faia se mea mo ia? Tilotilo e sili atu i le tulaga o mea ua e maua ae alu loa e fai. Amata mai le mea o loo e iai, aua e te inoino i le aso o mea iti. I le aso o le faamasinoga, e lē manatu le Atua i tagata e iai tomai ma agavaa, peitai o le a silasila ma faapea mai, ‘ua lelei ia, le auauna lelei e ma le faamaoni' ( Mataio 25:21). Amata laitiiti, tumau i le faamaoni ona faaaupegaina lea o oe e le Alii i mea uma e te manaomia ao e faatinoina le galuega na tuu atu ia te oe, i le suafa o Iesu, Amene. 

OPEN HEAVENSMATALA LE LAGI MO LE ASO LULU 24 IUNI 2026(tusia e Pastor EA Adeboye) Manatu Autu: O totōina oe ma auauna? (Are you planted and serving?) Tauloto Tusi Paia: Salamo 92:13 “O ē ‘ua totōina i le fale o le ALI‘I, e tupu olaola i latou i lotoā o le tatou Atua.”Faitauga - Tusi Paia: Galuega 13:1-3I le Luka 12:7 na fetalai Iesu o ‘outou lauulu ‘ua faitaulia uma. Afai o loo auiliili ona silafia e le Atua le aofaiga o ou lauulu i lou ulu, o lau faaiuga i le nofoaga e te mafuta ai ma isi tagata faatuatua e matua taua ia te ia. O lona uiga, e taua ia te oe le saili i fofoga o le Atua mo le taitaiga i le filifilia o le lotu e te mafuta ai ma isi tagata faatuatua. Fai mai le Isaia 61:3 “E avatu le fiafia i ē fa‘anoanoa i Siona, E foa‘iina atu ‘iā i latou le matagofie e sui a‘i le lefulefu, O le u‘u o le ‘oli‘oli e sui a‘i le fa‘anoanoa, O le ‘ofu e fai a‘i vi‘iga e sui a‘i le loto fa‘avaivai; E igoa i latou, O la‘au o le amiotonu, O le fa‘ato‘aga a le ALI‘I, e fai mōna vi‘iga.”O oe na totoina e le Alii, e na te silafia lelei le nofoaga e tatau ona e totōina ai ina ia e tupu ma ola e tusa ma lona finagalo, e fai mona viiga. O le faitauga mai le Tusi Paia o le asō tatou te malamalama ai na lolotu Paulo ma Panapa i le lotu i Anetioka. Ao iai iina, na faauuina ai i laua e Agaga Paia i le la galuega talai. Sa iai le lotu i Ierusalema ma le isi i Samaria i lea taimi, peitai na fetalai le Atua iai laua i le lotu i Anetioka. Na totōina i laua i le lotu i le nofoaga sa iai ma o le mafuaaga lea na auina mai ai e le Atua lana upu iai latou. Fanau a le Atua, e le gata e lelei le iloa o le lotu e te lotu ai, e taua foi lou mautu ma galue ai iina. E tutupu fatu o se laau pe a paū i le eleele. I le Ioane 12:24, na fetalai Iesu ‘Āfai e lē pa‘ū le fua o le saito i le ‘ele‘ele ma pala ai, e tumau pea o le mea e tasi; ‘ae ‘āfai e pala, ‘ona fua tele mai ai lea. O nisi kerisiano e suisui lava lotu e lolotu ai aua latou te lē faatauaina le totoina i se lotu i le mea o loo nofo ai, peitai, e faigata ai ona faamanuia iai le Atua. O nisi e toaaga i le lotu peitai e lē o galulue i se vaega o le lotu. O ia tagata faatuatua e muamua lava ō i fafo ma le falesa pe a uma le sauniga. Le au pele e, e na o fatu e totōina e mafai ona tutupu ma fua mai ai ni fua. E lē mafai e tagata faatuatua le maua o le atoaga o faamanuiaga a le Atua pe afai e lē o totoina ma auauna i le lotu i le nofoaga o loo finagalo le Atua e iai, aua e na o i latou e totōina i le fale o le Alii e mafai ona tupu olaola i latou(Salamo 92:13), ou te tatalo ia faatulaga e le Alii  ou vae i lana tovine ma sasaa atu ia te oe faamanuiaga e tele, i le suafa o Iesu. Ua e faataga ea le Atua e totōina oe i lana tovine, ma, o e galue ai iina? I le suafa o Iesu, Amene. 

OPEN HEAVENSMATALA LE LAGI MO LE ASO LUA 23 IUNI 2026(tusia e Pastor EA Adeboye) Manatu Autu: Filifili le taimi a le Atua (Choose God's time) Tauloto Tusi Paia: Teuteronome 30:19 “Ou te vala‘au i le lagi ma le lalolagi i le aso nei e fai ma molimau ‘iā te ‘outou, ‘ua ‘ou tu‘uina atu i ou luma o le ola ma le oti, o le manuia ma le malaia; o lenei, ‘ia e filifili i le ola, ‘ina ‘ia ola ai oe ‘atoa ma lau fānau;”Faitauga - Tusi Paia: Esoto 32:19-28E pei ona tatou iloa mai le tauloto mai le Tusi Paia o le asō, ua tuuina mai e le Atua i luma o tagata uma le ola ma le oti, manuia ma le malaia. E te ono fai mai, e te filifilia le ola ma le manuia, peitai o au mea e faia i aso uma e atagia ai lau filifiliga moni. I le ola, e leai ni faaiuga laiti poo galuega faia. O soo se galuega e faia ese tagata e iloa ai poo ia filifilia le ola poo le oti. I le Kenese 25:29- 34, o loo faamatala e le Tusi Paia le toe foi mai o Esau i le fale ua matuā fiaai ma fai atu ia Iakopo mo se ipu meaai e fesuiai ma lona tofi o le ulumatua. E na te lē iloa, o lana gaoioiga, na aveesea ai o ia ma lana fanau mai le manuia sa tatau ona latou maua. O le asō, e leai seisi o faapea mai, ‘o le Atua o Aperaamo, Isaako ma Esau', aua na faia e Esau le gaoioiga ua lē agavaa ai e tauave le manuia, ina ua ia inoino i lona tofi o le ulumatua i lona aiga. Na sesē lana filifiliga, ma na ia maua le taui. I le Iosua 7:16-26, na faamatala e le Tusi Paia le taui o le faaiuga sesē a Akana, na oo ai ina faaumatia lona gafa. Ina ua avatu e le Atua ia Isaraelu le manumalo ia Ieriko, na faatonu maoti e le Atua e aua nei latou avea se mea e tasi mai Ieriko. Peitai, na filifili e Akana le matapeapea, i le oa ma na i'u ane, ua oti faatasi ma lona aiga. Ou te tatalo, o soo se vaega e sesē sau faaiuga na faia ua oo mai ai luitau ma faigata i lou aiga, o le a galue ma tu mo oe le alofa mutimutivale o le Atua, e fesoasoani ia te oe e toe faaleleia ou ala, i le suafa o Iesu. Le au pele e, mo oe lava ma augatupulaga fai mai  e lei fananau mai, ia faamautinoa o loo e iai i le itu a le Atua. Aua e te taufaasesē ma faafoliga mai i se tagata e lē o oe. Filifili le itu a le Atua aua a oo ina ia faamanuia ia te oe, e manuia foi lou gafa ma ē tupuga mai ia te oe. Fai mai le Salamo 112:1-2, a e fiafia i le Alii, e malolosi lau fanau i le lalolagi. O lona uiga o ou suli, e le pei o tagata masani, ae o le a tauoloa ma tagata ola i la latou augatupulaga. Na matua tagata ola Isaako aua na filifili Aperaamo e tu i le itu a le Atua. Na faamatala e le Tusi Paia, ua tagata ola o ia, ma siitia, ua matua tagata ola. E iai le taimi na matua tagata ola ma malosi o ia i lo le atunuu atoa, ma na faatonu ai e le tupu o lea nuu e alu ese (Kenese 26:13-16). Fanau a le Atua, poo le a lava, poo ai lava e te filifili e te au ai, e aafia ai oe ma ou suli. Ou te faamalosi atu ia te oe, e te filfili le ola i au mea uma e faia ina ia e ola ma manuia ai, ma faapena foi i suli uma e tupuga mai ia te oe. O au faaiuga ma mea e faia, e aafia ai ou suli, filifili ma le poto, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 22 IUNI 2026(tusia e Pastor EA Adeboye) Manatu Autu: Alii o le taimi (Lord over time) Tauloto Tusi Paia: Ioane 11:25 “Ua fetalai atu Iesu ‘iā te ia, “O a‘u nei o le toetū ma le ola; o lē fa‘atuatua mai ‘iā te a‘u, e ui lava ‘ina oti, ‘ae ola lava ia.”Faitauga - Tusi Paia: Ioane 2:1-11O le Atua malosi ma matautia, e malosi moni. O ia o le Alii o mea uma, ma e malosi e mafai ona ia aumaia le lumanai i le taimi nei. I le faitauga mai le Tusi Paia o le asō, o Iesu, o lona tinā ma le au soo na o i se faaipoipoga. Ao faasolo le faaipoipoga, ua iloa e le tinā o Iesu, ua uma le uaina ma ua ia faailoa ia Iesu, ua ia tali mai, ‘e lei oo i lo'u taimi'. E ui i lea, na faatonu e Iesu auauna i le faaipoipoga e faatumu ni fagu vai i le vai, ona asu mai lea ma ave i le taitai o le tausamaaga. Ao latou faia, na liua i se vavega le vai i le uaina. Na aapa atu Iesu i le lumanai ma suia le taimi mai ‘e lei oo iai' i le ‘taimi nei'. Ou te tatalo, afai e iai se mea o loo e faatuatua ai i le Atua ua foliga mai ua faatuai ona taunuu, o le a amata ona tino mai i le taimi nei, i le suafa o Iesu. I le Ioane 11:1-17, na oti Lasalo ma tanumia mo le fa aso ae lei oo atu Iesu i lea nofoaga. I le tino, ua leai se faamoemoe aua o se tino oti mo aso e fa ua amata ona pala (tulou). Peitai ina ua taunuu atu Iesu i le fale o Lasalo, na ia fai atu ia Mareta, le tuafafine o Lasalo, e toetu mai Lasalo. Ana taunuu mai Iesu i le aso na maliu ai Lasalo, semanu e iai sina faamoemoe i le manatu o Mareta e mafai e Iesu ona toe faatuina Lasalo mai le oti, ma ua ia faapea mai, “Le Ali‘i e, ‘ua o‘o ‘ina manogi, auā o le fa lenei o po.” (Ioane‬ ‭11‬:‭39‬). E ui e lei maliu Iesu ma toetu mai,  na ia aapa atu i le lumanai ma avea ma le toetu ma le ola mo Lasalo (Ioane 11:25). Na ia faaaogaina lona tulaga na faasaoina seia maliu ma toetu mai, ma valaau ia Lasalo e sau i fafo mai le tuugamau. Le au pele e, e tatou te auauna i le Atua e lē taotaomia e le taimi. Na ia faia le taimi, ma o ia o le Alii o le taimi. O le mafuaaga lea e lē tatau ai ona e faavaivai pe afai e foliga mai ua leiloa nisi o avanoa taua poo e iai foi i se tulaga ua foliga ua lē mafai ona toe faaolaina. Afai o loo e feagai ma ia tulaga, e pau le mea o loo finagalo le Atua e te faia, o le faatuatua ia te ia, e pei ona fetalai Iesu i le Ioane 11:40, “Pe na ‘ou lē fai atu ‘ea ‘iā te oe, afai ‘e te talitonu, ‘ona e iloa lea o le mamalu o le Atua?”  Ou te tatalo i le asō, afai o iai se tulaga i lou olaga ua faamasinoina, ua oti ma manogi, o le a toe faaolaina mai  ma maua le ola, i le suafa o Iesu, Amene.

OPEN HEAVENSMATALA LE LAGI MO LE ASO SA 21 IUNI 2026(tusia e Pastor EA Adeboye) Manatu Autu: Faaa'oa'o i lou Tamā oi le lagi (Emulate your heavenly Father) Tauloto Tusi Paia: Eperu 6:12 “‘ina ‘ia lē paiē, a ‘ia fa‘aa‘oa‘o i ē na maua i le fa‘atuatua ma le ‘onosa‘i mea na folafolaina.”Faitauga - Tusi Paia: Efeso 5:1-5I le tele o tausaga talu ai, na tatalo se faifeau ma fai i le Atua, afai e na te maua le sefulu pasene o mea o loo ia te a'u, ua malie foi lona loto. Na fai iai le Atua afai e na te faia galuega o loo ou faia, e mafai foi ona ia maua mea o loo ou maua. Ina ua fesili i le Atua poo a au mea na faia i le tuanai ma na faailoa iai e le Atua, na ou amata i le anapogi mo le 40 aso. Na fai le tamaloa lea i le Atua e tuu ia o ia aua e lei sauni e mulimuli i lea faataitaiga. Fanau a le Atua, o le ausia o ni taui i le olaga nei, e tatau ona e mulimuli i faataitaiga aua o le natura o  mea, e i'u ane lava e te faapei o olaga o i latou o loo e mulimuli ai. Ina ua aveolaina ae Elia i le lagi, na maua e Elisaia le faaluaina o le faauuga sa ia Elia, na ia aveina le ofu talaloa o Elia ma tāina ai le vaitafe i Ioritana. Ona ia ole atu i le Atua ia vaeluaina le vaitafe aua na ia vaeluaina mo Elia, ma na faataunuuina e le Atua. Na mulimuli Elisaia i faataitaiga a lona tamā. Na fai Paulo i le au faatuatua i Korinito e mulimuli ia te ia e pei ona ia mulimuli ia Keriso (1 Korinito 11:1). O le fesili, o ai o e mulimuli ai?  O ai o e faaa'oa'o iai? Fai mai le Efeso 5:1, e tatau ona tatou mulimuli o le Atua o lana fanau. Ao tatou mulimuli i le Atua, e iai foi tagata o le Atua i lo tatou siomaga e tatou te mulimuli ai. O le tauloto o le asō o loo faamalosi iai tatou e mulimuli iai latou na latou maua faamanuiaga o folafolaga e ala i le faatuatua ma le onosai. E iai faataitaiga ma faasologa o mea e te mulimuli ai o fanau a le Atua. Afai o mulimuli moni se tagata ia Iesu Keriso, e faasaoina oe pe a e mulimuli ai aua foi o le a ia taitaia oe i le Alii. O loo saunia e le Atua ni faataitaiga se tele i lana Upu ma aumaia iai tatou o tagata o le faatuatua e tatou te faataitai ma faaa'oa'o iai ao latou mulimuli ia Keriso. O le mulimuli i se tagata, e tatau ona e suesue lelei iai latou ma mataitū latou mea o loo faia. E lē mafai ona e faataitai i se tagata mai ni tamai ata o loo e matamata ai i luga o le initaneti, aua e tele mea ni mea e faatatau iai latou e te misia. Faitau i latou tusi, galue fua mo  i latou, suesue ma maitau mea ma faaiuga latou te faia i mataupu. Le au pele e, ao e faataitai i lou Tamā oi le lagi, ia avea oe o se faataitaiga lelei i nisi tagata.  Mulimuli ia Keriso ina ia mafai e i latou e fia faaa'oa'o ia te oe, ona latou maua le Alii. Ou te tatalo ao e faaa'a'o i lou Tamā oi le lagi, e na te faia oe o se amepasa matagofie, i le suafa o Iesu. Tatalo i le Atua e fesoasoani i tamā uma ia avea i latou ma faataitaiga lelei i isi tagata, i le suafa o Iesu, Amene.

OPEN HEAVENSMATALA LE LAGI MO LE ASO TOONAI 20 IUNI 2026(tusia e Pastor EA Adeboye) Manatu Autu: Usitai ia te ia (Obey him) Tauloto Tusi Paia:1 Samuelu 15:22 “Ua fai atu Samuelu, “E tusa, ‘ea ‘ona fiafia o le ALI‘I i taulaga mū ma taulaga, i lona fiafia i le fa‘alogo i le si‘ufofoga o le ALI‘I? Fa‘auta o le fa‘alogo e sili lea i le taulaga ma le usiusita‘i e sili lea i le ga‘o o mamoe po‘a.”Faitauga - Tusi Paia: Kenese 22:1-3, Mataio 2:13-14E iai taimi e aumai ai faatonuga a le Atua e foliga mai e faigata ona usitai, ona o lea, o nisi kerisiano e faatuai ona usitai iai mo se taimi umi. E iai lava sina eseesega i le faatuai ona usitai ma le lē usitai moni. Ina ua faatonu e le Atua Aperaamo e ofo atu Isaako e osi ai le taulaga i le Kenese 22:1-3, ou te manatu e na te lei talanoa i lenei mataupu i lona toalua. E ono ia manatu o le talanoa ma Sara i le mataupu e ono faatuai ai ma ono lē mafai ai ona faataunuuina. E ui na faatonu e le Atua e faia se mea faigata, na ia usitai vave e aunoa ma le tau mafaufau iai. O le taui o lona usitai, na tauto le Atua ia te ia lava o le a ia faamanuia ia Aperamo ma ē tupuga mai ia te ia e faavavau (Eperu 6:13-14). I le tulaga lava e tasi, e lei faatali Iosefa ina ua faaali iai le agelu i se miti e sola ese mai Aikupito ma Iesu ma lona tinā ( Mataio 2:13). Ana ia faatali, semanu e oo ma maua atu e fitafita a Herota. O le vave na usitai e faasaoina ai ma maua ai faamanuiaga a le Atua. A avatu e le Atua se faatonuga, e finagalo e vave ona e usitai. Aua e te fesili iai, na o le usitai i le faatonuga. E lē gata e usitai vave, e finagalo le Atua e te usitai ia te ia ma le lotomalie. I le Isaia 1:19, na ia fetalai, “‘Āfai tou te gaua‘i ma ‘outou fa‘alogo, tou te ‘a‘ai ai mea lelei o le lau‘ele‘ele.”O le tulaga mulimuli, e finagalo le Atua e te usitai ma le atoatoa. O nisi kerisiano e manatu e usitai na o se vaega ae faatuatuanai isi vaega. Peitai, a oo loa ina mulimuli i le Atua, e leai se mea e ta'u o le usitai na o se vaega, a lē usitai ma le atoatoa, e lē o se usitai. Na fai e Saulo le mea sesē lenei ina ua faatonu e le Atua e faaumatia ma le atoatoa Amaleka (1 Samuelu 15:1-3). Na lē usitai ma le atoatoa i le faatonuga a le Atua e faaumatia tagata ma latou meatotino, ae na ia faasaoina le tupu, o mamoe pito sili ona lelei ma isi lafu manu. O le usitai a Saulo na o se vaega, na lē fiafia iai le Atua ma oo ina ia teena ai o ia (1 Samuelu 15:26). Aua foi o le usitai na o se vaega e tutusa lelei ma le lē usitai i le silafaga a le Atua. E lē fiafia le Atua i le usitai na o se vaega. O le usitai vave ma le atoatoa e sili atu lea i taulaga mū e ofoina atu ia te ia (1 Samuelu 15:22-23). Le au pele e, ua avatu ea e le Atua ni faatonuga maoti ia te oe e faatatau i se mataupu? Ole atu ia te ia mo le alofa tunoa e usitai vave iai, ma le atoatoa ma le loto malie. Ou te tatalo ia liua e le Alii soo se loto lē usitai ma le ma'a'a, i se loto usitai, i le suafa o Iesu. TataloTamā, faamolemole fesoasoani mai ia te a'u ia usitai i au faatonuga ma le loto malie, ia vave ma atoatoa i le suafa o Iesu, Amene. 

OPEN HEAVENSMATALA LE LAGI MO LE ASO FARAILE 19 IUNI 2026(tusia e Pastor EA Adeboye) Manatu Autu: Vivii i le Atua e le aunoa (Always praise God) Tauloto Tusi Paia: Salamo 147:1 “Ia ‘outou vivi‘i atu i le ALI‘I. Auā e lelei ‘ona fai pesega i lo tatou Atua; auā e matagofie, e ono lava le vi‘iga.”Faitauga - Tusi Paia: Isaia 38:18-30I tausaga talu ai, o se tasi o ou afafine ua maua i le kanesa ma ua fautuaina e fomai e pau le fofō, o le aveesea o lea totoga, le vaega o loo iai lona leo. Ina ua maea le taotoga, na ma asiasi iai ma lo'u toalua, tatalo ma faamalosi iai, e mafaia mea uma i le Atua. Ona ua aveesea le vaega o lona tino e iai le leo, sa le mafai ona tautala mai ae pau fesootaiga e mafai ona faia o feau tusitusia mai le telefoni. E iai se aso ina ua ou fo'i mai sa'u malaga, ao ou oso i fafo o le taavale, na ou vaai atu i se tagata o taavalevale i le palapala. O lou afafine lena na aveesea le totoga o lona tino e iai le leo. Ina ua vaai mai ia te a'u, ua faapea mai, ‘o a'u lenei tamā, ua mafai ona ou toe tautala'. Sa matuā ou faafetai moni i le Atua mo le toe faafoisia o lona leo ma faataga o ia e usu pese e vivii ai i le Atua e faifai pea. Le au pele e, na avatu e le Atua le leo ia te oe ia faaaoga e vivii ai ia te ia. Afai o loo e soifua pea, e mafai ona faaaoga lou leo e vivii faifaipea ai ia te ia. E tatau i le Atua lau viiga, ma o se tasi lea o auala e maua ai tali o au tatalo. I le taimi o le nofoaiga tupu a Esekia, na ia tofia ositaulaga ma le au sa Levī e faia viiga i le Alii. O latou matafaioi, o le avatu o viiga faifai pea i lotoā o faleie o le Alii, ma o le mea muamua e vaaia e soo se tagata a'o ulufale atu i le faleie, o ositaulaga ma le au sā Levī o loo vivii i le Atua (2 Nofoaiga Tupu 31:2). E lei leva, ae afātia, ma ua gasegase Esekia. Sa matuā ma'i lava. Ua auina mai le Atua lana perofeta o Isaia e logo Esekia. Na matuā faanoanoa i le feau na oo mai, o lea sa liliu atu i le puipui o le fale, ma tagi atu i le Atua. Na ia faamanatu i le Atua, o ia sa savali i ona luma i le upu moni ma faia mea lelei i ona fofoga. Na faalogo le Atua i lana tatalo ma toe auina Isaia e logo o ia, e lē oti (Isaia 38:1-8). Na silafia e le tupu e fiafia le Atua pe a vivii atu, ma o lea na faapea atu i le Atua, o le tuugamau e lē mafai ona vivii ia te ia, na o ē o soifua, e pei ona tusia i le faitauga mai le Tusi Paia o le asō (Salamo 147:1). Le au pele e, tusa poo a mea o tutupu i lou siomaga, e tatau ona e vivii faifaipea i le Atua pe afai o loo e ola pea. A e vivii i le Atua, o loo e faaumatia fuafuaga a le tiapolo ma tapunia i latou e tulai e tauimasui (Salamo 149:67). Ia avea le viiga e fai ma au tali i soo se mea. O lou leo o loo iai e faaaogaina e pese ai viiga i le Atua, i le suafa o Iesu, Amene.  

OPEN HEAVENSMATALA LE LAGI MO LE ASO TOFI 18 IUNI 2026(tusia e Pastor EA Adeboye) Manatu Autu: Faafetai i le Atua e le aunoa (Always thank God) Tauloto Tusi Paia: Salamo 92:1 “E lelei ‘ona vivi‘i atu i le ALI‘I, ma ‘ia fai pesega i lou suafa lē Silisili‘ese e.”Faitauga - Tusi Paia: Mataio 15:30-38I tausaga ua tuanai, na sau se tamaloa mauoa ia te a'u ma faapea mai e tau le mafai ona moe. Na ia faapea mai,  e iai se tagata na fai atu ia te ia a ou tatalo mo ia, e fofoina lona faafitauli lea. Na ia faapea mai foi e na te foai mai ni fale se 14 mo au pe a ou tatalo mo ia ma fofoina le faafitauli. E na te lē tau ofoina mai ni fale ia te a'u ona faatoa ou tatalo lea mo ia, peitai o lona naunautele ia maua se moe lelei na mafua ai ona ia faia lea ofo. O le mafai ona moe lelei o se tasi lea o faamanuiaga mai le Atua e tatou te lē amanaiaina seiloga ua lē mafai ona e moe pe e te iloa foi ni tagata e faapea. Le au pele e, e tele mafuaaga e te faafetai ai i le Atua ma o le ola i se olaga e faafetai i le Atua o se auala faigofie e faailoa ai le agalelei o le Atua i lou olaga. I le ogatotonu o luitau, a e faafetai, o le a amata ona e maua soo se mafuaaga e te vivii ai i le Atua. E vave ona e faaalia o le Atua o le mafuaaga lea e lē o alu ai i tua le olaga. E te mautinoa o loo galue le Atua mo lou lelei (Roma 8:28). A faafetai tagata i le Atua, e na te tatalaina faamalama o le lagi ma liligi ifo ana faamanuiaga i o latou luga. I le faitauga mai le Tusi Paia o le asō, e 4000 tane na matelaina i le fia aai ae le aofia ai fafine ma tamaiti na iai faatasi ma Iesu ma lona ausoo. Na alofa tele Iesu ma naunau e fafaga iai latou, ma o lea na ia fesili ai i lona ausoo e ta'u atu ia te ia pe fia meaai o loo iai. Na latou tali ma faapea atu e na o le 7 areto ma ni nai i'a. E ui i le lēlava o meaai e fafagaina le faitau afe o tagata, na faafetai Iesu, tofitofi i areto, ma tufa atu i lona ausoo ma le motu o tagata. O lana tali muamua i le lē lava o meaai na iai, o le sii o le faafetai. O le loto faafetai o Iesu na tatala ai faamalama o le lagi mo le faateleina, ma na faafuaseia, o ni nai meaai na iai e lē lava ona fafagaina ai le motu o tagata, ua faateleina seia maoona tagata uma, ma na totoe ato o toega meaai e fitu. Le au pele e, o e feagai ma se faafitauli? O e fia maua se fesoasoani, o e fia maua se suiga o lou siomaga pe iai se mea o loo e manaomia? Aua e te faavaivai, pe tomumu ae ave lau faafetai i le Atua. O le faavaivai ma le tomumu e lē faateleina ai ni nai mea o loo i ou lima, peitai o le faafetai e avatu ai ia te oe vavega. Ou te tatalo e tatala e le Alii ou fofoga e te iloa ai lona alofa tunoa o loo galue i soo se vaega o lou olaga ma fesoasoani ia te oe e atinaeina se loto faafetai moni, i le suafa o Iesu. O le faafetai i le Atua e oo mai ai vavega, i le suafa o Iesu, Amene.

OPEN HEAVENSMATALA LE LAGI MO LE ASO LULU 17 IUNI 2026(tusia e Pastor EA Adeboye) Manatu Autu: O Fanau, o le Atua e ana (Children belong to God) Tauloto Tusi Paia: Salamo 127:3 “Fa‘auta, o le fānau, o le tofi lea mai i le ALI‘I; o ē ‘ua fānau mai, o le taui lea mai ‘iā te ia.”Faitauga - Tusi Paia: Faamasino 13:6-14I le tele o tausaga talu ai, ao laiti lava la'u fanau, na ma'i tigaina se tasi. Ua maea ona avea Iesu ma o matou Fomai Sili, ma o soo se taimi e ma'i ai se tagata i lo'u aiga, e na o le tatalo a ona faamalolo lea o lea tagata e le Atua. Ao le taimi la lea, na ou tatalo i le Atua, vivii ia te ia ma faia mea uma ou te iloa ina ia malolo le tama, peitai e lei iai se suiga. I lou le mautonu, na ou fesili, ‘le Alii e, aisea ua e musu ai e faamalolo lo'u atalii?' Ae tali mai le Atua, ‘o ia o lou atalii, aisea ua e le faamalolo ai ia te ia?'. Na vave ona ou iloa la'u mea sese ma faapea atu, ‘faamagalo mai a'u Le Alii e, o ia o lou atalii, faamolemole faamalolo i lou atalii'. I totonu o le itula, ua toe tu i luga le atalii ma ua taaloalo solo. O tamaiti e lē o ni tamaiti a matua, ua nā ona latou vaaia o i latou. O le fanau o le tofi mai le Atua, o lona uiga o Lē e ana tamaiti o le Atua lava ( Salamo 127:3), o lea e tatau ona tausia i latou e tusa ma lona finagalo. O matua e lē fiailoa o latou fanau o le Atua e ana, e ono latou tausia i latou e ese mai lana fuafuaga mo latou olaga. Ina ua oo mai le agelu ia Manoa ma lana avā e ta'u iai o le a fanau mai se la tama, na fesili Manoa i se fesili taua e tatau i so'o se matua ona fesili ai i le Atua e faatatau i tamaiti ua ia foai mai, “…..se a se mea e tatau ai i le tama, ma se mea e faia ‘iā te ia?” (Fa‘amasino‬ ‭13‬:‭12‬)Na malamalama Manoa o le tamaitiiti o le a fanau mai iai laua, e mai le Atua ma o ia e ana. Na ia iloa e gata lona malamalama o se tagata, i le iloa o le ala e sili ona lelei e a'oa'o ma tausia ai le tamaitiiti. Ina ua maea ona ia fesili lea fesili taua, na ave e le agelu ia te ia ma lana avā se faatonuga maoti i mea e faasā ao tauave le pepe, ma le ala e tausia ai o ia pe a fanau mai. E lē tatau i matua ona faalagolago i lo latou iloa ma le malamalama i le tausia o fanau. E lē tatau ona taumafai e aoao ma tausia fanau a le Atua ua tuuina atu iai latou i auala o loo fai ai e nisi matua, aua ua ia saunia faatonuga maoti mo soo se tamaitiiti. Afai o oe o se matua, ole atu i le Atua e faaali atu ia te oe pe faapefea ona tausia ma aoao tamaiti ua ia foai atu ia te oe. Ia aofia o ia i soo se faaiuga e te faia mo lana fanau ona ia fesoasoani lea ia te oe e tausia i latou ma faataunuuina lona finagalo mo latou olaga i le suafa o Iesu. E tatau i matua ona faataga le Atua e taitai i latou e a'oa'o ma tausia fanau ua ia faatuatuaina i latou e vaaia, i le suafa o Iesu, Amene. 

OPEN HEAVENSMATALA LE LAGI MO LE ASO LUA 16 IUNI 2026(tusia e Pastor EA Adeboye) Manatu Autu: O ē ola ae ua oti (The living dead) Tauloto Tusi Paia: Salamo 16:8 “Ou te tu‘u le ALI‘I i o‘u luma e lē aunoa; auā o i lo‘u itū taumatau o ia, e le fa‘agae‘etia ai lava a‘u.”Faitauga - Tusi Paia: 1 Korinito 11:24-26I le Ioane 6:53, na fetalai Iesu e na o i latou e aai i lona tino ma feinu i lona toto e latou te maua le ola. O loo atagia ai, o soo se tagata e na te lē taliaina o ia e avea ma ona Alii ma Faaola e tutusa lelei ma lē ua oti. O ia tagata e foliga o loo ola, peitai, e leai se ola o iai latou ma e sa'o le faapea o i latou, o tagata ola ae ua oti. E pei ona tatou vaai iai i le faitauga mai le Tusi Paia o le asō, na saunia e Iesu le faamanatuga a le Alii, e faaigoa foi o le Faamanatuga Paia, e faaalia ai le ai i lona tino ma inu i lona toto. Na ia faasoa atu le areto ma le uaina i lona au soo i lena pō, ma faaigoaina o le feagaiga fou i lona toto. O le ai i le tino ma inu i le toto o Iesu e aumai ai iai tatou kerisiano le ola, ma o le mafuaaga lea o le Faamanatuga Paia, o se meaai e malosi lona mana. O le Alii o Iesu Keriso na ia faatonu i lona au soo e faaauau ona faia lenei paseka e fai ma faamanatuga ia te ia seia toe afio mai. O le faatele lava ona tatou talia, aai ma inu i le faamanatuga paia, e tatou te fai ai pea ma faamanatuga le maliu ma le toetu manumalo o lo tatou Alii ma Faaola. E tele faamanuiaga o lenei faamanatuga iai tatou le au faatuatua, ose tasi o ia faamanuiaga e iai le Alii i tatou luma e lē aunoa. O lona uiga, i lou tulaga o se kerisiano faatuatua, a iai Iesu i ou luma e lē aunoa, e leai ma se avanoa o satani e osofai ai oe. E pei ona tatou iloa i le tauloto mai le Tusi Paia o le asō, fai mai Tavita, e na te tu‘u le ALI‘I i ona luma e lē aunoa; auā o loo iai i lona itū taumatau, e le fa‘agae‘etia lava o ia. O le malosiaga lenei o Tavita, e leai ma se mea e faagaeetia pe luluina o ia aua sa iai le Alii i ona luma e lē aunoa. A e ai ma inu i le tino ma le toto o Iesu, o i latou e faia ae o loo ola pea i le agasala, e mafai ona faapea, e ola ae ua oti. Aua foi ao ai ma inu i le faamanatuga paia, o loo iai le Atua i o latou luma ma e latou te maua lona toasa aua o loo ola pea i le agasala. E vave ona ma'ima'i ai o ia ma iu ina maumau ai lona ola (1 Korinito 11:29-30). Le au pele e, aua nei e iai ma i latou o ola ae ua oti. Talia Iesu Keriso e fai ma ou Alii ma Faaola pe afai e te lei faia lava, sola ese ma le agasala, ma ia faaaoga tatau lou avanoa taua i le laulau o le faamanatuga a le Alii, ma ia faifai pea. O i latou e teena le maliu ma le toetu o Iesu e ola ae ua oti, i le suafa o Iesu, Amene. 

OPEN HEAVENSMATALA LE LAGI MO LE ASO SA 14 IUNI 2026(tusia e Pastor EA Adeboye) Manatu Autu: Mau'oa e lē tutusa ma le amio Atua (Prosperity is not equal to godliness) Tauloto Tusi Paia: 1 Timoteo 6:17 “Ia e matuā fai atu i ē mau‘oa i lenei olaga, ‘aua ne‘i fa‘amaualuluga i latou, ‘aua fo‘i le fa‘amoemoe i le ‘oloa e fa‘alētumau, a o le Atua soifua, o lo‘o foa‘i tele mai ‘iā te i tatou mea uma lava e fa‘afiafia ai.”Faitauga - Tusi Paia: Luka 12:16-21I le tele o tausaga talu ai, o se uso kerisiano ua fai mai e fia sui lana lotu i seisi lotu aua ua ia maitauina o tagata o leisi lotu, o le toatele ia o le au mauoa. Na vave ona ou faamalamalamaina o le mauoa e lē maua ona o le lotu, ma e lē o se fua lea o le amio atua. Fai mai le Kenese 4:16-17, na fausia e Kaino se taulaga tele ina ua ia alu ese mai le mamalu o le Alii. O le fausia o se aai tele o se tulaga maoa'e, peitai, e lei toe mafuta Kaino i le Atua ao ia fausia lea aai. Aua nei pelogia oe i le manatu o soo se lala e ola, lanulauava ma tuputupu o loo pipii i le a'a, aua foi o nisi lala e lanulauava pea ma foliga o loo ola lava, mo sina taimi, e ui ua tipi ese mai le laau. E i'u ane lava ua samasama ma ua pala. E moni e faamanuia e le Atua lana fanau ma foai atu iai latou le malosi e maua ai le oa (Teuteronome8:18), peitai, e le mafai ona avea le mauoa o se fua o le amio atua. E fuaina e le Atua lo tatou amio atua i fua vaaia i o tatou olaga ( Mataio 7:16). A fua mai fua lelei i le fanau a le Atua, e na te faamanuia iai latou, ma o se tasi o faailoga o ana faamanuiaga o le mauoa, e pei ona tatou vaai iai ia Aperaamo, o lē sa mauoa i lafumanu, ario ma le auro (Kenese 13:2). O Isaako foi sa amio atua ma mauoa. Fai mai le tusi Paia i le Kenese (26:12-14) ua faatupuina lona mauoa ma ua avea ma se tagata matua ola, mauoa ma tauoloa.E finagalo le Atua e te mauoa aua e fiafia e faamanuia i lana fanau i meaalofa lelei (Mataio 7:11). Peitai e lē finagalo e fuaina lou olaga i le tele poo le laitiiti o le oa o loo ia te oe (Luka 12:15). O le tupe o se auupega, ma a faatuatuaina oe e le Atua i le tupe, e fingalo, ia e faamaoni i lona faaaogaina. E finagalo ia e mauoa ia te ia ma ia faaaogaina le oa ua ia foai atu ia te oe, e viia ai pea lona suafa. I le faitauga mai le Tusi Paia o le asō, e lei malamalama le mauoa valea sa tatau ona ia pulea lelei le oa ua ia maua. Na faapuupuu lona ola aua e lei mauoa o ia i le Atua ma e na te lei faailoa o le Atua o le faapogai o lona tamaoaiga, ma ua ia filifili e faaputu le oa mo ia lava. Le au pele e, e sili atu ma faataua e le Atua lau mafutaga ma ia ma le tulaga o lou loto (1 Peteru 3:4) i lo le manuia o le oa o loo ia te oe ma le tele o tupe i faletupe. Ave lau faamuamua i le totōina o le manuia moni, o le mauoa  ma le manuia o lou agaga (3 Ioane 2), ae lē o le manuia i le oa. O le manuia i le oa, e lē o se fua lea o le amio atua, i le suafa o Iesu, Amene. 

OPEN HEAVENSMATALA LE LAGI MO LE ASO TO'ONAI 13 IUNI 2026(tusia e Pastor EA Adeboye) Manatu Autu: Mativa e lē tutusa ma le amio Atua (Poverty is not equal to godliness) Tauloto Tusi Paia: 3 Ioane 2 “Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.”Faitauga - Tusi Paia: 2 Tupu 4:1-7I le fitusefulu, ina ua fa'aolaina lo'u olaga, sa talitonu le toatele o kerisiano o le mativa o se tasi lea ta'iala mo le avea o se atalii poo le afafine moni o le Atua. Sa malosi tele lenei talitonuga ma ina ua fai meaalofa mai se tasi ia te a'u i se Mercedes-Benz, sa ou teuina i totonu o lo'u fale taavale e lē fa'aaogaina mo ni masina seia o'o ina fetalai le Alii ia te a'u, o lo o o'u taofiofia faamanuiaga a le tagata na foaiina le taavale mo a'u I lo'u lē fa'aaogaina o le foa'i. Sa ou fefe nei faapea tagata ua toe fo'i i tua lo'u olaga pe afai e vaai mai ia te a'u i lenei taavale taugata. Ona o le fetalaiga a le Alii ia te a'u, na o'u filifili ai ou te tietie ma fa'aaogā le taavale, tau lava o le faa tasi, ma ou te manatua sa matua'i lagona lo'u mā i lea aso. Ina ua uma lea aso, sa ou faapea atu i le Alii, “Le Alii e, ua o'u tietie i le taavale, e mafai ona o'u faatauina ese loa?” Na finagalo i ai le Alii ma sa ou faatauina ese loa. E le'i umi ae aumai e se isi se taavale limousine ono faitotoa mo a'u. Ina ua o'u vaai atu i le taavale sa ou faapea, “Le Alii e, e te silafia e tusa pe latou te tuuina lo'u tino maliu i totonu o lenei taavale e toe oso mai lava I fafo.” O le tele lea o lo matou manatu o le mativa e tutusa lelei ma le amioatua I na aso, ma ona o lea na faasesēina ai I matou e le tiapolo. Na siitia e le tiapolo tagata e pulea kamupani ma fale gaosimea seia o'o ina alofaina kerisiano e tagata amio leaga o loo faagaioia tamāoaiga eseese i le lalolagi. E leai se mea amioatua faatatau i le mativa, ua i'u ai le toatele o tagata i Seoli, faapei lava ona faia e le mauoa. O le mativa ua mafua ai ona filifili le toatele o tupulaga talavou e lē mulimuli i ala o latou matua kerisiano ona o aafiaga leaga a'o tutupu a'e. Ua mafua ai ona ula tagata o le lalolagi i le Atua mata'utia auā ua o latou manatu ua valea kerisiano ona o lo latou naunau i lenei Atua. I le faitauga mai le Tusi Paia o le asō, o se tasi o le ‘auso'o o Elisaia, na oti i le mativa ae tu'u se tofi o aitalafu mo lona aiga. A na lē sulu lana avā iā Elisaia ma maua ai le upu a le Alii na liliuina lo latou mativa i le tamāoaiga, sēmanū e ola a'e ona atalii e toalua i se olaga pologa ma inoino i le Atua e ui o lo la tamā o se tagata sa amioatua. E lē mativa le Atua (Hakai 2:8), o lona uiga o le mativa e lē mai le Atua. E avatu e le Atua i lana fanau le malosi e maua ai le tamāoaiga (Teuterenome 8:18;) ma o lona finagalo ia manuia i latou faapei ona manuia o latou agaga (3 Ioane 1:2). Le au pele e, tete'e le mativa! e lē o le finagalo lenā o le Atua mo lou olaga. E leai se amioatua i le mativa, i le suafa o Iesu, Amene.

An insight into the Media life of New SBS Samoan Producer Jerry Uesele.