Kry die nuus soos dit breek.
daily
weekdays
infrequent
Die Suid-Afrikaanse Weerdiens sê hy het verlede maand lae reënval in die Wes-Kaap aangeteken. Weervoorspeller, Samkelisiwe Thwala, sê ondernormale reënval is in Junie aangeteken en het tot Julie voortgeduur, met verskeie dele van die streek wat hul laagste reënval ooit gedurende Julie aangeteken het. Sy sê voorlopige reënvaldata dui daarop dat die Kaapstad Internasionale Lughawe sy laagste reënval in Julie sedert 1958 aangeteken het, met slegs 14,4-millimeter vir die maand.
Die Britse eerste minister, Andy Burnham, sê sy regering gaan meedoënloos optree om kleinboot-oorgange oor die Engelse Kanaal te beperk. Voorlopige syfers dui aan 14 526 mense het tot dusver vanjaar die land so binnegekom. Meer as 2 000 mense het die kanaal in klein bote oorgesteek sedert Burnham eerste minister geword het. Hy sê sy regering verander die algehele benadering, en verdubbel die aantal wetstoepassers wat mense-smokkelaars weerskante van die kanaal teiken:
Die drama rondom die Lincoln Memorial-weerkaatsende poel het Vrydag 'n belangrike keerpunt bereik toe die Departement van Justisie 'n mosie ingedien het om alle kriminele aanklagte teen die 67-jarige voormalige Amerikaanse Olimpiese kanovaarder David Hearn te laat vaar. Maar president Donald Trump is onbeïndruk en hou vol dit handel oor vandalisme. Kommentators meen die prokureur vir die Distrik van Columbia Jeanine Pirro, wat die klagtes teruggetrek het, moet nou kommer oor haar pos hê. Amerikaanse politieke ontleder Ron Brownstein het 'n ander mening.
Die Verkiesingskommissie sê Suid-Afrikaners het positief gereageer tydens die laaste kieserregistrasie-naweek voor die munisipale verkiesing in November. Volgens ʼn voorlopige verslag het die meeste in KwaZulu-Natal geregistreer, gevolg deur die Oos-Kaap en Gauteng. Tydens die eerste registrasienaweek op 20 en 21 Junie is meer as drie-miljoen registrasies aangeteken. Die kommissie se uitvoerende hoof, Sy Mamabolo, sê die minister van Samewerkende Regering en Tradisionele Sake sal hopelik binnekort die verkiesingsdatum aankondig:
Die voormalige Speaker van die Nasionale Vergadering, professor Peter Katjavivi, sê alle voorbereidings is afgehandel vir vandag se eerste Dr. Hage Geingob Town Hall Conversation-geleentheid. Katjavivi sê die geleentheid sal die wyle president se 85ste verjaardag gedenk, terwyl dit ook ondersteuning bied aan voortdurende pogings om die Dr. Hage G. Geingob Presidensiële Sentrum te vestig. Die geleentheid vind plaas by Unam se Hage G. Geingob-mediese kampus in Windhoek. Dit is gratis en oop vir die publiek, en sal om vanmiddag om ses-uur begin. Katjavivi het met Nampa gepraat.
Eloolo-boeliebief maak moontlik 'n terugkeer. Meatco het bevestig dat hulle aktief beplan om hul voormalige inmaakfasiliteite in Oshakati te laat herleef nadat die regering die Oshakati-abattoir aan die maatskappy terugbesorg het. Die waarnemende uitvoerende hoof, Albertus Aochamub, het aan Kosmos 94.1 Nuus gesê dat die terrein die afgelope tien jaar gesluit is, wat beteken dat toerusting opgeknap moet word voordat produksie kan hervat.
Dis Augustus en winderige toestande is amptelik hier. Vars suidelike tot suidwestelike winde sal vandeesweek na verwagting aanhou waai oor die noordelike en sentrale gebiede. Albertina Anderson, weervoorspeller van die Namibiese Meteorologiese Diens, sê aan Kosmos 94.1 Nuus dat veldbrande waarskynlik op plekke oor die noordelike en sentrale dele kan voorkom:
Die Britse premier Andy Burnham het met grensbeamptes vergader en sê hy sal meedoënloos wees rakende die kleinbote. Hy sê tot dusver vanjaar is die bote, gelaai met onwettige migrante, 50 persent minder as verlede jaar en dat Julie se aankomelinge die laagste syfer in ses jaar was.
Die Departement van Gesondheid het die vordering wat gemaak is met 'n nuwe tuberkulose-entstof verwelkom en bevestig voorbereidende werk word gedoen om tydige toegang vir Suid-Afrikaners te verseker. Dit vorm deel van voortgesette pogings om die epidemie teen die jaar 2030 uit te skakel as openbare gesondheidsbedreiging. Die departement se woordvoerder, Foster Mohale, sê 'n entstof wat TB by adolessente en volwassenes voorkom, sal 'n deurbraak wees vir die beheer en uitwissing van TB, beide wêreldwyd en hier in Suid-Afrika:
Europa beleef 'n geskiedkundige en meedoënlose somerhitte met temperature wat gereeld 40°C oor groot dele van Wes-, Sentraal- en Mediterreense Europa oorskry. Openbare vervoer, kragnetwerke en munisipale waterstelsels het wydverspreide ontwrigtings in die gesig gestaar, met brande wat in verskeie lande woed. Die wetenskap sê dit word aangedryf deur mensgedrewe klimaatsverandering en die VN se sekretaris-generaal Antonio Guterres sê tyd raak min.
Die Forum for South Africa het leefstyloudits by die Nasionale Vervolgingsgesag se Ondersoekdirektoraat Teen Korrupsie verwelkom, wat deur die minister van Justisie en Grondwetlike Ontwikkeling, Mmamoloko Kubayi, aangekondig is. Die Fosa-leier, Tebogo Mashilompane, sê die openbare vertroue in wetstoepassings- en aanklaer-agentskappe is ernstig geskaad deur bewerings van korrupsie, politieke inmenging en die stadige vervolging van hoëprofiel-korrupsiesake. Hy sê leefstyloudits sal help verseker dat diegene wat met die stryd teen korrupsie toevertrou is, self onberispelik is:
Nieu-Seeland se plaasvervanger-kaptein, Codie Taylor, sê hulle het geen illusies oor die uitdaging om die Springbokke as wêreldkampioene op 'n tuisveld aan te pak nie. Hy sal die span lei tot die gereelde kaptein, Ardie Savea, by die span aansluit voor die eerste toets op 22 Augustus teen die Springbokke op Ellis Park. Die All Blacks se toer van agt wedstryde skop Vrydag amptelik af teen die Stormers in Kaapstad. Taylor sê hulle weet dit gaan 'n moeilike toer wees, maar hulle is gereed:
AfriForum sê die instelling van die Onteieningswet in sy huidige vorm sal verreikende gevolge hê, daarom moet dit ongrondwetlik verklaar word. Die Wes-Kaapse Hooggeregshof hoor na verwagting vandag ʼn aansoek aan om dele van die wet uit te daag. AfriForum, die DA en die Instituut vir Rasseverhoudinge eis dat sekere dele van die wetgewing geskrap word. AfriForum se uitvoerende hoof, Kallie Kriel, sê die enigste mense wat gaan baat by hierdie wetgewing, is ʼn klein politieke elite:
President Donald Trump van Amerika sê onderhandelings met Iran hervat vandag. Dit volg ná sy besluit om alle beplande aanvalle op te skort met die voorwaarde dat ʼn ooreenkoms vinnig bereik word. Hy sê Amerikaanse bondgenote in die Midde-Ooste en Iran het hom gevra om die beplande aanval te kanselleer. Die Iranse staatsmedia ontken dit egter. Trump het aan joernaliste op Air Force One gesê dit sou die grootste aanval sedert die Tweede Wêreldoorlog wees:
Die DA-leier, Geordin Hill-Lewis, sê sy party begin vandag met sy grondwetlike uitdaging van die Onteieningswet in die Wes-Kaapse Hooggeregshof. Hy sê hulle is in die hof omdat die reg om eiendom te besit fundamenteel is vir vryheid, waardigheid en ekonomiese geleenthede. Hill-Lewis sê geen regering moet vae en omvattende magte kry om sonder vergoedng te vat wat aan Suid-Afrikaners behoort nie:
Die polisie sê die ondersoek na 'n besending kokaïen ter waarde van ongeveer 28-miljoen Suid-Afrikaanse rand gaan voort om diegene betrokke by die poging te identifiseer en aan te keer. Polisiewoordvoerder Athlenda Mathe sê die besending van 95-kilogram kokaïen wat Vrydag op die OR Tambo Internasionale Lughawe in Kempton Park, Ekurhuleni, aangekom het op 'n vlug vanaf São Paulo, Brasilië, is onmiddellik onderskep. Sy sê niemand is tot dusver gearresteer nie:
Namibië vier Nasionale Kankerbewustheidsweek van vandag tot Vrydag, en die Kankervereniging van Namibië nooi vroue tussen 20 en 65 jaar oud uit na bekostigbare Pap-smeer-ondersoeke en borsondersoeke in Windhoek. Siftings sal plaasvind op Dinsdag, Woensdag en Donderdag, 4 tot 6 Augustus, vanaf 8-uur die oggend by die vereniging se mediese sentrum by sy hoofkantoor in Windhoek-Wes. Die vereniging se uitvoerende hoof, Rolf Hansen, sê vroue moet 100 Namibiese dollar, hulle ID's en 'n japon of handdoek saambring. Hy het meer.
Die Internasionale Federasie van Motorfietsry, FIM, se Motocross of African Nations vind einde Augustus op die Gallina-baan net noord van die hoofstad plaas. Dit kom na Namibië verlede jaar in Zimbabwe toegewys is as vanjaar se gasheer. Nagenoeg 180-plus ryers van agt lande neem deel. Derek Jacobs van die Namibiese Motorsport Federasie sê baie reëlings is getref.
Vandag sou oudpresident Hage Geingob se 85ste verjaarsdag gewees het. Hy was van 2015 tot sy dood op 4 Februarie 2024 die derde president van Namibië. Geingob was die land se eerste premier van 1990 tot 2002, en het weer van 2012 tot 2015 in die pos gedien. Sy weduwee Monica Geingos onthou hom so.
Reaksie word ontvang op Stad Windhoek se besluit om sy kontrak met RedForce Debt Management te beëindig en die invordering van agterstallige munisipale rekeninge weer self te administreer. Terwyl die stap verwelkom is deur die Khomas Inwoners- en Belastingbetalersvereniging, sê woordvoerder Shaun Gariseb aan Kosmos 94.1 Nuus dat die munisipaliteit moet vermy om nog 'n eksterne skuldinvorderingsmaatskappy aan te stel en eerder sy interne kapasiteit moet versterk terwyl verseker word dat die skuldinvorderingsproses deursigtig en verantwoordbaar is.
Ohlthaver & List het erken dat die verlies van Namibië se Noorse skaap-uitvoerkwota 'n groot knou aan sy Farmers Meat Market-bedrywighede in Mariental toegedien het. Dit kom nadat nuwe ontleding toon dat die abattoir se sluiting nie te wyte is aan 'n tekort aan vee nie, maar aan die verlies van sy enigste premium-uitvoermark en versadigde streeksvraag. Ten spyte daarvan dat skaapbemarking vanjaar met meer as 38 persent toegeneem het, word byna 80 persent van die diere lewend na Suid-Afrika uitgevoer in plaas daarvan om plaaslik verwerk te word. Kosmos 94.1 Nuus het met groepsvoorsitter Sven Thieme gepraat:
Die DA in Gauteng het die burgemeester van Rand West City, William Matsheke, gevra om 'n belangeverklaring aan die Kantoor van die Speaker te voorsien. Jacques Julius van die party sê tydens 'n onlangse Spesiale Raadsvergadering het die burgemeester volgehou dat sy onlangse besoek aan die Fifa Sokkerwêreldbeker in die Verenigde State van Amerika met sy eie fondse betaal is. Hy het aangehaal dat hy 'n gevestigde sakebelang gehad het om vir hierdie reis te betaal:
Die plaaslike firma R&J Steytler Management Consultants het sy internasionale voetspoor uitgebrei met die aanstelling van 'n sakeleier van die Verenigde Arabiese Emirate, Saleh Alhashmi, as senior medewerker en sy amptelike verteenwoordiger in die Emirate en die Midde-Ooste. Daar word verwag dat die stap beleggings-, handels- en tegnologievennootskappe tussen die Golfstreek en Afrika sal versterk, met 'n besondere fokus op Namibië. Alhashmi het met Kosmos 94.1 Nuus gepraat:
Reaksie word steeds ontvang nadat die African Youth Survey 2026 bevind het dat terwyl jong Afrikane meer optimisties oor die toekoms is sedert die Covid-19-pandemie, stygende lewenskoste, korrupsie en kommer oor regering steeds vertroue in demokratiese leierskap uitdaag. Die opname het bevind dat hoewel steun vir demokrasie hoog bly, baie jongmense glo dat Afrika sy eie demokratiese model nodig het. Kosmos 94.1 Nuus het met LPM Jeugbevelleier Duminga Ndala gepraat, wat sê jong Afrikane verloor vertroue in Westerse-styl demokrasie.
Die regering het Banyana Banyana geprys vir hul moed, vasberadenheid en veggees ná hul Wafcon 2026-wedstryd teen die Ivoorkus. Die adjunkwoordvoerder, William Baloyi, sê die span het deursettingsvermoë, moed en onwrikbare toewyding getoon toe hulle teruggeveg het om die telling gelyk te maak. Hy sê Suid-Afrika het 'n trotse nalatenskap van sportuitnemendheid opgebou en Banyana Banyana se sukses en mededingendheid vorm deel van dié nalatenskap:
Die Kantoor van die Aanklaer-generaal het kommer uitgespreek oor die toenemende aantal mensehandelsake in die land, na beduidende stygings in verskeie streke. Tydens die Wêrelddag teen Mensehandel-herdenking in Ongwediva het die Aanklaer-generaal se Kantooramptenaar, Martha Nghiyonanye, gesê dat aangemelde sake in Oshakati van drie in 2024/2025 tot 10 in 2025/2026 gestyg het, terwyl Ondangwa 'n toename van een tot drie sake aangeteken het. Die Zambezi-streek het ook as 'n brandpunt na vore gekom, met 10 aangemelde sake.
Die Parlementêre Gekose Komitee oor Onderwys, Wetenskappe en Kreatiewe Nywerhede sê die kwessie rondom bestuursuitdagings en verbeterde prestasie by die Nasionale Finansiële Hulpskema vir Studente vereis 'n ernstige debat. Dit volg na bewerings dat die onlangs aangestelde Nsfas-administrateur Hlengani Mathebula 'n luukse leefstyl op Nsfas se rekening handhaaf terwyl probleme met studente se behuisingstoelaes in die media aangemeld is. Die komitee se voorsitter, Makhi Feni, sê die bewerings is uiters kommerwekkend:
Die president van die ANC, Cyril Ramaphosa, sê die party sal burgemeesters en raadslede herroep wat nie daarin slaag om dienste te lewer en mense goed te dien nie. Dit volg midde die land se voorbereiding vir die komende plaaslikeregeringsverkiesing in November. Ramaphosa het gepraat tydens ANC-kieserregistrasie en gemeenskapsmobilisering in die Madibeng plaaslike munisipaliteit, Noordwes. Die president het kieserregistrasie aangemoedig om die ANC se program te bevorder om beter gemeenskappe deur bekwame plaaslike regering te bou.
Die Algemene Nywerheidswerkersvakbond van Suid-Afrika eis die staatsgeleide herindustrialisering van die Suid-Afrikaanse ekonomie. Statistiek Suid-Afrika het aangekondig dat 245 besighede in die tweede kwartaal van hierdie jaar gesluit het. Giwusa-president Mametlwe Sebei sê die syfers verteenwoordig 'n direkte en verwoestende aanval op die lewensbestaan van die werkersklas. Hy sê die feit dat die ekonomie 1 361 besighede in die eerste helfte van 2026 verloor het, behoort 'n wekroep vir die regering van nasionale eenheid te wees:
Die Giraffe Conservation Foundation, in vennootskap met Angola se Nasionale Instituut vir Biodiversiteit en Bewaringsgebiede, het die afgelope week suksesvol kameelperde in Angola se Bicuar Nasionale Park hervestig as deel van 'n nasionale bewaringsinisiatief. Stephanie Fennessy, die stigting se uitvoerende direkteur, het aan Kosmos 94.1 Nuus gesê om genetiese diversiteit en langtermyn-bevolkingslewensvatbaarheid te maksimeer, is 12 kameelperde sorgvuldig gekies uit twee afsonderlike eiendomme in Namibië.
Die toerisme- en bewaringssektor spreek hul opgewondenheid uit oor die kabinet se goedkeuring van 'n nuwe beleid wat prospektering en mynbou in beskermde en omgewingsensitiewe gebiede reguleer. Bedryfsrolspelers sê die stap kom op 'n kritieke tydstip namate mineraaleksplorasie oor Namibië versnel. Kosmos 94.1 Nuus het met Ultimate Safaris se direkteur, Tristan Cowley gepraat, wat sê die beleid bied broodnodige leiding om ekonomiese groei met bewaring te balanseer.
Die LPM hou sy vierde jaarlikse induksiewerkswinkel vir plaaslike owerheidsraadslede in Windhoek. Tydens die opleiding word raadslede toegerus met die strategiese vaardighede en kennis wat nodig is om hul verantwoordelikhede na te kom. LPM se operasionele sekretaris, Dawid Eigub, het raadslede aangespoor om verder te beweeg as om die regering te blameer vir uitdagings wat plaaslike owerhede in die gesig staar en eerder te fokus op die ontwikkeling van praktiese oplossings.
Die direkteur-generaal van die Internasionale Arbeidsorganisasie (ILO), Gilbert Houngbo, het Namibië se stroomaf diamantbedryf geprys na 'n besoek aan Namdia en Finestar Jewellery & Diamonds Namibia. Hy sê die sektor skep werksgeleenthede, bou vaardighede en dra by tot die ekonomie, terwyl hy ook die werksomstandighede by die fabriek prys. Kosmos 94.1 Nuus het met Namdia se waarnemende besturende direkteur, Lelly Usiku gepraat, wat sê die afvaardiging het die diamantsny- en poleerfasiliteit besoek om eerstehandse insig in die bedrywighede te kry.
Die president van die Suid-Afrikaanse Sokkervereniging, Danny Jordaan, het die uittredende Bafana Bafana-afrigter, Hugo Broos, geprys vir die transformasie van Suid-Afrikaanse sokker gedurende sy termyn. Jordaan het die Belgiese afrigter, wie se vyfjaarkontrak Vrydag gëeindig het, geprys vir die bou van 'n mededingende nasionale span en die identifisering van jong talent wat gevestigde internasionale spelers geword het. Safa se soektog na 'n nuwe afrigter begin nou:
Die land kan wolklose, mooi en koel tot warm weer oor die naweek verwag, met sonnige toestande, koue oor die woestyn en matige weer aan die kus. Albertina Anderson, 'n voorspeller van die Namibiese Meteorologiese Diens, sê die nagte sal koud wees met lae temperature wat tot ongeveer 7 grade Celsius tot 9 grade sal daal.
Die Namibiese bokser Tryagain Morning Ndevelo het 'n plek in die mans se 60 kg-eindstryd van die Statebondspele bespreek nadat hy Noord-Ierland se Jude Gallagher in 'n opwindende halfeindstryd in Glasgow, Skotland met 'n verdeelde beslissing geklop het. Ndevelo het 'n vasberade vertoning gelewer om sy teenstander uit te skakel en Namibië se hoop op boksgoud lewendig te hou. Hy kom vanaand om kwart oor sewe teen Indië se Sachin Sachin in die goudmedaljegeveg te staan.
Maandeinde in die hoofstad het baie stiller as verwag verloop met net een ernstige voorval wat Vrydagaand die aandag van die Copps 94.1-span en die Namibiese polisie geverg het toe drie voertuie in die omgewing van Nampower in ‘n botsing betrokke was. Francois Lottering van Kosmos 94.1 was oudergewoonte op sy pos en doen verslag van die toneel:
COPE vra die minister van Justisie, Mmamoloko Kubayi, moet bedank na bewerings van korrupsie, onbevoegdheid en magsmisbruik in die Ondersoekdirektoraat teen Korrupsie. COPE sê die bevindings wat voor die Madlanga-kommissie aan die lig gekom het, wys op stelselmislukkings onder Kubayi se toesig. Die waarnemende nasionale voorsitter, Pakes Dikgetsi, voer aan verantwoordbaarheid strek tot by politieke leierskap en sê openbare vertroue in die teen-korrupsieliggaam is ondermyn:
Inligtingsminister Emma Theofelus het die jongste kabinetsbesluite aangekondig, insluitend die goedkeuring van 'n nuwe beleid om prospektering en mynbou in Namibië se beskermde en omgewingsensitiewe gebiede te reguleer terwyl ekosisteme beskerm word. Die kabinet het ook Namibië se ondertekening van die Statuut van die Afrika-Mineraalontwikkelingsentrum goedgekeur om samewerking te versterk en volhoubare ontwikkeling in die mineraalsektor te bevorder.
Die Namibiese Kamer van Koophandel en Nywerheid en Cran het kragte saamgesnoer om die land se digitale transformasie te versnel. Die twee instellings het 'n memorandum van verstandhouding onderteken om samewerking in kuberveiligheid, digitale handel, beleidshervorming en die ontwikkeling van digitale vaardighede te versterk. Dit is 'n poging om ekonomiese groei te bevorder en nuwe geleenthede vir besighede te skep. Cran-woordvoerder Mufaro Nesongano:
Meatco het winsgewend gebly ten spyte van 'n daling van 53 persent in abattoir deurset wat veroorsaak is deur droogte en die herbou van kuddes. Kingsley Kwenani, adjunk uitvoerende direkteur van die landbouministerie, het vanoggend tydens Meatco se jaarvergadering gesê dat verwerkte bees van 75 268 in die vorige finansiële jaar tot 35 594 in die huidige finansiële jaar gedaal het, terwyl inkomste van 1,8 miljard tot 1,1 miljard Namibiese dollar gedaal het. Hy sê dit is egter net een kant van die prentjie.
Reaksie word ontvang op vanmiddag se aankondiging dat al die brandstofpryse met 2 Namibiese dollar sal styg vanaf 5 Augustus. Kosmos 94.1 Nuus het met Kara van den Heever, 'n beleggingsontleder by Momentum gesels, wat sê totdat die situasie rondom die Straat van Hormuz weer normaal is, sal onsekerhede voortduur en verbruikers sal hul begrotings daarby moet aanpas.
Die DA gaan self ondersoek instel na beweerde luukse verblyf, dubbele besprekings en buitensporige reisuitgawes van die Nasionale Finansiële Hulpskema vir Studente se administrasie. Volgens Daily Maverick het die administrateur, Hlengani Mathebula, se verblyf van vier nagte in die Pepperclub Hotel en Spa in Mei belastingbetalers 9 200 Suid-Afrikaanse rand gekos, en hy het ook vier raadgewers aangestel vir byna 10 miljoen rand. DA-woordvoerder Delmaine Christians sê studente sukkel intussen met laat betalings, onvoldoende toelaes en verblyfkrisisse:
Energieminister Modestus Amutse het vanmiddag aangekondig dat brandstofpryse met 2 Namibiese dollar sal styg vanaf 5 Augustus. Die petrolprys in Walvisbaai sal dus 24 dollar en 48 sent per liter wees, diesel 50dpm sal 26 dollar en 26 sent per liter wees, en diesel 10dpm 26 dollar en 36 sent per liter. Amutse sê dat die besluit geneem is met inagneming van wêreldwye oliepryse en die herinstelling van die volle brandstofheffing, wat tydelik met 50 persent verminder is.
Die nasionale direkteur van Openbare Vervolging, Andy Mothibi, sê die gewese hoof van die Ondersoekdirektoraat teen Korrupsie, Andrea Johnson, word steeds strafregtelik ondersoek al het sy onlangs bedank te midde van haar getuienis voor die Madlanga-kommissie. Een van die bewerings is dat sy wederregtelik die inhoud van ʼn aanranding-dossier teen die geskorste adjunkhoof van Misdaadintelligensie, Fazel Khan, met hom gedeel het. Mothibi sê ʼn bedanking beskerm niemand teen strafregtelike aanspreekliheid nie:
Die Namibiese verteenwoordiger by die Pan-Afrikaanse Parlement, Olivia Hanghuwo, het 'n verenigde kontinentale reaksie op xenofobie en die oorsake van migrasie versoek, en Afrika-leiers aangespoor om die waardes van solidariteit en vreedsame naasbestaan te omhels. Hanghuwo het die opmerkings gemaak tydens die debat oor die mosie rakende die toenemende xenofobiese aanvalle in Suid-Afrika.
© 2020-2026 Ivy Podcast Discovery LLC
