Nuus

President Cyril Ramaphosa het wêreldleiers versoek om die Verenigde Nasies te herstel tot sy posisie as die middelpunt van internasionale betrekkinge. Ramaphosa het by die Globale Progressiewe Mobiliseringsitting in Barcelona, ​​Spanje gesê wêreldleiers moet vrede bevorder deur dialoog en diplomasie, deur die konsekwente toepassing van internasionale reg en die nakoming van die beginsels van die VN-handves:

Die GOOD-party vra die minister van bosbou, visserye en die omgewing, Willie Aucamp, om 'n onmiddellike herevaluering en 'n tydelike staking van nywerheids-uitbreiding aan die Weskus voorop te stel. Kaden Arguile van GOOD sê amptelike kreefkwotas is vertraag, verkeerd bereken en onbetwisbaar gelaat, wat 'n reuse-verlies aan inkomste vir die gemeenskap tot gevolg het. Hy sê hulle kan nie toekyk hoe 'n bedryf oor geslagte heen en die kultuur agterweë gelaat word nie:

ActionSA in Ekurhuleni het die inhegtenisneming verwelkom, van die adjunkhoof van die Ekurhuleni-metropolisie, Julius Mkhwanazi, op aanklagte van bedrog, korrupsie en regsverydeling. Die party vra verder ook vir die onmiddellike beëindiging van sy diens by die Stad. ActionSA se woordvoerder, Tumelo Tshabalala, sê die party is dankbaar vir die Madlanga-kommissie se besliste optrede in reaksie op die bewerings en getuienis wat voorgelê is:

Die minister van wetenskap, tegnologie en innovering, Blade Nzimande, het die Nasionale Kantoor vir Intellektuele Eiendomsbestuur versoek om die beskerming van intellektuele eiendom te versterk, omdat Suid-Afrika en Afrika steeds reuse-lekkasies ervaar. Suid-Afrika het 'n ongekende toename in data-lekkasies aangeteken. Voorvalle het in die eerste helfte van verlede jaar met 60 persent toegeneem. Die departement se woordvoerder, Veli Mbele, sê die kantoor moet strategiese vennootskappe vorm om die krisis te hanteer:

Die Namibia Deposit Guarantee Authority het hul 2025-verslag vrygestel en het positiewe groei getoon. Verlede jaar het die owerheid deelgeneem aan die nasionale krisissimulasie-oefening, voortgesette streeksbelanghebberbetrokkenheid en gevorderde strategiese vennootskappe deur samewerking met eweknie-instellings. Rakotoka Zaire, hoof-finansiëleontleder van die sentrale bank, het 'n oorsig oor die verslag.

President Cyril Ramaphosa vra vir die hervorming van die Internasionale Monetêre Fonds en die Wêreldbank en dat hulle nie net Westerse belange moet verteenwoordig nie. Ramaphosa het die Globale Progressiewe Mobiliseringsitting in Barcelona, ​​Spanje, toegespreek tydens ‘n werksbesoek aan die land. Hy sê die twee instellings moet die skuldlas aanspreek wat baie ontwikkelende ekonomieë terughou, die finansiële argitektuur hervorm en die finansieringsgaping vir ontwikkeling uitwis:

Die Wes-Kaapse regering vra belanghebbendes om kommentaar te lewer op die Wysigingswetsontwerp op die Voorkoming van Onwettige Uitsettings en Besetting van Grond. Dit het ten doel om munisipaliteite, staatsinstellings en privaat eienaars te bemagtig om meer beslissend te reageer op onwettige besettings en uitsettings. Die LUR vir infrastruktuur, Tertuis Simmers, sê tussen 2019 en 2024 het hulle meer as 'n miljard rand bestee om projekte teen onwettige besetting te beveilig:

Die landbou-organisasie TLU SA het minister van landbou, John Steenhuisen, se besluit verwelkom om 27 eksterne tegniese raadgewers aan te stel. Hulle sal help om tegniese data te na te gaan om te verseker dat alle produkte voldoen aan veiligheids- en gehaltestandaarde soos vereis deur die registrateur van die Wet op Kunsmis, Veevoer, Landboumiddels en Veemiddels. Die woordvoerder Bennie van Zyl sê dit moes lankal gebeur:

April is die maand om dieremishandeling te beveg – 'n tyd om te besin oor hoe diere behandel word en wat dit oor die samelewing openbaar. Die syfers van die Dierebeskermingsvereniging van Windhoek is skokkend: Van die meer as 4 000 diere wat elke jaar ingeneem word, is 90 persent reeds verwaarloos, verlate, siek of beseer. Kosmos 94.1 Nuus het met DBV direkteur Silke Van der Merwe gepraat oor die mees algemene vorme van mishandeling in troeteldiere.

Die Nasionale Verbruikerskommissie het die wysiging van 'n regulasie in die Wet op Verbruikersbeskerming verwelkom om strooipos-oproepe te beperk. Die minister van handel, nywerheid en mededinging, Parks Tau, het dit in die Staatskoerant gepubliseer. Woordvoerder Phetho Ntaba sê die gewysigde regulasies vestig 'n uitsluitings-registerstelsel en bied meganismes vir verbruikers om ongewenste regstreekse bemarking te kanselleer. Sy sê alle regstreekse bemarkers moet registreer om nakoming te verseker:

President Cyril Ramaphosa vra regverdige internasionale handelsreëls namate lande oorskakel na 'n lae-koolstof-ekonomie. Hy het op 'n sakeforum in Spanje gesê klimaatbeleid moenie ontwikkelende ekonomieë onregverdig benadeel nie, en bepleit sterker steun deur klimaatsbefondsing, tegnologie-oordrag en oorgangsmaatreëls. Ramaphosa beklemtoon Suid-Afrika ondersteun klimaatsoptrede, en handelstelsels moet regverdig bly namate die wêreld na groener nywerhede verskuif:

Die derde been van die 2026 Nasionale Veldfietskampioenskappe vind vandag by die Gallina Motocross Park net buite Windhoek plaas. Sowat 42 ryers gaan vir ‘n dag propvol aksie sorg, sê Kosmos 94.1 se Francois Lottering:

ActionSA se leier, Herman Mashaba, sê die voormalige Nasionale Party-politikus Roelf Meyer se aanstelling as Suid-Afrika se ambassadeur in Amerika ontbloot die omvang van president Cyril Ramaphosa se beheptheid met toenadering tot wit nasionaliste. Woordvoerder Omogolo Taunyane sê dis skandelik dat so 'n strategiese aanstelling vir die land se internasionale beeld by 'n 78-jarige afdwinger van apartheid moet berus. Sy verwelkom die sterk teenkanting van patriotiese Suid-Afrikaners teen die aanstelling:

Die DA sê EFF-leier Julius Malema se opmerkings na vonnisoplegging hou die gevaar in om die publiek se vertroue in die regbank te ondermyn. Die party sê Malema se beskrywing van landdros Twanet Olivier in die KuGompo City-hof as 'n rassis, is 'n ongegronde bewering wat vertroue in die regstelsel kan ondermyn. DA-woordvoerder Glynnis Breytenbach sê openbare aanvalle op regs-amptenare is roekeloos en bedreig die oppergesag van die reg:

Ongelukke en besope bestuurders in Windhoek het Vrydagaand die Copps 94.1-span en hul vennote, die Namibiese polisie, die grootste kopsere veroorsaak. Francois Lottering van Kosmos 94.1 het oudergewoonte sy Copps 94.1-baadjie aangetrek en doen verslag van die toneel:

Kry die nuus soos dit breek.

Na sy heropening in 2023 is Farmers Meat Market in Mariental tans in volle produksie. Kosmos 94.1 Nuus het met die voorsitter van die Ohlthaver & List Groep, Sven Thieme, gepraat wat sê die aanleg werk teen volle produksiekapasiteit van 280 000 skape. Dit is die enigste A-gegradeerde uitvoerfasiliteit vir skape in die land, met die kapasiteit om na die Europese Unie en Noorweë uit te voer.

Die Nasionale Vervolgingsgesag veroordeel die EFF-leier, Julius Malema, se dreigemente teen 'n staatsaanklaer na sy vonnis-oplegging. Die NVG sê die kommentaar, wat op sosiale media geplaas is, kom neer op intimidasie en ondermyn die oppergesag van die reg, en waarsku dat aanklaers toegelaat moet word om hul pligte sonder vrees uit te voer. Kaizer Kganyago van die NVG moedig die publiek aan om enige intimidasie teen wetstoepassingsowerhede aan te meld:

Die Maltahöhe-gebaseerde Rural Revive, die vlagskipinisiatief van die Wolwedans-stigting se AridEden-projek, is met goud bekroon in die kategorie Regeneratiewe Toerisme by die gesogte 2026 World Travel Market Africa Responsible Tourism-toekennings in Kaapstad. Hierdie erkenning kwalifiseer die projek om in September by die Global Responsible Tourism-toekennings in Londen mee te ding. Projekwoordvoerder Annely Ickua het met Kosmos 94.1 Nuus gepraat:

Namibië se ekonomie sal na verwagting geleidelik herstel na 'n trae 2025, met groei wat na verwagting tot 2,6 persent hierdie jaar en 2,9 persent in 2027 sal styg. Volgens die Bank van Namibië word hierdie vooruitsig ondersteun deur uitbreiding in konstruksie, nutsdienste, handel, finansiële dienste en openbare administrasie, tesame met sterker uraanproduksie. Die sentrale bank se adjunkdirekteur van korporatiewe kommunikasie, Naufiku Hamunime is aan die woord:

Konsultasies oor die kuberveiligheidwetgewing is die week in die hoofstad afgehandel. Volgens kenners is die wetgewing steeds nie op standaard nie en vrae oor menseregte bly ook 'n kwessie. Kosmos 94.1 Nuus het met Frederico Links, mede-navorser by die Instituut van Openbare Beleidsnavorsing gepraat wat sy kommer oor die wetgewing uitspreek.

Die Bulle se Verenigde Rugbykampioenskap-wedstryd teen die Dragons in Wallis vanaand is volgens die president van die Blou Bulle, Willem Strauss, uiters belangrik. Hy sê eksklusief aan Kosmos 94.1 Nuus dat die span nou in die besigheidsgedeelte van die kampioenskap is. TERUG: Die Bulle is tans agtste op die punteleer.

ActionSA het die Openbare Beskermer, Kholeka Gcaleka, gevra om die Phala Phala-ondersoek te heropen na die deklassifisering van die Onafhanklike Polisie-ondersoekdirektoraat se verslag. Dit het onthul dat lede van die Presidensiële Beskermingseenheid 'n onwettige parallelle ondersoek gedoen het na die diefstal op president Cyril Ramaphosa se plaas in Limpopo in 2020. Michael Beaumont van ActionSA sê Gcaleka se ondersoek moet fokus op die moontlike aanspreelikheid van personeellede in die Presidensie:

Die Suid-Afrikaanse Weerdiens het 'n waarskuwing uitgereik vir donderstorms met swaar reën en skadelike wind in dele van die land tot Maandag. 'n Geel vlak 2-waarskuwing vir hewige donderstorms met swaar reën is uitgereik vir dele van die Noord-, die Oos- en die Wes-Kaap, en die sentrale en westelike dele van die Vrystaat en Noordwes. Weervoorspeller Tokelo Chiloane sê hierdie weers-verandering is die gevolg van twee agtereenvolgende kouefronte:

Nadat gesubsidieerde tersiêre onderwys vanjaar in werking getree het, het Unam sterk inskrywingsgroei aangeteken. Die totale inskrywing vir 2026 staan op net meer as 30 800 studente, 'n toename vanaf ongeveer 26 900 in 2025. Dit is opmerklik dat die eerstejaar-inname aansienlik gestyg het, van sowat 8 300 studente in 2025 tot ongeveer 11 700 in 2026, 'n toename van meer as 3 300 studente. Unam-woordvoerder Simon Namesho het aan Kosmos 94.1 Nuus gesê dat die universiteit, wat kapasiteit betref, stabiel bly

Die adjunkminister van landbou, Ruthy Masake, het klaskamers en stoorkamers by die Uahekua Herunga Laerskool in die Ruacana-kiesafdeling ingewy. Die fasiliteite was geskenk deur Okalongo Fishing. Masake is aan woord en verduidelik die belangrikheid en samewerking tussen die privaatsektor en die regering.

Die minister van Menslike Nedersettings, Thembi Simelane, sê die toename in onwettige besettings van grond en geboue in die land plaas ʼn aansienlike finansiële en administratiewe las op die regering en die privaat sektor. Die regering het die Wysigingswetsontwerp op Voorkoming van Onwettige Uitsetting en Onwettige Grondbesetting vir openbare kommentaar gepubliseer. Simelane sê die voorgestelde wysiging wil munisipaliteite, staatsinstellings en privaat grondeienaars bemagtig om onwettige besettings en uitsettings meer doeltreffend te hanteer:

B2Gold het 'n noemenswaardige goud-skenking aan Save the Rhino Trust gemaak, wat gebruik sal word vir unieke goundstawe. Dit gaan ter ondersteuning van die veldwagters en beskerming van swartrenosters, onder die trust. Elzanne McCullonch, besturende direkteur van Venture Media wat die trust se kommunikasie hanteer, gee meer inligting.

Die gesondheidsministerie ondersoek personeel van die Sentrale Mediese Stoor te midde van bewerings wat verband hou met die manipulasie van voorraaddata, diefstal en die afleiding van farmaseutiese voorrade binne die nasionale voorsieningsketting. Daar word ook beweer dat hierdie optrede gelei het tot die doelbewuste skep van kunsmatige tekorte, skynbaar bedoel om openbare paniek te veroorsaak en noodverkrygingsprosesse te aktiveer. Ministeriewoordvoerder Walters Kamaya het aan Kosmos 94.1 Nuus gesê dat die personeel wat betrek word geskuif is hangende die uitslag van die ondersoek.

Volgens 'n verslag deur die Internasionale Energie-agentskap veroorsaak die oorlog in die Midde-Ooste die grootste ontwrigting in voorsiening in die geskiedenis van die globale oliemark. Die ontwrigting van olie- en gasvloei deur die Straat van Hormuz het groot implikasies vir energiesekerheid en bekostigbaarheid. Namibiërs wil weet waarom ons nie Angolese brandstof, of "ngungula" kan gebruik nie. Behalwe vir die hoë swaelinhoud is daar ander kwessies. Hoofekonoom in die energieministerie, Abednego Ekandjo, het aan Kosmos 94.1 Nuus verduidelik.

AfriForum sê die vonnisoplegging van EFF-leier Julius Malema wys niemand is bo die wet verhewe nie. Dit volg na die Oos-Londense Landdroshof in die Oos-Kaap Malema tot vyf jaar tronkstraf gevonnis het vir vuurwapenverwante aanklagte. Jacques Broodryk van AfriForum sê druk van die burgerlike samelewing het gehelp om die saak na die hof te bring:

Die Kantoor van die Arbeidskommissaris het 'n loodsinisiatief van stapel gestuur om dienslewering te verbeter deur die oplossing van arbeidsgeskille te stroomlyn, met die fokus op versoening en arbitrasie. Die program kom terwyl die kantoor 'n beduidende agterstand in die gesig staar, waarvan sommige sake meer as drie jaar hangende is. Arbeidskommissaris Kyllikki Sihlahla sê die doel is om te verseker dat werkers en werkgewers tydige besluite kry oor geskille.

Die minister van Landbou, John Steenhuisen, sê vroeë data dui aan die huidige massa-inentingsveldtog teen bek-en-klouseer lewer positiewe resultate op. Meer as 2 miljoen stuks vee is ingeënt tussen Februarie en 26 Maart en geen nuwe gevalle is aangemeld onder kuddes wat reeds behandel is nie. Die departement se woordvoerder, Joylene van Wyk, sê hulle het toesig versterk en 'n gesentraliseerde aanmeldingstelsel ingestel wat lei tot vroeër opsporing en vinniger data-opname:

Die herrie is los in die VSA. By die Pentagon se maandelikse gebedsdiens het die verdedigingsminister Pete Hegselth 'n gebed gelees wat ‘groot wraak en woedende woede' op Iran oproep. Hy het gesê die gebed is ‘CSAR 2517' genoem, wat staan vir Combat Search And Rescue, en is gebaseer op Esegiël 25:17. Maar, dit was uit die rolprent Pulp Fiction, spesifiek, die toespraak wat Samuel L. Jackson se karakter voordra voordat hy 'n ongewapende man teregstel. Tarantino het dit geskryf.

Die gesondheidsministerie ontken dat enige hospitaalsale slegs vir BBP's is, te midde van kritiek oor 'n Windhoek Sentraal-hospitaaleenheid wat na bewering vir top-regeringsamptenare gereserveer is. Die uitvoerende direkteur in die ministerie, Penda Ithindi, sê dat privaatsale al lank bestaan vir versekerde en selfbetalende pasiënte, terwyl hervormings onder Visie April 2026 daarop gemik is om gapings in toegang tot openbare gesondheidsorg te oorbrug, nie te verdiep nie.

Reaksie word steeds ontvang oor Suid-Afrikaanse EFF-leier Julius Malema se vonnis en verlof om daarteen te appelleer. Landdros Twanet Olivier het gesê dat sy nie twyfel aan sy skuldbevinding nie. Volgens AMT se nuutste politieke ontleding deur Roland Henwood van die Universiteit van Pretoria, is alles polities op die spel vir Malema. Dit beteken nie hy sal nie die situasie tot sy guns probeer uitbuit nie.

Die Punjab Kings het die Mumbai Indians met sewe paaltjies afgeransel, hul onoorwonne segetog voortgesit en is nou boaan die Indiese Premierliga se punteleer. Quinton de Kock het ʼn onoorwonne 112 van 60 balle behaal en bygedra tot Mumbai se 195 vir ses. Daarna het Prabhsimran Singh ʼn onoorwonne 80 van 39 balle aangeteken en deel ʼn vennootskap van 139 lopies met kaptein Shreyas Iyer. Dit het Punjab se oorwinning met 21 balle oor verseker. Iyer loof sy boulers wat Mumbai tot minder as 200 beperk het:

Amerika se minister van Verdediging, Pete Hegseth, sê hulle sal Iran se hawens blokkeer solank as wat nodig is. President Donald Trump het Maandag aangekondig dat die weermag Iran se hawens in die Straat van Hormuz en die Golf sal blokkeer nadat Amerika en Iran se samesprekings in Pakistan misluk het. Daar is tans ʼn skietstilstand tussen die twee lande, maar dit verstryk komende Woensdag. Hegseth het Iran se weermag gewaarsku:

FNB sê Suid-Afrika het 2026 met versigtige optimisme begin, maar globale spanning, insluitend die Midde-Oosterse konflik, beïnvloed die ekonomiese vooruitsigte. Die bank sê die herstel kan stadiger word, maar daar word nie verwag dat dit sal stop nie. Die bank sê plaaslike hervormings sal kostes in toom hou en die ekonomie behoort mettertyd te versterk. Koketso Mano sê toestande in die eiendomsmark bly toestande positief, maar globale druk kan korttermyngroei in huispryse en die vraag na verbandlenings vertraag:

Die markwaarde van die sentrale bank Namibia Deposit Guarantee Authority het gestyg van 30,3 miljoen Namibiese dollar aan die einde van 2024 tot 40,1 miljoen dollar op 31 Desember 2025, wat 'n jaarlikse netto toename van 9,7 miljoen dollar verteenwoordig. Die owerheid beskerm deposante deur 'n fonds te administreer wat kliënte vergoed, tot en met 50 000 Namibiese dollar, indien 'n kommersiële bank, buitelandse banktak of bouvereniging misluk. Die bestuurder van bedrywighede, Petrus Shifotoka, sê die owerheid bly gewortel in sy mandaat om deposante te beskerm in die geval van 'n kommersiële bankmislukking.

Namibië is in die wêreldwye kollig nadat president Netumbo Nandi-Ndaitwah aangewys is op TIME-tydskrif se jaarlikse lys van die 100 Mees Invloedryke Persone vir 2026. Die aankondiging beklemtoon haar reis van bevrydingstrydveteraan tot Namibië se eerste vroulike staatshoof, en haar groeiende impak op die internasionale verhoog as 'n leidende stem vir gelykheid, geregtigheid en inklusiewe ontwikkeling. Kosmos 94.1 Nuus het met presidensiële woordvoerder Jonas Mbambo gepraat:

Kry die nuus soos dit breek.

Die regering se “Growth at Home”-beleid, wat reeds in 2015 ingestel is, beoog om waarde by landbouproduksie te voeg, veral vir veeboere. Die beleid word egter nou weer onder die loep geneem met die tweede beesuitvoere na Mauritius, terwyl daar vrae is oor die doeltreffendheid van die strategie in die praktyk. Landboukenner Wallie Roux het met Kosmos 94.1 Nuus gepraat.

Nadat 'n Rovos Rail-trein op 1 Maart naby Naute weens vloedskade ontspoor het, het die trein weer teruggekeer na Namibië om sy toer te voltooi. 'n Treindrywer van die maatskappy en een van TransNamib het gesterf. Kosmos 94.1 Nuus het met TransNamib-woordvoerder Alina Garises gepraat wat sê dat die Namibiese verhouding met Rovos Rail steeds sterk staan.

In Suid-Afrika verwelkom DA-leier Geordin Hill-Lewis die vonnisoplegging in EFF-leier Julius Malema se vuurwapensaak en sê dit versterk die oppergesag van die reg, en bewys niemand bo die Grondwet verhewe is nie. Hy sê vuurwapen-geweld bly 'n ernstige probleem en onwettige vuurwapenmisdrywe moet sterk gevolge dra. Hill-Lewis voeg by die vonnis van vyf-jaar tronkstraf is 'n positiewe stap om aanspreeklikheid te versterk:

Internasionaal en Amerikaanse president Donald Trump het aan verslaggewers buite die Withuis gesê dat Teheran ingestem het om vir langer as 20 jaar geen kernwapens te hê nie, en dat die VSA en Iran baie na aan 'n ooreenkoms oor die oorlog is. (Laat Donderdagaand het Iran dit nog nie bevestig nie.) Hy het bygevoeg dat Iran nou bereid is om dinge te doen wat hulle nie voorheen sou oorweeg het nie. Trump is ook gevra oor sy openbare meningsverskil met Pous Leo en het so geantwoord.

Kry die nuus soos dit breek.

Namibië se groenskemas het 67,4 miljoen Namibiese dollar gegenereer om plaaslike landbou gedurende die 2025/26-produksieseisoen te versterk. Dit is gedryf deur 6 758,65 ton mielies ter waarde van 56,9 miljoen dollar en koring van 609 hektaar wat 10,5 miljoen dollar bygevoeg het. Agribank se tegniese adviseur vir gewasse en pluimvee, Hanks Saisai, het aan Kosmos 94.1 Nuus gesê dat geteikende belegging en 'n sakebenadering die sleutel is tot die optimalisering van die prestasie van die groenskemas, wat steeds kan verbeter.