Podcasts about nuus

Die Federasie van Namibiese Toerismeverenigings, Fenata, het die besluit van polisiehoof luitenant-generaal Joseph Shikongo verwelkom om die Toerismebeskermingseenheid onder sy direkte bevel te plaas, en noem dit 'n reuseversterking van besoekersveiligheid. Die eenheid sal nie net in Windhoek wees nie maar landwyd. Kosmos 94.1 Nuus het met Gitta Paetzold van die Namibiese Gasvryheidsvereniging gepraat.

Namibië kan meer as 900 miljoen Amerikaanse dollar, meer as N$14 miljard, in nuwe ekonomiese aktiwiteit ontsluit en ongeveer 26 000 werksgeleenthede skep deur strategies uit te brei na die uitvoer van rou minerale, volgens 'n nuwe verslag deur die VN se Handels- en Ontwikkelingsorganisasie. Kosmos 94.1 Nuus het met die organisasie se inligtingspesialis, Ivana Padierna, gesels wat sê Namibië het konkrete geleenthede om oor te skakel na hoërwaarde-aktiwiteite wat verband hou met verwerking, vervaardiging en verwante nywerhede.

Unam het 'n belangrike mylpaal bereik deur in die eerste QS World University Rankings: Sub-Sahara Africa 2026 ingesluit te word. Dit is die universiteit se eerste verskyning ooit in enige QS World University Rankings indeks. Die ranglys het meer as 1 000 instellings beoordeel, met Unam wat genoem is onder die 69 universiteite uit 21 lande wat die indeks gehaal het. Kosmos 94.1 Nuus het met Unam se woordvoerder Simon Namesho gepraat.

Die Namibiese Sekuriteitebeurs hersien sy noteringsreëls as deel van sy demutualiseringsproses, met opdaterings wat na verwagting plaaslike reëls met internasionale standaarde sal belyn. Die hersiening is daarop gemik om te verseker dat die beursvereistes aan beide wetgewende verpligtinge en internasionale norme voldoen. Dit volg op onlangse hervormings by die Johannesburgse Effektebeurs, wat 'n vereenvoudiging van sy noteringsvereistes aangekondig het. Tiaan Bazuin, die uitvoerende hoof van die NSX, het met Kosmos 94.1 Nuus gepraat:

Die omgewingministerie was vandeesweek gasheer vir 'n onafhanklike hersieningspan van kundiges van die Internasionale Atoomenergie-agentskap. Die besoek vorm deel van 'n onafhanklike tegniese hersieningsproses om objektiewe kundige advies te verskaf oor die voorgestelde uraan in-situ-loging mynbouprojek in die Omaheke-streek. Daar is veral gefokus op omgewingsbeskerming, grondwaterbronne, openbare gesondheidsoorwegings en regulatoriese toesig. 'n Vergadering met belangehebbendes is ook gehou. Kosmos 94.1 Nuus het met Wolfi Teichert, Sauma se voorsitter, gepraat.

President Cyril Ramaphosa se verklaring van bek-en-klouseer as nasionale ramp tydens sy staatsrede Donderdagaand is goeie nuus vir Namibië, want dit beteken Suid-Afrika gaan die siekte nou met mag en mening beveg, sê plaaslike landboukenner Wallie Roux. Maar dit beteken geensins Namibië kan laat slaplê nie, het Roux in ‘n onderhoud met Kosmos 94.1 Nuus gesê.

Die gewilde Capricorn Skolenetballiga is na sewe jaar jaar vir die komende seisoen opgeskort. Die Capricorn-groep het vroeër die week die aankondiging gemaak en gesê dit het ook met Netbal Namibië en die Namibiese Skolesport-unie beraadslaag. Die groep het gesê die huidige struktuur onbedoeld skole bevoordeel het wat die koste van reise en ander uitgawes kon dra, en dat baie talentvolle spanne weens finansiële beperkings nie kon meeding nie. Capricorn sal nou sy benadering heroorweeg om te verseker dat elke skool 'n gelyke geleentheid kry om deel te neem. Kosmos 94.1 Nuus het met Marelize Horn, die Capricorn Groep se hoof handelsmerk- en korporatiewe sakebeampte gepraat.

Die Namibiese Mededingingskommissie doen 'n beroep op brandstofkleinhandelaars, bedryfsrolspelers en lede van die publiek om hul mening te gee oor Nasan Energies se voorgestelde oorname van 52 Vivo Energy-vulstasies, wat as Engen handel dryf. 'n Openbare konsultasie sal komende Dinsdag van half-nege die oggend by die Avani Hotel in Windhoek gehou word. Die kommissie se woordvoerder, Dina //Gowases, het aan Kosmos 94.1 Nuus gesê die sessie gee belanghebbendes nog 'n geleentheid om insette te lewer voordat 'n finale besluit oor die samesmelting geneem word.

Weens bek-en-klouseer in naburige Suid-Afrika en Botswana, wat 'n risiko vir Namibië inhou, bly die land se jaggemeenskap op hoë gereedheidsgrondslag. Kosmos 94.1 Nuus het met Hannes du Plessis, die president van die Namibiese Professionele Jagvereniging, Napha, gepraat, wat sê daar is geen direkte risiko vir jagters nie. Hy het hulle egter aangespoor om streng by die veiligheidsmaatreëls wat deur die regering uiteengesit is, te hou.

Registrasie vir die 2026 SanlamAllianz Kusmarathon, een van Namibië se voorste atletiekkwalifiseerders, is amptelik oop. Die wedloop sal op 25 April na Swakopmund terugkeer en atlete 'n kritieke geleentheid bied om kwalifiserende tye vir die Sanlam Kaapstad-marathon te verseker. Die bemarkings- en kommunikasiebestuurder van SanlamAllianz, Laurencia Prinzonsky, het met Kosmos 94.1 Nuus gesels.

Die Amerikaanse ambasadeur na Namibië, John Giordano, vry hard namens Amerikaanse president Donald Trump se administrasie na Namibië se natuurlike hulpbronne. Hy het sedert die begin van die jaar met die myneministerie ontmoet en het selfs 'n paneelbespreking oor minerale by die Amerikaanse ambassade gehou. Kosmos 94.1 Nuus het reaksie van politieke ontleder, Professor Henning Melber gekry.

Namibië het een van sy grootste gemeenskaps-klimaataanpassingsprojekte afgehandel. Die Omgewingsbeleggingsfonds het die vyfjaar-Irema-inisiatief van 10 miljoen Amerikaanse dollar in Sesfontein, Fransfontein en Warmquelle in die Kunene-streek suksesvol voltooi. Die projek is in 2018 deur die Groen Klimaatfonds goedgekeur en saam met die landbouministerie geïmplementeer. Dit het groenskemas en boorgate gerehabiliteer, 2 500 droogtebestande bokke versprei, vroeë waarskuwingsweerstelsels en sonkragbesproeiing geïnstalleer, en meer as 1 600 boere in klimaatslim landbou opgelei. Die fonds se woordvoerder, Romeo Muyunda, het met Kosmos 94.1 Nuus gepraat:

Misdaad teen toeriste is weer in die kollig nadat president Netumbo Nandi-Ndaitwah dringende optrede versoek het. Dit kom na onlangse reisadvies van Duitsland en Kanada, wat verhoogde risiko's van roof, bedrog en motorkaping in Namibië uitgelig het. Kosmos 94.1 Nuus het met die voorsitter van Tourism Against Crime, Peter Boer gesels, wat sê belanghebbendes, saam met NamPol en die Windhoek Stadspolisie, werk ywerig om bewustheid te verhoog. Hy gee veiligheidswenke:

Boere word aangemoedig om die hitte en reënseisoen steeds te benut om aanplantings te maak. Hanks Saisai, Agribank se tegniese adviseur vir akkerbou, het met Kosmos 94.1 Nuus gepraat en verduidelik watter gewasse aangeplant kan word vir oes in Augustus.

Dodelike brande vind gereeld in informele nedersettings plaas. Vroeër die week het 'n twee-en-'n-half-jaar-oue dogtertjie en haar 20-jarige tannie gesterf in 'n brand in hul sinkhuis in Kuisebmond. Kosmos 94.1 Nuus het met die voormalige Walvisbaai-raadslid en gemeenskap-aktivis Ryan Gordan oor die kwessie gepraat.

Vandag is Wêreldradiodag, wat elke jaar op 13 Februarie gevier word. Vanjaar is die fokus op hoe KI uitsending, produksie en toeganklikheid kan verbeter, terwyl dit verseker dat menslike redaksionele oordeel sentraal bly. Kosmos 94.1 Nuus het met verskeie leerders, studente en stemme in die bedryf gepraat wat hulle mening gee oor die relevansie van radio vandag.

Nominasies vir die 2026 Namibiese Teater- en Filmtoekennings is amptelik aangekondig. Die toekennings, wat op 28 Maart in die nasionale teater se ouditorium in Windhoek plaasvind, sal Namibië se skerm- en verhoogtalent vier. 'n Totaal van 19 films is vir die onderskeie kategorieë genomineer, terwyl 'n totaal van 26 produksies in die teater van laat 2019 tot Desember 2025 opgevoer is. Kosmos 94.1 Nuus het met die woordvoerder van die nasionale teater, Desiree Mentor, gepraat:

Die Namibiese Universiteit van Wetenskap en Tegnologie het 'n skuldkwytskelding aangekondig wat daarop gemik is om finansieel beperkte studente in staat te stel om met 2026-registrasie voort te gaan en hul studies voort te sit. Nust-woordvoerder Cindy van Wyk het aan Kosmos 94.1 Nuus gesê dat die maatreël bedoel is om finansiële druk te verlig terwyl gestruktureerde terugbetaling van uitstaande fooie verseker word.

President Netumbo Nandi-Ndaitwah het vertrek na Addis Abeba in Ethiopië om die 39ste gewone sitting van die Afrika-unie se vergadering van staatshoofde en regeringshoofde by te woon, wat vir 14 en 15 Februarie geskeduleer is. Leiers sal beraadslaag oor belangrike kontinentale kwessies, insluitend vrede en veiligheid, die uitkomste van die 2025 G20-beraad, vordering met Agenda 2063, institusionele hervormings binne die Afrika-unie, en die hervorming van die Verenigde Nasies se veiligheidsraad. Kosmos 94.1 Nuus het met presidensiële woordvoerder Jonas Mbambo gepraat.

Kragverskaffers mag nie meer elektrisiteit sonder vooraf kennisgewing ontkoppel nie, ingevolge nuwe regulasies van die Elektrisiteitsbeheerraad, die ECB. Dit geld vir alle lisensiehouers, insluitend streekselektrisiteitsverspreiders, munisipaliteite en NamPower. Kliënte moet nou minstens 24 uur kennis gegee word voordat elektrisiteit weens wanbetaling ontkoppel word, en dit mag nie op Vrydae en oor naweke gedoen word nie. Kosmos 94.1 Nuus het met die aktivis Shaun Gariseb van Katutura Residents Rate Payers gepraat, wat sê Stad Windhoek steur hom nie aan die ECB nie.

Reaksie word ontvang op landbouminister Inge Zamwaani se aankondiging dat 1,5 miljard Namibiese dollar benodig word vir voorkomingsmaatreëls teen bek-en-klouseer. Kosmos 94.1 Nuus het gepraat met die plaaslike ekonoom Salamo Hei van High Economic Intelligence, wat sê die land sal oor die langtermyn veel meer moet belê.

Die Regshulpsentrum het aanvalle en dreigemente teen regsbeamptes sterk veroordeel na die dood van Ondangwa-aanklaer Justine Shiwedwa, wat maande nadat sy beserings opgedoen het in 'n skietery en suuraanval, oorlede is. Met landdroste en aanklaers wat toenemend dreigemente rapporteer wat verband hou met sake wat hulle hanteer, neem kommer toe oor die impak op geregtigheid. Die sentrum se direkteur, Toni Hancox, het aan Kosmos 94.1 Nuus gesê dat sulke aanvalle die oppergesag van die reg ondermyn.

Hierdie naweek stap Namibiërs uit solidariteit met kinders wat teen kanker veg en einde-van-lewe behandeling nodig het. Terwyl die wêreld Sondag Wêreldkankerbewustheidsdag vir Kinders vier, doen die Kankervereniging van Namibië, saam met die Lions-klub en wêreldwye pediatriese onkologie-vennote, 'n beroep op gesinne landwyd om hierdie Saterdag vir hoop te stap. Deelnamegeld vir studente is 20 Namibiese dollar en 50 dollar vir volwassenes. Geleenthede word in Windhoek, Rehoboth, Swakopmund en Walvisbaai beplan om broodnodige fondse in te samel. Kosmos 94.1 Nuus het met die Kankervereniging se uitvoerende hoof, Rolf Hansen gepraat.

Die Namibiese Rugby-unie het 'n vandeesweek 'n herboufase van 2026 tot 2031 aangekondig, na die nasionale span nie gekwalifiseer het vir die 2027 Rugbywêreldbeker nie en befondsing van Wêreldrugby verloor het. Volgens die NRU gaan die herbou finansiële groei insluit sowel as bestuurkwessies wat aangespreek sal word. Kosmos 94.1 Nuus het met Isak Hamata, 'n onafhanlike sport-kommentator gepraat.

Reaksie word ontvang op Namibië wat sy swakste telling in meer as 20 jaar op Transparency International se jongste Korrupsiepersepsie-indeks behaal het. Die swak prestasie word onderstreep deur wetgewing soos die Wet op Toegang tot Inligting en die Fluitjieblaserbeskermingswet wat steeds nie geïmplementeer is nie. Kosmos 94.1 Nuus het met Graham Hopwood, die direkteur van die Instituut van Beleidsnavorsing gepraat.

Namibië se staatsdiens het in 2025 tot byna 119 000 werknemers gestyg, van 107 000 in 2024. Die Staatsdienskommissie het in 2024, toe daar 107 000 staatsamptenary was, beraam dat dit die staat jaarliks sowat 35,4 miljard Namibiese dollar in salarisse en voordele kos. Bestuurskenner Pius Dunaiski waarsku dat met meer as 20 persent van Namibië se werksmag wat nou afhanklik is van regeringssalarisse, die staat vinnig die grootste werkgewer word. Hy sê die ekonomie kan nie die koste van die amptenary volhoubaar dra nie. In 'n onderhoud met Kosmos 94.1 Nuus het Dunaiski gesê dringende stappe moet gedoen word.

Namibië se visum-by-aankoms-stelsel het meer as 413,3 miljoen Namibiese dollar in inkomste vir die staat gegenereer in minder as twaalf maande na die bekendstelling daarvan, met 289 510 visa wat teen 31 Januarie vanjaar uitgereik is. Die Immigrasiebeheer-department het in die oorsigtydperk noemenswaardige diensleweringsuitsette aangeteken, insluitend die uitreiking van 51 285 reisdokumente, waarvan 50 155 gewone paspoorte was. Kosmos 94.1 Nuus het met Gitta Paetzold, die uitvoerende hoof van die Gasvryheidsvereniging van Namibië gepraat.

Wetenskaplike studies skets 'n ontnugterende prentjie van die uitdagings waarmee Namibië se Afrika-pikkewyne te kampe het. Navorsing op Mercury-eiland toon dat die pikkewyne gedwing word om te oorleef op lae-energie prooi, soos grond-els, eerder as hul voorkeurdieet van sardientjies en ansjovis. Dit verminder hul teelsukses, kuikenoorlewing en algehele gesondheid drasties. Kosmos 94.1 Nuus het met Naude Dreyer van Ocean Conservation Namibia gepraat.

Namibië se oorbelaste regbank is weer eens onder die loep nadat hooggeregshofregter Beatrix de Jager 'n hofbevel uitgereik het waarin haar oorweldigende werklas uiteengesit word en frustrasie oor kritieke personeeltekorte uitgespreek word. In 'n onderhoud met Kosmos 94.1 Nuus het prokureur Richard Metcalfe die sentralisering van hooggeregshofsake in Windhoek bevraagteken en 'n beroep gedoen op die vestiging van hooggeregshofafdelings in Swakopmund, Walvisbaai, Keetmanshoop en Rundu. Hy het gewaarsku dat 'n oorbelaste regbank 'n direkte bedreiging vir Namibië se demokrasie inhou.

Die Windhoek weerkantoor het sy nuutste klimaatbulletin vrygestel. Die reënvoorspelling vir Februarie tot April is ook uiteengesit. Kosmos 94.1 Nuus het met Helvi Akwenye, die weerkantoor se hoof-hidroloog gepraat, wat meer inligting gee.

Die uitbetalings van maatskaplike toelae het op die 9de Februarie begin, met die verskillende toelae wat op verskillende datums betaal word. Die publiek word aangemoedig om net op die datums wanneer hulle toelae uitbetaal word, na poskantoor-betaalpunte te gaan. Kosmos 94.1 Nuus het met Gladwin Groenewald, die woordvoerder van Nampost gepraat.

Met bek-en-klouseer wat Suid Afrika onder druk het, neem paniek toe oor hoe om diere te behandel. Voorkomende middels word ook ondersoek. Boere in Suid Afrika probeer die gebruik van nano-silwer om die virus te bestry, maar volgens kenners is behandeling meer kompleks. Plaaslike veearts dr. Theuns Laubscher het in 'n onderhoud met Kosmos 94.1 Nuus gesê silwer het sy plek in eksterne wondbehandeling, maar is nie die hele antwoord nie.

Namibië is vereer met die gesogte Volhoubare Avontuur- en Wildernistoerisme-toekenning by Outbound Travel Mart Mumbai, een van Asië se voorste reishandelskoue. Die toekenning erken Namibië se uitstaande verbintenis tot volhoubare toerisme, bewaring en verantwoordelike avontuurreise. Kosmos 94.1 Nuus het met Flora Quest, die Namibië Toerismeraad se bestuurder van korporatiewe kommunikasie gepraat.

Die Nasionale Teater van Namibië het 'n skedule vrygestel van die verhoog-akteurs opleidingslaboratorium se datums vir die jaar. Die opleidingsprogram vir beide akteurs en nie-akteurs, sal by die teater aangebied word. Die program het die afgelope naweek begin. Kosmos 94.1 Nuus het met Desiree Mentor, NTN se woordvoerder gepraat.

Die verwoestende veldbrande in Etosha in September 2025 het opslae gemaak en ook internasionale nuusbronne gehaal. Volgens die omgewingministerie het net 38 persent van die westelike deel van park afgebrand. Toeroperateurs sê egter hulle het ná die brand baie kliënte verloor wat gevoel het 'n besoek sal nie die moeite werd wees nie. Kosmos 94.1 Nuus het met toeroperateur Joseph Kafunda gepraat wat sê die brand het die omgewing goed gedoen. Kafunda het meer.

Sedert die begin van die jaar het die Amerikaanse geldeenheid teenoor die Suid Afrikaanse rand begin val. Die laaste wisselkoers het aangedui dat die rand op 16-rand-91-sent teenoor die Amerikaanse dollar staan. Kosmos 94.1 Nuus het met Suid Afrikaanse ekonoom, Dawie Klopper gepraat wat voorspel dat die dollar nog verder kan verswak.

TransNamib Holdings sê die vervaardiging van 20 lokomotiewe het nog nie formeel begin nie, met tydlyne en implementering wat afhang van 'n onafhanklike tegniese verslag. TransNamib se uitvoerende hoof vir kommersieel en bemarking, Kendall Swartz, sê dat slegs beperkte voorbereidende werk tot dusver plaasgevind het. Kosmos 94.1 Nuus het met Swartz gesels wat meer inligting gee.

Die Mynwerkersunie van Namibië het die skorsing van tien werkers deur Beifang Mining Technological Services, 'n kontrakteur wat ondersteuningsdienste by die Husab-myn lewer, sterk veroordeel. Die vakbond sê die bestuur het voortydig opgetree deur werknemers te skors ten spyte van geskilbeslegtingsmeganismes wat in bindende erkennings- en prosedurele ooreenkomste uiteengesit word. Die vakbond se sekretaris-generaal, George Ampweya, het met Kosmos 94.1 Nuus gepraat.

As deel van sy voortgesette pogings om bloedskenking te bevorder, het die Bloedoortappingsdiens van Namibië die "Skenk op 'n Afspraak"-veldtog vandag geloods en dit sal tot Valentynsdag op Saterdag, 14 Februarie duur. Die veldtog moedig beide huidige en voornemende skenkers aan om bloed in pare te skenk as 'n simbool van liefde en toewyding aan pasiënte in nood. Skenkers word genooi om deel te neem as paartjies, ouers en kinders, vriende, kollegas, broers en susters, of selfs as twee vreemdelinge. Die Bloedoortappingsdiens se opvoedkundige beampte, Frieda Vatileni-Asino, het met Kosmos 94.1 Nuus gepraat:

Die voorspraak vir 'n universele basiese inkomstetoelaag duur voort, met die Basiese Inkomstetoelaagkoalisie, of BIG, en voorstanders van sosiale geregtigheid wat die regering se huidige voorwaardelike basiese inkomstetoelaag as onvoldoende kritiseer. BIG voer aan dat die bestaande voorwaardelike model, wat 600 Namibiese dollar per huishouding per maand aan 'n beperkte groep individue verskaf, nie die land se ernstige sosio-ekonomiese uitdagings aanspreek nie. Kosmos 94.1 Nuus het met Herbert Jauch, die voorsitter van die Economic and Social Justice Trust gepraat:

Die Cheetah Conservation Fund lei 'n bewaringsprogram wat toon dat die beskerming van vee en die beskerming van jagluiperds nie teenoorgestelde doelwitte hoef te wees nie. Die stigting werk saam met boere om spesiaal opgeleide Anatoliese herdershonde onder hul kuddes te plaas. Dr. Laurie Marker van die fonds het aan Kosmos 94.1 Nuus gesê dat die resultaat beduidend was, aangesien veeverliese met gemiddeld sowat 91 persent gedaal het, wat die behoefte vir boere verminder om jagluiperds te vernietig.

Huldeblyke stroom steeds in vir die veteraan Swapo-lid en voormalige kabinetsminister Erkki Nghimtina, wat Sondagmiddag in sy huis op 77-jarige ouderdom oorlede is. Nghimtina het tussen 1997 en 2020 in vier ministeriële portefeuljes gedien, insluitend verdediging, myne en energie, werke en vervoer, en arbeid. In 'n onderhoud met Kosmos 94.1 Nuus het die leier van die Swapo-jeugliga, Ephraim Nekongo, gesê Februarie bly 'n somber maand vir Namibië omdat die land ook twee voormalige presidente gedurende hierdie tydperk verloor het.

Namibië se Grondwet is vandag 36 jaar oud. Opgestel deur die grondwetgewende vergadering onder voorsitterskap van wyle president Hage Geingob, lê dié dokument die grondslag vir demokrasie, eenheid en fundamentele menseregte en word dit as een van die mees progressiewe grondwette in Afrika gereken. Kosmos 94.1 Nuus het met professor Peter Katjavivi, voormalige speaker van die parlement, oor die belangrikheid van die grondwet gepraat:

Reaksie word steeds ontvang op die African Export-Import Bank se besluit om sy kredietgraderingsverhouding met Fitch Ratings te beëindig. Dit het gekom tesame met die stigting van die Africa Credit Rating Agency wat daarop gemik is om die kredietwaardigheid van Afrika-maatskappye en -lande te evalueer om die risiko vir beleggers te bepaal. Kosmos 94.1 Nuus het met dr. Misheck Mutize, die hoofkenner van kredietgradering by die African Development Peer Mechanism Review gepraat.

AGOA, PMI, brandstofpryse, aandelemakrte en volgende week se nuwe data...

Al die nuuste ruimte verkennings nuus.Magalies Playlist vir Space Nuus: https://open.spotify.com/playlist/5H6fgC9N7HKDNQDCmwf8tjHoofstukke:00:00; Maan toe!09:50; Blue Origin17:01; SpaceX22:08; NASA, Sjina, Indië, Twilight29:10; Teleskoopfotografie35:11; ISS noodsontruiming, nog NASA nuus39:55; Verken Jupiter, Pluto en Son45:37; Afsluiting

Podlitiek se manne het die vakansie gaan lees, peins, filosofeer en die wêreld rustig bekyk. Nou gesels hulle oor die temas, narratiewe en gebeure wat moontlik 2026 gaan oorheers.Die Podlitek-span bestaan uit:Louis BoshoffErnst van ZylArno Roodt

Musikante oral in die land skud hul vere reg om seker te maak Namibiërs neem vanaand op ‘n feestelike manier afskeid van 2025. Kosmos 94.1 Nuus het met King Tee Dee, ook bekend as The Dogg, gesels en ‘n spesiale boodskap van hom gekry:

Die munisipaliteit van Swakopmund het aangekondig dat hul nuwejaarsvieringe by die strand naby die Paddock tuine in Vineta aangebied sal word. Dit is gratis vir almal maar vakansiegangers word gemaan om nie te drink by die vieringe nie. Kosmos 94.1 Nuus het gepraat met die munisipaliteit se woordvoerder, Linda Mupupa.

Duisende aanhangers wêreldwyd treur saam met die Lambrechts-gesin van die plaas Simmenau in die Khomas Hochland ná Cindy, die grootmaakbobbejaan en liefling van sosiale media, Sondag oorlede is. Cindy, wat skaars ‘n maand gelede haar 31ste verjaardag gevier het, het reeds ‘n geruime tyd met hartversaking gesukkel. Ruben Lambrechts het sy herinneringe van sy ousus, soos hy Cindy dikwels beskryf het, met Kosmos 94.1 Nuus gedeel: