Profil

Durant la festa dal prim avost l'onn 2021 è l'idea naschida, tut spontanamain, sa regorda il co-iniziant ed oz president da l'Uniun Scuol Classics, Andrea Matossi. Da realisar mintga dus onns in festival d'auta qualitad cun plirs concerts en la halla da glatsch Gurlaina a Scuol s'è verifitgà.

En sia vita ha Jon Fadri Carpanetti da Crusch/Sent stuì prender inqual storta. L'anteriur lutgader activ ed ussa dapi blers onns trenader da lutga ha emprendì lainari e bostger. In accident da hockey al ha lura dentant sfurzà d'emprender er anc pur. L'accident da hockey pareva l'entschatta ina bagatella. Jon Fadri Carpanetti ha survegnì in puck en la stgaina. L'emprim mument ha el pensà: «Quai n'è nagut». La chomma è dentant s'unflada, a la fin ha el stuì ir tar il medi, e lura èn seguidas numerusas operaziuns. Adina puspè ha Jon Fadri Carpanetti gì tissientadas dal sang. Il mal è restà. Tranteren è quel stà uschè ferm ch'el ha ponderà da laschar amputar la chomma. Ozendi patratga Jon Fadri Carpanetti dentant auter. El di a sasez: «Quai ha stuì esser uschia, per insatge è quai bun». Il bab da duas mattas ha emprendì da viver cun il mal ed el giavischa per il futur da vegnir a frida anc meglier cun quel e da forsa far ina giada in viadi en il Canada per fabritgar era là chasas cun laina radunda. Per el sez ha Jon Fadri Carpanetti gia fabritgà ina tala chasa.

Sco directur dad RTR ha Bernard Cathomas schlargià radio RTR da 14 sin 24 uras, construì la chasa da medias rumantscha avant 20 onns ed implementà la purschida online. Sco secretari da la Lia Rumantscha è el s'engaschà politicamain per il rumantsch ed el è il «bab» dal rumantsch grischun. Tut ils engaschis professiunals da Bernard Cathomas han gì l'idea dad unir Rumantschas e Rumantschs. Quai vala per las Scuntradas rumantschas, per il svilup dad ina gasetta quotidiana, per la lescha da linguas che dat al rumantsch in statuts ferm ed era per la creaziun dal rumantsch grischun. «Jau sun stà quel ch'ha in zic inizià, in zic stuschà, in zic fatg las discussiuns e guardà che las cundiziuns sajan dadas», di Bernard Cathomas en il «Profil». El n'haja betg fatg tut sulet. RTR Avant 20 onns ha RTR pudì inaugurar la chasa da medias rumantscha. Quels da la televisiun na sajan betg vegnids gugent en chasa nova, sa regorda l'anteriur directur dad RTR. Els avevan sviluppà in'autra cultura da manaschi che quella dal radio rumantsch. «Dentant sch'ins è pitschen, na ston ins betg anc sa sparter», manegia Bernard Cathomas. «Ins na sto betg anc sa far pli pitschen che quai ch'ins è. Ils pitschens ston empruvar da sa far pli ferms, da mussar lur fermezza cun concentrar las forzas. E quai ha duvrà bleras discussiuns, blera motivaziun, bler insister.» Lia Rumantscha Il 1980 è Bernard Cathomas vegnì elegì sco secretari da la Lia Rumantscha. El ha inizià il rumantsch grischun. Il cumenzament ha questa lavur pudì vegnir fatga senza grondas dispitas e resistenza. Ma enturn ils onns 1990 hai cumenzà a dar attatgas massivas envers Bernard Cathomas. I fetschia impressiun da survegnir smanatschas da mort. «Ed jau hai era gì tema», conceda l'anteriur secretari da la Lia Rumantscha. Questas agressiuns sajan dentant mo vegnidas da paucas persunas.

En sasez ha la Tuatschina da 33 onns emprendì fisioterapeuta. Pervi d'in grev accident da velo che avess bunamain custà la vita ad ella, ha ella scuvert il yoga. Oz – 9 onns suenter il grev accident – è ella scolasta, terapeuta, docenta da yoga ed autura. Proximamain cumpara ses emprim cudesch da yoga. En il «Profil» raquinta la mamma dad ina figlia da 4 onns , co ch'ella ha chattà sia via en il yoga, dentant er en la vita.

43 onns ha Jachen Prevost lavurà en differentas funcziuns per RTR. El ha inscuntrà tranter auter Roland Kaiser ed è be per il nair da l'ungla mitschà da la mort. L'emissiun «Battaporta» da radio RTR era ils onns 1980 in labor. «Nus pudevan empruvar ora chaussas, nus eran fitg independents», di Jachen Prevost che ha cumenzà a lavurar tar RTR il 1983 en la redacziun da novitads. Ma ses grond giavisch era da far «Battaporta» – quai ch'el ha cumenzà a far clandestinamain, senza ch'ils superiurs savevan. Attentat da bumba Suenter la midada uffiziala tar la redacziun dal «Battaporta» saja el stà cuntentischem. Ma er Jachen Prevost ha adina lavurà per pliras emissiuns u redacziuns. Sper «Battaporta» e novitads è quai era stada la redacziun da sport. En quest connex è el stà il 1996 als gieus olimpics ad Atlanta ed è mitschà be per pauc da la mort. Sin in banc han el e collega Tona Poltera vis in satgados ed els èn chaminads vinavant. Forsa 200 meters pli tard hai dà in sfratg ed els han sentì l'unda da pressiun en il dies. Diagnosa Il 2017 è Jachen Prevost vegnì confruntà cun ina diagnosa ch'è stada in grond schoc: in tumor en il torax. In tumor betg uschè privlus, dentant in che pasava 3,8 kilos e che ha stuì vegnir operà. Il tumor vegn ad accumpagnar Jachen Prevost per vita duranta. Quel crescha adina puspè e cunquai dovra el er adina puspè terapias.

Claudio Cadonau ha giugà bunamain 20 onns hockey sin il pli aut nivel, tranter auter per ils ZSC Lions, ils SCL Tigers, l'EHC Bienna u l'EV Zug. En tut quels onns ha il Turitgais da 37 onns pudì festivar trais titels da campiun svizzer. Avant in onn ha Cadonau terminà sia carriera, el è dentant restà fidaivel al hockey sin glatsch. Dapi la primavaira 2025 è el schef da sport dals Rapperswil-Jona Lakers. Quai saja in ulteriur privilegi, di Claudio Cadonau che n'ha mai pudì dar hockey tar in club grischun, malgrà ch'el ha ina stretga relaziun cun Vuorz. Da là deriva sia mamma e Cadonau passenta uschia era bler temp liber ed ina gronda part da sias vacanzas en Surselva, quai ensemen cun sia famiglia. Da chasa è l'anteriur defensur però restà a Langenthal, nua ch'el ha era giugà duas giadas durant sia lunga carriera. Sco schef da sport tar ils Lakers è Claudio Cadonau oz en ina nova posiziun ed ha ina nova rolla. La passiun per il hockey e la finamira n'èn dentant betg sa midadas.

Renato Netzer (26) è cornetist cun corp ed olma. El suna en differentas furmaziuns – en la Musica instrumentala Savognin, la Brass Band Cazis e natiralmain er en la musica militara, en la Swiss Armed Forces Central Band. Il giuven Surmiran sa mova uschia tranter differentas classas, qualitads e sfidas da la musica instrumentala. Ina premiera spetga el dentant il matg. Anc mai n'è el stà ad ina festa da musica federala. Bienna è damai ina premiera. Là vegn el a star a la testa ed a manar ils musicists e las musicistas da Savognin en la concurrenza da marschar.

Dapi deschdotg onns è Nicola Gaudenz da Müstair survegliader da pestga da l'Engiadina Bassa e la Val Müstair. El deriva dad ina famiglia da reverendas a Scuol, el ha emprendì scolast primar ed ha fatg avant stgars ventg onns il pass da la stanza da scola en la peschicultura da Müstair.

Orlando Steiner dad Ardez ha fatg carriera en la hotellaria superiura. Sia via ha manà el er a Berlin, ad Amsterdam e lura enavos en la Svizra. Ussa lavura el a Flem tar Quant e Clerezza che cusseglian, resp. gestiuneschan hotels. Cun sia famiglia viva el a Falera. Morder sin ils dents e pazienza – quai èn las fermezzas dad Orlando Steiner. Quai gida el da na dar si. Orlando Steiner di, ch'el dovra squitsch e blera lavur. Uschiglio manca insatge. Mintgatant sto el dentant er far in «reset». E quel fa el per il solit il settember cun ir a chatscha. Sper sia lavur da cussegliaziun tar Quant e co-mainagestiun tar Clerezza a Flem è Orlando Steiner er docent da giast a la scola da hotellaria a Passugg. Ed el è er coach a la scola e commember da la giuria nua ch'il businessplan da scolaras e scolars vegn giuditgà. El possia profitar extrem da questa lavur a la scola er per Quant. Quai tegn dad ina vart giuven e mussa er nua che la via va, co ils hoteliers futurs pensan, di Orlando Steiner en il profil. Chattà la passiun per ir enturn cun glieud, l'hotellaria ed il turissem ha Orlando Steiner cun tschintg, sis onns sin il campadi da ses tat e sia tatta a Zernez. Gia sco buob ha el sez pudì decider chaussas ed er surprender responsabladad.

«Ina constellaziun che reflectescha la grugliez ed il puls da la vita quotidiana è sco ina sfendaglia, tras la quala ina pitschna poesia penetrescha. Igl è fitg bel da pudair tiers quest mument.» Tals muments da poesia preschenta Donat Caduff, artist e graficher enfin l'october en la Cularta a Laax. Donat Caduff: «Nua che auters van sperasor – vegn jau en acziun» «Sco uffant ma plaschevan dapli ils emballadis, il layout ed ils logos ch'il tremagl sez», sa regorda Donat Caduff. I saja evident che la fascinaziun per furmas, lingias e l' estetica accumpognian el sco in fil cotschen tras la vita. Gia d'uffant haja el dissegnà fitg gugent a moda filigrana. Il dun da dissegnar e crear à sa sviluppà durant il studi spezialisà sin grafica ad Amsterdam ma era grazia a sia perseveranza e sensibladad per il detagl en la vita quotidiana. Actualmain preschenta l'artist da Sagogn che viva a Turitg in'exposiziun che reflectescha ses segiurns artistics e creativs a Roma e Paris. «Observaziuns Obsessivas» – è il tetel da la sia exposiziun en la chasa d'art Cularta a Laax ch'è vegnida inaugurada da curt. È Donat Caduff in observatur obsessiv? «Sche jau ves ina constellaziun che correspunda al puls dal mintgadi, è quai sco ina sfendaglia tras la quala ina pitschna poesia penetrescha. Igl è fitg bel da pudair tiers quest mument.” Var 150 dessegns e fotografias reflecteschan la poesia ch'el ha chattà en sia lavur artistica a Paris ed a Roma: «A Paris hai jau tschertgà mes cunfins e la cundiziun da dissegnar, a Roma hai jau vulì producir», declara Donat Caduff. En l'emissiun «Profil» ans raquinta l'artist da 44 onns pertge ch'igl è bel da preschentar sias ovras en sia patria, dal success cun ses cudesch «das Gelbe des Eis», ma era pertge ch'el vesa savens ses mintgadi sco ina sort tribuna.

Cura che Ramona Stgier da Parsonz lavurava anc en la tgira directa, sajan blers pazients e pazientas muribundas mortas, gist cura ch'ella haja gì servetsch. Scu giuvna tgirunza haja quai dà da ponderar… «Pertge è quai uschia? Pertge tar mai? È quai bun u schlet?» Enfin ch'insatgi haja ditg ad ella che quai saja ina qualitad dad ella e che las persunas muribundas hajan la fidanza en ella e ch'ella dettia segirtad. Dapi lura vesa la dunna da 44 onns quai sco ina sort dun. Ils ultims onns haja ella er accumpagnà stretgamain parantella manaivla sin il davos viadi. En il mintgadi da spital en il Center da sanadad a Savognin ha ella dentant midà funcziun. Da la tgira da pazientas e cussadents tar l'accumpagnament d'emprendistas ed emprendists. E quels sa hajan schon sa midà ils ultims 14 onns dapi ch'ella fa quella lavur. Ed en la vita da Ramona Stgier devi er in temp cura ch'ella era sez pazienta. Quai pervia d'in disturbi da mangiar. Ed er sch'ella ha surmuntà la malsogna, saja ella tuttina anc mintga di preschenta a la maisa da gentar. Co ch'ella e sia famiglia van enturn cun quai ed era daco che Ramona Stgier è sa decidida da far il diplom federal da pura e pertge ch'ella è ina protagonista da l'exposiziun actuala dal Museum Ballenberg è d'udir en il Profil.

Mintgatant dovri in zic temp, fin ch'ins ha chattà quai ch'è il dretg, quai che porta cuntentientscha e satisfacziun. Uschia èsi era ì cun Luzian Spescha. En la vegliadetgna da circa 30 onns ha el scuvert la pictura artistica. E dapi lura n'ha el betg pli chalà. En il decurs dals decennis ha el gì numerusas exposiziuns. En il «Profil» raquinta l'um da 73 onns da sia uffanza senza bab, daco ch'el è daventà scolast e da sia grond'amur ch'el ha pers avant 13 onns.

Respiraziun è veta e tango è forsa per Pina Augustin respiraziun. Per la terapeuta da respiraziun ha la dretga respiraziun ina forza enorma. Forza dattan a la dunna oriunda d'Alvaschagn er il tango e la natira. Pina Augustin (64) è terapeuta da respiraziun. La dretga respiraziun haja ina forza enorma, di la terapeuta ch'è creschida si ad Alvaschagn. Cun la dretga respiraziun pon divers aspects da la vita vegnir meglierads. Quant ferm che la respiraziun vegn dentant negligida en il mintga-di, quai vesa ella en sia pratica a Cuira. Ina giada ha ella emprendì da scolasta primara, suenter trais onns instrucziun ha ella decidì dad ir ad alp e da bandunar l'instrucziun. Ella ha cumenzà la scolaziun da terapeuta da respiraziun ed ha chattà sia clamada.

Dapi 6 onns è Martin Cavegn guardiaselvaschina, president communal e fiduziari. E dapi in onn fa el er anc in podcast. El saja effizient, spert, disciplinà e bain organisà, be uschia saja i pussaivel dad esser guardiaselvaschina , president communal e fiduziari, di l'um da 55 onns che fa quests treis jobs dapi 6 onns in sper l'auter . Sper tut questas lavurs ha il Tuatschin lantschà avant 1 onn , ensemen cun ses figl Nils, era il podcast cun il num« Generationengespräche » . Ed in da quests discurs ha chaschunà bleras reacziuns criticas en la pressa . Pertge che quest podcast è impurtant per el sco bab e tge che motivescha el da s'engaschar politicamain, malgrà ch'il job da president communal saja tut auter che bels, raquinta l'um che è era magister da passlung en il Profil.

Selina Solèr da Mustér lavura en la Clinica psichiatrica da giuvenils a Cuira sco pedagoga d'uffants. Ella sezza ha er patì da depressiuns ed ha cun 30 onns survegnì la diagnosa ADHS. Selina Solèr di da sasezza ch'ella è fitg directa e cunquai è ella mintgatant da memia per blers. Quai ha procurà per grevs temps, er gia en scolina e scola. «Blers vegnan gnanc suenter perquai che tut sto ir svelt tar mai», di Selina Solèr en il Profil. Uss po ella regular quai meglier. Quest sa cuntegnair ha procurà per resistenza tar ils auters ed ella è sa retratga adina pli fitg, quai che n'ha betg fatg bain ad ella. Quai è ì uschè lunsch ch'ella na pudeva betg pli durmir e la finala betg pli lavurar. Il resultat era ina depressiun. Per sia lavur cun uffants e giuvenils en la Clinica psichiatrica da giuvenils a Cuira po ella profitar da sias experientschas. «Jau sai sco igl è da betg pudair durmir la notg», di Selina Solèr.» Ed ella sa er tge sforz ch'i dovra en questa situaziun per be far ina chaussa al di, per exempel far la duscha e che quai è gia insatge grond. Tgi che lavura en ina clinica psichiatrica, ina clinica acuta, sto esser resistent a stress. La situaziun po sa midar d'in mument sin l'auter. Ins na sa betg cura ch'insatgi nov vegn e cun tge problems. Sper quai han er pazientas e pazients ch'èn gia en la clinica basegns. Ed er sch'igl è uss gist tut en urden, po la situaziun cupitgar d'in mument sin l'auter.

Corsin Demarmels (52) chanta, suna e sa mova gugent – da stad cun il velo ed adina pli gugent cun il velo da cursa. Ma d'enviern il pli gugengt cun far passlung al Maraton da skis engiadinais – e quai gia per la 26avla giada. Passlung, musica e cant Corsin Demarmels sa mova, canta e suna gugent. Da stad è el da viadi cun il velo ed adina pli gugent cun il velo da cursa. D'enviern è il passlung sia gronda amur – ensumma saja il passlung il sport da famiglia. “Far sport dat energia” ed il pli tard in per meters sieva da la partenza dal marathon saja co in sentiment tut special. Quai saja er il motiv pertge che l'um da 52 onns va schon per 26avla giada a la partenza. Il cant en il Chor viril Surses saja insatge per l'olma ed il sunar la posauna bass en la Musica instrumentala Salouf, Mon, Stierva saja mademamain insatge per cuminanza ed olma, raquinta l'um cun atgna fatschenta a Cuira, ch'ha schon reglà ussa sia successiun da la firma.

La politica da pussanza è enavos ed ils dretgs umans èn sut squitsch. E tuttina datti persunas che na sa laschan betg decuraschar. Ina da quellas è Corsin Blumenthal oriund da Morissen. L'um da 38 onns lavura tar la fundaziun Swiss Peace a Basilea. Là sustegna el tranter auter organisaziuns en l'America latina tar l'organisaziun e digitalisaziun d'archivs. Quels èn impurtants per lavurar si il passà, sclerir malfatgs e render responsabel las persunas culpantas. En il «Profil» da RTR raquinta Corsin Blumenthal da ses viadis en l'America latina e pertge che la lavur d'organisaziuns umanitaras è oz fitg impurtanta.

El è cussegliader da facultad tar la Banca Raiffeisen Cadi. En ses temp liber viva Donat Albin per ses hobis e per il sport: «La fermezza da Trun èn las uniuns», di il president da l'Uniun da scursalets Trun. El raquinta da sias visiuns per la patinera, dal plaschair dal hockey e da ses viadis. En ses temp liber viva il cussegliader da facultad per sias uniuns: «La fermezza da Trun èn las uniuns. I sa mussa adina puspè che las uniuns tegnan ensemen per realisar projects en vischnanca», di il president da l'Uniun da scursalets Trun. La stagiun dal glatsch natiral a Pustget saja bain curta, dentant fitg intensiva - cun bels puncts culminants sportivs che gartegian grazia a bler idealissem dals commembers e da las commembras. La passiun per il hockey sin glatsch è vegnida messa en tgina a Donat Albin: «Cura ch'jau era pitschen, passentava mes bab praticamain tut l'enviern sin il glatsch. Oz è il hockey era mia gronda passiun, ed jau hai plaschair che nossa uniun giauda buna accoglientscha tar la populaziun». Donat Albin raschuna da sia passiun per il sport, da viadis, da sia musica, ma era dal plaschair vid sia lavur sco cussegliader da facultad ed insumma da sia vita privata e professiunala.

Severin Tönett dad Ardez, Anna Capranetti da Ftan e Simon Koller dad Ardez, trais giuvenils da 16 e 17 onns èn la Rümli Gang. Ina furmaziun da musica populara ch'i dat uss dapi quatter onns. La musica populara è la gronda fascinaziun dal trio.

Avant bel e bain 20 onns ha il skiunz lumnezian terminà sia carriera, era pervia da diversas blessuras. Uschia n'ha Franco Cavegn era betg pli pudì realisar il siemi da participar a ses quarts gieus olimpics il 2006 a Turin, insatge che haja dà ditg da morder. Durant var in decenni è el però stà in dals megliers skiunzs svizzers da la cursa rapida ed ha cuntanschì 35 giadas in plaz sut ils top 10. Malgrà ch'il grond success ha mancà, p.ex. cun gudagnar ina cursa da la cuppa mundiala, ina medaglia a campiunadis mundials u a gieus olimpics, saja el losch da sia carriera. Dapi blers onns viva Franco Cavegn cun sia famiglia a Maiavilla. Il sport è adina restà sia gronda passiun. Oz organisescha el cunzunt events da sport sco heliskiing en il Canada u navigar a vela en Svezia, dasperas è chavaltgar in da ses gronds hobis. Plinavant producescha l'anteriur skiunz sursilvan in agen vin.

Il moderatur, affarist e magister da skis patentà da San Murezzan, ha encletg la relaziun disturbada cun ses geniturs pir avant var 5 onns. Alfredo Wolf, savens pli enconuschent sco «Lupo» Wolf è oriundamain da Samedan. Dentant ha el decidì en la vegliadetgna da sis onns dad ir a star tar la famiglia Ronchi a Schlarigna. Quai er causa ch'el na sa sentiva betg bain en l'atgna famiglia. La premissa dals geniturs era dentant, ch'el stoppia ir a scola a Samedan, sa regorda l'um da 71 onns. Daco che la relaziun cun ses geniturs e la sora n'era betg buna e cordiala, sa Alfredo Lupo Wolf entant declerar meglier. Pir avant intgins onns ha el numnadamain realisà tras in'emissiun da televisiun d'ina chasa per uffants a Lai, ch'el na deriva betg da la famiglia Wolf, mabain ch'el è vegnì adoptà. Gugent fiss Alfredo Lupo Wolf daventà pilot. Quai n'hajan ils geniturs dentant betg lubì e sfurzà el da far in emprendissadi sin banca. Silsuenter haja el cumenzà da rebellar cun far festa, rock'n'roll e marihuana durant plirs onns. I saja er stà in'opposiziun encunter ses geniturs, reflectescha l'um sportiv. Entant maina il magister da skis patentà dapi plirs decennis in'atgna agentura per ils pli differents eveniments en val. Tranter auter er faschond sez moderaziuns da las cursas da chavals sin il Lai schelà da San Murezzan u organisond nozzas en Engiadina.

Anita Simeon Lutz (53) è creschida si a Lantsch e viva oz cun ses dus fegls a Neerach en il chantun Turitg. La Surmirana è architecta ETH ed anteriura schefredactura dal magazin per architectura, design e cultura d'abitar «Das ideale Heim». Anita Simeon Lutz ha dentant er auters interess che l'architectura. Ella è ina da las fundaturas ed organisescha las emnas da design Turitg. Sia incumbensa principala dentant è il mument la lavur sco schefredactura da la revista dals samaritans svizzers. Ditg è ella er stada organisatura dals Dis da litteratura rumantschs. Il motiv ch'ella è sa retratga ha er da far cun il destin da ses um. Avant 10 onns è el mort sieva d'ina malsogna maligna.

Sco organisatur d'events enconuscha el las sfidas e dinamicas che sa dattan durant sairas sco quellas da Son Silvester. Actualmain è l'um da 27 onns responsabel per tut ils eveniments da partis cun DJ's e concerts live sco era per ils eveniments en connex cun art e cultura al «Laax Open». Tge consequenzas che la disgrazia en il Vallais ha per questa ediziun e co ch'el va enturn cun stress e squitsch durant quels dis raquinta il Sursilvan, che ha ins stretga colliaziun cun Siat e che ha sez fatg musica cun Mattiu, Giganto e Sirius en il «Profil».

Durant 40 onns è Gian Gilli da Bever s'engaschà per il sport. El ha studegià magister da sport. El è stà divers onns trenader tar la federaziun svizra da skis. El era schef de mission da numerus gieus olimpics. Organisatur da campiunadis mundials e promotur da gieus olimpics en Grischun.

Gianna Olinda Cadonau è manadra da la partiziun da cultura e commembra da la direcziun da la Lia Rumantscha. Ed ella è er autura, scriva cudeschs e tocs da teater. La lavur per la Lia Rumantscha ed er la promoziun da cultura èn fitg politics. I va er per raps publics. E perquai èsi dad ir enturn cun grond respect. En ina communitad usche pitschna è tut fitg visibel, di Gianna Olinda Cadonau en il profil. Ils giavischs dad ella èn modests. Scriver, far viadis e passentar temp cun sia famiglia. Ses viadis mainan ella savens en l'Asia, magari er en l'India nua ch'ella ha sias ragischs. «Tschertas ingredienzas èn schon da là. Per exempel la fulla dad umans che guarda ora sco jau. E quai fa bain.» I saja las pitschnas chaussas: co ils corps sa movan, tge che vegn maglià, co sa vestgì, cun tge colurs. «A mes corp vai bain en l'India. Mia pel, mes chavels, la digestiun. Il corp è quiet. Na betg ch'jau stess mal en Svizra. Ma igl è insatge che croda davent en l'India.»

«Igl è stà in sentiment fitg curius da stuair far la valischa per adina. Questa giada, betg per far vacanzas, mabain per turnar a chasa a Domat», di Livio Niedermann. Il temp tar la Guardia svizra è sta ina buna scola da la vita. «Jau sun ì a Roma sco uffant e sun turnà sco um». L'emprim da settember da l'onn 2022 è Livio Niedermann da Domat entrà sco giuven gardist tar la Guardia svizra en il Vatican a Roma. Quai, suenter avair terminà ses giarsunadi da scolaziun commerziala e suenter avair absolvì la scola da recrut tar l'Armada svizra. Ils 6 da matg 2023 ha el engirà curaschi e fidaivladad al papa en linguatg rumantsch. 39 mais è el restà fidaivel al servetsch da la Guardia svizra. Durant quest temp ha el protegì e servì a papa Francestg, el ha stuì prender cumià da «ses papa» glindesdi da Pasca. Ils 6 da matg han el e ses cumpogns da la guarida pudì festivar l'elecziun da papa Leo XIV. L'onn 2025 saja stà in onn cun blera lavur e gronda preschientscha per il corp da la Guardia papala. Ma Livio Niedermann vesa quest temp a Roma sco ina vaira scola per la vita: «Jau sun ì a Roma sco uffant e sun turnà sco um». Surtut dal temp cun papa Francestg restan muments nunemblidaivels: «Durant las notgs da guardia era papa Francestg bun da far ina surpraisa. Ina giada ha el offri a mai in glatsch, e quai la damaun a las tschintg», sa regorda Livio Niedermann cun bucca da rir. Pertge che papa Francestg è stà ses fil cotschen durant il temp a Roma, ma era davart il nov vent che papa Leo ha purtà tar la Guardia svizra, dal temp liber sco gardist e co ch'ils plans per il futur sa preschentan uss per il giuven um da Domat, ans raquinta el en il «Profil».

Rico Arpagaus ha fatg ses emprendissadi en in affar da sport a Savognin. Gnanc 10 onns pli tard ha el surpiglià l'affar da famiglia e maina quel ussa cun dapli persunal che l'entschatta sco schef. Sin la naiv spetga Rico Arpagaus mintgamai cun brama. La stagiun d'enviern quinta passa dus terz da la svieuta annuala ed uschia saja quella da fitg gronda impurtanza per in affar da sport. Impurtant saja franc er stà d'avrir la filiala dar a fit skis gist sper la staziun a val da las pendicularas. Sper la vendita d'artitgels da sport è per il bab d'in mat da trais onns er sia famiglia fitg impurtanta. Pertge che Rico Arpagaus resta il pli gugent en la regiun e pertge ch'el ha fatg avant paucs onns la patenta da chatscha raquinta el en il Profil. Ina part ha en mintga cas da far cun il sentiment d'encreschadetgna.

«L'onn 2025 è stà fitg intensiv. In onn, nua ch'ins ha gì da decider bler, e nua ch'ins è era crudà in pèr giadas.» Sco mainafatschenta da la Sedrun Solar SA ha el scrit quest onn istoria d'energia. Ensemen cun ses team èsi gartegià da realisar sco pitschna interpresa sisum la Surselva l'emprim grond parc solar alpin en Svizra. Decisiv saja stà d'avair gì il curaschi da decider, da gughegiar e far! Quai valia per el dal reminent era en il sport. Blers onns ha il bab da trais figlias creschidas fatg cursas extremas sco ultramaratons e realisà era là che bler che paria nunpussaivel a l'entschatta sa laschia realisar cun l'endretga tenuta, preparaziun e strategia. En il Profil lascha l'um da 60 onns repassar quest onn turbulent cun tut sias sfidas e dat era in'invista en sia vita privata.

Antonetta Battaglia-Janutin ha preschentà avant curt ses cudesch «Ein Goldesel wäre mir lieber gewesen. Kindertage in Riom». L'autura dad 84 onns raquinta dal bun e dal schlet ch'ella ha fatg tras durant sia uffanza a Riom.

Mattiu Defuns da Trun è musicist, chantadur, chantautur rumantsch e cumponist. Il mument lavura el vi da ses proxim album che sa numna «Aura». Quel vegn edì il favrer 2026 e fin lura cumparan adina puspè singles che vegnan ad esser sin quest album, in process ch'ha cuzzà dus onns. Mattiu Defuns di da sasez ch'el saja in artist da vita. El manegia cun quai ch'el vegn da finanziar sia vita cun chaussas ch'el fa gugent. Ma el saja en emprima lingia schon musicist. Sia vusch descriva Mattiu Defuns sco rauca, loma e chauda. Ses stil da musica saja quel da chantautur, cun influenzas sfericas e tuns lungs, cumbinà cun registraziuns audiovisualas da la natira e maschadà cun in zic indi. Pia ina maschaida da singer-songwriter-sferic-indi.

30 maratons en 30 dis. Il davos mais è Ruedi Frehner currì 1291 kilometers per rimnar daners per la Fundaziun Sonnenschein, che sustegna uffants ch'han cancer e lur famiglias. Igl è in dals gronds projects ch'il Sursilvan ha organisà, dapi ch'el ha fundà il 2011 sia atgna fundaziun «Ruedi Rennt». Dapi dus onns è Frehner pensiunà, quai suenter avair lavurà passa 30 onns sin banca, il davos sco manader da la banca UBS a Cuira. Oz è Ruedi Frehner dentant er anc da viadi sco moderatur e speaker tar occurrenzas da sport. Sia vita è fixada cumplainamain sin sport e famiglia.

Tgi n'ha betg gia ina giada tschertgà sasez en l'internet. Be gia per guardar tge ch'ins chatta tut là da sasez. Jau hai en tutta cas chattà cun tschertgar mamez mes giast dal «Profil». Pertge tut quai che jau hai chattà da mes numalin en la rait ha animà mai d'emprender d'enconuscher in zic meglier quest Gion Caviezel da Haldenstein. Pertge el n'è betg mo stà manader da la scola a Singapur, inspectur da scola en il chantun da Schaffusa ed ha avant curt era manà il consorzi da scola da Laax, Falera, Sagogn e Schluein. El ha era manà plirs onns la federaziun d'unihockey dal Grischun, è scrivent e dat ussa cun 61 onns puspè scola a giuvnas persunas fugitivas a Cazas. Co quai è da puspè dar scola, daco ch'el è gia currì ina giada 100 kilometers al toc e daco ch'el è tuttina puspè turnà en Svizra suenter diesch onns a Singapur, ses segund dachasa, gliez ed anc bler dapli raquinta Gion Caviezel en quest «Profil».

Quella ha il schurnalist engiadinais tant tar la lavur sco er en sia vita privata. Senza passiun na funcziunassi betg, di l'um da 52 onns. Scriver e rapportar da tut quai che capita ed occupa la populaziun en Engiadina è la professiun da Nicolò Bass dapi stgars 20 onns. Cun ses artitgels en rumantsch vallader e tudestg contribueschia el er ina part a las mintgamai trais ediziuns l'emna che la gasetta Engadiner Post / Posta Ladina edescha. Quella lavur fetschia el cun gronda passiun, saviond ch'el è adina il «schurni» er en ses temp liber. Oriundamain ha Nicolò Bass emprendì d'ir enturn cun cifras. El ha fatg in emprendissadi mercantil en in biro fiduziari. Daco ch'el avess er pudì daventar coiffeur e tge che ses bab l'ha anc mussà curt avant sia mort, raquinta il bab da dus uffants creschids en il Profil.

Beni Thurnheer, Whitney Houston e la crisa da finanzas. Quai èn mo intgins chavazzins or da la vita da Reto Martinelli. Ina vita che mussa a moda exemplarica che betg tut sto ir tenor plan e ch'i dovra mintgatant er il curaschi da far in pass en il nunenconuschent. Reto Martinelli ha 49 onns, viva cun sia dunna Diana a Walchwil al Lai da Zug e lavura tar l'organisaziun «Wohnen Schweiz». En il «Profil» vai per la mancanza d'abitaziuns pajablas e co ch'ins pudess meglierar la situaziun per famiglias indigenas. Reto Martinelli raquinta era da ses temp sco giugader dad american football e tradescha, pertge che Whitney Houston ha dà in sigl pervi dad el.

Jon Fadri Tönett dad Ardez è scrinari e restauratur, el è musicant, chantadur, e tranter auter era president da la vischnanca burgaisa da Scuol. Jon Fadri Tönett n'è dentant betg mo apicultur, ma era custodi. En il suler da sia chasa tipica engiadinaisa cun ina gronda porta e cun arvieuts a crusch stattan veglias stgaffas cun picturas u entagls d'annadas. Ina da quellas stgaffas veglias è perfin vegnida salvada dals proprietaris d'antruras dal grond fieu a Sent l'onn 1921. En il suler da la chasa da Jon Fadri Tönett ad Ardez stattan però er in gìun, vaiders cun mel d'avieuls, veglias iseglias ed inquala antiquitad sco per exempel chalderas d'arom. Il suler da la chasa engiadinaisa da Jon Fadri Tönett è quasi in spievel dals interess dal giast dal «Profil». Creschì si è Jon Fadri Tönett ad Ardez en Engiadina Bassa. Ensemen cun dus fragliuns pli giuvens ha el passentà ina bella uffanza. Gia baud ha Jon Fadri Tönett decidì da vulair emprender il mastergn dal falegnam. Sche insatge era rut a chasa, cumadava quai il giuven Jon Fadri. Suenter il giarsunadi e las emprimas experientschas tar ina falegnamaria a Cuira è el alura turnà en Engiadina Bassa. E dapi blers onns lavura il giast dal «Profil» en ina falegnamaria ch'è spezialisada sin restauraziuns. Bleras stgaffas, blers balcuns torts, bleras stgalas e fanestras, bancs pigna, palantschieus e plafonds en Engiadina Bassa èn vegnids restaurads da Jon Fadri Tönett.

Tgi n'enconuscha betg quest sentiment da betg propi sa sentir bain perquai che tut enturn ins è anc ester e nunenconuschent. Ins è en in nov lieu, n'enconuscha betg la glieud e chapescha forsa gnanc tge ch'ella di. Quest sentiment che blers enconuschan magari da las vacanzas, enconuscha Anja Caminada (43), oriunda da Vattiz, fitg bain da sia lavur. Ella è numnadamain scolasta da classa integrativa da lungatg a Cuira, nua ch'ella gida ad uffants d'auter pajais da sa sentir in zic pli fitg da chasa tar nus cun mussar tudestg. Quant gronda che questa sfida è magari sch'ils uffants vegnan dals pli differents pajais dal mund, dentant er quant bel ch'igl è, sche l'entir mund è sin visita, raquinta la mamma ch'ha duas giadas schumellins e ch'è dapi dus onns separada da l'um en il “Profil” da questa sonda.

Marietta Jemmi da Flem è actura e da vesair en «L'Ultim Rumantsch». Ella seria fictiva cuntinueschan las dispitas da la famiglia Durisch. Marietta Jemmi è en la seria la matriarca. «Talas figuras na datti betg usche bleras per dunnas», di l'actura en il profil. I saja ina rolla moderna. Cun l'Andrietta, la mamma e matriarca en la seria, n'ha Marietta Jemmi betg bler cuminaivel. L'Andrietta saja ina dunnetta, ina che guarda che tut saja bi e bel a chasa, ina brava dunna e mamma. Ma nagin vesia l'Andrietta. Il bel da la figura saja ch'ella fa ina metamorfosa. La lavur al set è stada «heftia». I saja bel da far films. Ma ils dis èn lungs. La bun'ura a las sis èsi dad ir ella mascra ed in di da filmar po ir fin la saira las set. I dovra blera concentraziun e lura èsi er da spetgar bler.

Il pli gugent chanta Maria Catrina Albin-Caduff en il ravugl da «La Compagnia Rossini»: «Là ma sent 'jau purtada da mia segunda famiglia», di Maria Catrina. Tar il nov musical «Plaun Salter», s'engascha la sopranista davant e davos las culissas per il bainreussir da l'ovra da ses bab Armin Caduff.

Las differentas direcziuns che Claudia Alini-Cadonau ha gia instradà durant sia vita demussan ch'ella è averta per bler. Dapi 17 onns è Claudia Alini-Cadonau, oriunda da Ramosch, puspè da chasa en Engiadina Bassa. A Scuol viva ella cun ses um en ina chasa a l'ur da la vischnanca, nua ch'ella maina er ina butia creativa cun artitgels ed urdains ch'han il bul rumantsch.

Sch'i va per scolar e cussegliar purs e puras, lura è il Plantahof a Landquart la dretga adressa en il Grischun. E dapi il favrer maina in Rumantsch quella veglia instituziun chantunala ch'è bler dapli che be ina scola. Dad esser in di directur dal Plantahof n'è bain mai stà ses siemi. Sco uffant fiss el pli gugent vegnì locomotivist. Dentant sco quai ch'igl è magari sin la via da la vita, prendan ins bain enqual storta fin ch'ins è là nua ch'ins è il mument. Uschia n'ha er l'agronom Pieder Vincenz betg mo lavurà per il chantun, mabain tranter auter er sco sviluppader regiunal da la Surselva, per il label da charn da la Migros, en il marketing da la ÖKK u er sin grondas farmas en la Nova Zelanda cun bun 10'000 nursas. E sche Vus vulais savair quant fitg ch'el po profitar da tut quellas experientschas professiunalas, tge ch'el fa insumma l'entir di sco directur dal Planthof, quant fitg ch'il velo gida el da chattar puspè la via e sch'el sa gia tut ils nums da ses passa 100 collavuraturs e collavuraturas, lura tadlai il «Profil».

Martin Cabalzar da Cumbel ha passa trenta onns lavurà per la pressa rumantscha. L'emprim sco redactur da la «Gasetta Romontscha», la fin sco schefredactur da la Quotidiana. Cunzunt ils onns 1990 èn stads onns burascus cun bleras midadas. Martin Cabalzar è stà scolast primar e scolast secundar. Suenter diesch onns en stanza da scola, il 1987, ha el midà tar la «Gasetta Romontscha». «L'invenziun principala da quest temp è stà il fax», di Martin Cabalzar en il profil. «Jau scriveva mes text a Glion cun maschina, fascheva lura in fax a Mustér e quels vegnivan lura scrits giu, tschentads per la stampa.» La «Gasetta Romontscha» era da lez temp ina gasetta da partida ed el haja empruvà dad avrir ella. Mez dils onns 1990 era in temp burascus e difficil. Cun il resultat da la naschientscha da la Quotidiana. «Quai è stà ina fasa terribla. Ma da l'autra vart eran nus ina truppa fitg motivada da far in nov product», di Martin Cabalzar.

Andi Seeli oriund da Vuorz vala sco ina vaira icona en la scena da mountainbike. Ils onns 1980 ha el fundà ensemen cun dus amis il Club da Velo Surselva. Pli tard è el daventà trenader naziunal. Durant quels 10 onns sco trenader dals megliers mountainbikers da la Svizra ha el pudì festivar numerus success, tranter auter trais medaglias olimpicas ed otg titels da campiun mundial. Enconuschent è Seeli però surtut pervia dal «Power Kids Cup», oz enconuschent sut il num «Swiss Bike Cup», ina seria da cursas en Svizra ch'el ha lantschà il 1994. Quella seria da cursas è anc oz ina da las pli impurtantas suenter quella da la cuppa mundiala e vala sco sia ovra da la vita. Seeli ha dentant era fundà l'equipa da Nino Schurter ch'el ha pli tard surdà a Thomas Frischknecht. Il Sursilvan è uschia ina da quellas persunas ch'ha furmà Nino Schurter sco meglier mountainbiker dal mund.