Té con Gotas

Nun contexto no que a desigualdade entre ricos e pobres se convertiu nun dos grandes desafíos da nosa época, falamos moito de como repartir a riqueza pero non tanto de como creala. O asunto non é secundario para un país como Galiza, que nas últimas décadas viu pechar ou deslocalizar algunhas industrias históricas e, con elas, moitos postos de traballo. As start-ups innovadoras son en moitos casos un flotador de salvación e a oportunidade para crear novos sectores productivos moi vinculados ás novas tecnoloxías. En Galiza, existe unha interesante rede de empresas deste estilo pero aínda estamos lonxe doutros hubs de start-ups peninsulares como Málaga, Valencia ou o Porto. Que fai falla daquela para convertirnos nun polo innovador? Neste episodio trataremos de responder a esa pregunta coa axuda de Miguel Varela, CEO e co-fundador da start-up Teimas e membro da directiva da asociacion Start Up Galicia; Julio Martinez, xestor de proxectos de Cluster Galego Tecnolóxico Empresarial das Ciencias da Vida (Bioga); e Xavier Vence, catedrático de Economía Aplicada na Universidade de Santiago de Compostela (USC) e coordinador do grupo de investigación sobre Innovación, cambio estrutural e desenvolvemento (ICEDE).

Cando falamos de alternativas á banca tradicional, é habitual misturar conceptos e confundir, por exemplo, a banca ética coas cooperativas de crédito ou as seccións de crédito dunha cooperativa. O abano de ofertas que nos ofrecen estas finanzas con vocación máis social é moi amplo e non sempre é doado entender as diferenzas. Neste episodio tratamos de debullar que tipo de entidades podemos atopar os usuarios do estado español e cales son as súas principais características.

No podcast desta semana exploramos algunhas das formas de finanzas cooperativas que existen en Galiza, no resto do estado, e tamén no Reino Unido. Cooperativas de crédito, mutuas ou seccións de crédito son alternativas que, no sector das finanzas, operan con outros valores e criterios distintos aos da banca tradicional. Falamos con: Tony Greenham - director executivo de South West Mutual Bank Xavi Teis - responsable de comunicación de Coop57 Antón Insua - coordinador técnico de Coop57 Galiza Marta Vázquez Dopico - directora xerente da Cooperativa O Val

No último Té con Gotas falamos de macrogranxas e de posibles alternativas de producción de alimentos. Tivemos a oportunidade de contar con tres entrevistados que, desde o noso punto de vista, achegaron perspectivas moi interesantes. Para profundizar máis no tema, neste Té Sen Gotas queremos publicar a conversa íntegra que tivemos con Edelmiro López Iglesias, profesor de economía aplicada na USC, especializado en política agraria.

O último affaire ibérico coas macrogranxas pode pasar á historia dos manuais de Ciencia Política e Xornalismo como un bo exemplo de que, ás veces, hai polémicas que saltan aos medios a lombos das fake news ou, como mínimo, declaracións terxiversadas. Malia iso, o episodio puxo sobre a mesa o debate sobre a sustentabilidade deste tipo de grandes explotacións gandeiras nun mundo cada vez máis asediado polos efectos da crise climática. Neste programa tratamos de analizar que son as macrogranxas, que impacto ambiental e socioeconómico ten este modelo, cal é a súa presenza real en Galiza e que posibilidades habería de prescindir deste xeito industrial de producir carne e apostar por explotacións máis sostibles. Para achegar algo de sentidiño ao debate falamos co profesor titular de Economía Aplicada na Universidade de Santiago de Compostela (USC) e experto no ámbito da economía agraria Edelmiro López Iglesias, coa secretaria xeral do Sindicato Labrego Galego, Isabel Vilalba, e co xerente da cooperativa cárnica dos Ancares ‘A Carqueixa', Román Sánchez.

Neste Té sen Gotas falamos con Miguel Penas, expresidente da Associaçom Galega da Língua (AGAL) e membro do actual Consello da entidade, que nos falará dunha experiencia profesional recente que tivo no mercado portugués, traballando para unha empresa galega que buscaba vender servizos de administración dixital a compañías do país veciño. Na súa opinión, o galego facilita moito a aprendizaxe do portugués e a comunicación cun lusoparlante, aínda que considera que para se desenvolver en contextos máis formais é necesario aprender a gramática, léxico e fonética de xeito máis académico.

Neste Té sen Gotas publicamos completa a nosa entrevista con Enrique Sáez, exdiretor xeral do Banco Pastor, e presidente da Fundación Juana de Vega e do grupo Torres & Sáez, unha compañía galega especializada na distribución de equipamentos industriais e ferramentas. Nela fálanos de como descubriu a utilidade do galego para abrir novos mercados en Portugal durante a súa etapa como directivo do Pastor e danos a súa opinión sobre a importancia de ensinar portugués na escola. Os anacos da conversa con el que publicamos no Té con Gotas da pasada semana semella que tiveron moito éxito, así que aquí vai a gravación completa.

Desde a aprobación da lei Paz Andrade no 2014, o ensino de portugués no sistema educativo galego foi aumentando e hoxe chega a 5000 estudantes, pero, é suficiente? Estamos aproveitando todo o potencial que ten a proximidade do galego e o portugués? Falamos co secretario xeral de política lingüística da Xunta de Galicia, Valentín García, co vicepresidente da Associação Docentes de Português na Galiza, Luís Figueroa, e co empresario e ex-director xeral do Banco Pastor, Enrique Sáez Ponte.

A semana pasada, no Té con Gotas, falamos das cooperativas de vivenda en cesión de uso. Un modelo moi establecido en Dinamarca e que está a gañar adeptos en Catalunya. Pero unha cousa que nos quedou no tinteiro foi falar do financiamento e das relacións coas entidades de crédito. Neste Té sen Gotas volvemos falar con José Téllez, de Sostres Civic, e con Xosé Manuel Marcote, de Galca Solucións Habitacionais para que nos conten as dificultades que teñen para acceder a liñas de crédito.

No podcast desta semana analizamos a experiencia das cooperativas de vivenda en cesión de uso, un modelo de vivenda social que leva décadas poñéndose en práctica en países como Dinamarca e que no Estado español comeza a dar os seus primeiros pasos en Barcelona. Para comprender esta experiencia e entender algo mellor o mercado da vivenda no Estado falamos con José Téllez, un dos portavoces da cooperativa de vivenda catalana Sostre Civic, con Andrei Quintiá, investigador da Universidade de Santiago de Compostela (USC) especializado na área das políticas públicas de vivenda, e con Xosé Manoel Marcote, xestor de Galca Solucións Habitacionais, unha xestora galega de cooperativas de vivenda.

A semana pasada dedicámoslle un programa completo á cuestión do "retrofitting", é dicir, da rehabilitación enerxética. Para este Té Sen Gotas, queremos pararnos un pouco máis na relación entre un programa ambicioso de modernización do parque de vivenda e o "community wealth building", un concepto do que tamén falamos hai unhas semanas. Ademais, revisitamos as propostas da New Economics Foundation para entender que outras opcións máis aló das axudas directas se poden usar para fomentar que os propietarios renoven as súas vivendas.

Esta semana falamos do concepto de "retrofit", é dicir, da rehabilitación de vivenda para mellorar a súa eficiencia enerxética. Este tema, que pode parecer moi seco, é unha porta aberta para reducir de xeito significativo as emisións de CO2 e, ao mesmo tempo, aforrar na factura da luz e crear milleiros de postos de traballo. Conversamos con Aydin Dikerdem, do think tank británico New Economics Foundation, e coordinador dunha campaña para promover un programa masivo de modernización da vivenda no Reino Unido. Ao outro lado do Atlántico entrevistamos a Elena Ampudia, decana do Colexio Oficial de Arquitectos de Galicia.

Esta semana falamos do Community Wealth Building, un modelo de desenvolvemento local que continúa a colleitar éxitos aló onde se pon en práctica. A grosso modo, esta estratexia busca frear a concentración da riqueza nos grandes centros urbanos e financeiros, promovendo o gasto público en pequenas e medianas empresas locais e apostando por unha economía máis democrática a través do cooperativismo e outras modalidades de propiedade comunitaria. Para coñecer máis polo miúdo en que consiste este modelo, falaremos con Sarah McKinley, unha das portavoces do think tank Democracy Collaborative, que nos contará como comezaron a apostar por esta estratexia en Cleveland. No Reino Unido, conversaremos con Rachel Bentley, directora asociada do think tank Centre for Local Economic Strategies (CLES), que tamén nos porá ao día do Modelo Preston, un vello coñecido do noso podcast. Con todo, tamén nos preguntamos que marxe de manobra temos en Galiza para poñer en marcha estas propostas. Para responder a esa pregunta, parolaremos co profesor de Dereito Administrativo e secretario xeral da Universidade da Coruña (UDC), Carlos Aymerich.

No Té sen Gotas desta semana queremos afondar na idea da semana laboral de catro días a través do caso de dúas empresas privadas que tiveron moita repercusión na prensa: o da neozelandesa Perpetual Guardian e o da catalana Desigual. A primeira, que comezou a ensaiar con este modelo aló por 2018, foi un exemplo de como reducir horas de traballo sen recortar salarios, en diálogo cos traballadores e aumentando a productividade. Desigual, que aínda non puxo en funcionamento a xornada reducida, optou en cambio por rebaixar as nóminas lixeiramente, ofrecendo menos flexibilidade aos empregados que non queiran acatar a nova semana e facendo menos esforzos por chegar a un acordo cos representantes dos traballadores.

Comeza a nova etapa do Té con Gotas. A primeira gran idea da que imos falar é da proposta da semana laboral de 4 días. Viaxamos a Islandia da man de Jack Kellam, un investigador do think tank británico Autonomy, que escribiu un inform sobre o proxecto piloto de redución de xornada que fixeron na illa nórdica. Tamén falamos con Andrés Tarascó, CEO de Tarlogic, unha empresa de ciberseguridade con sede en Teo que está experimentado cunha semana laboral de 4 días.

Este é o último programa da etapa británica do Té con Gotas. Non só pechamos tempada, senón que cando volvamos despois do verán, farémolo con outro formato non tan centrado na actualidade do Reino Unido. O programa de hoxe está dedicado a facer memoria e lembrar o que aprendimos con este proxecto, os nosos programas favoritos e tamén reflexionamos sobre as ideas que nos gustaría levar a Galiza.

No podcast de hoxe analizamos os resultados da by election de Chesham and Amersham, un feudo tradicional dos conservadores no que, contra o que anticipaban todas as enquisas, gañaron os liberal demócratas. Despois das últimas victorias tories en zonas laboristas, semellaba que os de Boris eran practicamente imparables en Inglaterra. É posible contentar ao electorado das zonas máis deprimidas do país ao tempo que se mantén o apoio do electorado conservador de toda a vida? Tamén falaremos da elección que se celebrará nas próximas semanas en Batley and Spen. Trátase dunha área historicamente laborista pero na que desta volta se xuntan varios factores que poden facer dela un cocktail totalmente imprevisible. Ademais, faremos un anuncio importante sobre o futuro do noso podcast despois desta terceira tempada que está a piques de acabar. Escoita, porque queremos contar coa túa opinión!

Estes días celébrase en Cornualles o cumio do G7 e, para disgusto de Boris Johnson, un dos temas a tratar é o conflito entre a Unión Europea e o Reino Unido por mor do comercio de mercadorías en Irlanda do Norte. É o que na prensa británica bautizaron como “sausage war”, a guerra das salchichas.

Esta semana facemos un pouco de historia e revisamos a privatización do ferrocarril británico que tivo lugar a principios dos 90. Tamén entrevistamos ao maquinista do metro de Londres, Carlos Barros.

No podcast desta semana comentamos as implicacións políticas das recentes eleccións locais en Inglaterra e das lexislativas en Escocia e Gales. Centrámonos no impacto dos resultados nun debilitado Partido Laborista e dunha unión de nacións tamén nunha situación precaria.

No Té con Gotas desta semana falamos de modelos de contratación no sector público. En todos os países pasan anos memorizando temarios infinitos ou hai alternativas ás oposicións? Comentamos o caso británico e entrevistamos a Serafín Pazos Vidal, xefe da oficina de Bruxelas da Convención de Autoridades Locais Escocesas.

A Super Liga europea de fútbol terá que esperar. A proposta de cártel futbolístico impulsada polo presidente do Real Madrid, Florentino Pérez, e outros 11 clubes europeos esfarelou na tarde de onte despois de que as seis equipas inglesas que co-impulsaban a iniciativa comezasen a darse de baixa unha tras outra. No podcast desta semana analizamos as fortes presións políticas, sociais e deportivas que en Inglaterra forzaron aos seis clubes a deixar tirado a Florentino en cuestión de horas. O audio é só un extracto do Té sen Gotas desta semana, o noso podcast exclusivo para socios. Se queres escoitalo enteiro, subscríbete no noso Patreon.

No podcast de hoxe falamos de tráfico de influencias e portas xiratorias. En concreto, das portas que cruzou o exprimeiro ministro David Cameron para chegar do número 10 de Downing Street ao seu posto como lobbysta da empresa financeira Greensill Capital, no foco da prensa económica nas últimas semanas por entrar en quebra. Unha investigación xornalística revelou como Cameron presionou a membros do actual Goberno para que a firma que representa se beneficiase dalgúns dos programas de axudas á empresa postos en marcha por Boris Johnson durante a pandemia. O escándalo levou ao Goberno a abrir unha investigación sobre o papel e as presións de Cameron. Pero aínda hai máis. A caída de Greensill ten unha conexión directa con Galiza, en concreto coa Mariña lucense. Escoita o podcast enteiro para saber o por que.

Falamos do conflito que enfronta aos dous grandes líderes do independentismo escocés no século XXI: Alex Salmond e Nicola Sturgeon. Unha serie de denuncias de abusos sexuais contra o antigo líder do SNP levaron a un conflito de difícil solución entre estes dous vellos aliados. A pouco máis dun mes das eleccións escocesas, Alex Salmond anuncia a aparición dun novo partido independentista: ALBA. Sobre isto conversamos con Xabier Villares, galego residente en Edimburgo e afiliado ao Scottish National Party de Nicola Sturgeon.

O parlamento británico está debatendo unha proposta de lei que, entre outras cousas, outogará poderes especiais á policía para disolver protestas que causen demasiados prexuízos a terceiros. No Té Sen Gotas desta semana debullamos esta lei e explicamos os acontecementos que fixeron que estivese de tanta actualidade.

Rematou finalmente a política de austeridade? Estase abrindo unha nova era onde os impostos altos e a intervención pública na economía van ser o habitual? No Té con Gotas desta semana debullamos o orzamento presentado hai un par de semanas polo goberno británico, que inclúe fortes subidas de impostos e un nivel de investimento pouco habitual en gobernos conservadores.

Para poder votar desde a emigración, hai que solicitarllo ao goberno español para que envíen a documentación por correo postal. A isto chámaselle voto rogado, e leva sendo un quebradeiro de cabeza desde que se implantou no ano 2011. A semana pasada, o PSOE e Unidas Podemos presentaron unha proposta de lei para derrogalo. No Té con Gotas entrevistamos a unha das súas promotoras, Pilar Cancela, deputada do PSOE pola provincia da Coruña.

Cando este verán se xogue a Eurocopa de fútbol, Marcus Rashford vestirá a camisola da selección de Inglaterra mentres que Gareth Bale competirá coas cores de Gales. Os dous son cidadáns británicos, pero xogan con seleccións nacionais diferentes. No podcast desta semana falaremos de por que en moitas competicións internacionais o Reino Unido non participa como tal e cede o protagonismo ás 4 nacións constituíntes. Ademais, entrevistaremos a Alexandre Sanmartín Costa, adestrador da selección galega de fútbol gaélico, a única disciplina deportiva en que Galiza competiu con equipa propia nun torneo internacional.

Segunda parte da extensa entrevista co lingüísta Carlos Durão. Nesta ocasión falamos da súa aproximación ao reintegracionismo, da súa relación co filólogo e escritor Ernesto Guerra da Cal e do seu papel como embaixador non oficial do galeguismo no Reino Unido.

O protagonista do programa de hoxe chámase Carlos Durão. El é un dos galegos máis veteranos da comunidade de emigrantes no Reino Unido e un exemplo de compromiso coa lingua e cultura galegas desde o exterior. Traductor políglota e escritor, foi un dos promotores do Grupo de Traballo de Galego de Londres, unha asociación de galeguistas que desde a capital británica editaba un boletín que se distribuía por correo con reflexións sobre o ensino do galego e da situación cultural e política de Galicia. Desde a diáspora, tamén axudou a impulsar a Associaçom Galega da Língua (AGAL), facendo da defensa do reintegracionismo un dos seus cabalos de batalla persoais. Nesta primeira parte da conversa que tivemos con el, Carlos recorda como foi a súa chegada ao Reino Unido nos anos 60 e os seus primeiros contactos cos exilados republicanos e coa comunidade de galegos en Londres.

O Reino Unido e a Unión Europea selaron in extremis un acordo comercial na última semana de decembro que regulará a relación entre ambos bloques a partir de 2021. Malia que o sector servizos non se inclúe no tratado, os bens poderán comerciarse sen pagar aranceis, a pesar de que si serán necesarios controis na fronteira. En canto a pesca, os barcos da UE manterán os seus dereitos pesqueiros durante polo menos 5 anos, aínda que nese tempo perderán un 25% da súa cota. Estas son algunhas das resolucións clave do acordo pero, como está a ser a implementación nas primeiras semanas do ano? Que supón este tratado para o futuro da política británica? Que pasará, por exemplo, co sector financeiro? A estas e outras preguntas respostamos no episodio de hoxe.

Esta semana comparamos a cultura da transparencia das institucións públicas en Galiza e no Reino Unido. Neste programa tamén abordamos un tema lixeiramente relacionado, o da fuga de cerebros. Entrevistamos á economista Sara Fernández López, que vén de publicar xunto con outros investigadores do Foro Económico de Galicia un informe analizando a fuga de talento no noso país.

No podcast desta semana falamos do regreso da Princesa de Gales, Diana Spencer, á actualidade británica. Por un lado, volta estar na boca da xente pola estrea da cuarta tempada da serie de Netflix 'The Crown', onde se repasan os seus primeiros anos como integrante da familia real británica. Por outro, este mes de novembro fanse 25 anos dunha das súas entrevistas máis controvertidas, arredor da cal acaba de xurdir unha nova polémica. Na entrevista, contamos cunha convidada moi especial: a lingüista británica Harriet Cook, que nos contará (en galego!) de onde vén a súa paixón polo noso país e como se lle deu por investigar as cantigas medievais galego-portuguesas, entre outros asuntos.

No podcast desta semana analizamos as consecuencias para o Reino Unido da elección de Joe Biden como presidente dos Estados Unidos. Suporá ter un demócrata na Casa Branca un obstáculo para o tratado comercial que Boris Johnson prometeu pechar con Washington tras saír da UE? Por que Biden en particular pode ser un problema no conflicto da fronteira de Irlanda do Norte? Na parte da entrevista, falaremos con Adriana Páramo, unha directora de cinema e productora galega que desenvolveu durante dez anos a súa carreira en Londres e que vén de protagonizar un documentario sobre as vivencias dos emigrantes españois no Reino Unido.

Hoxe falamos dunha auténtica institución da diáspora galega no Reino Unido: o proxecto Galego en Londres. O que comezou como unha proposta educativa para a aula de lingua galega do instituto español Cañada Blanch, rematou por converterse nun punto de encontro para os galegos e galegas emigrados no Reino Unido. Falamos cos dous nomes propios que deron vida a este proxecto: Xaime Varela e Begoña González.

Malia que un 62% dos escoceses votaron a favor de permanecer na Unión Europea no referendo de 2016, Escocia está sendo arrastrada contra a súa vontade cara un Brexit pilotado en exclusiva desde Londres. A saída da UE e o ascenso como primeiro ministro de Boris Johnson están a reavivar os cantos de independencia nun país que en maio celebrará eleccións ao seu Parlamento nacional. O Scottish National Party (SNP), a quen todas as enquisas dan como claro gañador, xa anunciou a súa intención de convocar un segundo referendo de independencia, malia que Boris Johnson se nega a aprobalo. Encamíñase Escocia cara unha nova consulta histórica sobre o seu futuro?

Con este título con reminiscencias coruñesas abrimos a tempada 2 do Té con Gotas. E facémolo cun tema xa clásico neste podcast: o Brexit. Falamos dos últimos movementos deste verán e do estado das negociacións do tratado de libre comercio.

Esta semana facemos un alto nas nosas vacacións para facer un podcast sobre a Familia Real. O motivo? Temos en exclusiva unha entrevista con James Badcock, o xornalista británico que desvelou nas páxinas do Daily Telegraph algúns dos escándalos da Casa Real que fixeron ao Rei Juan Carlos fuxir do país.

Neste podcast despedimos a primeira tempada do Té con Gotas repasando algúns dos mellores momentos deste ano e medio e anticipando algunhas das novidades que chegarán a partir de setembro.

Para pechar a nosa cobertura especial das eleccións galegas, entrevistamos a Antonio Rodríguez Miranda, candidato do Partido Popular na provincia de Ourense e Secretario Xeral de Emigración da Xunta de Galicia desde o ano 2012.

A nosa cobertura especial das eleccións galegas de 2020 tráenos hoxe ao presidente do PSdeG e coordinador do seu programa electoral, Xoaquín Fernández Leiceaga, con quen falaremos das súas propostas para a diáspora galega.

Continuamos a nosa cobertura especial das eleccións galegas de 2020 cunha entrevista a Ana Pontón, cabeza de cartel do BNG. Preguntámoslle polas propostas da formación nacionalista para a Galiza exterior.

Comezamos a nosa cobertura especial das eleccións galegas entrevistando a Antón Gómez Reino, candidato á presidencia da Xunta de Galicia por Galicia en Común. Nas próximas semanas iremos falando con outros candidatos e representantes de distintas forzas políticas galegas.

Cando comezou a pandemia global, o goberno de Boris Johnson estaba nunha posición de forza. Mesmo nos primeiros meses da crise do coronavirus, a satisfación coa súa xestión era moi alta. Pero nas últimas semanas a opinión pública comezou a virarlle as costas ao goberno. No podcast desta semana falamos do auxe e caída -polo menos nas enquisas- do primeiro ministro.

Comeza o mes de xuño e moitos dos galegos emigrados comezan a planificar o seu regreso á casa polo verán. Loxicamente, este ano non é coma outro calquera. Neste podcast especial de hoxe falamos das recomendacións que fai o Goberno español á hora de organizar as vacacións, aclaramos os prazos e novos requisitos que imporá a "nova normalidade" do Covid e explicaremos as mellores rutas para regresar a Galicia nos próximos meses.

Unha das cousas que nos chamou a atención cando chegamos ao Reino Unido é o tratamento da saúde mental. Fálase dela máis abertamente, hai menos estigma e parece que se lle presta máis atención tanto na política como nas empresas. No podcast desta semana falamos deste tema coa psiquiatra infantil coruñesa Violeta Pérez.

A pesar do elevado número de mortos e infectados de Covid-19 que aínda rexistra por día, o Reino Unido comeza hoxe a levantar o pé do acelerador do confinamento. Farao máis a modo que o resto de Europa e entre críticas á errática política de comunicación do Goberno das últimas semanas. Neste podcast, comentaremos cales serán os cambios máis inmediatos e que debates están a espertar estas medidas no país. Na entrevista, falaremos con Ana Inés Jabares Pita, unha coruñesa galardonada a nivel internacional que traballa como escenógrafa no Reino Unido.

No podcast desta semana falamos de Keir Starmer, o novo líder do partido Laborista. Logo dun logo período de primarias, este xurista londinense foi elixido para substituír a Jeremy Corbyn, pero ao estar o foco de atención no coronavirus, non sabemos demasiado sobre el.

No podcast desta semana falamos de inmigración e traballadores clave. Por primeira vez en moito tempo, e a raíz da crise do coronavirus, estase recoñecendo o papel esencial de traballos como os de limpadoras, caixeiras, repartidores de comida ou traballadoras sociais en residencias de anciáns, sectores que no Reino Unido ocupan a unha porcentaxe moi importante de inmigrantes. Suporá esta crise un cambio na política migratoria do Goberno? Levará a experiencia do Coronavirus a que estes sectores recuperen unha certa conciencia de clase que mellore os seus dereitos laborais? Para falar de todo isto, entrevistamos a Mariña Fernández Reino, unha investig

Agora que hai tanta xente traballando desde a casa, no Té con Gotas queremos explorar un pouco máis a cuestión do teletraballo. Falamos das nosas experiencias sen ir á oficina e entrevistamos a Alan Felstead, profesor na facultade de ciencias sociais da Universidade de Cardiff e que ten feitas moitas investigacións sobre o traballo desde a casa. Esta é a primeira entrevista que facemos en inglés, así que moitas grazas a Saleta Chao por axudarnos coa dobraxe.

Dez días despois que en Galiza, o Reino Unido decretou oficialmente este luns o confinamento total dos seus cidadáns na casa. A diferenza é que aquí poderase saír facer exercicio durante unha hora ao día e mantendo a distancia social, ademais de saír para facer a compra, ir traballar ou ir ao médico. Neste episodio falaremos das últimas medidas do Goberno de Boris Johnson para controlar a pandemia e do plan económico adiantado polo primeiro ministro e polo Banco Central de Inglaterra para evitar unha crise económica de dimensións colosais. Ademais, entrevistamos a María Longueira, unha enfermeira coruñesa que traballa na Unidade de Coidados Intensivos (UCI) para adultos do Hospital Universitario de Wales, na cidade de Cardiff.