Podcasts about Musek

Kee Summer ouni Kolla? Den alternative Musek- a Konschtfestival war 10 Joer laang, als Openair, am Stengeforter Bësch, dunn am Park zu Miersch ... 2025 war laang net gewosst, op de Kolla-Kollektiv eng adaptéiert Plaz fir d'Evenement fannen an accordéiert kréie géif. Mee dach: dëse Weekend, also vum 5. bis de 7. September, ass de Kolla am Hollerecher Schluechthaus! Dir kennt eisen 100,7-Soundatlas? An dëser Rubrik presentéiere mir Iech eenzel Geräischer, huele se ausenaner, hannerfroen se. Wat dat mam Kolla ze dinn huet? Dat héiert Dir vum Kerstin Thalau a vum Joé Birchen.

E Concert ouni Musek? Dat klengt net logesch, an dach ass et méiglech. Den John Cage hat eng grouss Faszinatioun fir d'Stëll a Musek ouni vill Téin. Säi Wierk "4'33" ass revolutionär, well keng eenzeg Nout ze héieren ass. D'Première war den 29. August 1952 bei Woodstock am US-amerikanesche Staat New York. De Publikum war entsat. Den John Cage hat eppes gemaach, wat virdrun nach keen esou gemaach hat. Et ass e Wierk, bei deem d'Museker:inne meeschtens einfach nëmmen op hire Still sëtze mat hiren Instrumenter, a keng eenzeg Nout spillen. Dem Cage seng Iddi war et och, all kleng Beweegung aus dem Publikum ze héieren, zum Beispill wann een néitscht. Et geet drëm, datt een sech bewosst gëtt iwwert all aner Geräischer am Concertssall. Einfach gesot: et ass experimentell Musek. De Joachim Fontaine verréit méi.

Et ass schonn erstaunlech, wéi d'Zäit verschidde Bands an d'Hand spillt an aneren net. Wien hätt zum Beispill geduecht, Mëtt den 90er, wéi ee Kult eemol ronderëm d'Deftones entstoe géif, déi iergendwann am neie Joerdausend de Status vu Radiohead vum Metal kruten. Ugefaangen huet d'Band ronderëm de charismateschen Chino Moreno nämlech als Nu Metal Band, hat dowéinst, Zeitgeist oblige a wéi zum Beispill och Limp Bizkit, fir eng vun de Bands, mat deenen d'Zäit et net esou gutt gemengt hat, en DJ an huet haart an déif gestëmmte Gittaren a Bass mat Gebläers, Spriechgesang/Rap a Beats verbonnen. “Private music” resuméiert an 42 Minutten, wat Deftones an de leschten 30 Joer zu esou enger markanter Band gemaach huet: eng Band, déi d'Grenze vun deem, wat haart Musek kann, nei definéiert huet.

Op Initiativ vu fënnef Gemenge laanscht d'Atert, nämlech Attert (an der Belsch), Biekerech, Ell, Préizerdaul a Réiden ginn d'Musique dans la Vallée organiséiert. Eng Rees an d'Kläng vun der barocker Musek, d'Vertounung vun der ganzer Wierk-Panoplie vu verschiddenste Komponisten oder musikalesch Entdeckungsreesen an déi geeschtlech a weltlech Kultur aus Osteuropa. An och wann een d'Frënn vun der klassescher Musek uviséiert, stinn an dëser Editioun d'Famillen am Vierdergrond.

Haut geet et ëm grouss Nimm aus Hollywood déi net nëmmen um roude Teppech, mee och anescht en Zeeche setzen: de Leonardo DiCaprio mat Milliounenhëllef fir d'Ëmwelt, de Morgan Freeman mat engem Appell un d'Politik an de Steve Martin, deen als Komiker, Schauspiller a Banjo-Spiller souguer Grammys ofgeraumt huet. Eng Mëschung aus Klima, Politik a Musek an dat alles mat engem Hauch u Glitzer.

D‘Lëtzebuerger Musekszeen trauert ëm de Chris Belardi, deen zanter Enn der 90er Joren an der Lëtzebuerger Musekszeen een nohaltegen Impakt hannerlooss huet. De Multi-Instrumentalist a Member vun der Téitenger Musek, dem Gebridderduo The Carp‘s, Something Under My Bed a Chief Marts, war eisem Museksredakter Marc Clement wuel bekannt. Hien huet e puer Erënnerungen un de Chris Belardi preparéiert.

Kuzguncuk ass ee ganz historesche Quartier op der asiatescher Säit vun Istanbul. Do hat d'Pianistin a Komponistin Büşra Kayıkçı laang hire Studio mat hirem Piano an hiren Opnamgeräter. Si kënnt vun Istanbul an huet och do studéiert. Net nëmme klassesch Musek, mee och Innenarchitektur. Fir si beaflosst dat eent dat anert. Mat hiren eenzegaartegen a ganz intimen Improvisatiouns-Concerte begeeschtert si Leit ronderëm d'ganz Welt. De 17. August spillt si hiren alleréischte Concert hei am Land an de Rotonden. Wéi si Innenarchitektur an hir Musek verbënnt, an ob si deemnächst en neien Album erausbréngt, ënner anerem dat verréit déi 34-Joer jonk Pianistin am Gespréich mam Marie Schockmel.

All Donneschdeg um 19 Auer gëtt et am Rainbow Center an der Stad eng Chouerprouf: De Queer Choir Luxembourg ass en inklusive Chouer, dee vu Rosa Lëtzebuerg ënnerstëtzt gëtt. Dëse ganzen August gëtt de Fokus op déi spirituell Musek gesat. De Chouer séngt nämlech all Joer am Kader vun der interreliéiser Zeremonie vu Rosa Lëtzebuerg, esou wéi wärend der Chrëschtzäit. Am Gespréich mam Marie Trussart hunn déi zwee Dirigenten, de Gil Silva an de Paul Feitler erkläert, firwat esou e Projet immens wichteg fir hir Communautéit ass an och wou ee si fir d'nächst ka lauschtere goen. Mee fir d'éischt kläre mir d'Basics: firwat steet de Rainbow Center a wat ass eigentlech e Queer Choir?

D‘Congés annulés, de Summer-Museksfestival vun de Rotonden ass a vollem Schwong. Haut den Owend, 8.8., trëfft do d‘Energie vun enger Rave op déi kommunal Erfarung vun enger Theaterperformance, mat Kabeauché, engem Kënschtler aus dem Kenia, mat senger Band. Firwat datt d‘Abanne vum Public him esou wichteg ass a wat seng Musek soss nach eenzegaarteg mécht, beschwätzt de Marc Clement mam Kabeaushé live an de Rotonden.

D'Hannah Ida spillt déi Kéier net nëmme mat hirer Stëmm, hirer Gittar an hirer aussergewéinlecher Organell, mee och mat engem Cellist op der Bün. Elektronesch goufen et eng ganz Rei Neierungen un der Live-Show, an ... et ass fuschnei Musek am Set. Ee klengt Gespréich, ënner anerem iwwer d'Freed an de Rotonden als Headliner ze spillen

D'Siemens AG an d'Bayresch Staatsoper hunn de Klang vum Nationaltheater zu München digitaliséiert. Entstanen ass also een digitalen Zwilling vum Nationaltheater. D'Uerdnung vun Orchesteren oder verschidde Konfiguratioune vum Sall kënnen esou an engem 3D-Modell simuléiert ginn. Dëst soll et Museker:innen an Dirigenten an Dirigentinnen erlaben, d'Klangwierkung scho virun der éischter Prouf, beispillsweis doheem, auszeprobéieren. Esou ass et och méiglech eenzel Sëtzplazen am Nationaltheater vum Publikum auszeprobéieren an ze kucken, wéi den Orchester vun der jeeweileger Sëtzpositioun am Sall kléngt.

Leschte Freideg den Owend war an de Rotonden de Startschoss fir de Museksfestival Congés annulés. Et geet Schlag op Schlag mat de Concerte bis Enn August an och haut den Owend (30.7.) gëtt et zu Bouneweg live Musek, dës Kéier net aus Kanada, de UK oder Uganda, mee vun hei. Et spillen déi Lëtzebuerger Math-Rocker The Cookie Jar Complot, an dat mat neie Songs a mat Special Guest: d'Gewënnerin vum Screaming Fields dëst Joer,d' Emeraude Stone, spillt mat. Mir hate scho virun engem Mount op dee Concert agelueden an haten all d‘Museker:innen zesummen am Studio. De Marc Clement huet d‘Gespréich geleet.

De Mikis Theodorakis gëtt op engem 29. Juli 1925 gebuer. Haut ass hien als Komponist, Schrëftsteller a Politiker bekannt. Iwwer 96 Joer, an deenen de Museker Mikis Theodorakis lieft, entstinn iwwer 1.000 Kompositiounen an 1964 duerch de Film “Alexis Sorbas”, de Museksgenre Sirtaki. Mat senger Kompositioun gëtt hien zu engem weltwäite Phenomeen. De Mikis Theodorakis engagéiert sech net just an der Musek, mee och fir d'Fräiheete vun all eenzelen. Hie setzt sech géint Drogen, d'Nationalsozialisten an den Terrorismus an a kämpft fir d'Gerechtegkeet op Landesniveau, wéi och fir d'Kulturzeen. De Mikis Theodorakis fleegt och eng besonnesch Relatioun zu Lëtzebuerg. An deem Kader loosse mir dem Mikis Theodorakis säi Liewe Revue passéieren.

Virun zwee Joer war de Skallsjö Sommarorkester schonn eemol op Besuch zu Lëtzebuerg. Dëse Freideg, de 25. Juli zitt et si da fir ee weidere Concert an de Park vun der Villa Vauban fir ee Concert de midi. De Skallsjö Sommarorkester ass eng schweedesch Formatioun, déi sech 2013 gegrënnt huet. Nach haut trieden déi haaptberufflech Profimuseker:innen all Summer bei enger Tournée duerch Europa op, bäi där si weise wëllen, wéi ënnerhalsam klassesch Musek ka sinn. Egal ob beim Eraussiche vum Programm oder der Location vum Concertsevent. Si soen: "Museker musse schaffen a sech ëmmer nees Neies ausdenken, fir d'Leit ze erreechen. Wann dat net geléngt, ass et de Museker:innen hir Schold."

Den 20. Juli kann een e ganz besonnesche Velostuer maachen. De Start ass op der Mierscher Gare, an a puer Etappe fiert een op Schëndels, Mamer, Kohler a Péiteng. Bei all Statioun kann een e Concert mat Musek vum Johann Sebastian Bach lauschteren. De Rosch Mirkes, President vun der Bach-Vereenegung Lëtzebuerg huet mam Marie Trussart iwwer de Programm geschwat an ënner anerem verroden, wéi de Projet entstanen ass.

Wéi de Museker Pascal vu Wooltz virun zwee Deeg mam Auto déidlech verongléckt ass, war et wéi wann eng Presenz, op déi ee bis dohinner konnt zielen, einfach ewechgeholl gi wier. Séier huet d'Nouvelle den Tour gemaach, Kolleegen hunn dee Frënd vermësst, deen hinnen déi éischt Gittar geléint hat, anerer hate seng häerzzerräissend Versioun vun “Time of Your Life” am Ouer. Esou munch een huet sech drun erënnert, wéi e vum Pascal Alff, wéi hie mam biergerlechen Numm geheescht huet, mat deem oder dësem a Kontakt bruecht gi war, a wéi hien ëmmer hëllefsbereet war an oppen. Mënschen zesummenzebréngen, besonnesch ronderëm d'Musek, där hie säin eegene Stempel opgesat huet. Mat senger Band Weakonstruction oder Solo, mat der akustescher Gittar an e bësse Schellem, huet hien zu Lëtzebuerg d'Geschicht vun der Punkmusek mat- a weider geschriwwen a war als Member vum Organisatiounskommittee vum Festival Kein Bock auf Nazis zu Kusel. Och politesch aktiv, esou laang et mat Musek ze dinn hat. Méi Punk wéi mir alleguer, sote seng Frënn, an ee friddlechen nach dobäi. Dat huet hien 2023 dozou beweegt, sech bei de Lénke fir d'Parlamentswalen opzesetzen. No 20 Joer Musekmaachen an nëmmen 42 Joer op der Äerd, bleift säin Esprit héichzehalen a sech drun ze gewinnen, säi Gesiicht leider net méi op Concerten ze gesinn. D'Musek awer huet eng Manéier, een onstierflech ze maachen.

Yona a Mäna heeschen déi zwee lescht Participante vum Screaming Fields Festival, déi mir Iech dës Woch virstellen. De Festival-slash-Concours ass muer, Samschdeg, 5.7. an der Rockhal vu 6 Auer un. A fir d'Entdecke vu jonke Lëtzebuerger Talenter nëmmen net ze verpassen, huet de Marc Clement mat hinnen iwwer hir Musek an d'Participatioun um Festival geschwat. Ëmmerhi gëtt et ee Karriärs-Accompagnement vum Rocklab ze gewannen – an d'Geleeënheet, op der grousser Rockhalbün opzetrieden, wat fir déi meescht ee “First” ass. Als éischt huet de Marc mam Mäna geschwat, an um Enn déi viregt Gewënnerin Blue-Ish no hirer Erfarung mam Coaching gefrot.

De Chouer vun der uni.lu organiséiert ee Concert de 6. Juli an der Mäerteskierch zu Diddeleng. An deem Kader kollaboréiert den uni.lu Chouer mam Chouer vun der Universität des Saarlandes. Am Ganze wäerte méi wéi 100 Stëmme zesumme sangen, zesumme mam Orchester Con Nov'arco. Um Programm steet A capella Musek an och zesumme mat Orchester. "Northern Delights" ass de Motto vum Concert, an dofir gëtt et Musek vu Komponisten déi aus dem “Norde” kommen, ënnert anerem vum Karl Jenkins, Ola Gjeilo an Edvard Grieg. Den Entrée ass fräi, an eng Donatioun ass erwënscht. Den Thomas Gareau, den Dirigent a musikaleschen Direkter vum uni.lu Chouer, verréit am Gespréich mam Marie Schockmel méi.

Wéi kritt ee méi wéi Dausend Kanner dozou zesummen ze sangen? Op déi Fro huet d'Martina Maenichetti méi wéi eng Äntwert. Si ass Musekerin a schafft schonn zanter Joren als Pädagogin an der Philharmonie a gëtt hir Passioun fir d'Musek dagdeeglech un déi méi Jonk weider. Bei hirem neiste Projet Lëtz Sang hu sech 1.200 Kanner am grousse Sall an der Philharmonie getraff, fir zesumme mat de Lëtzebuerger Philharmoniker an der Sängerin Tali ze sangen. Wéi dat Ganzt verlaf ass, wat dee gréissten Challenge war, an ob esou änlech Eventer scho fir d'Zukunft geplangt sinn, alles dat verréit d'Martina Menichetti am Gespréich mam Marie Schockmel.

Zesumme mat der Sängerin Emeraude huet d'Lëtzebuerger Band e Cover vum Klassiker “Voyage voyage” produzéiert.

Vum 28. Juni bis de 6. Juli ass zu Veianen déi 7. Editioun vum Festival Alter Musik. D'Veianer Buerg gëtt fir eng Woch an eng Bün fir al Musek ëmgewandelt. D'Marie Trussart huet mam Cembalist a Organisator Rosch Mirkes iwwer de Programm geschwat an hien huet ënner anerem verroden, firwat de Festival mëttlerweil keng Erausfuerderung méi representéiert.

D'Museker:inne vum Lëtzebuerger Ensembel fir nei Musek United Instruments of Lucilin maachen aktuell eng Residenz an der Fondation Valentiny zu Rëmerschen. Den 29. Juni proposéiere si e Concertsdag ganz ronderëm de Motto Musique + Equilibre. Um Programm steet Nei Musek vu ville verschiddene Komponisten. Am Mëttelpunkt steet den John Cage, ee vun de berüümtste Komponisten aus dem 20. Joerhonnert. Den Olivier Sliepen ass Saxophonist bei Lucilin an ee grousse Fan vum Cage a senger Musek. Wann hien d'Chance gehat hätt, den Amerikaner kennenzeléieren, da wier hie gär zesumme mat him an de Bësch spadséiere gaangen, Champignone sammelen a si hätten duerno zesummen eng Champignonszopp gekacht. Dat a villes méi verréit de Saxophonist dem Marie Schockmel am Gespréich.

Den 29. Juni spille Museker:inne Wierker vu Brahms, Zemlinsky a Pavel Haas. Deels si manner populär Wierker dobäi, déi een awer haut net vergiesse soll, mengt de Leo Halsdorf am opus 100,7 Interview. Ob Concerte spillen oder programméiere méi ee grousse Challenge ass, och dat verzielt hien am Gespréich mam Lex Kauffmann.

5 Gemengen aus der Vallée de l'Attert tëschent der Belsch a Lëtzebuerg gi sech fir déi mëttlerweil 27. Editioun Rendez-vous beim Festival Musique dans la Vallée. Rezent gouf de Programm aus der Editioun 2025 presentéiert. Ee Grond fir de Lex Kauffmann mat der Directrice Sylvie Hubert iwwer d'Programmatioun ze schwätzen.

Das Radial ass de Museksprojet vun engem Schauspiller, dem Max Thommes, deen an Däitschland an zu Lëtzebuerg bei Theater an Tëlee schafft. D'Experiment huet ugefaangen, wéi de Max Protagonist war vun engem Film iwwer d'Intrusioun vu Kommunikatiounstechnologien an eist Liewen an iwwer Datenobsessioun. D'Live-Performancë vun Das Radial ware vun Ufank un intensiv, rosen, energesch, freedeg, voller performativer Elementer. Mat der Zäit huet sech den Theemekrees vun de Stécker erweidert. Séier Moud, Konsumdenken, politescht Säbelrasselen, de Rietsruck an Däitschland, méi Narzissmus a Gefillskeelt - et ass kee rosat Bild, deen Das Radial vun der Gesellschaft zeechent a mat 80er New-Wave-Klängpassend ënnermoolt. Fir déi nei Das Radial Plack - en Album - koum nei Musek, wéi den Titel “Tür-Politik”, bei déi bekannte Banger bäi, déi an deene leschte Joren erauskoumen an ëmmer Fudder fir de Käppche matgeliwwert hunn.

D‘Lëtzebuerger Jazz-Rockgrupp Benoit Martiny Band huet den 8. Juni hir éischt Tour a Groussbritannien ugefaangen. Firwat dës Concerten dem Benoît Martiny esou vill bedeiten a wéi seng Musek an England ukënnt, dat erzielt Iech d‘Claire Barthelemy.

An der Kultur zu Lëtzebuerg sinn d'Frae nach ëmmer ënnerrepresentéiert. Dat weist den Etat des lieux, deen de CID | Fraen an Gender wärend der Saison 2022-23 gemaach huet. D'Resultat ass erschreckend. Knapp ee Véierel vun de Plazen am kulturelle Secteur si vu Frae besat. An der klassescher Musek sinn dës Zuelen esouguer nach méi extreem: 80,9 Prozent vun de Plaze si vu Männer besat. D'Marie Trussart schwätzt mat Fraen aus dem kulturellen a feministesche Beräich iwwer dës Situatioun an iwwer hir perséinlech Erfarungen. Participanteën: • Alena Baeva, Geiistin • Chloé van Soeterstède, Dirigentin • Claire Schadeck, Chargée de projets CID | Fraen an Gender • Mariana Florea, Presidentin The Network Musek: • Helen Buchholz (1877-1953): Nocturno Marco Kraus, Piano • Lou Koster (1889-1973): Toute vie Orchestre Estro Armonico Luxembourg Jonathan Kaell, Direktioun • Catherine Kontz (geb. 1976): Murmuration Cathy Krier (Piano)

Op Initiativ vun der Ariel Wagner-Parker ginn um Lampertsbierg mat insgesamt dräi Chéier déi bekanntste Melodië vum Mikis Theodorakis opgeféiert. Dräi Chéier trieden den 11. Juni 2025 zesummen am Tramsschapp op. Dat sinn den Ambitus, d'Chorale vun der Communauté hellénique a Membere vun der Associatioun Sequenda. De Grond ass dem griichesche Komponist Mikis Theodorakis säin 100.Gebuertsdag, deen dëst Joer gefeiert gëtt. D'Ariel Wagner-Parker huet dëse Concert initiéiert. Domat schléisst si u Concerten un, déi hire Mann, de Guy Wagner (Auteur vum Buch "Mikis Theodorakis, une vie pour la Grèce" a fréieren 100,7-Mataarbechter mat enger eegener Serie iwwer de Mikis Theodorakis), zënter den 1970er Jore mat der Musek vum griichesche Komponist programméiert huet. Nieft dem Concertsprogramm huet d'Ariel Wagner-Parker dem Christophe Mirkes am Gespréich vill biographesch Detailer iwwer de Mikis Theodorakis verroden.

An der Philharmonie gëtt et net nëmmen d'Lëtzebuerger Philharmoniker, mee och d'Orchestra Academy. Dat ass eng Ausbildungsinstitutioun an där jonk Musekerinnen a Museker aus der ganzer Welt intensiv forméiert gi fir eng Karriär als zukünfteg Orchestermuseker:innen unzetrieden. Net nëmmen an der Philharmonie gëtt et esou eng Orchesterakadmie, mee vill aner Concertshaiser an Europa hunn dat och. Den 23. Mee hunn sech all déi Akademië fir ee Konferenzdag an der Philharmonie getraff. D'Haaptfro war: Wat solle Museker vu muer kënnen a wat solle mir hinnen haut bäibréngen? D'Akademie vum BR (Bayerischer Rundfunk) war och do, vertrueden duerch d'Luisa Fischer aus der Geschäftsführung. Fir si war et déi éischt Konferenz mat anere Responsabele vun Orchesterakadmien aus Europa. Zanter 25 Joer scho ginn et an der BR-Akademie ëmmer 18 Akademisten, déi fir 2 Joer ausgebilt ginn. Nieft der Musek spillen awer och den interkulturellen Austausch an d'kierperlech a mental Gesondheet eng grouss Roll. Am Gespréich mam Marie Schockmel verréit d'Luisa Fischer méi iwwer d'Zesummenaarbecht vun den Akademien, a wéi den Alldag vun engem Akademist ausgesäit, a wat d'Roll vun den Akademien am Fong ass.

Een Theaterstéck, dat wéineg Succès hat, mee duerch dem Georges Bizet seng Musek immens gutt beim Public ukënnt: dat ass déi kuerz Zesummefaassung vun der bekannter Orchestersuite “Arlésienne”. Am Géigesaz huet d'Kompositioun an d'Oper “Carmen” bei hirer Uropféierung esou guer net iwwerzeege kënnen. An ass dach haut eng vun de meeschtgespillten Operen iwwerhaapt. Jo, de Georges Bizet huet ee ganz interessanten CV virzeweisen. Ee Grond fir am Kader vu sengem 150. Doudesdag dëst besonnescht Liewe Revue passéieren ze loossen. Eng Recherche vum Jean Thill, am Gespréich mam Lex Kauffmann vum opus 100,7.

Fir d'Lëtzebuerger Philharmoniker stoung elo ee grousse Wiessel un. De Gustavo Gimeno hält no 10 Joer als Chefdirigent op, an de leschte Freide war säi leschte Concert an där Roll an der Philharmonie. Dat markéiert d'Enn vun enger grousser Era, iwwert déi den Alain Steffen elo e Buch erausbruecht huet. “Luxembourg Philharmonic. Das Zukunftsorchester” heescht dat, an doranner zeechent de Lëtzebuerger Schrëftsteller d'Visioun an de Parcours vun de Lëtzebuerger Philharmoniker. Net nëmmen seng eege Wieder kann een doranner liesen, mee och déi vu sëllege Personnagen aus der Welt vun der klassescher Musek. Een Héichpunkt am Buch ass fir den Alain Steffen seng Begéinung mam Pierre Cao. Den Alain Steffen huet hien deemools als jonken Dirigent kenne geléiert, an huet seng Entwécklung ganz genee matkritt. Méi Detailer iwwert säi Buch verréit den Alain Steffen am Gespréich mam Marie Schockmel, e puer Deeg virum leschte Concert mam Gustavo Gimeno als Chefdirigent.

"Luxemburg sucht den Superstar", awer fir zeitgenëssesch Musek. Dat erwaart de Public am Théâtre National du Luxembourg, kuerz TNL. D'Stéck gouf vum Komponist Claude Lenners a vum Regisseur Frank Hoffmann konzipéiert, mee wann een d'Beschreiwung vum Stéck liest, ass een sech net sécher. Ass et en Theaterstéck, eng Tëléemissioun oder villäicht e bësse vun deenen zwee? Ënner anerem dat, probéiert d'Marie Trussart am Gespréich mam Claude Lenners a mam Frank Hoffmann erauszefannen. 

Vu senger Konscht kënnen ze liewen – de groussen Dram vun all Kënschtler erweist sech zu Lëtzebuerg zumindest um Pabeier als méiglech: 107 Leit hunn hei am Land de Statut d'artistes, 268 Leit dee vum Intermittent du spectacle. An der Praxis gesäit d'Saach allerdéngs e bësse méi schwiereg aus, dat net just zu Lëtzebuerg, ma och am Ausland. Am Frankräich ass beispillsweis de Prozentsaz vu Schrëftsteller:innen, déi vun hirem literaresche Schreiwen eleng liewe kënnen, zimmlech geréng. Virun e bësse méi wéi engem Mount huet een Artikel an der Luxembourg Times, an deem zwee Kulturschafender iwwert de Seeldanz tëschent Broutjob a Konscht geschwat hunn, fir ee (klenge) Shitstorm gesuergt, dat well de Journalist op eng liicht naiv Manéier e Portrait gezeechent huet vu Leit, déi daagsiwwer schaffen an nuets kreativ ginn, ouni ze hannerfroen, wéi et kéint sinn, dass deels renomméiert Kulturschafend et nawell net packen, vun hirer Musek, hirer Konscht, hirem Schreiwen, bref vun hirer Aarbecht ze liewen. Fir e bësse mat där Manéier, de kreative Beruff ze verklären, opzeraumen, hunn d'Kerstin Thalau an de Jeff Schinker haut véier Leit agelueden, déi mat eis iwwert d'Erausfuerderung vum onofhängege Schaffen diskutéieren: d'Kënschtlerin Julie Wagener, déi transdisziplinaresch Kënschtlerin Clio van Aerde, de Museker Tun Biever an de Schrëftsteller Antoine Pohu.

"Ein musikalisches Feuerwerk zum Europatag" - dat ass de Motto vum Concert, deen Ad Libitum de 9. Mee Moies an der Kierch zu Mäerzeg spille wäert. De Lëtzebuerger Ensembel fir Barockmusek setzt sech zesummen aus 40 Museker:innen, vun deenen ee groussen Deel hei mat dobäi ass. Um Programm steet Musek vu fënnef Komponisten an am Fokus ass dem Händel seng weltberüümte Freedefeiermusek. Nieft anere groussen Nimm wéi Vivaldi an Telemann stinn och zwee manner bekannt Komponisten op der Affiche. Een dovunner ass de Benedikt Anton Aufschnaiter, deem seng "Serenada della pace" gespillt gëtt. Am grousse Ganzen ass et e Concert, deen am Zeeche vum Fridde steet, well dat jo d'Haaptiddi hannert dem Europadag ass, wéi de Rosch Mirkes verréit. De Leeder vun Ad Libitum, erzielt méi am Gespréich mam Marie Schockmel. 

"Ein musikalisches Feuerwerk zum Europatag" - dat ass de Motto vum Concert, deen Ad Libitum de 9. Mee Moies an der Kierch zu Mäerzeg spille wäert. De Lëtzebuerger Ensembel fir Barockmusek setzt sech zesummen aus 40 Museker:innen, vun deenen ee groussen Deel hei mat dobäi ass. Um Programm steet Musek vu fënnef Komponisten an am Fokus ass dem Händel seng weltberüümte Freedefeiermusek. Nieft anere groussen Nimm wéi Vivaldi an Telemann stinn och zwee manner bekannt Komponisten op der Affiche. Een dovunner ass de Benedikt Anton Aufschnaiter, deem seng "Serenada della pace" gespillt gëtt. Am grousse Ganzen ass et e Concert, deen am Zeeche vum Fridde steet, well dat jo d'Haaptiddi hannert dem Europadag ass, wéi de Rosch Mirkes verréit. De Leeder vun Ad Libitum, erzielt méi am Gespréich mam Marie Schockmel. 

Haut de Moien (05.05.) huet d'Philharmonie hir nei Saison virgestallt. De Programm baséiert op 4 Grondprinzipien: “Leading Figures”, “Une saison inédite pour notre orchestre”, “Les récits du Monde” an “Openness.Collaboration.”. Deemno stoungen déi grouss Klassikstaren am Vierdergrond, d'Lëtzebuerger Philharmoniker an enger Saison ouni Chefdirigent, Musek a Kulturen aus aller Welt, a Collaboratioune mat educativen Aktivitéiten. E Begrëff, dee wärend der Pressekonferenz och ëmmer nees opgetaucht ass, war d'Accessibilitéit. Wat dat genee heescht, erkläert de Christophe Mirkes am Gespréich mam Jeff Schinker.

Haut de Moien (05.05.) huet d'Philharmonie hir nei Saison virgestallt. De Programm baséiert op 4 Grondprinzipien: “Leading Figures”, “Une saison inédite pour notre orchestre”, “Les récits du Monde” an “Openness.Collaboration.”. Deemno stoungen déi grouss Klassikstaren am Vierdergrond, d'Lëtzebuerger Philharmoniker an enger Saison ouni Chefdirigent, Musek a Kulturen aus aller Welt, a Collaboratioune mat educativen Aktivitéiten. E Begrëff, dee wärend der Pressekonferenz och ëmmer nees opgetaucht ass, war d'Accessibilitéit. Wat dat genee heescht, erkläert de Christophe Mirkes am Gespréich mam Jeff Schinker.

"Dat bedeit puer Freed, well mir ganz vill Musek zesummen erlieft hunn", äentwert d'Maria Miteva op d'Fro wat déi 10 Joer Ars Nova Lux fir si bedeiten. Bei deem Ensembel ass si net nëmmen d'Flüttistin a Leederin, mee si huet en och virun 10 Joer zesumme mat der Komponistin Albena Petrovic an d'Liewe geruff. Am Fokus vun hire Concerte steet zanter dem Ufank Musek vu Lëtzebuerger Komponist:innen. De Samschden 3. Mee spillen si e Concert an der Philharmonie, mam Motto "Ways". Do geet et drëms, Kulturen zesummen ze bréngen. Dofir sti Wierker aus Japan, Bulgarien, Kroatien a Lëtzebuerg op der Affiche. D'Maria Miteva erzielt am Gespréich mam Marie Schockmel méi.

"Dat bedeit puer Freed, well mir ganz vill Musek zesummen erlieft hunn", äentwert d'Maria Miteva op d'Fro wat déi 10 Joer Ars Nova Lux fir si bedeiten. Bei deem Ensembel ass si net nëmmen d'Flüttistin a Leederin, mee si huet en och virun 10 Joer zesumme mat der Komponistin Albena Petrovic an d'Liewe geruff. Am Fokus vun hire Concerte steet zanter dem Ufank Musek vu Lëtzebuerger Komponist:innen. De Samschden 3. Mee spillen si e Concert an der Philharmonie, mam Motto "Ways". Do geet et drëms, Kulturen zesummen ze bréngen. Dofir sti Wierker aus Japan, Bulgarien, Kroatien a Lëtzebuerg op der Affiche. D'Maria Miteva erzielt am Gespréich mam Marie Schockmel méi.

E Sonndeg um 11 Auer iwwerdroen de radio 100,7 an den opus 100,7 déi 7. Matinée vun der Deutschen Radio Philharmonie live aus der Congresshalle zu Saarbrécken. Ënner dem Titel “Friedensvisionen” dirigéiert den dänesche Museker Michael Schønwandt den Orchester mam Edward Elgar senger éischter Sinfonie an dem Benjamin Britten sengem Pianosconcerto a Ré Majeur. Solist ass de Steven Osborne. Am Viraus vum Concert huet sech d'SR-Kultur-Museksjournalistin Gabi Szarvas mam Michael Schønwandt getraff, fir iwwer de Programm, déi perséinlech Bedeitung vun der englescher Musek fir den Dirigent an och den Theema Fridden ze schwätzen.

E Sonndeg um 11 Auer iwwerdroen de radio 100,7 an den opus 100,7 déi 7. Matinée vun der Deutschen Radio Philharmonie live aus der Congresshalle zu Saarbrécken. Ënner dem Titel “Friedensvisionen” dirigéiert den dänesche Museker Michael Schønwandt den Orchester mam Edward Elgar senger éischter Sinfonie an dem Benjamin Britten sengem Pianosconcerto a Ré Majeur. Solist ass de Steven Osborne. Am Viraus vum Concert huet sech d'SR-Kultur-Museksjournalistin Gabi Szarvas mam Michael Schønwandt getraff, fir iwwer de Programm, déi perséinlech Bedeitung vun der englescher Musek fir den Dirigent an och den Theema Fridden ze schwätzen.

Mat Musique Plus initiéiert United Instruments of Lucilin een interaktive Projet, bei deem et méi wéi nëmmen ëm Musek geet. Tëschent Abrëll a Juli gëtt op fënnef Weekender d'Musek nämlech mat anere Beräicher kombinéiert: Architektur, Literatur an och den eegene Sënner. Wéi dat Konzept a Realitéit ausgesäit a wat Iesse mat zäitgenëssescher Musek ze dinn huet, doriwwer schwätzen de Guy Frisch an Olivier Sliepen mam Lex Kauffmann.

De Samschdeg, de 26. Abrëll, erkléngen am Escher Conservatoire déi bekannte Melodien aus dem Bernstein senger "Westside Story" an aus dem "Candide". Vum Gershwin ënner anerem "An American in Paris". Et ass Musek, an déi een déif muss andauche fir se ze verstoen, well se dacks op Rhythme baséiert, déi net aus eisen europäesche Kulture kommen. Et ass och genee dës kulturell Diversitéit, déi déi amerikanesch Musek aus dem 20.Joerhonnert esou interessant mécht, fënnt d'Pianistin Lina Druart. De Melting Pot New York ass och dat éischt un dat si muss denken, wa si un amerikanesch Musek denkt, wéi d'Lina Druat am Gespréich mam Christophe Mirkes verréit.

Um Piano am Stater Conservatoire huet dem Anselme Pau säi musikalesche Parcours ugefaangen. Zu San Francisco huet hien da Film studéiert, an duerno ass hie quasi aus Zoufall an de Beräich vun der Filmkompositioun gelant. Datt Musek eppes bei anere Leit bewierkt, huet de Lëtzebuerger Komponist schonn am Alter vun 9 Joer gemierkt. Elo huet hien en neien Album erausbruecht, mat 26 Kompositiounen aus verschiddene Filmer. Den Titel “Hidden Scores” passt zu 100 Prozent och op hien, well hien ëmmer hanner der Musek ass. An engem Gespréich mam Marie Schockmel huet den Anselme Pau ënner anerem méi iwwer seng Musek fir Documentairen, Filmer a Reklamme verroden.

D'Amelia Baker - Kënschtlernumm Cinder Well - ass eng amerikanesch Singer-Songwriterin. Hir musikalesch Ufäng sinn op den Albume vun der kalifornescher Anarcho-Folk-Band Blackbird Raum ze héieren. Fir hiren Interessi un traditioneller Musek ze verdéiwen ass si an Irland geplënnert, wou hire Solo-Folk-Projet Cinder Well gebuer ass. Ënner der Woch huet si am Ratelach zu Esch ee Concert gespillt. Den Nicolas Calmes huet hir nom Concert e puer Froe gestallt.

"C'est vraiment une volonté aussi de montrer que la musique contemporaine n'est pas que avantgardiste" - dat seet de Pierre Fontenelle iwwer d'Musek, déi hien den 13. Abrëll um 16:00 a sengem Solo-Recital zu Bieckerech an der Kierch spillt. Et ass e variéierte Programm, bei deem dee jonken Cellist Pierre Fontenelle dem Publikum d'Méiglechkeete vu sengem Instrument an deene verschiddenste Stiler presentéiert. Virun allem gëtt et och zäitgenëssesch weiblech Komponistinnen ze entdecken, mat deenen hien net nëmmen a Kontakt steet, mee heiansdo och op der Bün. Am 100,7-Interview mam Christophe Mirkes verréit de Pierre Fontenelle ënner anerem wéi hien dës Komponistinnen entdeckt a kennegeléiert huet.

Eng Musek fir an iwwer Schildkröte komponéieren? Dat huet d'Catherine Kontz elo gemaach. Net einfach esou, mee fir den Internationale Klarinetteconcours, deen den 11. Abrëll am Kader vum Klenge Maarnecher Festival am Cube 521 zu Maarnech ass. Wéi den Titel "Tortoise: For Mango and Teal" et scho verréit, huet d'Lëtzebuerger Komponistin dëst Wierk fir hir eegen zwou Schildkröte geschriwwen. D'Mango an d'Teal sinn dräi Joer al an hu verschidde Charakteren, déi d'Catherine Kontz och an der Musek verkierpert. Am Gespréich mam Marie Schockmel huet si méi verroden.

E Klassiker an der Modernitéit, e Rebell - esou beschreift de Jury vun den International Classical Music Awards (ICMA) de Komponist Christoph Ehrenfellner, deen dëst Joer de Composer Award gewonnen huet. Fir de Christoph Ehrenfellner ass et eng bedeitend international Unerkennung, wéi hie selwer seet - grad wéi hien och confirméiert, als Komponist een Non-Konformist ze sinn. De Guy Engels huet sech de 19. Mäerz 2025 mam Komponist zu Düsseldorf virun der Präisiwwerreechung vun den International Classical Music Awards ënnerhalen, ënner anerem iwwer seng non-konformistesch Manéier Musek ze schreiwen.

Méi a méi Audiophiller versammelen sech neierdéngs a Baren, déi a Premium Hifi-Ausrüstung investéiert hunn, fir Vinylen ze spillen - an deenen hire Klang optimal am Raum ze diffuséieren. Ee Phenomeen, deen aus Japan an Europa eriwwergeschwappt ass.

Eis Sujete vun haut: Wanterfeeling zu Suessem, Resumé vum Background, Deulux-Laf zu Laser a Musek.