NDR 90,3 - Wi snackt platt

Bi "Wi snackt Platt" geiht dat dütmal üm twee plattdüütsche Ledermaker, de in'e tokamen Week bi uns in Hamborg to beleven sünd: an'n 26. Februor, avends Klock 6, speelt de 30johrige Lennon von Seht en Kunzert in'n Lichtwarksaal vun'e Carl-Toepfer-Stiften. Un an'n Freedag, den 27. Februor, avends Klock 8, steiht en vun de gröttsten Platt-Poeten, de wi hebbt, op'e Bühn vun'e KunstKaat in Volksdörp: Helmut Debus. Wi hebbt mit Lennon vun Seht över sienen Optritt un siene Musik snackt - un wi maakt en lütte musikalsche Reis dör dat Leven vun Helmut Debus. 50 Johr is dat nu her, dat sien eerstet Album "Wo ik herkam" rutkamen is. Dorto geiht dat ok noch üm uns plattdüütsche Geschichten-Akschoon „Vertell doch mal“, üm Kuddelmuddel – un en plattdüütsche Geschicht hebbt wi ok noch för Jo.

Bi "Wi snackt Platt" geiht dat dütmal üm en grotet Grönkohleten in Japan. Eenmal in't Johr draapt sik in Tokio mehr as 100 Lüüd, üm dor op so richtig wat noordüütsche Aart un Wies to slemmen un to fiern. Wi hebbt mit de Sängerin, Entertainerin un Autorin Annie Heger snackt, de dor nu al dat veerte Mal för de richtige noordüütsche Stimmung in Saal soorgt hett. Denn weern wi ok noch bi de Premieer vun dat Theaterstück “Regen in'n Kopp” vun den Hamborger Ledermaker un Kinnerbookautor Ove Thomsen mit dorbi – un dat geiht üm märkenhaft Waterwesen, de in'e Elv in'n Hamborger Hoben leven doot – dorüm dreiht sik nämmich allens bi uns Plattdüütsch Höörspeel "Ölben siene Waterwesen", dat Ji an'n Middewekenavend vunaf fief na negen bi NDR 90,3 höörn köönt. Un ok ne'e plattdüütsche Musik ut Hamborg hebbt wi för Jo! An'n 21. Februor speelt de "Tüdelband" en Album-Release-Kunzert in'e Fischhall in Hamborg-Harborg. Avends, Klock 8 geiht dat los. As Vörgesmack gifft dat bi "Wi snackt Platt" al mal en Leed vun dat ne'e Album "Foffteihn" to hören!Un noch en Veranstaltens-Tipp: Ok an'n Sünnavend, den 21. Februor, avends Klock 6 speelt de Ledermaker Willie Stemwede ut Hamborg-Rahlsteed en Kunzert in't Schulungszentrum vun "Hamburg Wasser" in´n Wellingsbüttler Weg 25a. To hören gifft dat ünner annern Leder vun sien ne'estet Album "Seewievke". Korten gifft dat bi't Torhaus Wellingsbüddel.

Wat in Hamborg un ümto in de plattdüütsche Welt passeren deit un över wat in Kultur, Politik un Sport op Platt snackt warrt - dat kriegt Ji mit bi "Wi snackt Platt".Herma Koehn - 60 Johr op'e BühnIn wiet mehr as 120 Rullen und Stücken weer de wunnerbare Schauspelersch Herma Koehn alleen an't Ohnsorg-Theater to beleven – man se hett ok noch an so vele anner Theaters speelt, weer in't Fernsehn to sehn un as Hörspeelsprekerin aktiv. Düssen Februor is dat 60 Johr her, dat de Bühnkarieer vun Herma Koehn losgüng: mit een Optritt bi dat Musical "Heimweh nach St. Pauli" in't Hamborger Operettenhuus - an'e Siet vun Freddy Quinn. Bi "Wi snackt Platt" vertellt wi Jo mehr över de grootardige Karrieer vun Herma Koehn.Momsen - Tiere - SensationenEen kennt em vun'e Theaterbühn, vun "Hör mal'n beten to", man ok vun't Fernsehn: Klappmuulpopp Werner Momsen. Tohoop mit sien Achtermann Detlef Wutschik hett he nu en ne'et Book rutbröcht. "Momsen. Tiere. Sensationen" vertellt vun Deerten un jümehr verrückte Egenschoppen: vun Wombats, de mit eckige Köddels jümehr Reveer markeert, vun Sülverfisch, de de Wollmüüs vun'n Bodden opfreten un Grottenolmen, de sik in een Johr blots fief Meters wiet bewegen doot. "Wi snackt Platt"-Reportersch Benita Brunnert hett sik mit Werner Momsen un sien Achtermann Detlef Wutschik drapen un mit jüm över dat ne'e Book snackt.Mehr Plattdüütsch gifft dat op ndr.de/platt

Bi de Amateurtheaters in Hamborg un ümto is in'n Ogenblick ornlich wat los: dat Amateurtheater Duvenstedt speelt de Geister-Kummedie „Kugelfisch Hawai“ un bi dat Stück "Een kommodigen Avend" vun de Bickbeern Schweizer Speeldeel in Rosengoorn-Nenndörp dörv Baggerfohrer Manni mal för en Avend beleven, wat dat heet, een Fro to ween. Un Wi snackt Platt-Reporters weern bi dat Amateurtheater Duvensteed un bi de Bickbeern-Schweizer-Speeldeel to Besöök. Bavento geiht dat ok noch üm uns Plattdüütsch Hörspeel an'n Middewekenavend: Heidi Mahler is dor in dat Stück "Dat ole Huus vun Tante Getrud" to beleven. Wi maakt Jo en beten wat Lust dorop!Moderatschoon: Jan Wulf

Dütmal vertellt uns Timsen vun'e Band Santiano wat doröver, wat för em wohre Frünschop is. Dorto geiht ok noch üm Howard Carpendale siene eersten Schreed as Musiker in "Metas Musikschuppen" in Oostfreesland, un wi sünd bi de Hittfelder Speeldeel to Besöök, de tokamen Wekenenn mit dat Theaterstück “Blots keen Püttjerkraam” Premieer fiert. "FRÜNN" - ne'et Leed vun TimsenVerleden Johr, dor hett Timsen vun'e Band Santiano en helet Solo-Album mit plattdüütsche Leder rutbröcht - un nu, nu leggt he nochmal en Single na. "Frünn", so heet dat ne'e Leed un dat is en wohret Leevsbekenntnis an echte Frünschop. Bi "Wi snackt Platt" vertellt Timsen, wat "wohre Frünnen" för em sünd - un, kloor: dat gifft ok dat ne'e Leed to hören."Blots keen Püttjerkraam" bi de Hittfelder SpeeldeelVunaf Sünndag, den 1. Februar, gifft dat bi de Hittfelder Speeldeel dat Stück "Blots keen Püttjerkraam" to beleven. Benita Brunnert hett de Lüüd vun't Theater bi en Proov besöcht.De oostfreeschen Wuddeln vun Howard CarpendaleHoward Carpendale is een vun de ganz groten Schlagerstars hier bi uns in Düütschland. Jüst annerletzt is he 80 Johr oolt worrn. Aver weet Ji egens woans dat allens mit de Karieer vun Howard Carpendale losgahn is? Ilka Brüggemann vertellt Jo mehr över Howard Carpendale siene eersten Schreed as Musiker in "Metas Musikschuppen" in Oostfreesland.Neewahlen bi'n Plattdüütsch Root un Vörberden op den Plattdüütsch DagAn'n Middeken, den 21.2.2026, stunnen bi'n Plattdüütsch Root för Hamborg Neewahlen op'n Plaan. Wat dorbi rutsuert is: Peer-Marten Scheller is as Spreker un Vörsitter vun'n Plattdüütsch Root wedderwählt worrn. Sien Stellvertreder warrt in'e Tokunft Uwe Michelsen ween. Tohoop mit Olaf Duge warrt Uwe Michelsen ok de Hamborger Plattsnackerinnen un Plattsnackers in'n Bunnsraat för Nedderdüütsch vertreden. Peer-Marten freit sik to de Wedderwahl - un op den Plattdüütsch Dag in Hamborg an'n 18. April. "Dat sünd bet nu al över 40 Veranstaltens, de mellt sünd!", so Scheller. Geern köönt sik ok wiederhen Lüüd mellen, de wat to'n Hamborger Plattdüütsch Dag bidregen wüllt: dat kann en Kunzert ween, en Lesen, en Informatschoons-Drapen vun en Plattkrink, en Föhren dör en Kark - oder wat ok jümmers. Bet to'n 10. Februar mutt de Plattdüütsch Root Bescheed weten.

Mal Hand op't Hart: wannehr hebbt Ji dat letzte Mal so richtig wat Kribbeln in'n Buuk hatt? Wenn Ji dorop mal wedder Lust hebbt, denn is villicht dat ne'e Stück in't Ohnsorg-Theater wat för Jo: denn noch bet to'n 15. Februaar speelt se dor de Kumedie "Kribbeln in'n Buuk - Der Himmel voller Geigen". Bi "Wi snackt Platt" vertellt wi Jo mehr över dat Stück. Sarah Kästner - Museums-Verklorersch un Plattkurs-LeiterschSe arbeidt as Verklorersch in't Museum för Kunst un Gewarv un vunaf Februar, dor is se ok Leitersch vun en Plattkurs för Anfängers bi de Hamborger Volkshoochschool in Hamborg-Borgfell: Sarah Kästner. Wi hebbt de studeerte Designerin in't Museum för Kunst un Gewarv drapen un stellt se Jo vör.Plattsnackers överall - ok in Berlin!Jedeen Sünndagmorgen draapt sik in Berlin de Lüüd vun'n Berliner Oostfreesenvereen, üm ok in de Hööftstadt de oostfreeschen Traditschonen to plegen - dat heet: Tee drinken, Klöönsnack un, kloor, Boßeln. Leandra Morich weer bi een vun de Boßeltörns vun'n Berliner Oostfreesenvereen mit dorbi. (Henwies: Ok in Hamborg gifft dat en Oostfreesenvereen!)Bi't "Plattdüütsche Hörspeel" warrt dat ieskoolt!Hebbt Ji bi all den Snee in'e verleden Weken ok mal doröver nadacht, woans dat woll weer, wenn mal so veel Snee fallt, dat een gor nich mehr so recht na buten kümmt? Jüst dorüm geiht dat bi uns Plattdüütsch Höörspeel "Iestappen oder Kiek na buten" vun Gunda Wirschun. Bi "Wi snackt Platt" maakt wi Jo en beten wat Lust op dat Stück, dat Ji an'n Middewekenavend üm fief na negen bi NDR 90,3 un ok in'e ARD Audiothek anhöörn köönt.

Bi "Wi snackt Platt" sünd wi dütmal bi de Plattsnackerinnen un Plattsnackers vun't Kreativhuus in Eimbüddel to Besöök: bi'n Plattkrink vun Heiko Thomsen. Dorto stellt wi Jo ok noch den Regisseur un Sänger Philip Lüsebrink vör, de in'n Ogenblick dat Stück "Achtertüksche Süstern" in't Stadttheater Cuxhaven inszeneern deit - un dat geiht üm dat Plattdüütsche Toonarchiv PLATO vun't Institut för Nedderdüütsche Spraak. Op de Websiet vun dat Internet-Projekt kann en sik nämmich nu Interviews mit bekannte plattdüütsche Autorinnen un Autoren anhöörn.

"Vertell doch mal" wedder los un dat gifft ornlich wat to winnen! De NDR söcht tohoop mit Radio Bremen un dat Ohnsorg-Theater de beste Kortgeschicht op Platt to't Thema Kuddelmuddel. Wat nee is düt Johr: erstmalig köönt Kinner- un junge Lüüd bet 18 Johr ok mit lütte Videos, Podcasts, Comics un anner Saken an'n Wettbewarv deelnehmen - un dat alleen oder as Grupp. Bottschopperin vun uns plattdüütschen Geschichtenwettbewarv is de Sängerin, Schauspelerin und Autorin Annie Heger. Bi "Wi snackt Platt" snackt wi mit Annie över den Wettbewarv, över ehr Leevde to de plattdüütsche Spraak un över Tipps un Tricks bi't Vertellen vun Geschichten.

För de letzte "Wi snackt Platt"-Utgaav för düt Johr hebbt wi Jo vergnöögliche Geschichten vun Gerd Spiekermann rutsöcht. Düssen Dezember, dor hett sik de wunnerbare Schrieversmann un Verteller vun plattdüütsche Geschichten ut sundheitlichen Grünnen vun'e Bühn verafscheed. Freit Jo noch eenmal op en poor vun siene schönsten un lustigsten Geschichten: op "Oma ehr Schötteldook", op "De swatte Placken" un op de Geschicht, wo dat üm Gerd sien Familiennaam "Spiekermann" geiht - denn op Finkwarder, dor gifft dat ok Lüüd, de Spiekermann heten doot. Is he mit jüm verwandt!? Dat vertellt he Jo bi "Wi snackt Platt".

De Stuuv un de Dannenboom sünd festlich wat smückt, dat rüükt na Dannengröön, Rükermännchen un wiehnachtlich Gewürzen - un ok bi "Wi snackt Platt" geiht dat an'n Eersten Wiehnachtsfierdag so richtig wat wiehnachtlich to. Schölerinnen un Schölers ut de veerte Klass vun'e Grundschool Bramfeld hebbt in'e verleden Weken düchtig wat plattdüütsche Wiehnachtsgedichten för Jo inöövt: freit Jo op Gedichten vun David, Aykan, Leni, Paul, Juna, Sandra, Kai un Ali. Bavento gifft dat, kloor, ok Wiehnachtsgeschichten to hören: de Geschicht "Lütt Moses hillige Nacht", leest vun den unvergeten Schauspeler Edgar Besser un de "Wiehnachtsgeschicht" vun den Evangelisten Lukas, vördragen vun Reimer Bull.

Dütmal hebbt wi bi "Wi snackt Platt" plattdüütsche Last-Minute Geschenk-Tipps för Jo: plattdüütsche Böker sünd uns Thema! Denn stellt wi Jo ok noch dat ne'e lütte Album vun de oostfreesche Sängersch Sabine Herrmann vör, mit Gerrit Hoss sünd wi op'n Wiehnachtsmarkt ünnerwegens un wi vertellt Jo, wann un woneem düt Johr in Hamborg plattdüütsche Wiehnachtsgottsdeensten fiert warrt. Wiehnachtsgottsdeensten in Hamborg In uns Sennen wiest wi hen op düsse Gottsdeensten: 24.12.25, 15 Uhr: Seemannswiehnacht op de Flussschipperkark, Hohe Brücke 2 in Hamborg 25.12.25, 9.30 Uhr: Frohbotschaftskark, Straßburger Platz 6a in Hamborg-Dulsbarg 26.12.25, 10 Uhr: Groot Flottbeker Kark - mit Pastersch Carina Lohse, den Chor "De olen Jungs", Ellen Pfohl un Bolko Bullerdiek (u.a.) 26.12.25, 18 Uhr: Krüüzkark in Wandsbeek, Kedenburgstraße 10, Gottsdeenst mit Texten op Plattdüütsch Böker-Tipps Dat sünd de Böker, vun de wi in de Sennen snacken doot: Charms, Daniil: Von Fall tau Fall. Auf Plattdeutsch. Übersetzt von Susanne Bliemel. Lümborg: Plaggenhauer Verlag 2025. 72 Seiten. ISBN 978-3-937949-34-5. Preis: 16,50 Euro. Barber, Ines: Boorn, wo de Wind weiht. Op Platt un op Hoochdüütsch. Tredition Verlag 2025. Softcover, 140 Seiten. ISBN 978-3-384-64223-3. Preis: 10,50 Euro. Momsen, Werner: Momsen, Tiere, Sensationen. Hoch- und plattdeutsche Geschichten über die Evolution. Hamburg: Quickborn-Verlag 2025. 95 Seiten. ISBN 978-3-87651-520-5. Preis: 8,80 Euro. Stührwoldt, Matthias: Gah mi af mit witte Wiehnacht. Winter- un Wiehnachtsgeschichten. Quickborn Verlag 2025. Softcover, 88 Seiten. ISBN 978-3-87651-521-2. Bestellnummer BO QUB 5048. Preis: 10,80 Euro. Kahrs, Hans-Hinrich: De Wiehnachtsmann as Ballonfohrer. Dör de Adventstiet vun Lappland bet na Noorddüütschland. Niederdeutsch / Hochdeutsch. Illustrationen von Sonja Jannichsen. Lümborg: Plaggenhauer Verlag 2025. Festeinband, Fadenheftung mit Leseband. 47 Seiten. ISBN 978-3-937949-35-2. Bestellnummer BO PLA 5029. Preis: 16,80 Euro.

Bi "Wi snackt Platt" snackt wi dütmal mit Fleeschermeister Andreas Bley in Hummelsbüddel över dat Wiehnachtseten, dorto weern wi ok noch bi den letzten groten Optritt vun Gerd Spiekermann in'e utverköffte Komödie Winterhuder Fährhuus dorbi – un Wolfgang Krischke vertellt mehr över en ne'et Internet-Projekt vun't Institut för Nedderdüütsche Spraak: op de Internetsiet www.niederdeutsche-literaturorte.de warrt Steden un Öörd vörstellt, de mit plattdüütsche Dichterslüüd to doon hebbt.

De Sängersch Norma ut Hamborg hett en ne'et Album mit fief Wiehnachtsleder rütbröcht. Bi "Wi snackt Platt" snackt wi mit Norma över dat Album un ehr Wiehnachtsfest op de Insel Föhr. Denn geiht dat ok noch üm dat Beerbruen: Arne Christiansen vun'e Brueree Bill Brew in Billwarder verklaart uns, woans Beer maakt warrt. Un wi sünd bi de Kantorei vun'e Karkengemeen Sinstörp to Besöök: An'n Sünndag, den 7. Dezember 2025, gifft de Chor en grotet Adventskunzert in'e evangeelsche Kark in Sinstörp. Avends Klock 6 geiht dat los. Wi weern voraf mal bi en Proov dorbi. Moderatschoon: Jan Wulf

He is en echten plattdüütschen Entertainer: Gerd Spiekermann! Siet 47 Johr is he nu al as Verteller mit siene wunnerbaren Geschichten op de Bühnen in Noorddüütschland to beleven – man nu schall dormit Sluss ween. An'n sövten Dezember, dor steiht he dat letzte Mal in Hamborg op'e Bühn: bi de Komödie Winterhuder Fährhuus mit sien Programm "Wiehnachten - Dat hool ik nich ut!". Woso sik Gerd Spiekermann nu na all de Johrn vun'e Bühn un vun sien Publikum verafscheden deit, dat vertellt he bi "Wi snackt Platt" - un he vertellt ok, woans dat domals vör 47 Johr allens losgahn is mit dat Vertellen vun plattdüütsche Geschichten. "Schenk Dien Tiet" - Ehrenamtliche Vörleserinnen un Vörlesers söcht! “Schenk Dien Tiet – Lees vör op Platt”, so heet en ne'e Akschoon, de vun de Hamborger Health Care-Agentur kwhc in Kooperatschoon mit den Quickborn-Verlag in't Leven ropen worrn is. Söcht warrt ehrenamtliche Vörleserinnen un Vörlesers, de Lust hebbt, in Hamborger Senioreninrichtens plattdüütsche Texten vörtodregen. Op en Internetsiet köönt Senioreninrichtens, de plattdüütsche Vörlesens anbeden wüllt, ehr Interesse signaliseern. Wi weern bi de Optaktveranstalten vun "Schenk Dien Tiet - Lees vör op Platt" in'e Seniorenresidenz "Augustinum" in Oevelgönn mit dorbi un hebbt mit allerhand Lüüd snackt: mit de Geschäftsföhrersch vun de HealthCare-Agentur kwhc Dr. Melanie Howe, mit Peer-Marten Scheller vun'n Quickborn-Verlag, aver ok mit Carina Dawert, Benita Brunnert un Yared Dibaba, de de prominenten Vörlesers bi de Optakt-Veranstalten vun de ne'e Hamborger Akschoon weern.

Dütmal geiht dat bi "Wi snackt Platt" üm den unvergeten Finkwarder Autor, Dichtersmann un Verteller Rudl Kinau. Düsse Daag is dat 50 Johr her, dat he storven is. Wi besinnt uns op em un wi snackt mit den Kinau-Experten Reinhard Goltz över sien Wark un ok de Schaddensieden vun sien Leven. Dorto geiht dat ok noch üm en ne'en plattdüütschen Pries för Hamborg: den mit 5000 Euro doteerten Hartmut-Cyriacks-Pries! De Stadt Hamborg söcht de beste Översetten in't Plattdüütsche för Kinner un junge Lüüd. Insennensluss is de 31. Januar 2026. Moderation: Jan Wulf

Dütmal gralleert wi den Hamborger Musiker Lars-Luis Linek to'n 70. Geboortsdag. Verleden Dunnersdag hett de Snutenhobelspeler un Plattsnacker sienen Geboortsdag groot wat fiert: mit en Kunzert in'n Lichtwarksaal vun'e Carl-Toepferstiften – un wi, wi weern dorbi. Dorto vertellt wi Jo ok noch mehr över dat Finale vun den Plattdüütschen Bandwettstriet “Plattbeats” - an'n Freedag, den 21. November is de in Rider's Café de und dat geiht geiht dat üm Ina Müller: verleden Week, dor weer se morgens hier b i uns in uns NDR 90,3-Morningshow to Besöök - un Jo!, dor is ok ornlich wat Plattdüütsch snackt worrn!

Dütmal sünd wi op de Plattdüütsche Bökermess in'n Lichtwarksaal vun'e Carl-Topefer-Stiften in'e Neanderstraat to Besöök. Mehr as veertig Verlagen präsenteert dor düt Weken plattdüütsche Literatur – un ok sünst gifft dat dor allerhand to beleven! Denn stellt wi Jo ok noch Susanne Bliemel vör. De plattdüütsche Autorin un NDR-Kollegin ut Mäkelborg-Vörpommern hett an'n Freedagavend den renomeerten Literaturpries vun'e Stadt Kappeln kregen – un wi vertellt Jo mehr över dat ne'e Stück in't Ohnsorg-Theater: siet verleden Sünndag is dor de Kummedie “Wi sünd de Ne'en” to beleven.

Dütmal maakt wi Lust op de 26. Plattdüütsche Bökermess, de dat an'n 8. un 9. November wedder hier bi uns in Hamborg to beleven gifft. Wi snackt mit den Platt-Literatur-Experten Heiko Block vun't Institut för Nedderdüütsche Spraak över de Böker, de ne'e rutkamen sünd un över dat, wat dat op'e Bökermess to beleven gifft. Denn geiht dat ok noch üm en ganz wunnerbaret Hörspeel vun'e Nedderdüütsche Bühn Niemünster, dat Ji Jo in't Internet anhöörn köönt: "Lüttjepütt" vun Johann Diedrich Bellmann - un wi maakt Lust op en ne'e Utgaav vun uns NDR Platt-Podcast "Platt, Schnack Mucke" mit Yared Dibaba. De Sängerin vun'e plattdüütsche Hardrockband "Rockwark" weer bi em to Besöök.

Snacks, Reportagen un Musik: Wat in Hamborg un ümto in de plattdüütsche Welt passeren deit un över wat in Kultur, Politik un Sport op Platt snackt warrt - Ji kriegt dat mit bi "Wi snackt Platt" op NDR 90,3. Plattdüütsch Dag 2026: Mitmaken un dorbi ween! Plattdüütsch - een ganzen Dag lang – un dat in'e hele Stadt: dat is de Plattdüütsch Dag in Hamborg. 2024 weer de letzte - un tokamen Johr, an'n 18. April 2025, dor schall dat wedder een geven. Bi "Wi snackt Platt" vertellt de Spreker vun Plattdüütsch Raat för Hamborg Peer-Marten Scheller mehr över dat, wat plaant is, un he roopt all Plattsnackers un Institutschonen in Hamborg to'n Mitmaken op. 160 Johr: De "Liedertafel Harmonie Finkenwärder" De Chor “Liedertafel Harmonie Finkenwärder” fiert sien 160johriget Jubiläum un an'n Sünndag, den 9. November, dor singt de Mannslüüd in'e Klosterkark Finkwarder jümehr grotet Jubiläumskunzert. Wi weern vöraf mal bi en Proov dorbi. Een Spraakplaan för dat Plattdüütsche An'n Maandagavend warrt vunaf Klock 6 in en Online-Kunferenz över de Tokumst vun uns plattdüütsche Spraak snackt - un Ji, Ji köönt dorbi ween. Bi "Wi snackt Platt" vertellt de Leitersch vun't Nedderdüütschsekretariat mit Sitt in Hamborg mehr över den "Spraakplaan Nedderdüütsch" un wat dat in de Online-Kunferenz to besnacken gifft. Lüüd, de mitdiskereern wüllt, könnt sik direkt bi't Nedderdüütschsekretariat mellen.

Wat in Hamborg un ümto in de plattdüütsche Welt passeren deit un över wat in Kultur, Politik un Sport op Platt snackt warrt - dat kriegt Ji mit bi uns "Wi snackt Platt"Podcast. To Besöök bi'n Parlamentskrink Plattdüütsch in'n Bunnsdag Bi "Wi snackt Platt" sünd wi dütmal in Berlin to Besöök - un twors in'n Bunnsdag! Bi' n Parlamentskrink Plattdüütsch kaamt Bunnsdagsafornte tohoop, de Plattdüütsch snacken doot oder de de Plattdüütsche Spraak eenfach an't Hart liggen deit. Över Frakschoonsgrenzen henweg snackt en dor un tuuscht sik ut: över Spraakpolitik, möögliche Themen vun plattdüütsche Parlamentsdebatten, Plattdüütsch in den Medien un allens, wat wichtig is, üm de plattdüütsche Spraak in Düütschland vöran to bringen. Wi harrn de Schangs, mal bi en Sitten vun'n Parlamentskrink Plattdüütsch mit dorbi to ween: bi de twete Sitten in düsse Legislatur-Periood. Wat de Parlamentskrink nipp un nau maken deit un wokeen dor allens mit dorbi is – dorto mehr in düsse Utgaav. Bunnsraat för Nedderdüütsch föddert: Plattdüütsch in't Grundgesett! Dorto geiht dat bi "Wi snackt Platt" ok noch üm en anner Thema ut de Berliner Politik: denn de Düütsche Bunnsraat, de hett an'n 26. September in en "Entschließung" den Wunsch an de Bunnsregeern formuleert, dat de sik dormit utnannersetten schall, dat de düütschen Minnerheiten, also de Fresen, de Sorben, de Sinti un Roma un ok de Dään mit en so nöömte Achtensklausel in't Grundgesett opnahmen warrt. Düsse Klausel schall kloor maken, dat düsse Minnerheiten in Düütschland acht, schuult un ünnerstütt warrt. Een wunnerbare Saak för de kulturelle Veelfalt in Düütschland, dat meent ok de Plattdüütsche Bunnsraat, also dat böverste Gremium vun all Plattsnackers in Düütschland, man he verlangt ok, dat in düsse Klausel ok de Plattdüütsche Spraak mit opnahm warrn schall. Woso he dat meent un wat de Minnerheitenbeopdragte vun't Land Sleswig-Holsteen Johannes Callsen dorto seggt, ok dorto mehr bi "Wi snackt Platt". DSV Hamborg speelt Edgar Wallace Dat is aver noch lang nich allens, wat wi in düsse Utgaav vörhebbt - denn dat geiht dat ok noch üm dat ne'e Theaterstück vun'e Düütsche Schauspeel Vereenigen Hamborg: de bringt nämmich en olen Edgar Wallace-Klassiker op'e Bühn. Vunaf den 31.Oktober is in't Theater an'e Marschnerstraat dat Stück "De doden Oogen vun Altona" to sehn. Wi hebbt de Lüüd vun'n DSV vöraf mal bi en Proov besöcht. Gerd Spiekermann is "Muksch!" Un kloor: to'n Sluss vun düsse "Wi snackt Platt"-Utgaav, dor hebbt wi noch en Klassiker ut uns Reeg "Hör mal'n beten to" för Jo! Mehr Infos to Plattdüütsch bi'n NDR ünner ndr.de/platt

Dütmal gifft dat bi "Wi snackt Platt" wat to fiern, denn de Hamborger Quickborn-Verlag, de warrt an'n Middeweken, den 15. Oktober, op'e Franforter Bökermess mit den Düütschen Verlagspries uttekent. Wi hebbt mit Verlags-Baas Peer-Marten Scheller över de grote Utteken snackt. Denn sünd wi ok noch mit de Reddenssanitäterin Nane Hansen ünnerwegens - se is de Protagonistin vun de ne'e Utgaav vun uns NDR-Online-Videoreeg “Mit Drift!”, dorto vertellt wi Jo ok noch mehr över dat ne'e Stück bi Tanks Theater in Nordersteed - “Kurschadden op Afweeg” heet de Kummedie - un: wi laadt Jo hartlich in, denn an'n Dunnersdag, den 16. Oktober, sünd Yared Dibaba un Annie to Besöök in uns NDR Popup-Studio in Bardörp. Vunaf middags Klock 12 köönt Ji mit de twee en "Plattdüütsche Middagspaus" maken un de twee mal persönlich kennenlehrn.

Dor weer düchtig wat los verleden Wekenenn op de Insel Helgoland! Mehr as 400 Lüüd hebbt bi'n Wannerloop över de Noordsee-Insel Helgoland mitmaakt. Een vun de Lopersch weer uns NDR-Platt-Reportersch Benita Brunnert. Bi "Wi snackt vertellt se, wo wunnerbar de Veranstalten weer un woans dat ehr Fööt nu geiht. Dat is aver noch lang nich allens: denn wi vertellt Jo ok noch mehr över Plattsnackers in Brasilien un anner Delen vun Südamerika - un dat geiht üm dat ne'e Stück "Das Doppelte Lottchen - Dubbelt höllt beter' op'e Studio Bühn vun't Ohnsorg-Theater.

Schauspelerin oder Schauspeler to warrn, dorvun dröömt vele junge Lüüd. Man woneem köönt de jungen Lüüd denn ok mal utprobeern, wat dat denn würklich wat för se is – de Schauspeleree? In't Ohnsorg-Theater to'n Bispeel! Bi den Ohnsorg-Jugendclub bringt de Theaterpädagogin Julia Bardosch un de Regisseurin Hanna Müller junge Lüüd dat Schauspelern - un blangenbi ok dat Plattsnacken bi. Na de Opföhrens vun dat Stück "Momo" vun Michael Ende in'n Juni un en lange Sommerpaus geiht de Ohnsorg-Jugendclub nu in de neegste Runn - un all jungen Lüüd, de Lust hebbt mittomaken, köönt an'n tokamen Dunnersdag , den 2. Oktober, bi en Snupperproov mit dorbi ween. Bi "Wi snackt Platt" vertellt Regisseurin Hanna Müller mehr över den Jugendclub. So veel aver vöraf: Plattdüütsch mööt de jungen Lüüd nich snacken könen, wenn se mitmaken wüllt! Helga Feddersen-Klassiker bi de Plattdüütsche Bühn Tangsteed Helga Feddersen weer ganz grootordige Volksschauspelersch hier ut Hamborg - veel to fröh is se storven. Een vun ehr Theater-Paraderullen, dat weer de „Perle Anna“ in de glieknamige Kummedi vun den franzööschen Autor Marc Camoletti - un vun düt Stück, dor gifft dat ok en plattdüütsche Faten: „Anna, dat Goldstück“ fiert an'n 10. Oktober bi de Plattdütsche Bühn Tangstedt Premieer speelt un "Wi snackt Platt"-Reporter Bernhard Koch, de hett dor annerletz mal bi en Proov vörbikeken. Gedenken an Günter Harte De plattdüütsche Radio-Reeg „Hör mal'n beten to“ vun'n NDR hett en lange Traditschoon: siet Enn vun'e 1950er Johrn gifft dat de. Een Autor, de ganze 37 Johr lang bi Hör mal'n beten to höörn weer, dat weer Günter Harte. An'n 26.Oktober vör vör nipp un nau 100 Johr, dor is Günter Harte in Hamborg-Eimsbüddel to Welt kamen. Bi "Wi snackt Platt" besinnt wi uns op em. "De Maschien" - Ne'e Musik vun'e Hamborger Tüdelband Fans hebbt dor nu al en beten wat op töövt, man nu, nu is dat sowiet: de Hamborger Tüdelband hett en ne'et Leed rutbröcht. “De Maschien” heet de ne'e Song - un överhaupt geiht Mire Butmann un Malte Müller dat grote Thema run düm de Maschinen un de "künstliche Intelligenz" in'n Ogenblick nich ut'n Kopp. Wi hebbt mit de Twee snackt un, kloor: dat gifft ok dat ne'e Leed to hören.

Een Frunschopsavend mit Annie Heger un Yared Dibaba in't Ohnsorg-Theater, "Rommé to drütt" bi't Theater 47 in Jenfeld, en plattdüütschen Gottsdeenst in'e Elisabethkark Eidelsteed - und en plattdüütsche Geschicht vun Gerd Spiekermann - dat sünd dütmal uns Themen bi "Wi snackt Platt". "Op de Fründschop" - Annie Heger un Yared Dibaba bi Ohnsorgs Yared Dibaba un Annie Heger: de twee sünd echte Frünnen - un nu geevt se gors tohoop en Book to düt Thema rut. "Op de Fründschop” heet dat, rutkamen is dat in'n Quickborn-Verlag - un an'n Maandag, den 22. September, dor stellt se dat Book bi en groten "Frünschopsavend" op'e grote Bühn vun't Ohnsorg-Theater vör. Bi "Wi snackt Platt" vertellt Annie Heger un Yared Dibaba mehr över jümehr Fründschop, Fründschop an sik, jümehr ne'et Book un denn "Fründschopsavend" in't Ohnsorg-Theater. "Rommé to drütt" - Dat Theater 47 in Jenfeld Dree ole Damen – un en Banköverfall! Vunaf tokamen Freedag speelt dat Theater 47 in Jenfeld dat Stück “Rommé to Drütt". Uns "Wi snackt Platt"-Reporter Bernhard Koch hett al vöraf mal in Jenfeld bi't Theater 47 vörbikeken un stellt Jo dat Stück un de Lüüd, de dor spelen doot, vör. Gottsdeenst op Platt in Eidelsteed un Tungen-Malöör Dorto geiht dat ok noch üm en Gottsdeenst op Platt, den dat an'n Sünndagmorgen, Klock 10, in'e Elisabethkark in Eidelsteed to beleven gifft - un Gerd Spiekermann vertellt en plattdüütschen Geschicht över en Malöör, dat em mal mit sien Tung passeert is.

Bi "Wi snackt Platt" sünd wi dütmal bi de Lohbrügger Börgerbühn to Besöök: "Op Hart un Neer” heet dat Stück vun Stefan Vögel, dat dor an'n 27. September Premieer fiert. Wi stellt Jo dat Stück un de Lüüd vun'e Lohbrügger Börgerbühn vör. Denn snackt wi ok noch mit den plattdüütschen Ledermaker ut Rahlsteed Willie Stemwede. An'n Sünnabend, den 20. September präsenteert he sien ne'et Album "Seewievke" in't "Allegro" in'n Güstrower Weg 2 in Rahlsteed. Namiddags, Klock 4, geiht dat los. Bavento stellt wi Jo ok noch en ne'en Audioguide vun'e Elvreederei Abicht un dat Ohnsorg-Theater vör, mit den een nu ok Havenrundfohrten op Plattdüütsch maken kann. Un dat geiht üm dat nedderdüütsch-freesche PEN-Zentrum mit Sitt in Hamborg, dat 2023 grünnt worrn is: op de Dagfohrt vun'e internatschonalen PEN-Zentren in Krakau hebbt de Delegeerten för en offitschelle Opnahm vun't nedderdüütsch-freesche PEN-Zentrum in den internatschonalen Verband stimmt. Un dat geiht üm en Hobenrundfahrt op Plattdüütsch bi de Elvrederee Abicht – wo de Ohnsorg-Schauspelers Nele Larsen un Robert Eder Jo wat över den Haven vertellt. Moderatschoon: Jan Wulf

Mit de Theaterfaten vun en oscarnomieerten Film vun Kay Pollak mellt sik dat Ohnsorg-Theater ut de Sommerpaus torüch. Bi "Wi snackt Platt" vertellt wi Jo, wat sik dat lohnt, sik dat Stück "Wie im Himmel - As in'n Heven" antokieken un wat de Besökers vun'e Premieer dorto seggt hebbt. Dorto sünd wi ok noch in'n Museumshaven Övelgönn ünnerwegens un stellt Jo den Kaptain vun't historsche Füerschipp "Elbe 3" vör. Un wi sünd bi't Nordersteder Amateurtheater to Besöök, dat Dunnersdag, den 11. September 2025, Premieer mit dat Stück "Ünner't Lüchtfüer" fiert.

Bi "Wi snackt Platt" hebbt wi dütmal wat för all Lüüd, de Plattdüütsch villicht noch nich snacken köönt, aver dat geern lehren wüllt! Nu in'n September gaht wedder de ne'en Plattdüütsch-Kursen bi de Volkshoochschool Hamborg los – un ganz ne'e as Lehrkraft mit dorbi is Anna Reinhard. Wi stellt Jo de junge Fro, de egens Schauspelersch is un ok al en ganze Tiet lang an'e Fritz-Reuter-Bühn in Schwerin to beleven weer, vör. Dorto vertellt wi Jo bi "Wi snackt Platt" ok noch, wokeen düt Johr den renommeerten Freudenthal-Pries för plattdüütsche Prosa und Poesie kriegen deit – un wi maakt en lütten Utfloog hen na Glückstadt un sünd an Boord vun dat öllste noch fohrdüchtige Seilschipp vun Düütschland to Besöök: de “Rigmor”.

Dütmal snackt wi mit de Spiegel-Bestsellerautorin un "Hallig-Pastorin" Gertrude vun Holdt över ehr ne'et Book "Auf hoher See. Geschichten zwischen Ebbe und Flut". Dorto geiht ok noch üm en Veranstalten an'n Middewekenavend, Klock 6, in'n Lichtwarksaal vun'e Carl-Toepfer-Stiften: dor warrt ut dat Book "Flünken vör de Seel" vörleest, dat düt Johr in'n Quickborn-Verlag rutkamen is - un twee plattdüütsche Geschichten hebbt wi ok noch för Jo!

Bi "Wi snackt Platt" sünd wi dütmal bi en "Mann över Boord"-Manöver op den Bardörper Gemöösewer “Uns Ewer” to Besöök. Dorto maakt wi ok noch en lütten Utfloog hen na de Jugendharbarg in Husum an'e Noordsee, wi vertellt Jo mehr över de drüdde Episood vun uns Hörspeel-Reeg "Düsse Petersens" - un en lütte plattdüütsche Geschicht vun Gerd Spiekermann hebbt wi ok noch för Jo.

Bummelig hunnertdusend Minschen in Hamborg snackt Platt. Wi bringt de "heemliche Mudderspraak vun de Norddüütschen" ok in't würkliche Leven to'n Klingen.

Dütmal hebbt wi ganz wunnerbare plattdüütsche Geschichten vun Hamborger Schölerinnen un Schölers för Jo. “Jungs un Deerns leest Platt” - so heet de plattdüütsche Leeswettbewarv vun'e Hamborger Scholen. De eerstplatzeerten Winnerinnen un Winners hebbt Ji hier bi “Wi snackt Platt” al vör en poor Weken höört, man bi't Finale op de grote Bühn vun't Ohnsorg-Theater weern noch so vele anner schöne Geschichten dorbi! Freit Jo op Geschichten vun Anouk Lampfl ut de drüdde Klass vun'e School Lutterothstraat in Eimsbüddel, op Iannis Chrissostomidis ut'e veerte Klass vun'e Fridjof-Nansen-School in Lurup, Paula an Huef ut de föffte Klass vun't Immanuel Kant-Gymnasium in Marmsdörp un un Nele Klose ut de sövte Klass vun't Alexander Humboldt-Gymnasium in Wilsdörp! Moderatschoon: Jan Wulf

Dütmal graleert wi Ina Müller to'n sösstigsten Geboortsdag: Bi "Wi snackt Platt" vertellt de Moderatorin un Sängerin, de siet vele Johrn in Hamborg tohuus is, vun ehr Kinnertiet op den Buernhoff. Denn geiht dat ok noch üm en heel interessantet Thema, to dat NDR-Platt-Reporter Frank Jakobs rechercheert hett: dat geiht üm dat Thema Hexenwahn un Hexenverfolgen hier bi uns in'n Noordüütschland. Bavento geiht dat ok üm dat grote Festival op Platt, dat verleden Sünndag in Elmshorn to beleven weer – präsenteert vun'n NDR. Un Annie Heger laadt in to en plattdüütschen Gottsdeenst, de een an'n Sünndag, den 27. Juli namiddags Klock 3, op'e Flussschipperkark beleven kann.

Dütmal sünd wi bi "Wi snackt Platt" bi en plattdüütsche Föhren över de Veeermastbark Peking dorbi, dorto vertellt wi Jo mehr över uns plattdüütsche Höörspeel-Reeg "Düsse Petersens", de dat vunaf Middewekenavend wedder bi NDR 90,3 to hören gifft - un wi snackt mit Helmut Hamke. De fröhere Sänger vun de Band "Speelwark" is een vun de Organisatoren vun dat Festival op Platt in Elmshorn, dat dat düssen Sünnavend wedder op den Pott-Carstens-Platz to beleven gifft. Dütmal vunaf namddags Klock 3 mit dorbi: Yared Dibaba, Norma, de Grupp Wippsteert, Henning Kothe un de Band Krakeel ut Elmshorn. Modereern deit dat Ganze Gerrit Hoss. Bavento warrt vörmiddags üm Klock 11 en plattdüütschen Gottsdeenst fiern - un vunaf Klock 2 maakt en Grupp vun Dudelsackspelers Musik. Mehr Plattdüütsch gifft dat ünner ndr.de/platt

Bi "Wi snackt Platt" stellt wi Jo dütmal Sophie von Pander vör. Se is Studentin an'e Uni Hamborg un wetenschopliche Hölpskraft bi de Perfessersch för Nedderdüütsche Spraakforschen Ingrid Schröder. Dorto geiht dat ok noch üm den plattdüütschen Ledercontest “Plattbeats”, wo sik vun nu af an wedder junge Ledermaker un Bands bewarven köönt. Dorto gifft dat ok noch de Geschicht to höörn, mit de Kai Bruhn ut Halstenbek düt Johr den tweten Pries bi uns Plattdüütsche Schrievakschoon “Vertell doch mal” wunnen hett - un bavento hebbt wi ok noch en "Hör mal'n beten to"-Klassiker vun Gerd Spiekermann för Jo. Moderatschoon: Jan Wulf

Wat weer dat för en feine Veranstalten verleden Sünndag in't Ohnsorg-Theater! “Jungs un Deerns leest Platt” heet de plattdüütsche Leeswettstriet vun'e Hamborger Scholen. Rund 150 Schölerinnen un Schölers hebbt düt Johr bi de Vörentscheden mitmaakt. 16 vun jüm hebbt sik dörsett un weern nu bi't Finale in't Ohnsorg-Theater mit dorbi. Freit Jo op de Winnergeschichten vun Paul Rüpke ut de 4. Klass vun'e School Arp-Schnittger-Stieg in Neefell, op Lina Weidmann (sösste Klass) un Jana Dierks (sövente Klass) vun't Gymnasium Finkwarder - un op Charlotte Schierwater ut de teihnte Klass vun'e Stadtdeelschool Neendörp.

Minsch, wat weer dat för en feinen Vörmiddag verleden Sünndag bi uns grote “Vertell doch mal”-Afsluss-Gala! Un dat Schönste is: glieks twee Hamborgerinnen un Hamborger kunnen sik över Priesen bi uns plattdüütschen Schrievwettbewarv vun'n NDR, Radio Bremen un dat Ohnsorg-Theater freien - denn de veerte Pries güng an Bernd Großmann ut Hummelsbüddel un de eerste Pries an Felicias Schröder ut Eimsbüddel. Bi "Wi snackt Platt" faat wi för Jo nochmal de schönsten Ogenblicken vun uns "Vertell doch mal"-Gala tosamen, un, kloor: dat gifft ok de twee Hamborger Winnergeschichten to höörn! Moderatschoon: Jan Wulf

Ok dütmal hebbt wi wedder ünnerscheedlich Themen ut de Plattdüütsche Welt in un üm Hamborg för Jo: Vörfreid op de grote "Vertell doch mal"-Gala in't Ohnsorg-Theater Sünndagvörmiddag vunaf Klock ölven dor warrt dat spannend, denn dor warrt de Winnerinnen un Winners vun uns plattdüütsche Schrievakschoon “Vertell doch mal 2025” künnigt maakt. Schangsen op en Pries hebbt ok fief Lüüd ut Hamborg. Bi "Wi snackt Platt" maakt wi en beten Vöfreid op de Gala, de Ji Jo Sünndag ok online in en Live-Stream ankieken köönt. Un dat lohnt sik: Nich blots, dat dor all de Winner-Geschichten vun wunnerbore Ohnsorg-Schauspelerinnen un -Schauspelers vördragen warrt, sünnern, kloor, dat gifft ok Musik op'e Ohren. Spelen un singen warrt de Country-, Rock- un Folk-Band Aalkreih ut Flensborg, de wi Jo bi "Wi snackt Platt" vörstellen doot. Man dat is noch lang nich allens! Denn ok bi de Gala mit dorbi ween warrt uns "Vertell doch mal"-Botschafterin düt Johr: de TV-Moderatorin Enie van de Meiklokjes. Modereert warrt de grote "Vertell doch mal"-Gala in't Ohnsorg-Theater vun Yared Dibaba un Ilka Brüggemann. Hamborger Wekenmarkten in'e Kries De Eerdbeersaison is vull in'n Gang – un ok Spargel un Rhabarber kann en noch köpen. Egens is dat en goden Tietpunkt, mal wedder op'n Wekenmarkt vörbitokieken. Dat Probleem aver is: Dorvun gifft dat jümmer weniger. Ok in Hamborg steekt de Markten in'e Kries. Wi weern mal op twee Wekenmarkten hier bi uns in'e Stadt ünnerwegens: in Willemsborg un op den Isemarkt in Harvstehuud. "Jungs un Deerns leest Platt" - De Leeswettbewarv vun'e Hamborger Scholen In'e verleden Weken, dor hett dat in ganz vele ünnerscheedlich Scholen in Hamborg Vörentscheden geven, wo de Kinner jümehr Lehrers un Mitschölers plattdüütsche Geschichten vörleest hebbt. De besten vun jüm, de sünd denn nochmal bi een Twüschenentscheed ween un de Kinner, de dor denn de Jury an'n allermeisten övertüügt hebbt, de sünd nu an'n tokamen Sünndag bi't grote Finale in't Ohnsorg-Theater mit dorbi. Wi hebbt mit Anke Hoyer snackt. Se is Referentin för Nedderdüütsch an'e Hamborger Scholen Moderatschoon: Jan Wulf

Ok dütmal hebbt wi bi "Wi snackt Platt" wedder ünnerscheedlich Themen ut de plattdüütsche Welt in Hamborg för Jo. Drapen vun Platt-Forschers in Hamborg Üm un bi 80 Wetenschoplerinnen un Wetenschoplers ut ünnerscheedlich Länner in Europa hebbt sik verleden Week hier bi uns in Hamborg to de 137. Johrsversammeln vun'n Vereen för Nedderdüütsche Spraakforschen drapen. Bi all de velen Vördrääg, de dat geev, is ok een Projekt vun'e Uni Hamborg vörstellt worrn, wo dat üm plattdüütsche Spraakerkennen dör KI geiht. Wi weern vör Oort un hebbt mit de Studentin Pia Borchers snackt, de dat Projekt an'n Dunnersdagvörmiddag vörstellt hett. Bavento hebbt wi uns mit Ingrid Schröder ünnerhalen. Se is Perfessersch för Nedderdüütsche Spraakforschen an'e Uni Hamborg un hett de Johrsversammeln vun'n Vereen för Nedderdüütsche Spraakforschen mit organiseert. Ohnsorg-Jugendclub speelt "Momo" vun Michael Ende Tokamen Dunnersdagavend, den 19.6., warrt dat spannend. Denn an düssen Avend fiert dat ne'e Stück vun'n Jugendclub vun't Ohnsorg-Theater Premieer. Ölben junge Lüüd twüschen veerteihn un twinnig Johr sünd denn op de Studio-Bühn vun't Ohnsorg-Theater to beleven. Speelt warrt dat Stück "Momo" na den bekannten Roman vun Michael Ende. "Wi snackt Platt"-Reportersch Marie-Sophie Koop hett vöraf mal bi en Proov vun'n Jugendclub vörbikeken. Ne'et Froens-Nettwark op Finkwarder Finkwarder Froenslüüd hebbt sik to dat „Frauen Aktiv Netzwerk Finkenwerder” tosamenslaten. Se wüllt Finkwarder "froens-fründlicher" maken. So schall dat in'e Tokunft op Finkwarder to't Bispeel ok mehr Straten geven, de na Froens nöömt sünd. Worüm dat de Finkwarder Froens bi ehr Arbeit nipp un nau geiht, dat hebbt se uns "Wi snackt Platt"-Reporter Bernhard Koch vertellt. Hör mal'n beten to-Klassiker vun Gerd Spiekermann Wat hebbt Ji as Kind geern eten? In uns "Hör mal'n beten to"-Klassiker ut dat Johr 1998 vertellt Gerd Spiekermann, wat he geern eten hett as he lütt weer - un wat nich! Moderatschoon: Jan Wulf

Bi "Wi snackt Platt" maakt wi düt mal en lütte Pingsttour mit Jo: wi sünd bi de Geesthachter Iesenbahnvereen to Besöök, wo een sik ok an'n Pingstsünndag wedder ole Damploks ankieken un dor ok mitfahren kann. Dorto vertellt wi Jo ok noch mehr över dat 125 Johrige Jubiläum vun'e Christuskark in't Othmarschen - un: dat geiht üm de ne'e Krimikummedie "Tiet is Geld - Jetzt oder nie" in't Ohnsorg-Theater. Wi weern för Jo mit bi de Premieer dorbi!  Moderatschoon: Jan Wulf

Bi "Wi snackt Platt" sünd wi dütmal mit een vun de letzten Finkarder-Elvfischers in'n Hamborger Haven ünnerwegens: Stefan Meier. Dorto besöökt wi ok noch dat Fisch-Spieslokal "Zur Post" in Cranz, wo dat ok hüüt noch frischen Fisch ut de Elv to eten gifft. Moderatschoon: Gerrit Hoss

Wenn de düütsche Bunnskanzler oder ok de Butenminister in't Utland ünnerwegens sünd, denn reist mehrstens ok en Dokter mit, de jümmers to Steed is, wenn dat de Politikers mal nich so goot geiht. De Dokters, de mitreisen doot, dat sünd ganz besünner Lüüd - un een vun jüm, dat is de Internist un Lungen-Speziaalist, man ok Musiker un Kabarettist Henning Kothe. Bi "Wi snackt Platt" vertellt he vun sien ne'en un opregend Job, de em ok al in de Ukrain un to de Papst-Inauguratschoon na Rom föhrt hett. Bavento hebbt wi noch twee Poetry-Slam-Geschichten vun Helge Albrecht för Jo - un wi wiest hen op twee plattdüütsche Gottsdeensten: an'n Sünndag, 25.5.2025, namiddags Klock 3 op'e Flussschipperkark - un an'n Sünndag, den 1. Juni 2025, morgens 9.30 in'e Michaelis-Kark in Hamborg-Neegroven, Cuxhavener Straat 323.

Bi "Wi snackt Platt" sünd wi dütmal op de Feltz-Warft op Finkwarder to Besöök, wi gralleert den Schauspeler Peter Heinrich Brix to'n 70. Geboortsdag un dat geiht üm en Verbrekerjagd to'n Mitmaken in'e Hamborger Spiekerstadt. Moderatschoon: Jan Wulf Mehr Infos op un över Platt ünner ndr.de/platt